Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

“EDITORIAL”, NJË KRYEVEPËR E MENDIMIT KRITIK, KRIJUES DHE PUBLICISTIK TË DALIP GRECËS

by

Sokol PAJA/

Libri “Editorial” që vjen para lexuesit nga editori i ndjerë i gazetës “Dielli” Dalip Greca, përbën një vlerë dhe risi të madhe në dokumentimin e mendimit kritik, krijues dhe publicistik të z.Greca. Ky libër përmbledh në vetvete një kontribut shkencor dhe publicistik rreth historisë së “Vatrës”, të “Diellit”, vatranëve, të patriotëve shqiptarë e veprimtarëve në mërgatën shqiptare të Amerikës. Nëpërmjet librit “Editorial” publiku i gjërë njihet në detaje rreth veprimtarisë memuaristike dhe publicistike të Editorit të Diellit 2009 – 2021 Dalip Greca, fazave në të cilat ka kaluar “Dielli”, “Vatra”, komuniteti shqiptar përgjatë drejtimit të “Diellit” nga z.Greca.

Me profesionalizëm dhe mjeshtri Dalip Greca e drejtoi “Diellin” për 12 vite dhe la gjurmë të pashlyshme në historinë e “Diellit”, Federatës Vatra e komunitetit shqiptar në Shtetet e Bashkuara të Amerikës. Dalip Greca ishte një gazetar me profil të lartë, kishte të zhvilluar një aftësi specifike të gazetarisë dokumentare. Nëpërmjet librit “Editorial” vijnë të paraqitura dhe të skalitura editorialet më me peshë në historinë 12 vjeçare të z.Greca që kanë mbajtur gjallë gazetën “Dielli”. Bien në sy shkrimet patriotike për Kosovën,Çamërinë, shqiptarët në trojet etnike e mërgatën në Shtetet e Bashkuara të Amerikës.

Nëpërmjet eksperiencës së tij të gjatë në media, libri “Editorial” i Dalip Grecës është një libër shumë i arrirë mediatik, publicistik dhe historik. “Editorial” padyshim është një libër që do u vlejë Fakulteteve të Gazetarisë në Shqipëri e Kosovë, studiesve e kërkuesve shkencorë në fushën e medias, shkencave humane, albanologjike e studiuesve shqiptarë në Universitetet e Amerikës. “Editorial” do të jetë një libër që do të na tregojë shumë histori dhe rrëfenja që me stilin që i shkruan Dalip Greca dhe mënyrën sesi ia ka ofruar publikut, tregohet shpirti i madh i Dalip Grecës si patriot, vatran, dokumentues, ekspert i lartë i çështjeve të trajtuara, njohës i shumë fushave dhe mbi të gjitha amanetqar i “Diellit” dhe “Vatrës”.

Falenderim dhe mirënjohje Federatës “Vatra” për botimin e librit “Editorial” që ashtu si me librin “Editorët e “Diellit” në 110 vite histori” përmbush një amanet të Dalip Grecës pas vdekjes për nxjerrjen në pah të krijimtarisë dhe kontributit të tij të lartë në Federatën “Vatra” dhe në gazetën “Dielli”. Falenderim special studiuesve Idriz Lamajt e Dr. Paulin Markut, vajzës së Dalipit Elisabeta Greca të cilët gjatë gjithë kohës ndihmuan në përgatitjen me korrektësi dhe profesionalizëm të lartë të këtij botimi. Mirënjohje redaktores Luljeta Xhediku dhe Adnan Mehmetit që dhanë një ndihmesë të veçantë në këtë botim.

Libri “Editorial” i Dalip Grecës në tematikat e trajtuara dhe kontributin publicistik e historik e bëjnë një vepër të shkëlqyer në historinë e medias shqiptare dhe të mërgatës Shqiptare në Shtete e Bashkuara të Amerikës. Libri “Editorial” i Dalip Grecës për nga mënyra e trajtimit të çështjeve, mënyrës së hulumtimit të fenomeneve, fakteve, dokumentave, analizës së fakteve, trajtimit dhe shfletimit të dokumenteve, perspektivës dhe vendosmërisë për t’iu shkuar deri në fund çështjeve që ngre, e bëjnë një botim me vlerë historike të patjetërsueshme në publicistikën shqiptare.

EDITORËT E DIELLIT NË 110 VITE HISTORI

by

Idriz Lamaj/

Folësit e mëparëshëm pasqyruan në detaje vlerat atdhetare dhe profesioniste të të ndjerit Dalip Greca, i cili pa dyshim do nxënë një vend të veçantë në historinë e Federatës Vatra, si editor i gazetës Dielli. Me fjalimet dhe kumtesat, me rastin e promovimit të dy veprave të tij, të botuara nga Vatra: EDITORËT E DIELLIT NË 110 VITE HISTORI dhe EDITORIALËT, e ndiejmë të gjithë vetën të nderuar.

Këtu do sjell dy-tre mendime personale, kush ishte Dalip Greca dhe si arriti këtë nderim dhe respektim të veçantë në rrethet e gjëra të vatranëve dhe të shqiptarëve të Amerikës. Dalipi kur erdhi në Shtetet e Bashkuara, ishte i njohur në Shqipëri si gazetar dhe përcjellës i shkathët i gjëndjes politike në atdhe, dmth, ai mori Diellin në dorë duke qenë i sigurt në qendrimet e tij atdhetare dhe intelektuale të pa lëkundshme. Të gjithë e dimë sa vështirë është me mbajt qendrim të pa lëkundur në shkrime, në kohë të ndryshimeve politike nga një sistem i egër komunist në një lloj demokracie të shthurur.

Sipas mendimit tim, Dalipi erdhi në këtë shkallë të lartë të respektit në sajë të ndershmërisë së trashëguar tradicionale familjare, të urtësisë dhe të solidaritetit të familjes Greca, dhe nga edukimi i tij shkollor që nga fëminia, si nxënës dhe student i shkelqyer. Në sajë të solidaritetit të tij familjar, ai emigroi këtu, solli familjen, dhe menjëherë familja e tij iu adaptua emigrimit me punë, edukim dhe mirësjellje si në rrethin familjar ashtu dhe në komunitetin tonë. Në sajë të këtij faktori, Dalipit i jepet mundësia ti përkushtojë veten Diellit dhe Vatrës. Ai prej ditëve të para në këtë vend, filloi të shkruante në gazetën Ilyria për historinë e shqiptarëve të Amerikës. Ndërsa, angazhimi i Dalipit për studimin e detajshëm të jetës dhe veprimtarisë të editorëve të Diellit, erdhi si brengë për harresën e kolegëve të tij në kohën që sot e quajmë moderne. Po të lexohen me kujdes faqet e studimit të tij për EDITORËT e DIELLIT, Dalipi e kthen lexuesin në vitet, vështirësitë dhe sakrificat e tyre, për krijimin dhe mbajtën gjallë të Vatrës dhe të Diellit. Lexuesi i sotëm i këtij libri, jo vetëm që njihet në hollësi me jetën dhe veprimtarinë e EDITORËVE të DIELLIT NË 110 VITE HISTORI, por njihet në hollësi edhe me të gjitha zhvillimet historike në trojet tona në Ballkan, dhe natyrisht këtu në Amerikë. Njihet me varfërinë, vuajtjet dhe sukseset tona kombëtare. Në secilin shkrim të tij gjenden paragrafe, fjali dhe copa shkrimesh të editorëve të Diellit, perla tërheqëse ndjenjash atdhetare, që lexuesin e kthejnë në kohën e tyre dhe e bëjnë krenar me kolegët e tij, me editorët e Diellit 114 vjetësh të vjetër. Me gjurmimin në imtësi të studimit të vet në jetën dhe veprimtarinë e editorëve të Diellit, ai thellohej për herë e më shumë në historinë reale të Vatrës dhe kohëve historike saj. Në këto studime pasqyrohehen valët e jetës së Diellit dhe të Vatrës, dhe të mërgimtarëve tonë të stabilizuar në këtë vend me vështirësi të pashpjegueshme.

Për botimin e këtij libri që mban në mbulesë emrin tim si përgatitës, shprehi falenderim dhe mirënjohje Vatrës, sepse Vatra finacoi botimin e historisë së vet reale. Për përgatitjen e librit: Për rënditjen, redaktimin e shikimin i secilës shkronjë e paragraf, falënderoj simotrën Elizabeta (Greca) Shehu, e cila është këtu midis nesh dhe rrin e heshtur. Urtësia dhe njerzillëku i saj gjatë përgatitjes së librit, shpesh herë më ka përmalluar dhe kthyer në kujtesën time sikur t’isha duke këmbyer mendime me Dalip Grecën, mikun tim të përjetëshëm.

Dalipin e kam pa shpesh herë të mërzitur, të lodhur, të dëshpëruar, ku shprehte vëllazërisht zhgënjimin e tij të gjithanshëm për negativitetin e reklamimeve të sotme përsonale, qoftë në radhët tona këtu në mërgim, qoftë në atdheun tonë etnik. Ai, gjatë bisedës i kalonte dhimbjet dhe streset e tij me shpresë për një të ardhme më të mirë dhe më të sinqertë midis nesh. Dalip Greca, mllefet e tij ndaj këtij negativiteti nuk ka munguar t’i shprehë në gazetën Dielli me një trajtim shumë të matur. Ai ishte i kujdesshëm kur shkruante, ose kur detyrohej të reagonte ndaj kritikave që i bëheshin Vatrës, Diellit, atij apo miqve të tij të ngushtë. Ai kontrollonte veten në mënyrë të çuditshme, por përgjigjen dhe qëndrimin e tij e jepte të qartë. Studimet, analizat dhe të gjitha shkrimet e Dalip Grecës dallohen për forcën e argumentit, kthjelltësinë e mendimit dhe thjeshtësinë e trajtimit.

MINISTRI KRASNIQI DHE 4 KRYETARË KOMUNASH NË KOSOVË VIZITUAN VATRËN

by

Sokol Paja/

New York, 28 Prill 2023- Federata Pan-Shqiptare e Amerikës VATRA u vizitua nga z.Elbert Krasniqi, Ministër i Administrimit të Pushtetit Lokal, z.Gazmend Muhaxheri Kryetari i Komunës së Pejës, z.Alban Hyseni Kryetari i Komunës së Gjilan, z.Qemajl Aliu Kryetari i Komunës Shtime dhe z. Ruzhdi Shehu Kryetari i Komunës Junik bashkë me stafet e tyre politike. Kryetari i Vatrës z.Elmi Berisha në fjalën e mirëseardhjes shpjegoi për miqtë rolin e Vatrës në historinë e kombit shqiptar dhe marrëdhëniet institucionale me shtetin e Kosovës. Presidenti i Nderit të Vatrës z.Agim Rexhaj në fjalën e tij shpjegoi për miqtë rolin e Vatrës e vatranëve në Amerikë dhe sidomos te lufta e Ushtrisë Çlirimtare të Kosovës dhe pavarësia e shtetit të Kosovës. Z.Elbert Krasniqi, Ministër i Administrimit të Pushtetit Lokal në fjalën e tij tregoi sukseset e shtetit të Kosovës dhe bëri thirrje për bashkëpunim më të fuqishëm të mërgatës për zhvillimin e Kosovës.
Z.Gazmend Muhaxheri Kryetari i Komunës së Pejës theksoi mbështetjen e Vatrës e mërgatës së Amerikës sidomos në vitin 1999. Z.Alban Hyseni Kryetari i Komunës së Gjilanit deklaroi se me anë të Vatrës rritet fuqia dhe mbështetja e mërgatës në dobi të çështjes së Kosovës dhe mirëqënies së popullit në Kosovë. Z.Qemajl Aliu Kryetari i Komunës Shtime tha se Vatra është historia më e lavdishme e kombit tonë. Ata na kanë udhëhequr në kohët më të vështira, sot kemi shumë nevojë për një tjetër mbështetje po kaq të rëndësishme e të fuqishme. Uashingtoni është Vatikani dhe Meka e kombit tonë, tha në fjalën e tij z.Aliu. Z. Ruzhdi Shehu, Kryetari i Komunës Junik theksoi se bashkëpunimi me organizatat patriotike në mërgatë është i domosdoshëm ku Vatra ka rolin e saj kryesor. Dr. Pashko Camaj në fjalën e tij theksoi rëndësinë e unifikimit të faktorëve shqiptarë për të mirën e kombit tonë. Z.Asllan Bushati në fjalën e tij u ndal te ndryshimet gjeostrategjike, ushtarake dhe politike në mbarë globin dhe kërkoi që gjithë shqiptarët të mbrojnë luftën e drejtë e të ndershme të Ushtrisë Çlirimtare të Kosovës. Z.Anton Raja theksoi se shqiptarët sot për sot duhet të punojnë më shumë për atdheun tonë. Z.Ilir Cubi si shqiptar i lindur në Amerikë u shpjegoi të pranishmëve ruajtjen e trashëgimisë dhe identitetit kombëtar në Shtetet e Bashkuara të Amerikës. Takimi u mbyll me dhuratat përkatëse simbolike dhe vazhdoi gjatë me biseda për të ardhmen e Kosovës e shqiptarëve në trojet etnike.
Vatra e Dielli i shprehin mirënjohje gazetarit Halil Mula për ndjekjen me profesionalizëm të aktivitetit patriotik.

VATRA PROMOVOI “FËMIJËT SHQIPTARË NË KOSOVË-VIKTIMA TË GJENOCIDIT SHTETËROR TË SERBISË”, HOMAZH DHE NDERIM

by

Sokol Paja/

New York, 27 Prill 2023 – Federata Pan-Shqiptare e Amerikës VATRA promovoi veprën “Fëmijët shqiptarë në Kosovë – viktima të gjenocidit shtetëror të Serbisë” një kryevepër dokumentare që denoncon dhe ekspozon krimet, vrasjet dhe torturat e serbëve mbi fëmijët shqiptarë në Kosovë. Me pjesëmarrjen e veprimtarëve të shquar të komunitetit shqiptar në Shtetet e Bashkuara të Amerikës, përfaqësues të shoqatave kryesore në Amerikë, mbrëmja promovuese ishte homazh, lutje dhe nderim për çdo fëmijë të vrarë në Kosovë në vitet 1981-1999 të dokumentuar me profesionalizëm nga Hanëmshahe ILAZI, Nusret PLLANA dhe Agim ALIÇKAJ. Editori i Diellit në fjalën prezantuese u shpreh se këto botime janë një kontribut historik për të dëshmuar të vërtetën e gjenocidit serb mbi shqiptarët. Faktet tregojnë barbarinë e regjimit fashist serb kundrejt luftës së drejtë, të pastër e të ndershme të Ushtrisë Çlirimtare të Kosovës. Ky libër është kontribut i çmuar për drejtësi kundrejt padrejtësisë shekullore ku luftëtarët e çlirimtarët gjenden në Hagë e kriminelët serbë në liri. Promovimi homazh filloi me shfaqjen e filmit : “Kush i vret fëmijët” dokumentar filmik i krimeve serbe mbi fëmijët shqiptarë në Kosovë. Kryetari i Vatrës z.Elmi Berisha i përlotur theksoi në fjalën përshëndetëse se ky promovim është një homazh për ëngjejt shqiptarë qu u vranë padrejtësisht prej regjimit serb. Prof. Nusret Pllana është intelektual i lartë, zëri i lirisë së Kosovës, zëri luftës krenare të UÇK. Agim Aliçkaj është një veprimtar i pandalshëm moralisht dhe kombëtarisht, përfaqësues i denjë mërgatës në përpjekje për çështjen kombëtare” theksoi kryetari i Vatrës z.Berisha. Imam Elez Osmani në fjalën e tij deklaroi se Prof. dr. Nusret Pllana është ndër të vetmit që është marrë edhe me gjenocidin serb ndaj fëmijëve shqiptarë të Kosovës. Në veprën e tij, ai ka shënuar me emër dhe mbiemër, me foto dhe me fjalë, tragjedinë e 1432 fëmijëve të Kosovës, të cilët do të ishin 1432 familje të së ardhmes së Kosovës dhe të shqiptarëve në përgjithësi. Pra, popullit shqiptar, i mungojnë nga tmerri i gjenocidit serb 1432 familje dhe askush deri sot nuk është përballur as me drejtësinë e shqiptarëve, as me atë botërore, theksoi z.Osmani. Bashkautori Agim Aliçkaj i emocionuar rrëfeu emocionet e rrugëtimit të librit, shpërndarjen e librit në Senat dhe Kongres, qendrat e mërgatës në Europë dhe deklaroi se SHBA është miku dhe aleati më i ndershëm dhe i vërtetë i kombit tonë, mirënjohje SHBA dhe homazhe fëmijëve të vrarë prej Serbisë. “Jam i impresionuar nga forca, fuqia dhe vendosmëria e Nusret Pllanës në denoncimin dhe ekspozimin e krimeve të Serbisë në Kosovë. Gjaku i krimit serb, gjaku i fëmijëve tanë nuk falet kurrë. Kërkojmë drejtësi, jo hakmarrje. Ne si komb nuk duhet të harrojmë kurrë” tha ndër të tjera z.Aliçkaj. Prof. Dr. Nusret Pllana deklaroi se vrasja e fëmijëve është dhimbja më e madhe e njerëzimit. “Barbarët serbë nuk mund ta zhbëjnë pavarësinë e Kosovës, nuk mund ta vrasin ardhmërinë tonë si shtet e si komb. Serbët kryen krime mizore e veprime shtazarake në Kosovë” tha ndër të tjera Prof.Dr. Nusret Pllana. Ai kërkoi më shumë mbështetje dhe përkrahje nga Institucionet e Shtetit të Kosovës në denoncimin e krimeve e gjenocidit serb mbi shqiptarët në Kosovë.

Harresa historike, servilizmi ndaj ndërkombëtarëve dhe bajraktarizmi nuk duhet të zënë vend në shoqërinë shqiptare dhe institucionet tona, këmbënguli Prof.Pllana. Ai shtoi se duhet mbështetje dhe bashkëpunimin kombëtar për të qenë një zë i fortë përballë propagandës shtetërore serbo-sllave. “Kërkojmë që të ndërtohet obelisku i fëmijëve të vrarë. Kurrë nuk do ta harrojmë gjakun e fëmijëve të vrarë. Mirënjohje mërgatës shqiptare në Amerikë e në Evropë për mbështetjen e sidomos z.Nazar Mehmetit në Teksas e secilit nga ju për mbështetjen” përfundoi fjalën e tij Prof.Dr. Nusret Pllana. Promovimi u mbyll me shpërndarjen e librit me nënshkrimin e autorit dhe një koktejl të dhuruar nga patrioti Toni Musaj. Lavdi përjetë luftëtarëve, çlirimtarëve, heronjve dhe dëshmorëve të lirisë së atdheut e kombit shqiptar.

DR. LUMNIJE KQIKU, SHKENCËTARJA SHQIPTARE NDEROHET SI “PERSONALITET NDERI ME MEDALJE TË ARTË” NË GRAZ TË AUSTRISË

by

Dr. Lumnije Kqiku, udhëheqëse e Klinikës Speciale të Endodoncionit dhe Traumatologjisë Dentare Prodekane për Studimet e doktoraturës ne seksionin e Stomatologjisë si dhe koordinatore për CEEPUS (Central European Exchange Program for University Studies) në një intervistë ekskluzive me Editorin e Diellit të Vatrës në New York, Sokol Paja, rrëfen emocionet e vlerësimit nga qyteti i Grazit të Austrisë për të arriturat shkencore si “Personalitet nderi me medalje të artë”, skanon situatën e shëndetësisë në Shqipëri dhe Kosovë, sfidat e mjekëve të rinj, botimet shkencore dhe angazhimet komunitare shqiptare në Graz të Austrisë.

DR. LUMNIJE KQIKU, SHKENCËTARJA SHQIPTARE NDEROHET SI “PERSONALITET NDERI ME MEDALJE TË ARTË” NË GRAZ TË AUSTRISË

Në jetën time profesionale kam marrë çmime shumë të rëndësishme duke filluar nga ato të nivelit nacional e më gjerë, përtej kufijve të Austrisë. Thjeshtë jam rritë me këto situata ku puna ime është shpërblyer maksimalisht. Çmimi i fundit që u nderova nga qyteti i Grazit të Austrisë për të arriturat shkencore “Personalitet nderi me medalje të artë”, është çmim që na nderoi të gjithëve dhe ia dedikojë familjes sime, prindërve të mi e sidomos Babait i cili më la këtë vit dhe e përjetova shumë rëndë ndarjen fizike të tij. Në këtë manifestim te ndarjes se çmimit të pranishëm ishin pothuajse gjithë qeveria e qytetit si dhe vet kryebashkiakja e Gracit Elke Kahr, e cila me këtë rast ka theksuar: “Mirënjohja është gjëja më e thjeshtë për të ju thënë faleminderit”. E thash që në karrierën time akademike jam nderuar me shumë çmime e mirënjohje por do të i veçoja: Mirënjohjen për të arriturat shkencore në karrierë dhe prezantim të Kosovës jashtë nga Drejtoria e Kulturës së Gjilanit dhe poashtu Mirënjohjen nga kryetari i Komunës së Gjilanit Lutfi Haziri për të arriturat shkencore sepse jam rritur në Gjilan. Pastaj nga shoqata e stomatologëve në Austri për disertacionin më të mirë në vitin 2005, një çmim që më ka dhënë vullnet të vazhdoj të merrem me shkencë edhe më tutje dhe po ashtu pata nderin të nderohem me Çmimin “Udhëheqja përmes Shembullit” nga Kolegji i Kirurgeve te Kosovës ne Kongresin e Dytë Klinik, të mbajtur në Prishtinë në Shtator 2022, çmim i cili i dedikohet veçanërisht mjekëve shqiptarë që jetojnë dhe punojnë jashtë vendit e të cilët kanë kontribuar dhe kontribuojnë për kirurgjinë në Kosovë.

NJË SHQIPTARE NË KLINIKEN DENTARE TË UNIVERSITETIT TË GRAZIT

Aktualisht jam e angazhuar në Kliniken Dentare të Universitetit të Grazit si ligjëruese e lartë për studentët e Mjekësisë së Përgjithshme, Stomatologjisë dhe studimeve postdiplomike, udhëheqëse e Klinikës Speciale të Endodoncionit dhe Traumatologjisë Dentare Prodekane për Studimet e doktoraturës ne seksionin e Stomatologjisë si dhe koordinatore për CEEPUS (Central European Exchange Program for University Studies). Punojë me shumë zell, dashuri e ndërgjegje etike. Projektet e mija janë afatgjata dhe ato i dedikohen shkencës dhe studimeve humane duke marrë pjesë në takime e konferenca të ndryshme. Ndryshe vështirësitë kanë qenë të shumta sepse është dashur punë, mund i madh e sakrificë e paparë për tu inkuadruar në botën shkencore e studimore të Grazit. Kuptohet që vetëmohimi im i ka tejkaluar këto barriera, por ato sigurisht që ishin vërtet delikate dhe rruga nuk ishte e lehtë.

NË SHQIPËRI E KOSOVË DUHEN INVESTIME NË SHËNDETËSI

Fatkeqësisht mendoj se largime të mjekëve do të ketë edhe në të ardhmen sepse mjekësia në shtetet shqiptare bukur lihet anash dhe nuk investohet aspak në kuadrot e dobishme për kombin. Kam pasur rastin të jem edhe në Ministrinë e Shëndetësisë si këshilltare e jashtme dhe kam para diferenca të shumta, ndërsa përkundër përkushtimit tejet të madhë të ministrit Prof.Dr. Rifat Latifi gjërat nuk ecnin sepse nuk qëndronte pas nesh qeveria në mbështetje. Intelektualët nuk ndalen me llafe e as me fjalime, ata duan investime në dijen e tyre që e arrijnë me shumë sakrifica. Megjithatë, shpresoj se projektet dhe punën e pa imagjinueshme që ka bërë Prof.Dr. Latifi, ta vazhdojnë të tjerët, pasi që të gjitha kanë të bëjnë me zhvillimin e sektorit të shëndetësisë dhe kushte e shërbime sa më të mira për qytetarët!

NË SHQIPËRI E KOSOVË KËRKOHEN REFORMA SHËNDETËSORE

E thash që çalimet kryesore janë tek qeverisja dhe menaxhimi jo adekuat, mungesa e pagave të dinjitetshme dhe mungesa poashtu e përgjegjësisë për të sjellur reforma shëndetësore në të gjitha nivelet. Mesazhi im për gjendjen aktuale në fushën e shëndetësisë në Shqipëri dhe Kosovë, është që qeveritë aktuale, të intervenojë urgjentisht në këtë sektor shumë të rëndësishëm, e që në pyetje është shëndeti i qytetarëve të vendit tonë. Deri më tani nuk është parë ndonjë mbështetje ose investim për sektorin e shëndetësisë.

NGA PROJEKTET SHKENCORE TE PUNA ME KOMUNITETIN SHQIPTAR NË AUSTRI

Edhe pse unë nuk kam shumë kohë të lirë për të qenë pjesë e te gjitha aktiviteteve që i dedikohen komunitetit shqiptar në Austri, megjithatë jam pjesë aktive dhe i përkrah në të gjitha punët e mira që bëhen për ata. Kontributi im zakonisht është në ngritjen profesionale, akademike dhe shkencore. Për mua si shkencëtare këto janë me prioritet të veçantë. Kam shumë botime qoftë të konferencave, simpoziumeve e intervista e detaje tjera në mediumet më prestigjioz dhe në platformat më të avancuara online këtu në Austri e botë.

MËRGATA SHQIPTARE NË AMERIKË ËSHTË THESAR YNI I PAZËVENDËSUESHËM

Mërgata shqiptare në Amerikë është thesar yni i pazëvendësueshëm. Ata janë, ishin dhe do të jenë përherë busulla dhe agjenda ku bëhen projektet dhe ndihmohet fati i shqiptarëve kudo në botë. E dua mërgatën shqiptare në Amerikë dhe i uroj vetëm suksese e punë të palodhshme në dobi të atdheut.