takime – Dielli

TAKIME TE PRESIDENTIT META NE SHBA

February 7, 2019 by dgreca

7 Shkurt 2019 Presidenti Meta takon Sekretarin e Shtetit Pompeo dhe Kryetaren e Kongresit Amerikan Pelosi

Uashington D.C., SHBA

Në vijim të vizitës së Tij në Uashington D.C., Presidenti i Republikës, Sh.T.Z. Ilir Meta mori pjesë sot në Mëngjesin e Lutjeve në prezencë të Presidentit të SHBA, Donald Trump, senatorëve, kongresmenëve, si edhe personaliteteve politike e fetare nga e gjithë bota.

Presidenti Meta u takua me Sekretarin e Departamentit të Shtetit, Mike Pompeo me të cilin bisedoi për partneritetin strategjik mes dy vendeve, sfidave të përbashkëta globale dhe veçanërisht për rolin e pazëvendësueshëm të SHBA-së për forcimin e sigurisë dhe stabilitetit në rajonin e Ballkanit.

Presidenti Meta pati gjithashtu një takim miqësor me Kryetaren e Kongresit Amerikan, znj. Nancy Pelosi, të cilën e uroi për zgjedhjen e saj në këtë detyrë të rëndësishme duke nënvizuar rolin e rëndësishëm që Kongresi Amerikan ka në mbështetjen e Shqipërisë dhe promovimin e demokracisë dhe shtetit të së drejtës.

7 Shkurt 2019 Presidenti Meta pritet nga Kongresmeni amerikan, z. Robert Aderholt

Në vijim të vizitës së Tij në Uashington D.C, Presidenti i Republikës Sh.T.Z Ilir Meta, i shoqëruar edhe nga delegacioni parlamentar i Shqipërisë, u takua me Kongresmenin Robert Aderholt, anëtar i Komitetit Amerikan të Helsinkit dhe bashkëkryetar i grupit të miqësisë SHBA-Shqipëri.

“Për shqiptarët, SHBA janë dhe do të mbeten partneri kryesor strategjik. Marrëdhëniet mes dy vendeve kanë një rëndësi jetike për ne”, – nënvizoi Presidenti Meta.

Kreu i Shtetit shprehu mirënjohjen për mbështetjen e SHBA në përpjekjet e Shqipërisë për konsolidimin e demokracisë dhe shtetit ligjor, për anëtarësimin në NATO, si dhe për përmbushjen e aspiratës euro-atlantike.

“Është e domosdoshme, – theksoi Presidenti Meta, – nevoja e një angazhimi edhe më të vendosur të SHBA në rajonin tonë, si një garanci për të gjithë investimin amerikan, por edhe si ndihmesë e pazëvendësueshme për finalizimin me sukses të marrëveshjes përfundimtare mes Kosovës dhe Serbisë”.

Kongresmeni Robert Aderholt siguroi Presidentin Meta për angazhim të pandalur për forcimin e arritjeve në Ballkanin Perëndimor falë përkushtimit konstant të SHBA për paqen, lirinë dhe stabilitetin.

7 Shkurt 2019 Presidenti Meta takohet me Kryetarin e Komisionit për Politikën e Jashtme në Kongresin Amerikan, Eliot Engel

Uashington D.C., SHBA

Presidenti i Republikës Sh.T.Z. Ilir Meta u prit në Kongresin Amerikan nga Kongresmeni, Eliot Engel, njëkohësisht Kryetar i Komisionit për Politikën e Jashtme.

Presidenti Meta falënderoi Kongresmenin Engel për rolin e tij të pazëvendesueshëm, jo vetëm në forcimin e marrëdhënieve shqiptaro-amerikane, por veçanërisht për angazhimin e tij të pakursyer për çështjen shqiptare në momentet më të vështira historike për kombin, çlirimin e pavarësinë e Kosovës dhe anëtarësimin e Shqipërisë në NATO.

Presidenti Meta shprehu besimin se z. Engel do të vijojë angazhimin e tij për të ndikuar në një vëmendje më të madhe të administratës amerikane, jo vetëm në raportet dypalëshe, por veçanërisht në sfidat euro-atlantike që po kalon rajoni.

“Një vëmendje e veçantë duhet të përfshijë Kosovën, që ndodhet në një moment të rëndësishëm për finalizimin e një marrëveshjeje me Serbinë, që do të jetë e qëndrueshme, afatgjatë dhe do të sjellë siguri dhe stabilitet në rajon”, – u shpreh Presidenti Meta.

Kongresmeni Eliot Engel siguroi Presidentin Meta për angazhimin e tij të vazhdueshëm për forcimin e arritjeve të derisotme në rajon falë përkushtimit të SHBA për paqen dhe lirinë.

Delegacion me perfaqsues te SHBA, vizituan Shqipërinë

May 11, 2017 by dgreca

Delegeciaoni amerikan realizoi takime me Presidentin Bujar Nishani, presidentin e zgjedhur Ilir Meta, Ministrin e Jashtëm Ditmir Bushati dhe kreun e opozitës Lulzim Basha./

unnamed unnamed (1)

Një delegacion me anëtarë të Dhomës së Përfaqësuesve të Shteteve të Bashkuara, udhëhequr nga kongresmeni Bob Goodlatte, kreu një vizitë në Shqipëri të mërkurën, gjatë së cilës nënvizuan partneritetin strategjik midis ShBA dhe Shqipërisë, rëndësinë e reformës në drejtësi për vendin, dhe çështje rajonale. Përfaqësuesit Steve King, Matt Gaetz, Dave Trott, David Cicilline, dhe Peter DeFazio iu bashkuan Z. Goodlatte, i cili shërben si Kryetar i Komitetit të Drejtësisë të Kongresit, gjatë takimeve me Presidentin Bujar Nishani, presidentin e zgjedhur Ilir Meta, Ministrin e Jashtëm Ditmir Bushati dhe kreun e opozitës Lulzim Basha.

Anëtarët e delegacionit i nxitën të gjitha palët për t’u bashkuar dhe për të zgjidhur mosmarrëveshjet e tyre, si dhe për të vazhduar punën e vështirë të demokracisë. Ata nënvizuan rëndësinë e zbatimit të reformës në drejtësi, forcimit të zbatimit të ligjit, si dhe theksuan rëndësinë që partitë të marrin pjesë në procesin demokratik.

A delegation of Members of the U.S. House of Representatives, led by Congressman Bob Goodlatte, visited Albania on Wednesday, where they highlighted the U.S.- Albania strategic partnership, the importance of the country’s judicial reform, and regional issues. Representatives Steve King, Matt Gaetz, Dave Trott, David Cicilline, and Peter DeFazio joined Goodlatte, who serves as the chairman of the House Judiciary Committee, in meetings with President Bujar Nishani, President-elect Ilir Meta, Foreign Minister Ditmir Bushati, and Opposition Leader Lulzim Basha.
The members of the delegation urged all parties to come together and work out their differences and continue the hard work of democracy. They stressed the importance of implementing judicial reform, strengthening the rule of law, and also emphasized the importance of parties participating in the democratic process.

Sipas njoftimit zyrtar te Ambasades se SHBA

zv/Sekretari Hoyt Yee në Shkup, takon krerët e partive shqiptare

April 30, 2017 by dgreca

Zv.ndihmëssekretari amerikan i Shtetit, Hoyt Brian Yee, i cili po qëndron për vizitë dyditore në Maqedoni, takimet i ka nisur me drejtuesit e partive politike shqiptare – me kryetarin e BDI-së, Ali Ahmeti, atë të lëvizjes Besa, Bilall Kasami, përfaqësuesin e Aleancës për Shqiptarët, Vesel Mehmedi, si dhe kryetarin e PDSH, së Menduh Thaçi.

Nga këto takime, siç bëhet e ditur nuk do të ketë prononcime për mediet nga zyrtari i lartë amerikan, i cili të hënën pritet të takojë presidentin Gjorge Ivanov, kryetarin e Kuvendit, Talat Xhaferi dhe kryetarët e LSDM-së, Zoran Zaev dhe të VMRO DPMNE-së, Nikolla Gruevski.

Pas takimit me zv.ndihmës sekretarin amerikan të Shtetit, Hoyt Brian Yee, kryetari i BDI-së, Ali Ahmeti ka thënë se Maqedonisë si asnjëherë më parë i duhet stabilitet dhe se procest duhet të vazhdojnë pavarësisht kundërshtimit të VMRO-së dhe akteve të dhunës.

Ahmeti tha se nga diplomati amerikan ka marrë mbështetjen në proceset e nisura dhe zgjedhjen e kryetarit të ri të Kuvedit, Talat Xhaferi.

“Maqedonisë në këtë situatë më së shumti i duhet stabiliteti, i duhet që proceset të zhvillohen në rrugë të mbarë, i duhet që institucionet të funksionojnë. Sigurisht që kthim pas nuk ka nga të gjitha këto zhvillime, nëse ne nuk vetëdijësohemi, sigurisht që i dobësojmë të gjithë qytetarët e Maqedonisë. Të pranohet ky realitet i ri, zgjedhja e kryetarit të Parlamentit të mbështetet edhe nga ato forca që kontestojnë zgjedhjen e Xhaferi, si kryetar të Kuvendit sepse emërimi i tij është bërë në rrugë ligjore dhe legjitime”, ka theksuar Ahmeti.

Ai tha se BDI-ja nuk do të pranojë pjesëmarrjen në seancat e Kuvedit të thirrura nga Trajko Veljanovski, pasi siç tha, ai nuk ka të drejtë morale e as ligjore të thërras seancë, sepse nuk ka shumicë parlamentare.

Në fokus të takimeve është kriza politike, e cila u përshkallëzua në dhunë si pasojë e ndërhyrjes së protestuesve në Kuvend kundër zgjedhjes së kryeparlamentarit dhe formimit të qeverisë nga shumica e re parlamentare.

Fizikisht ata sulmuan shumë deputetë të LSDM-së dhe më së keqi i pësoi lideri i partisë, Zoran Zaev, kandidat për kryeministër. Në mesin e të rrahurve është edhe Zijadin Sela nga Aleanca për Shqiptarët, i cili ende vazhdon të trajtohet në spital.

Njohësit e çështjeve ndërkombëtare besojnë në ndërhyrje më të fuqishme nga SHB-ja kundër atij që e quajnë regjim të Gruevskit për të parandaluar skenarë të tjerë që mund të destabilizojnë Maqedoninë drejt një konflikti edhe ndëretnik.

“VMRO DPMNE-ja e Nikolla Gruevskit do të tentojë të përdorë forma të ndryshme për ta penguar funksionimin e kryeparlamentarit, mirëpo shpresoj se tani ndërkombëtarët, e në veçanti SHBA-ja do të përdorë instrumente më efikase për ta neutralizuar apo izoluar nga veprimi i mëtejmë destruktiv që mund të jetë edhe më i rrezikshme për stabilitetin e vendit”, thotë Ismet Ramadani, drejtues i Këshillit Euroatlantik të Maqedonisë.

Ai thekson nevojën e veprimit sa më të shpejtë të kryeparlamentarit Xhaferi dhe të shumicës parlamentare për formimin edhe të qeverisë. Ai thotë se kreu i Kuvendit duhet t’i nisë një letër presidentit Ivanov me kërkesën për mandatimin e Zaevit për kryeministër dhe nëse këtë nuk e bën, atëherë sipas tij, shumica parlamentare duhet vetë që të zgjedhë edhe qeverinë e re.

Ish-kryetari i Kuvendit, Stojan Andov, thotë për Radion Evropa e Lirë, se zgjedhja e Talat Xhaferit për kryeparlamentar, është legjitime dhe se ai duhet të vazhdojë me hapat tjerë për zgjedhjen e qeverisë. Andov thotë se ajo që ka ndodhur në Maqedoni me sulmin ndaj deputetëve të Kuvendit, nuk ka ndodhur në asnjë vend tjetër të botës.

“Kryetar të Kuvendit zgjedh vetëm shumica parlamentare dhe askush tjetër. Çdo pretendim tjetër se populli duhet të vendosë për zgjedhjen e kryeparlamentarit, është qesharak dhe me qëllim të caktuar. Talat Xhaferi ka marrë shumicën e votave dhe ai tani duhet të ndërmarrë të gjitha veprimet për formimin sa më të shpejtë të qeverisë”.

“Gjithashtu, duhet të ndërmerren të gjitha procedurat e nevojshme për nxjerrjen para drejtësisë të atyre që lejuan ushtrimin e dhunës ndaj të zgjedhurve të popullit. Kjo është e patolerueshme dhe besoj se jemi shteti i vetëm, në të cilin ka ndodhur diçka e tillë. Si kryeparlamentar, në tre mandate kam parë raste kur janë rrahur deputetët mes vete, por asnjëherë që brenda Kuvendit të hyjnë njerëz dhe t’i rrahin deputetët. Kjo ishte e tmerrshme”, tha Andov duke besuar në ndihmën edhe të faktorit ndërkombëtar për kapërcimin sa më të shpejtë të krizës.

Arsim Sinani, njohës i çështjeve politike, konsideron se gishti duhet drejtuar nga presidenti Ivanov, i cili është një nga pengesat kryesore për zgjedhjen e qeverisë.

Sinani thotë se lajmi se zv.ndihmëssekretari amerikan i Shtetit, Hoyt Brian Yee do të takohet edhe me presidentin Ivanov, është sinjal i mirë, duke marrë parasysh se kreu i shtetit më parë kishte refuzuar të takohet me zyrtarë të lartë nga Brukseli.

“Mendoj se Hoyt Yee do të jetë i vendosur që të vazhdohet më tutje dhe tani pas zgjedhjes së kryetarit të Kuvendit të Maqedonisë, të zgjidhet edhe qeveria e re që do të drejtohet nga Zoran Zaev e cila do ta nxjerr vendin nga kriza, në të cilën e ka çuar Nikolla Gruevski”, thotë Sinani.

Ditë më parë ambasadat e huaja në Shkup dënuan ashpër dhunën ndaj deputetëve duke kërkuar zbardhjen e rastit dhe dënimin e autorëve.

“Sulmi ndaj një institucioni shtetëror, i cili paraqet zemrën e demokracisë, është sulm ndaj vetë demokracisë. Presim që këto vepra penale të hetohen në mënyrë sa më të shpejtë dhe organizatorët e autorët e sulmit të sillen para drejtësisë”, thuhej veç tjerash në deklaratën e përbashkët të delegacionit të BE-së, Ambasadës Amerikane, misionit të OSBE-së dhe zyrës së NATO-s.

TAKIME TË DR. BARDH SPAHIA NË SHBA

June 15, 2016 by dgreca

Dr. Bardh Spahia, Shef i Departamentit të Emigracionit dhe Diasporës pranë Partisë Demokratike Shqiptare realizoi takime në Nju Jork, Nju Xhersi dhe Washington./

Ne Foto:Dr.Spahia u takua edhe me kryetarin e bashkisë të qytetit Cliffside Park të shtetit të Nju Xhersit,z.Thomas Calabrese. Në këtë qytet do të hapet një zyrë e Partisë Demokratike Shqiptare./

Dr. Bardh Spahia, Shef i Departamentit të Emigracionit dhe Diasporës pranë Partisë Demokratike Shqiptare gjatë vizitës së tij në SHBA bëri takime me komunitetin shqiptar, por edhe me personalitete amerikane. Një takim interesant ishte ai që Dr. Bardh Spahia realizoi në qytetin Cliffside të Nju Xhersit. Dr.Spahia u takua me kryetarin e bashkisë të qytetit Cliffside Park të shtetit të Nju Xhersit. Në këtë qytet jeton një komunitet i madh shqiptarësh, të cilët i kanë dhënë mbëshetjen e tyre zotit Thomas Calabreze. Kryebashkiaku Calabrese është banor i hershëm i Cliffside Park. Ai, para se të merrte postin e Majorit, ka shërbyer në Këshillin Borough Cliffside Park, që nga viti 2001. Ai gëzon mbështeteje të madhe ngase punon shumë për qytetarët dhe ka sjellë shumë programe për komunitetin, veçanërisht për të rinjët. Ai është popullor ndoshta edhe pse ka një karrierë të pasur sportive si lojtar dhe si kapiten, ku në vitin 1979 udhëhoqi ekipin në finale. Ndoshta kjo i ka dhënë popullaritet por edhe angazhim për të sjellë progarme për rininë.Ai banon në Oncrest Terrace me zonjën e tij, Donna, dhe fëmijët e tyre, Nina dhe Thomas.

Kryetari i Bashkisë e priti në zyrën e tij mysafirin nga Shqipëria, duke treguar respekt dhe ngrohtësi. Thomas Calabrese i foli dr. Bardhisë Spahia për mbarëvajtjen e qytezës, për programet dhe projektete e kryera dhe ato të së ardhmes.

Në këtë takim dr. Spahia u shoqërua nga biznesmeni i njohur dhe aktivisti i palodhur i komunitetit shqiptar z. Bedri Lita, i cili e njeh mjaft mirë këtë qytet ,pasi jeton prej 20 vitesh në këtë qytet. Gjatë takimit, z. Spahia shprehi dëshirën e hapjes së një zyre të Partisë Demokratike në Amerikë, për përfaqesuesit e kësaj partie. Për këtë projekt është gjetë mirëkuptim. Zoti Bedri Lita i ka ofruar mbështetjen z Spahia. Kështuqë këtë zyrë do t’a mundësojë z.Bedri Lita për të gjithë simpatizantet e Partisë Demokratike, që dëshirojnë të bejnë takime për të kontribuar për zgjedhjet e ardhshme në Shqipëri. Në fakt kjo zyrë tanimë është e hapur, dhe pritet shumë shpejt inagurimi i saj.

Një takim interesant i zotit Spahia ishte ai që zhvilloi në Washington. Dr. Spahia krahas takimeve të tjera në Washington, realizoi edhe një takim të ngrohtë me ish ambasadorin amerikan në Tiranë z. William Rayerson, i cili mbetet një figurë e dashur dhe e njohur për rolin e tij gjatë viteve më të vështira të ndryshimit të sistemit prej shqiptarëve. Ai ishte ambasadori i parë që i dha mbështetje të jashtzakonshme triumfit të Demokracisë. Takimi tyre ishte miqësor, duke u nisur dhe nga fakti , që i ndjeri Ali Spahia, i ati i Bardhit me ambsadorin Rayrason gezonin marrdhënie të shkelqyera miqësore asokohe. Madje ambasadori tha fjalë të ngrohta për të ndjerin Dr. Ali Spahia dhe kontributin e tij në proceset demokratike.

Takim i veçantë ishet edhe që Dr. Bardh Spahia zhvilloi me Senatorin e Shtetit të Nju Jorkut, zotin Marty Golden, i cili e priti me dashamirësi të madhe dhe zhvilloi me të një bisedë të ngrohtë. Kur Senatori Golden u njoh me backgraundin e dr.Bardhit, edhe si mjek, po edhe si përfaqësues i një brezi të ri në Politikën Shqiptare, tha se ai e vlerësonte shumë afrimin e këtij brezi. Senatori tha se figura të tilla dinjitoze duhet të bëhen pjesë e partive politike në Shqipëri.

– Një figurë e tillë, dinjitoze dhe teper solide, i duhet nëj Partie Politike, konkretisht dhe Partisë Demokratike, që ju përfaqësoni, pasi njerez me kapacitet e vlera, jo vetem qytetare por dhe intelekti, i duhen skenes politike, tha Senatori.

Senatori Marty Golden e ka ftuar dr. Spahinë edhe në takime të tjera duke e quajtur një mik të mirë, që shqiptaret por dhe partia e tij, duhet të jetë krenare për z Spahia, që i përfaqëson në menyren më të mirë, siç i ka hije një shqiptari me vlera e vyrtyte.

Një tjetër takim interesant ishte edhe ai që Dr. Bardh Spahia realizoi me bashkombasin z. Mark Gjonaj. Natyrisht që kurrësesi nuk mund të mungonte një takim me Asambleistin e njohur tashmë për shtetin e Nju Jork-ut, si i pari shqipat në një nivel kaq të lartë, z. Mark Gjonaj. Në një takim miqësor ata ndanë dhe shkëmbyen realitetin por dhe ide mbi të ardhmen e afërt politike.

Takimi e pare dr. Bardh Spahia e pat kryer ne VATER, që në ditën e parë, me 1 Qershor 2016, sapo ai mbërriti në Nju Jork. Kryetari i Vatrës dr. Gjon Buçaj, i ka uruar mirëseardhjen dhe e ka njohur me qëndrimet dhe veprimtaritë e Vatrës, veçanërisht për Çështjen Kombëtare. Dr. Buçaj u ndal gjatë në situatën politike shqiptare në trojet Kombëtare, por edhe në qëndrimet e Vatrës për çështjen “Çame” dhe marrdhëniet me fqinjin Jugor, që ende nuk e sheh realisht zgjidhjen e problemit çam, duke pretenduar mosegzistenën e një gjenocidi të dokumentuar, ndërkohë që këmbëngul për ndërtimin e varrezave greke në tokën shqiptare, një kërkesë e padrejtë për një ushtri që ka shkelë tokën shqiptare dhe në vend që t’i tërheqë eshtrat e ushtarëve pushtues(Siç kanë vepruar edhe shtetet e tjerë si Itali, Gjermania etj.), kërkon që t’i kthejë ata në heronjë në tokën shqiptare të pushtuar prej tyre. Problemet me palën kundërshtare të luftës Italo-Greke, diplomacia dhe shteti helen duhet t’i zgjidhë me italianët dhe jo me shqiptarët. Mosnjohja e çështjes çame, apo moslejimi i kthimit të çamëve në shtëpitë dhe pronat e tyre, mbajtja e një Ligji absurd të Luftës me një vend fqinj, që është anëtar aktiv i NATO-s dhe aspiron BE-në, duket më shumë se Paradoks. Traktati i Miqësisë Shqiptaro-Greke, tha dr. Buçaj, nuk i ka zgjidhur problemet e mbetura pezull mes dy vendeve.
Dr. Bardh Spahia falenderoi për pritjen e ngrohtë që i rezervoi Vatra dhe tha se ndjehej shumë mirë që vizitonte këtë Tempull Historik Kombëtar. Ndjehem mirë edhe për faktin, se babai im i ndjerë , Dr. Ali Spahia, ruante respekt e nderim për Vatrën dhe vatranët ( I ndjeri Dr. Ali Spahia, deputet, ish nënkryetar i Partisë Demokratike dhe kryetar i grupit parlamentar të PD-së ndërroi jetë në Pavia(Itali) me 13 tetor të vitit 2000). Spahia ishte anëtar i komisionit të jashtëm parlamentar të Shqipërisë, si edhe kryetar i delegacionit shqiptar në Këshillin e Europës në Strasburg. Pas vitit 1997 ai ishte anëtar i Këshillit Kombëtar të PD-së dhe kryetar i Departamentit të të Drejtave të Njeriut të PD-së.Më pas dr. Bardh Spahia trajtoi problemet e Deparatmentit të emigracionit dhe të Diasporës, dhe parashtroi programin e Partisë Demokratike. Këtij qëllimi, tha ai, i shërben edhe kjo vizitë si dhe takimet në Nju Jork, Nju Xhersi, Ëashington, Chikago etj. Jo rastësisht kontaktin e parë e bëmë me Vatrën e shqiptarëve të Amerikës, theksoi ai.
Editori i Diellit i njohu mysafirët me historinë e Federatës Panshqiptare të Amerikës “VATRA dhe Gazetës 107 Vjeçare “Dielli” përmes ekspozitës fotografike” 100 vitet e Vatrës në Shërbim të Kombit” dhe përmes dokumentave arkivore.
Në takim ishin të pranishëm edhe zv/kryetari i Vatrës Asllan Bushati dhe vatrani veteran Zef Përndocaj.
Mysafiret i dhuruan kryetarit te Vatres shtatoren e Nene Terezes.(Korresp. i Diellit)

Drejtuesit e minoritetit grek kontakte me ushtarakë të lartë të ushtrisë greke

May 22, 2015 by dgreca

Ja kush janë gjeneralët grek që kanë lëvizur në Shqipëri/
Nga Arben LLALLA/
Prej disa vitesh trupat paraushtarake greke të grupuar në organizata të ndryshme kanë hyrë disa herë në Shqipëri si në Polenë, Korçë, Pogradec dhe në tërë jugun. Vetëm në 10 muajt e fundit ish-ministri i mbrojtjes dhe ish-Shef Shtabi i Ushtrisë greke për disa vite Frangos Frangulis ka hyrë me rroba civile dy herë në Shqipëri. Dy herë brenda 10 muajve ka hyrë edhe ushtaraku i lartë i pensionuar Andonios L. Vasileos.
Frangos Frangulis ka lindur në Komotini, në një vend të Greqisë ku banojnë myslimanë me origjinë turke, shqiptare dhe pomake. Për shumë vite ai ka qenë Atashe Ushtarak në Turqi. Frangos Frangulis nga viti 2009 deri më 2011, ishte Shefi i Shtabit të Përgjithshëm të Ushtrisë Greke. Në Dhjetor 2011, ai u paraqit në Gjykatë për të dhënë dëshminë si Shefi i Shtabit të Përgjithshëm të Greqisë për 39 ushtarët grek të cilët gjatë paradës ushtarake më 25 Mars 2010 kënduan këngë raciste ndaj shqiptarëve, turqve dhe emigrantëve të huaj që punojnë dhe jetojnë në Greqi. Ka qenë vetëm një muaj Ministër i Mbrojtjes së Greqisë, 12 Maj-12 Qershor 2012. Pasi u lirua nga rroba ushtarake gjenerali në pension, Frangos Frangulis filloj të marrë pjesë në aktivitetet që organizonin shoqatat ekstremiste greke dhe të minoritetit grek me temë aneksimin e jugut të Shqipërisë. Frangulis ka vizituar disa herë jugun e Shqipërisë këto muajt e fundit. Nuk dihet se në çfarë cilësie një ushtarak i lartë i Greqisë dhe që mban ende Ligjin e Luftës lëviz në zona ku jeton minoriteti grek me shqiptarët në paqe?
Frangos Frangulis gjatë vizitave në Shqipëri është takuar edhe me drejtuesit më të lartë të shoqatave dhe të minoritetit grek.
Më 17 Maj 2015, në përvjetorin e 101 të aneksimit të Jugut të Shqipërisë, kryetari i OMONIA Leonidha Papa në Delvinaq, afër kufirit greko-shqiptar bëri një takim me Andonios L. Vasileos, i cili ka patur detyra të larta në Ministrinë e Mbrojtjes së Greqisë si shef i zyrës së klasit parë në Shtabin e Përgjithshëm. Vasileos është ekspertë i lartë i programeve kompjuterike dhe i hartimit të kufirit detar. Për katër vite ai ka udhëhequr prezantimet për çështjet kufitare detare. Ka qenë dhe koordinator për siguri dhe menaxhim të krizave në Institutin për studime gjeopolitike. Jeton dhe vepron në Janinë. Ekzistojnë të dhëna se Andonios Vasileos ka vizituar jugun e Shqipërisë të paktën dy herë brenda vitit 2014-2015.
Të gjithë këto aktivitete të ushtarakëve të lartë grek nuk bëhet për të çliruar Vorio Epirin, por për të provokuar një luftë të kontrolluar në jug me qëllim që të hyjnë forcat ushtarake ndërkombëtare dhe më tej Greqia të ketë dorën e lirë për të grabitur rreth 300 miliard euro rezerva nafte dhe gazi natyror që gjenden në detin Jon, pjesë që i takojnë Shqipërisë.

LUFTË PËR DETIN JON
Revista greke e shtatorit 2011, “Bilanci ushtarak dhe gjeopolitika”, shkruan me shkronja të mëdha: “Luftë në Jon, operacioni ‘Skenderbeis’”. Autor i këtij shkrimi është Joani S. Theodhoratu, i cili shkruan për interesat strategjike në detin Jon dhe Adriatik, ku ka rezerva të mëdha gazi, nafte dhe kalimi i tubacioneve që do të furnizojë Europën për shumë vite. Revista i kushton 10 faqe marrëveshjes së kufirit ujor midis Shqipërisë dhe Greqisë. Autori thotë se interesat e Greqisë për këtë zonë po pengohen nga ana e turqve, që tashmë kanë një aleancë ushtarake afatgjatë me Shqipërinë.
Si pasojë e mosfunksionimit në detin Jon e marrëveshjes së Greqisë me EEZ për nxjerrjen e gazit dhe naftës mund të kalohet në një konflikt ushtarak midis Greqisë dhe Shqipërisë. Edhe pse Greqia ka potencial ushtarak të fuqishëm ndaj Shqipërisë, grekët janë të bindur se Turqia do ta sulmonte Greqinë për interesat e saj në këtë rast. Autori ndër të tjera shkruan për stërvitjet e përbashkëta ushtarake midis Shqipërisë dhe Turqisë, duke shfaqur shqetësimet e Athinës, e cila prej 20 vitesh strehon mijëra shqiptarë emigrantë ekonomikë dhe është një nga investitorët kryesorë në Shqipëri.
Rezervat e naftës dhe gazit
Në studimin e tij, gjeologu dhe ekonomisti i energjetikës greke dr. Kostandinos A. Nikolas, ka shkruar se në detin Jon, Qipro dhe Kretë gjenden rezerva nafte dhe gazi natyror. Gazeta “Avriani” shkruante se Greqia mund të përfitojë afro 700 miliardë euro me nënshkrimin e marrëveshjes me EEZ. Nikolas kërkon të bëhen hetime në këto zona detare për burimet e hidrokarbureve. Shkencëtari në fjalë bën një pasqyrë historike të problemeve të Greqisë me kufirin detar që ka ndër vite të pazgjidhur me Shqipërinë, Turqinë, Libinë, Egjiptin, ndërsa me Italinë e ka zgjidhur në vitin 1978. Sipas tij, më 1994-n Shqipëria dhe Greqia ishin shumë afër për ta zgjidhur çështjen e kufirit detar, por autoritetet shqiptare nuk lëshuan pe, ishin më të ashpra dhe Greqia nënshkroi që blloku i zonës 5 Hamilton në detin Jon t’i takojë Shqipërisë. “Pas 15 vitesh Greqia mundi të nënshkruante një marrëveshje të re me qeverinë shqiptare për zonën 5 afër ishullit të Korfuzit, por Gjykata Kushtetuese e Shqipërisë e rrëzoi këtë marrëveshje”, shkruan dr. Kostandinos sa i përket kufirit detar me Shqipërinë.