Këshilli Bashkiak i Tiranës me konsensus, ka arritur t’i japë fund ngërçit disa mujor. Me konsensus, anëtarët e Këshillit Bashkiak kanë vendosur që kryetari i këshilltarëve të PS, t’i nënshtrohet votimit për rikonfirmimin si kryetar i Këshillit Bashkiak të Tiranës, pas dorëheqjes të ish-kryetarit Njazi Kosovrasti. Pas diskutimeve që zgjatën disa minuta, Këshilltarët e majtë dhe të djathtë ranë dakord që në mbledhjen e sotme të miratohej një rend dite i shkurtuar, që kishte të bënte me konfirmimin e mandatit të zotit Gazmend Dibra si këshilltar i Bashkisë së Tiranës dhe konfirmimin e Aldrin Dalipit në postin e kryetarit të Këshillit Bashkiak.
Pozicionimin në karrigen e kryetarit të Këshillit Bashkiak pas rikonfirmimit me 32 vota pro, Dalipi e shfrytëzoi fillimisht për një ndjesë ndaj banorëve të kryeqyetit për bllokimin e punës së këtij këshilli. Ai i garantoi anëtarët e Këshillit dhe qytetarët se primare në funksionimin e këtij këshilli do të jetë zbatimi i ligjit dhe Kushtetutës.
“U kërkoj ndjesë qytetarëve të Tiranës, në emër të kujtdo që e mbajti peng këtë këshill. Kemi humbur shumë kohë. Dua të filloj menjëherë nga rendi i ditës, kam një propozim mbi tavolinë të ardhur nga kryetyari i Bashkisë për një shtetës fondi në buxhetin e njësisë bashkiake numer 11 për dhënien e një ndihme financiare familjeve të dëmtuara nga përmbytja e datës 16.10.2013” tha Dalipi.
Arritjen e konsensusit në Këshillin Bashkiak e ka përshëndetur edhe kryetari i Bashkisë së Tiranës, zoti Lulzim Basha. Kreu i Bashkisë së Tiranës, ndërsa ka urur zotin Dalipi për zgjedhjen në krye të Këshillit Bashkiak, e ka konsideruar konsensusin si shumë të rëndësishëm, për shërbimin që qytetarët presin nga të zgjedhurit e tyre.
“Më lejoni ta nis me një urim për kryetarin e ri të Këshillit, për detyrën e lartë që i është besuar nga ky këshill, pavarësisht se votimi u nda sipas vijës mazhorancë-opozitë. Tashmë, detyra juaj, jam i sigurt që ju dërgon në lartësinë e përfaqësimit të Këshillit Bashkiak të Tiranës. Së dyti, përshëndes të gjithë këshilltarët e qytetit të Tiranës, pavarësisht përkatësive politike për mençurinë dhe maturinë me të cilën arritën të tejkalojnë një ngërç i cili nuk i shërbeu për asnjë ditë qytetit të Tiranës. Në këtë këshill, është detyrë e gjithsecilit prej nesh t’i shërbejmë interesave të qytetit të Tiranës, të qytetarëve të Tiranës dhe kjo duhet të triumfojë mbi çdo ndasi dhe përkatësi politike. Normalisht, këto ekzistojnë, secili prej jush është këtu si rezultat i paraqitjes së listave nga subjektet politike por besoj se me kalimin e ngërçit, me gjetjen e konsensusit, jo për t’i shërbyer një pale apo një tjetre dhe as duke sakrifikuar parimet e shtetit ligjor, kemi dhënë shembullin më të mirë sot, ndonëse me pak vonesë por më mirë vonë se kurrë, thotë populli, se jemi të gatshëm të bashkojmë zërin, pavarësisht përkatësisë mazhorancë-opozitë, për çështje që preokupojnë qytetarët e Tiranës dhe që kërkojnë zgjidhje nga ky këshill, nga kjo bashki dhe pse jo nga autoritetet e tjera shtetërore. Qoftë ky një shembull i mirë për të gjithë të zgjedhurit dhe shërbëtorët e shtetit shqiptar, si në nivel vendor, ashtu edhe në nivel qendror! Uroj që rifillimi i punës të udhëhiqet përveç sensit të shërbimit ndaj qytetarëve, edhe nga zbatimi strikt dhe pa asnjë mëdyshje i ligjeve, vendimeve të këtij këshilli dhe gjithë dispozitave rregullative të Bashkisë së Tiranës dhe Republikës së Shqipërisë! Uroj që sa më shpejt, sëbashku me kënaqësinë e justifikuar për gjetjen e konsensusit, të triumfojë edhe sensi i shërbimit dhe ky këshill t’i përvishet menjëherë punës që e pret, vendimeve që e presin, të paraqitura tashmë e shumë e shumë vendimeve të tjera të cilat do të formulohen si nga Bashkia e Tiranës, si në bashkëpunim me anëtarët e këshillit të nderuar! Edhe njëherë ju uroj punë të mbarë, punë të mbarë edhe ju, z. kryetar!” – theksoi kryebashkiaku Basha.
Zoti Basha ka vlerësuar edhe kontributin e ish-kryetarit të Këshillit, zotit Njazi Kosovrasti, gjatë ushtrimit të detyrës, për dy vjet.
“Dua t’i adresoj një falënderim ish-kryetarit të Këshillit Bashkiak, z. Niazi Kosovrasti, për shërbimin e tij gjatë periudhës dy vjeçare që shërbeu si kryetar i Këshillit. Besoj, në emrin tuaj si këshilltarë, definitivisht në emër të Bashkisë së Tiranës dhe qytetarëve të Tiranës, z. Kosovrasti faleminderit për shërbimin tuaj!”
I vetmi vendim i diskutuar në mbledhjen e Këshillit Bashkiak ishte propozimi i kryebashkiakut Basha, për një shtesë fondi në buxhetin e njësisë bashkiakë numër 11, për t’u dhënë ndihmë financiare banorëve të dëmtuar nga përmbytja e datës 16.10 2013.
“Bëhet fjalë për një akt të sjellë me urgjencë, pasi ka të bëjë me një situatë emergjente, që është situata e shkaktuar nga dalja nga shtrati e lumit të Tiranës, që ka shkaktuar dëme në një popullsi prej 6000 qytetarësh të Tiranës, mbi 700 familje dhe 50 biznese. Siç jeni informuar, Bashkia e Tiranës i është gjendur në ditët e para të emergjencës, me praninë e ndërmarrjeve 1, 2 dhe 3, Policisë Bashkiake dhe të disa institucioneve të tjera, për të bërë ndërhyrjet emergjente. Eshtë bërë evidentimi i dëmit, i është kërkuar qeverisjes qendrore, përmes prefektit dhe grupeve të evidentimit, t’u vihet në ndihmë banorëve. Gjej rastin ta përsëris këtë apel, pasi ndonëse ka kaluar disa kohë, nevojat janë të mëdha. Bëhet fjalë veçanërisht për sektorë ku jeton një pjesë e komunitetit tonë, që është në tërësi e deprivuar, si nga ana ekonomike dhe nga ana shoqërore, qoftë edhe mungesa e disa tekteve shkollore për fëmijët ka shkaktuar probleme të mëdha. Ndonëse jemi munduar t’u gjendemi pranë edhe duke bashkërenduar përpjekjen tonë me ato të disa prej shoqatave të bamirësisë dhe organizatave jo qeveritare, por nuk mund të presim duarkryq deri sa të vijë përgjigjja nga qeveria, ndaj propozoj që gjysmën e fondit të emergjencave të Bashkisë së Tiranës, të parashikuar për buxhetin e vitit 2013, ta alokojmë menjëherë për t’u ardhur në ndihmë këtyre banorëve. Nuk është një shumë e madhe, është një shumë modeste prej 1 milionë lekësh të reja (10 milionë të vjetra), është gjysma e buxhetit që kishim parashikuar për emergjencat, me shpresën se kjo do të ndihmojë sadopak për lehtësimin e kategorive më të prekura, ndërkohë që do të vijojmë institimin tonë që organet përkatëse të pushtetit qendror, të bëjnë sa më shpejt vlerësimin e asaj çka është dërguar nga grupet e vlerësimit të dëmit dhe të alokojnë edhe ata resurset për t’u ardhur në ndihmë këtyre banorëve, të cilët pavarësisht se ka kaluar shumë kohë gjenden akoma një një situatë emergjente” – theksoi Basha.
Këshilltarët e PS akuzuan Bashkinë se fondi që po vë në dispozicion për të ndihmuar banorët nuk është i mjaftueshëm. Në përgjigje të pretendimit, Basha tha se buxheti për emergjencat civile të Bashkisë së Tiranës është sot 40% më i lartë se çka qenë në vitin më të mirë të ish-kryetarit të Bashkisë, Edi Rama.
“Z. Bushati, meqë insiston ta njollosësh konsensusin qytetar me sensin tënd të bërjes politikë në këtë sallë, më lejo të përgjigjem se buxheti për emergjencat civile të Bashkisë së Tiranës është sot 40% më i lartë se çka qenë në vitin më të mirë të ish-kryetarit të Bashkisë së Tiranës dhe kryetarit të partisë tënde. Sigurisht nuk e akuzoj, pavarësisht se kam rritur buxhetin për emergjencat civile, duke treguar koherencë me përkushtimin tonë për një mirëplanifikim të shpenzimeve buxhetore, nuk e akuzoj, pasi edhe pse buxheti i Bashkisë në drejtimin tim për këtë çështje është 40% më i lartë se i z. Rama kur ulej në këtë karrige, prapë se prapë këto janë mundësitë e pushtetit vendor dhe për këtë arsye shteti shqiptar ka parashikuar si me ligj, si me organikë shtetërore, si me buxhet të shtetit, Drejtorinë Kombëtare të Emergjencave Civile në Ministrinë e Brendshme dhe meqë po flasim për këtë dhe nuk preferoj të futem në çështje të tjera jo relevante me të cilat u zhyte në politikën e ditës, por jo në shpirtin e sallës, po ju them se sensi i parë duhet të jetë ai i pranisë pranë këtyre njerëzve. Ndonëse ky këshill kishte pikëpamje të ndryshme sa i përket legjitimitetit dhe legalitetit të veprimtarisë së disa anëtarëve të tij, çka e mbajti peng mbledhjen e Këshillit që është një çmim në dukje i lartë por asnjëherë për t’u anashkaluar, për hir të shtetit ligjor dhe kushtetueshmërisë, si themelet e demokracisë dhe shoqërive të lira, askush nuk i pengonte këshilltarët individualë të gjendeshin pranë këtyre familjeve dhe disa prej këtyre familjeve ndodhen pranë zonës ku ju kandiduat për ambicjen tuaj tjetër të madhe, për të cilën i dedikuat kohë fjalimit tuaj në Këshill. Ne mundet që të kemi vetëm 10 milionë apo 20 milionë në total të vjetra, por mendoj se prania e vazhdueshme pranë familjarëve, përpjekja për t’i ndihmuar qoftë individualisht, qoftë me rrethet e biznesit, siç ka ndodhur me disa këshilltarë të këtij këshilli që dua t’i falënderoj për zemrën e mirë por edhe për atë përpjekje ekstra që bënë për të dërguar atë pako ndihmash apo libra pranë atyre banorëve, edhe kjo mendoj se është një detyrë qytetare dhe detyrë e këshilltarëve, ndaj le të fokusohemi tek problemet e çështjet e Tiranës, për të cilat ndodhemi në këtë sallë! Të jesh i sigurt se ka vende të tjera për të diskutuar problemet e tjera, ka kohë për t’i zgjidhur ato dhe do të zgjidhen një e nga një! – deklaroi Basha.
Anëtarët e Këshillit Bashkiak, në mënyre unanime kanë miratuar shtesën e fondit, në buxhetin e njësisë bashkiake numër 11, për t’u ardhur në ndihmë familjeve të përmbytura. Zoti Basha ka kërkuar nga Këshilli Bashkiak, që së bashku me Bashkinë e Tiranës, t’i kërkojnë qeverisë të akordojë një fond për t’u ardhur në ndihmë këtyre banorëve.
Kryetari i Këshillit Bashkiak, zoti Dalipi ka theksuar se edhe këshilltarët e majtë do të kontribuojnë në mënyrë modeste për banorët e përmbytur. Bashkia e Tiranës ka hapur një numër llogarie, për ndihmën financiare ndaj banorëve.
“Sëbashku me këshilltarët kur na ra në dorë ky akt patëm një vendim tonin që dhe ne do kontribuojmë me një shumë modeste për familje të cilat janë gjendur në vështirësi si një detyrim qytetar i këtij këshilli. Falënderoj këshilltarët që u janë gjendur pranë. Do doja të jepnim konfirmimin tonë mbi këta akt, që tu japim këtyre banorëve një sinjal për mbështetjen që ata kanë nevojë” bëri thirrje Dalipi, thirrje të cilës iu përgjigjën me votë pro të gjithë këshilltarët” u shpreh Dalipi.
Ndërkaq Basha ka kërkuar nga qeveria të alokojë fondin e emergjencës për këtë zonë.
“Dua t’ju kërkoj me këtë rast që t’i jepni një zë edhe më institucional e të bashkuar kërkesës ndaj qeverisjes qendrore, për të treguar një vëmendje më të madhe, si me angazhimin në terren ashtu edhe me alokimin në mos në mënyrë të plotë, të paktë në mënyrë të pjesshme për fondet e emergjencës për këtë zonë. Lumi ka marrë përpara mure, dyer, ka shkatërruar tërësisht orenditë elektro-shtëpiake, ushqime, libra dhe çdo gjë të qindra banesave, dhe bëhet fjalë për një kategori banorësh që i përkasin pjesës së margjinalizuar si ekonomikisht ashtu edhe shoqërisht të qytetit të Tiranës. Kjo situatë vijon të jetë emergjente dhe le t’i drejtojmë një thirrje të bashkuar, pse jo edhe institucionale organeve të qeverisjes qendrore!” – u shpreh kreu i Bashkisë së Tiranës.