PRISHTINË, 27 Tetor 2015 B.Jashari/ Presidenti i Republikës së Austrisë, Heinz Fischer, mbërrin nesër për vizitë dyditore në Kosovë, me ftesë të presidentes së Republikës, Atifete Jahjaga.
Pritja me ceremoni shtetërore në sheshin “Ibrahim Rugova” bëhet në mesditë, e më pas zhvillohet takimi i presidentes Jahjaga me presidentin Fischer, në vazhdim edhe i kryetarit të Kuvendit të Kosovës, Kadri Veseli.
Të enjten, presidenti i Austrisë, Heinz Fischer takohet me kryeministrin e Republikës së Kosovës, Isa Mustafa.
Në vazhdim të axhendës, presidentja Jahjaga dhe presidenti Fischer marrin pjesë në Forumin Ekonomik Kosovar-Austriak në Prishtinë dhe vizitojnë Prizrenin, Kishën Katolike dhe Xhamia e Sinan Pashës në qytetin më të madh jugor të Kosovës.
Kongresistë amerikanë vizitë në Kosovë
PRISHTINË, 19 Gusht 2015/ Priten për vizitë në Kosovë një grup kongresistësh amerikanë, anëtarë të Komisionit të Kongresit për Partneritet dhe Zhvillim të Demokracisë.
Kongresistët amerikanë do priten nesër në Prishtinë në takime të veçanta nga presidentja e Republikës, Atifete Jahjaga dhe nga kryetari i Kuvendit të Republikës së Kosovës, Kadri Veseli, së bashku me anëtarët e Kryesisë së Kuvendit.
Takimet, sipas axhendave të njoftuara, mbahen në Presidëncë dhe Kuvendin e Kosovës, ndërsa priten edhe takime të tjera./b.j/
Meta në Kosovë : Bashkëpunimi Shqipëri-Kosovë ndihmon integrimin e Ballkanit Perëndimor në BE
Nga Behlul Jashari/. -Kryetari i Kuvendit të Republikës së Shqipërisë, Ilir Meta, tha sot në Prishinë se “bashkëpunimi Shqipëri-Kosovë, që ka hyrë në një dinamikë të re, ndihmon perspektivën e integrimit në Bashkimin Evropian të Ballkanit Perëndimor”.
I pyetur nga ATSH-ja se, sa bashkëpunimi Shqipëri-Kosovë, që ka hyrë në një dinamikë të re, e shpejton rrugën e Tiranës dhe Prishtinës drejt integrimit në BE, Meta tha se “ky bashkëpunim jo vetëm ndihmon Shqipërinë dhe Kosovën, respektivisht për t’u integruar në Bashkimin Evropian, por ndihmon perspektivën e antarësimit të vendeve të Ballkanit Perëndimor në Bashkimin Evropian”.
Kryeparlamentari shqiptar, Meta theksoi se “është e rëndësishme për te gjithë vendet evropiane, për të kuptuar se vetëm anëtarësimi i të gjithë vendeve të Ballkanit Perëndimor do të garantojë një stabilitet dhe siguri afatgjatë jo vetëm për vendet tona, por edhe për vetë Bashkimin Evropian”.
“Kjo është mjaft e rëndësishme për t’u kuptuar akoma më shumë nga Bashkimi Evropian dhe unë besoj se do të kuptohet çdo ditë e më shumë”, deklaroi Meta, i pyetur nga ATSH, pas takimit me Kryetarin e Kuvendit të Kosovës, Jakup Krasniqi.
Kryetari i Kuvendit të Shqipërisë, Ilir Meta, mbërriti mbrëmë në Kosovë për një vizitë zyrtare dyditore në Kosovë, me ftesë të kryeparlamentarit kosovar Jakup Krasniqi, me të cilin nisi sot takimet e shumta me krerë institucionalë të vendit dhe me kryetarë të partive në Kosovë.
Kryetari i Kuvendit të Republikës së Shqipërisë, Ilir Meta, u prit në takim shumë të ngrohtë edhe nga Kryeministri i Republikës së Kosovës, Hashim Thaçi, ndërsa po vazhdon takime të tjera.
Kryeparlamentarin shqiptar Meta, e shoqërojnë deputetët e Kuvendit të Republikës së Shqipërisë, Shpëtim Idrizi, Gramoz Ruçi dhe Luan Rama , ndërkohë që vazhdon vizita sipas një axhende të ngjeshur.