Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova Gardës Kombëtare të IOWA-s Medaljen Presidenciale Ushtarake

by

– Presidentja e Republikës së Kosovës, Vjosa Osmani dekoron Gardën Kombëtare të IOWA-s nga Shtetet e Bashkuara të Amerikës  me Medaljen Presidenciale Ushtarake. Në emër të Gardës, medalja i është dhuruar Komandantit të Gardës Kombëtare të IOWA-s, Gjeneralmajor Benjamin Corell /

PRISHTINË, 20 Maj 2021-Gazeta DIELLI nga korrespondenti në Kosovë Behlul Jashari/ Presidentja e Republikës së Kosovës, Vjosa Osmani në një ceremoni të organizuar në Presidencë, ka dekoruar Gardën Kombëtare të IOWA-s nga Shtetet e Bashkuara të Amerikës, me   Medaljen Presidenciale Ushtarake për kontribut të jashtëzakonshëm në zhvillimin dhe avancimin e Forcës së Sigurisë së Kosovës.

Në emër të Gardës, medalja i është dhuruar Komandantit të Gardës Kombëtare të IOWA-s, Gjeneralmajor Benjamin Corell.  

Presidentja Osmani ka falënderuar Gardën Kombëtare të IOWA-s për mbështetjen e vazhdueshme ndaj FSK-së, duke e konsideruar këtë proces  vazhdimësi të marrëdhënieve të shkëlqyeshme me aleatin e përhershëm të Kosovës, SHBA-të. Në këtë kontekst, Presidentja Osmani ka përmendur edhe dërgimin e kontingjentit të FSK-së në misione për mbështetje të stabilitet rajonal dhe operacioneve paqeruajtëse, nën Komandën Qendrore Amerikane. Sipas Presidentes Osmani, pjesëmarrja e FSK-së në misionin e paqeruajtës u bë e mundshme në saje të ftesës nga Komanda Qendrore, ndaj aktualisht pjesëtarë të saj ndodhen në një mision paqeruajtës krahas ushtarëve amerikanë në Kuvajt.

“FSK-ja, po zhvillohet në forcë ushtarake profesionale dhe ndërvepruese me forcat e NATO-s. Prandaj, anëtarësimi në NATO mbetet objektiv strategjik i shtetit tone”, ka theksuar Presidentja Osmani. Ajo ka shfaqur besimin për vazhdimin e bashkëpunimit të mëtejmë ndërmjet të dy ushtrive në funksion të ruajtjes së paqes dhe stabilitetit rajonal e më gjerë.

MINISTRI MBROJTJES ARMEND MEHAJ PRITI KOMANDANTIN E GARDËS KOMBËTARE TË IOWA-S U GJENERALMAJORIN BEN CORELL

Në  17 Maj 2021 ministri Mbrojtjes Armend Mehaj priti  Komandantin e Gardës Kombëtare të Ajovës (Iowa-s) nga Shtetet e Bashkuara të Amerikës (SHBA) gjeneral Majorin Ben Corell.                                                                                  

Në takim ministri Mehaj e  njoftoi, gjeneralin Corell mbi zhvillimet në Ministri të Mbrojtjes, për objektivat që ai ka parashtruar si ministër si për Ministrin ashtu edhe për FSK-në. Ministri Mehaj vlerësoi lartë  bashkëpunimin e ngushtë të deritashëm  në mes të Gardës Kombëtare të Ajovës dhe FSK-së, me theks të veçantë për  misionin e parë paqeruajtës jashtë vendit të FSK-së përkrah Gardës Kombëtare të Ajovës në Kuvajt. Po ashtu më këtë rast ata biseduan edhe për  agjendën e zhvillimit të ushtrimit “Defender Europe -21”, për rëndësinë e pjesëmarrjes së FSK-së si   dhe rëndësinë e pjesëmarrjes së Kosovës si shtet.                                                                                                         

Gjenerali Corell shprehu kënaqësinë që është në vizitë në Kosovë, duke vlerësuar lartë sukseset  e FSK-së, sidomos ato aktivitet që janë zhvilluar në kuadër të programit të bashkëpunimit  me GK të Ajovës, duke shpreh gatishmërinë që ky bashkëpunim të thellohet edhe më tej në të ardhmen.

Po ashtu edhe komandanti i FSK-së gjenerallejtënant Rrahman Rama priti në  takim të ndarë komandantin e Gardës Kombëtare të Ajovës (Iowa-s) nga Shtet e Bashkuara të Amerikës (SHBA) gjeneral Majorin Ben Corell. Të dy gjeneralët vlerësuan lartë   shkallën e bashkëpunimit në mes të FSK-së dhe GK të Ajovës, duke vlerësuar lartë mundësinë që ju ka dhënë FSK-së të jetë në mision paqeruajtës në  Kuvajt, ushtrimet dhe trajnimet e përbashkëta të deri tashme. U vlerësua si shumë e rëndësishme për FSK-në  pjesëmarrja në ushtrimin fushor “Defender Europe -21”.

KJO ESHTE FOTO ZYRTARE E PRESIDENTES TE REPUBLIKES SE KOSOVES

by

Në përputhje me Protokollin e Shtetit, është përzgjedhur fotografia zyrtare e Presidentes Vjosa Osmani, e cila është vendosur në Presidencë dhe e njëjta u është dërguar edhe Qeverisë së Kosovës, Kuvendit dhe Gjykatës Kushtetuese.

Fotografia zyrtare e Presidentes Osmani është përzgjedhur nga një komision i përbërë prej katër artistëve, përfaqësuesi i protokollit të shtetit, përfaqësuesi i protokollit të Kuvendit të Kosovës dhe dy përfaqësues nga Presidenca e Kosovës.

Sipas Ligjit për Protokollin e shtetit, neni 20, paragrafi 3, fotografinë e Presidentes Osmani obligohen ta mbajnë në zyra të gjithë institucionet e Republikës së Kosovës.(Gazeta Dielli)

Vjosa Osmani Presidente e gjashtë e Kosovës

by

Seanca e jashtëzakonshme e Kuvendit me të vetmen pikë në axhendë – Zgjedhja e Presidentit të Republikës së Kosovës e nisur mbrëmë vijoi e përfundoi sot/

Gazeta DIELLI nga korrespondenti në Kosovë Behlul JASHARI

PRISHTINË, 4 Prill 2021/ Presidente e re e Kosovës e sapozgjedhur sot në mbrëmje nga Kuvendi i  Kosovës me 71 vota në raundin e tretë është Vjosa Osmani deputetja e grupit parlamentar të Lëvizjes Vetëvendosje – më e votuara nga të gjithë kandidatët e të gjitha listave me 300 756 vota në zgjedhjet e parakohëshme parlamentare të 14 Shkurtit 2021. Ajo pak para orës 19:40 dha Betimin si Presidente e  Kosovës që u pasua me Himnin Shtetëror dhe me fjalën e parë të Presidentes.

Për zgjedhjen në votimin e fshehtë duheshin së paku 80 vota pro në raundin e parë a të dytë e së paku 61 vota në raundin e tretë nga së paku 80 vota në kutinë e votimit.

Pas dy votimeve pa kuorum mbrëmjen e djeshme, sot në përsëritjen e votimit të raundit të parë  në kuti ishin 81 vota – prej tyre pro Vjosa Osmanit ishin 69 e 12të pavlefshme, 0 vota për kundërkandidatin Nasuf Bejta.

Në raundin e dytë  të votimit në kuti ishin 82 vota – prej tyre pro Vjosa Osmanit ishin 67 e 11 të pavlefshme, 4 vota për kundërkandidatin Nasuf Bejta.

Në raundin e tretë  të votimit në kuti ishin 82 vota – prej tyre pro Vjosa Osmanit ishin 71 e 11 të pavlefshme, 0 vota për kundërkandidatin Nasuf Bejta.

Vjosa Osmani është Presidentja e gjashtë e Kosovës. I pari ishte  Presidenti historik Ibrahim Rugova, pas tij Fatmir Sejdiu, pastaj Behgjet Pacolli që qëndroi vetëm rreth një muaj në këtë post, Atifete Jahjaga dhe Hashim Thaçi.

Kuvendi i Republikës së Kosovës, nën drejtimin e kryeparlamentarit Glauk Konjufca, me kërkesë të 41 deputetëve, ka nisur të shtunën e djeshme në mbrëmje seancë të jashtëzakonshme me të vetmen pikë në axhendë – Zgjedhja e Presidentit të Republikës së Kosovës.

Punimet e seancës së jashtëzakonshme u hapën me konstatimin e kourumit, përkatëzisht prezencën e 84 deputetëve të pranishëm në sallë, të mjaftueshëm për të vijuar seancën për zgjedhjen e presidentit të Republikës së Kosovës.

Në garën për president janë prezantuar dy kandidatë: Vjosa Osmani-Sadriu dhe Nasuf Bejta.

Prezantimin e kandidates për president, Vjosa Osmani-Sadriu, e ka bërë deputetja e Lëvizjes Vetëvendose, Mimoza Kusari-Lila, ndërsa të kandidatit Nasuf Bejta, deputeti i VV-së Haxhi Avdyli.

Këto dy propozime janë hedhur në votim ku për propozimet kanë votuar 66 deputetë, ndërsa sipas procedurës më pas është mbledhur Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, për të  verifikuar nëse kandidatët i plotësojnë kushtet për president të vendit.

Në Komision është vlerësuar se të dy kandidatët i plotësojnë dispozitat kushtetuese për kandidat për president. Raportin para deputetëve e ka prezantuar kryetari i Komisionit për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, Adnan Rrustemi.

Pas kësaj procedure, kryetari Konjufca kërkoi nga përfaqësuesit e grupeve parlamentare që të japin mendimet e tyre në seancë. Kryetarja e GP të VV-së Mimoza Kusari-Lila propozoi që të fillojnë me votimin për kandidatët për president. Ndërsa në emër të Partisë Demokratike të Kosovës, deputeti Enver Hoxhaj, dha mendimin e tij në lidhje me zgjedhjen e presidentit.

Ai tha se për këtë proces të rëndësishëm për vendin parashihet të ketë një proces të dialogut dhe të arrihet një kompromis i gjerë me qëllim që presidenti që zgjidhet të jetë sa më konsesual dhe sa më përfaqësues. Hoxhaj tha se PDK nuk e voton kandidaten Vjosa Osmani për presidente të vendit e as nuk rri në sallë.

Grupet e tjera parlamentare nuk janë deklaruar, përveç Grupit Multietnik. Nga ky grup deputeti Enis Kervan deklaroi se mbështesin procesin e zgjedhjes së presidentit.

Më pas ka filluar votimi i fshehtë, në të cilin, herën e parë në votim kanë marrë pjesë 78 deputetë, numër ky i pamjaftueshëm për të përfunduar raundi i parë për zgjedhjen e presidentit.

Në përsëritjen e raundit të parë të votimit kanë marrë pjesë vetëm 79 deputetë, numër ky serish i pamjaftueshëm për përmbylljen e këtij raundi të votimit.

Pas dy tentimeve, kryetari Konjufca ka propozuar një pauzë për t’u konsultuar lidhur me procesin e mëtejmë të votimit. Pas rifillimit të seancës, kryetari Konjufca konstatoi se nuk ka kourum të mjaftueshëm për të vazhduar seanca.

Seanca e jashtëzakonshme e Kuvendit të Kosovës ndërpreu punimet të shtunën e djeshme para mesnate për të vazhduar, si u paralajmërua nga kryeparlamentari, sot në 4 prill në orën 17:00.

Vijimi i seancës sot nisi me pak më shumë se gjysëm ore vonesë me 83 deputetë të pranishëm në sallën e Kuvendit 120 anëtarësh. Pak pas fillimit të vijimit të seancës u njoftua nga kryetari i Kuvendit se në sallë ishin 84 deputetë.

Mërgata duhet t’i përgjigjet masivisht regjistrimit të popullsisë në Maqedoni të Veriut

by

-U.d. Presidentja Vjosa Osmani priti në takim zëvendëskryeministrin e parë të Maqedonisë së Veriut, z.Artan Grubi/

U.d. Presidentja Vjosa Osmani ka pritur në takim zëvendëskryeministrin e parë të Maqedonisë së Veriut, z.Artan Grubi.

Të dy bashkëbiseduesit kanë vlerësuar raportet e mirë ndërfqinjësore dhe kanë shprehur përkushtimin që ato të avancohen edhe më tej.

Z.Grubi ka uruar u.d. Presidenten Osmani për suksesin në zgjedhjet e 14 shkurtit.

Ai e ka njoftuar zonjën Osmani për ecurinë e procesit të regjistrimit të popullsisë në Maqedoni të Veriut dhe ka potencuar rëndësinë e përfshirjes sa më të madhe të Mërgatës shqiptare.

Në këtë kontekst zonja Osmani kë mbështetur këtë proces duke kërkuar nga Mërgata që t`i përgjigjet masivisht regjistrimit të popullsisë në Maqedoni të Veriut. Sipas saj, përtej aspektit statistikor, ky regjistrim do të jetë përmbajtësor në avancimin e të drejtave qytetare të shqiptarëve.  

Në takim u diskutua edhe për sfidat në menaxhimin e pandemisë Covid-19 dhe përpjekjeve të të dy shteteve për sigurimin e vaksinave anticovid.

U përmend se ndërmjet të të dy shteteve deri tashti ekzistojnë 19 draft marrëveshje, të cilat do të mund të shqyrtohen me krijimin e institucioneve të reja në Kosovë.

Urdhri “Shotë Galica” 8 grave të Kosovës

by

Presidentja në detyrë e Kosovës Vjosa Osmani akordon urdhrin “Shotë Galica” për 8 gra/

-Urdhri “Shotë Galica” u ndahet personave, të cilët kanë avokuar, kanë bërë vepra trimërie apo akte guximi  për barazinë gjinore/

PRISHTINË,  8 Mars 2021­- Gazeta DIELLI nga korrespondenti në Kosovë Behlul Jashari/ U.d. Presidentja e Kosovës Vjosa Osmani, me rastin e Ditës Ndërkombëtare të Gruas, ka dekoruar me urdhrin “Shotë Galica”, tetë gra, të cilat me aktivitetin e tyre kanë dhënë kontribut në avokimin dhe avancimin e barazisë gjinore si dhe në kauzën e përpjekjet për drejtësi.

Sipas u.d. Presidentes Osmani, secila nga këto gra e organizata, shquhen për guximin në kërkim të të drejtës së tyre, mbrojtjes së integritetit dhe të të vërtetës. Ajo ka thënë se vetëm duke pasur gra të guximshme e barazi gjinore, shoqëritë si kjo e jona mund të avancohen. Ajo ka theksuar se këto gra dhe shoqata përbëjnë modelin e aktivisteve që fatin e tyre personal e kanë shndërruar në kauzë për të mirën e përgjithshme, duke u përpjekur për të ngadhënjyer e vërteta dhe duke u bërë prijetare në avancimin e barazisë gjinore dhe të drejtave të njeriut në përgjithësi.

Urdhri “Shotë Galica” u ndahet personave, të cilët kanë avokuar, kanë bërë vepra trimërie apo akte guximi  për barazinë gjinore.

Të dekoruarat janë:

Vasfije Krasniqi – një heroinë e vërtetë e ditëve tona. Gruaja e cila dhimbjen e shndërroi në guxim dhe shembull se si mund dhe duhet të sfidohen stereotipet e paragjykimet shoqërore.  Gruaja e cila foli publikisht për tmerrin e përjetuar gjatë luftës së fundit dhe dhunimin seksual nga forcat serbe dhe meritorja për trasimin e rrugës për të gjitha gratë e mbijetuara të dhunës seksuale gjatë luftës në Kosovë. Për guximin e treguar në luftën e saj për drejtësi, znj. Vasfije Krasniqi dekorohet me urdhrin presidencial “Shotë Galica”. 

Shyhrete Tahiri – Sylejmani – gruaja që ndoqi hap pas hapi rrugën deri në sjelljen e drejtësisë për padrejtësinë që i është bërë asaj dhe shumë grave e vajzave të Kosovës. E mbijetuar e dhunës seksuale në luftën e fundit në Kosovë, Shyhrete Tahiri – Sylejmani dekorohet për guximin e saj që publikisht të kërkojë dënimin e përdhunuesve. Znj. Shyhrete Tahiri- Sylejmani  dekorohet me urdhrin presidencial “Shotë Galica” për ngritjen e zërit të saj që ndihmoi të fuqizohet zëri i shumë vajzave e grave të tjera anë e mbanë vendit tonë. 

Shehrije Balaj – gruaja e parë që dëshmoi në Beograd kundër forcave serbe që e përdhunuan atë gjatë luftës në Kosovës. Ndonëse vdiq në vitin 2018, ajo mbetet heroinë e ditëve të sotme. Për guximin e saj, znj. Shehrije Bala dekorohet me urdhrin presidencial “Shotë Galica”.

Marte Tunaj – është ndër gratë e para në Kosovë që ka dëshmuar për dhunimin e kryer gjatë kohës së luftës nga forcat serbe. Në momentet më të vështira të luftës së UÇK-së, ajo iu përgjigj organizmit të tij dhe dha kontribut të jashtëzakonshëm. Ajo nuk jeton më, por vepra e saj është e pavdekshme. Për shembullin e dhënë dhe guximin, znj. Marte Tunaj dekorohet me urdhrin presidencial “Shotë Galica”.

Shoqata “Thirrjet e nënave” – Shoqate e cila për vite tashmë merret me procesin e zbardhjes se fatit te personave të pagjetur e të zhdukur gjatë luftës së fundit në Kosovë.  Thirrja e nënave mbetet thirrja më e kumbueshme në vendin tonë për drejtësi. E nënat e Gjakovës nuk u dorëzuan kurrë dhe nuk do të dorëzohen derisa drejtësia të vje në vend. Për qëndresën, vendosmërinë e punën e palodhshme ndër vite, shoqata “Thirrjet e Nënave”, dekorohet me urdhrin “Shotë Galica”.

Shpresa Loshaj – një pishtare e vërtetë, një guximtare e pashoq, një luftëtare për gjithpërfshirje e aktivizëm në përpjekjet për mbrojtjen e lumenjve të Kosovës.  Për punën e saj të palodhshme, për mosluhatjen në qëndrimet e saja, si dhe për guximin për të sfiduar padrejtësitë, si dhe për guximin e treguar në mbrojtjen e pasurive natyrore të Kosovës, znj. Shpresa Loshaj dekorohet sot me urdhrin “Shotë Galica”. 

Arjeta Musliu – gruaja që vendosi që dhembjen e saj ta kthejë në forcë, duke hapur kështu qendrën këshilluese ‘Ri-Jeta’, që tu dal në ndihmë të gjithë të rinjve që përballen me përdorimin e substancave narkotike. Arjeta është shembull se si sfidat e jetës shndërrohen në motiv për të ndihmuar të tjerët në nevojë, dhe si dhimbja vet mund të na ndihmojë të lehtësojmë dhimbjen e të tjerëve. Për përkrahjen e qindra familjeve, prindërve e në veçanti nënave, znj. Arjeta Musliu dekorohet sot me urdhrin “Shotë Galica”.

Fahrije Hoti – Ajo është themeluesja e ndërmarrjes “Krusha”, në të cilën janë të punësuara pesëdhjetë gra, shumica e të cilave kanë mbetur të veja nga lufta e fundit në Kosovë. Themelimi i shoqatës “Gratë e veja” në vitin 2003 për përpjekjet për zbardhjen e fatit të personave të pagjetur ishte hapi i parë. Dy vite më vonë, Fahrija filloi një iniciativë vetjake për konservimin e ushqimeve dimërore. Kjo iniciativë në vitin 2010 u shndërrua në ndërmarrjen e njohur “Krusha”. Znj. Fahrije Hoti dekorohet me urdhrin presidencial “Shotë Galica” si gruaja që nuk u ndal kurrë së besuari dhe së guxuari përkundër të gjitha paragjykimeve.