Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for March 2014

5 projekte për restaurimin e “Marubit”

by

*Restaurimi i Fototekës, “Marubi”, fituese studio holandeze “Casanova-Hernandez”/

Nga Gjergj Mima/Nisi të Dielën, 30 Mars, në Shkodër, prezantimi publik i fazës së fundit të përzgjedhjes së projekteve fituese për projektin “Restaurimi dhe Muzealizimi i Fototekës Kombëtare ‘Marubi”. Pjesëmarrës në këtë ceremoni kanë qënë edhe Kryeministri Edi Rama dhe Ministrja e Kulturës Mirela Kumbaro.Fjalën e hapjes e mbajti ministrja e Kulturës, Mirela Kumbaro e cila tha se, sot do të prezantohen pesë projekte për restaurimin e “Marubit”.“Fototeka Marubi është një pasuri për të gjithë shqiptarët”, u shpreh ministrja Kumbaro, duke shtuar se, “me këtë Muze të Marubit në synojmë që të shtojmë vlerat pasi jo vetëm Marubi, por edhe Shkodra është një xhevahir në kurorën e kulturës shqiptare”.

Kumbaro në fjalën e saj e cilësoi fototekën “Marubi” si një thesar të cilin duhet vetëm ta sigurojmë dhe ta gëzojmë, duke shtuar se në përfundim të këtij muzeu, thesarin e fototekës Marubi synojmë ta regjistrojmë në thesaret e trashëgimisë botërore të UNESCO-s.“Sot po prezantohen pesë projekte, për të mundësuar restaurimin e “Marubit”. Këto pesë projekte dolën nga gara e parë ku morën pjesë 26 propozime nga 8 vende të botës. Sot ne kemi idetë dhe teknologjitë më bashkëkohore për të vlerësuar “Marubin”. Kjo është rruga e progresit në kulturë, që na dëfton vlerat e Shkodrës dhe të pinjollëve të shquar shkodranë.

Kjo rrugë progresi i jep dinjitet krenarisë sonë për thesaret e kulturës shqiptare. Ministria e Kulturës është e angazhuar për t’i mbrojtur dhe për t’i kthyer dinjitetin e merituar trashëgimisë kulturore. Në përfundim të këtij muzeu, thesarin e fototekës Marubi ne synojmë ta regjistrojmë në thesaret e trashëgimisë botërore të UNESCO-s”, tha Kumbaro.

Kryeministri: Ngritja e muzeut të Marubëve, Akt dinjitoz për krenarinë kombëtare

Kryeministri Edi Rama vlerësoi sot ngritjen e muzeut të Marubëve në Shkodër “si një akt dinjitoz me vepra, jo me fjalë, për ngritjen e krenarisë kombëtar”.I pranishëm në Kinema Millenium në Shkodër, kryeministri Edi Rama, i shoqëruar edhe nga ministrja e Kulturës, Mirela Kumbaro, mori pjesë në prezantimit publik të fazës së fundit të përzgjedhjes së projekteve fituese për projektin “Restaurimi dhe Muzealizimi i Fototekës Kombëtare ‘Marubi”’.

“Studio që do të bëjë restaurimin do të bëjë të mundur që së shpejti ky thesar dhe dinastia e Marubëve të dalë më në fund nga burgu i harresës dhe lagështirës mbytëse dhe të bëhet pjesë e jetës së qytetarëve të Shkodrës. Dhe pas kësaj do të jenë më të shumtë atë që do e vizitojnë Shkodrën”, tha Kryeministri Rama.Duke folur mbi gjendjen e Fototekës ‘Marubi’, Kryeministri Rama u shpreh se, “E kam parasyve takimin me Luçianon, Drejtorin e Fototekës ‘Marubi’, djalë i ri, energjik, me pasion e vullnet që na tregoi gjendjen e mjeruar që ishin lënë të gjithë pjesët e çmuara të këtij thesari dhe përpjekjet e tij krejt individuale, me një grup njerëzish për të luftuar shiun, lagështirën, për të luftuar që në kushtet e pasigurisë totale Fototeka të mos cënohej. Jam i bindur që drejtori dhe stafi i tij sot janë shumë të lehtësuar dhe mezi presin ta kalojnë thesarin nga vendi krejt i papërshtatshëm, në vendin që meriton në zemër të Shkodrës”.

Kryeministri përgëzoi edhe ministren e Kulturës, Mirela Kumbaro, “për punën e shkëqyer dhe mbërritjen në këtë stacion, që vërtet qe parashikuar brenda 300 ditëve, por ishte nevojshme të arrihej edhe kjo cilësi që mundëm ta shohim sot përmes varianteve të paraqituara. Gjithashtu e përgëzoj për faktin se ka vënë që në fillim, si më kryesoren, punën për inventarizmin e thesarave tona të lëna rrugëve, të dëmëtuara vazhdimisht, të shqyera e grabitura, për të cilat sot nuk kemi inventar. Nuk dimë ekzaktësisht sesa vepra materiale disponojmë në secilën nga fushat e trashgimisë tone”.

Sipas kreut të ekzekutivit, “procesi i inventarizimit ka përparuar dhe sot që po flasim për thesarin e Marubit ka nisur procesi për dixhitalizmin e tij. Ka nisur puna për të ruajtur këtë thesar që sot është mjaft i dëmtuar, por që ka shumë për t’u thënë brezave që do të vijnë”.

“Me një kilometër më pak asfalt dhe një thesar më shumë të shpëtuar, sepse kaq kushton shpëtimi i një thesari, ne bëjmë shumë më tepër drejt Shqipërisë europiane, drejt atdheut që meritojnë fëmijët tanë. Jemi të vendosur që vit pas viti ta shtojmë, jo vetëm vëmendjen, por edhe volumin e të mirave materiale që do të shpenzojmë për trashëgiminë kulturore dhe kulturën në përgjithësi”, tha Kryeministri Rama.

“Duke siguruar thesare, si ky thesari i madh që po sigurojmë sot, bëjmë të mundur rritjen e dinjitetit kombëtar dhe forcimin e identitetit europian”, u shpreh kreu i qeverisë, duke shtuar se, “Marubët kanë drithëruar botën kur kanë dale në dritën e syve të ekspertëve të huaj dhe kur janë ekspozuar në hapësira prestigjoze në botë. Vetë struktura prestigoze e thesarëve të Francës ka dedikur një fond në vitet 90’ për të restauruar pjesë të trashëgimisë së Marubëve, dhe kjo trashëgimi ka bërë që kjo pasuri të shihet si një prej zëdhënësve më të rëndësishëm të kulturës evropiane dhe një prej zëdhënësve më spektakolare të historisë dhe gjenezës së fotografisë”.

“Vlerësimet për Marubët në gjuhë të huaj janë shumë më dinjitoze se vlerësimet e bëra në gjuhën shqipe. Kemi konsumur shumë fjalë për patriotizmin, por veprat që do të tregonin patriotizmin dhe krenarinë kombëtare mungojnë, ashtu siç mungon sot një muze dinjitoz për dinastinë e Marubëve. Ashtu siç e shoh ngritjen e Muzeut si një akt dinjitoz me vepra, jo me fjalë për krenarinë kombëtare. Ashtu siç e shoh një vlerë për Shkodrën ngritjen e këtij muzeu, që sigurisht duhet pasuar me ngritjen e vlerave të tjera të këtij qyteti, të cilat sot gjenden në braktisjen e harresës”, theksoi Kryeministri Rama.

Sipas kreut të qeverisë, me këtë akt, “zgjerojmë hapësirën e edukimit qytetar. Ky muze nuk do të jetë pikë referimi vetëm për ata që do të vizitojnë qytetin, por edhe një arsye më shumë për të besuar se gjeneratat e tjera do të rriten me një dije dhe krenaritë shtuar dhe një edukatë qytetare më të madhe falë këtij muzeu”.

Kryeministri Rama gjithashtu u shpreh se, “ka filluar projekti për vlerësimin e Kalasë së Shkodrës dhe një sërë masash do të merren që këtë vit. Një projekt do të ndërmerret edhe për rrugën që lidh Shkodrën me pellgun e Plavës dhe Gucisë, për të bërë të mundur kështu rilindjen e Shkodrës, që përfshinte dikur një pellg më të gjerë edhe me pjesën matanë kufirit. Duam ta rivitalizojmë këtë lidhje, këtë hapësirë, sigurisht në kushte të reja. Do të shtrijmë me shpejtësi një segment rrugor drejt Vermoshit, dhe në bashkëpunim me qeverinë e Malit të Zi do të bëjmë një bashkëpunim mes territoreve të banuara nga shqiptarët të integruara në një pellg shkëmbimesh kulturore, njerëzore dhe ekonomike”.

Restaurimi i Fototekës, “Marubi”, fituese studio holandeze “Casanova-Hernandez”/

Studio fituese e Konkursit Ndërkombëtar të projektimit për “Restaurimin dhe Muzealizimin e Fototekës Kombëtare Marubi” u zgjodh studio holandeze “Casanova-Hernandez”.

5 Studiot fituese paraqitën nëmënyrë të detajuar projektet e tyre për restaurimin e fototekës Marubi. Në aktivitet morën pjesë Kryeministri Edi Rama, Ministria e Kulturës Mirela Kumbaro, deputet, përfaqësues të artit dhe kulturës, e qytetarë.

Burime nga Ministria e Kulturës theksojnë se , “ky është një ndër projektet më të mëdha të qeverisë shqiptare dhe FSHZH që ka si për qëllim ruajtjen dhe zhvillimin e trashegimisë sonë kulturore”.

Aktiviteti i sotëm shënon fazën përmbyllëse të Konkursit Ndërkombëtar të Projektimit për “Restaurimin edhe Muzealizimin e Fototekës KombëtareMarubi”.

Sipas Ministrisë së Kulturës, “Konkursi i cili është organizuar nga Ministria e Kulturës, në bashkëpunim me Fondin Shqiptar të Zhvillimit dhe Atelier Albania  është një konkurs i standarteve evropiane, i sigurt ne perzgjedhjen e me te mireve, inovativ ne ide dhe vizion, do te sjelle progres ne sherbim te thesarit tone kulturor”

 

(Sipas ATSHse)

 

Zhvillohet ceremonia e rivarrimit të eshtrave të Eqrem bej Vlorës

by

Nga Harilla Koçi/.-Të dielën, 30 Mars, në qytetin e Vlorës u zhvillua ceremonia zyrtare e rivarrimit të eshtrave të Eqrem bej Vlorës, diplomat, politikan dhe historian, personalitet i shquar i letrave shqipe. Me këtë rast, u bënë homazhe dhe u vendosën kurora në arkivolin me eshtrat e tij, në mjediset e shtëpisë së familjes në qytetin e Vlorës, atje ku ai u largua 70 vite më parë drejt Austrisë.

Kurorën në emër të kryeministrit Edi Rama e vendosi Këshilltari për Diplomacinë Kulturore dhe Rilindjen Evropiane, Fate Velaj, i cili vlerësoi figurën e Eqrem bej Vlorës, si një personalitet i kulturës dhe i letrave shqipe.

Bënë homazhe dhe vendosën kurora edhe kryetari i Kontrollit të Lartë të Shtetit, Bujar Leskaj, zv/ministri i Kulturës, Zef Çuni, Princ Leka II, qytetarë vlonjatë dhe nga rrethe të tjera të vendit. Zv/ministri i Kulturës, Zef Çuni, në fjalën e tij në ceremoninë zyrtare, u shpreh mes të tjerash se, Eqrem bej Vlora është personalitet i shquar i letrave shqipe. “Shpirti i tij endet mes letrave dhe dilemave politike”, theksoi Çuni. Kryetari i KLSH-së, Bujar Leskaj, në një prononcim për mediat e cilësoi Eqrem Bej Vlorën, personalitet të kulturës dhe një figurë poliedrike që, pavarësisht se e diskutueshme, ka lënë gjurmë dhe kontributin e vet në historinë e Vlorës dhe të Shqiopërisë, një nga pinjiollët e familjes Vlora.

Nga ana e tij, nipi i Ismail Qemal Vlorës, Darling Vlora, falenderoi në emër të familjes kryeministrin Edi Rama, për vendimin për kthimin në atdhe të eshtrave të Eqrem bej Vlorës. Ai u shpreh se vepra e Eqrem bej Vlorës, është aty dhe flet vetë.

Arkivoli me eshtrat e Eqrem bej Vlorës, i mbështjellë me flamurin kombëtar, u vendos në sheshin përpara ish- shtëpisë së Vlorajve në qendër të qytetit, e cila i është kthyer vajzës së tij. Ceremonia vazhdoi më pas në fshatin Kaninë, ku do të prehen eshtrat e Eqrem bej Vlorës në përmbushje të amanetit të tij.

Eqrem bej Vlora ndërroi jetë në mars të vitit 1964 në kryeqytetin e Austrisë, në Vjenë, ku edhe u varros.

Vendimi për kthimin e eshtrave të tij u mor nga Këshilli i Ministrave i Republikës së Shqipërisë në 7 mars.

Eqrem bej Vlora u largua nga vendi 70 vjet më parë

LETËR E HAPUR PER MINISTRIN E JASHTEM TE KOSOVES, Z. ENVER HOXHAJ

by

Do të ishte zgjedhje e duhur dhe gjithësesi e mirëpritur nga të gjithë ata që ia duan të mirën diplomacisë kosovare që z. Hoxhaj të emërojë profesorin Faton Bislimi në detyrën e të Ngarkuarit me Punë në Otavë që tani/

I Nderuar Ministër/

Fillimisht e ndjej për detyrë që me anë të kësaj Letre të Hapur t’ju uroj Juve, suksese në realizimin e objektivave të Ministrise suaj. Jemi një grup qytetarësh me nështetesi të ndryshme, me një synim dhe vullnet ashtu siç është dhe vullneti i Qeverisë se Kosovës, ai i promovimit të vlerave kulturore, njohja e Shtetit të ri të Kosovës në të gjitha sferat si dhe krijmi i marrëdhënieve midis popujve, princip ky i ndarë dhe i përgëzuar nga të gjithë.

I Nderuar Ministër, Javën që lame pas paralajmëruat hapjen edhe të një ambasade të re të Kosovës. Kësaj rradhe, diplomacia e vendit tone do të jetë prezente edhe në Otavë të Kanadasë.

Edhe pse pak me vonesë, vendimi i MPJ-së për të hapur ambasadën e Kosovës në Otavë duhet mirëpritur. Realisht, Kanadaja ka qenë një nga aleatet e vazhdueshme të ecjes së Kosovë drejtë clirimit e shtetësisë. Kanadaja, për nga fuqia ekonomike, po ashtu është një mike që Kosova duhet ta trajtojë me shumë respekt dhe përkushtim, sepse ka mundësi që vendi ynë të përfitojë nga mbështetja kanadeze edhe më shumë, sidomos në fushën e zhvillimit ekonomik.

Menjëherë pas publikimit të lajmit për hapjen e kësaj ambasade, sic është edhe e pritshme, fillojnë spekulimet se kush do ta përfaqësojë Kosovën në Kanada. Ne jemi dëshmitarë se shërbimi diplomatik i Kosovës është ende I ri dhe ka nevojë për njerzë me reputacion të lartë, profesionalizëm të thuktë, dhe përgatitje superiore. Diplomacisë sonë, sidomos në një vend të madh e të fuqishëm sic është Kanadaja, nuk i duhet një përfaqësues i tipit alla-partiak, por një njeri që me të vertetë do të punonte në interes të së mires së shtetit dhe vendit tone. Të gjithë që duan të bëhen ambasadorë mund ta kenë vullnetin e madh për punë, por jo të gjithë e kanë përgatitjen dhe njohuritë e duhura për ta sjellur të mira konkrete diplomacisë së shtetit tone.

Nga perspektiva e një doktoranti në marrëdhënie ndërkombëtare dhe si një njeri që ka magjistruar në politikë ndërekombëtare e diplomaci, unë e shoh shumë të nevojshëm përfaqësimin e Kosovës në Kanada nga një profesionist i mirëfilltë që jo vetëm se e ka elanin dhe vullnetin për punë, por I ka edhe njohuritë si dhe përvojën e duhur profesionale në një vend si Kanadaja, që do të thotë se e njeh nga brenda funksionimin e shtetit kanadez dhe si rezultat mund lehtë të navigojë drejtë suksesit të sforcimit të lidhjeve dhe projekteve ndërshtetërore.

Kurse, nga perspektiva e një të riu që dëshiron ta shoh sa më të hovshëm zhvillimin e Kosovës, sa më të ndritur të ardhmen e saj – mos për ne, të paktën për hire të fëmijëve tanë – unë besoj fuqishëm që Kosova ka njerzë të kalibrit të lartë që duhet t’I vëjë tani në funksion të shtetit dhe diplomacise. Ëndërra e atyre që dhanë jetën për këtë vend, duke përfshirë këtu edhe vet prindin tim, Dr. Fahredin Hotin, vëllaun e gjyshin tim, do të realizohet vetëm duke cuar përpara shtetin tone e jo assesi duke i kontribuar symbyllurazi vetëm një klani ose partie.

Prandaj, do të ishte zgjedhje e duhur dhe gjithësesi e mirëpritur nga të gjithë ata që ia duan të mirën diplomacisë kosovare që z. Hoxhaj të emërojë profesorin Faton Bislimi në detyrën e të Ngarkuarit me Punë në Otavë që tani. Pse profesorin Bislimi? Nuk e kam as fis as farë. Jemi njohur me të qysh në vitin 2003, kur ai ishte vetëm student në SHBA, por njëkohësisht ishte edhe anëtar aktiv i Lobit Shqiptaro-Amerikan dhe kishte ardhur në Kosovë me një delegacion të SHBA-ve të kryesuar nga Kongresisti Joseph DioGuardi, me të cilët paten vizituar edhe Krushën, vendlindjen time.

Faton Bislimi nuk është emër i panjohur edhe për opinionin publik shqiptar në Kosovë e jashtë saj, prandaj nuk do të bëj një përshkrim të bigorafisë së tij. Por, si një i diplomuar në Texas, I cili mandej ka magjistruar në Harvard ku mbahet mend për debatet e shumta fitimtare që i kishte patur me Vuk Jeremiqin e Tadiqin e Serbisë, së fundi ka garuar edhe në zgjedhjet locale të Gjilanit për kryetar komune si kandidat i një lëvizje qytetare “Koalicioni për Gjilanin” një nismë kjo që ishte përkrahur nga disa subjekte politike e grupe të ndryshme në Gjilan. Asnjëherë nuk ka qenë partisan politik, por gjithëherë I angazhuar në cështjen kombëtare sidomos me Lobin Shqiptaro-Amerikan, ku tani edhe shërben në Bordin e Drejtorëve të Ligës Qytetare Shqiptaro-Amerikane, me të cilën ka punuar që nga viti 2002.  Bislimi në SHBA ka punuar edhe si asistent për cështje të Ballkanit në Komisionin për Marrëdhënie me Jashtë të Kongresit.

Po pse Bislimi të na përfaqësojë në Kanada? Që nga viti 2009, Faton Bislimi ka jetuar e punuar në Kanada, ku fillimisht ka marrë edhe një magjistratur në marrëdhënie ndërkombëtare dhe ka ligjëruar lëndë të politikës dhe zhvillimit ekonomik në dy universitete në Halifax të Kanadasë—në Dalhousie University dhe në Mount Saint Vincent University. Tani, ai është në përfundim të studimeve të doktoraturës në marrëdhënie ndërkombëtare në njërin nga universitetet më të mëdha dhe më të mira të Kanadasë, University of Alberta, ku shërben edhe si studijues pranë Qendrës së Ekselencës së BE-së në këtë Universitet.

Në komunitetin shqiptar në Kanada, ashtu sikur edhe në SHBA, Bislimi vlerësohet shumë lartë dhe llogaritet vecse një lloj ambasadori joformal i Kosovës atje, sepse përmes fondacionit të tij arsimor, Bislimi Grup, ai ka realizuar disa projekte të shkëmbimit të studentëve në mes Kosovës dhe Kanadasë që nga viti 2012, një pjesë e të cilave është përkrahur edhe nga Departamenti për Punë të Jashtme i Kanadasë. Tutje, ai ka organizuar edhe ekspozitën e pare të nxënësve të Kosovës në Halifax në shenjë mirënjohje për kontributin e Kanadasë ndaj Kosovës, duke realizuar kështu edhe një sër takimesh në nivelet më të larta të Provincës së Nova Scotia-s dhe qeverisë Federale të Kanadasë edhe për një delegacion nga Kosova të kryesuar nga Zëvendës Ministri i Kulturës, z. Hajdin Abazi.

Për momentin, profesori Bislimi është duke punuar me disa universitete në Kanada që pritet të ofrojnë bursa akademike për studentë meritorë nga Kosova.

Prandaj, z. Faton Bislimi është zgjedhje ideale për të përfaqësuar Kosovën në Kanada, sepse e ka edhe përgatitjen akademike, edhe profesionale, edhe praktike (dmth përvojën në Kanada), por edhe vullnetin e gatishmërinë e lartë për të qenë në shërbim të shtetit të vet.  Pra, është në interes të Kosovës që z. Hoxhaj të mos e vonojë aspak këtë nominim, për të cilin i garantoj se brenda një afati kohor shumë të shkurtër, me punën e vet, profesori Bislimi do të krijojë e lansojë projekte të rendësishmë për vendin tone të përkrahur nga shteti kanadez. Kur ai ka bërë gjithë këtë punë në të mire të vendit pa patur fare pozitë zyrtare, nuk ka dyshim se në postin e përfaqësuesit të Kosovës, ai do të shumëfishonte sukseset e diplomacisë së Kosovës në Kanada në interes të drejtpërdrejt të shtetit tone.

Si qytetar i Kosovës por edhe si profesionist i fushës së marrëdhënieve ndërkombëtare, unë do t’i gëzohesha nominimit eventual të Faton Bislimit si ambasador  në Kanada dhe do të mburresha me këtë ambasadë.

Me Sinqeritet dhe Dashamirësi

Besnik F. HOTI

Ligjerus në Kolegjin Victory

Prishtinë

Tel: +377 44 105 152

besnikhoti@hotmail.com

Facebook: Besnik F. Hoti

 

VEPRIMTARI, ME DËSHMI PËR PRANIMIN DHE SHPËTIMIN E HEBRENJËVE, NË SHQIPËRI

by

Nga Murat Gecaj/Tiranë- Në sallën “Unesco” të Muzeut Historik Kombëtar të kryeqytetit,  u zhvillua veprimtaria me tematikë, “Shqiptarët dhe Hebrenjtë, para dhe pas Luftës së Dytë Botërore”(Pranimi dhe shpëtimi i hebrenjëve). Ajo ishte organizuar nga Instituti Shqiptar i Mendimit dhe i Qytetërimit Islam (AIITC), me drejtor dr. Ramiz Zekaj, në bashkëpunim me Fondacionin “Mbretëresha Geraldinë”. Veprimtaria u zhvillua me një Konferencë, ku u lexuan tema nga disa autorë dhe me shfqjen e flmit dokumetar “Besa”. Merrnin pjesë nga AIITC dhe Fondacioni “Mbretëresha Geraldinë”, punonjës të shkencës, kulturës e arsimit; diplomatë të ambasadave në Tiranë;  profesorë e akademikë;  nga institucionet zyrtare, shoqatat joqeveritare, media e shkruar dhe ajo elektronike e te ftuar të tjerë. Ndodheshin  edhe disa të ftuar nga Republika e Kosovës, ndër të cilët ishte z.Adem Demaçi.

Fjalën e hapjes e mbajti z. Faruk Borova, kryetar i Bordit të AIITC dhe ish-përfaqësues i Shqipërisë për Izrealin, në vitet 1993-1997. Pastaj u lexuan kumtesat e përgatitura: “Trajtimi i minoriteteve në Shqipëri” (nga prof.dr. Beqir Meta), “Shqiptarët dhe Hebrenjtë, gjatë kohës së Mbretit Zog”(nga Sulejman Gjana, kryetar i PLL) dhe “Një histori e shkurtër e pranisë së hebrenjëve  në Shqipëri” (nga Astrit Hykaj, regjisor-skenarist). Ndërsa më tej, në pamundësi ardhjeje në këtë veprimtarri, për të pranishmit u lexua “Dëshmia e një të mbijetuareje”, nga  Dr.Scarlet Epstein-OBE.

Përmes këtyre temave, u dhanë dëshmi e fakte të shumta për  pranimin e shpëtimin, strehimin dhe mbrojtjen e hebrenjëve (izrealitëve) në Shqipëri, që në kohën e mbretërisë dhe pas Luftës së Dytë Botërore, kur ata ndiqeshin nga nazistët, për t’i  kapur e shfarosur në kampin famëkeq të Aushvicit, në Gjermani. Ato flisnin qartë e më së miri, për  shpirtin njerëzor, traditat mikpritëse dhe besnikërinë e  popullit tonë, ndaj kujtdo që i ka ardhur në shtëpi dhe ka kërkuar ndihmën ose mbështetjen e tij.

Pjesëmarrësit në këtë veprimtari i përshëdeti bashkëshortja e Princit Leka, që dhe ai ishte i pranishëm, bashkë me disa anëtarë të Oborrit Mbretëror.

Fjalën e mbylljes e mbajti znj. Elia Zaharia, drejtoreshë e Fondacionit “Mbretëresha Geraldinë”.

Në këtë veprimtari mbresëlënëse u shfaq dhe u ndoq me mjaft interes nga të ftuarit filmi dokumentar, me titullin “Besa”, realizuar nga Astrit Hykaj. Gjatë koktejit, që ishte shtruar me këtë rast, të pranishmit panë me kërshëri ekspozitën fotografike, e cila pasqyronte bashkëjetesën e familjeve shqiptare e hebreje.

Tiranë, 29 mars 2014

UKRAINË – Minoriteti tartar i Krimesë gati të votojë për autonomi

by

BAKHTCHYSSARAI , 29 mars  – Tartarët e Krimesë u mblodhën te Shtunen per te diskutuar një votim për autonomi në tokën e tyre historike, pas aneksimit të gadishullit nga Rusia.

Përfaqësues tartarë të të gjithë Krimesë janë mbledhur në qytetin e Baçisarajit për një kongres, me qëllim që të vendosin për fatin e këtij komuniteti mysliman prej rreth 300 mijë personash.“Vjen një çast në jetën e çdo njeriu ku duhet të bëj një zgjidhje, që do të përcaktojë të ardhmen”, deklaroi lideri i tartarëve, Refat Chubarov.
Ai i propozoi turmës që “të votojë për një projektrezolutë që kërkon hapjen e procedurave ligjore dhe politike për autonomi kombëtare dhe territoriale të popullit tartar të Krimesë në territorin e saj histroik, Krime”.
Tartarët e shohin me dyshim Moskën që kur Josif Stalini urdhëroi deportimin e tyre në masë nga Krimeja drejt Azisë Qendrore në fund të Luftës së Dytë Botërore.