Archives for March 2014

PRESIDENTI MBLEDH KESHILLIN E SIGURISE KOMBETARE

March 11, 2014 by dgreca

‘Siguria Kombëtare’, Nishani: Si anëtarë të NATO-s, të dëshmojmë mirëkuptim dhe bashkëpunim/

Nga Anila Struga/.- Këshilli i Sigurisë Kombëtare u mblodh të martën në Presidencë, nën drejtimin e kryetarit të tij, Presidentit të Republikës, Bujar Nishani. Në takim ishin të pranishëm kryeministri Edi Rama, kryetari i Kuvendit, Ilir Meta, anëtarë të kabitetit qeveritar, ministri i Brendshëm, Saimir Tahiri, ministri i Jashtëm Ditmir Bushati, ministrja e Mbrojtjes, Mimi Kodheli, Prokurori i Përgjithshëm, Adriatik Llalla, kryetari i Partisë Demokratike të opozitës, Lulzim Basha, etj.

Në fjalën e tij, Presidenti tha sqaroi se mbledhja e sotme e Këshillit nuk ka lidhje me ndonjë rrezik akut, por me procesin e hartimit të një dokumenti që do të shtrihet për dekadat e ardhshme dhe që do të orientojë reformat më të rëndësishme të vendit.
“Si President i Republikës dhe Komandant i Përgjithshëm i FA-së do të jem gjithë kohës i vendosur për të ushtruar me përkushtimin maksimal autoritetin që më jep Kushtetuta dhe ligji në fushën e sigurisë kombëtare. Në vazhdim të kësaj vendosmërie si kryetar i këtij Këshilli, duke lutur mirëkuptimin dhe angazhimin tuaj, për ta shndërruar këtë Këshill në një mekanizëm aktiv, po përgatis një program vjetor të punës së tij”, iu drejtua Presidenti të pranishmëve.
Kreu i Shtetit theksoi se siguria kombëtare është një koncept i gjerë, që kontribuon pozitivisht ‘në mbrothësinë e kombit’. Si e tillë, tha ai, siguri kombëtare janë dhe elementë të jetës shoqërore, politike, kulturore si mirëedukimi, mirëshkollimi, sjellja qytetare, ndërgjegja komunitare, zbatimi me korrektësi i ligjit, marrëdhëniet normale shumicë-opozitë, mirëfunksionimi dhe bashkërendimi i punëve ndërinstitucionale etj”, theksoi Nishani.

“Siguria kombëtare, e përcaktuar dhe e institucionalizuar si e tillë, përfshin elementë të përcaktuar qartë, siç janë mirëfunksionimi i FA-së, ruajtja e rendit, Shërbimi Informativ, masat për ruajtjen nga terrorizmi, lufta kundër trafiqeve të paligjshme dhe krimit të organizuar, ruajtja e kufijve të vendit, paprekshmëria tokësore dhe detare, kujdesi për ekonominë në përgjithësi, si dhe kujdesi për ruajtjen e burimeve energjitike apo bizneseve strategjike, monedha, shëndeti i shtetasve etj”, tha Presidenti Nishani.

Ai falenderoi për praninë në takim, kreun e opozitës, Lulzim Basha, duke u shprehur se ”mirëpret kontributin e tij në çështjet e sigurisë”.
Duke u ndalur tek çështjet që do diskutohen në këtë takim, Presidenti ftoi pjesëmarrësit që të bëjnë ç’është e mundur ”për të ndarë këndvështrime sa më të përafërta lidhur me gjendjen aktuale, arritjen e problematikave, sfidat dhe më kryesorja përafrimin e sistemit tonë të sigurisë me atë të vendeve të tjera të NATO-s dhe BE-s”.

“Përgatitja e paketës ligjore të sigurisë dhe dokumenteve strategjik, deri në Samitin e NATO-s që do të mbahet në Uells, në shtator të këtj viti, do të jetë një rast i mirë që të provojmë se jemi anëtarë seriozë të Aleancës, që dimë të bashkëpunojmë dhe të mirëkuptohemi”, e mbylli fjalën e tij para Këshillit të Sigurisë, Presidenti Nishani.

Mbledhja ka vijuar me dyer të mbyllura, për të diskutuar çështje që lidhen me zhvillimin e reformës së bazuar në rishikimin e mbrojtjes 2013; plani i zbatimit, paketa ligjore, çështja e ristrukturimit të Forcave të Armatosura, etj

UKRAINË – Parlamenti i Krimesë shpall pavarësinë e gadishullit

March 11, 2014 by dgreca

SIMFEROPOL– Deputetët e parlamentit prorus të Krimesë deklaruan sot gadishullin të pavarur nga Ukraina, një etapë e paralajmëruar përpara mbajtjes së referendumit të dielën për të mundësuar bashkimin e saj me Rusinë.

“Një deklaratë pavarësie e Republikës Autonome të Krimesë dhe të qytetit të Sevastopolit u miratua nga 78 deputetë nga 81 të pranishëm”, sipas një komunikimi për shtyp të këtij parlamenti të konsideruar si ilegal nga autoritetet e Kievit.

Prokuroria: 7 të arrestuar, rekrutonin shqiptarë për të luftuar në Siri

March 11, 2014 by dgreca

Në kuadër të një hetimi të Prokurorisë për Krime të Rënda, me mbështetjen e plotë të Policisë së Shtetit, gjatë ditës së sotme janë arrestuar shtatë persona, të dyshuar si të përfshirë në rekrutimin e disa qytetarëve shqiptarë për të luftuar në Siri.

Në një deklaratë për mediat, Drejtuesi i Prokurorisë për Krime të Rënda, Eugen Beci, dhe Drejtori i Policisë së Shtetit, Artan Didi bën të ditur se të arrestuarit akuzohen për veprat penale të “Rekrutimit të personave me qëllim kryerjen e veprimeve terroriste”; të “Nxitjes, thirrjes publike dhe propaganda për kryerjen e veprave penale me qëllime terroriste”, dhe të “Nxitjes së urrejtjes ose e grindjeve ndërmjet kombësive, racave dhe feve”.Kështu, Gjykata për Krime të Rënda ka vendosur masën e sigurisë për personat e mëposhtëm: Genci Balla, nga Librazhdi, i vetëshpallur Imam i Xhamise te Unaza e Re, i paautorizuar nga Komuniteti Mysliman Shqiptar, (organizator) si dhe Bujar Asllan Hysa, nga fshati Bastar, Tiranë e banues ne Mëzez, Tiranë, me arsim te mesem, i vëtëshpallur Imam i Xhamise se Mezezit, i paautorizuar nga Komuniteti Mysliman Shqiptar, (organizator).

Beci bëri të ditur se në banesën e të arrestuarit Hyka u gjetën dhe u sekuestruan, dy aparate telefoni celular, disa karta memorie telefoni celular dhe aparat fotografik, kartë identiteti në gjuhën arabe si dhe një sërë kontrata depozitash bankare në emër të shtetasit Bujar Hysa dhe në emër të disa shtetasve të tjerë, disa libra fetarë, mes të cilëve Libri”Asgjësimi i teorisë së përzierjes së fesë Islame me fetë e tjera”.

Gjithashtu, ai tha se në objektin ku ushtron veprimtarinë fetare, u gjetën tre njësi kompjuteri, çantë ushtarake kamoflazhi, dy telefona celularë, 15 fishekë të kalibrave të ndryshëm.

Prokuroria tha se të arrestuarit e tjerë janë Edmond Balla, nga Elbasani, (organizator), Zeqir Imeri nga Dibra dhe banues Yrshek, Tirane, (organizator dhe pjesëmarrës). Në banesën e të ndaluarit Imeri u gjetën dhe u sekuestruan me cilësinë e provës material, 8 telefona celularë, 2 karta telefoni, një granadë ofensive e pa montuar, një armë automatike e tipit kallashnikov, katër krehëra automatiku, 320 (treqind e njezete) fisheke te kalibrit 7.62, një thikë, dy radio dhënëse-marrëse, një xhup kamuflazhi.

Ndërsa tre të arrestuarit e tjetër gjatë këtij operacioni janë Verdi Morava, nga Tirana financues i grupit, Fadil Muslimani (Dervishi), nga Elbasani dhe Astrit Tola, nga Dibra, të dy ndihmësa.

Në banesën e këtij të fundit u gjet një çifte 12 fishekë, 11CD, broshura fetare, fletore me shënime në gjuhën arabe, një sasi kartash SIM dhe disa numra celularë dhe një unfiformë ushtarake.

Prokuroria sqaron se shtetasit Genci Balla dhe Bujar Hysa, të cilët ushtrojnë aktivitet fetar ilegal, të palegalizuar në zonën e Unazës së Re dhe në fshatin Mëzez, Tiranë, dyshohet se kanë kryer veprime aktive për indoktrinuar persona të ndryshëm me ideologji radikale, për t’u angazhuar më pas në luftime në përbërje të grupeve terroriste ekstremiste që janë nën sanksione nga Organizata e Kombeve të Bashkuara.

Shtetasit Edmond Balla dhe Vervi Morava dyshohet se kanë kryer veprime konkrete për dërgimin e disa shtetasve shqiptarë në Siri.

Ndërsa shtetasit Fadil Musulmani, Zeqir Imeri dhe Astrit Tola dyshohet se kanë kryer veprime aktive për të ndihmuar organizatorët në rekrutimin dhe më pas dërgimin e disa shtetasve shqiptarë në Siri.

Gjithashtu, nga forcat e Policisë së Shtetit, në bazë të autorizimit të gjykatës, u ushtrua kontroll në disa ambjente në Tiranë dhe Pogradec, ku ushtronin veprimtarinë e tyre këta persona.

Ndërkohë, në kuadër të këtij hetimi, janë caktuar masat e sigurimit edhe për gjashtë persona të tjerë, të përfshirë në të njëjtën veprimtari kriminale, si edhe po vijojnë hetimet nga Prokuroria për Krime të Rënda dhe oficerët e policisë gjyqësore të Policisë së Shtetit.

Pse vendosa të jem me ”Nismën për Kosovën”?

March 11, 2014 by dgreca

Nga Faik KRASNIQI*/Në fillim të Janarit u takova me Prof.Dr. Jakup Krasniqin për një kafe, dhe në bisedën tonë rreth një orëshe diskutuam për shumë çështje që na preukopojnë të gjithëve. Prof. Krasniqi ishte lexues i rregullt i shkrimeve të mija prej vitesh, dhe më përgëzoi që pasqyroi realitetin tek ne dhe për guximin intelektual(Gjatë bisedës më dha librin e tij që e kishte ndarë për mua me titull ” Kosova në kontekst historik”). Prof. Krasniqi më inkurajoi që të vazhdoj të shkruaj kundër keqqeverisjes dhe dukurive negative, siç kam bërë deri më tash . Një nga temat që biseduam në atë takim ishte edhe rreth themelimit të partisë ”Nisma për Kosovën”. Biseduam rreth organizimit të partisë, sfidave që do t’i kemi si parti e re etj, etj. Si dy njerëz idealistë për Bashkim Kombëtar, parimorë dhe që ia duam të mirën Kosovës, kishim të njëjtat qëndrime rreth situatës politike dhe gjendjes së përgjithshme. Dhe, reciprocikisht shprehëm dëshirë dhe u dakorduam që si figurë publike edhe unë të jem pjesë e partisë. Dhe ashtu ndodhi. Që nga zyrtarizimi i partisë më 28 shkurt në sallën e kuqe të ”Pallatit të Rinisë” në Prishtinë, ku isha i ftuar, u bëra edhe zyrtarisht pjesë e një nisme që për udhëheqës të saj ka dy njerëz të dëshmuar edhe në kohën e luftës edhe në kohën e paqes, Prof.Dr.Jakup Krasniqi dhe z.Fatmir Limaj-Komandant Çeliku.

Prof.Dr. Jakup Krasniqin, e kam vlerësuar gjithmonë si patriot të madhë, njeri i drejtë dhe të sinqert.

Jakup Krasniqi është veprimtar i vjetër i çështjes kombëtare, luftëtar i lirisë, ideator me të tjerët për krijimin e PDK-së, tani person i cili ka përgjegjësi në krijimin e rrethanave për shqyrtimin dhe finalizimin e ligjeve duke e drejtuar institucionin më të lartë të shtetit Parlamentin në cilësinë e këshilltarit më të mirë të shtetit, që të vendos vlerat në shërbim të qytetarëve dhe shtetit. Jakup Krasniqi ka qenë një ndër shtyllat kryesore të UÇK-së. Jakup Krasniqi ka qenë një ndër themeluesit e dy partive kryesore në vend, të LDK-së dhe të PDK-së. Jakup Krasniqi është njeriu që kaloi 10 vite nëpër burgjet më famëkeqe të Serbisë pa u gjunjëzuar për asnjë moment. Jakup Krasniqi është njeriu që më së shumti është maltretuar nëpër burgje.

Jakup Krasniqi, politikani dhe diplomati me përmasa botërore, patriot dhe kombëtar, i drejtë dhe punëtor, i pakorruptuar, njeri parimor, i drejtë dhe i sinqert. Jakup Krasniqi është me fytyrë të hapur, ballëlartë dhe krenar sepse nuk bëri kurrfarë “bixhozi” me fatin e Kosovës. Jakup Krasniqi nuk bëri marrëveshje të dëmshme për Kosovën me serbin Ivica Daçiq. Këtë e bëri Hashim Thaçi dhe kompania e tij. Jakup Krasniqi, mjaft është për të që në histori do të mbetet si zëdhënës i të madhërishmës UÇK-së, i asaj ushtrie që ia ktheu pushkën makinerisë serbe për ta çliruar vendin, ndërsa Hashim Thaçi do të mbetet në histori me dy faqe të medaljes, të bardhën në kohën e luftës dhe me faqen e zezë në kohën e paqes, marrëveshjet me Daçiqin në dëm të Kosovës.

Unë besoj tek ”Nisma për Kosovën”!

Nisma për Kosovën, do të thotë një fillim i ri, me fytyra të reja, energji të reja, njerëz parimorë dhe me biografi të pastër. Unë besoj në ”Nismën për Kosovën” se do të ketë fytyra të reja të cilat nuk kanë pasur hapësirë nëpër parti tjera.

Unë besoj se ”Nisma për Kosovën” do të jetë subjekt i hapur për t’iu dhënë njerëzve hapësirë pavarësisht në cilin grup do të jenë, përndryshe edhe kjo parti nuk do të kishte dallim prej partive të tjera, pra do ishte vetëm një PDK e dytë. Unë besoj se ”Nisma për Kosovën” s’do të jetë parti e individit apo individëve, siç janë partitë e tjera ku vendos lideri i partisë dhe disa persona të fuqishëm në parti, por do të jetë parti e gjithë anëtarëve të saj dhe gjithë njerëzve që ia duan të mirën Kosovës. Unë besoj se ”Nisma për Kosovën” do të sjellë frymë të re në skenën politike të Kosovës. Unë besoj se tek ”Nisma për Kosovën” do të ketë demokraci të brendshme, ku çdo anëtar i saj do të shpreh shqetësimet dhe pakënaqësitë e veta. Unë besoj tek ”Nisma për Kosovën”, sepse në gjirin e saj do të ketë vend vetëm për figura të pastra, njerëz parimorë, me energji të reja dhe vetëm kështu do të jetë alternativë për qytetarët e Kosovës. Klasa politike në Kosovë tash e 15 vite e ka frikësuar këtë popull. Ky popull e ka humbur besimin tek institucionet e saj në të gjitha sferat dhe vetëm me figura të pastra, njerëz parimorë dhe energji të reja mund ta kthejmë besimin e humbur të qytetarëve ndaj institucioneve të Kosovës. Unë besoj se ”Nisma për Kosovën” do t’i jap fund keqqeverisjes në Kosovë, korrupsionit, krimit të organizuar, injorancës, nepotizmit etj. Unë kam besim që ”Nisma për Kosovën” do t’iu kthejë besimin dhe dinjitetin e humbur qytetarëve të Kosovës.

Arsyeja pse unë jam sot pjesë e ”Nismës për Kosovën”, është fal të nderuarit dhe shumë të respektuarit Prof. Dr Jakup Krasniqit. Falë këtyre dy njerëzve, z. Krasniqi dhe z. Limaj, unë besoj tek ”Nisma për Kosovën”. Beso edhe ti!

* (Autori është publicist nga Prishtina dhe anëtar i ”Nismës për Kosovën”)

Shqiptarët si të tillë , e zeza e kombit !

March 11, 2014 by dgreca

Nga Fahri XHARRA/

Demokraci vëlla , shkruaj çka të duash ,fol si të duash :”është kohë e artë”. ”Liri e të shprehurit” : shaj sa të mundësh , denigro kë të duash!. Poshtërsi kombëtare : ”Njollos sa të mundësh ! Mos e kurse askend !”. Qëpoj sipas qefit ,pakurrëfarë përgjegjësie ndaj kombit , ndaj historisë, ndaj ardhmërisë . Qëllimi i përbashkët : ” Nuk jemi komb , jemi të vonëshëm ,s´kemi heronj kombëtar , nuk e meritojmë shtetin -nuk i meritojmë të dy shtetet që i kemi , nuk jemi të aftë të udhëheqim dhe jemi rastësi në këto fysha e male të begata. Caku i huaj i ”qëllimit ” tonë : ” Largohuni nga këtu ,se jeni jo nga këndej pari! ”

Ideja e huaj , realizimi i ynë : Jemi komb i shpifur ! Nuk i takojmë as lëkurës e as mishit . Parat e huaja , mjerimi ynë .Kur e lexoj të shkruar nga deputeti i Kuvendit të Kosovës (e mos qoft ai kuvend se çka mbanë): “Debatet e fundit për Skënderbeun në Shqipëri kanë qenë mjaftë të mira dhe të trajtuara me profesionalizëm nga shumë historianë dhe analistë, kurse te ne në Kosovë ende nuk kemi një debat të tillë të mirëfilltë. Sipas librave autentik të historisë dhe sipas historianëve e analistëve nga Tirana u qartësuan shumë gjëra. Se Skënderbeu nuk kishte ngritur flamurin kuq e zi në Krujë por flamurin e Bizantit, se Kuvendi i Lezhës nuk ishte Kuvend shqiptar por ishte Kuvend i kombeve të ndryshme të besimit krishterë për të luftuar Perandorinë Osmane. Pra Kuvendi ishte në bazë fetare dhe jo në bazë kombëtare sepse në mesjetën e hershme kombet nuk kishin lindur ende dhe nuk kishte kurrfarë rëndësie se çfarë gjuhe flisje kur vihej interesi fetar para.Sipas historisë, Skënderbeu me t’u kthyer në Krujë muslimanëve shqiptar iu dha të zgjidhnin në mes krishterimit ose vdekjes, shumica e tyre refuzuan të braktisnin besimin islam dhe i masakroi pa mëshirë.”… më lind dyshimi të mëndoj se mos rastësisht (bëje Zot ëndërr!) nuk jam në Kosovë . Por kur e shof që është e shkruar dhe e folur shqip (bëje zot ëndërr) nuk i zë besë vetës që jam shqiptar.Sa më ” dhimbset” Perandoria turke që nuk gjeti miq në atë kohë në tokat tona, se sa mirë do ta kishim sikur të mos na vinte (me zjarr e tmerr) kurrë këndej pari.Sa i paskan pëlqyer deputetit ”debatet e fundit për Skënderbeun në Shqipëri ” dhe me çfarë keqardhje ende në Kosovë nuk paskemi një sqarim të mirëfilltë për atë kohë . Sa me”keqardhje po shkruaj ”që s´po iu del krah askush në Kosovë amirahmetëve,gëzimkëlmendëve, fuadramiqëve,shefqetkrasniqëve, milazimkrasniqëve .

Po ku paskemi qenë deri më tani që nuk e paskemi dijtë që Skenderbeu e paska ngritur flamurin e Bizantit në Krujë (oliverschmiti , fatos lubonja , abdi baleta )? Çfarë mësimi i

”mbrapësht” i historisë sepse nuk na kanë treguar që Skenderbeu ” me t’u kthyer në Krujë muslimanëve shqiptar iu dha të zgjidhnin në mes krishterimit ose vdekjes, shumica e tyre refuzuan të braktisnin besimin islam dhe i masakroi pa mëshirë.” ?!?! Dhëmbshuri historike . Vajtim!Sa të mjerë që jemi e nuk po e dijmë që ne jemi komb i ”krijuar ” fare rishtas , apo të ardhur nga Azerbajxhani bukur moti , apo që jemi serbë të albanizuar , apo jemi arnautashë që dikur flitnim serbisht dhe turku na e ”mësoi shqipen ” për inat të të popullit tonë ” amë , që të ndihemi shqiptarë (Oliver Schmitt) . Sa më vjen keq që ne nuk po ia ”ditkam ” për nderë Perandorisë Osmane që na bëri ”njerzë dhe na kulturoi” (Fatos Lubonja). Po ç´lidhje ne kishim me pellazgët , ilirët , dardanët ? Të kotë e kemi që mundohemi të krijojmë ” lidhje artificiale ” me gjëja se të parët tonë (Oliver Schmitt).

Po na jemi rastësi , se ”eshtrat tona të të parëve tanë ,kanë humbur maleve si ato të arushave dhe ujqërve ” dhe se vështirë të ” gjindet ndonjë fakt arkeologjik” për ne (J.Deretiç)

Sa më vjen keq që kot po mundohemi të kemi një gjuhë të bashkuar , të njësuar kur e dijmë që ”jemi popull me njëqind dialekte. dhe që fshati me fshat ” nuk mirret vesh ndër veti ( Jovan Cvijiç) S´di pse nuk gëzohemi që flasim një gjuhë të re ”kosovare ” (gegnishte kosovare të Migjen Kelmendit ) , apo pse nuk gëzohemi që e kemi një identitet ”kosovar ” ( të Halil Matoshit ) e mbi të gjtha një ”identitet musliman ” ( të Rexhep Qosjës) Çudi! dhe mosmirëmjohës.Sa keq që nuk po jemi falëmnderues që po na këshillojnë që vajzave tona t´iu vejmë shaminë mbi kokë deshtën ato apo jo. Por edhe feexhën , pse jo nëse ato e pranojnë Pse nuk ndihemi krenar që kemi nismëtar të kthimit pas. Pse nuk jemi krenar që vendet arabe dhe turke ”prodhojnë ” pa shpenzime familjare e as nuk harxhojmë fonde publike për që të na i ” shkollojnë” djemtë tanë? Eeeeeeeej , kur ata kthehen mu atëherë do të urrejmë pse jemi shqiptarë ,pse flasim shqip . Sa ”gëzim”!

Është për brengosje se si i madh e i vogël nuk kërcejmë sipas ”defit” arab , dhe që 15 vjet këndej në Kosovë , e që 22 në Shqipëri në ”lulën e demokracisë ” nuk ndihemi krenar për këtë liri të vetëhumbjes, vetëmohimit, dhe vetëzhbërjes.”Pra Kuvendi ( 1444fxh ) ishte në bazë fetare dhe jo në bazë kombëtare sepse në mesjetën e hershme kombet nuk kishin lindur ende dhe nuk kishte kurrfarë rëndësie se çfarë gjuhe flisje kur vihej interesi fetar para atij kombëtar… e sot që po i themi vetës komb (mos kofshim , më mirë) , për ç farë ineresi po flasim. E edhe në Kuvend!

Por edhe diçka , sa mirë që ishim dhe e kishim dikur ”Më 1887, në Shqipëri kishte tre mijë shkolla. Prej të cilave një mijë e dyqind shkolla publike turke, po aq shkolla private greke, treqind shkolla bullgare, serbe dhe vllahe, shkollë shqipe vetëm një, me drejtor Pandeli Sotirin!

Pra, gati çdo gjuhë lejohej të mësohej në “perandorinë tolerante”, përveç njërës: gjuhës shqipe! Dhe historia s‘mbaron me kaq. Katër vite më pas, Pandeli Sotiri vritet, shkolla shqipe mbyllet! Kjo është e vërteta, që ende nuk është shpalosur qartë përpara popullit shqiptar. (Ismail Kadare)” . Te ecim o burra e ta kthejme kete kohë!

Pa e harruar : “Të falemnderit” Shqiperi për debate të trajtuaraa me profesionalizëm ,për Skenderbeun . “Te falemnderit” Tv Rrokum për emisionet qe po na publikon. Ju falemnderit të gjithëve atyre që po na ndihmojnë me sa munden që të mos e duam popullin tonë dhe të kaluarën tonë historike. I falemnderoj të gjithë ata që po çojnë ujë në mullirin e sllavizmit .”I falemnderoj “te gjithe ata qe punojne kunder kombit dhe ardhmerise europiane te sajë!