Archives for February 2015

Super Bowl – New England Patriots, një skuadër e madhe

February 2, 2015 by dgreca

*Patriots fiton Super Bowl, ndiqet nga 110 milionë spektatorë/

*Tom Brady ishte më i miri në sfidën e madhe New England Patriots -Seattle Seahawks./
Finalja e këtij viti në futbollin amerikan ka shkuar në favor të New England Patriots. Ata mposhtën në një nga duelet sportive më spektakolare të planetit Seattle Seahawks me rezultatin 28-24, duke marrë titullin e parë që prej vitit 2004.
Në një finale ku emocionet ishin pushtuese deri në minutën e fundit, Patriots ishin në disavantazh prej 10 pikësh në fillim të pjesës së katërt, por Tom Brady realizoi përmbysjen dhe njëkohësisht regjistroi 12 “touchdoën” gjatë gjithë takimit, duke thyer kështu rekordin e Joe Montana. Pittsburgh Steelers është ekipi që ka më shumë trofe të Super Bowl, gjashtë të tillë.
Kjo sfidë u ndoq nga më shumë se 110 milionë telespektatorë. Secili nga lojtarët e New England Patriots kanë përfituar nga 97 mijë dollarë, ndërsa ata atë Seattle Seahawks nga 49 mijë. Reklamat këtë vit kanë kushtuar 4.5 milionë dollar për 30 sekonda, një rekord i ri.
Tom Brady ishte më i miri në sfidën e madhe New England Patriots -Seattle Seahawks. New England shënoi fitore me rezultat 28:24. Brady ishte lojtari i ndeshjes i Superbowl-it. Finalja numër 49-të e futbollit amerikan rezultoi një spektakël më vete, me New England Patriots që arriti të fitonte për herë të 4-t në histori trofeun Vince Lombardi duke mposhtur kampionët në fuqi të Seattle Seahawks. Tom Brady u shpreh i lumtur për triumfin e madh.
“Ishte me të vërtetë e pabesueshme ajo që bëri Malcolm Butler. Ne nuk dëshironim të merrnin pushim pavarësisht se loja po shkonte drejt fundit dhe për fat të mirë shënuam duke fituar sfidën. Malcolm u tregua thjeshtë i mrekullueshëm me lëvizjen e tij. Kjo ishte një ndeshje fantastike për ne, të gjithë djemtë dhanë maksimumin në fushë dhe unë jam jashtëzakonisht i lumtur për këtë sukses”, ka thënë Brady.
Një meritë të madhe për triumfin e 4-t në histori të New England, e ka pa dyshim trajneri dhe strategu i Patriots, Bill Belichick. “Ne të tre fazat e ndeshjes ne luajtëm në mënyrë fantastike. Sulmuam ne ashtu siç duhet dhe u mbrojtëm jashtëzakonisht mirë, me pak fjalë u treguam një ekip special. Të gjithë djemtë dhanë ndihmesën e tyre në këtë sukses dhe unë nuk mund të flas për emra të përveçëm.
Jemi një skuadër e madhe dhe ne kemi në ekip një grup të përbërë nga luftëtarë të jashtëzakonshëm. Edhe pse ishim në disavantazh asnjëherë nuk na shkoi në mendje se mund ta humbasim sfidën. Psikologjikisht dhe fizikisht ishim më i mirë se kundërshtari dhe kjo na ndihmoi për ta fituar Superbowl-in”, tha Belichick.

SHQIPERIA E PERMBYTUR, JANE SHPETUAR 311 PERSONA

February 2, 2015 by dgreca

Shqiperia po kalon caste te evshtira. Jugu eshte nen uje. Agjencia Reuters ka pasqyruar situatën e rëndë në jug të vendit, me imazhe dhe informacione për fshatrat dhe zonat e prekura.
Reuters shkruan se pas daljes së lumit vjosa nga shtrati, uji pushtoi tokat, shtëpitë, biznezet dhe gjithcka të dielën. Fshatarët shqiptarë janë ende të bllokuar në shtëpitë e përmbytura teska shërbimet e shpëtimit dhe emergjencës me helikopterë të ushtrisë kanë evakuuar gra, njëra prej tyre shtazënë, fëmijë , barinj dhe punëtorë të një pularie.
Banorët e zonave përreth Vlorës dhë Fierit, në të cilat kalon Vjosa, kanë humbur bagëtitë e tyre si pula, dele dhe derra. Shumë familje kërcënohen gjithashtu nga lumi i Osumit në Berat dhe një pjesë e mirë e tyre janë evakuuar.
Të bllokuar nga ujërat e fuqishëm, shumë prej banorëve telefonuan televizione të ndryshme për ndihmë, përfshirë dy vëllezër, të cilët u strehuan në një bunker, i mbetur që nga koha e komunizmit.
Derdhjet e Vjosës përfshinë edhe brigjet e Përmetit, duke bllokuar rrugën nacionale. Sipas parashikimeve të ekspertëve të motit, edhe në ditët në vijim priten shira të rrëmyeshëm, përfundon Reuters.
Nga dita e djeshme, kur edhe filloi përmbytja në Shqipëri janë shpëtuar 311 persona në të gjitha zonat e rrezikuara. Shifra është dhënë nga Policia e Shtetit.
Numri më i madh i personave të shpëtuar është në qarkun e Fierit, 112 persona, ku aktualisht po vijon ende operacioni. Në qarkun e Vlorës janë shpëtuar 98 persona, vjon operacioni. Në qarkun e Gjirokastrës janë shpëtuar 7 persona. Në qarkun e Beratit janë evakuuar 90 persona dhe në qarkun e janë shpëtuar 4 persona.
Policia e Shtetit po ashtu i bën thirrje banorëve që të bashkëpunojnë për të telefonuar në numrin pa pagesë 129 për t’u ardhur në ndihmë.
Deklarata e Policisë së Shteti
Strukturat e Policisë së Shtetit vijojnë operacionet e evakuim–shpëtimit të banorëve në zonat e përmbytura nga dalja e lumenjve nga shtrati si pasojë e motit të keq.
Prej ditës së djeshme dhe deri në këto momente Strukturat e Policisë së Shtetit , konkretisht Forcat e Lëvizshme Operacionale , Delta Forcë dhe efektivat e Drejtorisë së Policisë së Qarkut Fier, Vlorë, Berat, Gjirokastër dhe Elbasan kanë vakuuar dhe shpëtuar 311 persona dhe konkretisht:
Në Qarkun Fier janë evakuuar dhe shpëtuar 112 persona, ku aktualisht vijon operacioni për evakuimin edhe të disa banorëve të tjerë.
Gjatë paradites së sotme janë shpëtuar disa grupe barinjsh, dy të moshuar (çift) dhe dhjetra banorë të fshtrave Dazezë, Ferras, Hoxharë, Bishan, Rrefik, e Shtyllas, të cilët janë evakuuar me gomone nga FNSH e Delta Forcë.
Në Qarkun Vlorë janë evakuar dhe shpëtuar 98 persona, dhe vijon operacioni për të nxjerrë një bari i cili ka mbetur i bllokuar nga uji afër Bisht Malit.
Në qarkun Gjirokastër janë evakuar 7 persona . Aktualisht s’ka asnjë banorë të rrezikuar dhe të gjitha akset rrugore janë të kalueshme .
Në qarkun Berat:
Janë evakuuar nga Policia 90 persona. Aktualisht nuk ka asnjë telefonatë nga asnjë banor që të kërkojnë ndihmë . Të gjitha rrugët nacionale tashmë janë të kalueshme pasi niveli i ujit ka rënë.
Në Qarkun Elbasan mbrëmjen e djeshme janë evakuuar 4 persona.
Shtabi i emergjenës në Drejtorinë e Përgjithshme të Policisë së Shtetit vijon të funksionojë dhe po rakordon veprimet me Shtabin e Emergjencave .
Policia e Shtetit kërkon bashkëpunimin e banorëve duke sinjalizuar në Sallat Operative nëpërmejt numrin pa pagesë 129 me qëllim që policia t’ju shkojë në kohë në ndihmë.
Strukturat e Policisë do vijojnë të jenë në gadishmëri , deri në normalizimin e plotë të situatës.
Fieri, Vlora, Gjirokastra, Tepelena, Berati, Elbasani, jane ne emergjence.Në qytetin e Fierit , pas nje nate te frikshme, tashmë krejt zona është e kalueshme, pa prani të ujit, ndërsa niveli i lumit Gjanica ka pësuar rënie që nga mbrëmja e kaluar.
Rreshjet e shumta të ditëve të fundit sollën një rritje të nivelit të lumit Gjanicë dhe si pasojë daljen e tij nga shtrati.
Situata u parashikua dhe u njoftua nga shtabi i emergjencave civile në Bashkinë Fier qysh ditën e enjte, nëpërmjet mediave lokale dhe komunikimeve direkte me qytetarët.
Shtabi i emergjencave civile në bashkinë Fier, drejtuar nga Kryetari i Bashkisë në bashkëpunim dhe me FNSH-në ka qenë në gadishmëri të plotë në terren duke nisur nga dita e premte, deri në orët e para të ditës së hënë.
Nga prurjet e shumta të lumit Gjanicë uji ka depërtuar në katet e para të afro 50 banesave dhe 10 bizneseve në lagjet “1 Maji” dhe “Kongresi i Përmetit” të cilat janë nën nivelin e argjinaturës së lumit.
Gjatë gjithë kohës në gadishmëri së bashku me shtabin e emergjencave civile kanë qenë dhe forcat e FNSH-së me 3 varka shpëtimi në të dy anët e lumit. Situate ka qenë gjatë gjithë kohës nën kontroll të plotë.
Në orët e vona të ditës së dielë niveli i ujit të lumit nisi të pësojë rënie. Gjatë ditës së hënë pothuajse i gjithë uji është larguar nga banesat dhe bizneset dhe e gjithë zona tashmë është e kalueshme.
Fshatrat e komunës së Novoselës në Vlorë janë totalisht nën pushtetin e ujin, duke shënuar zonën më kritike në jug të vendit si pasojë e përmbytjeve nga moti i keq. Mijëra persona kanë lënë banesat e tyre, ndërsa dhjetëra të tjerë janë në pritje të evakuimit nga ekipet e shpëtimit, ku në disa raste është e detyrueshme ndërhyrja me helikopterë për shkak të terrenit të pakalueshëm nga toka. Policia, ushtria dhe Emergjencat Civile janë në terren për të shpëtuar banorët e izoluar në banesa apo biznese të përmbytura. Televizioni A1 Report i ka dhënë zë apelit të të përmbyturve drejt autoriteteve për t’i evakuuar në zonat nga ku ata ndodhen të rrezikuar.

Ministri i Bujqësisë, Zhvillimit Rural dhe Administrimit të Ujërave, Edmond Panariti tha për A1 Report se shkak për situatën kritike të përmbytjeve në jug të vendit janë bërë ndërtimet me leje dhe pa leje që janë dhënë për banesat e bizneset pranë lumenjve .
Sekretari i Përgjithshëm i Partisë Demokratike, Arben Ristani u kërkoi degëve lokale dhe të zgjedhurve vendorë të PD-së të mbajnë kontakte të vazhdueshme me banorët dhe të informohen për gjëndjen e tyre.
Sekretari i Përgjithshëm i PD-së, Arben Ristani vizitoi zonat e përmbytura të Fierit dhe Vlorës dhe takoi banorët e prekur nga kjo situatë e rënduar nga reshjet dhe me gjithë përpjekjet e shtabeve lokale, gjëndja është e rënduar dhe dhjetëra banorë rrezikojnë jetën dhe pronat.
Ristani u kërkoi degëve lokale dhe të zgjedhurve vendorë të PD të mbajnë kontakte të vazhdueshme me banorët dhe të informohen për gjëndjen e tyre si dhe kërkoi bashkëpunim të plotë me autoritetet për t’u ardhur në ndihmë njerëzve në vështirësi, pasi jeta e tyre dhe prona është prioritet absolut. “Kushtet e rrethanat kërkojnë domosdoshmërisht shumëfishimin e përpjekjeve dhe resurseve qeveritare”, pohoi Ristani.
Ndërtimet pa kriter buzë lumenjve janë një tjetër shkak i përmbytjeve masive në fshatrat e komunës së Novoselës, Fierit, Memaliajt etj. Ndërtesat e banorëve të ndërtuara shumë pranë lumenjve, të cilat tashmë ndodhen në ujë, janë bërë në mënyrë të pa planifikuar.
Vetë ministri i Bujqësisë, Zhvillimit Rural dhe Administrimit të Ujërave, Edmond Panariti, theksoi se shumë prej ndërtimeve që janë parë në fotografi të përmbytura nga uji, mund të jenë ndërtime pa leje, ose me leje, por të ndërtuara jashtë çdo kriteri dhe pa asnjë studim.
Panariti bëri me dije se këto ndërtime mund të kenë ndikuar në përkeqësimin e situatës së përmbytjeve, pasi kanë bllokuar kanalet e treta të kullimit, duke e bërë të pamundur tërheqjen e ujit që përmbyti jugun, si pasojë e daljes nga shtrati të lumenjve. Në këto foto shihet qartë që këto ndërtime janë bërë pa asnjë plan, buzë lumenjve.

MJAFT MË SE NA KENI SJELL SHPIRTIN NË MAJE TË HUNDËS!

February 2, 2015 by dgreca

Shkruan: Avdi Ibrahimi-Prizren/
Çfarë çmendurie! Më ka rastisur të dëgjoj e lexoj gati çdo ditë disa njerëz që janë të apasionuar pas liderit të tyre partiak sa konfuzioni i tyre moral, sikur na kujton atë trajtimin e mendimit apsurd, ku dita nuk mund të jetë assesi më e ngrohtë se nata, ku drita për ta assesi nuk është më e ndritshme se errësira, ku toka assesi nuk është më e thatë se deti, atëherë është mbase e qartë se njerëzit e tillë e kanë humbur aftësin për të shquar dallimin.
Qysh nga kohëra të lashta njerëzit që bënin biznes e pastaj disa edhe bëheshin “udhëheqës” që nëpërmjet parasë e mashtrimit, të atij apo këtij populli, tani të këtij apo atij shteti, kanë keqpërdorur emrin e “Udhëheqësit” për qëllime personale, kështu ata të mëparshmit, po edhe këta të sotshmit për të justifikuar të pajustifikueshmen.
Mbase besimi tek lideri partiak i takon kohës së re. Njerëzit, duke qenë inferior dhe te varur drejtëpërdrejtë nga lideri i tyre partiak, e ngritin në kult atë, duke i dhënë atributin e të paprekshmit… Të besosh në një lider nuk dëmton askënd dhe është tejet personale, por të jeshë i vetëmashtruar, e pastaj t’i mashtrosh të tjerët, është spekulim, është pandershmëri, është apsurde, është mbase edhe çmenduri! Është e kuptueshme se ka njerëz që kanë nevojë për një kult frike apo adhurimi, ka njerëz që besimin në liderin e tyre e ndjejnë si shpresë dhe forcë për të përballuar dhe realizuar qëllimet e të jetuarit.
Po ju kujtojmë këtyre servilëve të vetëmashtruar se, të luftosh pushtuesin e kombit shqiptar me penë e pushkë nuk është diktaturë, por edhe të jeshë kundër keqeverisjes së pushtetarëve të tanishëm nuk është antiatdhetarizëm, por përkundrazi është të jeshë i ditur dhe i kulturuar njëkohësisht të jeshë me ndjenja të larta atdhetare. Këtë ndjenjë të lart kulture dhe atdhetarie e tregun me vepra heronjtë e heroinat e Kombit Shqiptar nëpër shekujt e përflakur. Këtë ndjenjë të lartë atdhetarie dhe kulture e pati edhe Komandanti legjendar i UÇK-së Adem Jashari bashkë me luftëtarët e lirisë e natyrisht as kjo nuk quhet diktaturë.

Politika e rezistencës pasive nuk është asfarë shenje e qytetrimit evropian, nëse nuk e mbron dinjitetin kombëtar, por është dukuri e vetënënshtrimit dhe fyerje kombëtare. Por as politika e “nacionalizmit si kapital politik”, nuk është asfarë shenje e atdhedashurisë, por dukuri e nënshtrimit politik. Politika e “integrimeve” e “hapsirave demokratike”, e “kompromiseve”, e “qarkullimit të lirë të njerëzve”, nuk është asfarë premise politike, por mohim i dinjitetit kombëtar.

Jemi dëshmitar se sot, në Qeverinë e Kosovës të Isa Mustafës e Hashim Thaçit, ndodhet në bashkëqeverisje një Ministër për Kthim, nga Lista Sërbska, njëfar Aleksandri i quajti “egërsira” familjaret e të zhdukurve shqiptar nga Gjakova, që gjakuan për liri… që Shteti terrorist serb i Aleksandrit bëri gjenocit mbi popullin shqiptar, para disa viteve, ku ende kullojnë gjak plagët shqiptare.
Si qytetar shqiptar i Republikës Shqiptare të Kosovës, apeloj të reflektoj Qeveria e Kosovës, sa s’është bërë vonë, ti plotësoj këto tri kërkesa jetike të popullit:
1. Ta shkarkoj sa më parë Jabllanoviqin nga kabineti qeveritar i Isa Mustafës.
2. Trepça gjigandi ynë ekonomik të bëhet ndërmarrje publike.
3. Të ndaloj me të gjitha mjetet paqësore largimin e qytetarëve shqiptar nga Kosova.
Kjo është mbase detyrë mbi detyrat e Qeverisë së Ksovës, që kërkon situata aktuale, mos përfillja e këtyre kërkesave gjithpopullore na bënë të ju themi: Mjaftë më se na keni sjellë shpirtin në maje të hundës, nuk beson më asnjë qytetar i Kosovës në këta politikan idhuj pakrena, që vazhdimisht bënë kompromise politike në dëm të shqiptarëve të Kosovës, e durimit i ka ardhur fundi… Qeveria t’i kërkoj llogari Aleksandrit, e të bëjë largimin e menjëhershëm, nga pozitat e larta në Republikën Shqiptare të Kosovës, të këtij Aleksandri dhe gjithe aleksandrave që hanë bukën e Shtetit Shqiptar të Kosovës, por qe punojnë e veprojnë për Serbinë gjenocidiste!

Prizren, 2 shkurt 2015.

KA NDËRRUAR JETË VEPRIMTARI I KOMUNITETIT SHQIPTAR NË SHBA, DR. SELAHEDIN VELAJ

February 1, 2015 by dgreca

Funerali te Premten e ardhshme duke nise nga Ora 10 am ne adresen:Gallagher Funeral Home
31 Arch Street/
Greenich, CT CT.06830/
Tel i Funeralit: 203-869-1513/
….Redaksia e Diellit njofton bashkatdhetarët se ka ndërruar jetë veprimtari i njohur i komunitetit shqiptar në SHBA, ish kryetar i degës se VATRES së Nju Jorkut, dr. Selahedin Velaj. Z. Velaj është një ndër shqiptarët nacionalist që u largua nga Shqipëria fare i ri, pas Luftës së II Botërore. Familja e tij nga Kanina e Vlorës kaloi kalvarin e burgjeve komuniste.
Fillimisht z. Velaj kaloi në kampet e refugjatëve në Itali dhe më pas erdhi në SHBA. Gjatë të gjithë jetës ai ishte një shembull i vyer për bashkadhetarët, si pikë orientimi për t’i shërbyer cështjes kombëtare. Në Amerikë ai u lidh ngushtë me Federatën Vatra dhe ishte jo vetëm pjesmarrës por edhe organizator dhe udhëheqës i veprimtarive të Vatrës, kryesisht të degës së Nju Jorkut, ndër më aktivet e Federatës.
Selahedin Velaj ishte një ndër pjestarët e delegacionit të Vatrës, që vendosi ura komunikimi mes arëbëreshve të Italisë dhe Shqiptarëve të Amerikës. Më 1968 ai së bashku me kryetarin e Vatrës Peter Chiko, Anthony Athanas, dr. Hamdi Uruci dhe të tjerë ishin të ftuarit e vëllezërve të gjakut, arbëreshëve të Italisë me rastin e vendosjes së bustit të heroit Kombëtar në 500 vjetorin e heroit Gjergj Kastrioti Skënderbe në Romë, veprimtari që shënoi dhe lidhjet mes dy diasporave.
Një vit më pas , nëntor 1969, me rastin e 60 vjetorit të Gazetës Dielli, organ i Vatrës, dr. Velaj ishte pjesë e komisionit të festimeve. Është pikërisht kjo ngjarje festive, që shënoi kulmin e bashkëpunimit mes shqiptarëve të Amerikës dhe arbëreshëve. Një delegacion i madh prej arbëreshëve udhëtoi me Al Italian drejt Bostonit me 20 nëntor 1969, ku për ditë te tëra u zhvilluan veprimtari të përbashkëta, si në Katedralen e Shën Gjergjit, tek vendvarrimi i Fan S Nolit dhe Faik Konicës, Pier Four i famshem i Antoni Athanas,e deri tek veprimtaritë e kulmore të Nju Jorkut, ku përvec një seminari shkencor historik, u oroganizuan edhe ekspozita piktures me dy korifejtë e pikturës shqiptare, Ibrahim Kodra e Lin Delia, një paradë fanatastike e shqiptarëve të Amerikës dhe arbëreshëve, ku ranë në sy veshjet e bukura arbëreshe dhe të trevave shqiptare, paradë që nisi nga Rockfeler Center deri Katedralen e famshme të St Patrikut, veprimtaritë e përbashkëta fetare në Katedrale, dhe finalja u shënua me darkën përmbyllse, ku morën pjesë më shumë se 1000 vetë. Meritë në këtë veprimtari kishte edhe dr. Selahedin Velaj, që ishte pjesë e delegacionit.
Dr. Velaj njihet edhe për aktet e veta të bamirësisë si dhe përkrahjen që u ka dhënë shqiptarëve në nevojë apo përkrahjen që i ka dhënë brezi të tri. Ai ishte pjesë e shumë veprimtarive kulturore kombëtare mes shqiptarve.Ikja nga kjo jetë e dr. Selahedin Velaj është një humbje jo vetëm për bashkshorten e tij dhe djalin, por për të gjithë shqiptarët.
Lamtumirë dr. Selahedin Velaj!
Funerali te Premten e ardhshme duke nise nga Ora 10 am ne adresen:Gallagher Funeral Home 31 Arch Street/ Greenich, CT CT.06830/ Tel i Funeralit: 203-869-1513/ –
(D Greca- Gazeta Dielli)

E FTUAR NE SOFREN E DIELLIT- ANGJELINA KRASNIQI

February 1, 2015 by dgreca

MË THËRRET KRISMA E FJALËS/
Nga ANGJELINA KRASNIQI/

Sot hija ime përkundet majave shkëmbore,/
Hepohet,zgjatet kreshtash e degëve malore./
Mes harvallëqeve,thepash e shkëmbinjëve,/
Të sodis Pllajën Kosovë,mes gishtërinjëve./

Asnjë roje të mos ketë forcë,që të më ndalë,
Me frymën time të mallshme, çdo gjë e kall.
As mure të dhembëzuara mos më dalin para,
I rrafshoj me erën time, i kthej muret në ara.

Sot shikimin e dua të kthjelltë si lot-qumështi,
Mallin për AtëDheun do ta derdh nga mushti.
Jo mbi Maja errësirë,ato nuk janë shkretëtirë,
Janë vetëtina-diell,shpërthime ujë për të pirë….

Atë ujë-malli dua sot ta pi nga largësia e tretur,
Të gjitha pikimet t’i fus në gotë,të njomoj veten.
Atë rrjedhë lozonjare të Lumit të Bardhë,kulluar,
Të ndjej,kur më derdhet mbi fije barin-trup,uruar….

Dua që të rrëshqas ngadalë thepishtes tatpjetë,
Të ulem shelgjishteve të Karragaçit e të Parkut.
Të dëgjoj krismën e fjalës që del nga çdo fletë,
Dhëmbët ti ngul këcellit, ku lashë notat e vargut…

Me gjetheblertën nëpër buzë të vazhdoj rrugtimin,
Të ndalem në fushën,ku pushojnë eshtrat pa kala,
Të më rrjedhin shtat palë lot,dhe të mos pëpëtinin,
Mërmërimën,në të vajtuar ta mbledh në mushama….

Ta bëj notë për gjithë ata që ikën pa zhurmë,bujë,
Që nuk u mbuluan me mermer dhe as me këngë,
Që jetën e kthyen në një burim të kristaltë me ujë,
E lanë në pragjet tona traditën dhe mallin e rëndë.

T’i lutem gurit të rëndë të varrit gjyshit e gjyshes,
Dhe kryqit që e mbajnë si kandil gjithherë te koka.
U premtoj,do të kem në jetë krahët e dallëndyshes,
Për të ikur nga mërgimi, e të vendos lule tek porta.

Sot, i lutem çiftelisë së shpirtit, të mos i këputet teli,
Të vajtojë dhimbshëm për mallin,brengat e eshtrat.
Të ngul këmbët e mia deri në pulpa,të digjem hellit,
Si mishi qengjit pa faj,që piqet e rreshket për festat.

Pastaj,ashtu e kërcyllosur, ardhur nga rrotullimi globit,
Të ngul thellë gishtërinjët e këmbës shkëmb-plumbit,
E të dëgjoj lutjet e Nënës nën jehonën e Kor-Kombit:
“Hejj,Nuk vdes kurrë rrjedha e jetë – lashtësi – Lumit !…

NËNË TEREZA

Nënë Tereza,nëna e dhimbjes së kohës,
Mjekuesja e shpirtrave, ilaçi i varfërisë.
Ajo,në degën e thyer,në dimër të kohës,
Dhuroi dashuri prej të sajës shpirtësisë…

Nënë Tereza, që vetë fëmijë nuk lindi,
Por përkundi në duar me miliona fëmijë,
Nëna që me fjalën e embël botën bindi,
Ku mirësia,drejtësia duhet të jetojë,rrijë.

Dy duart e saj të vogla,e brishta peshore,
Mbajtën barazpeshimin e varfëri-kapitalit.
Ajo e thjeshta,njëkohësisht madhështore,
Që vuri shënjën e barazisë, lumturi-hallit.

Nënë Tereza, që botën në duar përkundi,
Këndojë ninulla për fukarenj dhe jetime.
Themelet e gjithë botës nga rrënjët tundi,
Për të vrarë dhimbjen,për të prurë gëzime…

Nëna e botës, bija e AtDhe-Vëndlindjes time !

JU QË GATUAT FJALË – URTËN

Më thirrën sot thinjat, rrudhat dhe goja
E gjyshës dhe nënes,që ishin të pa fund,
Unë pashë dhe buzëqeshjen tek e vona,
Gjerësin’ e shpirtit tuaj s’e pashë askund.

Pashë çdo fjalë-goje, kthyer në qëndisje,
Fije flokë – thinjur e bërë pe për gjilpërë,
Pashë si u shkelët,e nuk lëshuat zë-britje
Pëlhurën e shpirtit rrugë për breza bërë!

Ato rrudhat fytyrës e duarsh të palodhura,
Ravijezime historie të lashta, e të pafund,
Më thonë se lidhin pllajat pjellore me ura,
Që ju mbollët me lule,gjithanë e gjithkund.

Ah Gjyshja ime!…Atë lidhëse e marhamë,
Sot i marr në duar,dhe urtësisht më flasin.
Sot në vënd të bukës mashtrimin e hamë,
Kokëbardhën, mbuluan flokë që gërhasin !

Vërtet kishit fjalë të pakëta, dhe nën buzë,
Nuk di pse nuk i vendosnim vathë në vesh?
Nuk do gabonte dhe nuk lekundej askush,
Ta bartnim gjerdan dhe të ëmbl peshqesh!…

Kur dëgjohej zhurma e murit, e një rilindje
E çfligu kredhej gjumit, e digjej zjarrë i ultë,
S’vinit gjumë në sy, gatuanit vetëm simite,
Që t’i hamë e shijojmë dhe sot, fjalë të urtë.

Ju gatuat rregulla,e rregullat fluturuan ligje,
Ishit kundër ligjit që turbullon ujin që pihej.
Kundër jush ishte dhe kafshat-madhja hile,
E bashkë më ligjin,lindët dhe faljet,kjo dihej!

Atë lidhëz të kokës gjyshe,nëna ime e zgjodhi,
Lidhëse për djep,e ninulat tuaja sipër i këndoi.
Mbi kaptell të djepave, marhamen lehtë hodhi,
Bardhësia që ajo mbart, të ardhmën të sundoi!…

Unë, rrudhat e gjyshes e nënes ktheva në bojë,
E fijeve të thinjura, u dhashë kuptimin shkronjë!….

AROMË NËNORE

Lëkund gurët e rrënjëve të mia në këtë vënd,
Laj,thaj,shtrij,hekuros kujtimet me plot mall,
Ndjenjëflakën e vjetër zgjoj nga gjumi rëndë,
Të kem ndjenjë se vesha pëlhurën e bardhë.

Më linii në botën ku toka ka aromë nënore,
Ku zanat përkundin djepin tim të fëmijërisë,
Nën hijen e një manifestimi nën dritë hënore,
Ku trishtimi zbutet me zërin e fyellit, çiftelisë.

Më lini krahëqerpiku të vallëzojë Vallen e Shotës,
Lojën e Librazhdit, të Prespës e Rugovës vallen,
Flatrim Shqiponjën mbi të gjitha vallet e botës,
Takohen,nostalgjia e trishtë,me timen ringjalljen.

Me linii sot shpirtit t’i’a vesh pëlhurën e dasmës,
Një tis të më mbështjellë, e jehona e krenarisë,
E po më përdhumoi kohëfëlliqura mes për mes,
Hidhmëni leckë të shkrumohem në flakën e zisë.

Më linii sot t’i zhys sytë e vrenjtur nën një plis,
Këngën e mbi këngëve ta këndoj me brohori,
Të gjëmojë zëri thepave, nën të bjeshkës lis,
Besën trojeve të mia,tua ngrej lart mbi gjithësi.

Më lini sot, të bëhem hije e Flamurit të Shqipes,
Të valëvis e flamuroj anë e kënd me furi e mall,
Në krah të Shiponjës të ndjehem flatër e ditës,
Kapakëve të mëngjeseve,të frymoj e lirë,e gjallë.

M’a grisni sot gjuhën e stuhisë ndër kohë e mote,
Nëse rënkoj e çmendur mbi xixëllimat e lakminë,
Më cungoni trup, prini gjuhë, digjni kockat morte,
Po nuk pata me krenari,pasuri shpirti,Kombin tim!….

E LIDHUR ME SHOKË

Ç’është kjo stuhi që godet gufshëm gjoksit,
Dhe shtrëngon e mbërthen me valët vajë.
Ç’është kjo frymë që kthehet në një shokë,
Shokë-djepi që lidhë,Dheun e rrënjën e saj?

Atë,Dhe të Mëmësisë që nuk i ulet lashtësia,
E që me vulën e trimërisë së Gjergj Kastriotit,
U spërkat me ujë të bekuar nga gjak-trimëria,
Dhe vulosi botërisht urti – zotësinë prej motit !…

Me atë urti nisem, vij prapa diellit të ngrohtë,
Të pleqëroj me rrënjët e mia, të shliroj fobitë,
Prit një herë,dëgjo vetëm një herë,o bab’lok,
Prit,merre dhe një asht nga unë Bija e Kombit…

Vërtet prerë nga Kërthiza e Dheut, Mëmësisë,
Por nga varri gjyshit unë mora fjalët urtësisht,
Atë shokë nga brezi, ma lidhi fort për kërthizë,
Sa herë shoka më tërheq,unë lidhem serisht !

ÇAST PRANVEROR

Sot shpirti lumturohet gjithësisë re-valë,
Shkon e ndalet mbi Bjeshkët e Rugoves,
Aty fillon grykëderdhja e Lumit të Bardhë,
Derdh këngën qiell – hapurit të Kosovës !…

Shpirt-grimcuara shumfishmërisht endet,
Pranveruar aromon, lulëhapur gjithkund,
Herë bëhet bilbileshë,ulet në degë-pemët,
Herë fije-bar-zgjatur, që puhiza e përkund!…

Bëhet gur – shkëmb ku pushon Shqiponja,
Valëza burimi me krahë të një valltareje,
Që puth gurëzit e anëbrigjet kah valerizoja,
Mallin e mbledhur lan me zë – këngëtareje!

Grimcat e shpirtit bëhen hije të ndritshme,
Që gjasojnë në zanat kapur dorë për dore,
E ndjekin gjurmë-hapat brigjeve të ritshme,
Derdhen gurgullimes të bardhëta lulebore!…

Më ka ëndja të bëhem qengj lazdrimtarë,
Që bart këmborën bashkë me blegërimin,
Dhe kur Ju dëgjoni tingullin këmbortarë,
Është tingulli i shpirtit,thërret ngazëllimin.

Buzë – lumit të qetë kurorëhapura pemë,
Ku mbrëmjeve takohen idilet dashnorë,
Flladfreskun lëshoj,posi prekje e një ëme,
Momente ku mbretëron çasti më hyjnor!…

Dua të arabeskoj si harabel i përkëdhelur,
Me hapa kërcimtarë t’i mahnit që të gjithë,
Edhe pse plogësht,athët por krah-hedhur,
Shpupuris gëzimin, të var në degë stolitë!…

Herë lëndinë bar- njomtë posi mendafshi,
Ku vrapojnë këmbëza fëmijësh gazmorë,
Herë lulekuqe, që luajnë lojën e një afshi,
Lëngputhje kristalore mbi buzë-dashnorë!…

Herë kthehem në fijedrite dhe zë-jehonë,
Thërras nga lart, „Ojjjj Kosooova imeee!“
Nuk më shikon apo nuk më dëgjoooonë,
Jam Bijë Shqiptare, kthyer në Zanë-hije!….

Hejjjj!O Lumi i Bardhë,me valë-hijet e mia
Barte dashurinë time nëpër shtratin tënd,
Hidhe vallen e shpirtit thellë nga mbrëndia,
Merri dhe vargjet e mia,derdhi anë e kënd!…

Kur Shpirti i Malluar endet në Qiellin Shqiptarë,
Është Çast Pranveror, dhe të mërguarën e ngjall !