Archives for May 2015

Bosi i drogës kryetar parlamenti

May 22, 2015 by dgreca

Nga Jan Walter/
Kryetari i Parlamentit të Venezuelës Diosdado Cabello duhet të jetë koka e një karteli droge. Këtë e pohon një i besuar i tij. Sidoqoftë për konstelacionin e pushtetit në Venezuelë rasti ka të ngjarë të mbetet pa pasoja Diosdado Cabello duhet ta ketë vënë re në qershor 2014 se diçka nuk është në rregull me Leamsy Salazar. Kështu së paku i tha kryetari i Parlamentit të Venezuelës në janar stacionit radiofonik kolumbian “BLU Radio”. Gazeta e përditshme spanjolle “ABC” pati njoftuar atëherë, se shefi i sigurisë së Cabellos, Salazar kishte shpifur për të tek autoritetet amerikane, duke e quajtur figurë udhëheqëse të tregtisë venezuelane të drogës. Natyrisht akuzat janë të rreme dhe kapiteni i forcave ajrore, që dezertoi, nuk ishte truproja e tij, kundërshtoi menjëherë Cabello duke njoftuar hapa ligjorë kundër shtypit.
“Fushatë e bashkërenduar”
Presidenti i Venezuelës Nicolás Maduro u hodh në mbrojtje të zëvendëskryetarit të partisë së tij dhe e cilësoi raportin si pjesë të “fushatës së bashkërenduar” të opozitës, të mbështetur nga SHBA, kundër “Revolucionit Bolivarian”, siç e quan partia në pushtet sundimin e saj.
Marrëdhëniet mes SHBA dhe Venezuelës janë prej vitesh të tendosura, edhe për shkak se venezuelanë në mërgim në Florida mbështesin financiarisht opozitën në vend. Me akuzën e shkeljes së të drejtave të njeriut, muajt e fundit qeveria e SHBA ka vendosur sanksione ndaj disa anëtarëve të qeverisë së Venezuelës. Që autoritetet amerikane hetojnë kundër kryetarit të parlamentit të Venezuelës, siç njoftoi tani gazeta “The Wall Street Journal”, përshtatet krejtësisht me retorikën nga Karakasi.I fajësuari Cabello akuzoi ndërkohë tri media venezuelane, që kishin transmetuar lajmin e ABC-së, për shpifje të rëndë. Fundjavën e kaluar një gjykatëse lëshoi urdhërin për “ndalimin e udhëtimit jashtë vendi” për 22 gazetarë drejtues të gazetave “El Nacional”, “Tal cual” dhe “La Patilla” për shkak të shpifjeje të përsëritura dhe të rënda”. Përvç kësaj të paditurit duhet të paraqiten një herë në javë në gjykatë, shkruan “El Nacional” – ashtu siç kishte kërkuar Cabello.
Por aq kollaj akuza nuk mund të fshihet nga opinioni, as nga ai venezuelan. Sepse dyshimi, që Cabello është i përzier në tregtinë e drogës, nuk vjen papritur.
Drehkreuz Venezuela
“Venezuela vitet e fundit është bërë një qendër e tregtisë ndërkombëtare të drogës”, thotë në bisedë me DW këshilltari politik amerikan Douglas Farah. Kjo supozohet edhe nga rritja e konsumit masiv të drogës në vend: “Kartellet paguajnë tregtarë ndërmjetës të drogës. Ata e shesin pastaj në vend për të fituar para”, shpjegon Farah, i cili në vitet 90-të ka informuar si gazetar për gazetën “The Washington Post” nga kryeqyteti kolumbian Bogotá.
Më së voni nga viti 2008 ka dëshmi të shumta, se qarqe të larta qeveritare i kanë lejuar bizneset ilegale dhe kanë përfituar prej tyre, thotë Farah: “Shumë dëshmi të dëshmitarëve, që përputhen me njëra-tjetrën, rezultatet e autoritetit amerikan të drogës DEA dhe transporte masive të kokainës nga aeroportet zyrtare venezueliane për në Amerikën Latine, i bëjnë këto akuza shumë të besueshme.”Akuzat e Leamsy Salazar reshtohen në këto dëshmi. Që pas deklaratës së tij fshihen interesa personale, është e qartë, por edhe që Salazar di shumë për financimin e Partisë Socialiste të Unitetit, PSUV. Sepse edhe pse ai nuk ka qenë truproja e Cabellos, ai ka qenë për shumë vjet i besuari i kryesisë së partisë. Këtë e thotë vetë. Dhe ai duhet ta dijë
Numri 1,5 i Venezuelës
Diosdado Cabello ishte një ndër të besuarit më të vjetër të themeluesit të partisë, që ka ndërruar jetë, Hugo Chávez. Në vitin 1992 ata dështuan së bashku në tentativën për të bërë grusht shteti. Për një kohë të gjatë Cabello luante në partinë në pushtet një rol shumë më të madh se presidenti i sotëm Maduro. Togeri i dikurshëm ka patur shumë poste ministrore dhe fillimisht u diskutua të bëhej pasaardhësi i Chávezit, kur u konstatua, se ai mund të vdiste nga kanceri.Por me urdhër të Chávezit, Maduro u bë kryetar i PSUV dhe në fund president. Së paku që atëherë PSUV konsiderohet e përçarë – në nacionalistë të afërt me ushtrinë përreth Cabello-s, dhe Chavistë ortodoksë përreth Maduro-s.
Shpesh qarkullojnë thashetheme se ushtarakët mund ta rrëzojnë Maduron. Në shumicën e rasteve thashethemet vijnë nga opozita. Por ata tingëllojnë të besueshme, sepse pushteti i qeverisë nuk ndikohet aq shumë nga personi i Maduros si dikur nga ai i Chavezit.
Brenda partisë Cabello madje është më i fortë se Maduro, edhe për arsyen se ai është më dinak. Por atij i nevojitet Maduro, sepse si pasuesi i preferuar i Chávez ai gëzon mbështetjen pa rezerva të chavistëve të shumtë, edhe jashtë partisë.
Sikur autoritetet e SHBA-së të dëshmojnë me të vërtetë, se Cabello është përfshirë në tregtinë ndërkombëtare të drogës, kjo mund ta dobësonte në shumë drejtime aftësinë e tij veprim: “Në rang ndërkombëtar ai nuk do të ishte në gjendje të bënte më asgjë, në Amerikën Latinë prestigji i tij do dëmtohej dhe opozita venezuelane do të kishte edhe më shumë në dorë kundër tij”, thotë Douglas Farah.
Vetëm brenda partisë, mendon Farah, kjo gjë nuk do të këtë gati asnjë ndikim: “Cabello dhe Maduro i duhen njëri-tjetrit, për të qëndruar në pushtet”, thotë Farah. Prandaj edhe ky kapitull nuk do ta prishë lidhjen e tyre.

Kriza politike paralizon ekonominë e Maqedonisë

May 22, 2015 by dgreca

Ekspertët e ekonomisë të shqetësuar nga pasojat e krizës në Maqedoni. Gjendja e pasigurisë ka frenuar investitorët dhe bizneset po hasin në mungesën e qarkullimit të kapitalit si pasojë e rënies së aktivitetit ekonomik.
Gjendja e rëndë politike në Maqedoni po influencon negativisht ekonominë e veçanërisht investimet e huaja dhe vendase në sektorin e turzimit. Po ashtu për shkaqe sigurie rrezikohet dhe kthimi i mërgimtarëve gjatë periudhë së verës në atdhe, vë në dukje Menderes Kuçi, kryetar i Odës Ekonomike të Maqedonisë Veriperendimore OEMVP, duke analizar ndikimin e krizës politike në ekonominë e Maqedonisë. “Gjendja e rëndë politike në vend, ka ndikim negativ. Rrezikohet dhe kthimi i mërgimtarëve tanë në periudhën e verës, e që janë stimul i veçantë për rritjen e konsumit të përgjithshëm në Maqedoni, si dhe në mënyrë shtesë dhe rreziku nga zvogëlimi i depozitave të tyre, që në masë të madhe kontribojnë për stabilitetin makroekonomik të vendit dhe sigurojnë stabilitet të një pjesë të rezervave devizore”, vlerëson Menderes Kuçi.
Vazhdimi i krizës politike do të ketë ndikim negativ në ekonominë e vendit, e sidomos në investimet e huaja.“Pasojat e gjithë kësaj do t’i bartin kompanitë dhe qytetarët, ndërsa qeveria këtë do ta ndjejë pasi arka shtetërore do të jetë e zbrazur, indikacione të cilat tashmë dhe kanë filluar të ndjehen. Vazhdimi i krizës politiko-ekonomike do t’i zbeh mundësitë për ta mbrojtur Maqedoninë nga falimentimi”, thotë kryetari i OEMVP-së, Menderes Kuçi
Përfaqësuesit e odave ekonomike që përfaqësojmë interesin e komunitetit të biznesit, kanë paralajmëruar iniciativa të përbashkëta, të cilat do t’i dorëzohen qeverisë në drejtim të stabilizimit dhe normalizimit të krizës politike dhe ekonomike në vend.
Biznesmenët kërkojnë ndihmë
Kriza politike po reflektohet negativisht në sferën e ekonomisë, ndërsa pasojat më së shumti po i ndjejnë kompanitë e mëdha, por pa anashkaluar edhe konsumatorët e thjeshtë, thonë biznesmenët, duke kërkuar siguri politike që të mund të realizojnë parashikimet e tyre investuese në vend.“Kriza politike para së gjithash po ndihet tek oligarkët, apo tek kompanitë e mëdha ku ka ngecje në qarkullimin e kapitalit. Ngecjet në zhvillimin ekonomik po i ndiejnë edhe konsumatorët e thjeshtë, por edhe ndërmarrjet e vogla pasi në situatën e krijuar kemi ulje të kërkesave dhe rritje të shpenzimeve“, thotë biznesmeni Zore Temelkovski.
Ministri i financave, Zoran Stavreski, pranon se biznesmenëve u nevojitet stabilitet i qëndrueshëm që të mund të realizojnë projektet e planifikuara. Stavreski vlerëson se një zgjidhje e krizës politike do të ishte e mirëseradhur për bizneset vendase, por edhe për kompanitë e tjera që hezitojnë për të investuar në Maqedoni.
“Pres që rezultatet në ekonomi tani për tani nuk do të përkeqësohen, por gjithçka varet nga ajo se sa shpejtë do të tejkalohet kriza politike. Vlerësoj se është mirë që të dilet nga kjo situatë dhe bizneset të fillojnë me realizimin e parashikimeve të tyre në ekonomi“, thotë Ministri i financave, Zoran Stavreski.
Ekspertët e ekonomisë të shqetësuar nga pasojat e krizës
Profesori i ekonomisë në Universitetin e Shkupit, Zoran Ivanovski, thotë se për shkak të uljes së aktiviteteve ekonomike si pasojë e krizës politike, është reale që të pritet rritja e deficiteti buxhetor, apo të mos realizohet mbushja e buxhetit sipas parashikimeve të qeverisë.“Vlerësoj se nuk do të ketë ndryshime të theksuara sa i përket politikës ekonomike në krahasim me periudhën e deritanishme. Konsideroj se është reale që të presim rritje të deficitit buxhetor“, thotë Ivanovski.
Sipas njohësit të çështjeve ekonomike Visar Ademi kriza ekonomike do të manifestohet në dy aspekte, e para duke e ulur fuqinë blerëse të qytetarëve dhe e dyta duke ngrirë investimet e huaja në vend.“Investitorët e brendshëm duke e pasur të ulur konsumin e brendshëm do të kenë shumë më pak para në dorë që të investojnë tek kapacitetet ekzistuese të kompanive të tyre dhe do të ketë shumë më pak vende të reja pune. Kjo do të ndikojë shumë ndjeshëm në ekonomi dhe mendoj se do të ketë një lloj krize ekonomike që do të reflektohet pas pushimeve verore”, thotë Visar Ademi.
Eksperti Zoran Vitanov thotë se tanimë është i dukshëm ndikimi i krizës politike në ekonomi përmes anulimit të marrëveshjeve dhe bllokimit të investimeve nga jashtë. “Prodhimet vendase kanë mbetur të ngujuara në tregun e brendshëm. Blerësit e prodhimeve tona, të njëtet produkte i marin nga shtetet e tjera, sepse nuk kanë guxim të rezikojnë dhe të presin se çka po ndodh në Maqedoni “, deklaron Zoran Vitanov.
Sipas të dhënave të Bankës Popullore të Maqedonisë në muajin shkurt të këtij viti janë regjistruar vetëm 12.6 milionë Euro investime të huaja, investimet e huaja mesatarisht kanë qenë mbi 30 milionë Euro.(Kortezi Fatos Musliu-DW)

NESER PERUROHET SHTATORJA E ISMAIL QEMALIT NE PRISHTINE

May 22, 2015 by dgreca

Sic njofton Agjensia e Lajmebe Kosovapress neser do te organizohet perurimi i Shtatores se Atit te Pavaresise, Ismail bej Qemalit.Ne kete ceremoni eshte njoftuar se do te jete dhe Edi Rama. Agjensia komenton lajmin se Kryeministri i Shqipërisë, Edi Rama, do të vizitojë Kosovën te Shtunen me 23 Maj 2015, ku do të jetë i pranishëm në cermoninë e perurimit të shtatores së Ismail Qemalit në Prishtinë.
Sipas një njoftimi për shtyp të komunës së Prishtinës, në ceremoninë e vendosjes së shtatores së Ismail Qemalit, që do të zhvillohet në hapësirën para ish- Pallatit të Shtypit, në bashkëorganizim me Bashkinë e Vlorës, të pranishëm në këtë ngjarje do të jenë edhe presidentja e Kosovës, Atifete Jahjaga, si dhe personalitete të ndryshme nga fusha politike dhe kulturore e vendit.
Gjatë kësaj ceremonie, do të performojnë kori i filarmonisë së Kosovës dhe ansambli “Rexho Mulliqi”.
Në nëntor të vitit 2014, në një takim të kryetarit të Komunës së Prishtinës, Shpend Ahmeti, me delegacionin e intelektualeve nga qyteti i Vlorës, u percaktuan hollësitë e idesë dhe projektit të vendosjes së shtatoreve të Ismail Qemalit në Prishtinë dhe atë të Hasan Prishtinës në Vlorë.
Vendosja e shtatores simbolizon rolin e Ismail Qemalit në pavarësinë e shqiptarëve, si dhe në zhvillimin e kombit shqiptar.

Parlamenti-IKJA E DULES, ARDHJA E IDRIZIT, GREQIA NDERHYN

May 22, 2015 by dgreca

Një ditë pas zgjedhjes së kreut të PDIU, Shpëtim Idrizi si nënkryetar i Kuvendit, ka reaguar ashpër diplomacia greke. Ministria e Jashtme e Greqisë ka reaguar zyrtarisht pas zgjedhjes së Shpëtim Idrizit si nënkryetar i Kuvendit. Në dekoratën që duket si një ndërhyrje direkte në punët e brendshme të Shqipërisë, kreu i PDIU cilësohet nga Ministria e Jashtme Greke si përfaqësues i të kaluarës fashiste!
Duke iu përgjigjur interesit të mediave, një zëdhënës i Ministrisë së Jashtme greke tha se “zgjedhja e personave që ndjekin perceptime irredentiste, të lidhura direkt me të kaluarën e urryer fashiste dhe naziste, në pozicionet më të larta të shtetit, nuk nxit miqësinë, bashkëpunimin, stabilitetin dhe marrëdhëniet e fqinjësisë së mirë mes vendeve të Europës Lindore dhe nuk kontribuon në perspektivën europiane të Shqipërisë”,- thuhet në reagim.
Deklarata jo e zakonte lidhet me qëndrimin që Greqia ka ndaj komunitetit çam. Arsyeja se përse çamët u dëbuan me dhunë dhe ndaj tyre u bë gjenocid nga shteti helen lidhet me argumentin, sipas tyre, të bashkëpunimit të çamëve më pushtuesit nazist gjatë Luftës së Dytë Botërore.
Kreu i PDIU u zgjodh nënkryetar një ditë më parë, duke sjellë zemërimin e kreut të PBDNJ, Vangjel Dule, i cili dha dorëheqje nga detyra e nënkryetarit tjetër të Kuvendit.(KJ)

Unioni Global i Bizneseve të Diasporës Shqiptare mbajti takimin vjetor Prishtinë – Tiranë

May 22, 2015 by dgreca

Për të krijuar një ambient sa më të suksesshëm për Investime në trojet mbarëshqiptare/
Nga Beqir Sina-Prishtine/
Prishtinë – Unioni Global i Bizneseve të Diasporës Shqiptare në bashkëpunim me Ministrinë e Diasporës së Republikës së Kosovës, në shënim të përvjetorit të parë të themelimit të saj – po mban këto ditë një nga veprimtarit më të mëdha, që prej themelimit të tij.
Veprimtaria, e biznesit dhe afarizmit shqiptarë në botë, nisi me mbajtjen, sot të forumit të quajtur “Ambienti për Investime në trojet mbarëshqiptare”, në Sëiss Diamond Hotel – Prishtinë, ku morën pjesë më shumë se 50 biznesmen të suksesshëm shqiptarë të mbledhur nga Europa, SHBA dhe Kanadaja.
Mori pjesë edhe zoti Naim Deduashaj, i cili në pozitën e Drejtorit të Investimeve të Diasporës, është ideator fillestar strategjik i konceptit të organizimit të këtij Rrjeti të Bizneseve Shqiptare në Diasporë.
Në këtë forum morën pjesë, kryetarët e rrjeteve të bizneseve të diasporës, dhe delegacione afaristësh shqiptarë nga 17 shtetet e botës, si Anglia, Australia, Austria, Finlanda, Francë, Gjermani, SHBA (Dallas, Illinois, Wisconsin,Michigan, New York, New Jersey, Connecticut, ) Kanada, Italy, Kroaci, Slloveni, Turqi, Luxenburgu, Hollanda, Çekia, Hungaria dhe Zvicra.
Takimi i Unionit Global të Biznesmenëve të Diasporës Shqiptare në botë, u hap një fjalim përshëndetës nga presidenti i këtij unioni mbarë shqiptarë, zoti Nazar Mehmeti, i cili foli edhe mbi mbarëvajtjen e punës së këtij forumi gjithë përfshirës.
Forumin e përshëndeti edhe Presidenti i Nderit i këtij Unioni, biznesmeni i madh shqiptarë nga Maqedonia Lazim Destani, ndërsa e moderuan atë Ylli Blakaj koordinator për Europë i Unionit, biznesmen nga Austria dhe Ismet Smajli biznesmen nga Dallasi – SHBA.
Më pas kryetarët e rrjeteve nga 17 shtetet e botës, paraqitën raportet e tyre, dhe diskutuan mbi modalitetet e të bërit biznes në Kosovë dhe Shqipëri, si dhe sollën përvojën e tyre të suksesit në biznes simbas vendeve ku ata jetojnë e ushtrojnë bizneset e tyre.
Z. Elmi Berisha, nënkryetar i Rrjetit të Bizneseve të Diasporës dhe kryetar për “zonën e Tri-Shtetshit” New York, New Jersey, dhe Connecticut, mbajti referatin “Përmirësimi i klimës investuese për investitorët e Diasporës”.
Më pas iu bë një përmbledhje e punës së vitit të kaluar dhe u kalua (pikë për pikë -nen për nen) në diskutim të hapur rreth asaj që thirrej Platforma Strategjike e Veprimit (secili shtet me të drejtë për të prezantuar 3 deri në pesë minuta), një platformë kjo e shkruar nga ekspertët e zgjedhur nga ky Union me 10 faqe dhe disa kapituj.
Gjatë punës së këtij takimi vjetor, mbas leximit të platformës u kalua në diskutimin e preambulës, historinë e këtij Unioni, dhe vizionin e saj, qëllimin, dhe vlerat bazike të Rrjetit të Bizneseve të Diasporës Shqiptare, ngritjen e selisë Qendrore dhe strukturave organizative e funksionale, shpërndarja dhe burimet e financimit, të RRBDSH-së, shpërndarja dhe alokimi i buxhetit, aktet e tjera normative dhe rregulluese të Unionit.
Në mënyrë unanime të 17 kryetarët, kanë miratuar mbasi u hodh në vota – votimin për Platformën Strategjike të Veprimit, e cila u lexua nëpërmjet një video-projeksioni nga Sekretari i Përgjithshëm i këtij Unioni – zoti Ismet Smajli.
Presidenti i Unionit Global të Biznesmenëve të Diasporës Shqiptare në botë, zoti Nazar Mehmeti, i njohur edhe si veprimtar i dalluar i komunitetit shqiptarë në SHBA, mbetet president edhe për një mandat tjetër ose deri në zgjedhjet e ardhshme. Ndërsa, u votua me këtë rast vendi dhe data e mbajtjes së takimit të dytë vjetor të Unionit Global të Biznesmenëve të Diasporës Shqiptare në botë, duke caktuar si mikpritëse, vitin tjetër qytetin botëror të biznesit, i njohur ndryshe edhe si metropoli botëror, qytetin e New Yorkut – SHBA.
Në fund me përfundimin me sukses të punimeve të takimit të parë vjetor të Unionit Global të Biznesmenëve të Diasporës Shqiptare në botë, u shtrua një darkë në lokalin “Apollonia”, darkë ku mori pjesë edhe ish Konsulli i Përgjithshëm i Kosovës në Nju Jork, z Bekim Sejdiu, dhe miq të tjerë të këtij Unioni nga Prishtina dhe vendet e tjera nga Europa.
Unioni Global i Biznesmenëve të Diasporës Shqiptare në botë, sot udhëton për në Istog për të promovuar suksesin e një anëtari të këtij Unioni, investitorit nga diaspora (Belgjika) z Ismajl Bytyqi, pronar i kompanisë për kultivimin e peshkut.
Takimi në Istog – do të nisi sot me vizitën dhe takimin me kryetarin e Komunës së Istogut dhe afaristëve nga Diaspora, që kanë investuar në Istog, në lokacionin e thirrur “Trofta”
Ky takim do të hapet nga Ylli Blakaj dhe do të moderohet nga Bekim Neziri. Kurse pritet të flasin në këtë takim edhe prodhuesi i Peshkut, z. Ismail Bytyqi, – Hotel “Trofta”, nga Hotel Onix, Banja Termale, z Xhevdet Shoshi, kompania Agro Produkt, prodhuesi i Çajrave, z.Halit Avdiu, kompania Sinalco – Fabrika e Lëngjeve, zoti Gani Dreshaj, dhe firma Makon – firmë ndërtimore zoti Ismet Rugova.
Ky forum që nisi në Kosovë, ditën e enjte, përfundon me takimet dhe forumin që do të mbahet ditën e shtunë në Tiranë – Shqipëri.