Archives for October 2015

Komuniteti shqiptar ne SHBA-REAGIM I SHOQATAVE NDAJ KËRCENIMEVE TË MINISTRISË SË ARSIMIT TË MALIT TË ZI

October 16, 2015 by dgreca

Shoqatat shqiptare me veprimtari në SHBA me origjinë nga trojet tona etnike nën Malin e Zi reagojnë dhe dënojnë ashpër kërcënimet e Ministrisë së Arsimit të shtetit malazias ndaj nxënëseve shqiptar të shkollës së Tuzit të cilët me simbolet e tyre kombëtare Festuan plasmanin historik të Shqipërisë në kampionatin Europian.
Shoqatat tona vlerësojnë se shtetit malazias po i pengon çdo gjë shqiptare, urrejtja ndaj qenies shqiptare e dëshmoj dhe konfirmoj përmes një deklarate Ministria e Arsimit të këtij shteti me reagimet e saja tendencioze kinse për qortimin e nxënëseve shqiptar vetëmse festuan me flamurin e tyre kombëtarë duke mos shkaktuar asnjë incident më të vogël. Vallë ku ishte kjo e ashtuquajtur Ministri e Arsimit kur në tërë Podgoricë e anë e mban Malit të Zi u festua me flamuj të Serbisë fitorja ndaj Shqipërisë dhe nuk kishte asnjë reagim.
Absurditet i llojit të vetë është fakti se vetë institucionet malaziase nuk respektojnë Kushtetutën e tyre, sepse kushtetuta u lejon shqiptarëve përdorimin e simboleve kombëtare ndërkaq ligjet e po të njëjtit shtet e ndalojnë atë.
Shoqatat tona i habit edhe fakti se si vallë subjektet politike shqiptare heshtin dhe nuk reagojnë edhe kur sulmohen dhe kërcënohen edhe fëmijët e tyre.
Shoqatat vlerësojnë se ne momentin aktual është dashur te reagoj edhe organi kompetent, mbipartiak Këshilli Nacional i Shqiptareve (KNSH) nën Mal te Zi, dhe se heshtja e tyre nuk arsyetohet në asnjë mënyrë.
Shoqatat tona konkudojn se partitë nacionale shqiptare me aleancat e tyre të interesit të ngushte me partin në pushtet DPS po bëhen aprovuese të këtyre shkeljeve dhe nëpërkëmbjeve të të drejtave të shqiptarëve nën Mal të Zi.
Ne ua bëjmë me dije rinisë tonë se ne mburremi me ju në çdo aspekt jetës dhe se ne me plot përkushtim do të përkrahim aktivitetet edukimin dhe qëndrimin e rinisë në vendlindjet tona.

shoqatat:
Shoqata Atdhetare ’’Ana e Malit’’-New York
Shoqata Atdhetare ‘’Malësia e Madhe’’- Detroit
Fondacioni ‘’Plavë Guci’’- New York
Fondacioni Humanitar ‘’Malësi e Madhe’’- New York
Fondacioni ‘’Dom Simon Filipaj’’- New York
Shoqata Atdhetare ‘’Kraja’’- New York
Shoqata Atdhetare ‘’Ulqini ‘’- Chicago

New York, Detroit, Chikago

15 Tetor 2015

ARBEN LLALLA-VANGJEL DULES: HIQE MASKEN, JE VLLAH PREJ GUMENICES!

October 16, 2015 by dgreca

Gazetari Arben Llalla, një mbrojtës i flaktë çështjes came ka reaguar sot ndaj deklaratave të kryetarit të PBDNJ-së, Vangjel Dule.
Dulja kërkoi që për minoritarët, në fletët e votimit të vendoset edhe gjuha greke.
Por ja çfarë shkruan Arben Llalla në Facebook-un e tij kundër Dules:
“Burraveci Vangjel Dule, cili është me disa maska, ka kërkuar sot që fletët e votimit të jenë në gjuhën greke. I rikujtoj vllehut nga Gumenica i ngulur si bari delesh në periferi të Gjinokastrës, Vangjel Dules, se ai është betuar në Kushtetutën e Republikës së Shqipërisë. Neni 14 thotë:
Gjuha zyrtare në Republikën e Shqipërisë është shqipja.
Flamuri kombëtar është i kuq me një shqiponjë të zezë dykrenore në mes.
Stema e Republikës së Shqipërisë paraqet një shqyt me fushë të kuqe me një shqiponjë të zezë dykrenore në mes. Në krye të shqytit, me ngjyrë të artë, është vendosur përkrenarja e Skënderbeut.
Himni kombëtar është “Rreth Flamurit të Përbashkuar”.
Festa Kombëtare e Republikës së Shqipërisë është Dita e Flamurit, 28 Nëntori.
Prandaj Dule mos të bëj lojë fjalësh me OSBE-ODIR, tek e fundit kush ka dëshirë le të votoj ditën e zgjedhjeve, kush nuk ka dëshirë le të qëndroj në shtëpi, të ngrohë vezët apo të haj gështenja sepse Shqipëria nuk ka ligj që dënon ata që nuk votojnë, ashtu siç e ka një ligj të till racistë Greqia që dënon me gjobë apo me burg, ata shtetas grek që nuk dalin në votime.

VATRA PRITI ZV/KRYEMINISTRIN E MAQEDONISE, Z. MUSA XHAFERRI

October 15, 2015 by dgreca

Të Mërkurën paradite, me 14 Tetor 2015, Kryetari i Vatrës dr. Gjon Buçaj, priti në një takim prej dy orësh, zv/Kryeministrin e Maqedonise, z. Musa Xhaferri.Kryetari Buçaj, shoqërohej në pritjen e mysafirit, nga zv/Kryetari Asllan Bushati, Presidenti i fondit të Studentëve dhe anëtar i Kryesisë Mithat Gashi,anëtari i kryesisë së Vatrës dhe kryetar i degës në Queens dr. Skënder Murtezani, anëtari i Këshillit Drejtues Zef Balaj, anëtari i Këshillit të Urtëve(Advisory Board) Zef Përndocaj dhe Editori i Diellit, anëtar i kryesisë, Dalip Greca.
Kryetari Buçaj i uroi mirëseardhjen mysafirit dhe e informoi për veprimtaritë e Vatrës, duke u fokusuar në ato të Çështjes Kombëtare. Dr. Buçaj informoi për mbështejen që i ka dhënë Vatra Universitetit të Tetovës, protesta e fuqishme e saj kundër burgosjes së Rektorit të ndierë Fadil Sulejmani, vizitat që bëri aso kohe një delegacion i Vatrës në Tetovë e Shkup, por edhe qëndrimet e mëvonshme të Vatrës të kohës së Luftës apo të ngjarjeve të Kumanovës. Po ashtu ai përmendi edhe një vizitë që bëri një delegacion i Vatrës në Shkup,me rastin e 100 vjetorit të themelimit të Vatrës, takimi me Rektorin e Universitetit të Tetovës dhe bashkëpunëtorët e tij, takimi me grupin e mazhorancës shqiptare në Parlamentin e Maqedonisë, pjesmarrja aktive e Universitetit të Tetovës në veprimtaritë e 100 vjetorit të Vatrës, prania në këto veprimtari e Rektorit Prof. dr. Agron Reka(i ndjerë) dhe Prof. dr. Fehari Ramadani(Ligjërues në Konferencën shkencore “Vatra, 100 Vjet në Shërbim të Kombit”) etj. Kryetari i Vatrës duke përcjellë qëndrimet e Vartës, tha se faktori politik shqiptar duhet të jetë më bashkëpunues dhe të mos e shohë opozitën shqiptare atje si “armike”, por si alternativë, së paku për cështjen Kombëtare. Mosbashkëpunimi dhe fagmentarizmi i faktorit politik shqiptar shpërndanë votat e votuesve shqiptarë dhe favorizon partitë maqedonase. Vatra, tha dr. Buçaj, e sheh Marrëveshjen e Ohrit të pa zbatuar në praktikë dhe Ju duhet të kishit luftuar e përfituar më shumë prej saj.
Po ashtu kryetari i Vatrës kërkoi që partia shqiptare, që është në pushtetin qendror, dhe ato që qeverisin në komuna, duhet të luftojnë fort korrupsionin.
Zv/ Kryeminsitri Xhaferri falenderoi për pritjen e ngrohtë. Ai tha se emri i Vatrës ka peshë në Historinë Kombëtare dhe se ndjehej i privilegjuar që iu dha rasti për ta vizituar e për të prekur historinë e saj 103 vjeçare në shërbim të Kombit Shqiptar.
Më pas ai përcolli me detaje situatën në të cilën ndodhen shqiptarët e Maqedonisë dhe përpjekjet që ka bërë Partia që ai përfaqëson dhe që e ka mandatuar në ekzekutiv në më shumë se një dekadë, për të siguruar standarte për të drejtat njerëzore në fusha të ndryshme si në kulturë , gjuhën amtare, simbolet kombëtare etj.
Duke trajtuar çështjen kombëtare, ai komentoi se shqiptarët si Komb nuk kanë qenë më mirë se ç’janë, me dy shtete në Ballkan, Shqipëria në NATO, por ajo që nuk shkon është mosbashkëpunimi mes vetes, askush nuk i pengon qytetet shqiptare të Kosovës, të Shqipërisë, të Maqedonisë, të Malit të Zi, që të bashkëpunojnë, të organizojnë veprimtari të përbashkëta, të këmbejnë përvojë me njeri-tjetrin, të binjakëzohen-por jo formalisht, askush nuk na pengon të afrohemi më shumë shpirtërisht. Ajo çfarë bëri ekipi Kombëtar i futbollit është një mësim për politikanët dhe shtetarët e të gjithë rajonit, ku jetojnë shqiptarët.
Një problem delikat për shqiptarët është braktisja e trojeve, shpërngulja, emigrimi masiv,- tokat bosh, një ditë do të zihen….është koha për apel sepse jemi përballë një të nesërmeje të pasigurtë për ne shqiptarët, toka u mbetet e atyre që e popullojnë, prandaj edhe ju në emigracion duhet ta shihni rrezikun që vjen nga shpërngulja.
Më pas Zv/Kryeministri Xhaferri trajtoi dhe problemet shqiptare në Maqedoni, si ato politike edhe ato Kombëtare. Nisur nga pyetjet që iu bënë ai trajtoi edhe problemin e Kumanovës, Marrëveshjen e Ohrit e të tjera.Këto dy pika ishin më të nxehtat në debatin mes zv/kryeministrit dhe Vatrës.
Në bisedë u përfshinë edhe dr. Skënder Murtezani, njohës i mirë i problematikës shqiptare në Maqedoni. Ai bëri kritika të forta dhe shfaqi mendimin e kahershëm se faktori politik shqiptar, e ka të domosdoshëm bashkëpunimin dhe duhet të heqë dorë një orë e më parë nga grindjet, rrahjet nëpër fushata elektorale, të luftojnë korrupsionin në radhët e përfaqësuesëve të tyre në ekzekutiv etj. Ai shtoi se do të ishte mirë që faktori politik shqiptar, pozitë dhe opozitë, të ndërtojë një platformë kombëtare dhe do të ishte mirë që të kërkohet funksionimi i Maqedonisë me Kantone, si Zvicra, ku të respektohet etniteti. Si ka mundësi që shqiptarët nuk arrijnë të bëhen faktor i pavarur qeverisës apo të diktojnë rregullat e lojës qeverisëse, por bëhen vasalë të maqedonasve, si pozita ashtu dhe opozita ? Ndoshat nga që janë të kapur nga korrupsioni apo një pjesë janë të “blerë”!
Ai dha alarmin për paksimin e klasave në gjuhën shqipe, ç’ka paralajmëron një të ardhme të pasigurtë. Po ashtu ngriti problemin e universiteteve, ndërsa Marrëveshjen e Ohrit, e trajtoi si një dokument të mbetur sirtareve dhe shqiptarët nuk kanë përfituar thuajse asgjë. Kjo Marrëveshje, pavarësisht faktorit Maqedonas, që nuk i ka interesuar që ajo të jetë aktive, faktori shqiptar duhet ta kishte shfrytëzuar, veçanërisht në drejtim të ngritjes së institucioneve kulturore, Akademi Arti e të tjera.
Po ashtu Dr. Murtezani kritikoi praktikat e partive politike shqiptare që nuk bashkëpunojnë me diasporën e këtushme, që ka emigruar nga ato treva. Më keqja është se shqiptarët e këtushëm votojnë minimalisht, nga që emrat tanë nuk janë në listat e shtetit maqedonas, tha Murtezani dhe shtroi pyetjen: Çfarë përpjekjesh keni bërë Ju dhe Partia Juaj që keni kohë në pushtet?
Po ashtu dr. Murtezani shfaqi mendimin se gjuha shqipe nuk është funksionale zyrtarisht. Një dokument i ardhur nga Komuna e Tetovës, që drejtohet nga ish zv/kryeministrja Teuta Arifi, vjen në gjuhën maqedonse, jo shqipe. Si duhet kuptuar kjo? Së paku të ishte dygjuhëshe!
Z. Mithat Gashi, kërkoi që Partia që përfaqëson z. Xhaferri, duhet të bëhet inisatore për të hetuar krimet e komunizmit në këtë ish Republikë në kohën e ish Jugosllavisë komuniste, për të parë faktin se sa janë shfrytëzuar fushatat spastruse, në emër të ideoligjisë, për të ndjekur elementin nacionalist shqiptar. Sipas fakteve, shqiptarët dalin më të viktimizuarit e sistemit komunist Jugosllav. A ka vullnet shteti Maqedon t’i hetojë këto krime?-shtroi pyetjen z. Gashi.
Përgjigja e z. Xhaferri ishte Jo.
Zv/ Kryetari i Vatrës Asllan Bushati, e vlerësoi vizitën e zv/ Kryeminstrit Xhaferri në Vatër. Ai i përgëzoi shqiptarët e Maqedonisë për kontributin që kanë dhanë ndër vite për çështjen Kombëtare, por edhe për fitimin e të drejtave të shqiptarëve, të mohuara nga shteti maqedon. Partia juaj, tha z. Bushati, ishte kontribuese në Luftë, për atë meritoni përgëzime, por kur erdhët në pushtet, duket se lufta u harrua shpejt, idealet për të drejta të shqiptarëve, mbetën pas, dhe shumë nga pushtetarët tuaj lakohen për korrupsion e servilizëm ndaj maqedonasve.
Për zv/Kryetarin e Vatrës, Marrëveshjes së Ohrit, i ka ikë koha, është konsumuar. Duhet një Platforëme re, që t’u japë më shumë dinjitet dhe të drejta shqiptarëve të Maqedonisë, jo vetëm në letër. Duhet t’i prezantoni mungesën e të drejtave të shqiptarëve edhe tek faktori i jashtëm, sygjeroi Bushati.
Në debat u përfshinë edhe Zef Balaj, Zef Përndocaj dhe Editori i Diellit. Në fund mysafiri la mbresat në Librin e Vatrës, ku shkroi se ndjehej i gëzuar që vizitoi këtë Tempull të Shqiptarizmit dhe preku historinë e atyre që i dhanë aq shumë Kombit. U ndjeva i privilegjuar që u takova me ju, dhe ndamë bashkë mendimet tona për çështjen kombëtare, shkroi Xhaferri.
(Fotografite i gjeni ne Facebook-dalip Greca)

POZITË DHE OPOZITË DUHET TA GJEJNË RRUGËN E DIALOGUT

October 15, 2015 by dgreca

Nga Harry Bajraktari*/
Bllokada e kuvendit që po vazhdon me javë duke ndodhur edhe ditën e sotme ka ngritur tensionet nënjë shkallë dëshpëruese në Kosovë dhe kjo paraqet rrezik të një eskalimi të situatës së përgjithshme me pasoja të paparishikueshme. Keqpërdorimi i Kuvendit dhe përdorimi i dhunës brenda tij në shoqëritë demokratike janë të pa pranushme dhe si të tilla çdo kund gjykohen. Kuvendi është arenë dialogu dhe debati për probleme të ndryshme me të cilat përballet shteti i Kosovës dhe askush nuk ka mandat nga të zgjedhurit e popullit, qoftë pozitë, qoftë opozitë t’ i mbyllë dyert e këtij institicioni më të lartë ligjevënes të shtetit tonë. Vurja e dryrit, kështu siç po i vëhet Kuvendit, duke përdorur metodat jo demokratike dhe jo ligjore, po i vëhet bllokada shtetit, të cilin siç e dimë të gjithë e krijuam me sakrifica të mëdha të të gjithëve, me gjak dhe vuajtje.Nuk kanë qenë të pakta edhe krizat tjera në të kaluarën që i shkaktuan partitë politike për të ardhur në pushtet. Tani kemi një situatë shumë më të ndërlikuar, do të thoshja tepër të rëndë, që u krijua për shkak të nënshkrimit të dy marrëveshjeve: asaj për krijimin e Bashkësisë së Komunave serbe dhe Demarkacionit, vijës kufitare me Malin e Zi, ku opozita nxjerrë si pretekst se në të dy rastet është shkelur kushtetuta e Republikës së Kosovës, dersa pozita në pushtet i ka demantuar këto pretendime. Tani në vend të dialogut në Kuvend, ku do të bisedohej lidhur me këto dy marrëveshje, opozita ka zgjedhur rrugën tjetër të bllokimit, duke përdorur format e ndryshme të dhunës. Dihet se dhuna prodhon dhunën dhe ne jemi dëshmitarë të asaj çka ndodhi para pak ditësh në rrugë të Prishtinës. Mbyllja e dyerve të Kuvendit dhe pamundësia e shpjegimit të përmbajtjes së këtyre dy marrëveshjeve të nënshkruara në Bruksel në prani të zonjës Mogorini, tek qytetarët e Kosovës, u krijua një situatë konfuze.Skenat e gazit lotsjellës në Kuvend nga deputetët e opozitës, ku ka edhe pasoja shëndetësore, flasin se ne ende jemi larg tolerancës parlamentare dhe respektimit të ligjeve që janë miratuar po nga deputetët. Fatkeqësisht me këto sjellje jo demokratike dhe jo parlamentare po krijojmë imazhin e keq në botë në kohën kur Kosova, këto ditë, me një shpresë të madhe do të pranohet në UNESKO dhe hapi tjetër do të jetë liberalizimi i vizave dhe inkuadrimi në proceset tjera në Bashkimin Europian. Patriotizëm është hapja dhe jo mbyllja, jo dhuna, po dialogu dhe respektimi i shtetit.Një gjë është e qartë se kushdo që mund të vijë në pushtet në të ardhshmën s’ do të ketë mundësi që këto marrëveshje të nënshkruara në prani të Bashkësisë Ndërkombëtare t’ i zhvleftësojë. Këtë e dinë edhe ata që janë kundër tyre dhe ata që kanë vendosur firmat mbi to. Po çka tash?Në një situatë të tillë të papërmbajtur, pozitë dhe opozitë, duhet të lënë interesat partiake dhe të mendojnë për të mirën e Kosovës dhe për të mirën e popullit të saj, nga i cili u zgjodhën dhe të gjithë së bashku të gjejnë rrugën për të dalë nga kjo krizë e rëndë. Vetëm dialogu, toleranca dhe mirëkuptimi garantojnë sukses dhe asesi veprimet jashtëkushtetuese. Ky dialog mes partive politikë, pozitë dhe opozitë, duhet të ndodhë sa më parë dhe Kuvendi t’ i kthehet punës normale të miratimit të ligjeve dhe të kryrjes së obligimeve që ka në kompetencat e tij ndaj qytetarëve.Zgjidhja më e mirë sipas meje në këtë situatë të ndërlikuar për këto dy marrëveshje të nënshkruara në Bruksel do të ishte shpallja e një
referendumi ku populli do të përcaktoj, pasi që do të kishte marrë të gjitha shpjegimet e mundshme.
Populli pret nga qeveria dhe parlamenti të kryhen punët që kanë mbetur pa u përfunduar, siç është zhvillimi ekonomik, hapja e vendeve të reja të punës, ndalja e korrupcionit, zbatimi i ligjeve dhe krijimi i besimit që është luhatur.Një përshkallëzim i gjendjes dhe qitja e njerëzve në rrugë do të ishte fatal për ne dhe, veç pasojave përbrenda, do të humbim përkrahjen që kemi pasur deri tash nga SHBA dhe nga Bashkësia Europiane. Kjo do të ishte baraz me paralizën e shtetit.
Reagimet e SHBA dhe të Bashkësisë Europiane flasin më së miri se cila është rruga që duhet ndjekur!

*Autori është veprimtar dhe biznesmen i njohur i komunitetit Shqiptaro-Amerikan dhe themelues i gazetës Illyria në New York.

BE quan Europë vetëm BE – Opozita nuk është rrezik për Kosovën – Status quo-ja e imponuar nga BE po!

October 15, 2015 by dgreca

Nga Elida Buçpapaj/
Në janar të këtij viti kam shkruar një opinion me titullin eksplicit „Kosova geto në zemër të Europës“. Nuk e ka krijuar Kosova këtë situatë, që të vetëgetoizohet, por ndërkombëtarët, ose shkurt thënë BE-ja. Kosova në fund të shekullit XX viktimë e një regjimi kriminal, vijon në shekullin XXI të mbetet viktimë e mentalitetit anakronik të BE-së.
Kosova vendi i vetëm në Ballkan që nuk përfiton nga sistemi Shengen, dhe tani populli i Kosovës po kërcënohet nga faktorë kryesorë të BE-së se, nëse mbështet opozitën, do të mbetet jashtë Shengenit përsëri!
Opozita e Kosovës nuk është armikja e Kosovës. Opozita e Kosovës nuk është as fashiste dhe as terroriste. Opozita e Kosovës është pro Amerikane, pro BE dhe pro Kosovës, por që nuk mund të ngopet me lugën bosh, sepse as barku i popullit të Kosovës nuk ngopet me lugën bosh.
Tash opinioni kosovar e ka kuptuar qartë se BE-ja ka përdorur mënyra jodemokratike për të mbajtur Thaçin në qeverisje, duke synuar edhe riciklimin e tij si President. Hashim Thaçi një lloj hibridi i Putinit në Ballkan, i krijuar si lider kukull me vizën e BE-së! Krejt absurde dhe në kundërshtim me vlerat demokratike të Perëndimit.
Kur opozita krijoi pas zgjedhjeve të qershorit 2014 aleancën e VLAN-it, BE-ja nuk e pranoi fuqinë e votës së opozitës në Kosovë, që do t’ja hiqte Thaçit shansin të qeveriste vendin për mandat të tretë. Kur opozita përdorte pushtetin e votës, BE-ja nuk e pranoi këtë pushtet, duke i imponuar Kosovës një aleancë kukull – midis Thaçit dhe Isa Mustafës. Them aleancë kukull, sepse Isa Mustafa, kur hyri në aleancë me Thaçin, ai e tradhtoi elektoratin e tij. Në fushatën zgjedhore Mustafa e kërkoi votën për LDK-në me premtimin dhe qëllimin politik se do ta linte Hashim Thaçin në opozitë.
BE-ja nuk e pranoi fuqinë e votës së opozitës së Kosovës kur kjo ishte me formacionin politik si VLAN, duke krijuar kështu përshtypjen në mbarë opinionin shqiptar se ishte vetë BE-ja pas martesës perverse midis Thaçit dhe Isa Mustafës, kur as njëri dhe as tjetri nuk gëzojnë simpatinë minimale, sepse janë vetë institucionet ndërkombëtare Perëndimore që qeverisjet e tyre i vlerësojnë të korruptuara dhe autokratike.
Veprimet e opozitës aktualisht në Parlamentin e Kosovës janë legjitime.
Opozita duhet të jetë shumë e kujdeshme, sepse SHIK-u synon ta inkriminojë. Për të mbrojtur integritetin e saj, opozita duhet të mos shkaktojë asnjë lloj dëmi që ia cënon asaj imazhin e veprimit politik, për të tjerat, brenda normave demokratike, është e lirë të veprojë. Të evitohet edhe rasti si i deputetes Flora Brovina. Asnjë dëm dhe dëmtim të mos shkaktohet nga veprimet opozitare.
Ndërsa pretendimet se veprimet e opozitës janë fashiste dhe rrezik jo vetëm për Kosovën, por edhe për rajonin janë manipulim i pastër. Fotoja e zëvendësit të Hashim Thaçit, Petrit Selimi, me të birin bashkë me Daçiçin, ndërkohë që Daçiçi deklaron se Kosova është ISIS, janë shprehja më vulgare se shefi i Petrit Selimit është në pozita thellësisht vasale me Serbinë. Daçiç quan Kosovë vetëm Thaçin dhe Petrit Selimin, ndërsa pjesa tjetër, sipas tij, është ISIS. Por Kosova nuk mund të barazohet as me dy vetë apo me tre vetë, me Hashim Thaçin, Petrit Selimin e Isa Mustafën. Kosova barazohet me popullin e saj, të papunë dhe lënë në mjerim nga kjo qeverisje.
Shqiptarët e Kosovës nuk janë indianët e Amerikës të kohës së Kristofor Kolombit. Populli i Kosovës nuk mund të qeveriset nga një regjim, cilësuar nga më të korruptuarat e Europës, vetëm për të kënaqur orekset e Beogradit, që në të gjitha daljet zyrtare e konsideron Kosovën si pjesë të Serbisë, kur 25 vende të BE-së e kanë njohur Kosovën si shtet të pavarur. Kjo e detyron BE-në që në raportin Kosovë-Serbi, të operojë në përputhje me verdiktin e shumicës së popujve të BE-së që e kanë njohur pavarësinë e Kosovës si shtet sovran.
BE-ja duhet të dale nga statusi i burokratit që dëmton së pari interesat e vetë Europës. Një BE burokratike, indiferente, cinike ndaj fatit të pjesës të saj, siç është Kosova, është e papranushme. Kur ekzistonte Muri i Berlinit ishte e justifikuar, tani jo!
Pasojat e strategjisë izolacioniste të BE-së, ku për të, Europë domethënë vetëm BE, është shkatërrimtare për Europën. Kriza sot me refugjatët sirianë që po dynden me miliona në BE duke rrezikuar vërtetë stabilitetin e BE-së, është produkt i verbërisë së saj. Zyrtarët e BE-së dhe padronët e tyre u treguan syleshë, sepse të mësuar me limuzina e avionë me bileta të klasit të parë, të rrethuar nga sekretaret dhe mantenutat, nuk e kanë imagjinuar se sirianët apo popullsia nga vendet e Afrikës mund të arrinin në zemër të BE-së duke përshkruar në këmbë me mijra e mijra kilometra.
Po më në fund, a i ka dalë gjumi BE-së ?
Sepse produkt i syleshësisë të BE-së është edhe e status quo-ja në Kosovë, që ka imponuar një regjim mizerabël dhe të dështuar, ku papunësia, informaliteti dhe korrupsioni ua ka djegur të gjitha shpresat popullit të Kosovës. Pas sirianëve, kosovarët janë të dytët që ikin nga sytë këmbët nga vendi i tyre. Prej deportimit të kohës të Milosheviçit, ky është dëbimi i dytë që i bëhet popullit të Kosovës nga qeverisja. Pavarësisht se Zoti e ka krijuar Kosovën në zemër të Europës, ajo është një geto dhe Tokë e Djegur për popullin e saj.
Pretendimet e BE-së se Thaçi vendos stabilitet është iluzion dhe spekulim. Kosova do të jetë e destabilizuar deri sa aty nuk do të ketë kushte minimale të jetës. Njerëzit mund t’i vrasësh në dy mënyra: përmes bombave të Asadit, përmes barbarive të ISIS ose duke ua hequr qytetarëve perspektivën e së ardhmes që të fitojnë bukën e gojës për fëmijët e tyre me punë të ndershme.
Prandaj veprimet e opozitës të Kosovës nuk janë kundër Kosovës, por pro Kosovës.
Organizimet e opozitës të Kosovës kanë „degjeneruar“ dhe prodhuar dhunë vetëm kur segmente të SHIK-ut, njerëz të Thaçit dhe Kadri Veselit kanë interferuar kriminelë midis protestuesve.
Prandaj opozita tani operon brënda Parlamentit të Kosovës me vezë dhe gazlotësjellës.
Zgjidhja është se Kosova nuk mund të qeveriset nga regjime kukulla, të cilat brenda vetes janë të kalbura nga krimi dhe korrupsioni. Kosova është Europë ndaj kërkon nga BE-ja një qasje të përgjegjëshme sipas parimeve demokratike të Perëndimit.
Kosova e ndërton vetë demokracinë, në bashkëpunim me aleatin e saj jetik SHBA dhe BE, në kuadrin e integrimeve Euro-Atlantike, por jo si deri më tani, si një koloni në Afrikën e kohës koloniale. Kosova është Europë. Europë nuk do të thotë vetëm BE.
Për 15 vjet rresht pas ndërhyrjes të NATO-s, qytetarët e Kosovës, duke iu bindur verbërisht verbërisë të BE-së nuk e kanë gëzuar të drejtën e lëvizjes përmes sistemit Shengen, dhe tani BE-ja kërkon t’ju imponohet duke i kërcënuar se do t’i lejë prapë pa Shengen !
Mënyrat e imponimit të BE-së permes ndëshkimeve që BE-ja iu bën jo politikanëve të korruptuar, por popullit të Kosovës janë dështimi më i madh i BE-së.
Dhe bilbilat e gazi lotsjellës në Parlamentin e Kosovës është këmbanë për ndërgjegjen e BE-së.
Që të zgjohet sa më parë deri sa nuk është vonë!