Archives for February 2016

Hoti: Grupet kriminale po e cenojnë sigurinë në veri

February 9, 2016 by dgreca

Flet Per Europen e Lire, Besim Hoti – Zëvendës komandant i Policisë së Kosovës për rajonin e Mitrovicës/
Radio Evropa e Lirë: Zoti Hoti, ka vlerësime të ndryshme nga ekspertët e sigurisë në Kosovë se me gjithë përparimet e bëra kohët e fundit, në veri të Mitrovicës gjendja sigurisë vazhdon të mbetet e brishtë. Si e vlerësoni gjendjen aktuale atje, referuar zhvillimeve të muajve të fundit?
Besim Hoti: Mund të pajtohem pjesërisht me deklaratat e analistëve, por jo tërësisht. Incidentet e tilla, të cilat herë pas herë mund të ndodhin, sigurisht që nga aspekti i paragjykimeve mund të jenë si të tilla, por, ato duhet të vërtetohen, para se ne të konstatojmë një gjë të tillë; mendoj, në mungesë të dëshmive dhe fakteve.
Se a ka grupe, individë ose persona me qëllime të caktuara, për të pamundësuar zhvillimin e institucioneve…po, ekziston si mundësi, por po flasim për individë e për grupe të caktuara. Sidoqoftë, vlerësimi i përgjithshëm i sigurisë në rajonin e veriut, përkatësisht në katër komunat më veriore të Republikës së Kosovës, tregon se nuk kemi regjistruar incidente dhe nuk kemi pasur raste të cilat në formë të përgjithshme do ta cenonin sigurinë. Ka incidente, të cilat mund të jenë të organizuara ose të izoluara, por nuk mund të flasim për incidente të cilat cenojnë përgjithësisht situatën e sigurisë.
Radio Evropa e Lirë: Ju po flisni për grupe dhe persona. Për cilat grupe bëhet fjalë?
Besim Hoti: Ju jeni dëshmitarë se në veri kemi një zbatim më të fuqishëm të ligjit, në përpjekje edhe të shtrirjes së institucioneve të tjera, që për grupe të caktuara kriminele, me qëllim të përfitimeve materiale të jashtëligjshme, sigurisht që shtrirja e institucioneve nuk është mjaft e mirëpritur. Viteve të fundit kemi një shtrirje më të fuqishme të zbatimit të ligjit në veri, dhe kjo i pengon grupet e caktuara të interesit, sepse i prishë hesapet e tyre të përfitimeve.
Edhe rasti i fundit, që lidhet me djegien e veturës zyrtare, sigurisht që mund të jetë një çështje personale e një individi apo grupi të caktuar, kundrejt të cilëve zyrtarët policorë kanë zbatuar ligjin, duke u nisur nga arrestimet e deri te sekuestrimi i mallrave ose elementeve të jashtë ligjshme. Këto mund të merren si çështje të hakmarrjeve të ndryshme ndaj zyrtareve policorë, të cilat s’ëndërrohen në çështje personale te individët. Zyrtarët policorë nuk i shohin si zbatues të ligjit, por çështjet i marrin si personale. Kemi pasur raste të hakmarrjes edhe në të kaluarën ndaj zyrtarëve që kanë zbatuar ligjin.

Radio Evropa e Lirë: Kur flisni për këto grupe, kjo nënkupton se janë disa grupe, apo jo?

Besim Hoti: Janë individë, grup, ose grupe. Nuk dua të paragjykojë me numra se sa grupe janë, por, mund të jenë grupe të interesit prej dy apo më tepër personave. Nuk do të thotë që është vetëm një grup i caktuar i organizuar… nuk duhet të jetë ai i strukturuar, por, po preken interesat e grupeve të ndryshme.
Radio Evropa e Lirë: Atëherë, sa mund të konsiderohen këto grupe si faktorët që po i rrisin tensionet në veri, dhe sa janë të fuqishme ato që t’i sfidojnë organet e rendit?
Besim Hoti: Sigurisht që nuk janë [të fuqishme]. Ndoshta mund të pajtohemi ose të mos pajtohemi, por ajo që është më e rëndësishmja, e veçanërisht për një zonë mjaft të ndjeshme, si Mitrovica e veriut, aty ku ndër vite kemi pasur incidente jashtëzakonisht madhore, e kryesisht të orientuara nga karakteri i urrejtjes ndëretnike, [tash] të tilla nuk kemi.
Tash po flasim për qërim hesapesh të grupeve kriminale, të cilave u preken interesat, dhe kjo fuqi e tyre nuk mund të jetë aq e madhe sa mund të paragjykohet. Mund të themi se fuqia e këtyre grupeve të interesit dhe fuqia e këtyre grupeve kriminale për çdo ditë vjen e zbehet, dhe në këtë mënyrë, në veri të kemi sa më pak incidente.
Radio Evropa e Lirë: Një çështje shqetësuese, që në vazhdimësi është ngritur në lidhje me veriun, ka të bëjë edhe me lirinë e lëvizjes. Sa janë bërë përparime në këtë drejtim, sidomos në lirinë e lëvizjes në lagjet me popullatë shumetnike?
Besim Hoti: Sipas statistikave, ne nuk kemi pasur incidente të karakterit të tillë, të cilat vërtetë do të pasqyroheshin negativisht në veri. Gjatë vitit të kaluar kemi pasur katër raste të tilla të regjistruara, por kryesisht kemi pasur të bëjmë me persona të mitur, pra, të moshës së re.
Në të gjitha këto raste, policia i ka arrestuar personat si kryerës të mundshëm të veprës, dhe të njëjtit i ka sjellë para drejtësisë. Kemi të bëjmë edhe me raste madhore, të rënda, deri në vrasje të rëndë në tentativë, por, policia i ka zgjidhur këto raste të regjistruara. Ambienti i sigurisë ka ndryshuar mjaft dhe tani kemi një ngritje të sigurisë dhe një ngritje të besimit në organet e sigurisë në të gjitha zonat e banuara me popullatë të përzier. Kemi një qarkullim, bashkëpunim dhe koordinim mjaft të mirë edhe me përfaqësuesit e këtyre lokaliteteve.
Radio Evropa e Lirë: Sa është numri i pjesëtarëve shqiptarë të policisë në veri, dhe numri i përgjithshëm i policëve në atë pjesë të Kosovës?
Besim Hoti: Kemi diku mbi 40 pjesëtarë të Policisë së Kosovës, të përkatësisë etnike shqiptare, të cilët shërbejnë në këto zona; pra, e kam fjalën për katër stacionet policore, të cilat janë në komunat më veriore të Kosovës. Kurse, numri i pjesëtarëve të Policisë së Kosovës në drejtorinë rajonale të veriut është rreth 506 pjesëtarë të policisë, pra, zyrtarë të uniformuar.(Bisedoi: Arton Konushevci)

Kosovë-Portofoli kreditor me Bankën Botërore

February 9, 2016 by dgreca

-Ministri i Financave në qeverinë e Kosovës, Avdullah Hoti: Deri më tani, shuma totale e kredive të nënshkruara me Bankën Botërore është 68 milion SDR, apo me kursin aktual rreth 85 milion euro/
PRISHTINË, 9 Shkurt 2016/Ministria e Financave në qeverinë e Kosovës sot mbajti Tryezën e diskutimit për Portofolin kreditor me Bankën Botërore, në të cilin murrën pjesë përfaqësues të Institucioneve vendore, përfaqësues të Bankës Botërore, si dhe koordinatorë të projekteve.
Ministri i Financave Avdullah Hoti duke shpreh zotimin e tij dhe institucionit që ai drejton për implementim të suksesshëm të të gjitha projekteve me financim përmes portofolit të Bankës Botërore, bëri të ditur se ky është takimi i parë për këtë viti si pjesë e takimeve të rregullta që organizohen vazhdimisht në mënyrë që të sigurohet implementimi i suksesshëm i Marrëveshjeve Financiare që Qeveria e Republikës së Kosovës ka nënshkruar me Bankën Botërore.
“Ministria e Financave ka të nënshkruara me Bankën Botërore gjithsej 9 Marrëveshje financiare , ndërsa 2 prej tyre tashmë kanë përfunduar. Nga 9 Marrëveshjet Financiare shtatë nga ato janë me kompozim Kredi/Grant për financim të projekteve specifike që kontribuojnë në mirëqenien sociale në Kosovë, si dhe një Marrëveshje Financiare e nënshkruar në fushën e Arsimit e cila është në proces të Ratifikimit. Deri më tani, shuma totale e kredive të nënshkruara me Bankën Botërore është 68 milion SDR, apo me kursin aktual rreth 85 milion euro”, tha ministri Hoti.
Ministri Avdullah Hoti paraqiti zotimin e Ministrisë së Financave që projektet të kenë implementim të suksesshëm brenda kornizës së paraparë ligjore, ngase sipas tij çdo shtyrje paraqet kosto më të lartë të huamarrjes si dhe efekt buxhetor. Ai bëri të ditur se në bazë të Marrëveshjes Financiare gjatë vitit 2016 pritet të finalizohen 3 projekte: Projekti për përforcimin e sektorit financiar dhe infrastrukturën e tregut, Projekti për modernizimin e sektorit publik, si dhe Projekti për pastrim të sektorit të energjisë dhe bonifikim të tokës./b.j/

Imazhi i Muzeut të Krujës dëmtohet nga rrugë

February 9, 2016 by dgreca

Nga Ahmet ZANI/
Muzeu Kombëtar i Gjergj Kastriotit, i njohur ndryshe si muzeu i Skënderbeut dhe muzeu i Krujës është një nga më të vizituarit në vendin tonë.
Ky muze është ndërtuar në Kalanë e famshme të Krujës kryeqendra e shtetit të Arbërit, ku janë të ekspozuara mjaft objekte, dokumenta, riprodhime nga historitë e legjendarit Skëderbe.
Në 100 vjetorin e Pavarsisë së Kombit shqiptar, është investuar për ndriçimin e pjesëve kryesore të Kalasë. Përreth Kalasë rrugët e kalldrëmta sjellin panoramën e mrekullueshme të muzeut, dhe turistët vendas si dhe të huaj largohen me mbresa nga muzeu i Krujës, ndërsa kohët e fundit rasti i dëmtimeve të disa rrugëve kanë shqetësuar jo pak banorët vendas.
Lagjet e Krujës që ndodhen përreth Kalasë, aty ku dhe lidhen disa rrugë që tashmë sjellin shqetësimin e banorëve të cilë ankohen nga moskujdesjet e strukturave institucionale sikur mos të njohin historinë e Muzeut dhe të kalasë së Krujës në tërësi. Rrugët kanë nisur të çarat dhe disa banorë po përpiqen të investojnë për të minimizuar dëmtimet me ato pak mundësi që ofrohen, por kjo është shumë pak. Lëvizjet e tokës në disa pozicione përreth kalasë, krijojnë problemet e shfaqura ndërsa vendorët justifikohen nga mungesa e fondeve, kjo nuk mund të justifikojë pamjen e krijuar sëpaku për turistët ku përballen me këtë fakt aspak normale duke ju larguar realitetit historik që mbart muzeu i Krujës.
Nje problem me vete perben edhe cilesia e dobet e punimeve ne Hamamet e muzeut.

Ministri Hyseni, vizitë zyrtare në SHBA

February 9, 2016 by dgreca

SHBA, vlerësohen lartë të arriturat e Kosovës/
Washington, 8 Shkurt 2016/Ministri i Punëve të Brendshme të Republikës së Kosovës, Skender Hyseni, po qëndron në Washington, në një vizitë zyrtare disa ditore. Gjatë ditës së parë, ministri Hyseni, takoi Bruce Swartz, zëvendës-asistent i Prokurorit të Përgjithshëm të Shteteve të Bashkuara të Amerikës, si dhe Wayne Salzgaber, zëvendës-drejtor i Byrosë Nacionale Amerikane për INTERPOL.
Temat kyçe të bisedave që ministri Hyseni pati në këto takime ishin parandalimi i radikalizmit dhe ekstremizmit të dhunshëm në Kosovë, luftimi i krimit, si dhe bashkëpunimi ndërkombëtar policor.
Bashkëbiseduesit amerikanë vlerësuan lartë të arriturat e Kosovës në përballjen e saj me ekstremizmin e dhunshëm dhe radikalizmin. U konstatua se tashmë Kosova ka demonstruar efikasitet në parandalim të këtyre dukurive, që Kosovën e bëjnë shembull jo vetëm për rajonin, por edhe për shumë vende tjera të botës.
Vëmendje e veçantë gjatë këtyre takimeve iu kushtua përfshirjes më të madhe të Kosovës në bashkëpunimin policor ndërkombëtar, veçanërisht anëtarësimit në INTERPOL.
Ministri Hyseni mori përkrahje të pa kursyer amerikane për arritjen e këtyre objektivave. Në të gjitha takimet u theksua partneriteti strategjik funksional midis Republikës së Kosovës dhe Shteteve të Bashkuara në fushën e sundimit të rendit dhe ligjit.
Në vijim të vizitës, ministri Hyseni do të ketë takime të shumta dhe do të nënshkruajë një Memorandum Mirëkuptimi për fushën e forenzikes me FBI-në. Po ashtu, gjatë qëndrimit në Washington, ministri Hyseni është ftuar të mbajë një ligjëratë në “George Washington University”./b.j/

Kosovë-Priten takime tjera të liderëve drejt zgjidhjes për krizën politike

February 9, 2016 by dgreca

-Shtypi: Zëdhënësi i Ambasadës së SHBA-së shtoi se e vetmja rrugë përpara është të bisedohet dhe të gjendet një zgjidhje me kompromis, por përjashtoi zgjedhjet si rrugëdalje nga situata e krijuar-/
-“SHBA: Zgjedhjet nuk do ta ndryshonin Qeverinë”/
Nga Behlul Jashari/ PRISHTINË, 9 Shkurt 2016/ Në Kosovë priten takime të tjera të liderëvetë partive politike parlamentare, nga maxhoranca e opozita, në tryezën e Presidentes së Republikës, Atifete Jahjaga, pas të paraditës së djeshme në praninë e përfaqësuesëve më të lartë të SHBA e BE në Prishtinë.
Nuk kishte ndonjë marrëveshje apo kompromis drejt daljes nga kriza politike, por një hap ishte vetë takimi me pjesëmarrjen e njërit prej tre liderëve të opozitës, i cili u mbajt në frymë konstruktive, sipas komunikatës nga Presidenca, e cila thkson se të pranishëm ishin edhe ambasadori i Shteteve të Bashkuara të Amerikës, Greg Delawie dhe Përfaqësuesi Special i Bashkimit Evropian, Samuel Zhbogar.
Komunikata e dërguar pasdite theksonte se, “Presidentja Jahjaga falënderoi liderët e partive politike parlamentare që i janë përgjigjur ftesës së Presidentes për të rivendosur dialogun pozitë-opozitë si mënyrë për të ripërtërirë konsensusin thelbësor demokratik në Kosovë”.
“Gjatë takimit, i cili u mbajt në frymë konstruktive, udhëheqësit politikë paraqitën qëndrimet e tyre për tejkalimin e bllokadës politike dhe shprehën gatishmëri për të kërkuar zgjidhje të përbashkët”, përfundonte deklarata nga Presidenca e Kosovës.
Ndërsa, në deklaratat e liderëve politikë kosovarë edhe pas diskutimit në tryezën e përbashkët në Presidencë për tejkalimin e gjendjes së krijuar në vend u ritheksuan qëndrimet e mbajtura deri tash.
Që nga fundvera 2015 e fillimit të krizës politike në Kosovë, dje ishte përpjekja e tretë e Presidentes për të ulur në një tryezë maxhorancën dhe opozitën, ku për herë të parë ishte edhe një nga tre liderët e opozitës, kryetari AAK-së, ndërsa VV dhe Nisma vazhduan me refuzimin e ftesave. Në dy përpjekjet paraprake, së pari në tetor, e pastaj në dhjetor, Presidentja me liderët ka zhvilluar vetëm takime ndaras, të veçanta.
Takimi i djeshëm i liderëve politikë është kryetema e shtypit të sotëm në Kosovë dhe një nga kryetitujt është “SHBA: Zgjedhjet nuk do ta ndryshonin Qeverinë”.
Shtetet e Bashkuara të Amerikës vazhdojnë të shpresojnë se dialogu mes liderëve politikë do të sjellë zgjidhje për krizën aktuale në Kosovë, ndërsa insistojnë se zgjedhjet e parakohshme nuk e zgjidhin situatën, meqë ato nuk do të ndryshonin pothuaj asgjë nga përbërja e Qeverisë aktuale.
Në një deklarim për gazetën Koha Ditore, zëdhënësi i Ambasadës së SHBA-së në Prishtinë, Philip Drewry, tha se dialogu i nisur në tryezën e së hënës, të organizuar nga presidentja e Kosovës, Atifete Jahjaga, duhet të vazhdojë.
“Së pari, ne lavdërojmë presidenten Jahjaga dhe liderët e partive politike që u bënë bashkë sot për të nisur kërkimin për një zgjidhje të bllokimit aktual politik, dhe u bëjmë thirrje partive politike që të vazhdojnë dialogun për të gjetur një rrugë përpara në interesin më të mirë të qytetarëve të Kosovës”, ka thënë Drewry.
Zëdhënësi i Ambasadës së SHBA-së shtoi se e vetmja rrugë përpara është të bisedohet dhe të gjendet një zgjidhje me kompromis, por përjashtoi zgjedhjet si rrugëdalje nga situata e krijuar.
Me kryetitullin në ballinë “Liderët s’e zgjidhin krizën”, gazeta Zëri shkruan se, në takimin e ftuar nga presidentja Atifete Jahjaga, liderët e partive politike nuk kanë arritur marrëveshje për zgjidhjen e krizës politike në vend. “Ramush Haradinaj ka kërkuar shpalljen e zgjedhjeve të parakohshme, përderisa kreu i partisë më të madhe në vend, Hashim Thaçi, deklaroi se lideri i AAK-së në takim as që i ka përmendur dy kauzat e opozitës: Asociacionin dhe Demarkacionin”, përfundon citimi nga gazeta.
Në kundërshtim të katër marrëveshjeve të 25 gushtit 2015 me Serbinë, veçmas asaj për asociacionin e komunave me shumicë serbe në Kosovë, si dhe të marrëveshjes për demarkacionin e kufirit me Malin e Zi, tre subjektet opozitare, Lëvizja Vetëvendosje, Aleanca për Ardhmërinë dhe Nisma, me gjithësej 31 deputetë në parlamentin 120 anëtarësh, kanë organizuar protesta, aksione simbolike e manifestime, si dhe kanë bllokur Kuvendin e Kosovës edhe me hedhje gazi lotsjellës në sallën e seancave plenare e jashtë saj, ndërsa në këto zhvillime kishte edhe të arrestuar, përfshirë 13 deputetë opozitarë, të cilët ndërkohë janë liruar.
Ndërkohë, Kuvendi i Kosovës ende nuk ka mbajtur asnjë seancë plenare në sesionin pranveror, duket në pritje të një zgjidhje për krizën politike.
Në 22 janar 2016, Kryesia e Kuvendit të Kosovës mbajti mbledhjen e parë për sesionin pranveror, në të cilën ishin prezentë edhe kryetarët e grupeve parlamentare, por nuk u përcaktua ndonjë datë për seancë plenare.
Ndërsa, Kuvendin e Kosovës e presin shumë punë, përfshirë zgjedhjen e Presidentit të Republikës, pasi Presidentes aktuale i kalon mandati pas dy muajsh, në 6 prill, e sipas Kushtetutës “zgjedhja e Presidentit të Republikës së Kosovës duhet të bëhet jo më vonë se tridhjetë (30) ditë para përfundimit të mandatit të Presidentit aktual”. Kushtetuta përakton edhe se, “nëse në votimin e tretë, asnjëri kandidat nuk zgjidhet President i Republikës së Kosovës, shpërndahet Kuvendi dhe shpallen zgjedhjet e reja, të cilat duhet të mbahen brenda dyzet e pesë (45) ditësh”.
Opozita, e cila ka kërkesë edhe shpërndarjen e Kuvendit e shpalljen e zgjedhjeve të parakohëshme, ka ritheksuar se “thirrja eventuale e seancave plenare nuk i kontribuon zgjidhjes së krizës politike”, ndërsa ka paralajmëruar protestën e ardhëshme për në ditën e festës së 8 vjetorit të shpalljes së Pavarësisë së Kosovës -17 shkurt, në Prishtinë.
Në 9 janar 2016, në protestën në Prishtinë, kundër qeverisë, sipas opozitës ishin rreth 100 mijë pjesëmarrës, ndërsa sipas Policisë së Kosovës ishin 8 mijë. Më parë, në ditën e festës së 28 nëntorit 2015, në manifestimin e opozitës në Prishtinë sipas vlerësimeve të saj ishin 35 mijë pjesëmarrës.
Derisa dje nuk ishin së bashku në tryezën te Presidentja Jahjaga, tre subjektet opozitare kanë bërë një deklaratë të përbashkët, ku theksojnë se “më 17 shkurt edhe një herë qytetarët e Kosovës do të bashkohen në një protestë mbarëqytetare” dhe se “zgjidhja janë zgjedhjet”.