Archives for July 2016

Kryeministri Mustafa në Samitin e Liderëve në Paris, kërkon përkrahje për projekte konkrete zhvillimore

July 4, 2016 by dgreca

-Ishin të pranishëm presidenti francez Hollande, kancelarja gjermane Merkel, kancelari austriak Kern, kryeministri italian Renzi, përfaqësuesja e lartë e BE-së për Politikë të Jashtme, Mogherini dhe kryeministrat e Kosovës, Shqipërisë, Sllovenisë, Kroacisë, Malit të Zi, Maqedonisë, Bosnje Hercegovinës dhe Serbisë/

Paris, 4 korrik 2016-Gazeta DIELLI/ Kryeministri i Republikës së Kosovës, Isa Mustafa, po merr pjesë në Samitin e Liderëve të Ballkanit Perëndimor, i cili po zhvillon punimet në Paris.Njoftimi i dërguar sonte thekson se, Kryeministri Mustafa mori pjesë në takimin qendror të Samitit, ku ishin të pranishëm presidenti francez Hollande, kancelarja gjermane Merkel, kancelari austriak Kern, kryeministri italian Renzi, përfaqësuesja e lartë e BE-së për Politikë të Jashtme, Mogherini dhe kryeministrat e Kosovës, Shqipërisë, Sllovenisë, Kroacisë, Malit të Zi, Maqedonisë, Bosnje Hercegovinës dhe Serbisë. Në fjalën e mbajtur, kryeministri Isa Mustafa, ka listuar projektet konkrete zhvillimore për të cilat ka interes të përbashkët në rajon, shprehu përkushtimin e Kosovës për bashkëpunim me vendet e rajonit si dhe vlerësoi rezultatet që po jep procesi i nisur në Berlin. Të pranishëm në punimet e samitit janë edhe zëvendëskryeministri, njëherësh ministër i Kulturës, Rinisë dhe Sporteve, Kujtim Shala, ministri i Punëve të Jashtme, Enver Hoxhaj dhe ministri i Zhvillimit Ekonomik, Blerand Stavileci. Kryeministri Mustafa foli për proceset eurointegruese të Kosovës, duke përfshirë MSA-në dhe rekomandimin për liberalizim të vizave.“Besoj thellë se është në interes të BE-së që të hapë më shumë mundësi për integrimin e vendeve të Ballkanit Perëndimor në BE”, tha kryeministri.Kryeministri Mustafa prezantoi edhe proceset konkrete ku ka nevojë për bashkëpunim më të madh ndërmjet vendeve të rajonit si zhvillimi ekonomik, qarkullimi i lirë dhe energjia.

Me këtë rast, kryeministri bëri thirrje që Serbia të kryej obligimet dhe të mundësohet funksionalizimi i projekteve moderne në të mirë të të gjitha vendeve të rajonit, siç është transmisioni i energjisë. Kryeministri Mustafa ka listuar një numër të projekteve në fushën e transportit, ambientit dhe energjisë, si linja 10 e hekurudhës që lidh Shkupin-Prishtinën dhe Beogradin, kompletimi i Autostradës 7 që lidhë Shqipërinë me Kosovën dhe me Nishin në Serbi, i cili do të lidhte Detin Adriatik nga Durrësi me korridorin 10 të Rrjetit Evropian. Kryeministri Mustafa foli edhe për punën që po bëhet në përfundimin e Autostradës për Shkup si dhe mundësinë e zgjatjes së pistës së Aeroportit të Prishtinës. Në sektorin e energjisë, kryeministri tha se po punohet në ndërtimin e kapaciteteve të reja gjeneruese, në riaftësimin e kapaciteteve ekzistuese si dhe interesimin që të ndërtohen linjat e interkoneksionit me vendet e rajonit. Duke u referuar rritjes ekonomike prej 4 % të Kosovës, kryeministri Mustafa prezantoi punën që po bëhet që këtë vit rritja të jetë edhe më e madhe. “Kemi nevojë të shfrytëzojmë të gjitha mundësitë për investime më të mëdha, huazime më të volitshme, të cilat do të krijonin kushte të kapërcejmë problemin e papunësisë së lartë sidomos të të rinjve dhe grave”, tha kryeministri duke theksuar nevojën që të mendohet edhe për treg të përbashkët të kapitalit.

Kryeministri vlerësoi edhe themelimin e Zyrës Rajonale për Bashkëpunim të të Rinjve, si një impuls i duhur që do të krijoj ura të këmbimit dhe bashkëpunimit rinor.

Në fund, kryeministri Mustafa ka shprehur besimin e palëkundur të qytetarëve të Kosovës në vlerat evropiane dhe në Bashkimin Evropian si familje e popujve. “Duke pas parasysh këtë besim dhe përcaktim popullor, Qeveria e Kosovës është plotësisht e përkushtuar për avancimin e agjendës eurointegruese. Republika e Kosovës beson dhe po punon që të jetë pjesë e familjes evropiane”, tha kryeministri Mustafa.

Gjatë Samitit të Parisit, kryeministri Mustafa do të takohet me drejtuesit e shteteve të BE-së si dhe homologët nga vendet e rajonit.

***

Hoxhaj në Samitin e Parisit, BE-ja më e vendosur se kurrë për të ardhmen

Paris, 4 korrik 2016-Gazeta DIELLI/ Ministri i Punëve të Jashtme i Republikës së Kosovës, Enver Hoxhaj ka marrë pjesë në takimin e ministrave të jashtëm të Ballkanit Perëndimor së bashku me ministrat e Francës dhe Gjermanisë.

Në takimin që është pjesë e Samitit të liderëve të Ballkanit Perëndimor, Hoxhaj ka folur për sfidat dhe zhvillimet e reja në BE dhe Ballkan pas referendumit në Britani, dhe nevojën që të rimendohet qasje e re.Po ashtu, Hoxhaj ka folur edhe për raportet ndërmjet Kosovës dhe BE-së duke kërkuar heqjen e vizave pas rekomandimit pozitiv muaj më parë, ndërsa ka përmendur edhe dialogun me Serbinë dhe mos implementimin e marrëveshjeve.“Politika jonë e jashtme rajonale mbështetet në paqen, stabilitetin dhe sigurinë. Angazhimi ynë në dialog me Serbinë, me gjithë të kaluarën, është dëshmia më e mirë e këtij dedikimi. Megjithatë ky proces nuk duhet të vazhdoj pafundësisht dhe marrëveshjet duhet të implementohen”, ka thënë Hoxhaj në takim.Më tej, ai ka ngritur shqetësimet për ndërhyrjet gjithnjë në rritje të Rusisë dhe ekstremizmit në rajon, duke kërkuar nga BE-ja që të jetë më e vendosur se kurrë për t’u përballur.

Kryediplomati kosovar ka falënderuar Komisionin Evropian dhe vendet anëtare të BE-së për përkrahjen pasi Kosova është njëra nga tri shtetet e vetme që ka përfituar financimin e një projekti hekurudhor.

Hoxhaj është pjesë e delegacionit të Kryeministrit të Kosovës, Isa Mustafa dhe Samiti në Paris është vazhdimësi e Procesit të Berlinit.

****

Kosova, partnere në një projekt rajonal në Samitin e Parisit

-Ministri i Kulturës, Rinisë dhe Sportit në qeverinë e Kosovës, Kujtim Shala, në Samitin e Parisit mori pjesë në Konferencën e Rinisë të Ballkanit Perëndimor “Connecting Youth”/

Paris, 4 korrik 2016-Gazeta DIELLI/ Ministri i Kulturës, Rinisë dhe Sportit në qeverinë e Kosovës, Kujtim Shala, po merr pjesë në Samitin e Parisit mbi Ballkanin. Ai sot ka marrë pjesë në Konferencën e Rinisë të Ballkanit Perëndimor “Connecting Youth” që organizohet në kuadër të këtij samiti, me ç’rast do të do të nënshkruhet edhe marrëveshja për themelimin e Zyrës Rajonale të Bashkëpunimit Rinor.

Ministri Shala në fjalën e tij të rastit në këtë samit, u shpreh se Qeveria e Republikës së Kosovës, e ka mirëpritur iniciativën për themelimin e Zyrës Rajonale për Bashkëpunim Rinor, meqë qëllimi kryesor i kësaj është promovimi dhe arritja e pajtimit dhe miqësisë mes popujve të Ballkanit, nëpërmjet bashkëpunimit të rinjve.

Po ashtu, ministri Shala u fokusua te funksioni që duhet të ketë kjo zyre, dhe u shpreh se promovimi i tolerancës, solidaritetit, besimit reciprok, bashkëpunimit social dhe ekonomik, rritja e pjesëmarrjes së të rinjve në jetën shoqërore e politike, shkëmbimin e përvojave në fushën e arsimit, si dhe promovimi i diversitetit kulturor, janë vetëm disa nga detyrat që duhet të arrihen nga kjo zyrë.

Ministri Shala në fjalën e tij i falënderoi edhe dy Qeveritë: atë Gjermane dhe Franceze për ndihmën dhe eksperiencën e ofruar, meqë këto dy qeveri, u shpreh Shala, kanë një bashkëpunim model në këtë aspekt, siç është bashkëpunimi i Zyrës franko-gjermane për 53 vite rresht.

Më tej, Shala shtoi se Qeveria e Kosovës, sikurse deri më tani, do të luajë një rol konstruktiv dhe të përgjegjshëm në frymën e mirëkuptimit dhe bashkëpunimit, duke përmbushur të gjitha obligimet e dakorduara, që rrjedhin nga obligimet e gjertanishme, si në aspektin financiare, po ashtu edhe në atë të përfaqësimin në bordin e paraparë, në sekretariat, si dhe përfaqësimin në nivel të vendit.

Në fund të fjalës së tij, ministri Shala u shpreh se Qeveria e Kosovës është e përkushtuar që të mbështesë të rinjtë në përgjithësi dhe do të angazhohet gjithashtu për të mbështetur Zyrën e Bashkëpunimit Rajonal Rinor, dhe shtoi se Kosova është partner në këtë projekt të rëndësishëm rajonal.(Pergatiti:Behlul JASHARI)

Çamëria-ndërgjegjja e vrarë e shqiptarëve

July 4, 2016 by dgreca

Nga Gani MEHMETAJ/

Kur Armando Sadiku, lojtari i kombëtares shqiptare e dha golin kundër rumunëve, dhjetë milion shqiptarë u gëzuan si asnjëherë më parë. Të gjithë u bëmë shqiptarë krenarë, të gjithë nxituam të mburremi që jemi nipërit e Gjergj Kastriotit. Euforia zgjati tërë natën. Por të nesërmen gdhiu një portal i cili e bëri Armando Sadikun tabelë qitje, sepse qenka çam, ndërsa shqiptarët e Çamërisë u bënë objekt i fyerjeve nga më të pistat që kam lexuar ndonjëherë në gjuhën shqipe. Grekët- xhelatët e shqiptarëve të Çamërisë nuk u përmenden më asnjë fjalë. Krimi i tyre fshihej, amnistoheshin, kurse shaheshin viktimat.

Shqiptarët e Çamërisë janë kaptina më e dhimbshme e historisë sonë kombëtare. Një krahinë të tërë gati sa Kosova e shkombëtarizuan grekët dhe e bënë pronë të tyre. Gur mbi gur nuk lanë në qytete e katunde. Shqiptarët e Çamërisë pinjoll të njërit ndër fiset më të vjetra ilire, i shndërruan me 1945 në kolona të pafundme refugjatësh. Çamëria e sotme ishte Thesprotia e lashtë ilire, luftëtarë të përkushtuar të çështjes shqiptare, ushtarë trima të Gjin Bua Shpatës e princërve të tjerë arbëror të jugut, sot bredhin dyerve të botës nga Konispoli deri në kufinjtë më të skajshëm të Anadollit, në Eskisheher, pa të drejtën elementare-kthimin në tokat e veta.

Të vrarë e të dëbuar nga grekët, të fyer e të sharë jo rrallë nga bashkëkombësit, të shpërfillur nga pjesa tjetër e kombit jashtë kufirit, të shpërfytyruar nga hallet e shumta, të pambështetje nga institucionet evropiane, ata megjithatë e ruajtën gjuhën, traditën e kulturën shqiptare si askush tjetër, kanë muzikë e këngë që të mrekullojnë, kanë valle që të mbajnë pezull, ndërsa përpiqen ta tregojnë tragjedinë -gjenocidin e përmasave biblike, por që jo rrallë tragjedia e tyre bie në vesh të shurdhër.

Papa duhet të zbresë në Çamëri

Çamëria nuk është vetëm ndërgjegjja e vrarë e Evropës, Çamëria është edhe ndërgjegjja e vrarë e shqiptarëve. Papa duhet të zbresë një ditë në Çamëri e t’ua qajë hallin, shqiptarët duhet t’i mbështesim më shumë se sa deri me tash. Greqia i masakroi dhe i dëboi nga territori etnik, bëri gjenocid ndaj tyre, krimin më të madh në shekullin XX, Shqipëria nuk i mbështeti, komunizmi i vuri nën dyshim e karantinë, i nëpërkëmbi e përbuzi, Kosova e kishte hallin e vet, po edhe egoizmin e madh, Turqia, ish pushtuesi mizor, i përdori për kthim resto sikurse të gjithë shqiptarët myslimanë: të jep grekët e armenët e Anadollit, i tha Greqisë, më jep shqiptarët myslimanë të Çamërisë, dhe jemi të larë. Ushtria greke i dëboi shqiptarët e Çamërisë të besimit myslimanë në Turqi, shqiptarët ortodoks i shpërndau më kërcënime më thellë në kontinent apo ua këputi gjuhën. Për njëqind vjet gati i shkriu më shkombëtarizim, pra i vriste në heshtje, ata që nuk arriti t’i vriste më pushkë a më bajoneta. Të tjerët i detyroi të deklaroheshin grekë. Sa herë më ka rastisur mua dhe turistëve të tjerë nga Kosova të takojmë, apo të banojmë në shtëpitë e çamëve ortodoks, të cilët na prisnin aq përmallshëm deri në përlotje, kujdeseshin si askush tjetër ndaj nesh, pikërisht sepse ishim të gjakut të tyre, na e rrëfenin tragjedinë e tyre, por gjithnjë më një sy në dritare se mos i përgjonte kush, apo me veshët nga dera se mos futej ndonjë policë i fshehtë grekë. Shqiptarë ortodoks të Çamërisë për herë të fundit kam takuam më 1991.

Ndërkaq, shqiptarë të dëbuar të Çamërisë kam takuar pas vitit 1992, kryesisht në Shqipëri, por edhe në Francë e Turqi. Sa brengos fakti që greku nuk i lejon të kthehen në krahinën shqiptare, po aq brengosëse është pse një pjesë e bashkëkombësve nuk ua dinë hallin, i përbuzin e përçmojnë si të gjithë të dëbuarit, sepse ashtu i mësuan në kohën e Enver Hoxhës, ashtu po i mësojnë shtrembër edhe në kohën e demokracisë. Lobi i fuqishëm grekë në Shqipëri ka shtrirë rrënjë kudo dhe nuk i lë të ngrehin kokë, zëmër ngushtësia provinciale shqiptare është armiku tjetër, që i nxit shqiptarët kundër shqiptarëve, ashtu sikurse i nxiste dikur lobi serb shqiptarët kundër “kosovarëve”. Shqiptarët e Çamërisë ishin tragjikë në dy plane. Shqiptarët ortodoks që shpëtuan nga masakrat greke, i shkriu dhunshëm pushteti i Athinës, duke ua prerë gjuhën e traditën kombëtare, duke i kërcënuar se po dhanë shenja ringjallje do ta pësonin; shqiptarët myslimanë Greqia i dëboi një herë në Turqi, duke ua humbur farën, ndërsa pjesën tjetër i dëboi në Shqipëri, pasi masakroi pjesën më të madhe të popullatës, gra e fëmijë. Grekët nuk bënë dallime fetare, ata bënë gjenocid ndaj shqiptarëve në Çamëri.

Gjenocidi grekë është i pashembullt, vetëm gjenocidi turk kundër armenëve mund t’i afrohet, ndërsa vetë shqiptarët nuk e ngrehin zërin kundër këtij gjenocidi, ose reagimet janë të flashkëta, shpesh të pasinqerta. Kryesisht reagojnë shqiptarët e Çamërisë, por nuk reagojnë ose fare pak reagojnë shqiptarët e Kosovës, të Maqedonisë, Preshevës e Bujanovcit. Secili e ka futur kokën në zhguallin e breshkës dhe nuk i intereson çfarë ngjet jashtë katundit të vet.

Si arsyetoheshin krimet greke?

“Çamët duhet të kenë bërë diçka, prandaj i dëbuan”, më tha më 1991 Llaqi, një ish pjesëtar i strukturave të Enver Hoxhës. Më la pa fjalë se si i arsyetonte krimet greke, ndërsa i fajësonte viktimat çame. Arsyetimin cinik të gjenocidit grek kundër shqiptarëve të Çamërisë e kam dëgjuar dhjetëra herë në Tiranë. Një arsyetim që s’ta kapte mendja. Gjenocidi arsyetohej me kinse bashkëpunimin më fashistët. Grekëve u lejohej bashkëpunimi më nazistët, kurse shqiptarët duhej të vriteshin e të dëboheshin. Faktet tregojnë se ishin grekët kombi më bashkëpunues më pushtuesin gjermanë në Gadishullin Ilirik. Nuk e di a e kanë shikuar mbrojtësit e gjenocidit grek kundër shqiptarëve të Çamërisë, filmin “Mediteraneo”, ku vajza e dëlirë greke, ua fal dëlirësinë e vet njëkohësisht dy ushtarëve italianë. Janë dhjetëra filma që e paraqesin këtë bashkëpunim greko-italian, apo greko-gjerman edhe në instanca më të larta dhe në shtrirje më të gjëra se sa në dashuri. Megjithatë strukturat komuniste anti kombëtarizmin e qyqarin ndaj çamëve e mbulonin me ideologji, pra çamët ishin armiq, sepse ishin bashkëpunëtorë të nazizmit, nuk i ndihmuan sepse u mbetej hatri serbëve e rusëve.

Në demokraci ka zëra e grupe që i sulmojnë e fyejnë, sepse po bashkëpunuakan më Turqinë e Arabinë Saudite, ndërsa citojnë deklarata të kreut të partisë çame. Nuk e di a duhej të formohej partia çame në Shqipëri, por duket që shpërfillja e pafalshme e shtetit ndaj çamëve mund të ketë ndikuar në formimin e partisë krahinore, ndërsa nuk përjashtohet që kjo shpërfillje cinike t’i ketë hedhur në prehrin e Turqisë e islamizmit, gjë që do të ishte tragjike për këtë komunitet. Nuk ishte më i mirë pushtuesi turk nga ai grek, prandaj është kriminale nëse i afrohen Turqisë. Po ashtu, sulmi kundër Armando Sadikut, u nis, sepse një portal shkruan që ai qenka takuar më një hoxhë- korb islamik. Takimi i një sportisti më një islamik që e ngreh gishtin si antenë televizori në një shtet laik është i dëmshëm për uniformën kuq e zi e për emrin e mirë të kombit të tij, kurse bashkëpunimi apo ndihma turke për shqiptarët e Çamërisë do të ishte fatale, sepse do t’u jepte shkas grekëve të refuzojnë çdo kërkesë çame, madje s’do ta kenë as mbështetjen perëndimore. Kush u garanton përfaqësuesve të çamëve që nuk ka marrëveshje të fshehtë greko-turke për tregtimin e interesave çame. Do t’i shes Turqia interesat e çamëve sikurse i shet limonin e kontaminuar të bregdetit mesdhetar.

Mbyllet samiti në Paris: BE mbetet e angazhuar në Ballkan

July 4, 2016 by dgreca

“Do të mbajmë fjalën dhe do të vazhdojmë të punojmë për stabilitetin dhe sigurinë në Ballkan, ndërsa vendeve të rajonit u themi se procesi i zgjerimit të Bashkimit Evropian vazhdon”, ka thënë presidenti i Francës, Francois Hollande, në mbyllje të samitit për Ballkanin Perëndimor në Paris.

Në konferencën për gazetarë, Hollande ka thënë se shqetësimet e vendeve të Ballkanit Perëndimor se si do të ndikojë te to vendimi i Britanisë së Madhe për të braktisur BE-në, kanë qenë të arsyeshme.

“Ka qenë e rëndësishme të theksohet se vendimi i Britanisë, në asnjë mënyrë, nuk do të ndikojë në angazhimin e BE-së ndaj vendeve ballkanike, në përputhje me kushtet e përcaktuara”, ka thënë Hollande.

Ai ka theksuar se BE-ja është projekt paqeje dhe se të gjitha vendet e rajonit kanë përjetuar luftën civile, nacionalizmin dhe ekstremizmin, andaj “edhe dinë të vlerësojnë paqen”.

Për të lëvizur tutje në procesin evropian, ka shtuar Hollande, është i domosdoshëm zbatimi i reformave, forcimi i sundimit të ligjit, lufta kundër krimit dhe forcimi i bashkëpunimit rajonal.

Në samitin në Paris, Serbia ka marrë dritën e gjelbër për vazhdimin e mëtejshëm të euro-integrimit. Komisionari për zgjerim i BE-së, Johannes Hahn, ka thënë se Kroacia ka dhënë pëlqimin për hapjen e dy kapitujve të negociatave për anëtarësimin e Serbisë në BE, gjë të cilën e ka kundërshtuar deri më tash.

Hahn po ashtu ka thënë se BE ka vendosur të sigurojë 96 milionë euro për tre projekte të infrastrukturës hekurudhore në Serbi, Shqipëri dhe Kosovë.

Takimi i Parisit pas BREXIT, Hollande dhe Mogherini rikonfirmojnë mbështetjen ndaj perspektivës europiane të rajonit. Miratohen financimet për tre projekte të infrastrukturës në Shqipëri, Kosvë e Serbi. Nënshkruhet marrëveshja për Zyrën rajonale të Bashkëpunimit Rinor.

I mbledhur në një kohë kur për Bashkimin europian dhimbjet e kokës për largimin e Britanisë së Madhe janë ende të forta, takimi i nivelit të lartë me kryeministrat e vendeve të Ballkanit, i treti në vazhdën e procesit të nisur në Berlin në 2014, rikonfimoi me fjalët e aktorëve kryesorë europian se angazhimi për këtë pjesë të Europës nuk është zbehur.

“A e ka ndryshuar perspektivën europiane që u është ofruar vendeve të Ballkanit , vullneti i popullit britanik i shprehur me referendum? Po procedura që do të nisë në vjeshtë mes BE-së dhe Britanisë së Madhe? Po paqartësitë që kanë lindur pas këtij rezultati? Ishte e rëndësishme që të rikonfimonim tepër qartësisht se vendimi Britanik nuk e ka vënë në dyshim angazhimet ndaj Ballkanit”, deklaroi në deklaratën e tij për shtyp në përfundim të takimit presidenti francez François Hollande. “Pse duhet të jemi kaq të qartë? Eshtë nga njëra anë mbajtja e fjalës së dhënë, por edhe për të rikujtuar atë çfarë është Europa”, tha ai duke nënvizuar se “Europa është paqja. Dhe vendet e Ballkanit na kujtojnë thelbin e vetë procesit europian. Ato kanë njohur shpërbërjen e Jugosllavisë, luftrat civile, nacionalizimin dhe ekstremizimin dhe ato e njohin vlerën e paqes”, u shpreh presidenti Hollande. Megjithatë ai saktësoi se rruga është gjithashtu e qartë për të gjithë sipas rregullave të përcaktuara më parë e që duhen respektuar nga vendet e Ballkanit. “Për të shkuar më tej drejt Europës, reformat janë të rëndësishme. Ky është kyshti për të vijuar me këtë perspektivë. Reformat për shtetin e së drejtës, luftën kundër krimit të organizuar dhe korrupsionit, rregulla në fushën e drejtësisë dhe bashkëpunimi rajonal”.

Në të njejtën linjë me të dhe Përfaqësuesja e Lartë e BE-së për Politikën e jashtme dhe të Sigurisë Federica Mogherini. “Para së gjithash zgjedhja e qytetarëve britanikë nuk përfaqëson fundin e Bashkimit Europian. Përkundrazi, qytetarët e Ballkanit Perëndimor shohin te BE-ja një projekt të madh paqeje, zhvillimi ekonomik dhe mundësishë për të rinjtë. Dhe duke e parë BE-në me sytë e të rinjve të Ballkanit, na ndihmon të kuptojmë se çfarë është sot në rrezik, çfarë do të humbisnim nëse nuk do të rizgjonim projektin europian siç po bëjmë këto javë”, u shpreh ajo duke saktësuar se “mesazhi që kemi për miqtë tanë të Ballkanit është se BE-ja është aty, mbetet e fortë, mbetet fortësisht e interesuar për procesin e zgjerimit në Ballkan dhe punon çdo ditë me secilin vend për të menaxhuar flukset e emigracionit, ato të refugjatëve, parandalimin e terrorizmit, zhvillimin e rrjeteve të ndërlidhjes për ekonomitë tona, dhe do të vazhdojmë ta bëjmë këtë”, u shpreh zonja Mogherini.

Takimi i Parisit bëri një vlerësim të ecurisë së projekteve të mbështetura në Samitin e Vjenës, ku u miratuan 10 projekte të ndërlidhjes rajonale (6 në infrastrukturën rrugore e 4 në infrastrukturën energjitike). Në deklaratën përfundimtare të takimit theksohet se “projektet e investimeve të miratuara në Vjenë duhet të vihen në zbatim pa vonesa. Pjesmarrësit mirëpritën faktin se disa nga këto projekte mund të inaugurohen gjatë këtij viti”. Po ashtu, u miratuan dhe 3 projekte të reja, ndër të cilat njëri lidhet me Shqipërinë, me rehabilitimin e hekurudhës Tiranë-Durrës dhe ndërtimin e segmentit hekururdhor Tiranë – Rinas, me një vlerë investimi 81 milionë Euro, nga të cilat, 35 milionë euro do të jepen si grant nga WBIF (Korniza e Investimeve në Ballkanin Perëndimor). Dy projektet e tjera lidhen me Serbinë, me modernizimin e hekurudhës Nis-Dimitrovgrad-kufiri me Bullgarinë, përmes një granti 44 milionë eurosh, dhe me Kosovën, për rehabilitimin e Hekurudhës Fushë-Kosovë-Mitrovicë, që do mbështetet me një grant 17 prej milion eurosh.

Ndërkohë, projekti i Gazsjellësit Adriatiko-Jonian është paraqitur si një projekt rajonal në kuadër të Kornizës së Investimeve në Ballkanin Perëndimor, dhe do të mbështetet financiarisht nga BERZH-i studimi i fizibilitetit me 3,5 milionë Euro. Po në fushën e energjisë, sipas Deklaratës përfundimtare, është prezantuar dhe “një nismë për rritjen e investimeve për efikasitetin e energjisë lidhur me ndërtesat e banimit dhe zhvillimin e qëndrueshëm, falë një financimi shtesë të BE-së prej 50 milion eurosh. Në këtë rast bëhet fjalë për një program i cili synon të identifikojë rrugët më të mira për zhvillimin e potencialit hidroenergjitik të rajonit”, ndërkohë që është rënë dakort për “një hartë rruge që do të çojë drejt krijimit të një tregu rajonal të energjisë”.

Një nga vendimet e takimit, i nënvizuar si “një hap i rëndësishëm për mbylljen e plagëve të së kaluarës” e i përshëndetur në mënyrë të veçantë dhe nga presidenti Hollande, ishte nënshkrimi nga vendet e rajonit të marrëveshjes për themelimin e Zyrës Rajonale të Bashkëpunimit Rinor një nismë e kryeministrave të të Shqipërisë dhe Serbisë, bazuar në modelin franko-gjerman të pas Luftës së dytë Botërore. Objektivi i Zyrës do të jetë “mbështeja e aktiviteteve që promovojnë ripajtimin mes popujve, si dhe të programeve mbi diversitetin, shkëmbimet ndërkulturore, pjesmarrjen qytetare dhe promovimin e velrave demokratike”. Vendet e rajonit do të kontribuojnë me një total prej 1 milion eurosh për funksionimin e Zyrës Rajonale, ndërkohë që 1 milion euro të tjera do të ofrohen nga BE-ja.

4 Korrik 2016 : festime me fishekzjarre edhe nga familjet Shqiptaro-Amerikane

July 4, 2016 by dgreca

Zef Perpepaj si organizatori kryesor edhe kete vite e festoje s’bashku me familjen Perpepaj, ashtu si kurse edhe vietet e kaluara ne nji ambjent me të vërtet festivë – mjaft defryes dhe patriotik, në fushën e një lokali piktoresk, bregun e lumit Hudson në Yonkers – New York, pjes e pronës së Perpepajvet “nuk munguan, si tha edhe vatrani Zef Balaj, anëtarë i Bordit të LQSHA, flamuri dhe simbolet e shtetit tonë të adaptuar Shteteve të Bashkuara të Amerikës dhe Shqipërisë”/
Nga Beqir SINA/NEW YORK CITY : Çdo vit, më 4 korrik, Shtetet e Bashkuara festojnë Ditën e Pavarësisë. Sivjet, 4 Korriku, 240-vjetori i shpalljes së pavarësisë së Shteteve të Bashkuara të Amerikës nga Britania e Madhe, në vitin 1776, kur 13 kolonitë e asaj kohe shpallën pavarësinë dhe lirinë e tyre nga qeverisja britanike, u shënua në të gjithë vendin mbramjen, e 4 Korrikut me fishekzajrre në qiellin e El Dorados.
Komunitetet në të gjithë territorin e Shteteve të Bashkuara të Amerikës, mbrëmë , me organizime të ndryshme familjare, festuan Katër Korrikun, me, muzik, barbecue, lojra sportive, dhe fishekzjarre, çka tregoj se kemi te bejme me nji ngjarje të veçantë, kombëtare për çdo komunitet dhe familje amerikane, në SHBA.
Duke kërkuar për te parë se si e festuan familjet shqiptare, 4 Korrikun – 240-vjetorin e shpalljes së pavarësisë së Shteteve të Bashkuara të Amerikës, mbrëmë, ndoqa festimet e dy familjeve shqiptare, Perpepaj dhe Balaj, të cilat ishin bërë se bashku me rreth 200 anëtarë të dyja familjeve, nipa e mbesa, dashamirë, miq edhe shokët e tyre amerikanë, me të cilët keto dy familje, edhe bashkë punojnë në sektorin e bisnisit të përditëshëm .
Dita e Pavarësisë në këtë mjedisë, mbas, ushqimit të shumë llojshëm, pijeve, muzikës dhe lojrave të sportit, përfundojë në mbrëmje me një zhurmë patriotike, e cila dallohet me shëndrritjen e fishekzjarreve, duke “ndezur” dhe “verbuar” në qiellin e natës! mbi El Dorado.
Zbukurimin e këtij ambjenti festiv me rastin e 4 Korrikut – e kishte përgatitur mjeshtri i fishekzjarreve Tom Perpepaj, duke e bërë këtë mbrëmje festive të përngjante me atë të spektaklit, që organizon në qyetin e New Yorkut, kompania MACY’s, e cila është ndër më të mëdhatë, në SHBA për organizime të tilla festive.
Dy, më të vjeterit e të dy familjeve, ( kumbar me dekada ) Prel Perpepaj, që është i vetmi vëlla që jeton prej katër vëllezërve të arratisur nga Shqipëria në 1951, dhe vendosur për disa vite në Kosovë, deri sa erdhën në SHBA, së bashku me Zef Balën, e familjen e tij, sjollën kujtimet të bukura e shumë interesante nga jeta e tyre në Amerikë dhe festimi i çdo 4 Korriku- Ditës së Pavarësisë së SHBA
4 Korriku, i shpalljes së pavarësisë së Shteteve të Bashkuara të Amerikës, është një festë kombëtare e SHBA, e dalluar në dekada për gjithë komunitetin shqiptarë, dhe familjet shqiptare ,të cilat me forma të ndryshme , si gjithë komunitet e tjerë, dalin të organizuar për të festuar në parqe e mjedise(Backyard) e të tjera me familjet e tyre, miq e shok amerikanë, që të e festojnë së bashku në mënyrën më të kënaqshme.
Kështu ishte, për familjet amerikane, dhe komunitetet e tjera, edhe dita e djeshme ishte një tjetër fundjavë – festive, që si çdo vit i bënë bashkë edhe familjet shqiptare në SHBA , ashtu si dhe familjet amerikane , te festojnë së bashku, duke shënuar me këtë rast Ditën e Pavarësisë, 4 Korrikun, 240-vjetorin e shpalljes së pavarësisë së Shteteve të Bashkuara të Amerikës nga Britania e Madhe, në vitin 1776, kur 13 kolonitë e asaj kohe shpallën pavarësinë dhe lirinë e tyre nga qeverisja britanike.

HAPPY Independence Day USA!

July 4, 2016 by dgreca

HAPPY Independence Day USA!/

Today is Independence Day, is the National Day of the United States. Independence Day of the USA, also refered to as the Fourth of July or July Fourth in the U.S., is a federal holiday commemorating the adoption of the Declaration of Independence on July 4, 1776, by the Continental Congress declaring that the thirteen American colonies regarded themselves as a new nation, the United States of America, and no longer part of the British Empire. Independence Day is commonly associated with fireworks, parades, barbecues, carnivals, picnics, , concerts, family reunions , and political speeches and ceremonies, in addition to various other public and private events celebrating the history, government, and traditions of the United States. Independence Day is the National Day of the United States.

HAPPY Independence Day USA!