Archives for May 2017

SOFRA E DIELLI:REVOLTA, SPAÇ

May 20, 2017 by dgreca

Nga Agim Xh. Dëshnica/

Migjen, Migjen/

tek prehesh lart/

mes yjeve të artë/

a t’shkoi kund ndër mend/

në meditimin tënd/

dhunim e poshtërim,/

që ç’mend, si ky mjerim?/

Ku jeta hiqej zvarrë, pa gjurmë, pa mbresë,/

Sizifi i dërmuar, do shuhej nën ngarkesë;/

ku veç një qen të shoqëron si mik, si qengj/

e zogu në frengji, këndon si shenjtë/

e uji vjen e qan/

e sy e buzë të lanë./

Njeriu bishë e verbër; i prapë, pa vesh, pa shpirt ;

Cerber, me dhëmbët plumb që shemb

e kthetrat si kamxhik.

Mos griset re e zymtë, sipër majë më majë

e copë e pakët qielli, mos zbret në ferrin Spaç,

me erën dhe mendimin, kalon hendekë e boka,

përroin – rrjedhë gjaku, ku jeta tretet nëpër gropa;

mbi kulla karakollësh, pushon e pret në pragje,

troket në porta lehtë, nga gjumi zgjon të lodhur,

me thirrje e pak fjalë,

të vdekur e të gjallë.

E gjaku vlon në tru , në zemër e në krah,

ringjallja merr vendim

në mug e zbardhëllim.,

shpërthen dëshira për liri,

Mjaftë më! Më këmbë! Drejtësi!

Sfilitur, skllevër, por bijë të mirë,

kur s’dimë u ngrys apo ka gdhirë.

S’durohet , tmerr, skëterrë-minierë,

vagon mundimesh- Karont në hon;

qysqi e plagë, kazmë e lopatë,

vare e rëndë, vdekje e mandatë,

me afsh vullkani në çdo skutë;

në ditë pa ditë, helm e gas i mrytë;

me gjakun tonë-normë mizore,

tunel e terr e shpellë mortore

e jashtë të pret, ndëshkim, kërbaç,

e brenda burgut qeli, litar,

O Spaç, O Spaç, o Spaç!

Më këmbë. Flamurin !

Mjaftë më, gazetë e supë e zezë,

përbindësh apelesh në mëngjez,

pa diell, pa qiell,

pa një livadh e hijeshi

e shtigje qark, për miqësi.

Më këmbë! Lirinë !

Na digjet shpirti për lule e degë,

na digjet buza për fjalë e këngë;

për dhomë të qetë e shpresë e ëndërr;

për dasmë me valle, me nuse , dhëndër.

Afër nënokes kur gatuan,

për lojë vocërakësh tok me gruan;

për një gotë me babanë,

bisedë me motër e me vëllanë.

për mësim e shkencë e krijim,

për ardhmërinë me ngadhënjim . 2

Na presin drita, era e lirë, gjindje e tokë.

Të gjithë me halle e mall, për miq e shokë.

Të dalim rrugësh, në bulevard,

kur moti ngroh a mali zbardh.

Të shkojmë të lahemi në lumë,

në hije manash të bëjmë zhurmë;

në det të hapur kur fryn nga jashtë,

në muzg, në park, në orën gjashtë.

O ti, o Orë e malit, pse rri e kqyr më kot,

rrudh ballin e menduar, në faqe rrjedhin lot?

Skënderin, Palin, Dervishin, Hajriun;

s’i preu plumbi,

as vdiqën, as humbën.

Jetojnë, thërrasin: Kujdes!

Djelmoshat e bukur.

Bijtë e nënave, trimat e dritës,

armiqtë e territ. Të patundur!

Enden gërmadhash, gurësh , braktisjesh ,

Pjetër, poetë, piktorë, kujtesa dhimbjesh;

përroi zhurmon, mbush rrjedhën e jetës…

Dëgjohen fuqishëm zëra: Kujdes, kujdes

Lagunat dhe fenomenet në mbrojtjen e tyre

May 20, 2017 by dgreca

Nga Gëzim Llojdia/

1.Një udhëtim në gjirin e Nartës, përbënë një atraksion. Afrohem, drejt flladit përkëdhelës tè kësaj ngrohtësie,në çdo pulitje sysh gjej një fushëpamje tè cilën e zbuloj me ëndje,zhytur thellësive me rrymë të nëndheshme ,që vjen duke shpërthyer. Gjiri i Vlorës ,rrethuar nga brigjet e sheshtë, me thellësi të vogla, mbyllur nga shpatet e malit Lungara dhe gadishullit,shkojnë deri mbi lartësit 840 m.Në këtë gji deti është i çuditshëm motivi peshkatar.Sa e sa përpjekje tè lëna pas, anije tè braktisura nga pamundësia e lundrimit,përplasen me dallgët duke u përballur me guximin e tyre tè pamposhtur,çdo rikthim në pikën e nisjes bèhet lajtmotivi i orëve tè pafund tè pritjes. Ankoruar nè brigjet e shpirtit peshkatar ,qè kurrë nuk u përkul nga tè gjitha vështirësitë, serish një nerv jete mbijeton duke sjellè shpresën, që kurrë nuk mbytet,kaltërsitë e premtuara mbeten tè dlira në nostalgjinë e cila nuk mund tè shlyhet me asgjë.Sipas të dhënave të siguruara nga :Gef/UNDP – ruajtja e ligatinave dhe ekosistemeve bregdetare ne rajonin e Mesdheut, Fondi shqiptar i zhvillimit, Albanian Development,Instituti i kërkimeve Urbane :Territori administrativ,sot nënë veresi të njësisë administrative përfshinë një sipërfaqe prej 12,000 ha nga të cilat 42 km katror janë të përbëre nga pasqyra ujore e Lagunës së Nartës. Një vijë bregdetare prej rreth 10.5 km në detin Adriatik. Pjesa tjetër e territorit shtrihet në lartësitë e kodrave, që rrethojnë qytetin e Vlorës në pjesën verilindore dhe lindore. Disa kufij imagjinarë janë përkufizuesit e saj në jugperëndim nga Orikumi ,në veri verilindje nga Novoselë.Ishulli i Sazanit dhe Laguna e Nartës. Laguna e Nartës është e njohur në nivel ndërkombëtar për shkak se përmbush kërkesat e Ramsarit. Laguna mbyllet me kepin e Triportit.

2.Sa njihet :Gjiri i Vlorës dhe kepi i Treportit? Fjalët e pathëna si muzgje tè heshtura që vijnë radhe-radhe,një shi i imët u mbulon ndjeshmërinë duke i mbajtur afër dhe përkëdhelur,është një mallëngjim qè pushton anè e kënd gjithësinë e këtij eklipsi.Pemë të larta kapin qiellin e mundësive duke iu rikthyer gjithmonë thellësive hapet nè pambarim. Hapet një dritare nè këtë fushëpamje .Atje tej një jehonè,që fshihet i hap sytë agimeve tè përndritura,përgjumje e kudondodhur mè vjen si fjalè e ligè duke mërmëritur. Gjiri i Vlorës i përcaktuar me këto përmasa:19 km i gjate dhe 16 km i gjere. Fillon me Kepin e Triportit,përfundon me Kepin e Gjuhëzës. Kepi i Treportit ndodhet në lagunën e Nartës. 3. Treporti në listën e qyteteve antike. Vlora ka 5 qytete antike: Amantia, Olympia, Cerja, Orikum, Treporti .Triporti: është një rrip toke, në forme istmi shtrihet 8 km në veriperëndim të Vlorës, shkruhet në planin e zhvillimit të saj,midis lagunës së Nartës në lindje dhe detit në perëndim. Relievi i këtij rripi toke krijohet nga kodrina të ulëta, që shkojnë deri në 80 m. Në zona të tjera rripi i tokës është shumë i ulët dhe përbëhet nga një rërë e hollë edhe e bardhë (zona e Kavalonës në lindje të Nartës). Në të kaluarën lidhja e lagunës së Nartës me detin realizohej nga tre hyrje nga të cilat sot funksionon vetëm dy. Në pjesën me të gjerë e më të lartë të Triportit gjendet fshati i Zvërnecit, në pjesën jugore të së cilës që zgjatet drejt detit janë zbuluar mbetje të një porti antik.

3.Ku gjendet Narta? Nè burimet e të gjitha ujërave të kristalta,aty ku humb kuptimi i kësaj kohe dhe hapësirave të qenësishme. Nèse mundesh bèje tè çele fushëpamjen qè lundron nè një det të pafund,thellësitë le të mbeten mirazhe tè largëta. Udhëtar,merre me vete të gjithë magjinë që sjell gjiri parajsës mrekullore të Nartës. Mes petale lulesh shkrihesh e bëhesh njësh kësaj hijeshie,bari i njomè lëshon aromën dehëse dhe kudo përhap frymè ripërtëritjeje,natyrë moj e ëmbla që sjell ngazëllimin depërtues. I mbyll sytë, duke tè imagjinuar tè tjera ardhmëri dhe ngjitje lartësive,j çasti i mbetur ndërmjetësisë mes kulmeve dhe skajeve,lërmë tè prehem e qetè nè këto lugina të mrekullisë parajsore.Në veri të qytetit aktualisht gjendet, fshati i Nartës, ngritur buzë ujërave të lagunës, rrethuar nga kodra të buta të mbuluara me vreshta nga të cilat prodhohet një prej verëra në mënyrë artizanale,por tepër cilësore. Banesat tipike të ulta rrugicat dhe në jug stadiumi,fusha e braktisur,kur dikur skuadra “Adriatikua” gjendej në kategorin e dytë. Dikur, njihej për prodhimin e Vloshit. Në jug të fshatit ku zë fill pylli mesdhetar ndan lagunën nga deti,vetëm tre vjet më parë Qendër komune , sot një njësi administrative me det dhe plazhin e madh, ka në territorin e saj një ndër dy lagunat e Gjiut të Vlorës, laguna e Nartës për nga madhësia mund të shkruhet si: laguna e dytë, me sipërfaqe 4.180 hektarë. Laguna e Nartës është përcaktuar në një plan zhvillimi administrativ ajo përbën një ekosistem të rëndësishëm natyror. Laguna e Nartës është e njohur në nivel ndërkombëtar me një numër shpendësh ujor me më tepër se 48.700 lloje. Për tre lloje, zona pret 1% të numrit të përgjithshëm. Në dimër, me tepër se 23% e shpendëve ujor të Shqipërisë strehohen në këtë zonë. Në të gjenden 195 lloje shpendësh, ndërsa kordoni që ndan lagunën nga deti është i mbuluar me pyje mesdhetare. Kjo është një pikë mjaft e mirë për observimin e shpendëve ujore si dhe për peshkimin. Ujërat e lagunës janë të pasura me peshk, sidomos ngjala dhe levrek. Laguna mbyllet me kepin e Triportit, i cili së bashku me kodrën e pyllëzuar përbën një kompleks natyror mjaft të bukur turistik. Disa të dhëna:Laguna e Nartës është sipërfaqja ujore kryesore e zonës. Pjesa veriore e e saj transformua në kripore sot mbulon një sipërfaqe prej afro 1 500 ha. Laguna e Nartës është vendosur ne zonën Vlore-Myzeqe, ne pjesën jugore të deltës së Lumit të Vjosës. Ajo, përfshin zonën nga Grykëderdhja e Vjosës deri ne Kepin Triport. E gjithë zona prej Grykëderdhjes se Vjosës, përfshire fshatrat Bishan, Novosela, Cerkovina, Panaja, Narta, karakterizohet nga dominimi i fushës bregdetare aluviale që shtrihet gjatë bregdetit të ulet ranor. Kriporja dhe lagunat ndahen nga një digë prej 13.8 km2 . Laguna e Nartës (2 900 ha) ndahet nga deti prej një brezi ranor, i mbuluar në pjesën më të madhe të tij prej pyllit të pishave. Laguna komunikon me detin nëpërmjet dy kanaleve artificiale. Kanali jugor është 200 m i gjatë, 6-48 m i gjerë dhe 0.2 -1.8 m i thellë. Kanali verior është 800 m i gjatë, 11-60 m i gjerë dhe 0.3-0.5 m i thellë. Kanali ka një debit prej 2.2 – 4.3 m 3 /s. Të dy kanalet bllokohen shpesh për shkak të mbushjes nga sedimentet. Laguna ka një thellësi mesatare prej 1.2 m. Thellësia maksimale arrin 2.08 m ndërsa thellësia minimale është 1.08 m. Si çdo lagunë tjetër e këtu regjimi ujor është ne varësi të baticë-zbaticës. Një ndikim të madh kanë erërat. Era jugore ul nivelin e lagunës me 20-25 cm, ndërsa era e veriut ngre nivelin me 15-20 cm. Uji i lagunës është tepër i kripur me shifra në pikun e verës kapin vlerën 78.0 0 /00. Kur sasia e ujit të ëmbël është mjaft e ulët dhe kur kanalet e komunikimit janë të bllokuara nga mbushjet, një sipërfaqe prej afro 1 000 ha thahet ndërsa një pjese tjetër prej afro 800 ha kap një thellësi prej 10 cm.

4.Gjiri i Nartës shquhet për shpezët me një habitat të pasur. Gjiri i Vlorës dhe zona e Nartës,kryesisht janë studiuar nga mjaftë organizata si dhe ente shtetërore .Gjiri i Nartës shquhet për bollëkun e shpesëve dhe peshkut të gjolit. Mirëpo sasia e peshkut e ardhur nga laguna ,vetëm rënie ka pasur. Disponojmë disa të dhëna të përfshirë nën një hark kohor, 30 vjeçar në sundim të dy regjimeve. Gjate periudhës 1975-1990 kapjet vjetore te peshkut ishin afro 55 kg/ha (d.m.th. 1 590 kv/vit) me një maksimum prej 70 kg/ha (2 023 kv/vit) në vitet 1980-87. Afro 30% e prodhimit vjetor përbehej nga gaforret (Carcinus aestuarii). Sipas të dhënave, numri i peshkatarëve dhe kapjet kanë shënuar rënie në 50 vet, ndërsa zëniet e peshkut në tërësi në vitin 2003 ishin 46 kg/ha ose 1 340 kv/vit. Llojet kryesore të peshkut janë qefulli (katër lloje të ndryshme), ngjala, levreku, kocja dhe aterina. Struktura e peshkut dominohet nga qefulli. Llojet me vlera të larta si: levreku,kocja përbejnë vetëm 25 % te zënieve. Këto sasi janë 2-4 here më të ulëta se në lagunat e tjera bregdetare të Shqipërisë. Llojet të pasura te makro-zoobentos (gjallesa të thellësisë në nivel të përgjithshëm) janë bivalvoret Cardium edule dhe krustacet si Gaforrja. Iktiofauna është e ngjashme me atë te Lagunes se Karavastase, por paraqet dominim te Ngjalave, Aterines, Celikut dhe llojeve te ndryshme të Qefullit. Laguna strehon një avifauna interesante veçanërisht gjatë periudhës së dimrit. Zogjtë që ndeshen me shpesh, në lagunë janë: Pula e ujit, Cafka e përhime, Karabullaku i detit, Karabullaku i vogël, Kredharaku i vogël, Kuqla qafëgjelbër, Rosa kërre, Kryekuqe e madhe, Marsakja, Bajza, Çafka e madhe e bardhe, Çafka e kuqërremtë, Laraska e detit, Qyrylyku këmbëqirizë, Pulëbardha kokëzezë, Pulëbardha e argjendtë.

Sot peshkimi punëson diku te 50 peshkatar, dhe të kutjosh se në fillim viteve ’90, ishin 200. Zonat e peshkimi përfshijnë lagunën e Nartës, Limopuan, Derdhjen e vjetër të lumit Vjose, lagunën e Kallënges, lumin Vjosa dhe brezin litora.

5.Laguna e Nartës ka në vetvete problemet e saj.Citojmë disa:Janar, 2017. Pas 60 vitesh një fenomen i rrallë natyror ngjau në lagunën e Nartës, sipërfaqja ujore e lagunës ngriu nga moti i ftohtë , ndërsa banorët dhe peshkatarët nuk janë munduar shumë për të kapur peshkun. Produkti kryesor i lagunës ngjala sipas ankimit të peshkatarëve për kapjen e ngjalës dhe mbledhjen e rasatit të peshkut përdoren mjete shumë të imëta që dëmtojnë produktin, që bie në rrjetat e tyre. Por nuk është ky i vetmi shqetësim për këta peshkatarë, që bashkërisht kanë marrë nën administrim një pjesë të lagunës. Gjuetia , e paligjshme e peshkut. Fenomeni drejt zhdukjes të pelikanit dhe shpendëve të tjera që dikur kishin për disa muaj vendqëndrimin e tyre në këtë vend është frenuar me ligjin e moratoriumit.

Grupimi “Dhjetor 90” përshëndet marrëveshjen e liderit demokrat

May 20, 2017 by dgreca

Nga Dr. Bislim AHMETAJ */Në një deklaratë për mediat grupimi “Dhjetor 90” përshendet marrëveshjen e arritur nga Kryetari i Partisë Demokratike dhe i opozitës shqiptare zoti Lulzim Basha me Kryeministrin në detyrë, njëkohësisht Kryetar i Partisë Socialiste të Shqipërisë zotit Edi Rama. Deklarata e plotë Grupimi”Dhjetor 90” përshendet marrëveshjen e arritur nga Kryetari i Partisë Demokratike dhe i opozitës shqiptare zoti Lulzim Basha me Kryeministrin në detyrë, njëkohësisht Kryetar i Partisë Socialiste të Shqipërisë zotit Edi Rama. Arritja e kësaj marrëveshje shmangu një konflikt social shumë të rrezikshëm dhe krejtësisht të panevojshëm ndër shqiptarë, konflikt i afruar nga keq qeverisja dhe abuzimi eksterm me pushtetin i mazhorances së rilindjes e cila në këto katër vite e largoj vendin nga rruga europiane e integrimit më shumë se kurrë në këto 27 vite pluralizëm politik. Grupimi ynë ishte pjesë integrale e protestës 90 ditëshe të opozitës shqiptarë për kauzën e shejtë të votës së lirë. Përmes këtij njoftimi dëshiroj t’iu përcjellë mirënjohjen time të thellë gjithë anëtarësisë tonë nga Gjirokastra në Tropojë, nga Korca në Durrës për pjesëmarrjen active dhe të përditshme në Cadrën e Lirisë, prezenca e perhershme e protagonistëve të dhjetorit 90 i dha dinjitet, vlerë dhe peshë protestës historike të opozitës shqiptarë. Gjithashtu me këtë rast shpreh mirënjohjen e pa kufi për të gjithë ata qytetarë të rinjë e të reja, burra e gra që për tre muaj sfiduan frikën, presionet, shantazhet, kërcënimet dhe me qëndresën e tyre ja dolën ta thyejnë arrogancën e mazhorancës , ja dolën ta ulin atë në tryezën dialogut. Vlerësimi ynë për angazhimin e SHBA-ve në zgjidhjen e krizës që kishte mbërthyer vendin është maksimal. Ne si gjithmonë i jemi mirënjohës Amerikës për gjithcka ka bërë për Shqipërinë dhe kombin shqiptarë që nga Presidenti Wilson dhe deri tek President Tramp. Mirënjohja për zotin Yee i cili i vuri pikat mbi “i” sagës së opozitës dhe i dha fund arrogancës së mazhorancës dhe i celi rrugën finale marrëveshjes është e thellë dhe shumë e ndjerë për ne dhe për gjithë shqiptarët, ajo është mirënjohje për Amerikën, aleaten tonë strategjike. Pa dyshim edhe roli i zotit McAllister meriton respekt dhe vlerësim të posaçëm, ai me përsonalitetin e tij të padiskutueshëm në kulmin e krizës mes arrogancës së mazhorancës dhe durimit stoik të protestuesve hodhi paketën e kompromisit, paketë e cila tregonte që ai jo vetëm e njihte shumë mirë situaten e kriminalizimit të pushtetit në Shqipëri, por edhe masat me të cilën mund ta shuante mllefin në rritje të protestuesve. Në të njëjtën kohë ne s’mund ta neglizhojmë përçmimin që ndjejmë për shumë diplomatë dhe zyrtarë të lartë të BE-së dhe vendeve te tjera të vecanta, një pjesë e të cilëve fatkeqësisht nuk e duan Shqipërinë, një pjesë tjetër për fatin e tyre të keq jo se nuk e duan Shqiperine dhe integrimin e saj në Europe por janë zhytur dhe notojnë në vaskën e korrupsionit, krimit dhe drogës që ka ndërtuar klani i shumicës që drejton mazhorancën aktuale. Gjithashtu duam të shprehim vleresimin dhe respektin tonë për kryetaret e Partive të opozitës të cilët me qëndresën e tyre për të mos u shantazhuar nga “ofertat” e overdozave të mazhorancës së kanabisit ja dolën ta delegjitimojnë procesin farsë zgjedhor që po planifikonte mazhoranca e kanabisit. Dhe së fundi një vlerësim për Lulzim Bashën i cili me urtesine e tij prej celiku ja doli ta thyeje arrogancen e Edi Rames dhe mazhorances se tij . Tani atij i mbetet të materializoj atë që ka premtuar për 90 ditë në Çadrën e Lirisë. Republika e Re që ai ka lançuar këtu e tre muaj më parë do të shihet e matet që ditën e hënë , ditë kur është paralajmëruar thirrja e seancës së jashtëzakonshme të Parlamentit të Vjetër, tek emrat që ai do të afrojë për “postet” teknike që prodhojë marrëveshja e tri ditëve më parë. Hapi tjetër i sprovës së Lulzim Bashës për ndërtimin e Republikës së Re do të jenë listat e kandidatëve për deputet në Kuvendin e Republikës së Re. Ne besojmë, sepse në filozofinë tonë nuk qëndron paragjykimi. Paragjykimet ndërtojnë mure. Besimi ura.

*Kryetari: Dr. Bislim AHMETAJ(E dërgoi për Diellin Cerciz Loloci)

Kuizi i Diturisë 2017

May 19, 2017 by dgreca

*Kuizi i Diturisë 2017, në Traisenin e vogël me zemër të madhe/

* Cikli i Lartë i fillores, vendi i parë “Iliria” nga Welsi me nxënësit Anita Salihi, Emire Garipi, Blerina Gashi, Kaltrina Rexhepi i mësueses Rafete Kosumi. Cikli i Ulët “Ylberi” me nxënësit Artemisa Zenelaj, Erza Hasani, Elis Ramaj, Albina Zenelaj i mësuesit Osman Ademi./

2Trasen -

Nga Hazir MEHMETI/*Traisen, 13 maj 2017. Rrjedha e lumit malor luginës përcillte udhëtimin tonë drejtë qytezës së Traisenit, emërtim i lumit që u sjell jetë tremijë e pesëqind banorëve të luginës. Mes tyre dhe shumë shqiptarë nga të gjitha trevat shqiptare të cilët për herë të parë pritën nxënës e mësuese nga disa qendra të Austrisë. Mësuesja Antigona Elshani dhe bashkëshorti i saj Hafir Elshani me mbështetjen bashkëvendësve të Traisenit treguan një mikpritje dhe organizim i cili do mbetët i paharruar në historikun e kuizeve në Austri. Hapje e programit me vallen e luajtur me elegancë prej nxënësve nga Graci: Agnesa, Erona, Rinesa, Krenare, Sara, Albiona, dhe Blerina ngrohu që në fillim zemrat mërgimtare.
Moderatoja nga Graci, Albana Maxhuni, me shije prezantoj pikat programore në mirëseardhjen nga mësuesja nikoqire, Antigona Elshani. “Në veçanti falënderoj Këshilltaren e Traizenit zj.Edelmaier Heidmari, Z.Gerhard Fügl, Z.Andeas Gaupmann, bashkëshortin tim Hafirin, Një falënderim i veçantë për të gjithë në Traisen që e ndihmuan organizimin, gatuan ushqim nga kuzhina e pasur shqiptare dhe gjithë atë që duhet për të mbajtur një garë diturie dhe një program kulturo artistik.” Në emër të Shoqatës së Mësuesve Shqiptarë “Naim Frashëri” në Austri programin e hapi Hazir Mehmeti, kryetar. Ai falënderoj vendoret për pritjen dhe kushtet e ofruara: “Përshëndes Edelmaier Heidemarie, këshilltare dhe zyrtarët tjerë bashkiak për mbështetjen. Ardhja e juaj na nderon të gjithëve Austria na përkrahu në kohën më të vështirë dhe ne do jemi gjithmonë falënderues. Po ashtu mësimi i gjuhës amtare në kuadër të shkollimit publik në Austri e ndihmon integrimin e suksesshëm dhe ruajtjen e identitet të origjinës, andaj kjo na bënë krenar për vendin ku jetojmë”
Të pranishmit i përshëndeti zj. Zana Rugova, sekretare në Ambasadën e Republikës së Kosovës në Austri. “Në emër të Ambasadorit z. Sami Ukelli dhe të Ambasadës ju përshëndes dhe uroj suksese kuizit tuaj. Ne jemi gjithmonë pranë organizimeve të tilla ku afirmohet gjuha e fjala shqipe aq më rendësi për ruajtjen e identitetit kombëtar”
Në fjalën e saj zj.Edelmaier Heidemarie, këshilltare në Bashkinë e Traisenit mes tjerash tha: “ Ndihem e lumtur që organizohet një manifestim i tillë në bashkinë tonë. Dua ti përshëndes të gjithë nxënësit, mësuesit, prindërit dhe gjithë ju. Mirë se keni ardhur dhe suksese!” Anton Marku, kryetar i Lidhjes së Shkrimtarëve “Aleksandër Moisiu” në Austri përshëndeti dhe uroj sukses garës duke rikujtuar, se ruajtja e gjuhës është elementi i parë i ruajtjes së qenies kombëtare. Ai përgëzoi mësuesit për organizimin e bukur” Në çdo fillim kapitulli, Alban Spahiu me zërin e tij dhe lojën në çifteli zgjoi mallin dhe dashurinë për këngën e vërtetë shqiptare.
Gara e diturisë u drejtua nga mësuesi Osman Ademi, kurse juria ishte në përbërjen: Bukurije Limani, Ibrahim Hasani dhe Rafete Kosumi. Për teknikën kompjuterike u përkujdes Ilir Hasani. Nga 23 mësuese në Austri, anëtarë të shoqatës janë vetëm 14 prej tyre nga të cilët pjesëmarrjes në garë ishin vetëm gjashtë mësuese: Antigona Elshani, Bukurije Limani, Rafete Kosumi, Hazir Mehmeti, Osman Ademi, Ibrahim Hasani. Garat u mbajtën për dy ciklet. Nga Cikli i Ulët i pari u rendit ekipi “Ylberi” pastaj me radhë ekipet tjera. Ekipi “Fluturat” : Fiona Murseli, Bleona Jupa, Stela Paskali; “Shpresa” – Eltion Shaqiri, Melisa Rrahmani, Albion Dervishaj; “Ilirida“- , .Lorena Sejdiu, Sara Alili, Anesa Izairi dhe ekipi “Zgjoi” me nxënësit: Esra Osmani, Vesa Arifi dhe Din Arsani. Nga cikli i lartë “Iliria” nga Wels-i u rendit i pari dhe do ta përfaqëson Austrinë në Kuizin që organizon Ministria e Diasporës në Kosovë. Ekipet tjera ishin “Bleta” nga Traiseni me nxënësit: Edonisa Çekaj, Altina Krasniqi, Granit Limani dhe Laura Kastrati. “Dituria” nga Graci me nxënëset: Leona Maxhuni, Rilinda Bytyqi, Yllza Berisha dha Albina Berisha. Ekipi “Afrim Zhitia” nga Deutsch Wagrami me nxënësit: Dorart Alushaj, Leonis Shala, Jehona Skeraj.
Loja teatrale me skenografi nga teksti “Tri Fluturat” nga nxënësit: Edonis Cekaj, Ermira Murati, Metin Murati, Varisa Limani, Vaid Limani, Elisa Cekaj, Adonita Sahitaj, Ideal Sahitaj, Elham Dzeljili, dhanë porosi të pa harruar se puna me dashuri e përkushtim është me vlera jetëgjatë. Loja teatrale “Shoqet ” e luajtur nga nxënësit Leona Maxhuni, Fiona Sadiku dhe Rilinda Bytyqi nga Graci ishte prekës dhe porositës, se gjuha e nënës është çelësi i të qenit shqiptar, andaj kultivimi i saj brezave është porosi e shenjtë. “ Vallja e Tiranes” luajtur nga grupi i vajzave nga Vjena Artemisa Zenelaj, Erza Hasani, Erda Arifaj, Albina Zenelaj ishte e mrekullueshme, pastaj “Vallja e Pavarësisë” luajtur prej nxënëseve nga Wellsi

Kënga “Mora fjalë” e kënduar nga Anesa Izairi e përcjellë me çifteli mori porosi nga Legjendari, Adem Jashari dhe ai është vet Liria që u buzëqesh brezave shqiptare kudo. Recitimet nga .Gresa Sejdiu, .Lorena Sejdiu, Albion Dervishaj plotësuan vargun e shprehjes artistike të ditës. Ekipet u shpërblyen me dhurata nga organizatori.Kuizi “Traiseni 2017” nuk do harrohet për mikpritjen e ngrohtë dhe imazhit të mirë të njeriut tonë të sinqertë i brumosur me dashuri kombëtare.

Z. Hazir MEHMETI eshte bashkepunetor i gazetes “Dielli” ne Austri

Kosovë-Ambasadori i SHBA: E ardhmja në duart tuaja, Votoni!

May 19, 2017 by dgreca

– Ambasadori i SHBA-ve në Kosovë, Greg Delawie: Siç ne amerikanët e kemi zakon të themi se “secila votë është e rëndësishme”, mesazhi im numër një për qytetarët e Kosovës është ju lutem dilni dhe votoni! Sa më e madhe që të jetë dalja, aq më i madh do të jetë mandati i qeverisë së ardhshme për të përcaktuar rrugëtimin tuaj të rëndësishëm përpara…-Në fund, ne nuk përkrahim asnjë parti dhe asnjë kandidat. Ne vazhdojmë të punojmë për një Kosovë të pavarur, demokratike dhe me prosperitet e cila jeton në paqe me fqinjët e saj/

1 ambasadori amerikan PRISHTINË, 19 Maj 2017-Gazeta DIELLI-Behlul Jashari/ Ambasadori i SHBA-ve në Kosovë, Greg Delawie, sot pasdite, vizitoi Komisionin Qendror të Zgjedhjeve të parakohshme parlamentre të 11 qershorit 2017.

Fjala e Ambasadorit Delawie në Komisionin Qendror të Zgjedhjeve, 19 maj 2017:Kryesuese Daka dhe të nderuar anëtarë të Komisionit Qendror të Zgjedhjeve, ju faleminderit për mikpritjen tuaj këtu sot. Jam i kënaqur për mundësinë që t’i drejtohem institucionit tuaj dhe të shpreh mbështetjen tonë për rolin kyç që e luani në organizimin e zgjedhjeve. Nuk është detyrë e lehtë, por ne kemi besim, siç e keni dëshmuar në vitin 2014, se KQZ është më se e përgatitur për këtë detyrë.Siç ne amerikanët e kemi zakon të themi se “secila votë është e rëndësishme”, mesazhi im numër një për qytetarët e Kosovës është ju lutem dilni dhe votoni! Sa më e madhe që të jetë dalja, aq më i madh do të jetë mandati i qeverisë së ardhshme për të përcaktuar rrugëtimin tuaj të rëndësishëm përpara. E ardhmja e vendit tuaj është në duart tuaja, dhe 11 qershori është dita kur ju mund të thoni fjalën tuaj – kjo është veçanërisht me rëndësi për ata që votojnë për herë të parë. Prandaj Hajde! Votoni! Ne kemi kënaqësinë të shohim që KQZ po vazhdon të rris vetëdijesimin e votuesve dhe të edukojë ata për rëndësinë e votës së tyre.Pasi që zgjedhjet janë absolutisht vitale për të siguruar një të ardhme të ndritshme që të gjithë qytetarët e Kosovës e meritojnë, unë po ashtu u bëj thirrje edhe të gjithë politikanëve që të zotohen se do t’i mbajnë zgjedhjet të lira nga mashtrimet dhe nga dhuna politike.Të qenit të lira nga mashtrimi fillon me lista të pastra të kandidatëve. Çdo person i njollosur nga korrupsioni ose ndonjë krim tjetër i rëndë nuk ka vend në listat e kandidatëve sipas mendimit tim. Kosova ka shumë udhëheqës të talentuar që nuk janë të përfshirë në këto aktivitete dhe ata e meritojnë tu jepet shansi. Prandaj unë i nxis fuqishëm udhëheqësit e partive që të pastroni listat tuaja dhe të pyesni veten nëse kandidatët vërtetë e meritojnë besimin e qytetarëve. A janë ata më të mirët që mund të ofroni?Qytetarët e Kosovës dhe bashkësia ndërkombëtare po ashtu presin zgjedhje të besueshme në të cilat kandidatët, si dhe gazetarët që i mbulojnë ato, të jenë të lirë nga frikësimi. Fushatat kanë të bëjnë me atë se kush i ka idetë më të mira. Ato kanë të bëjnë me thirrjen në aspiratat më të larta të popullit të Kosovës, që të jetojnë në një vend dhe rajon paqësor dhe me prosperitet. Prandaj, ju bëj thirrje të gjitha partive dhe udhëheqësve politikë të refuzojnë dhe dënojnë të gjitha format e frikësimit.Suksesi i KQZ-së është përforcuar nga partneriteti i fuqishëm i Task Forcës për Zgjedhjet që ky institucion e ka me PZAP-në, policinë, prokurorët dhe gjyqtarët. Prandaj, dua t’i bashkohem thirrjes së Task Forcës bërë votuesve që të raportojnë çfarëdo shenje të ndonjë parregullsisë. Ne kemi parë në të kaluarën se si mashtrimi në zgjedhje mund ta dëmtojë Kosovën, por përpjekjet tuaja në vitin 2014 kanë kontribuar që të ketë një proces të drejtë që besoj se është e drejtë themelore e çdo qytetari. Kam besim se KQZ do të bëj maksimumin për të siguruar integritetin e votës.

Pasi që është shumë e rëndësishme që Kosova të vazhdojë të përmbush standardet evropiane në mbajtjen e zgjedhjeve, Ambasada e SHBA-së do tu bashkohet organizatave të tjera ndërkombëtare në shpërndarjen e ekipeve të vëzhguesve nëpër vendvotime gjithandej Kosovës. Ne do të jemi në numër të madh në terren në ditën e zgjedhjeve dhe ekipi i ambasadës sime do të plotësohet me kolegë nga ambasadat e tjera të SHBA-së në rajon. Meqë ne besojmë se edhe besimi i qytetarëve në zgjedhjet e Kosovës është shumë me rëndësi, USAID-i është duke punuar që të financojë një program me Institutin Demokratik të Kosovës, i cili, përmes koalicionit Demokracia në Veprim, do të rekrutojë, trajnojë dhe shpërndajë një grup prej 2,800 qytetarëve vëzhgues.Këta qytetarë vëzhgues do të vëzhgojnë dhe mbajnë shënime për procedurat e regjistrimit të votuesve, votimit dhe numërimit të votave në vendvotime në ditën e zgjedhjeve, përveç vëzhgimit që do ta bëjnë para dhe pas ditës së zgjedhjeve. Përmes USAID-it, ne po ashtu kemi kënaqësinë të vazhdojmë të mbështesim partnerin tonë Fondacionin Ndërkombëtar për Sistemet Zgjedhore (IFES), për t’i ofruar mbështetje teknike dhe këshilluese Qendrës së Numërimit dhe Rezultateve. Megjithatë, janë qytetarët e Kosovës ata që janë në pozitën më të mirë për të raportuar çdo parregullsi. Prandaj nëse shihni diçka, ju lutem thoni diçka!Në fund, ne nuk përkrahim asnjë parti dhe asnjë kandidat. Ne vazhdojmë të punojmë për një Kosovë të pavarur, demokratike dhe me prosperitet e cila jeton në paqe me fqinjët e saj. Ju faleminderit edhe një herë për gatishmërinë tuaj për tu takuar me ne sot. Pres me padurim të përcjell suksesin tuaj dhe zgjedhjet me të drejta dhe më të lira të mbajtura ndonjëherë në Kosovë. Ju faleminderit shumë.