Archives for June 2020

COVID-19- Bota regjistroi 6.8 milion të infektuar, nga të cilët rreth 2 milion i përkasin Amerikës

June 5, 2020 by dgreca

Shteti i New York-ut ka regjistruar 384 mijë e 975 të infektuar dhe ka humbur 30 mijë e 372 jetë…

Të premten u regjsitruan 91 viktima, ndërkohë që Michigani raportoi shifrën më të lartë të vdekjeve 24 orëshe, 260.

Ekonomia Amerikane gjatë muajit maj fitoi 2,5 milion vende pune, dhe shkalla e papunësisë ra në 13.3 për qind.

Përgatiti:Dalip Greca

6.8 milion persona në të gjithë botën janë prekur nga koronavirusi deri të premten, 5 Qershor 2020, ndërkohë që në 24 orët e fundit u regjistruan 133 mijë e 579 pacientë të infektuar.Numri i të shëruarëve është 3 milion 312 mijë e 659. Shtetet e Bashkuara të Amerikës raportuan se numri i të infektuarëve po i afrohet 2 milionshit(deri me 5 qershor u regjsitruan 1 milion 953 mijë e 177 persona), gjatë 24 orëve të fundit u raportuan 29 mijë e 126. Pas SHBA-së Brazili është vendi i dytë më i prekur me 645 mijë e 438 të infektuar(infeksioni ditor kapi shifrat 29 mijë e 518), Rusia vjen e treta me rreth 450 mijë, në vendin e katërt renditet Spanja me 288 mijë, Mbretëria e Bashkuar renditet e pesta me 283 mijë e 311, India 236 mijë e 134, Italia 234 mijë 531, Peru 187 mijë e 400, Gjermania me 185 mijë e 414 etj.

Bota ka humbur deri tani 397 mijë e 411, nga të cilët 111 mijë e 374 janë amerikanë. Parashikimi statsitikor sipas Qendrës për Kontrollin dhe Parandalimin e Sëmundjeve në SHBA, deri më 27 qershor do të regjistrohen në total 127 mijë viktima.

Sipas CNN ka një tregues pozitiv për ekonominë amerikane , e cila gjatë muajit maj fitoi 2,5 milion vende pune, dhe shkalla e papunësisë ran ë 13.3 për qind, sipas Byrosë së Statistikave të Punës.

Komunitetet e pakicave në Shtetet e Bashkuara kanë qenë më të prekura nga pandemia e koronavirusit.

Qeveria amerikane po ndihmon të financojë zhvillimin e një vaksine kundër koronavirusit, por me tensionet e protestave ka dale problem nese do te gjenden persona nga njerezit me ngjyre per te pranuar eksperimentimin e vaksines.

Ndërsa protestat kombëtare që drejtohen kundër brutalitetit të policisë dhe sistemin gjyqësor të SH.B.A. vazhdojnë në javën e dytë, zhvilluesit e vaksinave mund të kenë një kohë më të vështirë për të bindur njerëzit me ngjyra për të marrë pjesë në testimin e vaksinave.

Shteti i New York-ut duket se i ka stabilizuar shifrat edhe pse turmat kanë dalë jashtë kontrollit gjatë protestave, ku nuk respektohen masat e sigurisë.Nëse do t’i kërkonim shtetit të New York-ut një vend në renditjene shteve të Europës dhe Amerikes se Jugut, për numrin e të infektuarëve, ai do të renditje i treti, mënjëherë pas Brazilit dhe Rusisë, duke lënë pas Spanjën, Mbretërinë e Bashkuar, Indinë, Italinë, Perunë, Gjermaninë, Turqinë, Iranin, Francën, etj… Deri më 5 qershor shteti i New York-ut raportonte 384 mijë e 975 të infektuar, por numri ditor i të infektuarëve ka rënë rreth 1,076 persona, ndërsa për numrin e viktimave krahasuar me shtetet e Europës dhe të Amerikës së Jugut, New Yorku vjen pas Mbretërisë së Bashkuar me 40 mijë e 226 të vdekur, pas Brazilit me 35 mijë e 033, Italisë 33 mijë 774. Shteti i New York-ut ka humbur deri tani 30 mijë e 372 të vdekur. Ditën e sotme u raportuan 91 viktima, nga 117 që ishin ditën e enjte, 86 të mërkurën etj.

Shteti i dytë në SHBA më i prekur vijon të mbetet New Jersey me 163 mijë e 774 të infektuar, në 24 orëshin e fundit u regjistruan 627 të infektuar, ndërkohë që kanë humbur deri tani 12 mijë e 82 jetë njerëzore, gjatë ditës së Premte u raportuan 76 të vdekur,të enjten 100, të mërkurën 123.

Për jetët e humbura i trei ndër shtetet e Amerikës së Veriut renditet Massachusetts me 7 mijë e 235 të vdekur, Pannsylvania me 5 mijë e 969, Michigan me 5 mijë e 855, Illinois me 5 mijë e 795 etj.

“Jeta lojë numrash”( Pitagora)

June 5, 2020 by dgreca

NGA ALFONS GRISHAJ/DIELLI

Filozofi i parë i civilizimit perëndimor, Talesi i Miletit, theksonte se, “Uji ështëqendra e jetës. Anaksimandri, nxënësi i Talesit shkonte në një drejtim tjetër, i cili theksonte se gjithçka ngrihetnga pafundësia dhe shkon në infinit. Kurse Anaksimenesi, nxënësi i Anaksimandrit thoshte: “Ajri është i rëndësishëm po aq sa uji”, dhe besonte se shpirti është formuar nga ajri. Ndërsa Pitagora, që besonte tek rinkarnimi, thoshte: “Jeta është lojë e numrave!”

Në të vërtetë të gjitha çfarë thonë tre filozofët e parë të perëndimit që studiuan burimin e jetës, kanë pasur rëndësi të padiskutueshme në mendimin filozofik përgjatë shekujve. Ndërsa definicionet e Talesit dhe Anaksimenesit janë më të lehta për t’u kuptuar, teoria e Pitagorës, duket shumë më e ndërlikuar. Prandaj po tentoj të ndalem tek “loja” e numrave të Pitagorës, për ta futur në hullinë time kompromentuese të këtij shkrimi.

Dikur, në një muzikal shqiptar, (Karnevalet e Korcës) një personazh i thoshte të shoqes në diskutim e sipër: “Olimbi, jeta është llogari!”. Skenaristi, duke synuar ta satirizonte personazhin, pa dashur, jep efektin e kundërt. E bën atë të këndshëm. Unë nuk e besoj se ai e njihte Pitagorën sa të citonte gati me përpikmëri thënien e tij. Po, ç’ t’ i bësh, logjika e numrave!

Në botë, loja e numrave është leva e Arkimedit për të lëvizur materien rreth nesh, pro dhe kundra. Siç dihet, luftërat fitohen me lojë numrash. Votat janë llogari numrash, por diku kanë tjetër funksion e diku tjetër. Në vendet e civilizuara ato janë elementet e mekanizmit që sjell ndryshimin në shoqëri. Në vendet e pazhvilluara, ku votat blihen me para, janë thjesht elemente statistikore, numërorë barku dhe jo ndërgjegjeje. E kështu mund të vazhdojë deri në “infinit” siç, thoshte Anaksimenesi.

Këtu fillon dhe tragjikomedia e shumë popujve. Varfëria e tejskajshme dhe humbja e shpirtit janë lojë e numrave! Robëria dhe nënshtrimi janë lojënumrash. Gjymtimi i kujtesës historike, harresa dhe rikthimi prapa…, po shaka numërorësh! Prishja e shumë familjeve dhe miqësisë, lojë numrash. Prostitucioni dhe bordellot, lojë e dhimbshme numrash. Shkatërrimi i solidaritetit, lojë numrash.

Loja e numrave, të len pa bukë, pa shtëpi, të copëton familjen. Nëse ndërgjegja e lirë do t’i mundte numrat, njeriu që vuan do kish qenë në paqe hyjnore me burimet që ia ka dhuruar Perëndia, por janë pikërisht lojtarët e këqinj të numrave që ngulen në çdo udhëkryq si barrikada të hekurta nëluftë të pabarabartë me viktimën. Dhe udhëkryqi është ekuacioni i banditëve politikë që militojnë 24/7.

Karl Jungu thoshte: “Natyra, ndonëse shpesh tregohet e errët dhe jo e tejdukshme, kurrë nuk tregohet dinake siç tregohet njeriu.”

Ngado të shkosh, injorantët politikë shtohen me një etje shtazore për të gërmuar minierën e numrave, sepse injoranca politike numërore ka një bark të madh që shpesh gremis dhe veten, si në rastin aktual në Amerikë. Krahu i majtë është dashnor i numërorëve pa djersë. Dhe ky vend lind dhe importon komisarë të kuq që robotohen me peticione amorfe, Markoviç për llogari të Ramës, emërohet Dukë Hudhra i Diasporës. Tjetri, Xhokeri i Thaçit dhe Vuçiqit. Lojë numrash o baba! Të heqim Richard Grenell! Opa, atij i çimentohet pozicioni…, dhe nëse Grenelli nuk e ka pasur ndërmend lojën e numrave kundër Dardanisë, tani mundet ta luajë atë i frymëzuar nga peticionistat e “zgjuar” që, në njërën anë hiqen Trampistë, në anën tjetër sofistë.

Megjithatë, askush nuk mund ta kthejë Zamzamin në shkretëtirë, përveç Zotit që e bëri për të shuar etjen e djalit të Abrahamit.

Sartre thoshte, “disa zgjedhje (numrash*) janë bazuar mbi gabimin, dhe disa mbi të vërtetën”, dhe unë këtë të fundit mundohem t’ua shpjegoj tinzarëve shqipfolës, sepse karma ka rrezë të gjerë, në mos sot… nesër të troket në derë.

————————————-

* Shtesë e imja

AMERIKA DO VAZHDOJË MBËSHTETJEN PËR KOSOVËN

June 5, 2020 by dgreca

-Kryeministri Hoti priti ambasadorin amerikan, Philip S. Kosnett/

PRISHTINË, 5 Qershor 2020-2020-Gazeta DIELLI/ Kryeministri i Republikës së Kosovës, Avdullah Hoti priti sot në një takim njoftues ambasadorin e Shteteve të Bashkuara të Amerikës në Kosovë, Philip S. Kosnett.

Gjatë këtij takimi, kryeministri Hoti e falënderoi ambasadorin Kosnett për mbështetjen e përhershme të SHBA-ve për vendin tonë, si dhe pohoi vendosmërinë e Qeverisë së Kosovës për të punuar ngushtë me SHBA-të edhe në të ardhmen.

Po ashtu, kryeministri Hoti e njoftoi ambasadorin Kosnett për prioritetet e menjëhershme të qeverisë së re, siç janë: lufta kundër COVID-19 dhe rimëkëmbja ekonomike. Krahas këtyre, ai theksoi edhe prioritetet e tjera, si forcimi i shtetit, avancimi i demokracisë, luftimi i korrupsionit, rritja e punësimit, zhvillimi i tregut të lirë dhe marrja e përgjegjësive për dialogun.

Ambasadori Kosnett tha se Shtetet e Bashkuara do te vazhdojnë mbështetjen e saj për Kosovën, sidomos në përpjekjet për të përmirësuar marrëdhëniet rajonale, mbështetjen e zhvillimit ekonomik dhe forcimin e sundimit të ligjit – përfshirë këtu edhe luftën kundër korrupsionit.

100 VJET NGA LUFTA E VLORES- BANDA KOMBETARE DHE TRUPAT VULLNETARE TE VATRES ISHIN NE VLORE…

June 5, 2020 by dgreca

….DHE…PËR NJË TRIM NË HISTORI…PORTRET PER LUFTETARIN PATRIOT MEHMET BEQAJ…/

Ne Shqipërisë Shkruan qe nga Mars 1920 fresh 200 Trupa Vullnetare te Vatres…

– Sjellim në vëmendje: Në Luftën e Vlorës morën pjesë edhe Trupat Vullnetare të Vatërs dhe Banda Muzikore ”VATRA”…Muzikën e Hymnit të Luftës së Vlorës e ka kompozuar dirigjenti i Bandës së Vatrës, Profesor Thoma Nasi…

Nga IDAJET JAHAJ, Vlorë/

Një dialog: – Na folë pak për luftën,- e pyetën Mehmetin./

– Për cilën luftë?- iu përgjigj ai, me buzëqeshjen karakteristike./

A nuk ka diçka homerike në këtë deponim ?/

Mjafton kaq për të kuptuar epicitetin e atij trimi. Dhe të gjithë trimave të tjerë të epopeve të lirisë. Ishte Mehmet Beqaj nga Vranishti. Ai kishte jetuar në fundin e shekullit të 19-të dhe gjatë gjithë shekullit XX (1885 – 1973). Rrojti 88 vjeç.

Është kollaj në përshkrimet letrare të thuash për një figurë “rrojti”. Por është vështirë ta përshkruash jëtën e kësaj luftëtarit të lirisë , të një luftëtari të stuhishëm për atdhe, për më se tre çerek shekulli. I tillë ishte Mehemt Beqaj nga Vranishti. Sigiruisht, në jetën e tij të gjatë ai shkëlqeu me pjesëmarrjen në sa e sa luftime të kohëve për çështjen e lirisë, që në rininë e tij. Nga viti 1900 deri nga vitet 40-të të shek. XX. Pra, afër gjysmëshekulli sakrifica e përkushtime. E jo vetëm me pushkë, por edhe me fjalë, me kushtrime, me filozofinë e atdhetarit.

Shkëlqeu përkrah trimave e kapedanëve të tjerë të Vranishtit e të Lumit të Vlorës, krah Sali Vranishtit, Azem Sulos, Pasho Ramadanit e të tjerëve. Dhe Vranishti, si kudo në Labëri, ka nxjerrë shumë kapedanë të tillë të lirisë së Mëmëdheut.

Mund të shkruash shumë e shumë për këtë trim, por vetëm disa kulme të veprimtarisë së tij japin imazhin e këtij veterani patriot.

Nga kronika e veprimtarive në beteja

Lindi në vitin 1880. Eposi dritëzues i Rilindësve i kishte shtrirë rrezet edhe në Labëri, edhe në Vranisht. Në këtë fshat, më 1878, kishte bujtur Abdyl Frashëri e kishte qëndruar disa ditë mes këtij populli atdhedashës. Drita e këtij burri i kishte përçuar rrezet e tij edhe tek brezat e mëpasmë, nëpërmjet kujtimeve të veteranëve. Kështu edhe Mehmeti, kishte dëgjuar për ‘të dhe në zemër i ishte skalitur harta e Mëmëdheut, për të cilin Abdyli i madh kishte shkrirë jetën.

Kishte dëgjuar se turqit kishin torturuar disa nga burrat e fshatit të tij. Zemra e djaloshit hovte për veprime atdhetare, për të shkrepur armë mbi pushtuesit.

Që më 1900 Mehmeti u lidh me lëvizjen e “komitave” të maleve, praktikisht me firarët që ngjiteshin majave të Çikës për të sulmuar armikun e për të mos u kapur prej tyre. Më pas mori pjesë në radhët e çetës së Sali Vranishtit, çetë që u bë e famshme kundër zaptijeve turke. Luftimet e kësaj çete u bënë epope lirie. Mehmeti ndoqi Saliun në ndeshjen me xhandarët turq në Buzujk. Po ashtu në përballjen me filogrekun Thimio Loli në Delvinë.

Në vitin 1908 ai pa dhe njohu nga afër Ismail Qemalin, i cili erdhi në Vranisht, te Pasho Ramadani e Veli Duka, ku qëndroi një javë. Pa dritën e burrit të flamurit, që do ta shpëtonte Shqipërinë nga kthetrat e të huajve. Dëgjoi edhe fjalët e tij për çetat, lirinë, Shqipërinë, unitetin, shkollat, abetaret…

Pas shpalljes së pavarësisë Mehmetit e shokëve do t’i dilnin detyra të tjera. Duhesh ruajtur shteti i ri, shteti i shqipeve. Mehmeti nuk i ndahej çetës së Saliut. Serbët ishin afruar në veri e Mehmeti me të tjerët shkuan kundër tyre deri në Dibër e i përzunë prej andej. Pastaj ata u kthyen kundër invadorëve të Jugut, grekërve, të cilët mësynë Brgedetin tonë. Pas shumë pritash e sulmesh i zhdukën edhe palikarët e Megali-idhesë greke nga vendi ynë. Bandat e Spiro Milos panë lemeri nga pushka e zotërve të këtij vendi.

Gjatë viteve 1913 e 14 Mehmeti luftoi bashkë me shokët në Shashicë, Bestrovë, Cakran, Ardenicë, etj. kundër bandave filoturke si ato të Haxhi Qamilit e të tjerëve. Në një nga këto luftime u plagos rëndë vëllai i tij, Merke Beqaj. Atë çuan për kurim në Francë, por nuk mundi të shpëtojë. Atje e varrosën. Mehmeti, më pas, shkoi sërish në Qafën e Macukullit kundër serbëve.

Epopeja e 1920-ës e gjeti në këmbë luftëtarin tashmë të hekurt e veteran. Vranishti dërgoi në atë luftë mbi 200 luftëtarë, me Sali Vranishtin në krye. Midis tyre u dallua edhe Mehmet Beqaj. Luftoi në Drashovicë, në Vreshtat e Mëdha, në lagjet e Vlorës, deri sa e shporrën edhe pushtuesin italian. Trimat lebër shkruan epope të artë dhe shembulli i tyre bëri jehonë në botë.

Pas asaj lufte, më 1924, Mehmeti shkoi deri Shkallën e Tujanit, në radhët e forcave popullore, duke përzënë forcat e diktatorit të kohës, që e shiste vendin te serbët. Qeverinë Demokratike të Nolit e shihte si shpresë të ngrohtë për jetën e këtij vendi të shumëvuajtur…

Kronikë e pasur, e ndritshme.

Dhe cilësitë e Trimit. Ciceron i kujtimeve…

Për të cilësuar luftëtarë të tillë, dikush përdori një togjfalësh po aq të rrallë: “Ata hidheshin si luanët në zjarr” ! Shumë e saktë dhe emocionante. Ashtu tregonin shokët e tij edhe për trimin Mehmet Beqaj. Por ai ishte edhe i tjeshtë, i përzemërt me shokët e fshatarët, me bashkëatdhetarët. Ishte i pajisur me rreptësi luftëtari, por edhe me filozofinë popullore të kallzimit. Ai fliste , si shumë veteranë të tjerë lebër, si ciceron për luftimet, shokët. Për llogoret e armikut, hedhjen në sulme nga tanët, durimin në luftime, marshimet. Tërë jetën nuk iu nda gishti nga këmbëza. Ashtu siç thoshte një varg i famshëëm për Sali Vranishtin : “ Kapedan Sali Vranishti / Sa rrove punoi gishti/” .

…Në vitet 40-të ai u lidh me lëvizjen e luftën Çlirimtare. “Edhe kësaj lufte i kemi borxh mundimin, sakrificën e jetën,- profetizonte në bisedat. -Sikurse edhe në luftrat e para”.

Por kësaj here ishte rreth të 60-tave. Nuk mund t’i qepej dot malit. U jepte kurajo të rinjve. “ Si më 20-tën, bij, – u thoshte.- që hidheshim si luanët mbi tela ”. Jetoi edhe rreth 30 vjet pas çlirimit. Si ciceron, megjithëse fjalëpakë, kallzonte historira. Por mbeti proverbiale ajo pyetja e tij : “ Për ç’ luftë më pyesni ?” Debolesë të madhe kishte kapedan Saliun. “Keni dëgjuar për Çerçiz Topullin , o djem? Ja, edhe ne si ai e kishim kapedanin tonë.” Dhe ishte hijerëndë e fjalë-ergjëndë.

Dhe të tjerët për Mehmetin : “ Nuk e vari njëherë pushën në oxhak. Po pranë vetes, edhe në gjumë. Kishte frymëmarrjen e Atdheut. Si gjithë luftatarët e tjerë, stuhi në beteja.

…Dhe penat e mëdha për trimin…

Ditë të tëra kishte biseduar i ndrituri Petro Marko me Mehmetin e veteranët e tjerë të Vranishtit, atje në fshatin malor., kur bëri romanin “Halimi”. Ai bujti në shtëpinë e Mehmetit,( pra, te i i biri i tij, Mitati).Në faqet e fundit të romanit Petroja shkruan : “ Në një shesh , përpara shkollës së madhe të fshatit, vinin një e dy pleq me qylaf të bardhë, me tirq dhe me shkop në dorë.Nja katërmbëdhjetë pleq, me fytyra të thata, me sy të gjallë, me mustaqe të bardha, si festet që mbanin mbi kokë.

-Duam të dijmë,-tha njëri nga poetët e rinj,- në se keni marrë pjesë në luftë?

Ata u panë në sy dhe u vrenjtën.

– Në cilën luftë, more bir? – pyeti njëri prej tyre që quhej Mehmet.

– Po ,- miratuan të tjerët. –Në cilën luftë? Se janë shumë luftrat që kemi bërë.

– Në 20-tën ,- tha poeti i ri.

…-Të gjithë kemi lindur me pushkë në dorë,- foli Mehmeti. Dhe pas një hopi : – Dhe me pushkë në dorë do vdesim !

…E ciceronët veteranë të atdheut u ndezën në kujtime…

Ndërsa brilanti i vargjeve, Xhevair Spahiu, në një kronikë për Vranishtin e trimat e tij, shkroi: “ Bisedonim ulur në bar. Me nja dhjetë pleq. Kujtimet e 1920-tës buronin… Gjithkush nga ata kishte një shenjë nga ajo luftë: ndonjë gisht të prerë, ndonjë shenjë cefle predhe në këmbë…Për Mehmet Beqaj thoshnin se e mbante zjarrin ndezur deri vonë. Kishte trup mesatar, fytyrë të ngrohtë, qeleshe të bardhë. Kur fliste, sytë i lëshonin xixa. Sytë herë i mbërthente në cep të qerpikëve, herë i lëvizte si zhivë…Dhe më mbeti në kokë ajo pyetja e tij e thellë : “ Për cilën luftë t’ ju flasim ? Se kemi mbi pesëmbëdhjetë vjet në luftra…”

Si në eposet homerike…

Sjellim në vëmendje: Në Luftën e Vlorës morën pjesë edhe Trupat Vullnetare të Vatërs dhe Banda Muzikore ”VATRA”…Muzikën e Hymnit të Luftës së Vlorës e ka kompozuar dirigjenti i Bandës së Vatrës, Profesor Thoma Nasi… Ai publikoi kujtimet e veta ne gazeten Dielli pasi u kthye ne SHBA….

( Literaturë :

Gazeta “Hora e Vranishtit”, dhjetor 1970; romani “Ultimatum” i P. Marko; gazeta “ Hora”, nr.9, 2005; gazeta “ Hora “ v.2010, nr. 8; kujtime veteranësh të Vranishtit…).

Dr. Vjosa Osmani u takua me ambasadorin amerikan Philip Kosnett

June 5, 2020 by dgreca

–Kryetarja e Kuvendit të Kosovës, dr. Vjosa Osmani në takim virtual me Këshillin e Evropës dhe Komisionin e Venecias/

Kryetarja e Kuvendit të Kosovës, dr.Vjosa Osmani, në një takim me ambasadorin amerikan Philip Kosnett, ka biseduar për agjendën e Kuvendit të Republikës së Kosovës dhe çështjet që pritet të trajtohen në seancat e radhës.

Zonja Osmani e njoftoi ambasadorin amerikan Kosnett lidhur me urgjencën e miratimit të një numri të konsiderueshëm të marrëveshjeve ndërkombëtare, me të cilat synohet përmirësimi i jetës së qytetarëve të Kosovës.

Në këtë kontekst, kryetarja e Kuvendit e informoi ambasadorin amerikan edhe për themelimin e Komisionit parlamentar, i cili do ta trajtojë menaxhimin e pandemisë Covid-19 nga institucionet përkatëse.

***

Kryetarja e Kuvendit të Kosovës, dr. Vjosa Osmani në takim virtual me Këshillin e Evropës dhe Komisionin e Venecias

Kryetarja e Kuvendit të Kosovës, dr.Vjosa Osmani ka mbajtur një takim njoftues online me Frank Power, shef i Zyrës së Këshillit të Evropës në Kosovë dhe anëtarë të Komisionit të Venecias.

Në takim është diskutuar nevoja e vazhdimit të bashkëpunimit ndërmjet Kosovës dhe KE-së. Kryetarja Osmani ka thënë se Kosova është anëtare e Komisionit të Venecias, i cili gëzon respekt në vendin tonë.

Më tej, ajo ka potencuar rolin e Komisionit të Venecias në ofrimin e opinioneve në lidhje me çështjet ligjore që trajtohen në institucionet e vendit.

U diskutua edhe për çështjet ligjore, të cilat janë dërguar nga pala kosovare dhe të cilat aktualisht po trajtohen nga Komisioni i Venecias.

Në takim kanë marrë pjesë edhe anëtarë të Komisionit të Venecias: Antonio Henriques Gaspar (anëtar), Martin Kuier (anëtar zëvendësues), Cesare Pinelli (zv.anëtar), Silvia Grundmann (shefe e Institutit Demokratik dhe e Divizionit për të drejta të njeriut).