Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for August 2020

KOSOVA, BUST SENATORIT AMERIKAN BOB DOLE NË 30 VJETORIN E VIZITËS HISTORIKE…

by

-Në 30 vjetorin e vizitës në Kosovë të delegacionit të Senatit të Shteteve të Bashkuara të Amerikës, nesër – në 30 Gusht 2020, në Prishtinë përurohet busti i Senatorit Bob Dole/

-Para 30 vitesh, në fund të muajit Gusht 1990, në Kosovë erdhi një delegacion i Senatorëve dhe Kongresistëve Amerikanë në krye me Senatorin Bob Dole. Presidenti  historik i Kosovës Ibrahim Rugova, atëherë kryetar i Lidhjes Demokratike të Kosovës, në takim i kërkoi që ta mbështesin Pavarësinë e Kosovës si të vetmen zgjidhje për paqe në Ballkan/

-Presidenti historik i Kosovës, Dr. Ibrahim Rugova me Senatorin Amerikan Robert Dole – të Dërguarin e Posaçëm për Kosovën të Presidentit të SHBA Bill Clinton, takim në Shkup, derisa konferenca ndërkombëtare për Kosovën – Konferenca e Rambujesë, e nisur në 6 Shkurt 1999,  u ndërpre në 23 Shkurt pa rezultate përfundimtare, ndërsa vazhdimi i saj u thirr për datën 15 Mars në Paris.Vetëm pas më pak se tre javësh, në 24 Mars 1999 filloi fushata ajrore e NATO-s kundër caqeve ushtarake serbe në Kosovë…/

-Në 7 Nëntor 2002: Presidenti Rugova emëroi Senatorin Amerikan Bob Dole Ambasador Nderi i Kosovës në Shtetet e Bashkuara të Amerikës/

-Në 24 Shkurt 2020 fotografia e shtatores i është  dorëzuar Senatorit Amerikan Bob Dole/

SPECIALE-Gazeta DIELLI nga korrespondenti në Kosovë Behlul JASHARI 

PRISHTINË, 29 Gusht  2020/ Me rastin e 30 vjetorit të vizitës në Kosovë të delegacionit të Senatit të Shteteve të Bashkuara të Amerikës të udhëhequr nga Senatori Bob Dole, nesër – në 30 Gusht 2020, në Prishtinë përurohet busti i Senatorit Dole.

Zbulimi i bustit të Senatorit Bob Dole nga Oda Ekonomike Amerikane në Kosovë, Qeveria e Republikës së Kosovës dhe Ambasada e Shteteve të Bashkuara të Amerikës në Kosovë  bëhet në në një ceremoni në orën 13:30 te  Udhëkryqi i rrugëve Bob Dole dhe Bill Clinton në lgjane Dardania në Prishtinë. 

Në ceremoni do flasin Kryeministri i Kosovës Avdullah Hoti, Ambasadori i SHBA në Kosovë Philip Kosnett dhe Drejtori Ekzekutiv i Odës Ekonomike Amerikane në Kosovë Arian Zeka.

Gjatë veprimtarive të ditës së nesërme të 30 vjetorit të vizitës në Kosovë të delegacionit të Senatit të Shteteve të Bashkuara të Amerikës, Ministrja e Punëve të Jashtme dhe Diasporës  Meliza Haradinaj-Stublla në ora 11:00 do të bëjë zbulimin e pllakës përkujtimore për nder të këtij përvjetori në Sheshin Nënë Tereza.

Poashtu në Shesh, në ora 11:10, Ministria e Kulturës, Rinisë dhe Sportit do të hapë ekspozitën e fotografit Hazir Reka, me fotografi unike nga vizita e delegacionit të Senatit amerikan në 29 Gusht të vitit 1990. 

Para 30 vitesh, në fund të muajit Gusht 1990, në Kosovë erdhi një delegacion i Senatorëve dhe Kongresistëve Amerikanë në krye me Senatorin Bob Dole. Në rrethana të okupimit të Kosovës nga Serbia,  policia serbe me masa represive e me gaz lotsjellës nuk lejoi tubimin e shqiptarëve për të përshëndetur delagacionin nga Amerika, madje mezi lejoi ardhjen e delegacionit nga Aeroporti deri në hotelin Grand. 

Presidenti  historik i Kosovës Ibrahim Rugova, atëherë kryetar i Lidhjes Demokratike të Kosovës, në takim i kërkoi delegacionit Amerikan me në krye Senatorin Dole që ta mbështesin Pavarësinë e Kosovës si të vetmen zgjidhje për paqe në Ballkan. Ndërsa,  nga fundi i Shtatorit 1990 Rugova vizitoi Shtetet e Bashkuara të Amerikës…

KOSOVA PARA 21 VITEVE: CLINTON-RUGOVA-DOLE, PARALAJMËRIM LIRIE… 

E para 21 viteve, në 5 Mars 1999, një takim i Presidentit historik të Kosovës Ibrahim Rugova me Senatorin Amerikan Bob Dole – të Dërguarin e Posaçëm për Kosovën të Presidentit të SHBA Bill Clinton, ishte edhe një paralajmërim lirie. Takimi shumë i rëndësishëm u mbajt në Shkup, pasi regjimi kriminal okupator serb e kishte pamundësuar në Prishtinë.

Ishte koha kur konferenca ndërkombëtare për Kosovën – Konferenca e Rambujesë, e nisur në 6 Shkurt 1999,  u ndërpre në 23 Shkurt pa rezultate përfundimtare, ndërsa vazhdimi i saj u thirr për datën 15 Mars në Paris.

Presidenti historik, Dr. Ibrahim Rugova,  në Prishtinë i kthyer nga Rambujeja e para nisjes përsëri për atje drejt Parasit në një konferencë shtypi në 5 Mars paralajmëronte nënshkrimin  para 15 Marsit 1999 të Marrëveshjes së Rambujesë, për të cilën një ditë më vonë dha miratimin edhe Kuvendi Republikës së Kosovës së Deklaratës së 2 Korrikut e Kushtetutës së 7 Shtatorit 1990, si dhe Referendumit të 26 deri  30 Shtatorit 1991 me votim 99,87 për qind për Kosovën Shtet Sovran dhe i Pavarur. Në konferencën për shtyp ku ishte edhe korrespondenti tash i Gazetës DIELLI, Presidenti Rugova paralajmëronte edhe vendosjen e NATO-s në Kosovë…

Dhe, vetëm pas më pak se tre javësh, në 24 Mars 1999 filloi fushata ajrore e NATO-s kundër caqeve ushtarake serbe në Kosovë, Serbi dhe Mal të Zi, pas së cilës nga mëngjesi i  Ditës së Lirisë – 12 Qershorit 1999 forcat paqeruajtëse e shpëtimtare të NATO-s nisën të hynin në Kosovë,  në vendin që në 2020-tën festoi 21 vjetorin e lirisë e 12 vjetorin e pavarësisë së shpallur në 17 Shkurtin historik 2008.

Ashtu si paralajmëronte Presidenti Rugova, në mes të marsit përfaqësuesit e Kosovës nënshkruan Marrëveshjen e Rambujesë/Parisit për Kosovën, ndërsa Beogradi – pala serbe refuzoi ta nënshkruajë. Ishte hapur rruga për ndërhyrjen ushtarake për Kosovën të NATO-s, forcës më të madhe planetare, prirë nga Shtetet e Bashkuara të Amerikës.

 Në 29 Maj 1998, Presidenti Rugova në Uashington ishte takuar me Presidentin Amerikan Bill Clinton. “Ne ritheksuam se zgjidhja më e mirë për Kosovën do të ishte shteti i pavarur”, deklaronte Presidenti Rugova pas takimit. Ndërsa, Presidenti Clinton tha se Kosova është një nga shqetësimet amerikane dhe se SHBA-të do të intensifikojnë angazhimin për zgjidhjen e çështjes së Kosovës në kuadër të Grupit të Kontaktit dhe të NATO-s…

Në mbrëmjen e 24 Marsit 1999, kur ndodhi ndërhyrja shpëtimtare e NATO-s me bombardimin e caqeve të forcave kriminale serbe, në terrin e natës dhe të okupimit të egër, drita e shpërthimeve të goditjeve nga qielli të aviacionit të forcës më të madhe planetare shihej si një shpresë e besim për të ardhmen e ëndërrave për lirinë e paqen derisa në Kosovë kishte marrë përmasa gjenocidi terrori i spastrimit etnik kundër shqiptarëve.

“Tani, bindja jonë e fortë për gjithçka që po ndodhë në Kosovë është e vetmja shpresë e popullit të Kosovës”, theksonte në atë ditë e orë historike Presidenti i SHBA-ve, Bill Clinton,  derisa nga Shtëpia e Bardhë  i drejtohej kombit amerikan, duke folur për zhvillimet tragjike në Kosovë dhe ndërhyrjen shpëtimtare të  NATO-s…

 Njëmbëdhjet vite pas takimit në Uashington, në 1 Nëntor 2009 në Kosovën e lirë Presidenti Amerikan Bill Clinton, në fjalën e tij në Kuvendin e Republikës kosovare, por edhe në sheshin me emrin e shtatoren e tij në Prishtinë, ka përkujtuar Presidentin historik Ibrahim Rugova dhe një gurë kristali të cilin ai ia kishte dhuruar. 

“Ai gurë kristal të cilin ma dha Rugova i është dhuruar një universiteti, por për një kohë ai ishte i njohur edhe në SHBA me emrin ‘Guri i Rugovës’”, tha Presidenti amerikan Clinton. 

“Atëherë, ai (Rugova), më tha se duhet të na ndihmosh”,  ka përkujtuar ish-Presidenti i SHBA-ve, Clinton gjatë vizitës në Kosovë.

Presidenti amerikan Clinton me rastin e shuarjes në 21 Janar 2006 të Presidentit kosovar Rugova shprehej: “Kam pasur nderin ta mbështes luftën e tij për paqe dhe liri”…

7 NËNTOR, 2002: PRESIDENTI RUGOVA EMËRON SENATORIN AMERIKAN BOB DOLE AMBASADOR NDERI I KOSOVËS NË SHTETET E BASHKUARA TË AMERIKËS

Në 7 Nëntor 2002 Presidenti Ibrahim Rugova ka emëruar Senatorin shumëvjeçar Amerikan, Bob Dole Përfaqësues të Lartë të Kosovës me titull Ambasador Nderi i Kosovës në Shtetet e Bashkuara.

Edhe më atë rast, Presidenti historik Rugova ka thënë se Bob Dole është mik i madh i Kosovës dhe më shumë se një dekadë e ka përkrahur çështjen e Kosovës për liri, pavarësi e demokraci.

Në njoftimin e Presidencës theksohej se,  tani Zyra e Senatorit Dole do t’i përfaqësojë interesat e Kosvës në Uashington, pranë Administratës, Kongresit, Senatit dhe komunitetit të biznesit amerikan.

Presidenti Rugova ka theksuar se ky ishte një moment i rëndësishëm për te dhe për popullin e Kosovës.  

24 SHKURT 2020: FOTOGRAFIA E SHTATORES I ËSHTË  DORËZUAR SENATORIT AMERIKAN BOB DOLE

Në 24 Shkurt 2020 Ambasadori i SHBA-së në Kosovë, Philip Kosnett, i ka dorëzuar Senatorit Amerikan Bob Dole një fotografi të shtatores që do të vendoset në Prishtinë.

 “Ishte kënaqësi që t’ia dorëzoja personalisht një foto të shtatores së Senatorit Bob Dole e krijuar nga Luan Mulliqi, e cila do të zbulohet së shpejti në Prishtinë. Njeri i mrekullueshëm”, ka shkruar Ambasadori Kosnett me atë rast.

Vendimi për ndërtimin e një shtatore për një prej miqve më të mëdhenj të Kosovës ishte marrë më 22 Korrik  2019 me rastin e ditëlindjes së Senatorit Dole.

Media ka raportuar se Senatori Dole ishte ndjerë jashtëzakonisht i lumtur për lajmin që e kishte marrë rreth ndërtimit të shtatores në Prishtinë.

22 KORRIK 2019: PËR SENATORIN AMERIKAN BOB DOLE SHËNIMI I DITËLINDJES DHE INICIMI I NDËRTIMIT TË BUSTIT NË PRISHTINË 

Në 22 Korrik 2019 atëherë Kryeministri në detyrë i Republikës së Kosovës, Ramush Haradinaj, në shënimin e ditëlindjes dhe inicimit të ndërtimit të bustit për Senatorin Amerikan Bob Dole në Prishtinë ka përkujtuar vizitën historike të Gushtit 1990.

“Përderisa Senatori Dole ishte në hotelin ‘Grand’ duke bashkëbiseduar me udhëheqësin e atëhershëm të shqiptarëve, presidentin tonë historik, Ibrahim Rugova, policia, regjimi i Millosheviçit kishte filluar keqtrajtimin e qytetarëve jashtë. Kjo vizitë ishte kthesë, kjo vizitë ishte një nismë për së mbari e Kosovës dhe kështu u vazhdua nga të gjithë ata që na nderuan me vizita më pastaj në Kosovë dhe kështu u vazhdua me përkrahjen e vitit ’99, me ndërprerjen e tragjedisë dhe kthimin e jetës në Kosovë dhe mendoj se sot i gjithë populli i Kosovës e nderon veten dhe këtë miqësi”, tha kryeministri në detyrë Haradinaj, duke shtuar se janë të gëzuar që populli i Kosovës i drejtohet me një nderim dhe në shenjë falënderimi për kontributin e tij jetësor për Kosovën, Senatorit Bob Dole.

“Falënderojmë presidentin Trump për kujdesin për Kosovën dhe njëkohësisht urojmë që miqësia jonë Kosovë-Amerikë të jetë e përjetshme. Zoti e Bekoftë Kosovën! Zoti e bekoftë Amerikën!”, tha Haradinaj.  

Ambasadori i Shteteve të Bashkuara të Amerikës  në Kosovë, Philip Kosnett, falënderoi për mundësinë e këtij çasti frymëzuese, duke thënë se bashkë me bashkëshorten e tij janë të nderuar që janë dëshmitarë të vënies së gurthemelit dhe po ashtu edhe Senatori Bob Dole është prekur nga ky nderim.

“Gjatë tërë jetës së tij në shërbim, fillimisht si hero i ushtrisë amerikane gjatë Luftës së Dytë Botërore, pastaj në Kongresin e Shteteve të Bashkuara të Amerikës, si kandidat për President të SHBA-ve dhe tani si njëri ndër burrështetasit më të respektuar, Bob Dole i ka prirë gjithmonë shtytjes përpara të kauzës së lirisë në tërë botën. Andaj, nuk ishte fare befasi që ai u bë mbështetës i pazëvendësueshëm i Kosovës, duke qëndruar përkrahë popullit të këtij vendi në përpjekjet tuaja për ta ndërtuar një shtet të fortë dhe të lirë”, tha Ambasadori Amerikan Kosnett. 

Drejtori ekzekutiv i Odës Ekonomike Amerikane, Arian Zeka, tha se nuk ka mënyrë më të mirë sesa kjo e sotmja që t’i urojmë senatorit Bob Dole ditëlindjen e tij, e në të njëjtën kohë nuk ka ditë më të mirë se kjo e sotmja që bashkërisht të konfirmojmë përjetësimin e kujtesës për gjithë rolin dhe kontributin që Senatori Bob Dole ka pasur në Kosovë.

KOSOVA NDERON ME NJË PLLAKË DHE STATUJË SENATORIN AMERIKAN ROBERT DOLE

by

Nga Frank Shkreli-

Të djelën me 30 gusht, 2020, Republika e Kosovës do të zbulojë një pllakë dhe do të vendosë një statujë në qendër të Prishtinës në kujtim të vizitës së ish-Senatorit Robert Dole dhe 6 kolegëve të tij senatorë amerikanë.  Ishte Senatori Dole, ai që paralajmëroi i pari Washingtonin dhe botën– i pari,pasi u këthye nga ajo vizitë në Kosovë, për fundin e ish-Jugosllavisë si shtet federativ.

Pas “shtypjeve shokuese” që kishte parë në Kosovë ndaj shqiptarëve të asaj krahine nga ana e forcave policore serbe, ish-Senatori Dole ia nisi punës për të sensibilizuar Kongresin por edhe popullin amerikan për krimet dhe shkeljet e rënda të të drejtave të njeriut që po ndodhnin në Kosovë kundër shqiptarëve autoktonë, nga forcat kriminale të Millosheviqit.  Kjo ishte, pikërisht, edhe periudha që njëherazi vuri në lëvizje edhe lobimin në Kongres dhe pranë qeverisë federale të komunitetit shqiptaro-amerikan, i  cili megjithëse i vogël në numër, arrijti të siguronte një mbështetje të pa parë deri atëherë — në qarqet e politikës amerikane – në favor të të drejtave dhe kauzave të shqiptarëve në trojet e tyre autoktone në ish-Jugosllavi dhe në rajonin e Ballkanit Perendimor, në përgjithësi.

Vendimi për ngritjen e statujës dhe të pllakës përkujtimore, për të shënuar këtë ngjarje tepër të rëndësishme, jo vetëm në historinë e Kosovës modern si shtet i pavarur, por edhe të shqiptarëve në përgjithësi, ishte marrë në fillim të këtij viti, siç mund të lexoni kronikën (historikun) e botuar me atë rast, me 28 shkurt, 2020:

KOSOVA NDERON SË SHPEJTI ME STATUJË ISH-SENATORIN AMERIKAN ROBERT DOLE –Nga Frank Shkreli

Disa ditë më parë, Ambasadori i Shteteve të Bashkuara në Republikën e Kosovës, Z. Filip Kosnett vizitoi ish-Senatorin amerikan, Z. Robert Dole në zyrën e tij në Washington.  Kryediplomati amerikan në Prishtinë njoftoi, në portalin e tij të internetit, qëllimin e takimit të tij me Z. Dole.  Ai ka shkruar se “Ishte kënaqësi për mua që t’i dorëzoja personalisht Senatorit Dole, fotografinë e statujës së tij që do të zbulohet së shpejti në Prishtinë, (punuar nga skulptori Luan Mulliqi) – për një burrë të shquar e plot merita”, është shprehur ambasadori Kosnett.  Senatori Dole, nga ana e tij, shfaqi kënaqësinë për vendosjen dhe zbulimin e shpejt të statujës së tij në Prishtinë ndërsa falënderoi përfaqsuesin e lartë diplomatik amerikan në Kosovë për vizitën, duke shënuar gjithashtu në portalin e tij se Ambasadori Kosnett, “Po bën një punë të mrekullueshme, si përfaqësues i Shteteve të Bashkuara në Kosovë.”  Ambasadori i Shteteve të Bashkuara në Prishtinë, Philip Kosnett duke i dorëzuar ish-Senatorit Robert Dole fotografinë e statujës së tij që, sipas ambasadorit amerikan, së shpejti do të zbulohet në Prishtinë.

Senatori Robert Dole me tre presidentët amerikanë –Xhorxh Bush i vjetër, Bill Klinton dhe Xhorxh Bush i ri –protagonistët kryesorë të lirisë, çlirimit dhe të pavarësisë së Kosovës nga zgjedhja e rëndë serbe –njëri përcaktoi “vijën e kuqe”për Serbinë, tjetri mobilzoi NATO-n për çlirimin e Kosovës dhe i fundit shpalli pavarësinë e Kosovës nga Tirana.  Në krah të tyre ishte gjithmonë Senatori Dole, si njëri prej mbrojtëve më të shquar të të drejtave të shqiptarëve të Kosovës. 

Autoritetet e Republikës së Kosovës kishin marrë vendimin për të vendosur statujën e ish-Senatorit republikan Bob Dole në Prishtinë, në vitin 2018, me rastin e 95-vjetorit të lindjes të ligjvënsit amerikan, i njohur si njëri ndër politikanët më të dalluar amerikanë të fund shekullit të kaluar, për përpjekjet e tija në mbështetje të çlirimit dhe të pavarësisë së Kosovës.

Statuja e Senatorit Dole do të vendoset në një kënd të Rrugës Bob Dole dhe Bulevardit Bill Clinton, që siç tha edhe ambasadori amerikan Kosnett, në inagurimin e vendit ku do vendoset statuja e Dolit, rrugë këto që janë emëruar pas dy kundërshtarëve politikë amerikanë nga dy parti të ndryshme politike, njëri republikan e tjetri demokrat.  Megjithë ndryshimet në qëndrimet e tyre në rrafshin e zhvillimeve politike në Amerikë, ata ishin miq të ngushtë me njëri tjetrin.  Ata ndanin dashurinë për Atdheun e tyre dhe ishin dedikuar shërbimit ndaj të tjerëve, ndërkohë që përpiqeshin të bashkëpunonin kurdoherë që ishte e mundur.  Ambasadori Kosnett është shprehur   duke shtuar se “Do bënim mirë të gjithë, nëqoftse do të përqafonim filozofinë e Senatorit Bob Dole — se në politikë kemi kundërshtarë, por jo armiqë”.

Senatori Robert Dole, një ish-veteran i Luftës së Dytë Botërore, Kongresmen dhe Senator nga shteti Kansas, udhëheqës i republikanëve në Senat dhe kandidat i Partisë Republikane për President, e kishte bërë çështjen e Kosovës kauzë të tijën, që në fillim të 90-atave të shekullit të kaluar.  Në një letër dërguar Dr. Ibrahim Rugovës, Senatori Dole, udhëheqës në atë kohë i republikanëve në Senat dhe kryetari i Komisionit të Senatit për punë të Jashtme, Senatorit demokrat, Claiborne Pell – dy ligjëvensit e lartë amerikanë — i shkruajnë presidentit të ardhshëm historik të Kosovës se, “Siç e dini ne jemi shumë të shqetësuar rreth gjendjes në Kosovë.  Për vite tani, popullësia shqiptare në Kosovë është subjekt shtypjesh dhe mohimesh të të drejtave të njeriut nga një regjim i egër komunist i Republikës së Serbisë…”  Senatorët amerikanë shprehen se situata në Kosovë është e rrezikshme dhe e pa parashikueshme.  Ata ftojnë Dr. Ibrahim Rugovën që të vizitonte Washingtonin, sa më parë që të jetë e mundur, që sipas tyre, “Për t’u takuar me ta dhe me senatorë të tjerë të interesuar për gjëndjen në Kosovë, për tu këshilluar me ju, për hapat më të mirë që duhet të merren, individualisht dhe në bashkpunim me njëri tjetrin”, shkruanin ish-senatorët Claiborne Pell dhe Bob Dole, në letrën e tyre drejtuar Dr. Ibrahim Rugovës të dates 19 Shtator, 1991. Kështu filloi edhe ndërkombëtarizimi i çështjes së Kosovës.

Fillimisht me sensibilizimin e popullit amerikan dhe të përfaqësuesve të tij në Kongres, siç ishte ish-Senatori Bob Dole, i cili me letrat e tija të shumta dërguar udhëheqësve të botës për t’i njoftuar për gjëndjen në Kosovë, sensibilizoi edhe opinionin ndërkombëtar në favor të mbrojtjes së të drejtave të shqiptarëve të Kosovës dhe të aspiratave të tyre demokratike për një Kosovë të lirë dhe të pavarur.

Angazhimi dhe roli i tij, mbrenda dhe jashtë vendit në atë kohë, ishte kritik për zhvillimin e punëve në favor të Kosovës, sidomos gjatë dekadës së fundit të shekullit të kaluar, përpjekje këto që më në fund çuan në çlirimin dhe më vonë në pavarësinë e Kosovës.  Statuja e ish-Senatorit republikan Robert Dole në Prishtinë i bashkohet statujës së ish-presidentit amerikan demokrat Bill Klinton dhe bashkpuntores së tij, ish-Sekretares së Shtetit Madeleine Albright, në frymën e bashkpunimit të dy partive kryesore amerikane në mbështetje të aspiratave të Kosovës për liri e pavarësi.  Kjo frymë bashkpunimi midis dy partive amerikane republikane dhe demokrate – përsa i përket Kosovës, vazhdon edhe sot.

Duke folur për angazhimin e ish-Senatorit Bob Dole ndaj lirisë dhe të drejtave të poullit të Kosovës gjatë inagurimit, vitin që kaloi, të vendit ku do të zbulohet shpejt  statuja e Senatorit Dole, Ambasadori Kosnett e cilësoi, Z. Bob Dole si, “Një udhëheqës në promovimin e kauzës së lirisë anë e mbanë botës.  Nuk është për të çuditur që ai u bë një mbështetës i pa zevëndsueshëm i Kosovës, duke qëndruar pranë dhe në mbështetje të popullit të këtij vendi, në përpjekjet e tija, për të ndërtuar një shtet të fortë dhe të lirë”, ka thënë me atë rast, kryediplomati amerikan në Prishtinë.  Duhet thënë se në këtë frymë bashkpunimi është njohur dhe vlerësuar shumë prej popullit të Kosovës, ndihma e këtyre burrave dhe grave amerikane në mbështetje të Kosovës gjatë dekadave.

Siç është shprehur edhe Ibrahim Rugova, shpresojmë që më në fund, kjo frymë bashkpunimi, të sigurojë një miqësi të përhershme, jo vetëm, midis Shteteve të Bashkuara e Kosovës por edhe midis Kombit amerikan dhe Kombit shqiptar, në përgjithësi.  Megjithë grindjet dhe mosmarrveshjet midis partive të ndryshme politike në Kosovë dhe në Shqipëri, duket se të pakën deri tani, kjo miqësi është e paprekshme dhe gjesti për vendosjen e statujës së ish-Senatorit Republikan Robert Dole në Prishtinë pasqyron një qëndrim të përbashkët mirënjohjeje të klasës politike shqiptare dhe popullit të Kosovës, karshi burrave të shtetit amerikan që kontribuan në themelimin e shtetit të pavarur e të lirë të Kosovës, që është sot.

Duke aluduar se edhe midis miqësh mund të ketë mosmarrveshje, ambasadori amerikan në Prishtinë, Filip Kosnett, me rastin e inaugurimit të vendit ku do të vendoset statuja e Senatorit Dole në Prishtinë, është shprehur se,“Qeveritë tona nuk do të pajtohen gjithmonë për politikat e ndryshme dhe do të nevojitet punë serioze për të mbajtur qëndrimet tona në përputhje me njëra tjetrën, ndërsa rritet partneriteti i Kosovës me Shtetet e Bashkuara.  Por, një gjë është e qartë: se miqësia e qendrueshme midis popullit të Kosovës dhe popullit të Shteteve të Bashkuara, nuk varet nga ndonjë parti politike ose nga ndonjë individ, në veçanti”, është shprehur me atë rast, ambasadori amerikan në Prishtinë, por janë lidhje ndërmjet dy popujve tanë.

Po e përfundoj këtë shkrim me fjalët e ambasadorit amerikan në Prishtinë, Z. Kosnett që shqiptoi në inaugurimin e vendit ku do të zbulohet së shpejti statuja e Senatorit Dole në Prishtinë, duke shpresuar se rasti i zbulimit të statujës së Senatorit Amerikan Robert Dole në Prishtinë, të jetë një moment që të fokusohemi në historinë dhe në vlerat tona të përbashkta që kanë bashkuar popullin e Shteteve të Bashkuara dhe popullin e Kosovës.

“Le të frymëzojë ky monument i Bob Dolit, përpjekje të reja për të ndërtuar — për fëmijt e Kosovës një atdhe që ata e meritojnë — për një Kosovë në paqe me fqinjtë e saj, me drejtësi dhe mundësi të barabarta për të gjithë, pa dallim”, është shprehur ambasadori amerikanë në Kosovë, Filip Kosnett.  Shpresojmë që ashtu të jetë!

Me Senatorin Robert Dole në darkën e dekorimit të tij me çmimin “Duart e Shpresës”, nga Këshilli Kombëtar Shqiptaro-Amerikan, Shtator, 2005 –kur autori drejtonte këtë organizatë lobimi shqiptaro-amerikane.

*Shkrimi është botuar me 28 shkurt, 2020

LAMTUMIRË ZEF PËRNDOCAJ!

by

…ZEF PËRNDOCAJ-ISH KRYETARI I VATRËS PËR SHTETIN E NEW YORK-UT, ANËTAR I BORDIT TË FEDERATËS QË PREJ VITIT 1975, U PËRCOLL ME NDERIME, LOT DHE LULE…

Vdekja e vatranit Zef Përndocaj me 24 gusht 2020 plagosi zemrat e familjarëve, miqëve dhe vatranëve. Ashtu sic e meritonte, Kisha, komuniteti dhe Vatra, e nderuan dhe e respektuan maksimalisht Njeriun e Mirë Zef Përndocaj. Masivisht komuniteti bëri homazhe për 7 orë dhe ngushëlloi Familjen Përndocaj, miqtë dhe të gjithë ata që e deshën dhe e respektuan.Federata Pan Shqiptare e Amerikës VATRA porositi një kurorë me lule në nderim të vatranit të përkushtuar,që e nis rrugëtimin me Vatrën që me 28 nëntor 1967,- ish kryetarit të degës së Vatrës për Shtetin e New York-ut, ish anëtarin e Bordit të Vatrës që nga viti 1975. Shërbimet funerale u organizuan në Shtëpinë mortore Ballard-Durand-Funeral Home, në qytetin White Palins, NY të premten me 28 gusht 2020, nga ora 2 e pasditës deri në 9 të mbrëmjes. Federata VATRA shkoi e grupuar për të ngushëlluar familjen Përndocaj dhe miqtë- Kryetari Elmi Berisha, Presidenti i nderit Agim Rexhaj, nënkryetarët Dr. Pashko Camaj, Besim Malota, sekretarja Nazo Veliu,arkëtari Marjan Cubi me zonjën Dila, anëtarët e kryesisë,Anton Raja, Zef Balaj me zonjën Lina dhe djalin David,Ibrahim Kolari, Mark Mrnacaj dhe Aleks Mrnacaj,Asllan Bushati, Veis Belliu, Editori Dalip Greca me familjen,më pas shkuan edhe anëtari i Këshillit të Vatrës Cezar Ndreu me Desi Ndreu, të bijën e vatranit Jonuz Ndreu, e cila sapo ka zënë vendin e të atit në Vatër,dhe Shpëtim Ndreu e të tjerë. Në emër të Fedeartës Pan Shqiptare të Amerikës VATRA, z. Agim Rexhaj, president Nderi i Vatrës, ka ngushëlluar nipin e Zefit, Dod Luli, ardhur enkas nga Shqipëria për këtë rast, si dhe të birin e Zefit Albert Përndocaj. Z. Rexhaj, evidentoi përkushtimin, devotshmërinë dhe bujarinë e vatranit të vjetër Zef Përndocaj. Homazhe kanë kryer edhe ish Kryetari Gjon Bucaj me familjen, si dhe vatranë të tjerë.

MESHA E DRITËS, LUTJE, LOT, DHIMBJE

Të Shtunën, 29 Gusht, në orën 10 paraditë, në Kishën Katolike Shqiptare “Zoja e Shkodrës” famullitari Don Pjetër Popaj, ka udhëheq Meshën e Dritës. Në emër të famullisë, Këshillit të Kishës, ai ka ngushëlluar familjen Përndocaj, është lutë për shpirtin e Zefit dhe ka vlerësuar karakterin burrëror, kombëtar dhe fetar të Zefit. Don Pjetri, tha ndër të tjera, se vëllai ynë Zefi, ka përjetuar vuajtje mundime, ka provu dënime që në moshë fëminore, ka parë babën në pranga, i kanë pushkatuar axhën,ka provue jetën e malit dhe është arratisë për t’i shpëtuar vuajtjeve të diktaturës komuniste. Zefit ia kanë dënuar familjen dhe të afërmit,ai provoi vështirësi të shumta, por besimi në Zot nuk ia humbi qetësinë dhe gjykimin…Kur i shkova para pak ditësh në spital,tha don Pjetri,edhe pse në gjendje të vështirë shëndetsore ai ishte i kthjelltë dhe në paqe me veten dhe Zotin…Zefi ishte njeri i mire, që respektonte gjithkënd, nuk ofendonte askënd, ishte i dashur me të gjithë, një familjar i përkushtuar, besimtar i devotshëm, në shoqëri i respektuar.Për cështjen kombëtare nuk u kursye. Ishte bujar për fe e atdhe. I qeshur me të gjithë; të gjithë i ka dashtë dhe i ka respektuar. Prania juaj sot në masë kaq të madhe në meshë, edhe pse në kushtet e kufizimeve të Pandemisë, tregon se dhe ju e keni dashtë shumë….

Gjatë meshes don Pjetri u ndihmua nga Lek Vata dhe Mhill Velaj.

Pas lutjeve, në emër të familjes ka përcjell mesazhin e dhimbjes por dhe të krenarisë për axhën e vet, nipi i Zefit, djali i vëllait të ndjerë Bibës, Dodë Bibë Përndocaj. Duke kujtuar castet më jetësore të Zefit, Doda ka portretizuar njeriun e mirë Zef Përndocaj. Kishte dhe raste, kur rrëfimi ndërpritej nga dhimbja dhe lotët… ndërsa mbesa Elizabeth, vajza e vajzës,na bëri për të qarë. Një mesazh shpirti për gjyshin e saj të mirë që e donte aq shumë.

Kjo meshë i pat të gjitha: Lutjet, lotët, dhimbjet.

Në meshë ishin të pranishëm edhe vatranët: Agim Rexhaj me zonjën Laura, Besim Malota, Zef Balaj me zonjën Lina dhe djalin David, Marjan Cubi me zonjën,Anton Raja, Idriz Lamaj me zonjën Alma, Lek Mirakaj, Asllan Bushati, Dalip Greca e të tjerë. Ishin në meshë edhe ish kryetari i Vatrës dr. Gjon Bucaj me familjen, Mithat Gashi dhe të tjerë. Pas meshës, kortezhi që shoqëroi arkmortin me trupin e pajetë të Zef Përndocaj udhëtoi drejt varrezave Gate of Haven në Hawthorne, New York.

LAMTUMIRA…

Pas lutjes fetare nga famullitari dom Pjetër Popaj, e ka marrë fjalën Dr. Gjon Bucaj, ish kryetar i Federatës VATRA. Z. Bucaj tregoi me detaje jetën e Zefit, që e nisi shtegtimin e jetës 80 vite më parë në fshatin Sang, të krahinës së Fanit të Mirditës,kur prindërit e tij të kujdesshëm, ia ruajtën andrrat, që të mos i prisheshin nga rrethanat jetësore, por erdhi tragjedia e komunizmit,që preku dhe Zefin e familjen e tij…Mbi ta ra persekutimin komunist,arrestime,internime, përndjekje, dhe qendresë. Zefi, tha dr. Bucaj, pa me sytë e tij djegjen e shtëpive, pa babën me pranga ndër duar, përjetoi kohën e vrasjes dhe qëndrimin legjendar të axhës së tij, që së bashku me një kumbar luftoi heroikisht dhe nuk u dorëzua… Më 1951 u detyruan të arratisen në ish Jugosllavi…(Të plotë lexoje në Diellin e printuar)

Nata e madhe e futbollit shqiptar në Ligën e Europës

by

Teuta “Mbretereshe”, Sherri “heroi” laçian… Kukësi “shuplakë” Slavias… Shkëndija një fitore për ditëlindje…  Renova eleminon kampionen e shumfishtë … 

Përgatiti:Albano Kolonjari-

Faleminderit Teuta, Laçi, Kukësi, Shkëndija dhe Renova. 27 gushti i këtij viti do të hyjë në historinë e Europa Lige, si nata e madhe e futbollit shqiptar. Tre ekipe shqiptare Teuta, Laçi dhe Kukësi shkruajnë historinë duke u kualifikuar për në turin e tretë të Ligës së Europës. Dhe sëbashku me to edhe dy skuadrat shqiptare të Maqedonisë së Veriut Shkëndija dhe Renova, kanë bërë që për një natë Liga e Europës të flasë shqip. 

Teuta-Beitar 2-0

“Kualifikimin ia dedikojmë familjeve tona, qytetit të Durrësit që na ka përkrahur. Edhe pse me stadium bosh, nga pallatet u dëgjuan broherimat, e dimë që na kanë parë nga televizori…fitorja u përket atyre”, shprehet tranjeri i Teutes Edi Martini. Në stadiumin “Niko Dovana”, Teuta është “mbretëresha” e mbrëmjes shqiptare. Krasniqi (6′) dhe Hebaj (88′) i dhanë Teutës fitoren e pastër përballë skuadrës Beitar të Jeruzalemit. Skuadra nga Jeruzalemi zbriste në Niko Dovana duke mbajtur mbi supet e saj gjashtë tituj kampion, shtatë kupa dhe dy superkupa te këtij vendi. Në “letër” Beitar ishte më i favorizuar se Teuta në këte takim. Por në fushën e lojës Teuta tregoi se ishte një skuadër me shumë dëshirë, dhe e  dominoi ndeshjen gjatë 90 minutave. Takimi nisi me sulm dhe me gol për djemt e detit  të cilët kaluan në avantazh që në të gjashtën minutë me anë të Krasniqit. “I falenderoj të dy sulmuesit. Janë dy sulmues të talentuar, njeri më i mirë se tjetri. Më vjen mirë, sepse ishte realisht një ndeshje e rëndësishme”, shprehet “arkitekti” i kësaj skuadre Edi Martini., i cili më pas thekson:” Unë vlerësoj grupin. Ne kemi 18 lojtarë të mrekullueshëm. Ne do të punojmë në merkato, por duhet të pranojmë se kemi një ekip mjaft të mirë”. Në pjesën e dytë Teuta nuk u tërhoq, por vazhdoi të sulmonte dhe kishte mundësi për të shënuar, por goli i dytë do të vinte dy minuta përpara përfundimit të takimit, kur Hebaj me kokë, do të vuloste këtë fitore të bukur të djemve të detit. 

***

TEUTA-BEITAR JERUZALEM 2-0

Teuta: Frashëri, Todorovski, Arapi, Hoxha, Kuro, Avdyli, Aleksi, Beqja, E.Vila, L.Vila, Krasniqi. Trajner: Edi Martini.

Beitar Jeruzalem: Nitzan, Biton, Dgani, Verdaska, Kostantini, Rotman, Ali Mohamed, Krif, Atar, Azulai, Vered. Trajner: Roni Levi.

***

Kukësi-Slavia e Sofies 2-1

“Shuplakën” që tranjeri Skënder Gega i dha skuadrës bullgare Slavia e Sofies, duke e eleminuar me rezultatin 2-1, e kanë ndierë edhe drejtuesit e Partizanit, të cilët një vit më parë tranjerit kampion nuk i besuan vazhdimësinë e skuadrës së kuqe në kupat e europës. Kukësi-Slavia ishte një ndeshje e hapur nga të dyja skuadrat. Të parët që kaluan në avantazh ishin kuksianët me anë të P.Eze në të 56 minutë nga pika e bardhë e penalltisë.  Pikërish kur kuksianët ishin ne momentin e tyre më të mirë dhe po kontrollonin lojën, ndërshkohë dhe miqtë barazojnë rezultatin në 1-1 në të 81 minutë me anë të Krastev. Fitorja e kuksianëve erdhi nga stoli. Në të 65 minutë Gega hedh në fushën e lojës dyshen Gavazaj-Cooper, të cilët do të ishin edhe çelësi i suksesit kuksian.  Cooper në të 85 minutë do ti “vidhej” mbrojtje së Slavias dhe pas një asis te Gavazaj shënon golin e dytë për kuksianët. “Jam i lumtur për lojtarët që u futën në pjesën e dytë, por të gjithë dhanë shpirtin në fushë gjatë 90 minutave dhe meritojnë komplimente” shprehet tranjeri Skënder Gega. Por përsa i përket ndeshjeve të ardheshme Gega thotë:”Do e shikoj me qetësi ndeshjen për të parë ku kemi çaluar dhe besoj se do të përmirësohemi. Kemi objektiva të qarta. Kemi nevojë për përmisime dhe për këtë do të flas me drejtuesit. Dua të përshëndes Teutën dhe Laçin për kualifikimin”. 

***

Keshla-Laçi 0-0 4-5 me penallti

Portieri Alan Sherri është heroi kurbinas, ndërsa Laçi bën suprizën duke eleminuar Keshla në stadiumin Shafa të Arzerbajxhanit. Me 37 ndeshje në europë, 6 në Ligën e Kampionve, 27 në Europa Ligë dhe 4 në Kupën Intertoto, Kishla dukej një skuadër e “madhe” për laçianët, të cilët nga ana e tyre nuk e kanë një eksperincë të tillë në kompeticionet europiane. Por në fushën e lojës skuadra e drejtuar nga Armando Cungu tregohet cinike dhe për më tepër që nga minuta e 72-të e takimit luan me dhjetë lojtarë pas daljes me karton të kuq të futbollistit De Olivera. 90-të minutat e këtij takimi përfunduan në barazim 0-0 dhe në bazë të rregullores së UEFA-s u luajtën edhe dy pjesë nga 15 minuta të cilat nuk ndryshuan rezultatin e lojës. Për të caktuar fituesin e këtij takimi u gjujatën penalltitë, ku laçianët fituan 4-5. “Për sa i përket goditjeve të penalltive ne ishim prëgatitur në këtë pikë. Ne kishim marrë parasysh faktin se ishte vetëm një ndeshje, Nuk mendoj se jemi me fat. Ne fituam përmes lojës tonë dhe përkushtimit. Unë kam ardhur në Baku dy herë dhe të dyja herët kisha humbur së pari ndaj Inter Baku, pastaj ndaj Karabak. Këtë herë arrita triumfoja. Ishte një ndeshje e vështirë. Keshla është një ekip shumë i mirë. Jemi të lumtur që fituam,  në një ndeshje që u bë shumë e vështirë pasi gjyqtari largoi lojtarin tonë me karton të kuq”u shpreh tranjeri Armando Cungu. 

FT: KESHLA – LAÇI 0-0

PENALLTITË: (4-5)

1 . Nuabueze (Laçi) – shënon

2. Klof (Keshla) – shënon

3. Lushkja (Laçi) – shënon

4. Silvio Zhunior (Keshla) – shënon

5. Donald Rapo (Laçi) – shënon 

6. Aksiundov (Keshla) – shënon 

7. Mentor Mazrekaj (Laçi) – shënon

8. Haxhiev (Keshla) – shënon 

9. Ignjatovic (Laçi) – shënon 

10 Sherri pret penalltinë e fundit dhe kualifikon Laçin.

KESHLA: Namasko, Qirtimov, Bojoviç, Alijev, Salahil, Kamara, Klots, Isgandarli, Hadzhijev, Artut, Mfutila.

LAÇI: Sherri, Turkaj, Selmani, Ignjatoviç, Marku, Lushkja, Ramos, Deliu, Teko, Xhixha. Nuabueze. Tranjer Armando Cungu 

***

Sumgayit FC – Shkendija e Tetoves 0-2

Një fitore për ditëlindje. 41 vjet më parë në 27 gushtin e vitit 1979 do të krijohet në Maqedoninë e Veriut Shkëndija e Tetovës. Pikërisht në ditëlindjen e saj të 41-të skuadra e drejtuar nga profesor Ernest Gjoka fiton pastër në transfertë me rezultatin 0-2 përballë skuadrës azerbajxhanese Sumgayit FC. Besart Ibrahimi dhe Ljupco Doriev shënuan nga pika e bardhë e penallitsë. Kjo ishte fitorja e 10-të e Shkëndijës në Europa Ligë dhe e 13-ta në kompeticoinet europiane. Besart Ibrahimi shënoi golin e tij të 15-të me fanellën e Shkëndijes, ndërsa Dorievi shënoi golin e 40-të në kompeticionet eruopiane për Shkëndijen e Tetovës. Skuadra e profesor Ernest Gjokës e dominoi ndeshjen dhe fitoi me meritë këtë takim. 20 minutat e fundit të takimit skuadra e Shkëndijës së Tetove do ti luante me 10 lojtarë pasi në minutën e 70-të Goudiaby do të ndëshkohej me kartonin e kuq. 

***

SUMQAYIT FC-SHKËNDIJA 0:2 (0:0)

Stadiumi “Kapital Bank Arena” në Sumqayit-Azerbajxhan

Arbitër: Arman Ismuratov (Kazakistan)

Golashënues: Ibraimi pen. 56’ dhe Doriev pen. 90’ (Shkëndija)

Karton i kuq: Mutallimov 89’ (Sumqayit)

SUMQAYIT FC: Dzhenetov, Hyseynov (c), Khodzhaniyazov, Mustafayev, Mutallimov, Ghorbani, Sadikhov, Badalov, Ahmadov (Hemati 62’), Mammadov (Abdullazade 73’), Nacafov (Abdullazade 63’).

Trajner: Aykhan Abbasov

SHKËNDIJA: Zahov, Paviç, Bejtullai (c), Ibraimi, Totre, Ahmedi, Doriev (Es Sahal 90’+2), Murati (Neziri 90’+3), Dita, Krivak, Imeri (Zejnullai 77’).

Trajner: Ernest Gjoka 

Alashkert-Renova 0-1

Skuadra e Renoves fitoi me rezultatin 0-1 ne Jerevan te Armenise. Golin e vetem te ketij takimi e shenoi Miskovskit ne te 56 minute. 

FC Alashkert i Yerevan nuk arriti të kalojë raundin e parë kualifikues të UEFA Europa League. Skuadra e Yeghishe Melikyan luajti me skuadrën shqiptare Renova të Maqedonisë Veriut  dhe u mposht me një rezultat minimal 0-1. Renova 0:1 (0:0). Alashkert kishte mundesinë të shënonte në minutën e parë të ndeshjes, por portieri Veli bëri mrekullinë duke shpëtuar portën nga një gol i sigurtë.  Në fillim e ndeshjes, Alashkert kishte një avantazh të dukshëm për sa i përket hapësirës dhe lojës, ndërsa skuadra e Renoves  i afrohej portës kundërshtare shumë rallë.  Momenti i parë i rrezikshëm për Renovën ishte në minutën e 16 kur portieri Ognjen Cancarevic shpëton  Alashkert nga një gol i sigurtë. Në mes të ndeshjes, Alashkerti nuk ishte ndonjë avantazh të madh dhe Renova gradualisht filloi të kishte kontroll mbi topin dhe sulmoi. Në fund e pjesës së parë, klubi i futbollit armen ende kishte kontroll të plotë lojën, por nuk arriti të depërtojë në mbrojtjen e Renovës. Pjesa e parë përfundoi 0-0. Në fillim të pjesës së dytë, Renova shënoi golin e parë dhe të vetëm të këtij takimi në minutën e 57-të. Në fund të ndeshjes, sulmet e skuadrës armene ishin të lexueshme, dhe skuadra vendase nuk arriti të paraqiste ndonjë rrezik serioz Renoven, e cila ishte rreshtuar në mbrojtje. Renova bëri suprisë duke eleminuar kampionen e shumefishtë të Armenisë. .

Goals: 58′ Nenad Mishkovski

Alashkert: Čančarević; Bryan, Voskanyan, Mitrevski, Honchar; Grigoryan (80′ Tankov); Gome, Perdigão (61′ Camara), Tiago Galvão, Tiago Cametá (67′ Papikyan); Glišić.

Renova: Velii; Velija, Djelil, Mishkovski, Fetai; Gavazaj, Sadiki: Shefiti, Gafuri (C) (86′ Veliu), Ramadani (71′ Jasharoski); Selmani (63′ Stojchevski).

Yellow cards: Gome, Grigoryan, Glišić, Tiago Galvão (A), Selmani, Shefiti, Sadiki (R)

Referee: Nicholas Walsh 

Kosova, Strategji Kombëtare për Zhvillim

by

-AMBASADORI AMERIKAN NË PRISHTINË, PHILIP KOSNETT: TË PËRKUSHTUAR PËR TA NDIHMUAR KOSOVËN-

-Qeveria e Kosovës do të hartojë Strategjinë Kombëtare për Zhvillim për 10 vjetët e ardhshme. U mbajt takimi i Forumit të Donatorëve për Rimëkëmbje Ekonomike, pjesëmarrës ishte edhe ambasadori i Shteteve të Bashkuara të Amerikës në Kosovë, Philip Kosnett/

    PRISHTINË, 28 Gusht 2020-Gazeta DIELLI/ Kryeministri i Qeverisë së Republikës së Kosovës, Avdullah Hoti, i shoqëruar nga ministrja e Financave, Hykmete Bajrami, mori pjesë në takimin virtual të Forumit të Donatorëve për Rimëkëmbje Ekonomike, në të cilin pjesëmarrës ishin edhe ambasadori i Shteteve të Bashkuara të Amerikës në Kosovë, Philip Kosnett, përfaqësuesi i Bashkimit Evropian në Kosovë, Riccardo Serri, si dhe përfaqësuesit e vendeve donatore prezente në Kosovë, të agjencive zhvillimore dhe institucioneve financiare ndërkombëtare.Takimi kishte për qëllim diskutimin për qasjen e përbashkët të Qeverisë së Kosovës dhe donatorëve për të financuar rimëkëmbjen ekonomike të vendit, të nevojshme pas pandemisë së Covid-19.

Gjatë takimit, kryeministri Hoti shpalosi vizionin afatgjatë të Qeverisë së Kosovës për rimëkëmbjen ekonomike dhe për përfshirjen e donatorëve në financimin e prioriteteve të vendit.

Ndihma e menjëhershme e mobilizuar nga donatorët nëpërmjet projekteve, përkrahjes së buxhetit të vendit dhe huave për investime, me qëllim të rimëkëmbjes ekonomike gjatë vitit 2020 dhe e planifikuar për vitin e ardhshëm, arrin mbi 400 milionë euro.

Qeveria e Kosovës do të hartojë Strategjinë Kombëtare për Zhvillim për 10 vjetët e ardhshme, e cila do të jetë orientuese për reformat dhe objektivat afatgjate të vendit për zhvillim të qëndrueshëm, në përputhje me aspiratat për integrim evropian të vendit.

Për të mundësuar rimëkëmbjen ekonomike, do të hartohet një plan më i detajuar i investimeve më të rëndësishme për 5 vjetët e ardhshëm, i cili do të financohet nga buxheti i vendit, donatorët dhe në bashkëpunim me sektorin privat.Qeveria e Kosovës dhe donatorët do të vazhdojnë koordinimin e tyre të rregullt nëpërmjet diskutimeve sektoriale për objektivat e përbashkëta që do të financohen bashkërisht, duke synuar të rritet sinergjia, efiçenca dhe efikasiteti gjatë zbatimit dhe të eliminohen pengesat e shfaqura për zbatimin e fondeve të donatorëve.

AMBASADORI AMERIKAN NË PRISHTINË, PHILIP KOSNETT: TË PËRKUSHTUAR PËR TA NDIHMUAR KOSOVËN-
-Fjala e ambasadorit Kosnett gjatë Forumit për bashkërenditjen e donatorëve për rimëkëmbje ekonomike, 28 gusht 2020/Kryeministër Hoti, zëvendës-kryeministra, ministra, kolegu im z. Serri, kolegë të tjerë nga komuniteti diplomatik dhe i donatorëve, mirëdita.Forumi i nivelit të lartë për bashkërenditjen e donatorëve, që mbahet nën udhëheqjen e Qeverisë së Kosovës, na mbledh çdo vit për të bashkërenditur ndihmën nga donatorët dhe prioritetet strategjike të Qeverisë së Kosovës. Këtë vit po mblidhemi në mënyrë virtuale, në rrethana të jashtëzakonshme. Asnjë vend nuk i ka të gjitha përgjigjet për sfidat tona të përbashkëta dhe është jetike që të vazhdojmë të vëmë dijeninë në dispozicion dhe të shkëmbejmë idetë përderisa vazhdojmë tutje.Çdo vend po përballet me sfidën si të sigurojë më shumë resurse për të adresuar nevojat urgjente mjekësore, si dhe si të rimëkëmbë dhe forcojë ekonominë. Kjo nuk është „lojë e shumës zero”, ku njëri fiton e tjetri humb. Menaxhimi i pandemisë shkon krah për krah me përgatitjet për rimëkëmbjen ekonomike. Vënia nën kontroll e kërcënimit që vjen nga virusi dhe sigurimi i shëndetit të komunitetit është parakusht i rimëkëmbjes ekonomike. E rimëkëmbja e plotë ekonomike nuk do të jetë e mundshme nëse dështon menaxhimi i pandemisë.Shtetet e Bashkuara të Amerikës dhe pjesa tjetër e bashkësisë ndërkombëtare mbesin të përkushtuar për ta ndihmuar Kosovën. Përderisa SHBA-ja po i mobilizon forcat e saj shkencore dhe industriale, gjithnjë e më shumë kemi mundësi që t’i japim Kosovës pajisje dhe furnizime, duke plotësuar kështu kontributet e vazhdueshme financiare dhe ndihmën teknike.Këto Forume për bashkërenditjen e donatorëve të jashtëm mund të jenë mënyrë efikase e renditjes së prioriteteve ashtu që resurset e pakta – ato të Kosovës, por edhe ato të siguruara nga partnerët ndërkombëtarë – të shfrytëzohen në mënyrë efikase. Duhet të përmirësojmë komunikimin, t’ju japim përparësi nevojave dhe të sigurojmë fundin e „pazarit për donatorë”.
Edhe pse ne, ndërkombëtarët mund të ofrojmë pajisje dhe të shkëmbejmë ekspertizën tonë, as ne nuk kemi shkop magjik në mesin e veglave tona. Prandaj, aftësia e qeverisë për ta menaxhuar kërcënimin nga COVID-i më shumë varet nga mobilizimi dhe bashkërenditja e resurseve vendore dhe fuqisë së popullit se sa nga
ndihma nga jashtë. Qeveria duhet të jetë në gjendje të shfaqë vendosmëri për plane të hollësishme që ato të funksionojnë dhe këtu përfshihet mobilizimi i resurseve vendore dhe bashkërenditje më të mirë ndër-ministrore.
E partitë politike duhet të vënë nevojat e popullit mbi ato të politikës së përditshme, duke u përqendruar në miratimin e shpejtë të ligjeve ekonomike dhe duke i lënë anash shkarjet e zakonshme në sherre provinciale.
Do ta përmbylli këtë duke theksuar sërish se edhe pse qeveria duhet t’i prijë betejës, luftimi i COVID-it është detyrë e çdo qytetari. Kur Kosova u godit nga pandemia, qytetarët, bizneset dhe organizatat ishin ndër të parat që reaguan. Plani i qeverisë për rimëkëmbje ekonomike mund të shërbejë si shtytës për angazhim domethënës me qytetarët, organizatat dhe sektorin privat për të shfrytëzuar resurset që ekzistojnë tashmë në Kosovë.
Populli i Kosovës është i famshëm për energjinë dhe zgjuarsinë. Këto janë armët tuaja të fshehta.
Ju faleminderit për kohën tuaj dhe le t’i shfrytëzojmë sa më mirë mundësitë që na i ofron kjo konferencë.