dgreca – Page 1458 – Dielli

Kosova me Kompleks Rezidencial Qeveritar

April 14, 2018 by dgreca

-Qeverita e Kosovës, në mbledhjen e sotme, miratoi vendimin për shpalljen me interes të veçantë publik të pronave të paluajtshme, të cilat do të preken nga realizimi i Projektit “Ndërtimi i Kompleksit Rezidencial Qeveritar” në zonat kadastrale të Prishtinës dhe Graçanicës/

-Para 10 viteve, pas shpalljes së pavarësisë së Kosovës paralajmërohej se shteti i ri do të bëhet me objekte të reja qeveritare…Edhe Pallati Rilindja, 18 katësh në qendër të Prishtinës, u shpronësua e rinovua dhe u shndërrua në ndërtesë qeveritare. Punëtorët e Rilindjes ende në pritje të realizimit të drejtave të garantuara me ligj/
-Qeveria, në mbledhjen e 41-të, miratoi Projekt Kodin Penal të Republikës së Kosovës/

SPECIALE-Gazeta DIELLI nga korrespondenti në Kosovë Behlul Jashari /

PRISHTINË, 13 Prill 2018/ Kosova ndërton Kompleksin Rezidencial Qeveritar në periferi të kryqytetit, Prishtinës.

Qeverita e Kosovës, në mbledhjen e sotme, drejtuar nga kryeministri Ramush Haradinaj, miratoi vendimin për shpalljen me interes të veçantë publik të pronave të paluajtshme, të cilat do të preken nga realizimi i Projektit “Ndërtimi i Kompleksit Rezidencial Qeveritar” në zonat kadastrale të Prishtinës dhe Graçanicës.

Ndërtimi i kompleksit qeveritar që parashihej të bëhet në lagjen “Prishtina e Re” në periferi të kryeqytetit, në lokalitetin Hajvli, në një hapësirë prej 35 hektarësh, është ide e para 10 viteve, menjëherë pas shpalljes së pavarësisë së Kosovës në 17 shkurtin historik 2008. Ky projekt, që llogaritej të kushtojë rreth 90 milionë euro, pritej të jetë pjesë e projekteve që do të paraqiteshin në Konferencën e donatorëve për Kosovën.Përfaqësuesit e qeverisë së Kosovës dhe të komunës së Prishtinës në shkurt 2008, pak ditë pas shpalljes së pavarësisë, kanë biseduar për këtë projekt dhe realizimin e tij “në pajtim me përformancen e re që duhet të kenë institucionet e Republikës”.Në prill 2008, në një mbledhje të qeverisë së Kosovës paralajmërohej se shteti i ri do të bëhet me objekte të reja qeveritare, ndërkohë që disa ministri ishin të vendosura nëpër shtëpi private në mungesë të ndërtesave publike.Pas shpalljes së pavarësisë edhe Pallati Rilindja, 18 katësh në qendër të Prishtinës, u shpronësua e rinovua dhe u shndërrua në ndërtesë qeveritare.

PALLATI I SHTYPIT RILINDJA I SHPRONËSUAR, 10 VJET NDËRTESË QEVERITARE, PUNËTORËT QË ISHIN ATY ENDE PRESIN REALIZIMIN E TË DREJTAVE TË GARANTUARA ME LIGJ

Pallati i Shtypit Rilindja filloi të ndërtohet në nëntor 1971 dhe u finalizua në kohën kur Kosova me Kushtetutën e vitit 1974 ishte element konstituiv me të drejtë vetoje i federatës së atëhershme, nga shpërbërja e së cilës dolën shtatë shtete të pavarura, të reja të rajonit. RILINDJA pasi kishte investuar në truallin e Pallatit të Shtypit filloi edhe ndërtimin e tij, duke qenë udhëheqëse e punimeve dhe investitore.

Të gjitha ndërtesat që kishte, përfshirë atë ku tash është Ministria e Diasporës dhe Agjencia e Statistikave, Rilindja i ka dhënë për investim në ndërtimin e Pallatit të Shtypit – kullës 18 katëshe, me vendimin e datës 28. 5. 1976 të qeverisë së atëhershme të Kosovës. Për investim në Pallatin Rilindja punëtorët kanë ndarë një pjesë të rrogave të tyre afër 15 vjet për kthimin e kredive që kishte marrë ndërmarrja.Në 23 majin e vitit 2014, pjesë e vendimeve të qeverisë së Kosovës ishte edhe vendimi përfundimtar i shpronësimit për interes publik të ngastrave kadastrale në të cilën ndodhen objektet e Ndërmarrjes Shoqërore Rilindja, e në këtë kuadër Pallati Rilindja tash ndërtesë qeveritare, prej mëse 10 vitesh.Punëtorët e ndërmarrjeve që ishin në Pallat, të gazetës tradicionale të Kosovës Rilindja e të tjerët gjatë gjithë këtyre viteve ende janë në pritje të realizimit të drejtave të ligjëshme. Një nga të drejtat e garantuara me ligj për punëtorët është pagesa e 20 përqindëshit të vlerës së çdo prone të shronësuar. Çështja e 20 përqindëshit pritet të zgjidhet pasi të hyjë në fuqi Ligji me ndryshime e plotësime për Agjencinë Kosovare të Privatizimit, i miratuar në 30 mars 2018 në Kuvendin e Kosovës, ku është thënë se, “përmes këtij Projektligji synohet të krijohet edhe një mekanizëm për shpronësimin e pronave të ndërmarrjeve shoqërore që janë të nevojshme për sektorin publik” dhe se, “nëpërmjet këtij mekanizmi qeveria e Kosovës si autoritet shpronësues do të paguajë 20 përqind të mjeteve financiare dedikuar për punëtorët përfitues të ndërmarrjeve shoqërore”.Zgjidhja për Rilindjen, që ka statusin e ndërmarrjes shoqërore, pritet e kërkohet edhe nga Agjencia Kosovare e Privatizimit. Për privatizimin e gazetës tradicionale të Kosovës, pa u ndërlidhur me objektin e saj të shpronësuar, që tash është ndërtesë qeveritare, është edhe shembulli i gazetave në rajon dhe në botë, që kishin statusin si të Rilindjes, e që janë privatizuar dhe kanë vazhduar të dalin.

Në arsyetimin e kërkesës për privatizim theksohet edhe se emri dhe tradita e gazetës Rilindja është një vlerë shumë e madhe, e krijuar gjatë mëse shtatë dekadave, është pasuri me vlerë më të madhe se e çdo pallati, dhe kjo duhet të vlerësohet edhe në procesin e privatizimit.“Dhe, ai që do ta blejë gazetën Rilindja dhe natyrisht do e nxjerrë këtë të përditshme historike dhe tradicionale të Kosovës do jetë pronar i një pasurie të madhe mediale kombëtare, do të jetë trashëgimtar i ligjshëm i firmës-emrit, traditës. Rilindja ishte, është dhe mbetet edhe si një shenjë identiteti”, theksohet në kërkesën e 12 Shkurtit 2014 drejtuar Agjencisë Kosovare të Privatizimit, e cila në vazhdimësi është në mbështetje të së drejtës së gazetës tradicionale të Kosovës e punëtorëve të saj.Ndërmarrja Shoqërore Gazeta Rilindja në vitin 2017 ka hyrë në procesin e likuidimit, gjatë të cilit punëtorët e saj kanë bërë kërkesat e tyre bazuar në ligje në Agjencinë Kosovare të Privatizimit dhe në Dhomën e Posaçme të Gjykatës Supreme të Kosovës.Para 73 viteve, në 12 Shkurt 1945, në Prizren nisi të dalë gazeta shqiptare, tradicionale e Kosovës, Rilindja me angazhimin e intelektualëve të shquar të asaj kohe, me shkronja plumbi që u sollën me arka nga Tirana, e më pas vazhdoi në dalë në kryeqytetin Prishtinë.Gazeta historike Rilindja arriti të jetë histori e Kosovës që nga koha e Konferencës së Bujanit e Rezolutës për të ardhme të vullnetit kombëtar e demokratik të popullit e deri në Pavarësinë e shpallur në 17 Shkurt 2008 e në njohjet ndërkombëtare. Në ballinë të numrit të fundit të 30 Dhjetorit 2008 është paralajamruar: “Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë”

QEVERIA MIRATON PROJEKT KODIN PENAL TË REPUBLIKËS SË KOSOVËS

PRISHTINË, 13 Prill 2018- Gazeta DIELLI / Projekt Kodi Penal i Republikës së Kosovës u aprovua sot nga qeveria e Republikës së Kosovës, në mbledhjen e 41-të, drejtuar nga kryeministri Ramush Haradinaj. Qeveria theksoi se, ky Projekt Kod është bazuar në tre parime themelore: sundimi i ligjit dhe lufta kundër korrupsionit dhe krimit të organizuar; funksionimi i organeve te pavarura për zbatimin e ligjit; mbrojtja dhe avancimi i të drejtave të njeriut.

Plotësimet dhe ndryshimet e Kodit Penal të Republikës së Kosovës kanë qëllimin e vetëm, që të avancojnë sundimin e ligjit, forcimin e institucioneve të pavarura në luftimin e krimit dhe qasje e drejtë dhe efektive në sistemin e drejtësisë për të gjithë qytetarët pa dallim.

Kodi i ri adreson tre tema të gjëra: Masat kundër krimit të organizuar dhe korrupsionit; Masat për promovimin dhe mbrojtjen e të drejtave të njeriut; Masat kundër terrorizmit dhe parandalimin e tij.Dënimet për vepra penale që ndërlidhen me korrupsion janë rritur dhe janë propozuar amendamente të reja që i ndalojnë personave të dënuar për korrupsion që të ushtrojnë pozita dhe funksione në administratën publike në kohëzgjatje deri në 10 vjet nga shpallja e aktgjykimit dënues.Në hartimin e këtij Kodi kanë qenë të angazhuar 180 anëtarë të grupeve dhe nëngrupeve tematike, të përbëra nga shoqëria civile, mediat, institucionet ndërkombëtare, kanë punuar në ndryshimin dhe plotësimin e 100 neneve të Kodit Penal të Republikës së Kosovës. Kryeministri i Kosovës Ramush Haradinaj e vlerësoi si ditë të suksesshme miratimin e këtij Projekt Kodi, që e ka të fokusuar forcimin e sundimit të rendit dhe ligjit dhe luftën e të gjitha formave të krimit në vendin tonë.Ministri i Drejtësisë, Abelard Tahiri, tha se Projekt Kodi Penal i Republikës së Kosovës është në përputhje me standardet e Bashkimit Evropian si dhe në harmoni të plotë me Kushtetutën vendit.Gjatë mbledhjes, ministri i Financave njoftoi kabinetin qeveritar me situatën financiare dhe të projekteve zhvillimore të qeverisë. Ministri Bedri Hamza përmendi treguesit makroekonomikë zhvillimorë dhe trendët e tyre, që paraqesin rëndësi për zhvillimin e vendit. Ai theksoi nevojën e disiplinës financiare për të ruajtur trendët pozitive të zhvillimit në Kosovë, por theksoi edhe sfidat që paraqiten në këto zhvillime.

Hipokrizi e politikë

April 14, 2018 by dgreca

1 astrit LULUSHI

Nga Astrit Lulushi/Hipokrizia nuk është e mirë, është gënjeshtër me emër tjetër; mashtrim, lajkë, shpifje, pretendim, që jeton me lavdi të huazuar. Njerëzit që shkojnë në kishë a xhami, por nuk besojnë në Zot; njerëzit të cilët janë vegjetarianë, por veshin këpucë e xhaketa lëkure; ata janë të angazhuar në hipokrizi, ose sillen ndryshe nga ajo që thonë se besojnë. Feja e dënon hipokrizinë.
Por në politikë ndodh ndryshe. Ndonjë edhe mund të thotë se politika është e vlefshme, por meqenëse është e lidhur pashmangshmërisht me hipokrizinë, gënjeshtra nuk duhet të jetë e gjitha e keqe. Njerëzit pranojnë më lehtë atë që duket se është sesa atë që është, thotë Makiaveli tek Princi. Nisur nga parimi i mbijetesës së më të fortit (Seleksionimi Natyror), duket se njerëzit evoluojnë për të luajtur lojën e jetës sipas mënyrës makiaveliane.
Të tjerë thonë se mënyra më e mirë për të qenë i drejtë është që të jesh i drejtë. Por meqenëse është shumë më e vështirë të jesh i drejtë se sa të dukesh i drejtë, njeriu për lehtësi shpesh zgjedh si duket dhe jo si është. Kështu, njeriu mbushet me fuqi e pushtet që në fakt nuk i takon. Dhe nga puna e ndikimi i tij, shtrembërimi i realitetit zmadhohet. Aq më tepër që pushteti dhe privilegji vetë e përkrahin shtrembërimin.
Hipokrizia ka qenë prej kohësh në vemendje të psikologëve. Karl Jung thoshte se hipokritët nuk janë në dijeni të hijes së natyrës së tyre. Çdo individ ka nevojë për ndryshim, përmbysje, ripërtërritje, por jo duke i detyruar të tjerët nën maskën hipokrite të dashurisë ose ndjenjës së përgjegjësisë ose eufemizmave të tjera. Nëse njerëzit edukohen për të parë qartë hijen e natyrës së tyre, mund të shpresohet se ata gjithashtu do të mësojnë të kuptojnë dhe t’i duan më shumë të tjerët. Më pak hipokrizi dhe pak më shumë vetëdije mund të kenë rezultate të mira. Sepse njeriu është i prirur për të fajsuar tjetrin për gabimet dhe padrejtësitë e veta.
Benjamin Franklin thoshte se hipokrizia është vetë-mashtrim. Kur mbron një vendim a një post, njeriu hipokrit përpiqet të krijojë prova të rreme. Dhe, kur kërkohet të japë dëshmi, ai përpiqet të kërkojë dhe interpretojë “prova” që konfirmojnë atë që tashmë beson. Për më tepër, njerëzit priren të mendojnë shumë për veten e tyre, duke theksuar pikat e forta dhe arritjet, dhe duke anashkaluar dobësitë dhe dështimet e veta. Studime të ndryshme kanë provuar se rregullat morale të njeriut çojnë në dënimin e pabesisë, ndërsa rregullat e çiftëzimit e nxisin një person ta kryejë atë. Fuqia i zmadhon këto efekte. Njeriu me pushtet, ka më shumë gjasa të kryej pabesi, duke sfiduar kështu besimin e tjetrit.

Pompeo do të punojë për ta “përmirësuar” marrëveshjen me Iranin

April 13, 2018 by dgreca

I zgjedhur i presidentit Donald Trump për postim e Sekretarit të Shtetit, Mike Pompeo u përpoq që të heqë dyshimet se ai mund të avokojë që SHBA të tërhiqet nga marrëveshja bërthamore me Iranin, duke thënë se ai do të vazhdojë të punojë me aleatët e SHBA-së në përpjekje për të forcuar dhe “përmirësuar” marrëveshjen.

Shefi i CIA-s Pompeo, që u nominua për postin e kryediplomatit të SHBA-së nga Trump muajin e kaluar, ka thënë gjatë një seance dëgjimore për konfirmin e tij para Komitetit për Punë të Jashtme të Senatit, se ai do të vazhdojë punën e ish-sekretarit Rex Tillerson dhe do të punojë me aleatët evropianë për të përmirësuar marrëveshjen me Teheranin.

“Dua ta rregulloj marrëveshjen. Ky është qëllim”, ka thënë Pompeo para komitetit të Senatit.

“Nëse nuk ka asnjë shansë që marrëveshja ta rregullohet, unë do t’i rekomandoj presidentit që ne të bëjmë punën tonë më të mirë së bashku me aleatët, për të arritur një rezultat më të mirë dhe një marrëveshje më të mirë”.

Presidenti Trump ka vendosur një afat që deri në muajin maj që marrëveshja bërthamore me Teheranin të përmirësohet, në të kundërtën, ai ka kërcënuar se do të tërhiqet nga kjo marrëveshje.

Trump ka thënë se ai nuk do të nënshkruajë ndonjë valë të re të sanksioneve, derisa, ato që ai i quan “të metat e tmerrshme” të marrëveshjes, të jenë përmirësuar.

Por, pavarësisht kritikave të Trumpit se Teherani po shkelë “shpirtin” e marrëveshjes, duke vazhduar prodhimin e raketave balistike, Pompeo ka thënë se ai “nuk ka para të dhëna se ata (Irani) nuk po i përmbahen marrëveshjes”.

Drejtori i CIA-s, Pomepo ka shtuar se nuk beson që Irani mund të prodhojë shpejt armë bërthamore, nëse marrëveshja prishet.

Teherani së fundmi ka kërcënuar se do të rikthejë aktivitetet e tij bërthamore, nëse Trump tërhiqet nga marrëveshja.

Pompeo ka thënë se ai do të vazhdojë përpjekjet e Tillersonit për të negociuar një marrëveshje shtesë, që ka për qëllim forcimin e marrëveshjes bërthamore së bashku me aleatët evropianë (Francën, Britaninë dhe Gjermaninë), të cilët kanë qenë në mesin e gjashtë fuqive botërore që kanë nënshkruar marrëveshjen bërthamore më 2015.

Negociatorët evropianë, që po mbajnë bisedime me negociatorin amerikan Biran Hook në Uashington, kanë thënë se besojnë se po bëjnë përparim drejt një marrëveshjeje, ku do të adresohen shqetësimit e presidentit Trump mbi paktin bërthamor, ka raportuar agjencia Reuters.

Reuters ka cituar një diplomat evropian të ketë thënë se nëse “SHBA pajtohet që të punojë me evropianët që të sigurohet se programi bërthamor iranian është vetëm për përdorim civil, ne mund të pajtohemi për diçka”.

Por, ky diplomat ka thënë se negociatorët evropianë nuk mund të pajtohen në diçka që në mënyrë eksplicite është e ndaluar në marrëveshjen e vitit 2015.

Trump ka thënë se ka parë tri defekte në marrëveshjen bërthamore: dështimin për të ndaluar zhvillimin e raketave balistike të Iranit, kufizimet për inspektorët ndërkombëtarë që të vizitojnë vendet bërthamore dhe data e skadimit pas 10 vjetësh për pasurim me uranium dhe aktivitetet e tjera bërthamore të Iranit.

Përgatiti: Mimoza Sadiku

Kuvendi ende në terr informativ rreth deportimit të shtetasve turq

April 13, 2018 by dgreca

Deportimi i gjashtë shtetasve turq nga Kosova, ngjarje kjo e datës 29 mars, vazhdon të mbetet një zhvillim me shumë të panjohura, jo vetëm për opinionin publik, por edhe për krerët e shtetit dhe institucionet më të larta të Kosovës.

Agjencia e Kosovës për Inteligjencë (AKI) ende nuk ua ka dorëzuar raportin rreth këtij rasti institucioneve më të larta vendore.Përveç një raporti informues, të cilin deri më tani e ka prezantuar vetëm presidenti i Kosovës, Hashim Thaçi, institucionet tjera vazhdojnë të pohojnë se nuk kanë asnjë informacion zyrtar rreth asaj se si ndodhi që Kosova deportoi gjashtë shtetasit turq, të cilët deri në ditën e dëbimit, kishin leje valide qëndrimi në Kosovë.

Të premten, pritej që zëvendësshefi i Agjencisë së Inteligjencës, Latif Merovci të raportojë para Komisionit parlamentar për mbikëqyrje të AKI-së, por ky raportim nuk ndodhi. Ishte hera e katër që ky Komision kishte kërkuar këtë raportim.

Kryetarja e Komisionit, deputetja nga radhët e Partisë Demokratike të Kosovës, Ganimete Musliu tha se po bëhet e pamundur të ketë një kontroll ligjor demokratik mbi Agjencinë e Inteligjencës.

“Komisioni unanimisht konstaton që nuk jemi duke mundur ta zhvillojmë kontrollin demokratik apo anën ligjore të kontrollit demokratik mbi AKI-në. Ne do të mundohemi që në bazë të kompetencave që i kemi, bashkërisht të gjejmë rrugë për të funksionuar si komision dhe për të marrë përgjigje nga institucionet përgjegjëse”, tha deputetja Musliu.

Në ditën e deportimit të gjashtë shtetasve turq nga Kosova për në Turqi, si një aksion i koordinuar ndërmjet shërbimeve të inteligjencës nga Turqia dhe Kosova, jo vetëm deputetët, por edhe presidenti, kryeministri dhe kryetari i Kuvendit kishin deklaruar se nuk kishin njohuri rreth këtij rasti.

Si kundërreagim, kryeministri Ramush Haradinaj më pas pati liruar nga detyra ministrin e Brendshëm Flamur Sefaj dhe shefin e AKI-së, Driton Gashi.

Në bazë të një rezolutë të miratuar nga Kuvendi, pas një seance të jashtëzakonshme, është iniciuar edhe formimi i një komisioni hetimor parlamentar për t’i ndriçuar rrethanat e dëbimit të gjashtë shtetasve turq.

Deputeti Ilir Deda, nga Alternativa ka thënë për Radion Evropa e Lirë se shpreson që përmes këtij Komisioni, do të dalin para drejtësisë personat që sipas tij kanë shkelur Kushtetutën e Republikës së Kosovës.

Të gjashtë shtetasit turq u arrestuan dhe u dëbuan me një aeroplan të Shërbimit të Inteligjencës Turke më datë 29 mars vetëm pak orë pasi u arrestuan nga Policia e Kosovës në bashkëpunim me Agjencinë Kosovare të Inteligjencës (AKI).

Pesë prej personave të dëbuar nga Kosova ishin punonjës të shkollës “Mehmet Akif” në Kosovë, pronë e klerikut turk Fethullah Gulen, ndërkaq personi i gjashtë ishte një mjek turk.

Ankaraja i ngarkon ata me dyshimin se janë anëtarë të organizatës Hizmet të udhëheqësit fetar turk, Fetullah Gulen dhe e fajëson këtë të fundit se qëndron pas një tentim puçi në korrik të vitit 2016.Dëbimi i shtetasve turq me leje qëndrimi në Kosovë kishte nxitur edhe reagimin e Bashkimit Evropian.“Arrestimi dhe deportimi i gjashtë shtetasve që kanë jetuar ligjërisht në Kosovë, ngrit pyetje për respektimin e procesit të rregullt gjyqësor”, thuhet në qëndrimet e BE-së.

Nga Brukseli, Kosovës i ëshët bërë me dije se sundimi i ligjit është parim themelor i Bashkimit Evropian.

Po ashtu, BE kishte rikujtuar institucionet e Kosovës se procedurat arbitrare lidhur me arrestimin, ndalimin apo azilin janë kundër këtyre parimeve evropiane.

Sylejman Vokshi- luftëtari, strategu dhe diplomati i madh shqiptar

April 13, 2018 by dgreca

Nga Jahja LLUKA/

Vendlindja e njërit prej burrështetasve më të mëdhejnë shqiptarë të shek.XIX ishte Gjakova.Në histori njihet si themelues i veprës “Projekti i Ushtrisë Shqiptare” për tu bërë njëri nga strategët më të njohur dhe diplomat i arrirë në qarqet ndërkombëtare. Kur Napoleon Banaparta preku fundin e tij si perandor pas krijimit të” Lidhjes së Shejtë”ngjarjet tronditëse në kontinentin e lashtë reflektuan në perceptimin ndaj jetës për Sylejmanin.Fati i shumë popujve të Evropës shkruhej në vulën e gjakut dhe të barutit dhe për këtë Sylejmanin nuk e lente të qetë vuajtja e popullit të tij.Nga gjithë këto ngjarje të pandërprera që kapluan kohën e tij, ai kishte një qëllim të vetëm ruajtjen e kombit shqiptarë nga zhdukja pasi që Rusia dhe Turqia ende ishin superfuqi dhe bënin kalkulime mbi kokat e shqiptarëve. Në moshë shumë të re bëhet pjesë e Lëvizjes së Kallfëve, për të mbrojtur jetën dhe dinjitetin e njerëzve të thjeshtë,për të vazhduar pastaj me aktivitetin kundër shfrytëzimit dhe shtypjes që i bëhej popullit shqiptar nga pushteti qendror Osman, me mbështetjen e Fuqive të Mëdha. Reformat e përcaktuara nga pushteti Osman nuk njihnin asnjë të drejtë fetare dhe kombëtare ndaj shqiptarëve,përkundrazi bënin ç’mos që t’i shkombëtarizonin ata.Për këtë gjë Sylejman Vokshi ishte aktiv në konfliktin shqiptaro-osman prej vitit 1839 e cila njihet si periudha e Tanzimatit. Lufta e tij e vazhdueshme kishte një qëllim të vetëm, bashkimin e të gjitha trojeve shqiptare në një shtet autonom të vetëm. Qëndresa e tij e palodhshme e bëri Vokshin një ndër personalitetet më të mëdha jo vetëm ndër shqiptarë por edhe më gjërë. Kështu Kriza Lindore dhe Traktati i Shën Stefanit bënë që Vokshi me atdhetarët tjerë shqiptarë të nisin krijimin e Lidhjes Shqiptare të Prizrenit, organizatë me karakter mbarëkombëtar në rrafshin, ushtarak,politik, pushtetor dhe kulturo-arsimor. Ç ështjen e shtetit shqiptar autonom si dhe kërkesat e saj Lidhja e Prizrenit përveç Portës së Lartë të sulltanit, i shtroi edhe para Kongresit botëror në Berlin ku merrete pjesë gjithë diplomacia ndërkombëtare. Në luftën e tij të pakompromis ndaj forcave feudale çifligare dhe Lidhjes së Myslimanëve të Vërtetë a Fraksionit të sulltanit, Partisë së Portës, në Kuvendin e Përgjithshëm Kombëtar të Lidhjes në Prizren Sylejman Vokshi nuk ndaloi. Ky konflikt i hapur e i pakompromis, çoi në vrasjen e prijësit Abdullah pashë Drenit dhe të mareshalit Mehmet Ali pashë Maxharri, misionar i sulltanit, që kishte ardhur të vinte në jetë vendimet e padrejta të Kongresit të Berlinit për cungimin e viseve shqiptare. Fraksionit të sulltanit, Partisë së Portës, në Kuvendin e Përgjithshëm Kombëtar të Lidhjes në Prizren Sylejman Vokshi nuk ndaloi. Ky konflikt i hapur e i pakompromis, çoi në vrasjen e prijësit Abdullah pashë Drenit dhe të mareshalit Mehmet Ali pashë Maxharri, misionar i sulltanit, që kishte ardhur të vinte në jetë vendimet e padrejta të Kongresit të Berlinit për cungimin e viseve shqiptare. Veç tjerash dhe në luftën ndaj malazezëve në Plavë dhe Guci, Hot e Grudë u vunë në pah aftësitë luftarake dhe komanduese të Sylejman Vokshit me trimat tjerë shqiptarë. Si hartues i veprës “Projekt i Ushtrisë Shqiptare”, burrat e Lidhjes së Re e zgjodhën shef të Seksionit Ushtarak me cilësinë e Ministrit të Mbrojtjes e të Kryekomandantit të Ushtrisë. Figura e tij mbetet madhështore duke i dhënë lavdinë dhe sa ishte gjallë.Sa ishte Vokshi Malësia e Gjakovës u shndërrua në kështjellë të pathyeshme për armikun. Përpjekjet e tij për ruajtjen dhe zhvillimin e kulturës kombëtare dhe gjuhës shqipe shënojnë një kthesë historike, ai shkollën shqipe e shihte si tempull të formimit e të edukimit atdhetar. Vepra e tij i takon përjetësisë duke u bërë frymëzim për brezat.