Rezoluta e 11 kongresmenëve amerikanë

March 18, 2017 by dgreca

Rezoluta e 11 kongresmenëve – Alarmi i SHBA: Zgjedhjet në Shqipëri të rrezikuara nga ndikimi i Rusisë/

Qeveria e Vladimir Putin ka për qëllim të influencojë zgjedhjet në të gjithë Europën. Shqetësimi vjen nga Shtetet e Bashkuara dhe nga ky risk nuk shpëton as Shqipëria.Rezultati i zgjedhjeve parlamentare mund të ndikohet nga sulmet kibernetike dhe fushata propagandistike e Rusisë.Nisur nga akuzat e përfshirjes së Rusisë në procesin zgjedhor amerikan, por edhe në disa shtete të tjera, 11 kongresmenë republikanë në Shtetet e Bashkuara, kanë depozituar në Dhomën e Kongresit një rezolutë, ku kërkohet ndalimi i menjëhershëm i përfshirjes së Rusisë në këto fushata si dhe vendosjen e sanksioneve nga Amerika, ndaj personave përgjegjës.Në dokumentin prej 4 faqesh, kongresmenët listojnë rastet, kur disa shtete nëpërmjet agjencive të inteligjencës apo institucioneve të tjera, kanë denoncuar sulme kibernetike apo kanë zbuluar hakera rusë, të cilët kanë tentuar të marrin, por edhe kanë marrë në kontroll disa servera të rëndësishëm, duke ndikuar në procesin zgjedhor.

Një tjetër shqetësim i ngritur prej tyre, është dhe përhapja e lajmeve të rreme nëpërmjet rrjeteve sociale, por edhe dy agjencitë e lajmeve ruse “Russia Today” apo “Sputnik News” gjatë periudhës së referendumit në Mbretërinë e Bashkuar për daljen e saj nga Bashkimi Europian.

Kongresemenët kërkojnë që në kohën kur Shqipëria, Franca, Gjermania, Serbia, por dhe disa shtete të tjera kanë të planifikuara të mbajnë zgjedhje të përgjithshme, lokale apo presidenciale gjatë këtij viti, Federata Ruse është angazhuar në një fushatë të gjerë sulmesh kibernetike dhe dezinformimi për të influencuar politikën dhe zgjedhjet në të gjithë Europën.

“Zyrtarët rusë, thuhet ne rezolute, kanë shprehur dëshirën e tyre për të ndarë NATO-n, dobësuar institucionet demokratike dhe mbështetur ekstremiste, kandidatët pro-Moskës në të gjithë Europën”.

Për këtë arsye, kërkohet që Rusia të ndërpresë menjëherë të gjitha sulmet kibernetike që kanë në shënjestër qeveritë europiane, partitë politike, zyrtarët e qeverisë, subjektet zgjedhore dhe sistemet informuese publike.

Dëshnicarët, me zemër dhe shpirt atdhetar

March 18, 2017 by dgreca

LETER PER EDITORIN E DIELLIT/:

Përshëndetje zoti kryeredaktor ! Të falenderoj shumë për impenjimin dhe përpjekjet e vazhdueshme në promovimin dhe ruajtjen e vlerave pozitive të shqiptarëve emigrantë në Amerikë, që nga më të hershmit e deri te më të vonët. Meritë keni edhe për publikimin dhe pasurimin, me rubrika të ndryshme të jetës dhe veprave të tyre nga shoqata “VATRA”, nëpërmjet faqeve të gazetës “Dielli”, të cilën e drejtoni me kompetencë e profesionalizëm, i vetmi burim informacioni që kemi ne këtu në Shqipëri. Personalisht të jam mirënjohës, sepse nëpërmjet Jush arrita të njihem me fakte të panjohura, që gjyshi im, Çoban Malushi, ka qenë anëtar i degës numër 19 “VATRA” që në themelim të saj, më 23 janar 1913, i treti nga e majta në rreshtin e dytë dhe po ashtu në fushatën e 3 qershorit 1917 ka dhënë ndihmesë me 10 dollarë. Kjo më ka nxitur prej kohësh për të bërë një shkrim, gjë vendosa ta realizoj me rastin e 100 vjetorit të fushatës së shoqatës “VATRA”. Në se e gjykoni se mund të botohet,do të të falenderoja së tepërmi.

Me shumë respekt, miqësisht nga Tirana, Petrit Malushi

Dëshnicarët, me zemër dhe shpirt atdhetar/

1 Petrit malushi

Nga Petrit Malushi/

Eshtë vështirë, thuajse në çdo rast kur dikush rastësisht apo jo rastësisht, tek shpreh mendim e opinion për përmetarët brenda të cilëve përfshihen edhe dëshnicarët, të mos flasë me konsiderata dhe admirim për cilësitë dhe vetitë e tyre. Dhe kjo ndodh fare natyrshëm, pa asnjë lloj imponimi, duke pohuar një të vërtetë të prekshme, nëse punon me një përmetar e dëshnicar, e ke koleg, je fqinjë me të, ke pirë një kafe, e ke mik, apo qoftë edhe kur ke bërë bisedë pak minuta, sa për të pirë një cigare. Banorët e Përmetit dhe të zonës së Dëshnicës, ndër vetitë e shumta të shkëlqyera dhe pozitive si mikpritja, shpirti i pastër, zemërgjerësia, humanizmi, toleranca, arsimdashja, harmonia fetare kanë të ngjizur edhe atdhetarizmin e patriotizmin.

Baza e kultivimit të këtyre vetive, zakoneve dhe veseve kanë qenë dhe janë familjet përmetare e dëshnicare me traditat e kulturën e asaj zone, që i përcjellin ato brez pas brezi, prej më të moshuarëve tek më të rinjtë dhe i mbartin me vete kudo që shkojnë, brenda Shqipërisë dhe jashtë saj. Historia është e mbushur me plot shembuj të kësaj natyre, që nga kohët më të hershme. Për ilustrim mjafton të përmendet demostrimi i tyre gjatë Rilindjes, para dhe pas shpalljes së Pavarësisë, në Luftën e Parë Botërore, në vitet pas saj, gjatë Luftës së Dytë Botërore, në periudhën e socializmit apo në vitet e tranzicionit. Në fakt kjo është një temë që asnjëherë nuk shteron dhe nuk mund të thuhet se është thënë gjithëçka. Mund të shkruhen vëllime e seri pa mbarim librash historie, autobiografie, monografi, romane,novela, tregime, vjersha, drama e sërish dalin fakte e ngjarje të reja, pasi përmetarë e dëshnicarë gjen në çdo qytet të Shqipërisë dhe në çdo shtet të botës, e ata kudo lënë gjurmë për mirë e jo për keq.
Fakte që i ruan historia
Por shkak për këtë shkrim u bë afrimi i 100 vjetorit të Fushatës së Shoqërisë Patriotike „VATRA“ në Amerikë për mledhjen e ndihmave financiare në mbështeje të politikës për mbrojtjen e çështjes shqiptare në arenën ndërkombëtare, pasi shteti i ri shqiptar ishte i pafuqishëm. Saktësisht nxitësi i drejtëpërdrejtë ishte miku dhe shoku im i ngushtë, shrimtari dhe publicisti përmetar e dëshnicar, Nuri Dragoj, të cilin mbase nuk gaboj nëse shprehem se nuk ka përmetar që s´e njeh. Duke u kthyer te tema e shkrimit, vlen të theksohet se pikërisht para 100 vitesh, në vitin 1917, më 3 qershor „VATRA“ çeli fushatën me synimin e lartpërmendur, në mbarë Amerikën, ku kishte emigrantë shqiptarë, të cilët u treguan të gatshëm për të kontribuar me sa të mundnin. Natyrisht të shumtë ishin edhe përmetarët e dëshnicarët. Për të qenë sa më konkret për lexuesit e këtij shkrimi, po japim fragmente të botuara dhe të ribotuara të atij viti për këtë ngjarjeje historike me peshë kombëtare. Kështu gazeta “Dielli” e datës 30 qershor 2014, me autor Dalip Grecën, ka hedhur në faqet e saj artikullin e gazetës “Dielli“ të datës 3 qershor 1917, ku shkruhet për fushatën e Vatrës për shpëtimin e Shqipërisë, të shoqëruar edhe me një listë me emra të ndihmëtarëve vatranë për shpëtimin e Shqipërisë, fushatë që nisi pikërisht më 3 Qershor 1917.“ Fushata i parapriu,-risjell në këtë shkrim kryeredaktori Dalip Greca,- Konferencës së Paqes ku çështja shqiptare dhe Pavarësia e shtetit do të ishin në qendër të debateve, me oreksin e shtuar të fqinjëve tanë për t´i rrëmbyer copa të tjera Shqipërisë Londineze. Vatra kishte marrë përsipër që të mbronte të drejtat e shetit shqiptar inekzistent gjatë luftës dhe kishte vendosur përfaqësuesit diplomatikë në Angli-Londër, Zvicër, Uashington etj të cilat i paguante me shpenzimet e saj. Ambasadori Mehmet Konica në Londër dhe dr. Mihal Turtulli në Zvicër ishin ndër më aktivët. Nga raportet e Mehmet Konicës prej Londre shihej rreziku i coptimit të Shqipërisë që gjatë luftës ishte e okupuar. Kush do t´i dilte për Zot Shqipërisë? Qeveria Shqiptare nuk egzistonte. Kolonitë Shqiptare me përjashtim të Vatrës, ishin të paralizuara për arsye të luftës. Barra i ra Vatrës që kishte mbetur i vetmi zë për shpëtimin e Atdheut. Shqiptarët, punëtorë të Amerikës, që ishin mbledhur rreth Vatrës, e vlerësuan jo barrë, por detyrë të shenjtë daljen zot të Atdheut. Për të përballuar shpenzimet e mëdha që nevojiteshin për këtë ndërmarrje kombëtare, nuk mjaftonin mijëra dollarë, por duheshin qindra mijëra. Atë kohë një punëtor i mirë merrte 8-9 dollarë në javë. Si do të grumbulloheshin qindar mijëra? Po familjeve që kishin në Shqipëri, çfarë do t´u dërgonin? Sipas llogarive duke futur dhe frymën kombëtare si faktor inspirues, udhëheqësit e Vatrës, ia nisën fushatës duke synuar që së paku të mblidhnin 40 deri 50 mijë dollarë”. Ditën që Vatra e hapi fushatën “ Për shpëtimin e Shqipërisë”, më 3 Qershor 1917, Noli dha kushtrimin me poezinë e famshme “ Jepni për Nënën”. Me shpenzimet e “VATRES” u mbajtën delegatët, u dërguan misione, u organizua mbrojtja e Shqipërisë. Sipas Konicës shpenzimet e bëra që nga fillimi i aktiviteteve e deri në vitin 1922 arritën shifrën 197.072.89 dollarë. Në atë shkrim jepen edhe emrat e shteteve dhe vendeve të Amerikës ku ndodheshin dhe punonin emigrantët shqiptarë, anëtarë të “VATRES”, që dhanë ndihma financiare si : LAUSANE, SVICRE; MANCHESTER.N.H; ROKLAND,ME; ASHTABULLA,OHIO; ËARREN,MAS; HATHORREN.MASS; MAYNARD.MASS; E.MILLINOCKET.ME; GARDNER.MASS; LEAVEËORTH.KANSAS; ËESTER.OHIO; AUGUSTA.ME; NILES.O; ROCLAND.ME; DUNKIRK N.Y; BANKOR.ME; ËATERVILLE.ME; MADISON.ILLYNOIS; MINOA.N.Y; SYRACUSE.N.Y; HAVERHILL. MASS; GLENDIVE.MONTANA; SANFORD-SPRINVALE.ME; BATH.ME; MECHANICVILLE.CONN; CONCORD.NH;LYNN.MASS; Sipas mundësive kontributet kanë qenë nga 1,2,3,4,5,6,7,8,9,10,15,20 e deri në shifra 1000 dollarë, shifër kjo e shënuar nga Dr. Mihal Turtulli. Shpirti patriotik dhe ndjenjat atdhetare për fatet e Shqipërisë vlonin edhe te emigrantët dëshnicarë e përmetarë. Edhe pse dollarët fitoheshin me vështirësi dhe ata punonin në punë mjaftë të rënda, kishte prej tyre që dhanë fitimet e një jave pune. Midis emrave të shumtë që përmenden në atë shkrim një numër i madh janë përmetarë e dëshnicarë. Ja disa prej tyre: Qani M.Gostivishti, Mehmed H.Gostivishti, Hasbi T. Podgorani, Tefik Ramis Pavari, Sefer Ali Podgorani, Hysen Jemin Podgorani, Myrto Alush Podgorani, Hamit Airedin Podgorani, Dule Sherif Podgorani, Mehmed Zenel Malëshova, Spiro M. Naska Leusa, Peneleon M. Postenani, Athanas Buçka Lashova, Qirjako Bojaxhi Lashova, Themistokli Duhani, Sotir Anesti Lashova, Lambi D. Çarshova, Lazar Botzi Çarshova, Vangjel Petridi Peshtani, Konstandin Dhimitri Trebicka, Adem Dane Maxhanji, Muhamet Qazim Podgorani, Maksut Ali Ribanji, Sefer Ymer Çoroguni, Vëll. Mato Trebicka, Vëll. Nikolla Trebicka, Brahim Hysen Potgorani, Lici Petro Trebicka, Hari Apostol Trebicka, Zonjusha Theodora Adams, Sulejman Hysen Xhananji, Qazim Isa Fratari, Çoban Malush Leskoveci, Hasan Hamet Tolari, Murat Isuf Tolari, Veli Shaban Potgorani, Bakush Zenel Çoroguni, Hasan Isuf Potgorani, Nexhip A. Bënja, Muharem Hasan Maxhani, Haxhi Myslim Këlcyra, Xhemal Adem Tolari, Alim Shem Badlonja, Husen Muharem Ribani, Agush Mecan Senicani, Rusten Vakush Zhepova, Myslym Duli Zhepova, Kalem Adem Senicani, Sadik Rakip Bedyqasi, Dine Kamber Çoroguni, Sherif Sejat Seniçani, Kamber Islam Senicani, Guri D. Opingari, Thimi Angel Odriçani, Zonja Vana K.Ogreni, Kostaq M. Ogreni, Zonjusha Tefta K. Ogreni, Apostol L. Bënja, Gaqi P. Novosela, Loni S. Naum, Hasan Myslim, Qamil Kamber Çoroguni, Qenan Duro Panariti, Hasim Panariti, Ibrush Mehmet Panariti, Riza Teme Panariti, Nail Banush Përmeti,Vait Bakush Përmeti, Xhafer Asllan Panariti, Daman Xhemal Përmeti, Bajram Brahim Përmeti, Hamza Gani Përmeti, Bajram Hajdar Panariti, Abas Jaup Panariti, Sefer Zyla Panariti, Xhemal Oran Panariti, Deme Muke Panariti, Xhelo Sherif Panariti, Nuredin Elmas Panariti, Kamber Rakip Panariti, Safet Xhemal Përmeti, Karafil Shaban Përmeti, Jonus Seran Panariti, Kaçi Latif Panariti, Hasan Jaup Panariti, Refat Tair Panariti, Liço Rahman Panariti, Sabri Frashëri, Faslli Teme Panariti, Banush Feta Përmeti, Abdulla Ahmet Përmeti, Çerciz Osman Miçani, Rakip Ali Panariti, Muhamet Nuredin Frashëri, Riza Mehmet Përmeti, etj. Por ishte puna intensive dhe e palodhur e shoqërisë“VATRA” , themeluar qysh më 28 prill të vitit 1912, që arriti të sensibilizojë çdo shqiptar të Amerikës.
Federata Pan-Shqiptare e Amerikës “VATRA”
Themelimi i “VATRES” erdhi si domosdoshmëri historike në funksion të çështes kombëtare, menjëherë pas formimit të shtetit të ri shqiptar. Pas shumë takimesh e negociatash midis tyre, shqiptarët e Amerikës ngarkuan komisionin e bashkimit, në përbërje të të cilit ishin : Fan S. Noli, Faik Konica, Kristo Floqi, Paskal Aleksi dhe delegatët e shoqërive : Elio Tromara, Llambi Çikozi, Kristo Kirka, Kosta Vasili dhe Kosta Kota, që të merrej me hapat e mëtejshëm. Kështu më 23 mars 1912 u organizua mbledhja e parë, ku u qartësua qëllimi i shoqërisë. Mbledhja e dytë u mbajt më 24 mars 1912 , në të cilën u diskutua organi i shtypit që do të përdorej nga shoqata, ndërsa mbledhja e tretë më 31 mars 1912, dhe në të u vendos emri i shoqatës. Pas këtyre tri mbledhjeve të rëndësishme, ku u trajtuan të gjitha problemet, pasi mbledhje të tjera të zakonshme ishin mbajtur edhe në datat 15,17 e 22 mars, më datën 28 prill 1912, në Boston u themelua shoqëria “VATRA”, që u quajt Federata Pan-Shqiptare e Amerikës. Më datën 13 qershor 1912 ajo u njoh zyrtarisht edhe nga institucionet ligjore të shtetit amerikan. Shoqëritë shqiptare që u mblodhën për themelimin e VATRES, me përfaqësuesit e tyre ishin : “Besa-Besën”, në Boston, “Kombëtarja”, në Ëorchester, “Flamuri i Krujës”, në Boston, “Mirëbërësja”, në Sarakusit, dhe “Skënderbeu” në Gorry Jani. Menjëherë pas mbledhjes themeluese “VATRA” krijoj degët e saj, numri I të cilave arriti mbi 65, kudo ku kishte emigrantë shqiptarë në Amerikë. Dega numër 1 u krijua në Boston, më 12 maj 1912, dega nr. 2 në Lyn Mass, më 26 maj 1912, dega nr.3 në Peobody Mass, më 30 korrik 1912, dega nr. 4 në Manchester N.H më 2 qershor 1912, dega nr. 5 në Ëarchester Mass më 19 maj 1912 dhe Tauntan Mass më 2 qershor 1912, dega nr. 6 në Leëiston Maine më 28 qershor 1912, dega nr. 7 në Bidefford-Saco më 16 qershor 1912, dega nr. 8 në South Framinghom Mass më 19 maj 1912 dhe Brocton Mass më 19 qershor 1912, dega nr.9 në Hudson – Marboro Mass më 26 maj 1912, dega nr. 10 në Southbridge, Mass më 16 qershor 1912 e kështu me radhë edhe degët e tjera.
Përmetarët dhe dëshnicarët anëtarë të “VATRES”
Natyrisht edhe emigrantët e fshatrave të Dëshnicës së Përmetit e mirëpritën këtë fakt dhe të gjithë u bënë pjesë e degëve të kësaj shoqërie patriotike duke e mbeshtetur atë shpirtërisht, moralisht e financiarisht. Falë dokumenteve të kohës në Amerikë, organeve drejtuese të shoqatës “VATRA”, të zgjedhurve në këto organe, arkivit të pasur, të plotë dhe të qartë e të saktë, gazetës “Dielli” , organ I kësaj shoqate që nga themelimi e deri në ditët e sotme, drejtorëve, kryeredaktorëve dhe redaktorëve të saj, me nivel sipëror profesional, pasionant e ndjenja kombëtare, edhe pse ka kaluar mbi një shekull, gjithëçka është ruajtur e freskët pa lënë pluhurin e viteve të mbulojë asgjë. Dhe emrat e mbiemrat e vatranëve patriotë dëshnicarë, shpesh të shoqëruar edhe nga emrat e fshatrave si simbolikë e moshumbjes së identitetit të tyre, janë të pranishëm kudo, në të gjitha degët. Deri tani na kanë rënë në dorë disa dokumente për themelimin e degës numër 19, të cilat po i botojmë në këtë shkrim.
Dega nr.19 e “VATRES”, vetëm dëshnicarë
Duke lexuar materialet e disponueshme për formimin e degës së “VATRES” me numër 19, vëren se më të shumtët janë dëshnicarë. Për konkretizim të kësaj, po botojmë një pjesë të dokumenteve të asaj kohe, ku tregohet themelimi i degës nr.19 të VATRES, më 23 janar 1913 në Concord, Neë Hampshirë, shoqëruar me fotografi dhe me disa prej emrave, që identifikohen lehtësisht se janë nga : Maxhanji, Podgorani, Ribanji, Corgunji, Xhananji, Fratari, Leskoveci, Tolari, Bënja, Këlcyra, Senicani, Badlonja etj. Ja si pasqyrohet ky fakt në dokumentet dhe shtypin e kohës në Amerikë, për themelimin, anëtarët e kryesisë dhe anëtarët e thjeshtë. “Më 26 janar, 1913, u themelua Dega No. 19 e Federatës PanShqiptare të Amerikës VATRA, në Concord, Neë Hampshirë. Kryesia e kësaj dege përbëhej nga :Kryetar Z.Sotir V.Katundi, sekretar Z.Spiro N.Goroshjani, arkëtar Z.Kostandin D.Trebicka, kontrollorë Z. Vangjel N.Trebicka, Asllan Maksut Tolari dhe Zenel Adem Ribani. Disa nga anëtarët e kësaj dege janë : Kostandin Dhimitri Trebicka, Adem Dane Maxhanji, Muhamet Qazim Podgorani, Maksut Ali Ribanji, Sefer Ymer Çorogunji, Vëll. Mato Trebicka, Vëll Nikolla Trebicka, Brahim Hysen Potgorani, Sulejman Hysen Xhananji, Qazim Isa Fratari, Çoban Malush Leskoveci (i treti nga e majta, në reshtin e dytë), Hasan Hamet Tolari, Veli Shaban Ribanji, Xhafer Qazim Potgorani, Bakush Zenel Çoroguni, Islam Ramadan Çoroguni , Nexhip A. Bënja, Muharem Hasan Maxhani, Haxhi Myslim Këlcyra, Xhemal Adem Tolari, Alim Shem Badlonja, Husen Muharrem Ribani, Agush Meçan Seniçani”. Shpresojmë që me këtë shkrim, duke shfrytëzuar materialet e pakëta që na kanë rënë në dorë, të kemi evokuar sado pak vlerat me pozitive të përmetarëve dhe dëshnicarëve, vecanërisht ato atdhetare dhe patriotike.

Sulm terrorist në Aeroportin e Parisit

March 18, 2017 by dgreca

Një i vdekur pas shkëmbimit të zjarrit në Paris,Policia evakuoi 3000 persona/

Në aeroportin e Parisit, Orly një person u qëllua për vdekje nga policia pasi i rrëmbeu armën një ushtareje. Prokuroria e Përgjithshme Franceze filloi hetimet për terrorizëm.

Sipas agjencisë së lajmeve, AFP që bazohet në burime të Ministrisë së Brendshme franceze sulmuesi sulmoi një ushtare për t’i rrëmbyer armën, ai u fut në një dyqan në aeroportin e Orlys, por në fund ai u qëllua për vdekje nga forcat e sigurisë. Ministri i Brendshëm, Bruno Le Roux u shpreh, se personi nuk ia kishte dalë të kishte në zotërim armën.

Le Roux bëri të ditur, se ky person pak orë më parë në një kontroll rutinë të policisë në Stains, kishte qëlluar kundrejt një polici duke e plagosur lehtë. Sipas të dhënave të policisë, autori vjen nga qarqet radikale myslimane. Në aksionin policor në aeroportin Orly nuk pati lëndime personash të tjerë. Policia evakuoi 3000 persona për arsye sigurie, ndërkohë që trafiku ajror u bllokua, dhe fluturimet janë transferuar në aeroportin Charles de Gaulle. Prokuroria e Përgjithshme franceze filloi hetimet. Orly, aeroporti i dytë më i madh i Parisit, ka qenë shpesh objekt sulmesh.

Koleksioni Marubi ekspozohet në Stamford

March 18, 2017 by dgreca

Ekspozitë në SHBA me fotografi nga koleksioni Marubi/

Në Stamford të shtetit Connecticut u hap mbrëmjen e së premtes një ekspozitë me dhjetra fotografi nga koleksioni i famshëm Marubi, të sjella nga muzeu me të njëjtin emër në Shkodër, njofton Zëri i Amerikës. Për herë të parë, artdashësit amerikanë dhe komuniteti shqiptar në SHBA kanë rastin të shijojnë nga afër fotografi bardhë e zi të cilësisë së lartë, që pasqyrojnë një kujtesë të rrallë vizuale të identitetit shqiptar.

BIZNESMENI VATRAN

March 18, 2017 by dgreca

Njihuni me Piro Poloskën, biznesmenin dhe atdhetarin e palodhur të VATRES në Tampa/

Ne Foto: Piro Poloska/2- Dega e Vatrës në Tampa/3- Me kryetarin e Vatrës, dr. Gjon Bucaj 4-Pershendet ne feste Piro Poloska/ 5- Vatranet e deges se Tampes/

NGA FADIL SHEHU-FLORIDA/

Midis virtyteve më thelbësore që ka në gjak,dhe shoqëron gjatë gjithë jetës së tij shqiptarin, padyshim spikatin: thjeshtësia, njerëzorja,mikpritja.Gjithësesi nuk ka se si te ndodh e ndryshe, kur përballesh me drejtuesit e degës “Vatra“ Tampa Bay në Florida, të cilët me ngrohtësinë e tyre, të ofrojnë zemrën.Këto cilësi të vyera në çdo kohë e situatë, i gjen tek ata që drejtojnë e mbajnë të ndezur zjarrin e kësaj vatre, idealet e çmuara atdhetare. Padyshim në angazhime dhe përkushtime të tilla, midis atyre që njihen për devotshmëri dhe përkushtim, spikat intelektuali,njeriu që me thjeshtësinë e tij ofron fjalën e gdhendur, fjalën e dashur dhe të ngrohtë, biznesmeni i sukseseshëm, patrioti dhe një nga themeluesit e degës Vatra në Tampa bay,Piro Poloska. I lindur në fshatin Pendavinj të fushës së Korçës, ku si në një valle të bukur devolliçe, shfaqen zënë dorë për dore, me madhështinë dhe hijeshinë e tyre fshatrat e kësaj zone kaq të njohur për njerëzit punëtorë dhe të kulturuar.

Që fëmijë,te djaloshi bjond me sy të kaltër që i picërinin për natyrën e bukur,rritej dashuria dhe kërshërija për të njohur të panjohurat e natyrës që e rrethonte. Shkollën tetëvjeçare e kreu në vendlindje me rezultate të shkëlqyera. Më pas i duhej që po me atë pasion, ti përkushtohej vazhdimit të shkollës së mesme të përgjithëshme,ku pasioni i tij per dijen e bëri që të përfundonte gjimnazin me notën mesatare 10, duke u cilësuar ndër nxënësit më të talentuar të shkollës.

Mbas mbarimit të shkollës së mesme, Piro vazhdoi studimet në Universitetin “Eqerem Cabej” Gjirokaster. Ky qytet i gurte jugor, me arkitekturen dhe njerezit e tij, u be strehe e enderave te tij rinore. Vendi ku ai, tashmë një djalosh i ri me energjinë dhe pasionin e moshës iu përkushtua studimeve në fushën a Matematikës dhe Fizikës. Edhe këtu puna dhe pasioni që e karakterizon dhanë frytet e tyre. Me rezultatet e aritura, Piro u evidentua si një nga studentët më të mirë të Universitetit dhe njëkohësisht spikati aftësia e tij organizative dhe e lidershipit në komunitetin e universitetit.

Për arësye të centralizimit partiak në emërimin e kuadrit, Piro e fillon karierën, larg vendlindjes së tij, në një trevë dhe qytet ndryshe nga Korça, mësues i Fizikës në shkollën e mesme të përgjithshme “Shefqet Guzi” të qytetit të Gramshit.

Në harkun kohor gjatë qëndrimit të tij nëntë vjeçar në këtë qytet,ai arrin të vazhdoje studimet pasuniversitare në Universitetin e Tiranës, Fakulteti i Shkencave Natyrore , ku mbron me sukses Masterin në Fizikë. Paralelisht me këtë ai punonte në drejtim të mbrojtjes së Disertacionit shkencor në Fizikë, duke kaluar me sukses provimin Pasuniversitar të gjuhës Ruse dhe filozofisë, si pjesë e këtij disertacioni.

Për të, nuk kishtë rëndësi fakti se ku jetonte dhe shërbente.Të rëndësishëm ishin njerëzit e dashur dhe të respektuar të këtij qyteti, nxënësit të cilëve u jepte dritën e diturisë dhe që i jepnin më shumë kuptim jetës së tij.

Si përherë me buzëqeshjen e tij,të çelur çdo çast në buzë,me mallin dhe nostalgjinë e një kohe të shkuar, Piro tregon: “Nuk e harrroj kurrë respektin, fjalët e ngrohta të njerëzve të mirë të këtij qyteti

tepër të dashur për mua, që zë një vend të rëndësishëm në formimin tim profesional. Ky qytet u bë shtëpia ime e dytë.” Vitet e qëndrimit në këtë qytet të dashur,bënë që Piro të njihej nga afër me jetën e vërtetë të njerëzve të thjeshtë, të prekte nga afër gëzimet dhe shqetësimet e tyre,çka bënte që ai të lidhej më fort me ta dhe të mbetej një njeri i dashur, i respektuar dhe i besuar mes tyre.

Ishte koha kur brënda vetes nisi të trokiste e ardhmja e tij si familjar.

Në këtë ambjent intelektual, Piro pati fatin të njihej me mësuesen e re të letërsisë të emëruar në atë shkollë, me vajzën e bukur Korçare, të urtë, të çiltër dhe inteligjente Arjana Filipi, mbesa e aktorit të shquar të skenës dhe filmit shqiptar, ”Artist i Popullit” Thimi Filipi. Rrugët e tyre të jetës qenë takuar tashmë dhe qenë bashkuar nga dashurija e tyre për tu bërë një , dhe për të vazhduar kështu përgjithmonë. Fryti i parë i dashurisë së tyre ishte ardhja në jetë e fëmijës së parë, djalit Aris. Ky qytet,padyshim edhe sot mbetet ndër vendet më të dashura për çiftin korçar Piro dhe Ariana Poloska.

Pas afro një dekade në qytetin e Gramshit,Piro rikethehet sërish në strehëzën e tij të vjetër,në Korçë.Kthimi në qytetin e Korçës e gëzoi çiftin e ri me ardhjen në jetë të vajzës së tyre Tea, e cila padyshim sillte një dimension tjetër dhe një gëzim i ri në familjen Poloska.

Eksperienca e tij si mësimdhënës,kualifikimi profesional, Disertacioni dhe mbrojtja e Masterit, kishin bërë që Piro të akumulonte vlera të spikatura në fushën e edukimit, të cilat do i shfaqte me shumë kompetencë më pas.Puna e tij frutdhënëse,cilësitë e tij të admirueshme si njeri me temperament të qetë,kembëngulës në atë që kërkon të arije të realizoje, aftësitë organizative, spikatën në punën e tij katër vjeçare si drejtor i shkollës së mesme të bashkuar të komunës së Pojanit, dhe më pas për tre vjet si nëndrejtor i shkollës tetë vjeçare “Sotir Gurra”në qytetin e Korçës.

Në pranverën e vitit 1999,kur lulet në degët e pemëve sapo kishin nisur të çelnin, Piro merr lajmin se kishte fituar familjarisht llotarinë Amerikane të Green Card.Një portë e re po hapej në jetën e kësaj familje. E priste tempulli i lirisë, vendi i shanseve dhe shpresave të mëdha për të gjithë, Amerika.Kurrësesi,largimi nga familja,nxënësit,miqtë dhe shokët…nga Korça plakë, Korça nuse,nuk do të ishte i lehtë.

Piro po linte mes tyre 39 vjetet me te bukura të jetës së tij. Fluturon drejt Amerikës,të njohur veçse në libra,drejt një ëndrre të re drejt së panjohurës. Ankorohet fillimisht me familjen e tij pranë të afërmëve të tij në qytetin Dallas,Texas.

Mosnjohja në nivele të kënaqëshme e gjuhës angleze,ndihma finanaciare e pa mjaftueshme,motivon Piron dhe bashkëshorten e tij Ariana të përveshin “mëngët”,në punën e tyre të re pa naze apo pretendime duke punuar vetë si kamarier në një nga restorantet e qytetit, kurse bashkëshortja Ariana si shitëse në një supermarket. Krahas punës,ai iu përkushtua prioritetit të asaj kohe, studimeve. Bashkë me bashkëshorten ata ndoqën një kurs intensiv njëvjeçar në Dallas Comunity Colege për mësimin e gjuhës Angleze. I prirur që më shumë flet me vepra se sa me fjalë,i shtyrë nga ne për të vazhduar rrëfimin e episodeve të veçanta të jetës se tij,Piro shton se:“Ardhja ime këtu në Florida konsistoi me një ftesë për të vizituar Floridën.

Të them të drejtën, Florida më befasoi me ngrohtësinë e saj, me detin dhe natyrën e mrekullueshme. Duke qëndruar si vizitorë dhe duke u bërë pjesë e kësaj jete për për disa ditë, u dashuruam me Floridën dhe nuk e bëmë të gjatë.Morëm vendim të transeferoheshim këtu.

Për afro dy vjet punova në nje kompani te prodhimit të paisjeve kompjuterike në Saint Petersburg.Rrethin e tij familjar e zgjeroi edhe ardhja e familjes së të vëllait Thimaq në atë kohë. Në përsosje të mëtejshme të kualifikimit të tij profesional,ai sërish guxon për të bërë më të mirën e mundëshme për të nesërmen.

Arrin të realizoje ekuivalentimin e diplomës të marrë në Shqipëri, dha provimet plotësuese ,duke marrë diplomë ekuivalente dhe duke aritë standartet e licensimit në Mësimdhënien e Matematikës në shtetin e Floridës.Kjo i hapi rrugën për të punuar si mësues në Pinellas Co School Board duke iu kthyher në këtë mënyrë profesionit te tij të vjetër, mësimdhënies. Në procesin e blerjes së shtëpisë së tij në Largo,Piro pati rastin të njihej me mekanizmat fillestare të transaksioneve të shtëpive të banimit dhe pasurive të tjera të palujtëshme. Ky ishte një zbulim dhe pasion i ri për të. E tërhoqi sidomos fakti që do kishte shumë më tepër mundësi për të qenë më pranë njerëzve. Nisi kështu të merrte krahë një ëndër dhe karierë e re. Pas licensimit si Real Estate Agent, punoi për një kohë të shkurtër part time krahas mësimdhënies. Nuk u desh shumë kohë, që në vitin 2003 të kalonte si Realtor (Agent Imobilar) me kohë të plotë.

Puna e tij e re i dha kënaqësinë e patjes së mundësisë tu asistojë njerëzve në një nga investimet më të mëdha financiare në jetën e shumicës së njerëzve, siç është shtëpia e banimit.Në veçanti duke punuar nga afër me emigrantët shqiptarë të ardhur në shtetin e Floridës gjatë viteve të fundit,nga Shqipëria,Kosova,Maqedonia,Mali i Zi. Asistenca e tij teknike, duke sqaruar dhe këshilluar njerëzit për detajet ndonjëherë të komplikuara të blerjes dhe shitjes të pasurive të palujtshme ka qenë një ndihmë e madhe sidomos për bashkëatdhetarët e sapoardhur dhe që për këtë arësye nuk kishin njohuritë dhe eksperiencën e mjaftueshme në këtë fushë. Piro drejton sot “The Poloska” Team, i përbërë nga një grup Realtors, expertë në fushën e shitjeve dhe blerjeve të shtëpive dhe bisneseve. Një dimension i ri i aktivitetit të këtij bisnesmeni të suksesshëm si investitor në pasuritë e paluejtëshme është edhe krijimi i kompanisë “Elite RE Investments Inc.” Djali i tij Aris që nuk ka shumë kohë që është diplomuar në Financë dhe Manaxhim bisnesi, është licensuar gjithashtu si Real Estate Agent dhe punon si Zv/President i kësaj kompanie, duke vazhduar në gjurmët e të atit dhe duke sjellë një frymë dhe energji të re në bisnes dhe njëkohësisht me ekspertizën e tij ka bërë të mundur që të shumëfishohet shifra multi miljonëshe e shumës së vlerës së shitjeve të kryera.

Bashkëshortja Ariana nuk ju nda pasionit të saj të vjetër të edukimit. Sot ajo manaxhon me shumë sukses bisnesin e saj në edukimin e fëmijëve parashkollorë. Vajza Tea, mbas diplomimit universitar në Shkencat Biomjekësore vashdon studimet pasuniversitare për tu bërë mjeke. Me siguri mundet të themi që ajo që ka aritur të realizojë kjo familje në këto vite është një shembull i vërtetë suksesi dhe i mundësive që ofron SHBA.

Portreti i këtij njeriu do të ishte i mangët, po të mos nënvizonim mirë kontributin e tij të veçantë në komunitet. Ai u është ndodhur njerëzve pranë në çdo nevojë, duke i ndihmuar jo vetëm me strehimin por edhe më tej, me çdo gjë që ka patur mundësi. Ndjenja e tij e fortë patriotike kombëtare është evidentuar më së miri gjatë gjithë kohës. Nuk është rastësi që Z Piro Poloska ishte pjestar i grupit nismëtar për krijimin e degës Vatra në Tampa Bay. Duke e mbështetur fuqishëm këtë nisëm dhe duke dhënë kontributin e tij modest në suksesin e kësaj shoqate si Anëtar i Këshillit Drejtues të saj. Çdo bashkëatdhetar që e ka njohur Piron, të flet për të me fjalë zemre dhe mirënjohje për kontributin e tij, për punën e tij të sinqertë, humanizmin e tij të spikatur si patriot i flaktë, intelektual, bisnesmen dhe Vatran i devotshëm.Janë pikërisht këto vlera që lartësojnë personalitetin e këtij njeriu të thjeshtë,të cilat ai i manifestoi me shumë pasion në hapjen e të parës shkollë shqipe një vit më parë,nga dega Vatra,në qytetin Clearwaternë shtetin e Florides.

Eshtë kjo shkollë,e cila falë përkushtimit të kryetarit të kësaj dege,Tasim Ruko, i mbështetur nga vatranët,beri te mundur që çdo shpenzim,madje dhe mësimi të jetë falas.Padyshim –thotë Piro,-suksesi i aritur na obligon për të punuar me më teper përkushtim dhe dinjitet për çështjen kombëtare në udhën e patjetërsuar që na ka dhënë Fan Noli ynë i madh, per te ruajtur dhe çuar me tej vlerat e atij standarti te larte te trasheguar nga ky vizionar i ralle. E thene shkurt dhe thjesht, ky është portreti i njeriut të mirë,intelektualit patriot,aktivistit të palodhur të degës Vatra në Tampa Bay- Florida,vatrani i nderuar nga të gjithë,Piro Poloska.