Kongresmeni Eliot Engel merr titullin qytetar nderi në Lezhë

September 1, 2016 by dgreca

“Qytetar Nderi” për kongresmenin Eliot Engel dhe “Mirënjohje e Qytetit” për shqiptaro-Amerikanin Harry Bajraktari ishin dy titujt e akorduar gjatë të enjtes nga Bashkia dhe Këshilli i bashkisë Lezhë.

Në ceremoni mori pjesë edhe ambasadori i SHBA në Shqipëri Donald Lu. Kongresmeni Eliot Engel e vlerësoi maksimalisht këtë titull dhe foli për vazhdimin e marrëdhënieve të mira mes Shqipërisë dhe SHBA, ndërsa Harry Bajraktari vuri në pah mbështetjen që Amerika i ka dhënë Shqipërisë e Kosovës ndër vite.

Në fjalën e rastit ambasadori Lu falenderoi qytetin e Lezhës për nderimin që iu bë zotit Engel, duke thënë se ai ka qenë një nga mbrojtësit më të mëdhenj të çështjes shqiptare në New York.

Kongresmeni Engel takime pune në Tiranë

September 1, 2016 by dgreca

Kongresmeni amerikan në vizitë pune. Takime me presidentin Bujar Nishani dhe kreun e opozitës Lulzim Basha/

Kongresmeni amerikan Eliot Engel nisi sot një vizitë pune në Tiranë. Ai u prit në një takim nga presidenti Bujar Nishani. Kreu i Shtetit shqiptar vlerësoi angazhimin e kongresmenit amerikan dhe e falenderoi atë “për rolin e veçantë dhe mbështetjen e fuqishme që ai personalisht i ka dhënë Shqipërisë, Kosovës dhe të gjithë shqiptarëve, për afro tre dekada si kongresmen”. Zoti Nishani ka ritheksuar rëndësinë e marrëdhënieve mes dy vendeve ndërsa është nënvizoi se “Shqipëria dhe shqiptarët i konsiderojnë Shtetet e Bashkuara si mikun dhe aleatin e saj strategjik më të madh”, duke shtuar se “se shqiptarët me krenari të veçantë e legjitime do të jenë gjithnjë krah Shteteve të Bashkuara në përballimin e sfidave globale dhe në luftën kundër terrorizmit ndërkombëtar e ekstremizmit të dhunshëm me baza fetare. Shqipëria është e vendosur për të kontribuar për paqen dhe stabilitetin, si në nivel rajonal ashtu edhe në nivel global”, u shpreh Kreu i Shtetit.

Kongresmeni Engel shoqërohej dhe nga një prej personaliteteve të diasporës shqiptare në SHBA, zoti Harry Bajraktari. Duke shfrytëzuar edhe praninë e tij, presidenti Nishani u shpreh se “ne shqiptarët ndjehemi shumë krenarë për diasporën tonë në SHBA dhe kontributin që ka dhënë për forcimin e marrëdhënieve mes tyre dhe Shteteve të Bashkuara”.

Kongresmeni Engel pati një takim dhe me kryetarin e opozitës Lulzim Basha, i cili gjithashtu e falenderoi për “kontributin e vyer që ka dhënë për Shqipërinë dhe Kosovën si dhe angazhimin e përhershëm për demokracinë në Shqipëri”. Zoti Basha më pas është ndalur dhe në zhvillimet e fundit politike në vend, ku ai ka përsëritur qëndrimet e njohura të opozitës. “Zgjedhjet e lira dhe të ndershme, krimi dhe droga me mbështetje shtetërore si dhe korrupsioni i përhapur gjerësisht, ishin shqetësimet e ngritura nga zoti Basha në këtë takim”, bëri të ditur një njoftim i shpërndarë nga Partia Demokratike.

Kroniken me detaje per viziten en Presdence e morem nga faqja zyrtare e Presidentit

Presidenti Nishani priti sot kongresmenin amerikan, Eliot Engel

1 shtator 2016

Presidenti i Republikës, Sh.T.Z. Bujar Nishani, priti sot në një takim të veçantë kongresmenin amerikan Eliot Engel, i cili ndodhet në një vizitë pune në Shqipëri, i shoqëruar edhe nga një prej personaliteteve të diasporës shqiptare në SHBA, zoti Harry Bajraktari.

Presidenti Nishani përshëndeti vizitën e radhës së Kongresmenit Engel në Shqipëri, si një prej vizitave të shumta të tij dhe e falënderoi atë për rolin e veçantë dhe mbështetjen e fuqishme që ai personalisht i ka dhënë Shqipërisë, Kosovës dhe të gjithë shqiptarëve, për afro tre dekada si kongresmen. Në mënyrë të veçantë Kreu i Shtetit vlerësoi mbështetjen dhe bashkëpunimin e Kongresmenit Engel me diasporën shqiptare në Shtetet e Bashkuara të Amerikës. Kreu i Shtetit u shpreh se: “është gjithmonë kënaqësi mikpritja e një kongresmeni amerikan në Tiranë, por vizita dhe prania juaj na jep një gëzim të veçantë, si mua personalisht si President i vendit ashtu edhe të gjithë shqiptarëve”.

Kreu i Shtetit shprehu gjithashtu mirënjohjen e thellë për mbështetjen e madhe e të qenësishme që Shtetet e Bashkuara i kanë dhënë Shqipërisë dhe shqiptarëve, që prej themelimit të shtetit shqiptar e deri në ditët e sotme, me Pavarësinë e Kosovës, anëtarësimin e Shqipërisë në NATO dhe kosolidimin e institucioneve demokratike dhe të shtetit të së drejtës. “Shtetet e Bashkuara kanë qenë pranë Shqipërisë dhe shqiptarëve në momente kyçe të historisë së tyre moderne dhe lista e falënderimeve do të ishte shumë e gjatë, por një falënderim të veçantë dëshiroj ta bëj për mbështetjen që SHBA-të kanë dhënë për rrëzimin e regjimit komunist dhe dekomunistizimin e vendit, si dhe për anëtarësimin e Shqipërisë në NATO, duke e ndihmuar të bëhet një anëtare e denjë e kësaj aleance.” – u shpreh Presidenti Nishani.

Presidenti i Republikës theksoi ndër të tjera se, Shqipëria dhe shqiptarët i konsiderojnë Shtetet e Bashkuara si mikun dhe aleatin e saj strategjik më të madh dhe e siguroi kongresmenin amerikan Engel se shqiptarët me krenari të veçantë e legjitime do të jenë gjithnjë krah Shteteve të Bashkuara në përballimin e sfidave globale dhe në luftën kundër terrorizmit ndërkombëtar e ekstremizmit të dhunshëm me baza fetare. “Shqipëria është e vendosur për të kontribuar për paqen dhe stabilitetin, si në nivel rajonal ashtu edhe në nivel global.” – u shpreh Kreu i Shtetit.

Presidenti Nishani, duke shfrytëzuar edhe prezencën edhe të përfaqësuesit të diasporës shqiptare në SHBA, zotin Harry Bajraktari u shpreh se ne shqiptarët ndjehemi shumë krenarë për diasporën tonë në SHBA dhe kontributin që ka dhënë për forcimin e marrëdhënieve mes tyre dhe Shteteve të Bashkuara.

Voltana Ademi: Edi Rama kërcënon Shkodrën

September 1, 2016 by dgreca

Reagimi – Ademi: Rama kërcënon Shkodrën me zero fonde. I hakërrehet që s’e votuan/

Nga: Bepin Kolvataj/Kortezi-ORA NEWS TV/

Kryetarja e bashkisë së Shkodrës Voltana Ademi thotë se kryeministri Edi Rama kërcënoi dje Shkodrën se nuk do të marrë fonde nga qeveria nëse nuk prish ndërtimet përreth stadiumit. Përmes një deklarate për median Ademi e quan ‘skandaloze” dhe të papranueshme” kërcënimin dhe akuzon Ramën se pas saj fshihet hakmarrja e tij për Shkodrën që s’e votoi.

Ademi tha se nuk do të shkelë ligjin sa i takon objekteve që janë me pronarë dhe akuzoi Ramën se po bllokon zhvillimin e qytetit më të madh verior.

Voltana Ademi: Jam këtu për të denoncuar kërcënimet e papranueshme dhe skandaloze të kryeministrit të vendit ndaj Shkodrës dhe qytetarëve të saj. Mbrëmë në prani të dhjetra vetëve në ambientet e stadiumit Loro Boriçi Edi Rama u hakërrue duke më thënë se Shkodra do të ketë zero fonde. Zero fonde e përsëriti 10 herë kryeministri i Shqipërisë. Nuk është vetëm kërkesa e tij për prishjen e shtëpive pranë stadiumit arsyeja, kurrsesi. Kjo eshte e qarte se eshte nje sjellje politike, hakmarrese ndaj nje qyteti e ndaj banoreve te tij, qe nuk e kane votuar Edi Ramen.

Dua ti bëj të ditur kryeministrit se shtëpitë me leje, prona, qytetarët dhe ligji janë më të rëndësishëm se pushteti dhe bashkia se unë e qeveria , më të rëndësishëm se Edi Rama.

Ademi thote se Rama po privon zhvillimin e Shkodrës

Ademi: Nuk do të pranoja kurrë të shembja në mënyrë të paligjshme shtëpinë, pronën e djersën e një qytetari vetëm sepse kjo ka të bëjë me trillet e një kryeministri. Edi Rama haptazi po dënon qytetarët e Shkodrës, kundër ligjit kushtetutës. Ai po privon qytetarët e Shkodrës nga të drejtat e tyre për të pasur zhvillim arsimim dhe shëndetësi më të mirë.

Në cilësinë e kryetares së bashkisë kam dërguar në qeveri me dhjetra projekte por të gjitha janë refuzuar sepse qytetarët e Shkodrës janë të lirë?! Nuk pranojnë të sundohen?! Kjo është taksa që u dashka që të gjithë të paguajnë në Shkodër, hakmarrjen dhe revanshin?! Sillet me buxhetin sikur të jetë pronë e tij personale. Historia ka treguar se asnjë kryeministër në historinë e këtij vendi duke nisur nga ato që kanë qenë më të rëndë nuk e kanë fituar betejën me qytetaërt e Shkodrës. Gjithmonë në fund triumfon e drejta.

Po a i trembet ndërhyrjes së kryeministrit për prishjet e këtyre ndërtimeve?

Ademi përgjigjet: Gjithmonë funksionon ligji dhe ligji duhet të zbatohet nga të gjithë. E drejta e pronës dhe e shpronësimit është me ligj.

Çfarë ndodhi dje: Rama kritika Ademit: S’ke prishur ndërtimet pa leje përreth “Loro Boriçit”

Kryeministri Rama dhe kryebashkiakja Voltana Ademi patën një debat në sy të medias për ndërtimet pa leje rreth stadiumit. Ademi deklaroi: Po mbroj të drejtën e pronës së qytetarëve sa kam mundësi; Rama lutet: O Zot ndihmo Shkodrën!. Shikoni videon poshte.

SHBA – Shpërthim në Qendrën Hapësinore Kennedy

September 1, 2016 by dgreca

Një shpërthim i madh ka ndodhur në Qendrën Hapësinore Kennedy në Florida.

Kompania hapësinore Space X po përgatitej për nisjen e një rakete nga toka.Shkaku i shpërthimit nuk ishte i qartë dhe ende nuk dihet nëse ka të lënduar.

Pamjet nga vendngjarja tregojnë një shtëllungë të madhe tymi që ngrihet mbi kompleks.Fuqia e shpërthimit tronditi ndërtesat që ndodhen disa milje larg.

Zyrat e emergjencës locale e përshkruan incidentin si një “abort katastrofik gjatë një prove statike zjarri”.Nëpërmjet një statusi në Twitter, Zyra e Menaxhimit të Emergjencave Brevard Country njoftoi se nuk përbënte rrezik për publikun.Space X po kërkon të krijojë një epokë të re të raketave dhe udhëtimit hapësinor.Space X ka përdorur raketat e saj Falcon-9 për të marrë furnizime për në Stacionin Hapësinor Ndërkombëtar.

FMN miraton këstin e radhës prej 35.9 mln euro për Shqipërinë

September 1, 2016 by dgreca

Bordi ekzekutiv i fondit në Uashington ka dhënë aprovimin për lëvrimin e kestit, në kuadër të rishikimit të 8 të programit me qeverinë shqiptare të nënshkruar rreth 3 vite më parë.

Ne total, deri më tani janë disbursuar 298 mln euro. Por edhe pse ka vlerësuar rimëkëmbjen ekonomike, e ndikuar nga investimet në sektorin energjetik dhe rritje graduale e kërkesës së brendshme.

FMN le disa rekomandime për qeverinë në lidhje me borxhin dhe taksen e pronës.

‘Reformat fiskale strukturore qe mundesojne tatimin e prones sipas vleres se tregut do te forcojne menaxhimin e financave publike. Politikat e autoriteteve duhet te vazhdojnë të përqendrohen në rregullimin fiskal duke mbështetur rritjen nepermjet lehtesimit monetar’ theksohet ne njoftimin per shtyp të FMN.

Fondi monetar vlerëson gjithashtu se rritja e kredisë mbetet e ngadalte, duke u kufizuar nga kreditë e keqija.

Ministri i Financave, Arben Ahmetaj, e konsideroi një lajm të mirë për ekonominë shqiptare dhe një përgjigje të merituar për kukuvajkat që dëshirojnë vetëm skenarë të zinj për vendin.

Ahmetaj: Përgjigje e merituar për “kukuvajkat” që ndjellin zi

“Sërish lajm i mirë për ekonominë shqiptare dhe një përgjigje e merituar për “kukuvajkat” që dëshirojnë vetëm skenarë të zinj për ekonominë e vendit.

Bordi i Fondit Monetar Ndërkombëtar miratoi sot rishikimin e tetë të programit me Qeverinë shqiptare duke konfirmuar edhe njëherë plotësimin e të gjithë kritereve të përformancës të vendosura në program.

“Rimëkëmbja ekonomike po përforcohet, e mbështetur nga investimet dhe konsumi. Një progres i mirë është bërë me axhendën e reformave strukturore. Inflacioni po rimëkëmbet nga nivelet e ulëta të fillim-vitit ndërsa strategjia e qeverisë për zgjerimin e bazës së taksapaguesve, rritja e pajtueshmërisë së publikut për pagimin e taksave dhe përmirësimi i administratës do të ndihmojnë në uljen e nivelit të borxhit duke krijuar edhe më shumë hapësirë për shpenzime publike produktive” – thuhet në deklaratën e FMN.

Një tjetër certifikim i performancës, një tjetër argument i qartë për suksesin e programit të rimëkëmbjes së ekonomisë dhe konsolidimit fiskal në Shqipëri, një tjetër përgjigje e merituar për ata që nuk heqin dorë nga një skenar grek për vendin.”