Papa Francesku u përball me një dhuratë të pazakontë në vizitën e tij në Venezuelë. Presidenti Evo Morales i dhuroi një kryq me drapër e çekan. Ati i Shenjtë e pranoi fillimisht dhuratën. Por kur e pa që kryqi ishte vendosur mbi simbolin komunist, e refuzoi atë menjëherë.(KJ)
Berisha:Vizat drejt rikthimit pas eksodit
Tirane, 9 Korrik- Ish-kryeministri Sali Berisha ka ngritur dy çështje të rëndësishme në Kuvend sipas tij, kultivimi i lëndëve narkotike dhe eksodi i shqiptarëve në muajt e fundit.
Berisha tha se “qeveria jep shifra të falsifikuara për zbulimin dhe asgjësimin e kanabisit. Janë 1 milionë rrënjë të kultivuara. Elementë të së majtës, nxisin masivisht mbjelljen e kanabisit, – theksoi deputeti demokrat. – U bë një operacion që u përshëndet nga të gjitha palët, por Shqipëria është zhytur në kanabis. Më i fuqishmi në PS pas Edi Ramës, Koço Kokëdhima, vazhdon të bëjë fushatë për legalizimin e kanabisit, duke qenë avokat i mbjelljes së saj. Sot kanabisi mbillet kudo në shumë zona malore. Siç e keni nisur do ta bëni Shqipërinë si Jemeni”.
Ndërsa mbi eksodin masiv të shqiptarëve në vendet e Bashkimit Europian, Berisha tha se po u vazhdua me këto ritme, do të rikthehet regjimi i vizave: “Po ecim drejt ndëshkimit. Një vend kandidat që kërkon azil politik, nuk i jepet integrimi në BE. Të merren masa kundër eksodit. Po të vazhdohet kështu, do rikthehet regjimi i vizave. Eksodet janë të lidhura me qeverisjen e keqe. Sipas studimeve, 60% e të rinjve largohen nga vendi”, – shtoi Berisha.
SHBA: Shënimi i 20 vjetorit të gjenocidit të Srebrenicës
*SHBA: Shënimi i 20 vjetorit të gjenocidit të Srebrenicës, Dhoma e Përfaqësuesve kalon unanimisht Rezolutën/
*Një rezolutë e ngjashme për të dënuar genocidin e Srebrenicës – bllokohet me veton e Federatës Ruse në OKB
Nga Beqir SINA/
Vetëm disa orë pasi Rusia vuri veton ndaj një rezolute të OKB-së për të dënuar masakrën e 1995 në Srebrenicë gjatë luftës në Bosnje, ka qenë Dhoma e Përfaqësuesve, në Kongresin amerikan ajo që e bëri përcaktimin e masakrës si një “krim dhe gjenocid”, duke kaluar njëzëri Rezolutën e paraqitur në legjislacionin amerikan , nji resolute, kjo, e sponsorizuar nga Komisioni i Helsinkit Kryetari i saj kongresisti republikan i Nju Xhersit – Chris Smith.
Rezoluta H. Res. 310 pohon se politikat e agresionit dhe spastrimit etnik të zbatuara nga forcat serbe në atë vend gjatë luftës në vitin 1995 përbënin gjenocid, dhe dënon deklaratat e disa vendeve për t’a mohuar atë – se masakrat plotësojnë përkufizimin e gjenocidit.
“Komuniteti ndërkombëtar duhet të rigjykojë veten e saj – për të sjellë para drejtësisë një herë dhe për të gjithënjë, të gjithë ata që i kryen këto krime të tmerrshme,” tha përpara votimit kongresisti Smith, sponsorizuesi i kësaj rezolute. “Këto vrasje brutale nuk janë kryer në betejë, tha ai, duke vazhduar se ata(forcat militare serbe të Bosnjes) kishin kryer krime dhe genocid kundër njerëzve të cilët ishin të paarmatosur dhe të pafuqishëm për t’u mbrojtur dhe të cilët ishin të “siguruar”në mënyrë të përsëritur nga paqeruajtësit hollandezë, që ata nuk do të dëmtoheshin nëse ata u kishin per t’u dorëzuar(ashtu si dhe pati ndodhur). Dëshmitë janë të mëdha se ekzekutimet janë kryer me qëllim të veçantë për të shkatërruar popullsinë boshnjake muslimane të zonës. Ky qëllim është elementi qendror në krimin e gjenocidit përdorur gjatë luftës “.
“Sot komuniteti ndërkombëtar është gati që njëzëshëm të shpall se masakra e Srebrenicës ishte një gjenocid,” vazhdoi ai. “Rezoluta e paraqitur nga unë sot , tha zoti Smith, riafirmon mbështetjen e SHBA-ve për këtë fakt, dhe përcjell ngushëllimet tona më të thella për familjen dhe miqtë e viktimave.”
Dhoma e Përfaqësuesve te Kongresit Amerikan kaloi një zëri Rezolutën H.Res. 310 edhe sot nxit Bordin për Parandalimi e Mizorive -një organizatë ndërinstitucionale e ngarkuar për të ndihmuar qeverinë amerikane për të identifikuar dhe konfirmuar, dhe për të adresuar konkluzione për të nxjerrë udhëzime për parandalimin e gjenocideve të ardhshme,. Rezoluta gjithashtu inkurajon Shtetet e Bashkuara që të vazhdojnë të mbështesin pavarësinë dhe integritetin territorial të Bosnjës dhe Hercegovinës, si dhe paqja dhe stabiliteti në Evropën juglindore si një e tërë.
Kjo resolute përmend faktin Masakër të më shumë se 8,000 burrave dhe djemve të Srebrenicës në korrik 1995. E cila thuhet në të – ishte një nga mizoritë më të rënda të ndodhura në konfliktin në Bosnjë dhe Hercegovinë midis Prillit 1992 dhe Nëntorit 1995, gjatë së cilës periudhë më shumë se 2.000.000 njerëz ishin zhvendosur, me force nga shtëpitë e tyre dhe më shumë se 100,000 njerëz janë vrarë , dhe dhjetëra mijëra gra dhe vajza janë përdhunuar ose torturuar dhe abuzuar. Përveç kësaj për të qenë më të saktë me përcaktimin e nacionalitetit të viktimave kryesore në Srebrenicë, ata janë individët të trashëgimisë boshnjake të cilët përbëjnë shumicën e viktimave gjatë konfliktit në Bosnjë dhe Hercegovinë si tërësi, veçanërisht në mesin e popullatës civile.
Që nga viti 1995, kongresisiti Smith ka punuar për të nxjerr nëpërmjet fakteve të mbledhura atë se kush janë autorët e akteve të tmerrshme në Srebrenicë duke kërkuar edhe ndëshkimin e tyre, për të dhënë një ngushëllim për të mbijetuarit dhe familjet e viktimave. Në vitin 2005, zoti Smith thuhet se ishte dhe autor i Rezolutës H. Res. 199, e cila në mënyrë të qartë dhe pa ekuivoke ka dënuar masakrën e Srebrenicës si gjenocid dhe u miratua me mbështetjen e madhe në Dhomën e Përfaqësuesve. Gjithashtu, në korrik të vitit 2007, kongresiti republican i Nju Xhersit Chris Smith vizitoi Srebrenicën për të dëshmuar pasojat tragjike të gjenocidit 1995.
DY AMBASADORE NE NDIHME TE FEMIJEVE PER BIRESIM
Ambasadat e SHBA dhe Austrisë në Tiranë, në ndihmë të fëmijëve që lihen për birësim/
Ambasadori Amerikan Donald Lu, dhe ai Austriak,Thomas Schnoll u takuan dje me Ministrin e Drejtësisë, Nasip Naço të cilit i prezantuan nismën “Komiteti i Nenit 5”. Qëllimi i kësaj nisme të përbashkët është përmirësimi i situatës ligjore për trajtimin e fëmijëve, prindërit biologjikë të të cilëve nuk mund të kujdesen dhe lihen për birësim. Gjatë takimit ambasadorët vunë në dukje nevojën për t’i ndihmuar këta fëmijë në gjetjen e një familjeje dhe shtëpie të re sa më shpejt, duke minimizuar pengesat e mundshme burokraktike. Në lidhje me ndryshimet ligjore që propozohen përmes nismës “Komiteti Neni 5”, Ministri Naço u shpreh se paralelisht do të ishte e nevojshme edhe nisja e një fushate ndërgjegjësuese me synimin për të ndryshuar perceptimin e çështjes së adoptimit në vend. Ndërkohë “Rritja e ndërgjegjësimit, nisja e një fushate publike informuese lidhur me këtë çështje, bashkarisht edhe me miratimin e Strategjisë ndërsektoriale për fëmijët, do të garantojë suksesin e kësaj nisme, e cila mendoj se kërkon koordinim të plotë për të pasur një rezultat pozitiv”, vijoi zoti Naço. Gjithashtu bashkëbiseduesit theksuan se gjetja e një zgjidhjeje sa më të mirë dhe të shpejtë për fëmijët e braktisur, birësimi i tyre në familje të përshtatshme, si dhe kontrolli në vijimësi i cilësisë së kushteve që këta fëmijë do të gëzojnë në familjet birësuese, duhet të mbetet në fokusin e këtyre ndryshimeve ligjore dhe punës së përditshme të organeve ligjzbatuese në vend. Në fund të takimit u theksua nevoja që të garantohet mbrojtja dhe mirërritja e fëmijëve që ndodhen nën kujdesin e institucioneve publike.
Sh.K.
Kosova në duart e mafio-politikës!?
Opinion nga Faik KRASNIQI/
Do të ishte naivitet i ynë i skajshëm, nëse presim që këta politikanë të korruptuar dhe të kriminalizuar, të cilët tash e 16 vite e kanë kapur shtetin për fyti, drejtësinë, doganat, ATK-në dhe çdo institucion shtetëror, dhe fajtorët për shkatërrimin e ekonomisë së Kosovës dhe degradimin e shtetit, që ta luftojnë krimin dhe korrupsionin, kur këta vetë janë ata që i zhvillojnë këto aktivitete kriminale! Prandaj nuk bën ta fajësojmë vetëm z. Lulzim Rafuna, për korrupsionin nëpër dogana, sepse z. Rafuna është i emëruar po nga mafiapolitike dhe tek e fundit ai është vetëm drejtor i doganave e asgjë më shumë, dhe ai detyrimisht duhet t’u bindet urdhërave të eprorëve të tij, ata të cilët e kanë emëruar në kë post! Që do të thotë kriminelët e politikës dhe parapolitikës! Ne të gjithë e dimë se ‘peshqit e mëdhenjë’ të politikës doganat i kanë në duart e tyre, dhe krimi ekonomik bëhet kryesisht nga bizneset kriminale që janë të lidhura ngushtë me ‘peshqit e mëdhenjë’ të politikës! Prandaj edhe z.Rafuna është i detyruar t’i mbyll sytë përballë krimeve të rënda ekonomike nëpër dogana, dhe nuk guxon të dalë kundër që t’i parandaloj veprimtaritë kriminale nëpër dogana, sepse po të veproj direkt do të preken të gjitha kompanitë kriminale, të cilat tash e 16 vite përmes bosave të politikës, kanë keqpërdorur dhe vazhdojnë t’i keqpërdorin Doganat e Kosovës, duke dëmtuar rëndë buxhetin e Kosovës dhe pasuruar në mënyrë të paligjshme! Nga ai moment që z.Rafuna do të merrte masa të rrepta për ta parandaluar kontrabandën dhe korrupsionin nëpër dogana, matrapazët e politikës dhe parapolitikës që iu cënohen interesat e tyre, marrin vendim dhe e shkarkojnë nga detyra, me arsyetime të lloj-llojshme: ose e akuzojnë për korrupsion, ose për joprofesionalizëm, ose i mveshin gjëra të tjera, pasi nuk po ju shkon më për shtati interesave të tyre dhe automatikisht e zëvendësojnë me dikë tjetër, që ta vazhdojnë krimin e tyre ekonomik përmes doganave, sepse e kanë në dorën e tyre edhe arrën edhe çekiçin, që do të thotë se ata vendosin se kë ta shkarkojnë dhe kë ta emërojnë!
Shteti duhet të pastrohet nga mafio-politika!
Mafio-politika dhe mafio-oligarkët, prej pas luftës në Kosovë, kanë krijuar një zingjir kriminal, përmes të cilit rrjet, kanë pushtuar çdo institucion shtetëror të Kosovës, për ta kontrolluar, abuzuar, vjedhur e plaçkitur sa më shumë këtë shtet dhe këtë popull! Ata nuk zgjedhin mjet për ta bërë një gjë të tillë! Edhe nëse është në pyetje jeta e qytetarëve, siç ishte rasti me skandalin e krundeve të kafshëve, skandali i stendave ku si pasojë vdiqën mbi 800 qytetarë të Kosovës, nëpër klinikat e mafio-politikës dhe qindra skandale të tjera, që kurrë askush nuk u dënua dhe të gjitha këto skandale të tmerrshme u heshtën, sikur nuk ka ndodhur asgjë, edhe pse vdiqën qytetarë të këtij vendi! Mafia-politika dhe parapolitika, i ka krijuar këta përmbarues, për t’i plaçkitur edhe në mënyrë të ”ligjshme”, qytetarët dhe bizneset e ndershme në Kosovë, dhe në mënyrë perfekte po i zbatojnë urdhërat e kapove të mafio-politikës! Me këta banditë dhe mafiozë në pushtet dhe në skenën politike dhe me Hajredin Kuçin ministër të drejtësisë, që e kanë kapur shtetin për fyti dhe janë fajtorët për shkatërrimin dhe kapjen e shtetit dhe të drejtësisë, nuk hetohet asgjë dhe nuk merret asnjë veprim për t’i pastruar të këqijtë nga Gjykatat dhe Prokuroritë, që në çdo shtet normal i ndjekin kriminelët dhe të korruptuarit! Por pjesa dërrmuese e këtyre prokurorëve dhe gjykatësve, janë të emëruar politikisht nga mafia-politika, prandaj edhe skena politike është e tejkriminalizuar dhe e tejkorruptuar, sepse nuk ka kush t’i fus në burg këta kriminelë, të veshur me petkun e politikanit! Kjo gjendje do të vazhdojë akoma, deri sa në skenën politike do të kemi këtë klasë politike, që e shkatërruan këtë shtet dhe këtë popull, dhe ky popull i shkretë që është gjunjëzuar dhe dorëzuar përballë kësaj kaste mafioze të politikës, në vend se t’ju kundërvihen, ata zgjedhin të marrin arratinë, drejt vendeve të perëndimit, edhe pse e dinë që për shqiptarët e Kosovës nuk ka azil!