Ndoshta, takimi më i rëndësishëm i ditës, së bashku me përqafimin e të rinjve, ishte mesha e Papës Françesku në stadiumin e Koshevos, i rrethuar nga varrezat e improvizuara të viktimave të luftës së Bosnjës, që gjatë rrethimit të gjatë të Sarajevës, nuk kishin as varr për mort. Të mbijetuarit i futën nën dhe të vdekurit e tyre si mundën e ku mundën. Foli për paqen, Ati i Shenjtë, duke vënë ballë për ballë leximet biblike me gjendjen e sotme. Foli për drejtësinë, e cila sjell paqen, siç thotë Isaia profet. Paqja është një nga lumnitë e Ungjillit, theksoi para 65 mijë besimtarëve, që e kishin mbushur si kurrë ndonjëherë stadiumin, rrugët e sheshet, pranë tij. Me patos, Ati i Shenjtë, që në fillim të homelisë, u tërhoqi vëmendjen boshnjakëve shumëetnikë e shumëfetarë, se:
“Paqja është ëndërra e Zotit, është plani i Hyjit për njerëzimin, për historinë, së bashku me gjithë krijesat. Është plan, që kundërshtohet gjithnjë nga njeriu e nga i Keqi. Edhe në kohën tonë, aspirata për paqen dhe impenjimi për ta arritur ndeshen me faktin se në botë ka konflikte të shumta të armatosura. Është një lloj lufte e tretë botërore, që zhvillohet “pjesë-pjesë”; e, në kontekstin e komunikimit global, perceptohet si atmosferë beteje”.
“Kurrë më luftë”, përsëriti Papa Françesku fjalët e shën Gjon Palit II, i cili në vitin 1994 nuk mundi ta vizitojë Bosnjë-Hercegovinën për shkak të çekinëve – gati të shtinin mbi këdo, edhe mbi Atin e Shenjtë, i cili, gjithsesi, pati frikë jo për vete, por për besimtarët. Arriti të shkojë më pas në Sarajevë, në vitin 1997. E Papa Françesku ngriti zërin kundër atyre, që duan ta ushqejën luftën me qëllim, për interesa të ulta; kundër atyre, që krijojnë ndeshje ndërmjet kulturave e qytetërimeve, që spekullojnë me shitjen e armëve:
“Por luftë do të thotë fëmijë, gra e të moshuar në kampet e refugjatëve; do të thotë shpërngulje me zor; do të thotë shtëpi, rrugë, fabrika të shkatërruara; do të thotë sidomos, sa e sa jetë të përgjysmuara. Ju e dini mirë, e keni provuar pikërisht këtu: sa vuajtje, sa shkatërrim, sa dhimbje!”.
Papa Françesku citoi fjalët e Jezusit në Ungjill: “Lum veprimtarët e paqes”. Nuk thotë “Lum predikatorët e paqes”, nënvizoi Ati i Shenjtë, sepse për fjalë janë të gjithë të zotë, edhe hipokritët, edhe gënjeshtarët. Jezusi lavdëron ata, që përpiqen personalisht për arritjen e paqes, e cila kërkon punë artizani, pasion, durim, eksperiencë, këmbëngulje. E si arrihet paqja? Papa përmendi Isainë profet dhe Papën Piu XII:
“Paqja është rrjedhojë e drejtësisë. Edhe këtu: jo një drejtësi e deklamuar, e teorizuar, e planifikuar… por një drejtësi e praktikuar, e jetuar. E Besëlidhja e Re na mëson se drejtësia më e plotë është të duash të afërmin si vetveten. Kur, me hirin e Tënzot, e ndjekim këtë urdhëresë, ah si ndryshojnë gjërat! Sepse ndryshojmë ne!”
Shën Pali Apostull, vijoi Papa, në Leximin e dytë të meshës, na tregon cilat janë sjelljet e nevojshme për arritjen e paqes: dhembshuria, mirësia, përvujtnia, ëmbëlsia, zemërgjerësia, falja e durimi. Me këto sjellje, tha Ati i Shenjtë, bëhemi artizanë të paqes:
“Por, të mos kujtojmë se kjo varet vetëm prej nesh! Do të binim në një moralizëm zhgënjyes. Paqja është dhuratë e Zotit, jo në kuptimin magjik, por sepse Ai, me Shpirtin e Tij, mund t’i dikojë këto qëndrime në zemrat tona e në korpin tonë, duke na kthyer në mjete të vërteta të paqes së Tij. E, nëse shkojmë më thellë, Apostulli thotë se paqja është dhuratë e Zotit, sepse është fryt i pajtimit të Tij me ne. Vetëm nëse pajtohet me Zotin, njeriu mund të bëhet veprimtar i paqes”.
Kurrë më shumë se në këtë çast, nuk mori kuptim motoja e udhëtimit të Papës Françesku në Sarejevë: “Mir vama” (Paqja qoftë me ju), të cilën Ati i Shenjtë e shqiptoi disa herë në gjuhën vendase.
Rexhep Qosja: Jo Gjykatës Speciale, shqiptarët s’duhet ta dënojnë vetveten
Akademiku i njohur Rexhep Qosja i bën apel politikës shqiptare në Kosovë të mos votojnë themelimin e Gjykatës Speciale.
“Shqiptarët nuk do të duhej, në asnjë mënyrë, ta dënojnë vetveten, nuk do të duhej të vetëdënohen” thotë Qosja në një intervistë botuar sot në gazetën e Kosovës “Epoka e re”.
Rexhep Qosja: Për mua është me rëndësi politike dhe etike, është me rëndësi historike, është me rëndësi kombëtare, që atë Gjykatë të mos e themelojnë vetë shqiptarët. Shqiptarët nuk do të duhej, në asnjë mënyrë, ta dënojnë vetveten, nuk do të duhej të vetëdënohen”
Duke folur në këtë intervistë edhe për dënimin me burgim të ish-komandantëve të UÇK-së, Sylejman Selimit, Sami Lushtakut dhe bashkëluftëtarëve të tyre, Qosja ka thënë se këto janë dënime të frymëzuara prej motiveve politike e të bëra për qëllime politike.
Duke folur për kuvendin e fundit zgjedhor të LDK-së, zgjedhjen me Isa Mustafës kryetar, Qosja e ka krahasuar me bolshevikët e Stalinit e fashistët e Musolinit.
Qosja komenton dhe ngjarjen në Kumanovë. Sipas tij është shkaktuar prej politikës nacionaliste të Nikolla Gruevskit dhe bën me përgjegjësi edhe dy partitë shqiptare, BDI-në dhe PDSH-në.
Katër ngjarjet që do të ndikojnë në politikën e Kosovës dhe Shqipërisë
Rexhep Qosja: “Kohët e fundit politikën kosovare e kanë shënuar ato katër ngjarje -ndonjëra prej tyre e pritur e ndonjëra e papritur. Dhe këto katër ngjarje janë: 1. Sulmi blickrig i Qeverisë së tanishme të Maqedonisë ndaj lagjes shqiptare në Kumanovë, në të vërtetë ndaj kundërshtarëve të asaj qeverie, që ishin vendosur në atë lagje; 2. Dënimi i komandantit të Shtabit të Përgjithshëm të Ushtrisë Çlirimtare të Kosovës, Sylejman Selimi, i komandantit të Zonës Operative të Drenicës, Sami Lushtaku, dhe i disa pjesëtarëve të tjerë të Ushtrisë Çlirimtare të Kosovës; 3. Mbledhja plenare e Kuvendit të Kosovës për miratimin e ligjit mbi themelimin e Gjykatës së Veçantë për trajtimin dhe dënimin e krimeve eventuale të Ushtrisë Çlirimtare të Kosovës; dhe 4. Kuvendi i Tetë Zgjedhor i Lidhjes Demokratike të Kosovës, në të cilin kryetar i kësaj partie u rizgjodh Isa Mustafa. Këto katër ngjarje jehuan, cila më shumë e cila më pak, në jetën kombëtare shqiptare në përgjithësi, kurse tri prej tyre patën dhe do të vazhdojnë të kenë jehonë edhe ndërkombëtare, në mënyrë të veçantë në Bashkimin Evropian dhe në Shtetet e Bashkuara të Amerikës. Këto katër ngjarje do të jenë me ndikim edhe në politikën e ardhshme të Kosovës e të Shqipërisë, por dy prej tyre edhe në politikën e faktorëve ndërkombëtarë ndaj Kosovës dhe, mund të jetë, ndaj Shqipërisë”
Nishani thirrje Kosovës: S’ka alternativë tjetër përveç Gjykatës Speciale
Presidenti i vendit, Bujar Nishani, në një intervistë për mediat kosovare, i ka bërë thirrje deputetëve të Kosovës të votojnë themelimin e Gjykatës Speciale, si e vetmja mënyrë për të ecur përpara.
“Për sa kohë ka një kërkesë nga komuniteti ndërkombëtar që pretendime të caktuara për raste të caktuara, për individë të caktuar, kërkojnë të hetohen dhe të gjykohen për të vërtetuar fajësinë apo pafajësinë e tyre, unë besoj që nuk ka alternative tjetër përveçse për ta krijuar këtë mekanizëm“, citohet Nishani në gazetën “Koha Ditore”.
Votimi në kuvendin e Kosovës të amendamenteve kushtetuese dhe ligjit që do të themelonte Gjykatën Speciale është shtyrë në dy seancat e fundit të kuvendit. Ndërsa shumica pretendon se deputetët nuk kanë ende në dorë draftligjin e përkthyer, opozita thotë se në parlament nuk janë votat për ta miratuar. Për të ndryshuar kushtetutën duhet të votojnë pro 80 nga 120 deputetë që janë në parlament.
PAPA BOSHNJAKEVE: KUNDERSHTONI BARBARINE E ATYRE QE MBJELLIN DHUNE!
Papa Françesku u ka bërë thirrje myslimanëve, ortodoksëve dhe katolikëve të Bosnjës, që t’i lënë prapa “plagët e thella” të së kaluarës dhe të punojnë së bashku për një të ardhme paqësore.
Në fjalimin e tij në Presidencë e Bosnjës, Papa u bëri thirrje boshnjakëve që të kundërshtojnë “barbarinë” e atyre që vazhdojnë të mbjellin ndarjen “si një pretekst për dhunë të tmerrshme”.
Ati i Shenjtë u bëri thirrje qytetarëve të Bosnjës që të vazhdojnë të punojnë për paqe dhe respekt ndërfetar, përmes durimit dhe dialogut të besueshëm.
“Kjo do të lejojë që zërat e ndryshëm të bashkohen dhe të krijojnë një melodisublime të fisnikërisë dhe bukurisë, në vend të klithmave fanatike të urrejtjes”, tha ai.
Papa Françesku më pas ka shkuar në stadiumin e Sarajevës, ku edhe do të zhvillohet ngjarja kryresore e vizitës së tij. Aty do të marrin pjesë 65 mijë njerëz, shumica prej tyre katolikë.
Mëngjesin e së shtunës, Papa Françesku arriti në Sarajevë të Bosnje e Hercegovinës.
Ati i Shenjtë po zhvillon një vizitë njëditore në Sarajevë dhe atje u mirëprit nga mijëra qytetarë, të cilët kishin dalë ta përshëndesnin derisa po kalonte autokolona prej aeroportit nëpër qytetin e banuar nga rreth 300 mijë myslimanë.
Me vizitën e tij, Papa Françesk synon që të forcojë pajtimin ndërmjet komunitetit serb, atij kroat dhe myslimanëve të këtij vendi.
Hera e fundit kur një lider i Vatikanit ka vizituar këtë vend, ka qenë 20 vjet më parë, pas përfundimit të luftës.
Masat e sigurisë janë të mëdha dhe 5,000 policë do të jenë në detyrë, pasi që pritet që 100 mijë njerëz do të mundohen të takojnë Atin e Shenjtë.
Më shumë se një e treta e popullatës në Bosnje është kroate katolike dhe shteti prej 3.8 milionë banorësh është i ndarë në Republikën Serbe të Bosnjës dhe në Federatën Kroate-Myslimane.
Kërcënimi i Shtetit Islamik për Ballkanin
“Një tokë e karakterizuar me male të fuqishme, që për shekuj të tërë janë lëkundur nga beteja të përgjakshme”…
Mund të tingëllojë si citat nga një broshurë turistike që shet pushime verore në Ballkan, por në fakt me të tilla citate nis një video e re propagandistike e asaj që njihet si qendër mediale “Al-Hayat”, e ndërlidhur me grupin militant “Shteti Islamik”.
Videoja ka në shënjestër myslimanët që jetojnë në shtetet e Ballkanit dhe theksi bie mbi versionin revizionist të Shtetit Islamik mbi historinë e Ballkanit, duke nisur nga Lufta e Parë Botërore.
Ajo është publikuar në rrjetet sociale më 4 qershor, por duket se është xhiruar para 6 shkurtit, kjo për faktin se njëri nga militantët që shfaqet në video, Mirza Haklaj nga Mali i Zi është raportuar të jetë vrarë pikërisht në atë datë.
Mesazhi në këtë video është i ngjashëm me atë që kanë video mesazhet tjera të IS-it: Myslimanët në Evropë janë përçmuar nga “të pabesët” dhe ata mund ta rimarrin dinjitetin e tyre vetëm përmes “xhihadit” në radhët e Shtetit Islamik.
Dhe përveç thirrjeve për t’iu bashkuar Shtetit Islamik, videoja bën thirrje gjithashtu për sulme të vetme kundër caqeve vendore në Ballkan.
Dy nga personazhet në këtë video, flasin shqip.
Abu Muqatil [Al Kosovi] dhe Abu Bilqis [Al Albani] paralajmërojnë hakmarrje “ndaj atyre që kanë poshtëruar myslimanët”, ndërsa thonë se “armiqtë e Allahut po kërkojnë t’i përçajnë”.
Në mesazhin e Al Kosovit flitet për “ditë të zeza” ndaj atyre që kanë nënçmuar myslimanët dhe Allahun, “në Kosovë, Shqipëri, Bosnjë, Maqedoni dhe në të gjithë Ballkanin”.
Ndaj videos së publikuar nga Shteti Islamik me përmbatje kërcënuese, ka reaguar edhe Bashkësia Islame e Kosovës.
Zëdhënësi i kësaj Bashkësie, Ahmet Sadriu duke folur për Radion Evropa e Lirë, ka theksuar se Bashkësia Islame e Kosovës i gjykon ashpër kërcënimet që Shteti Islamik i përcjellë për rajonin, përfshirë edhe Kosovën, përmes videos së publikuar.
“Këto nuk kanë të bëjnë absolutisht me anën fetare Islame, sepse të kërcënosh me vrasje, me shkatërrime dhe gjera të tjera, Islami këto i ndalon. Ato faktikisht nuk kanë të bëjnë fare me Islamin”.
“Kështu që, ne si institucion, si Bashkësi Islame, paraqitjet e tilla i gjykojmë, mirëpo apelojmë tek institucionet tona shtetërore që të jenë vigjilente dhe t’i përcjellin këto gjëra”, thotë Sadriu.
Zyrtarët e Qeverisë së Kosovës, thonë se ekzekutivi është duke i dhënë përkrahje të gjithë dikasterëve që janë përgjegjës për sigurinë në vend, përfshirë këtu, Policinë e Kosovës dhe Departamentin e saj Kundër Terrorizmit, prokurorinë dhe Agjencionin Kosovar të Intelegjencës, në mënyrë që ato t’i kenë resurset e nevojshme për të kryer detyrat e tyre.
Edon Miftari, këshilltar për siguri i kryeministrit të Kosovës, Isa Mustafa, thotë për Radion Evropa e Lirë se organet e sigurisë janë të gatshme të reagojnë përballë çfarëdo lloj kërcënimi, përfshirë këtu edhe kërcënimet sikurse ky i fundit nga Shtetit Islamik, përmes videos së publikuar.
“Unë besoj që nëse policia, përmes analizave të veta dhe përmes bashkëpunimit që e kanë me AKI-në , vlerësojnë që ka kredibilitet në ato kërcënime, atëherë ata i kanë masat e veta që i ndërmarrin në përputhje me kërcënimin”, theksoi Miftari.
Policia e Kosovës, përmes një komunikate për medie ka vlerësuar se “tani për tani nuk paraqitet ndonjë rrezik i lartë nga terrorizmi në Republikën e Kosovës, megjithatë Kosova nuk mund të jetë imune sikurse nuk janë edhe shtetet me te zhvilluara ne Evropë e me gjerë”.
Gjithashtu në këtë komunikatë thuhet se Policia e Kosovës, “ monitoron çdo aktivitet të personave fizik dhe juridik, për të cilët siguron informata se mund të paraqesin rrezik për rendin kushtetues në të ardhmen apo mund të kryejnë ndonjë vepër penale” dhe se “e gjithë kjo bëhet me qëllim të parandalimit dhe zbulimit të ndonjë vepre penale të mundshme, duke përfshirë veprat e terrorizmit dhe ekstremizmit fetar”.
Sidoqoftë, ajo që është e dukshme në këtë video, është mungesa e Lavdrim Muhaxherit, militantit më të njohur nga vendet e Ballkanit në IS.
Muhaxheri pretendohej të jetë vrarë vitin e kaluar, deri në shpërfaqjen e një videoje më 21 maj, në të cilën shihej teksa kryente një sulm me raketahedhës kundër një të riu sirian. Koha se kur është bër videoja në të cilën shihet Muhaxheri mbetet ende e diskutueshme.
Ndryshe, sipas hulumtimit të Qendrës Kosovare për Studime të Sigurisë, mbi 230 qytetarë nga Kosova thuhet se u janë bashkuar organizatave terroriste në Siri edhe Irak, duke e renditur Kosovën në vendin e tetë nga numri i shteteve, qytetarët e të cilave u janë bashkuar luftërave të huaja.(Kortezi:Bekim Bislimi dhe Joanna Paraszczuk)