Nga Arbi Fortuzi/-. Ministria e Kulturës është duke punuar me kapacitet të plotë për të përfunduar sa më shpejt përgatitjet për organizimin e vizitës së Papa Françeskut në Tiranë më datë 21 Shtator 2014.
Lajmi u bë sot i ditur nga Ministrja e Kulturës, Mirela Kumbaro e cila iu përgjigj interesit të gazetarëve lidhur me ecurinë e përgatitjeve për vizitën e Papa Françeskut në Tiranë. Sipas Kumbaros, dikasteri që ajo drejton, pavarësisht se është kohë pushimesh, po punon me intensitet të plotë që organizimi të jetë sa më shpejt gati. “Edhe pse jemi në periudhë pushimesh, për të cilat i dëshirojmë të gjithë shqiptarëve gëzuar dhe pushime sa më të mbara, ne si ministri kemi më shumë se një muaj që kemi nisur të përgatitemi për të organizuar të gjitha detajet e vizitës së Papa Françeskut në Tiranë”, theksoi Kumbaro.
Sipas saj, kjo vizitë është një ngjarje mjaft e gëzuar për vendin tonë dhe gjithë shqiptarët, që për një ditë do të jenë në qendër të globit. “Kjo ngjarje e kthen vendin tonë nga një fshat i vogël, në një vend të madh, duke dëshmuar se Shqipëria tashmë është një vend si vendet e tjera, ku Papa mund të realizojë vizitat e tij”, theksoi Kumbaro.
Duke folur për përgatitjet, Ministrja e Kulturës bëri të ditur se po punohet në tre drejtime. “Kanë nisur punimet në Sheshin “Nënë Tereza” për ristrukturimin e tij, pasi më datë 21 shtator do të mbahet mesha e shenjtë dhe predikimi i Atit të Shenjtë, në kuadër të vizitës zyrtare që do të zhvillojë në vendin tonë. Po ashtu, shtoi Kumbaro, Pallati Kongreseve po ristrukturohet për t’u kthyer në një qendër të madhe mediatike, pasi gjatë vizitës priten mijëra gazetarë nga e gjithë bota me transmetime live. Së fundmi, po punohet edhe për ristrukturimin e Muzeut Kombëtar, të cilin Papa Françesku e ka në axhendë për ta vizituar”, nënvizoi Kumbaro.
Vizita e Papa Françeskut në Tiranë: Shenjtëria e tij, Papa Françesku më 21 shtator do të vizitojë Tiranën dhe kjo do të jetë një festë për të gjithë. Lajmi u bë ditur nga vetë Papa gjatë lutjes “Angelus” në Vatikan në orën 12:00 të datës 15 Qershor’. Kjo sipas Nunciaturës Apostolike Shqiptare do të jetë një udhëtim apostolik gjatë të cilit, Ati i Shenjtë, do të ketë mundësi, jo vetëm të takojë dhe të forcojë në fe bashkësinë katolike të Shqipërisë, por edhe të inkurajojë dhe të thellojë raportet e mira tashmë ekzistuese ndërfetare, si dhe të nxisë shoqërinë dhe popullin shqiptar të përballet me guxim, shpresë, zemërgjerësi e shpirt solidariteti në sfidat e të tashmës dhe të ardhmes që ndërthuren me ndërtimin e Shqipërisë së re të rilindur”.
Ky udhëtim i Papë Françeskut ndodh 21 vite pas vizitës historike dhe të paharrueshme të bërë nga Papa Shën Gjon Pali i Dytë më 25 prill 1993, në agimin e asaj “dite të re” që për Shqipërinë, pas rënies së komunizmit, shënoi hapjen e demokracisë, të lirisë fetare dhe të të gjitha të drejtave themelore të burrit dhe të gruas. Është i një domethënjeje shumë të lartë ky udhëtim i parë i Papë Franceskut në një Vend europian. Do të jetë udhëtimi i katërt i Tij ndërkombëtar që kur u zgjodh Ipeshkëv i Romës më 13 mars 2013: i pari ka qenë në Brazil (Amerikë), me rastin e Ditës Botërore të të Rinjëve (22-29 luglio 2013); i dyti, udhëtimi muajin e kaluar në Tokën Shenjte: Jordani, Palestinë, Izrael (Lindja e Mesme), që ka patur jehonë të madhe në mas-mediat ndërkombëtare edhe për fjalët, takimet personale dhe gjestet kurajuese të Papë Françeskut; i treti do të jetë ai, tashmë i shpallur, që do të çojë Atin e Shenjtë në Republikën e Koresë (Azi) më 14 – 18 gushtin e ardhshëm, me rastin e Takimit të VI të të rinjëve të kontinentit aziatik. Pas këtij lajmi, më 30 Korrik 2014, Keshilli i Ministrave vendosi për një shtesë fondi në buxhetin e vitit 2014, prej 141.115.797 milione lekesh, miratuar për Ministrinë e Kulturës dhe Qendrën Kombëtare të Kinematografisë, për mbulimin e shpenzimeve që do të kryhen në kuadër të organizimit të punëve në vijim të ardhjes së Papa Françeskut në Shqipëri. Ndërsa më 31 Korrik 2014, në katedralen e Shën Palit në Tiranë u zhvillua takimi mbi programin e udhëtimit apostolik të Papa Françesku në Tiranë më 21 Shtator te ketij viti. Mësohet se Ati i Shenjtë do të niset nga Roma në orën 07:30 të datës 21.09.2014 dhe pritet të mbërrijë në aeroportin “Nënë Tereza”, në orën 09:00, ku do të pritet nga kryeministri Edi Rama.
Menjëherë pas mbërritjes në Tiranë, Ati i Shenjtë do të pritete në një ceremoni në zyrtare në Presidencë rreth orës 9 e 30 minuta. Në orën 10:00 Ati i Shenjtë do të mbajë Meshën e Shenjtë në sheshin “Nënë Tereza”.
Në orën 13:30 Papa Françesku do të ketë një drekë me Ipeshkvijtë shqiptarë dhe më pas do të takojë edhe krerët e besimeve të tjera në Shqipëri.
Në orën 17:00 do të kremtohet lutja mbrëmësore në Katedrale. Në 18:30 Papa do të takojë fëmijët e qendrës “Betania” në Fushë-Krujë dhe në orën 19:45 do të zhvillohet ceremonia e përcjelljes së Papës në aeroport. Ati i Shenjtë niset drejt Romës nga aeroportin “Nënë Tereza”në orën 20:00.
Gjatë këtij takimi, në kuadër të vizitës së Papa Françeskut në Shqipëri, në 21 shtator 2014, sheshi “Nënë Tereza” do të ndryshojë tërësisht pamje. Këshilli Bashkiak i Tiranës vendosi akordimin e fondit prej 332 milionë lekësh për ndërhyrjen dhe rivitalizimin e sheshit “Nënë Tereza”, si dhe dhënien e titullit “Qytetar Nderi” i Tiranës, Atit të Shenjtë.
Më 9 gusht 2014 në Sheshin “Nënë Tereza” në kryeqytet kanë nisur punimet për rindërtimin e tij, pasi më 21 shtator do të mbahet mesha e shenjtë dhe predikimi i Atit të Shenjtë, në kuadër të vizitës zyrtare që do të zhvillojë në vendin tonë.
Projekti pë rehabilitimin e këtij sheshi është hartuar nga Instituti i Monumenteve të Kulturës dhe u miratua në datën 15 Korrik 2014 nga Këshilli Kombëtar i Restaurimeve.
Komisioni shtetëror për vizitën e Papa Françeskut në Shqipëri, që drejtohet nga Ministrja e Kulturës, Mirela Kumbaro , i ngritur për organizimin e punës dhe aktiviteteve që do bashkërendohen me rastin e vizitës së Papa Françeskut më 21 shtator, ia ngarkoi Bashkisë së Tiranës ekzekutimin e projektit për ndërhyrje rehabilituese në sheshin “Nënë Tereza”
Ndërhyrjet rehabilituese parashikojnë nivelimin e sheshit qendror pas heqjes së strukturës së shatërvanit në qendër të tij, i cili tashmë është vlerësuar si i amortizuar, krejtësisht jashtë funksionit dhe jokoherent me kontekstin arkitektoniko-urbanistik të sheshit.
Shkallaret që rrethojnë sheshin do të restaurohen tërësisht, pjesët e munguara të travertinave do të zëvendësohen me të njëjtin material dhe trotuaret do të plotësohen me mozaikun e veshjes sipërfaqësore.
Fasadat e objekteve që ballafaqohen me sheshin do të pastrohen plotësisht. Objekteve të Universitetit Politeknik të Tiranës, Akademisë së Arteve, Qendrës së Studimeve Albanologjike dhe Rektoratit do t’u kthehet hijeshia e pamjes së tyre fillestare.
Koncepti i ndriçimit të sheshit do të ndryshojë tërësisht: në qendër të sheshit do të pozicionohen ndriçues të lartë dhe në perimetrin e tij ndriçimi do të jetë i ulët. Gjithashtu do të unifikohet ndriçimi sipërfaqësor i bardhë i fasadave të objekteve dhe do të vihet në pah volumetria e tyre me anë të ndriçimit ngjyrë blu.
Në pjesën e kolonadës do të hiqet struktura e përkohshme e Fast Food ‘Kolonat’, duke rikthyer identitetin e kompleksit në tërësinë e tij.
Hapësira përgjatë dy krahëve të Universitetit Politeknik do të çlirohet nga ndërtimet dhe do të kthehet në hapësirë të gjelbër.
Qeveria shqiptare me VKM e posaçme të mbledhjes së fundit të Këshillit të Ministrave ndihmoi në krijimin e kuadrit ligjor dhe financiar që bën të mundur fillimin e kryerjes së punimeve në një kohë sa më të shpejtë.
Afati i përfundimit të ndërhyrjeve në sheshin “Nënë Tereza” , maksimalisht do të jetë data 10 shtator 2014. Komisioni Shtetëror, i kryesuar nga Ministria e Kulturës është duke ndjekur hap pas hapi të gjitha fazat për organizimin e punës.