s p – Page 2154 – Dielli

Datë historike-22 Korrik 2010: Kosova e pavarur fituese në Gjykatën Ndërkombëtare të Drejtësisë pas ankesës së Serbisë

July 22, 2022 by s p

-Para 12 viteve, në 22 Korrik 2010, Kosova shtet doli fituese në Gjykatën Ndërkombëtare të Drejtësisë (GJND) pas një ankese që Serbia kishte dërguar kundër shpalljes së Pavarësisë në 17 Shkurtin historik 2008/

-Në intervistën ekskluzive që kam zhvilluar në ditën e Vendimit të Gjykatës Ndërkombëtare të Drejtësisë, Ministri i Jashtëm Kosovar Skender Hyseni fliste në telefon nga Haga: Sigurt se do të ketë njohje të reja për Kosovën…/

Kalandar-Gazeta DIELLI nga korrespondenti në Kosovë Behlul Jashari

PRISHTINË, 21 Korrik 2022/ Kosova fituese përballë Serbisë doli para 12 viteve, kur Vendimi i Gjykatës Ndërkombëtare të Drejtësisë u dha pas një ankese që Serbia i kishte dërguar kundër shpalljes së pavarësisë së Kosovës.

Në 22 Korrik 2010, Gjykata Ndërkombëtare e Drejtësisë ka konkluduar se miratimi i Deklaratës së Pavrësisë së Kosovës në 17 Shkurt 2008 “nuk e ka shkelur të drejtën e përgjithshme ndërkombëtare, as rezolutën 1244 të Këshillit të Sigurimit e as Kornizën Kushtetuese”.

“Prandaj, miratimi i kësaj deklarate nuk e ka shkelur asnjë rregull të aplikushme të së drejtës ndërkombëtare”, theksohej më tej.

Atëherë, para 12 vitesh, ministri i Jashtëm i Kosovës, Skender Hyseni, e cilësonte vendimin e Gjykatës Ndërkombëtare të Drejtësisë si “të qartë” dhe që “nuk lë vend për dyshime”, se pavarësia e Kosovës është bërë në përputhje me të drejtën ndrëkombëtare.

“Gjykata konstatoi, me shumicë dërmuese, se Deklarata e Pavarësisë së Kosovës nuk ka shkelur të drejtën ndërkombëtare. Mendimi i Gjykatës është eksplicit dhe i qartë, dhe nuk lë vend për dyshim”, thuhej në deklaratën e ministrit Hyseni, pas vendimit të Gjykatës Ndërkombëtare të Drejtësisë në lidhje me pavarësinë e Kosovës.

“Gjykata Ndërkombëtare e Drejtësisë ka vendosur në favor të Kosovës në të gjitha pikat”, vazhdonte më tej deklarata.

“Tani presim njohje të mëtejme të Kosovës. U bëjmë thirrje shteteve që e kanë shtyrë njohjen e Republikës së Kosovës në pritje të Mendimit të Gjykatës, që tani të vendosin për njohjen (e Kosovës)”, thuhej në deklaratën e ministrit të Jashtëm të Kosovës.

Menjëherë pas këtij zhvillimi me rëndësi historike, në një deklaratë të anëtarëve të Grupit Drejtues Ndërkombëtar për mendimin këshillues të Gjykatës Ndërkombëtare të Drejtësisë rikonfirmohej mbështetja e palëkundur për pavarësinë e pakthyeshme të Kosovës dhe bëhej thirrje për njohje.

“Grupi Drejtues Ndërkombëtar rikonfirmon mbështetjen e palëkundur të tij për pavarësinë e pakthyeshme të Kosovës demokratike dhe shumetnike në kufijtë e saj të tanishëm dhe i bën thirrje shteteve tjera që të njohin Kosovën. Ai po ashtu përshëndet përkushtimin e vazhdueshëm të Kosovës dhe progresin e konsiderueshëm në zbatimin e Propozimit Gjithëpërfshirës për Statusin dhe do të vazhdojë të mbështesë Kosovën në punën për realizimin e perspektivës së saj evropiane”, theksohej në deklaratë.

Grupi Drejtues Ndërkombëtar (ISG) për Kosovën, i cili përbëhej nga vendet që e kanë njohur Pavarësinë, ishte formuar në 28 Shkurt të vitit 2008 dhe synonte të orientojë dhe mbikëqyrë zhvillimin demokratik të Kosovës, të nxisë qeverisjen e mirë dhe shumetnicitetin, bazuar në Propozimin Gjithëpërfshirës të emisarit të posaçëm të OKB-së, kryenegociatorit për statusin, Martti Ahtisaari.

ARKIV, 22 KORRIK 2010 – INTERVISTA QË KAM ZHVILLUAR NË DITËN E VENDIMIT TE GJND – MINISTRI HYSENI FLET NGA HAGA: ME BEOGRADIN NUK DO TË KETË BISEDIME PËR STATUSIN E KOSOVËS, NDARJE APO SHKËMBIM TERRITORESH

-Ministri i Jashtëm Kosovar Skender Hyseni në intervistën ekskluzive që kam zhvilluar në ditën e Vendimit të Gjykatës Ndërkombëtare të Drejtësisë (GJND) para 12 viteve: Marrëdhëniet e mira me Serbinë, interes i përbashkët për integrim në BE e NATO/

Opinioni i Gjykatës Ndërkombëtare të Drejtësisë (GJND) tregoi qartë se pavarësia e Kosovës nuk ka krijuar asnjë precedent dhe se është në interes të Ballkanit Perëndimor, deklaronte ministri i Jashtëm Kosovar Skender Hyseni në një intervistë ekskluzive që kam zhvilluar para 12 vitesh për Agjencinë Shtetërore-Zyrtare të Lajmeve të Shqipërisë. “Opinioni këshilldhëns i GJND-së, tregoi qartë se pavarësia e Kosovës, nuk ka krijuar asnjë precedent dhe se është në interes të Ballkanit Perëndimor”, tha ministri Hyseni, në intervistë telefonike nga Haga.

Ministri Hyseni në 22 Korrik 2010 ishte i pranishëm kur GJND dha mendimin këshillimor në lidhje me pavarësinë e Kosovës.

Gjykata Ndërkombëtare e Drejtësisë u shpreh në favor të pavarësisë së Kosovës. Presidenti i GJND-së Hiasashio Ovada deklaroi se pavarësia nuk shkel të drejtën ndërkombëtare.

Shefi i diplomacisë kosovare tha se, “ne e dimë që Kosova dhe Serbia e kanë të ardhmen e tyre në BE dhe NATO, e për këtë arsye marrëdhëniet e mira fqinjësore janë të domosdoshme”. Ai nënvizoi se “këtë fakt, e kemi përcaktuar qartë prej kohësh, tani është në dorën e Serbisë që të tregohet në nivelin e përgjegjësive të duhura”.

Hyseni vuri në dukje se “nga vendimi i GJND-së, nuk ka asgjë që do të mund linte mundësi sado të vogla që të hidheshin dilema rreth shtetësisë së Republikës së Kosovës”.

Ministri pohoi se normalizimi i raporteve Kosovë-Serbi varet ekskluzivisht nga Serbia. “Kemi shprehur vullnetin për raporte të mira fqinjësore me Serbinë, sikurse i kemi ndërtuar me të gjithë fqinjët e tjerë por ky rast është interes i përbashkët”, tha ai.

Hyseni rithekson faktin se me Beogradin nuk do të ketë bisedime për statusin e Kosovës, ndarje apo shkëmbim territoresh, ide rreth të cilave është spekuluar muajt e fundit. “Kosova dhe Serbia janë fqinjë të përhershëm dhe si të tillë, sot apo nesër, pas një kohe apo pas shumë kohësh, do duhet të bisedojnë për çështje të natyrës praktike që i lidhin këto vende të pavarura dhe sovrane”, tha Hyseni.

Ministri i Jashtëm kosovar, Skender Hyseni, u shpreh i sigurt se do të ketë njohje të reja për Kosovën pasi ka një numër vendesh që janë zotuar për këtë ndërsa u bëri thirrje shteteve që nuk e kanë njohur ende, e veçanërisht atyre vendeve që kanë pritur opinionin këshilldhënës të GJND-së, që ta bëjnë këtë sa më parë.

Kosova shpalli pavarësinë në 17 Shkurt 2008 dhe deri tani është njohur nga 69 shtete, theksohej në fund të intervistës së 22 Korrikut 2010.

Ndërsa, deri tani – 12 vjet pas Opinionit të Gjykatës Ndërkombëtare të Drejtësisë Kosova është njohur nga 117 shtete anëtare të Organizatës së Kombeve të Bashkuara.

GAZETA TRADICIONALE E KOSOVËS RILINDJA PËR 17 SHKURTIN HISTORIK 2008

Gazeta tradicionale e Kosovës Rilindja për 17 Shkurtin historik 2008 doli numër i jashtëzakonshëm festiv me kryetitullin me shkonja ngjyrë ari: KOSOVA SHPALLI PAVARËSINË BOTA E NJEH SHTETIN MË TË RI.

Po në ballinë, nën imazhet e nënshkrimit të Deklaratës së Pavarësisë së Kosovës, të Flamurit e Stemës së shtetit të ri evropian dhe fishekzjarreve të festimeve në Prishtinë, Rilindja shkruante poashtu me shkronja ngjyrë ari: 17 SHKURTI 2008 DITA MË E MADHE SHQIPTARE PAS 28 NËNTORIT 1912 TË PAVARËSISË SË SHQIPËRISË.

Lart te logoja po në faqen e parë shkruante: RILINDJA JU URON SHPALLJEN DHE NJOHJEN E KOSOVËS SHTET I PAVARUR.

VATRA PËRSHËNDET REZOLUTËN E KUVENDIT TË SHQIPËRISË KUNDËR RAPORTIT TË DIKC MARTYT

July 22, 2022 by s p

Federata Panshqiptare e Amerikës VATRA përshëndet rezolutën e Parlamentit të Republikës së Shqipërisë që votoi kundër raportit të ish -të dërguarit të Këshillit të Evropës Dikc Martyt duke i konsideruar të pabaza pretendimet e ngritura në këtë raport. Federata Vatra është e bindur se lufta e Ushtrisë Çlirimtare të Kosovës kundër okupatorit serb dhe regjimit gjenocidal të Millosheviçit ka qenë luftë e pastër, e ndershme, e drejtë dhe çlirimtare. Vatra shpreh bindjen e thellë se pretendimet e ngritura në Raportin e Dick Martyt janë të paargumentuara, të paprovuara dhe të pabazuara në prova dhe fakte. Federata Vatra u bën thirrje edhe institucioneve kombëtare e ndërkombëtare që ta rrëzojnë këtë Raport si të pavërtetë. Vatra, vatranët dhe shqiptaro-amerikanët krenohen me luftën heroike të UÇK-së. Askush nuk do të guxojë asnjëherë që ta njollosë apo baltosë luftën e UÇK për çlirimin e Kosovës. Vatra është e bindur se Lufta e UÇK ishte një luftë e drejtë dhe heroike për t’u çliruar prej gjenocidit e pushtuesit serb.

Me bindje të thellë e respekt

Kryetari i VATRËS

Elmi BERISHA

“Ukraina, si funeral poshtërues i Perandorisë Putiniste”

July 22, 2022 by s p

*Gjeneral Piro AHMETAJ/

Kam ndjekur me interes dhe përgjegjesi shtesë dinamikën 5 mujore të luftës në Ukrainë: “10-ra konferenca të Këshilit të Atlantikut, panele të Ekpertëve dhe personaliteteve elitare të sigurisë në Washington, Bruksel, Munich Security Conference, Qëndrën Marshall, Gjermani, Londër, Kolegjin e NATO-s Romë, Samitin e Madridit, etj“!

Megjithë, sigurisht respektin për disa gazetarë me integritet dhe kurajo Euroatlantike, kam refuzuar me vetëdije të bëhem pjesë e “tallavasë mediatike”, pasi “përtej modestisë së tepëruar” nuk kam kohë të shpërdoroj me të dalldisur nga fuqia e mbiPushtetit; me shterpësinë e mendimit të kuvendarëve “të emëruar nga Kryetarët”, analistëve të gjithëditur apo rambo-strategëve të vetë (de) degraduar mbi harta me avion, raketa, tanke, “bunkerë atomik dhe rezerva strategjike për ditët e qametit” duke e shpjeguar kështu “luftën, jo vetëm për Ukrainën” nga studio “kapterësh trudhjamosur me konceptet e luftës II-të botërore, në mos atyre më herët”!

Gjithësesi duke vijuar në linjë me 10-ra analiza të publikuara përgjatë 5 muajve të luftës, si dhe besuar se kolegët e fushës dhe opinioni mbarëKombētar ka nevoj për këndveshtrime realiste, pse jo dhe optimiste, po paraqes një përmbledhje të përditësuar rreth humbjes së pashmangshme të luftës, ose me fjalë të tjera “Ukraina, si funeral poshtërues i Perandorisë Putiniste“:

Së pari, mbas 5 muajsh lufte rraskapitëse, Rusia ka fituar disa beteja (objektiva rajonale në Donetsk, Luhansk, Kherson, etj), por me kosto shumë të lartë dhe HUMBJE të mëdha: “rreth 40 mijë ushtarak kanë mbetur të vrarë, 6500 tanke & trasportues të blinduar, 1200 helikopterë, avjone ushtarak, përfshi UAV (pa pilot), 1500 artileri dhe sisteme raketore, 15 anije luftimi, etj. Kjo luftë, sipas raporteve të agjensisive të njohura, në vetëm 5 muaj i ka kushtuar Moskës mbi 10 Miliard $ në ditë, ndërsa në total 1.5 Bilion Dollarë” !

Për ta bërë edhe më të qartë, përmasat e një humbje në Ukrainë, po sjell vetëm shifra të (pa) krahasueshme të humbjeve të BRSS në luftën gati 10 vjecare (1979-1989) në Afganistan: “13.621 ushtarë, 451 helikopterë dhe avionë, 147 tanke, 443 artileri e armë të tjera si dhe vetëm disa qindra Miliard $” !

Pra përveç turpëruese, humbja ishte edhe një goditje e rëndë për madhështinë e Ushtrise së Kuqe, pasi nga Afganistan, humbi dhe iku me bisht nën shalë dhe sipas strategjistëve: “u ngul gozhda e fundit në arkivolin e Bashkimit Sovjetik si dhe e ambicjeve të saj gjeopolitike për të: “thyer rrethimin e SHBA-ve dhe për të dalë në ujërat e nxehta të Azisë Jugore”.

Kështu, refereruar shifrave të dy luftrave Rusia: “në vetëm 5 muaj Luftë në Ukrainë, ka pësuar jo me pak se 10 herë më shumë humbje se sa 10 vite së bashku në Afganistan”!

Mesazhet mes shifrave flasin edhe më fortë se oshetimat e raketave vrasëse apo megafonët e Moskës zyrtare: “Makimeria ushtarake e Rusisë po zvarritet e rraskapitur drejt humbjes turpëruese të LUFTËS për pushtimin e tërësisë teritoriale të një vendi Sovran dhe të një Kombi martirësh, (Ukrainës).

Ndërsa, përtej një lufte të destinuar për të humbur me turp, kjo do të jetë edhe “fillimi i fundit me gjak të Putinit“, pinjollit të ambicjeve Staliniste dhe pjellës së makinerisë së krimit shtetëror (KGB)!

Së dyti, 5 muaj më parë, krahas luftës për pushtimin e Ukrainës: “Rusia e marrosur po sfidonte njëkohësisht rendin dhe faktorët e sigurisë globale (UN, NATO, USA) duke kërcënuar se me fuqinë e arnëve do të zgjeronte anbicjet gjeopolitike të perandorisë Putiniste”. Por është duke u rrokullisur e dështuar me turp edhe në këtë aventurë neo-Fashiste.

Kjo, falë jo vetëm rezistencës heroike të Ukrainasve, por edhe solidaritetit dhe vendosmërisë së ShBA, UN, NATO dhe BE që e: “rrethuan Rusinë me embargo ekonomike dhe diplomatike”, si dhe vijojnë ta “mbështjellin Ukrainën” me mbështetje të gjithanshme, përfshi ushtarake nga të gjitha vendet e NATOs si dhe 2 vendet skandinave (Suedia & Filanda) që në Samitin e Madridit nënëshkruan aspiratën e anëtarësimit.

Prandaj krahas humbjes së luftës në Ukrainë, Rusia do të gjynjëzohet e diskretituar edhe në përballjen me fuqinë ushtarake të USA/NATO-s, por edhe me kredibilitetin dhe interesat gjeopolitike për zgjerimin e kufijve të demokracisë të Aleancës Euroatlantike”!

Thënë këto, jam i bindur se bashkë me Luftën për pushtimin e Ukrainës, Rusia do të humbas edhe peshën gjeopolitike në botë, fatmiresisht edhe në Europën Juglindore, etj.

Së treti, ndërsa RSh do i duhet jo vetëm të dënojë nga “frengjitë e fb” luftën dhe të rreshtohet me “TikTok’s” në krah të USA & NATO-s, por edhe: “të kontribuojë me kohezion të pakushtëzuar, vendimarrje dhe kapacitete modeste në mbështetje te Ukrainës, si dhe në mbrojtje te stabilitetit, anëtarësimin në BE si dhe zhvillimin interesave Kombëtare në Rajon, Mesdhe dhe më gjerë“.

Ndërsa e siell kjo në kuadrin e pëpjekjeve për stabilitetin në Ballkanin perëndimor, shpresoj se kjo luftë do shërbejë si këmbanë e fortë arsyesh strategjike edhe për 4 vendet (Greqia, Rumania, Spanja dhe Sllovakia) për të njohur zyrtarisht dhe për t’i hapur rrugë procesit të anëtarësimit të Kosovës në NATO.

Në shtesë, me statusin e ekpertit në peshimin e rreziqeve dhe oportuniteteve të sigurisë kombētare, rajonale dhe NATO-s, do i këshilloja aktorët politik të Tiranës dhe Prishtinës zyrtare që: “humbja e luftës dhe peshës së Rusisë, rrjedhimisht edhe e fuqisë ushtarake të Serbisë në Rajon: “është një rrethanë e artë gjeopolitike për të aplikuar platformën: “dyShtete të pavarura njëKomb i vetëm” midis RSh & Kosovës si dhe integruar masat shtetërore në dobi të stabilitetit demokratik, mirëqënien dhe besimin e qytetarëve në axhendën e integrimit në BE.

Së fundmi, sfidat e faktorizimit të RSh në tavolinat e vendimarrjeve të mëdha (UN, NATO, BE) si dhe forcimi i bashkepunimit strategjik me SHBA, i gjej si një mundësi historike për të mbrojtur dhe zhvilluar interesat mbarëKombëtare në rajon, Mesdhe, etj!

Zoti e bekoftë paqen jo vetëm në Ukrainë, demokracinë, interesat gjeopolitike të RSh, fuqinē ushtarake të NATO-s si dhe Aleancën e vlerave Transatlantike.

Kuvendi i Kosovës mbajti seancë të veçantë për nder të presidentit të Shqipërisë, Ilir Meta

July 22, 2022 by s p

Nën udhëheqjen e kryetarit Glauk Konjufca, Kuvendi i Republikës së Kosovës u mblodh sot në seancë të veçantë për nder të presidentit të Republikës së Shqipërisë, Ilir Meta, i cili po qëndron në Kosovë, në vizitën e tij të fundit në cilësi të presidentit. Seanca filloi me intonimin e dy himneve, himnit kombëtar dhe himnit shtetëror të Republikës së Kosovës.

Duke i uruar presidentit Meta mirëseardhje në Kuvendin e Republikës së Kosovës, kryetari Konjufca e falënderoi atë për gatishmërinë dhe e ftoi për t’iu drejtuar deputetëve me një fjalë rasti.

Në adresimin para deputetëve të Kuvendit të Republikës së Kosovës, presidenti Ilir Meta tha se kthimi në parlament pas pesë vitesh e gjen Kosovën me zhvillime madhore, si në ndërtimin e institucioneve demokratike, ashtu edhe në arritje të konsiderueshme në rrafshin ndërkombëtar.

Presidenti Meta tha se shteti i ri i Kosovës në shumë drejtime është shembull edhe për vendet e tjera të rajonit, përfshirë këtu edhe Shqipërinë.

“Gjithçka e lidhë Shqipërinë me Kosovën. Tërësia identitare, historia, gjuha, besimi, kultura, tradita, zakonet, interesat dhe perspektiva euroatlantike. Kjo lidhje e pandashme Shqipëri- Kosovë i ka rrënjët tek gjaku i derdhur dhe sakrificat sublime të etërve të kombit dhe heronjve tanë më të lavdishëm, nga Gjergj Kastrioti Skënderbeu, tek Adem Jashari, nga Ismail Qemali tek Ibrahim Rugova”, tha presidenti Meta.

Kreu i shtetit shqiptar theksoi po ashtu se Kosova është një faktor i rëndësishëm stabiliteti në rajon, duke hedhur themele të forta dhe të qëndrueshme të shtetndërtimit, duke përqafuar kështu vlerat dhe parimet më të larta demokratike, përkushtimin në funksionimin e demokracisë parlamentare, balancën e pushteteve dhe sundimin e ligjit.

Për më tepër, Meta tha se Shqipëria e mbështet fuqimisht çdo përpjeke të Kosovës për anëtarësim në NATO dhe organizata të tjera ndërkombëtare, por që ka hapësirë të kontribuojë akoma më shumë.

“Shqipëria i ka mundësitë dhe duhet të bëjë më shumë në këtë drejtim. Si vend anëtar i NATO-s, anëtare jo e përhershme në Këshillin e Sigurimit, si vend që sapo nisi negociatat e anëtarësimit në BE, Shqipëria ka një hapësirë veprimi ende të pashfrytëzuar sa duhet në dobi të forcimit të pozitës ndërkombëtare të Kosovës dhe të anëtarësimit të saj në organizatat ndërkombëtare”, theksoi presidenti shqiptar.

Meta tha se të dyja vendet tona duhet të mendojnë dhe bashkëpunojnë edhe në mënyrë më strategjike se deri tani, duke shtuar se përparimi drejt Bashkimit Evropian duhet të jetë mision parësor dhe i palëkundur.

Tutje, presidenti Meta potencoi se Kosovës duhet t’i hiqet sa më parë regjimi i vizave, duke thënë se shtetet që nuk e kanë njohur ende atë duhet të binden për ta bërë një gjë të tillë, pasi Kosova është rast sui generis.

Ai foli edhe për rëndësinë dhe pastërtinë e luftës së lavdishme të Ushtrisë Çlirimtare të Kosovës.

“Të krenohemi për lirinë dhe pavarësinë, por të qëndrojmë më vigjilentë ndaj rreziqeve të reja që na kanosen. Historia na e jep çdo të drejtë të krenohemi me luftën çlirimtare të UÇK-së, por të kujdesemi që kjo luftë të vazhdojë të mbetet e panjollosur siç e meriton. Të mbështesim kauzën heroike të luftëtarëve për tu mbrojtur dhe çliruar nga gjenocidi. Pafajësia e udhëheqësve që sot gjenden padrejtësisht në Hagë do triumfojë mbi çdo tentativë të pashpresë që synon t’i kthejë agresorët në viktima dhe viktimat në agresorë. Kosova është jo vetëm faktor paqeje, sigurie, stabiliteti por edhe demokratizimi dhe evropianizimi në rajon”, deklaroi presidenti Ilir Meta.

PARTITOKRACIA – VIRUS I SHOQËRISË PLURALISTE

July 22, 2022 by s p

Nail Draga/

Ndonëse është pritur se do të kemi ndryshime cilësore në pluralizëm qytetarët janë të zhgënjyer sepse koncepti i depolitizimit të pushtetit edhe në pluralizëm mbetët mision i dëshiruar me pengesa nga partitë politike të cilat janë në qeverisjet lokale apo ate shtetërore, nga del se kemi të bëjmë me partitokracinë që është në kundërshtim me vlerat e demokracisë pluraliste, duke dëshmuar se kemi të bëjmë me shoqëri të pakonsoliduar dhe kundër parimeve demokratike.

Nëse në monizëm për kuadrat udhëheqëse vendoste partia ku si kriter bazë ishte përshtatshmëria politike e pastaj ajo profesionale, në pluralizëm me të drejtë është pritur që në këtë aspekt të bëhën ndryshime pozitive. Por, ndodhi e kundërta sepse edhe në pluralizëm fusha e punësimit mbeti iluzion, sepse infektimi i monizmit është bartur me besnikëri edhe në pluralizëm.

Në vend që të respektohet sistemi i vlerave , ka ndodhur e kundërta ku parësore është përkatësia partiake, duke vendosur aty kuadra partiakë pa marrë parasysh përgatitjen etyre partiake, meritokarcinë apo autoritetin shoqëror në mjedisin përkatës. Në këtë aspekt përjashtim nuk bëjnë as subjektët politike të shqiptarëve në Mal të Zi, çështje e cila nuk është në favor të vlerave shoqërore dhe demokracisë pluraliste.

Depolitizimi mision i parealizuar

Kemi të bëjmë me ambiciet e partive politike për të vendosur në struktura të qeverisjës lokale apo shtetërore individët partiak të cilët kanë qenë të angazhuar në fushatën zgjedhore apo i kanë mbeshtetur në forma të ndryshme. Një veprim i tillë ka marrë përmasa shqetësuese sepse në këtë drejtim janë angazhuar të gjitha partitë politike të cilat janë pjesë e koalicionëve qeverisëse.

Ndonëse në Mal të Zi, në sajë të rotacionit të pushtetit në sajë të zgjedhjeve parlamentare të mbajtuara me 30 gusht 2020, është pritur qe qeverisja e re te dallohej nga ajo e shkuara, ndodhi pikërisht e kundërta, sepse partitë politike fituese të zgjedhjeve në strukturat e pushtetit vendosën kuadrat partiake. I njëjti veprim është duke ndodhur edhe pas dekompozimit të shumicës parlamentare dhe formimit të qeverisë së pakicës(28 prill 2022). Sepse, tradita e trashëguar në këtë aspekt është vështirë të ndryshojë, pavarësisht deklaratave politike, nga del se depolitizimi i sistemit mbetën mision i parealizuar, që nuk është në favor të parimeve demokratike.

Përkatësia partiake e jo ajo shkollore

Nuk është çështje e panjohur se përkatësia partiake është parësore në fushën e punësimit e jo të përgatitjes shkollore. Madje resor të ndryshëm qeveritar si arsimi, shëndetësia e administrata publike janë bërë veprimtaritë kryesore duke qenë bazat e elektortatit votues të partive politike. Kemi të bëjmë me dukurinë e politizimit ku në veçanti dallohet fusha e arsimit. Madje disa shkolla partitë politike i trajtojnë si bastione të tyre, që dëshmohet përmes emërimit të drejtorëve sipas marrëveshjeve të pjesëtarëve të koalicionit në nivel qeveritar.

Duket paradoksale, por as në vendin e punëtorit sanitar nuk mund të punësohej nëse nuk i përket partisë politike, nga del se është politizuar çdo veprimtari publike shoqërore. Një veprim i tillë dëshmon se nuk vlerësohen vlerat profesionale apo shoqërore por përkatësia partiake, dukuri me pasoja shoqërore tash dhe në të ardhmën.

Përfaqësimi dhe prezantimi

Në vendet e ish kampit socialist ku ekzistonte kulti i individit pa kufizime të mandatit, në pluralizëm në sajë të zgjedhjeve mandati i pushtetit është i kufizuar duke respektuar vullnetin e qytetarëve që paraqet vlerë të demokracisë pluraliste. Në rrethana të reja kemi të bëjmë me mundësi që qytetarët përmes procesit të zgjedhjeve duke mbeshtetur subjektet politike sipas preferencës së tyre të ofrojnë ndryshime shoqërore.

Nëse e trajtojmë në këtë aspekt Ulqinin, përkatësisht qeverisjën lokale me keqardhje themi ndonëse janë mbajtur zgjedhjet lokale me pjesëmarrje me parti të ndryshme është përshtypje e përgjithshme se qeverisja lokale ka pasur pengesa subjektive si nga kuadrat përgjegjëse, korrupsioni,, nepotizmi, shpërdorimi i pozitës zyrtare si dhe nga mos funksionimi i pushtetit ligjor. Dhe një situatë e tillë është mbeshtur nga pushteti qendror të cilët këtu kanë realizuar objektivat e tyre që dëshmohet me dështimin e privatizimit, papunësinë dhe emigrimin e popullsisë në botën e jashtme.Kemi të bëjmë me dështimin e përgjithshëm për tre dekada, që dëshmon dështimin e individëve në përfaqësim dhe prezantim në strukturat të qeverisjës lokale e asaj qendrore.

Qytetarët e Ulqinit presin ndryshime

Ulqini ka nevojë për ndryshime me një pushtet lokal të përgjegjshëm e profesional që punon në favor të qytetarëve e jo të idividëve apo klanëve të ndryshme. Pas zgjedhjeve lokale të mbajtura me 28 mars 2022 dhe formimit të shumicës parlamentare(Koalicioni “Fillimi i ri” dhe Forca) me 19 këshilltarë qytetarët presin ndryshime në nivelin lokal sidomos kur nga Ulqini është edhe kryeministri i Qeverisë së Malit të Zi(D.Abazoviqi). Është ky një moment që duhet të shfrytëzohet, sidomos në investimet e munguara vite me radhë në Ulqin nga pushteti qendror. Andaj, të gjithë qytetarët me kureshtje presin të fillojnë të realizohen në praktikë premtimet pazgjedhore. që do të jetë në favor të qytetarëve të këtij mjedisi.

Duhen profesionist të guximshëm

Nuk ka dilemë se për ndryshime pozitive duhet angazhim konkret me individë të përgatitur dhe të guximshëm pa hipoteka për tu ballafaquar me realitetin i cili për tre dekada ka qenë degradues për Ulqinin. Por, duhet të jemi realistë se Ulqini vite me radhë ka pasur pushtet të pakonsoliduar në sajë të raportëve jo parimore me pushtetin qendror. Ndërsa tash egzitojnë gjasat të eliminohen këto divergjenca duke u konsoliduar jo vetëm në aspektin financiar, sepse nuk mund të arsyetohet e dhëna se qyteti i Ulqinit është me i varfëri në regjionin bregdetar, kur dihet se këtu janë resurse të mëdha për zhvillim ekonomik.

Andaj, ka ardhur koha për një qasje tjetër me strategji zhvillimore dhe përgjegjësi personale e institucionale e kuadrave udhëheqëse, e jo si deri më tash që pushteti lokal është trajtuar sipas interesit të individëve lokal dhe oligarkëve në nivel shtetëror.