Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

VATRA I URON MARJAN CUBIT: SHËRIM TË SHPEJTË!

by

             Prej së premetes të 18 shtatorit, miku ynë, vatrani i përkushtuar,atdhetari i papërtuar, besimtari i devotshëm,Marjan Cubi, ndodhet për mjekim në  Presbyterian Lawrence Hospital në Bronxville, New York. Gjendje e tij shëndetësore është në përmirësim të ndjeshëm dhe nën kontrollin e mjekëve. Familja e tij shembullore, natë e ditë, është pranë tij. Po ashtu edhe Vatra me kryetarin Dritan Mishto, zv. kryetarin Agim Rexhaj, sekretaren Nazo Veliu,anëtarin e kryesisë Zef Balaj, anëtarin e këshillit Mark Mrnacaj, Editorin Dalip Greca, vatranët Asllan Bushati, Veiz Belliu e të tjerë i kanë bërë vizita në spital dhe kanë uruar familjen për urim të plotë dhe të shpejtë. Interesimi i komunitetit ka qenë maksimal. Shumë telefonata nga Kosova dhe jo vetëm, kanë uruar familjen për shërim të shpejtë.

               Marjan Cubi është jo vetëm anëtar i kryesisë së Vatrës dhe arkëtar i saj, jo vetëm shqiptari i parë prej Kosove i anëtarësuar në Vatër, jo vetëm ish kryetar i LDK-së për SHBA, por edhe drejtor i Qendrës Kulturore”Nëna Terezë” pranë Kishës Katolike Shqiptare “Zoja e Shkodrës”, si dhe ishet arkëtar për grumbullimin e fondeve për Katedralen “Nënë Tereza” në Prishtinë”, ku shqiptarët e Amerikës dhuruan më shumë se 1,3 milionë dollarë. Nuk ka veprimtari ku të mos ketë qenë i pranishëm Marjan Cubi, në Uashington, Ohajo, Micigan, Nju Jork, nuk ka demonstrim a manifestim për Kosovën,të drejtat e shqiptarëve në Mal të Zi, në Luginën e Preshevës, të gjitha trojet kombëtare, Camërinë, ku të mos ketë qenë i pranishëm aktiv Marjan Cubi. I dalluar në Vatër, i papërtuar në Kishë, atdhetar dhe besimtar shembullor. Nënë Tereza është idhulli i tij, e takoi në gjallje të saj, por shkoi edhe në Kalkutë për ta përcjellë në banesën e fundit Shenjtëreshën me gjak shqiptar. Tash dy vjet ai me familje dhe krahinë organizon Festën e Shën Nënë Terezës në Nju Jork. Sikur të gjithë të ishim kaq aktivë sa Marjan Cubi, komuniteti ynë do të ishte më dinamik, dhe më i bashkuar.

Shërim të Shpejtë, miku ynë, Marjan CUBI!

TURNEU ‘RRETH BOTES ME MUZIKE’ NE NJU JORK

by

Nga Rafaela PRIFTI/

Tri artistë të kalibrit më të lartë të muzikës Inva Mula, Genc Tukiçi, Olen Cezari e sollën artin e tyre në Nju Jork, si pjesë e turneut të vjeshtës 2019. Pas shfaqjeve të mirëpritura nga komuniteti në tri qytete kanadaze Toronto, Ottava, Montreal, dhe suksesit të koncertit të tyre në Roçester, Miçigan, në fund të muajit shtator, trioja e ambasadorëve të njohur të artit shqiptar ngriti peshë spektatorët në Nju Jork-ut në datën 5 Tetor.  Programi i mbrëmjes i konceptuar si një udhëtim muzikor përmban polivalencë kuptimore dhe emocionale si për artistët edhe për publikun. Në fillim të shfaqjes sopranoja prestigjioze Inva Mula doli në skenën e Grand Prospect Hall dhe u përshëndet me duartrokitje të forta. Kur ajo i falenderoi pjesëmarrësit me dashamirësi dhe tha se do ta fillonte programin me këngën ‘Globi rrotullohet’ kënduar në Festivalin e Fëmijëve në Shkodër, një entuziast nga salla nuk u përmbajt dhe foli me zë të lartë: “E mbajmë mend!” Ashtu vërtet! Artisja e skenave më të mëdha të botës nuk ka qenë kurrë larg mendjes dhe zemrës së bashkëatdhetarëve, Shfaqja në Nju Jork vetëm se e përforcoi praninë e përhershme të saj mes nesh! Midis të ftuarve dhe spektatorëve që hynin në sallën e Grand Prospect Hall, ishin anëtarë të trupit diplomatik, biznesmenë, funksionarë, artistë shqiptarë e amerikanë, të gjithë adhurues të trios me karierë artistike ndërkombëtare.    




Preludi i koncertit me potpurinë shqiptare të aranxhuar për piano nga mjeshtëri Genc Tukiçi, dhe në vijim, kompozimet e interpretimet virtuoze nga violinisti i talentuar Olen Cezari burojnë nga një pikë e globit: vendlindja e të tre artistëve shqiptarë me famë botërore. Kabaja e jugut, jaret shkodrane, serenatat korçare janë pikënisja dhe pikëlidhja e të gjithë neve që sot jemi pjesë e një komuniteti të madh jashtë atdheut. Odeta Hoxha, asistentja e artistes së famshme operistike dhe bashkëorganizatore e turneut në Montreal, thotë se në kohën kur e kemi dëgjuar “Globin” si fëmijë në Shqipërinë e mbyllur nuk mund ta imagjinonim se ne do ishim ata që do bëheshim ‘shtegtarë të këtij rruzulli’. Atëherë shtegtimi si tema e turneut bëhet shprehje e unit tonë të përbashkët.

  

Në vetë konceptimin e koncertit, udhëtimi e gjen shprehjen artistike tek repertori i përzgjedhur mirë. Pjesë muzikore italiane të tilla si Cinema Paradiso për piano dhe violinë janë ‘një duet intrumental’ i dy maestrove, Genc Tukiçi dhe Olen Cezari të cilët janë në gjendje të transportojnë publikun në kohë dhe hapësirë. Intrepretimet unike të disa baladave klasike si ‘Parla piu piano’ dhe ‘Non ti scordar di me’ nga sopranoja Inva Mula janë të pashoqe. Meqë në atë ndërtesë të Grand Prospect Hall kishte kënduar tenori i madh i të gjitha kohërave Enrico Caruso, në program u këndua balada e kompozuar nga kantautori dhe bashkëatdhetari i tij Lucio Dalla, i cili e ka vlerësuar Olenin si ‘gjeniun e violinës’ dhe ka pasur disa bashkëpunime me të. Pra, siç tha Inva, kënga Caruso ishte “homazh” kushtuar nga artistët për artistin dhe gjithë artistët. Më tej, ajo ftoi në skenë sopranon shqiptare Dëshira Ahmeti-Kërliu me të cilën interpretoi në duet këngë qytetare korçare. Kërliu këndoi solo arian Summertime nga Gershwin. E lindur në Shkup dhe e ngjitur në skenat e operave botërore prej njëzet e pesë vjetësh, Dëshira ka pasur fatin të edukohet si artiste nën drejtimin e sopranos Nina Mula në Tiranë. Për pjesën e turneut në Nju Jork, Dëshira, e cila ishte organizatore bashkë me bashkëshortin, tha se “ka shumë për të thënë lidhur me këtë pikë” dhe do ulemi të bisedojmë sapo të jetë e mundur. Një artiste tjetër u ftua në skenën e koncertit në Nju Jork. Ana Golja, aktore dhe këngëtare me prejardhje shqiptare nga Toronto, si një yll në ngjitje në fushën e filmit dhe muzikës. 

Duke u nisur nga ajo pikë e vogël në rruzullin tokësor, udhëtimi muzikor kalon nëpër Itali, Argjentinë e Francë dhe përsëri kthehet në viset jugore të Italisë aty ku ‘gjaku ynë i shprishur” – il nostro sangue sparso – ka krijuar xhevahirë si ‘O e bukura More’ dhe ‘Lule Lule’. Në pjesët e programit si tek këngët qytetare korçare, Margjelo dhe Eja, eja lule borë, Inva i fton spektatorët të këndojnë nga salla dhe me ëmbëlsi bëhet drejtuese e një korri entuziast.

Të lidhur nga respekti për mjeshtërinë artistike të njëri-tjetrit dhe dashurinë për artin e muzikës, të tre artistët e mëdhenj i paraqitën talentet e tyre në çdo pjesë të mbrëmjes duke lejuar të shkëlqente secili në artin e vet. 

Pas përfundimit të koncertit, miqtë dhe spektatorët adhurues prisnin me radhë të përshëndesnin artistët dhe fotografoheshin me ta. Ishte një maratonë me aparate dhe blice të kamerave të publikut që kishin marrë pjesë në udhëtimin rreth globit me tri artistët shqiptarë dhe donin ta fiksonin momentin në përjetësi. 

Baritoni i njohur shqiptar Kreshnik Zhabjaku i cili ka një karierë të bujshme skenike, kujton paraqitjen koncertale në Town Hall, Nju Jork, ku ai interpretoi me artistë si Inva Mula, tenori Riad Ymeri, soprano Dëshira Ahmeti-Kërliu. Të lidhur me profesionin dhe njohje familiare, nëna e Kreshnikut, Nermin Zhabjaku, pianiste e shquar e Teatrit të Operës dhe Baletit, ka shoqëruar me piano edhe prindërit e Invës, artistët Nina e Avni Mula. Duke shprehur adhurim dhe kënaqësi për koncertin në Nju Jork, baritoni Kreshnik Zhabjaku thotë se ata janë “artistë të mrekullueshëm që dinë t’i japin kënaqësi të veçanta publikut. Një koncert që me ëmbëlsinë dhe virtuozitetin në skenë më dhanë edhe një herë bindjen pse unë si këngëtar klasik bëj këtë punë që kam zgjedhur. Shkëlqimi në sytë e spektatorit është pagesa më e vyer për artistin. I uroj suksese të mëtejshme grupit!”  

—————————————————————————————-

Shënim nga editori: Pas Nju Jorkut turneu shkon në Arligton, Massachusets ku me datën 8 tetor do të jepej shfaqja në Regent Theater nën kujdesin e organizatores Edlira Athanas Joseph në emër të Shoqatës Shqiptare-Amerikane BESA. Dielli publikoi shkrimin e kolegut tonë Fuat Memelli për koncertin e trios së famshme shqiptare aty. 

VËLLEZËRIT BYLBYL DHE FREDD MARKU ME FAMILJE HAPIN TË PAME

by

ZEF MARKU- 3 Prill 1942 – 1 Tetor 2019 /

–  ME 20 TETOR 2019, NGA ORA 10 .A.M.- 4.P.M., NË ROYAL REGENCY HOTEL,YONKERS, NY/
 
Fredd dhe Bylbyl, djemtë e të ndjerit Zef Marku, që ndërroi jetë me 1 Tetor 2019 në Tiranë, njoftojnë KOMUNITETIN:/
 
– Njoftojmë miqtë, shokë dhe dashamirët së më rastin e ndarjes nga jeta të babës tonë të dashur
ZEF MARKU- 3 Prill 1942 – 1 Tetor 2019- në Tiranë, ku edhe u varros, djemtë Bylbyl dhe Freddy Marku më familje hapin të pame (për burra dhe gra) ditën e dielë, më 20 Tetor në Royal Regency Hotel në Yonkers nga ora 10AM deri në 4PM.
Adresa: 165 Tuckahoe Rd, Yonkers 10710.
Bylbyl Marku 1 (917)673-7914
Freddy Marku 1(718)207-1068
————
The Marku family announces with great sadness the loss of their beloved father
ZEF MARKU
April 3,1942 – October 1,2019
in Tirana, where he was laid to rest. Bylbyl and Freddy Marku , sons, and family will have a viewing on Sunday, 20 October at the Royal Regency Hotel in Yonkers from 10am to 4pm.
Address: 165 Tuckahoe Rd, Yonkers 10710.
Bylbyl Marku 1(917)673-7914
Freddy Marku 1(917)207-1068
 






Një lëvizje e re shqiptaro-amerikane në Boston

by

TEKSTI DHE FOTOT:ADRIAN MURRAJ/

Reth 270 pjesëmarrës dhe dhurues të drejtpërdrejtë ju përgjigjën ftesës së lëvizjes më të re “Bashkësia Shqiptaro-Amerikane për parandalimin dhe shërimin e kancerit”. Kjo veprimtari shquhet tepër dinamike përsa i përket zhvillimit të saj pasi brenda këtij viti dëshira për të ndërgjegjësuar, qartësoi edhe më shumë misionin e kësaj lëvizjeje ku dallon bashkëpunimi i grupit organizator, të të mbijetuarve, pacientë që po trajtohen për shërim dhe grupi i gjerë i mjekëve të njohur nga “Brigham & Women’s Hospital” të Bostonit.

Njohuritë dhe përvoja e jetës për nismëtaret e Komitetit Organizator “Shqiptarët Mundin Kancerin” (Roberta Nashi, Mimoza Papargjir dhe Brunilda Shosho), shprehën më së miri qëllimin e këtij organizimi ku vemendja u pëqëndrua në njohjen dhe përpjekjet për ta mundur kancerin të cilat mund të arrihen së pari duke patur parasysh çështjet; 1- Kujdesi, 2- Parandalimi, 3- Kurimi Shërues, 4- Mbështetja, 5- Rrjeti i Bashkëpunimit, 6- Dhurimi, 7- Fusha Kërkimore, 8- Fitorja dhe të Festuarit, për një jetë sa më të shëndetshme.

Fjala përshëndetëse nga Roberta Nashi mbi këto qëllime të nismës dhe veprimtarisë u pasua nga ligjëratat e mjekëve specialistë të kësaj fushe, dr. Agim Aliaj, dr. , John Goldberg, dr. Philip Çaushaj, dr. Ivi Kasimati, dr. James M. Cleary të cilët paraqitën histori të pacientëve dhe ndërhyrjeve për shërimin e tyre për femra dhe meshuj mbi diagnostikime si, kanceri i gjirit, i mitrës, i zorrëve, prostati, kanceri i lëkurës etj.

Pra me një trajtesë kaq të gjerë veç informacionit historik dhe shkencor për parandalimin dhe trajtimin e sëmundjes që sollën mjekët me interes të veçantë u ndoqën ligjëratat e Roberta Nashi dhe Mimoza Papargjir që sollën përvojat familjare dhe personale të tyre për kapjen në kohë dhe ndjekjen e trajtimit të sëmundjes, formimin e një rrjeti shoqëror ndihme për ta përballuar dhe mundur kancerin.

Gjesti bujar i këtij takimi veç ndihmës financiare të dhënë nga shumë biznese shqiptare pati dhe dhuratat e menjëherëshme nga pjesëmarrësit duke e tejkaluar parashikimin e organizatorëve me arritjen e një shume prej 15, 300 dollarë një shumë kjo që i jepet BWH në fushën e kërkimit shkencor.

Organizatorët kishin rastin të falenderonin pjesëmarrësit për këtë mbështetje duke ndërtuar një atmosferë feste dhe gëzimi e cila u përshkua nga muzika e luajtur dhe e kënduar prej disa artistëve të njohur shqipëtar si Brunilda e Rik Hoxha, Petrika Mele, Valentin Veizi, Rachel Stoja.

Shkolla Shqipe “Alba Life”, në shkollë të re në Bronx

by

Në ditën e parë të shkollës nderoi me pjesëmarrjen e saj Ambasadorja e Republikës së Shqipërisë në Washington Ambasadore Floreta Faber/

Nga Keze Kozeta Zylo/DIELLI*/

Në mjediset e Shkollës së mesme publike amerikane Christopher Columbus e cila ndodhet në Pelham Parkway, nxënësit, mësuesit, prindërit dhe gjyshëit vinin grupe-grupe për të filluar ditën e parë të Shkollës Shqipe.  Me fytyrat e gëzuara dhe sytë që ju reflektonin vetëm dritë e bënin këtë të shtunë dhe më të shndritshme dhe më entuziaste.  Shkallët përpara shkollës u mbushën përplot dhe kush e kush me flamur shqiptar dhe amerikan në dorë i valëvisnin me krenari sa më lart në ajër.  Dielli të lëbyrte sytë dhe një fllad veror vinte herë pas here nga gjethet e pemëve që vazhdonin të rrinin si kurorë e gjelbër mbi godinën e lartë të kësaj shkolle. 

Ishte krijuar një harmoni perfekte midis natyrës dhe ditës festive në hapjen e Shkolles Shqipe në Bronx nga Alba Life.  Ndonëse mund të shihje tek tuk ndonjë nxënës që fshihej apo lotonte pas krahëve të mamit, nga përvoja e gjatë e jetës si mësuese e shkruaj me bindje se ata mësohen dhe luëzojne aq shpejt sa më vonë u kërkojnë vetë prindërve të venë sa më parë në shkollë. 

Hapja e Shkollës Shqipe në Bronx nuk ka qenë e lehë, ka qenë rrugëtim i vështirë, punë, ec e jake, por jo dhe e parealizueshme.  Prindërit falënderonin herë pas here dhe ajo që dëgjoja më së shumti nga ata ishte se jo veëm që shprehnin kënaqësinë për mësimin e Gjuhës Shqipe, por dhe tejet të kënaqur që shkolla do t’i bëj të jenë të zënë me punë kualitative se sa të qorrojnë sytë pranë I-padit.  është gjuha e nënës sime më tha një nxënës gjatë bisedave të shkurtra para mësimit, i cili më preku thellë dhe më kujtoi prozatorin e shquar Mitrush Kuteli qe thotë:

Të falem ty, o Gjuhë, hoj,

ty, zëth i nënës, qetësi,

ty, këngë e foshnjës, kaltërsi,

ty, afshi i zemrës, dashuri,

gjithmonë e ëmbël,

…mjaltë zgjoi.

Sa me krenari i dëgjoja dhe i kundroja nxënësit, kur ngjisin shkallët e shkollës me mësueset e tyre për të shkuar pranë klasave.  Si zakonisht siç bëhet në ditën e parë të shkollës u bë një ceremoni festive në mjediset lluksoze dhe komode  të librarisë së shkollës.

Moderatorja e ceremonisë ishte autorja e këtij reportazhi bashkëthemeluese e shkollave shqipe e cila në emër të bordit të shkollës iu uroi të gjithë të pranishmëve, prindërve dhe nxënësve fillim të mbarë dhe ta gëzojmë këtë shkollë të re shqipe në Bronx.  Ndonëse “Alba Life” ka hapur shkolla në të gjitha lagjet e Nju Jorkut Bronxi kishte ngelur për në fund, por populli thotë se ëmbëlsira lihet për në fund.  Ndonëse shpesh herë kishim pasur kërkesa nga prindër të ndryshëm për të hapur një shkollë shqipe në Bronx, përsëri koha shumë e zënë kishte bërë të vetën.  Por kur ne pamë se disa prindër po udhëtonin që nga Bronxi për të ardhur në Staten Island për gati 3 deri në 4 orë si psh. Familja e Elton dhe Arta Xhaferrit me të dy fëmijet u nxitëm për të realizuar një shkollë shqipe në Bronx.  Po kaq nxitëse ishte dhe lidhja me birin e UÇK-së Blerim Gjocaj i cili ëndërronte që fëmijët e tij t’i sillte në shkollë shqipe dhe të mësonin gjuhën shqipe.  Ai shpesh na thoshte se betejat e luftës janë më të lehta se betejat për të mos u asimiluar dhe doemos që ja merrnim në konsideratë këtij trimi të Kosovës që familjarisht hodhën pushkën në krah dhe i dolën për Zot trojeve shqiptare.

Një kontribut shumë të dukshëm po jep dhe ish pedagogja e universitetit në Tiranë znj.Majlinda Tafaj e cila koordinon në realizimin e programit mësimor.  Të tre së bashku si Xhaferri, Gjocaj dhe Tafaj kanë rekomanduar dhe kanë punuar për të sjellë sa më shumë nxënës në shkollë.

Falënderimi shkoi dhe për mësueset Elda Gjongeci, Mirvete Krasniqi Veselaj dhe asistentet si Ergona Matoshi të cilat kanë një përvojë të mjaftueshme në mësimdhënie si në Kosovë dhe në Shqipëri dhe do të jenë pranë klasave të tyre për të dhënë mësim. 

Një urim me telefonatë erdhi nga z.Mark Gjonaj këshilltar pranë Bashkisë së Nju Jorkut dhe një lider i përkushtuar i Diasporës dhe i Kombit i cili në pamundësi për të ardhur uroi suksese për hapjen e shkollës dhe vit të mbarë.

Në këtë ceremoni nderuan nga Shoqata Shqiptaro Amerikane “Skënderbej” z.Bashkim Shehu kryetar, z.Mark Qehaja n/kryetar dhe z.Imer Lacaj financier.

Në ditën e parë të shkollës nderoi me pjesëmarrjen e saj Ambasadorja e Republikës së Shqipëisë në Washington Ambasadore Floreta Faber e cila shoqërohej nga Konsullja e Shqipërisë në New York znj.Najada Sojli. Ato u mirëpritën me lule të dhuruara nga dy nxënëse të talentuara si Amelba Xhaferri dhe Fatjona Gjocaj.   Ambasadorja Faber bisedoi nëpër tavolinat ku ishin ulur nxënësit dhe i përshëndeste ata për ditën e parë të shkollës.  Fjala e saj ishte mbresëlënëse tek të gjithë të pranishmit.  Midis të tjerash Ambasadorja Faber tha se unë gjithmonë e kishja planifikuar për ta vizituar Shkollën Shqipe “Alba Life” dhe ja sot jam shumë e gëzuar dhe po marr pjesë në hapjen e një shkolle shqipe në Bronx.  Kur shikoj posterat e ndryshëm dhe në njerin prej tyre lexoj si: “Ti Shqipëri më jep nder më jep emrin shqiptar” dhe vazhdoi duke interpretuar zemrën ti ma gatove plot me dëshirë e me zjarr shkruar nga kryerilindasi Naim Frashëri emocionohem dhe më ngazëllehet shpirti që gjeneratat në Diasporë luftojnë dhe punojnë për të mbajtur gjallë gjuhën, traditat dhe kulturën shqiptare.” 

Ambasadorja Faber falënderoi z.Qemal Zylo themelues dhe drejtor i Shkollave Shqipe Alba Life së bashku me stafin e shkollës dhe njoftoi se nesër në një ceremoni në Manhattan Shkolla Shqipe “Alba Life” do të vlerësohet si Ambasador i Kombit, vlerësim që u mirëprit me duartrokitje nga të gjithë të pranishmit.

Qemal Zylo i falënderoi të gjithë nxënësit, prindërit dhe mësuesit qe i janë bashkuar programit serioz të Shkollës Shqipe “Alba Life” dhe iu uroi që ta gëzojmë së bashku Shkollën Shqipe në Bronx. 

Më vonë Ambasadorja Faber shkoi në të gjitha klasat dhe iu dhuroi nxënësve në emër të shtetit shqiptar librat e abetares dhe një kontigjent librash dhe iu premtoi se do të sjellë libra pësëri në të ardhmen.

Dita e parë e shkollës dhe ceremonia festive u filmua nga z.Qazim Doda producent dhe themelues i TV “Albanian American Vision” si dhe nga TV “Alba Life” me kameraman Elton Xhaferri dhe Glen Nutaj.

E shtuna në Bronx ishte një ditë e veçantë, e bekuar, sepse ishte nje ditë që i falej Gjuhes Shqipe, Gjuhes sonë Hyjnore!  Udha e shkronjave do të vazhdojë e ndritur përjetësisht!

21 shtator, 2019

Bronx, New York

* per me shume foto shihni ne Facebook-dielli vatra