Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Delegacioni i Këshillit të Ambasadorëve Shqiptarë (KASH), gjatë vizitës në Kosovë u pritë në takime të veçanta pune në zyrat e Grupeve Parlamentare të opozitës në Parlamentin e Kosovës

by

Prishtinë, 17 Dhjetor 2022.

Në vijim të vizitës zyrtare në Prishtinë, delegacioni i Këshillit të Ambasadorëve Shqiptarë (KASH), zhvilloi takime të veçanta pune me Kryetaret e Grupeve Parlamentare dhe anëtarë të G.P të opozitës parlamentare në Parlamentin e Kosovës.

Delegacioni i KASH u prit nga z. Arben Gashi, kryetar i Grupit Parlamentar të Lidhjes Demokratike të Kosovës (LDK), z. Abelard Tahiri, kryetar i Grupit Parlamentar të Partisë Demokratike të Kosovës (PDK) dhe z. Besnik Tahiri, kryetar i Grupit Parlamentar të Aleancës për Ardhmërinë e Kosovës (AAK).

Kryetarët e Grupeve Parlamentare të LDK, PDK dhe AAK, në këto takime ishin të shoqëruar nga deputetët e partive përkatëse anëtar dhe drejtues të Komisonit të Jashtëm, të Integrimeve Europiane dhe Komisionit të Sigurisë të Parlamentit të Kosovës.

Gjatë këtyre takimeve, u shkëmbyen mendime e vlerësime në lidhje me zhvillimet më të fundit në Kosovë dhe në rajon, gjithashtu u dhanë sugjerime për bashkërendimin e përpjekjeve dhe iniciativave, në funksion të zgjidhjes së situatës së krijuar në veriun e Kosovës, si dhe të avancimit të përmbushjes së objektivave eurointegruese të vendeve tona.

Këshilli i Ambasadorëve Shqiptarë (KASH) vlerësoi zhvillimin e proceseve të brendshme demokratike në Republikën e Kosovës, si një shembull për të gjithë rajonin. Nga ana e KASH u vlerësua lart se si zhvillohen zgjedhjet dhe procesi demokratik si dhe respektimi dhe moskontestimi i rezultatit të tyre nga ana e qytetareve, por edhe nga të gjitha institucionet e Republikës së Kosovës.

Në konteksin e zhvillimeve të fundit në Kosovë, u vlerësua si një ngjarje sa historike, aq edhe e argumentuar e plotësisht e mbështetur në arritjet e standarteve të kërkuara evropiane nga ana e Republikës së Kosovës, aplikimi i Kosovës për anëtarësim në Bashkimin Evropian.

Anëtarët e delegacionit të KASH në badhkëbisedim me kryetarët dhe anëtarët e Grupeve Parlamentare të LDK, PDK dhe AAK, theksuan rëndësinë e përqëndrimit të të gjitha përpjekjeve në drejtim të negociatave Kosovë-Serbi, të ndërmjetësuara nga BE dhe Shtetet e Bashkuara të Amerikës, përkundër përpjekjeve te Beogradit, edhe nëpërmjet veglave të tij në veriun e Kosovës, për të përshkallëzuar artificialisht tensionet, me qëllim bllokimin e negociatave për normalizimin dhe njohjen reciproke të dy vendeve, që do të shërbenin për forcimin e mëtejshëm të paqes, sigurisë, stabilitetit dhe zhvillimit të të gjithë rajonit.

Këshilli i Ambasadorëve Shqiptarë (KASH) beson se unifikimi i faktorit politik shqiptar dhe kapërcimi i ndasive politike të momentit, për përballimin e situatës së krijuar me Serbinë, janë me një rëndësi themelore kombëtare.

Gjatë bashkëbisedimit të delegacionit të KASH me kryetarët e G.P të Parlamentit të Kosovës, me theks të veçantë u diskutua për rolin e pazëvendësueshëm të Diplomacisë Parlamentare, e cila po merr një rol gjithnjë e më të rëndësishem kudo në Europë dhe botë, si një instrument i mirë për lidhje direkte dhe plasimit të vërtetës për Kosovën dhe zhvillimeve rreth saj.

Kryetarët e Grupeve Parlamentare të LDK, PDK dhe AAK, u shprehën se përcjellin me vëmendje veprimtarinë e KASH dhe vlerësuan rolin e Këshillit të Ambasadorëve Shqiptarë (KASH) në këto momente delikate për Kosovën. Gjithashtu u shprehë gatishmeria dhe angazhimi i plotë intyre për koordinim dhe bashkëpunim në mes të Grupeve të tyre Parlamentare dhe KASH.

KASH u shpreh se eshtë i gatshëm për të ndihmuar me të gjitha kapacitetet e veta, si me përvojën dhe kontaktet diplomatike dhe miqësore kudo që ka mundësi, por edhe me vlerësime gjeopolitike, në mbështetje të anëtarësimeve të Kosovës në organizata të ndryshme ndërkombëtare, sidomos edhe me angazhim me lidhjet që ka KASH në shtetet mosnjohëse të Kosovës.

P.S.

Delegacioni i Këshillit të Ambasadorëve Shqiptarë :

1. Prof. Edmond Panariti, Ish Ministër i Punëve të Jashme – Anëtar i Asamblesë së KASH.

2. Amb. Genci Mucaj, Anëtar Bordi – Drejtor Ekzekutiv i KASH.

3. Amb. Flamur Gashi, Anëtar Bordi – Drejtor për Rajonin dhe Diasporën në KASH.

4. Amb. Spiro Koçi Anëtar Bordi – Sekretar i Përgjithshëm i KASH.

5. Ambasador Avni Spahiu, Koordinator i KASH për Kosovën – Anëtar i Asamblesë së KASH.

6. Skender Thaci – Anëtar i Bordit Këshilldhënës të KASH.

Kosova ka burra e gra që e mbrojnë Atdheun e tyre

by

Armend Mehaj/

I vetmi zhvillim i Serbisë këto 23 vite është përditësimi i politikës së Millosheviqit me metodat ruse të luftës hibride!

Deklaratat e Vuçiq dhe Bërnabiq, me tentim destabilizimin e veriut të Republikës së Kosovës janë plotësisht të papranueshme.

Periudhës së shantazheve, kërcënimit, i ka ardhur fundi.

Qeveria e Republikës së Kosovës, të gjitha autoritetet dhe institucionet e sigurisë, do të zbatojnë dhe marrim veprime në përputhje me ligjshmërinë, kushtetueshmërinë dhe obligimin që e kemi ndaj qytetarëve tanë pa dallim etnie.

Në Republikën e Kosovës nuk do të lejohet më veprimi i grupeve kriminale serbe që udhëhiqen nga Beogradi, e asnjë formë e ilegalitetit që pengon integrimin e komunitetit serb në veri të vendit, dhe që ka për qëllim sabotimin e institucioneve.

Dorëheqjet e pjesëtarëve të komunitetit serb nga Policia e Republikës së Kosovës si dhe deklaratat e autoriteteve serbe për dërgimin e trupave ushtarake brenda territorit të Republikës së Kosovës, flasin shumë për një mendësi që vazhdon të funksionoj bazuar në politikën Millosheviqiane e edhe ruse, që don kaosin e edhe luftën, por që është fantazi e një mendjeje të sëmurë, e parealizueshme në realitetin e çdo shteti që është ndërtuar mbi bazën e vlerave demokratike evropiane dhe vullnetin e popullit.

Tendencat serbe të Rusisë së Ballkanit nuk kanë vend në shtetin tonë. Nuk do të ndodhin ngase nuk do të lejohen asnjëherë.

Shteti i Republikës së Kosovës në gjithë gjatësinë kufitare dhe tërësinë territoriale ka burra e gra, pjesëtarë të Policisë e të Ushtrisë, që i dalin për zot në çdo kohë, që e duan atdheun e mbrojnë qytetarët e vet.

Mendësia destabilizuese ruse nuk ka vend në Ballkanin evropian proamerikan që në lëkurën e vet ka përjetuar mjaftueshëm trazira sa për t’i njohur dhe mos t’i lejuar më.

Në koordinim me aleatët tanë jemi për paqe dhe dialog, aq sa jemi të vendosur për mbrojtje dhe siguri.

Republika e Kosovës synon të ardhme demokratike dhe prosperuese si pjesë e Bashkimit Evropian dhe NATO-s, çdo përshkrim tjetër nuk përkon me realitetin tonë si shtet.

May be an image of 8 people, outdoors and text

See Insights and Ads

Boost post

1616

1 comment

Like

Comment

Share

SHOQATA “SKËNDERBEJ USA” NY-NJ NË FESTË

by

Veri Talushllari/

Edhe ushtarakët shqiptarë (në pension e të liruar), familjarë dhe miq të tyre, me banim në New York dhe New Jersey i janë bashkuar mjedisit festiv të Nëntorit, në Tiranë dhe në Prishtinë, në Vlorë dhe në Shkup, në Europë e kudo në botë ku jetojnë e punojnë shqiptarë.
Në një festë të bukur familjare e shoqërore, nën tingujt e orkestrës së këngëtarit Muharrem Borova e miqve të tij, zv. Presidentja e Shoqatës Dirka Xhakolli, pasi ftoi pjesëmarësit të nderojnë Himnin e Flamurit dhe Himnin e ShBAve, njoftoi për rezultatet e zgjedhjeve të reja për Kryesinë e Shoqatës.
Tashmë President Nderi i Shoqatës, Kapiten i Rangut të Parë(P), z. Bujar Hasani uroi për detyrën e re dhe ftoi të mbajë fjalën përshëndetëse Presidentin e sapozgjedhur, Prof. Assoc. Dr. Kol. (L) Gëzim Mustafaj.
Profesor Mustafaj bëri një sintezë të rrugës dhe luftës së popullit shqiptar duke evidentuar ngjarjet e mëdha të historisë sonë nga 28 Nëntori i Skënderbeut e i Ismail Qemal Vlorës, fitoren mbi nazifashizmin në krah të Bllokut Antifashist, ndryshimet demokratike në Shqipëri e deri te fitorja e UÇKsë në aleancë me NATOn mbi regjimin gjakatar serb dhe krijimin e shtetit të dytë shqiptar, Republikës së Kosovës. Ai përmendi faktin që 110 vjetori i pavarësisë i prin 110 vjetorit të krijimit të Ushtrisë Shqiptare.
Dhe për gëzimin tonë, këto festa përkojnë edhe me 5 vjetorin e krijimit të Shoqatës sonë.
Me këtë rast u dhanë çertifikata mirënjohjeje për veprimtarë të saj, dhe në një moment të bukur u soll një tortë për datëlindjen dhe daljen në pension të z. Agim Pira, një nga veprimtarët më aktivë të Shoqatës dhe punës në komunitet.
Për lexuesin, “Association of SKËNDERBEJ USA” në Nju Jork, ka në radhët e saj ushtarakë në pension ose në lirim tashmë me banim në Nju Jork dhe
zonën verilindore të Nju Xhersit, familjarë të tyre, miq e dashamirës. E krijuar më 10 dhjetor 2017 dhe e miratuar nga Departamenti i Shtetit të NY në shkurt 2019, Shoqata jonë ka një historik të pasur veprimtarish.
Ne festojmë madhërisht Pavarësinë e Shqipërisë dhe Fitoren mbi Nazifashizmin, Ditën e Pavarsisë së ShBAve dhe përkujtojmë data e ngjarje historike të Atdheut tonë. Duke pasur një antarësi me nivel të lartë shkollimi dhe intelektual, Shoqata “SKËNDERBEJ USA” ka zhvilluar veprimtari shkencore e letrare, si Simpoziumi për 100 vjetorin e Kongresit Kombëtar të Lushnjës dhe Luftës së Vlorës, promovimin e librave me përmbajtje letrare apo studimore të botuara nga anëtarët e Shoqatës, ka përkujtuar Dëshmorët e luftrave për liri e pavarësi, apo të rënë në krye të detyrës viteve të fundit etj.
Në bashkëpunim me Shoqatat simotra të ushtarakëve në Shqipëri, kemi kontribuar me shkrime apo me pará për botime librash dhe shfaqje dokumentarësh për historikun e Ushtrisë shqiptare, që këtë vit shënon gjithashtu 110 vjetorin e krijimit më 4 dhjetor.
Kështu, në 5 vjetorin e krijimit të saj Shoqata “SKËNDERBEJ USA” NY, vjen me një bilanc të pasur veprimtarish, çka e bën të ligjshëm gëzimin dhe harenë në këtë festë të bukur të 110 vjetorit të Pavarsisë së Shqipërisë.
Dhe me urimin për më shumë veprimtari të pasura e të larmishme, festuesit shpërndahen në të pestë lagjet e Nju Jorkut dhe në Nju Xhersi, për t’u takuar, siç thuhet në moton e Shoqatës “Së bashku për punë të mira!”
NY, 30 Nëntor 2022.

PËR FLAMURIN KOMBËTAR

by

Bledi Filipi/

Flamuri Kombëtar është i shqenjtë për çdo shqiptar kudo që ndodhet. Format dhe përmasat e Tij janë paracaktuar në Ligjin 8926/2002 të mbështetur në nenet 14, 78, 81 të Kushtetutës së Republikës së Shqipërisë:

Ligjin 8926/2002 me disa ndryshime në dt. 8 gusht 2022, PËR DISA SHTESA NË LIGJIN NR. 8926, DATË 22.7.2002, “PËR FORMËN DHEPËRMASAT E FLAMURIT KOMBËTAR, PËRMBAJTJEN E HIMNIT KOMBËTAR,FORMËN DHE PËRMASAT E STEMËS SË REPUBLIKËS TË SHQIPËRISË DHEMËNYRËN E PËRDORIMIT TË TYRE”

Neni 3

Format dhe përmasat e flamurit kombëtar

1. Flamuri kombëtar paraqet një fushe me ngjyre te kuqe gjaku, me një shqiponje te zezë dykrenore në mes, me krahë të hapur anash. Secili nga krahët e shqiponjës ka nëntë pendë, ndërsa bishti ka shtate pende.

2. Përmasat e flamurit kombëtar përcaktohen ne raportin 1 me 1,4 njësi. 3. Pamja e flamurit kombëtar, fortësia e ngjyrave te tij dhe raportet janë ato te përcaktuara në shtojcën nr .1, që i bashkëlidhet këtij ligji dhe është pjese përbërëse e tij .

Për Flamurin Kombëtar

Flamuri i Shqipërisë është flamuri kombëtar shqiptar, një flamur me fushë të kuqe dhe një shqiponjë dykrenare të zezë në mes. Flamuri shqiptar e ka prejardhjen nga një vulë e heroit kombëtar shqiptar Gjergj Kastrioti Skënderbeu, i cili i udhëhoqi shqiptarët në një kryengritje të përbashkët në shekullin XV kundër Perandorisë Osmane duke i sjellë trojeve shqiptare pavarësinë për një kohë të shkurtër (1443-1478). Shqiponja ishte pjesë e emblemës së familjes Kastrioti e cila e ka zanafillën në perandorinë bizantine.

Mendime mbi origjinën

Shqiponja ka qenë dikur, në periudhën e Romës antike, simbol i këtij shteti. Edhe sot të dy klubet e njohura të futbollit në Romë si Roma dhe Lacio mbajnë përkatësisht simbole antike, nga ku i pari kokën e ulkonjës së kapitalit dhe i dyti shqiponjën me krahë të hapur. Si simbol i Romës, shqiponja u përdor edhe nga strategët e saj si Kaj Mari, Luç Serg Katilina, Pompeu i madh, Çezari, etj. Ky i fundit përdorte si simbol të tij shqiponjën e artë të vendosur në një fushë të kuqe. Po kështu veproi me stemën e Çezarit edhe i nipi Oktavian Augusti, i cili u pasua më vonë edhe nga Kostandini i Madh. Me ndarjen e Perandorisë Romake në vitin 395 shqiponja u transformua me dy koka, duke simbolizuar njëra Perandorinë e Perëndimit me qendër Romën dhe tjetra Perandorinë e Lindjes me qendër Kostandinopojën (Bizantin). Ndërkohë Perëndimi u pushtua nga barbarët në vitin 476 duke humbur traditat më të vyera të antikitetit, e bashkë me to edhe simbolin e tij. Ndërsa Lindja (Bizanti) vazhdoi të jetojë edhe për dhjetë shekuj të tjerë duke ruajtur këtë simbol që vinte prej “qytetit të përjetshëm” (Romës). (Histori e Popullit Shqiptar. Tiranë 2002, fq.294)

Formën dhe ngjyrat e tij, flamuri bizantin i mori gjatë sundimit të Justinianit (527-562) që kishte origjinë ilire. Dukej se atij i pëlqente që dy kokat e shqiponjës ti identifikonte me vetveten dhe të shoqen, Perandoreshën Teodora. Më vonë me kalimin e kohës me anë të martesave dhe dhënies së privilegjeve, Bizanti ia dhuroi simbolin perandorak fisnikërisë së kombeve, që ishin integruar në këtë Perandori shumëkombëshe si princat rumunë, bullgarë, gjermanë, rusë, serbë, grekë, shqiptarë, etj. Kjo eshtë arsyeja që këtë simbol sot e përdorin një dyzinë popujsh e shtetesh, të cilat dikur kanë patur kontakte të ngushta ekonomike e kulturore me Bizantin. Ndërkohë që ai shfaqet si simbol i Kishës Ortodokse, pasardhëse e drejtpërdrejtë Perandorisë së Lindjes. Flamuri origjinal bizantin ruhet sot në një nga manastiret e malit të Shenjtë (Athos) në Greqi, në ngjyrat e tij fillestare me shqiponjën e zezë me dy koka, të vendosur në një fushë të artë.(Historia e Popullit Shqiptar, fq.433)

Deri më sot shumica e shqiptarëve mendojnë se flamuri i tyre është flamuri i Skënderbeut, pa e ditur origjinën e tij. Edhe sot ne nuk e dimë me saktësi se kur Skënderbeu përdori si simbol të shtetit të tij shqiponjën dykrenore. Njihet fakti se këtë simbol ai e huazoi nga Muzakajt, duke e zëvendësuar stemën që kishte trashëguar nga i ati Gjoni. Ky i fundit përdorte si stemë figurën e një princi (burri) me flokë të gjatë dhe togë (Gjin Varfi, Heraldika shqiptare, Tirane 2000, fq. 27). 

Shqiponjën dykrenore e kanë përdorur si simbol të tillë edhe Arianitët, Cernojeviçët e Zetës, Lek Dukagjini, etj. Për herë të parë në histori emblema e Gjergj Kastriotit me shqiponjën dykrenore shfaqet në vitin 1451. Ajo paraqitet në një libër uratash që ju dhurua Skënderbeut nga Alfonsi i V, Mbreti i Napolit, me rastin e nënshkrimit të traktatit të Gaetës më 26 Mars 1451. Ai ju dorëzua ambasadorëve të Skënderbeut që nënshkruan këtë traktat, Peshkopit Stefan të Krujës dhe at Nikola Bergucit nga Protonoteri i Alfonsit Arnaldo Fonoleda. Simboli përfaqësues i shtetit të Skënderbeut del përsëri në një katalog venecian stemash në vitin 1463, kur Gjon Kastrioti i biri i heroit mori titullin “Fisnik i Republikës”. (Akademia e Shkencës, Historia e Popullit Shqiptar, fq. 434). Po kështu ky simbol ruhet i gdhendur në varrin monumental të Kostandin Kastriotit, ndërtuar në vitin 1500 nga gjyshja e tij Donika, në kishën e Shën Marisë së Ëngjëjve në Napoli (Itali). Njëlloj si në flamur Skënderbeu e përdori shqiponjën dykrenore me krahë të ulur dhe yllin me gjashtë cepa sipër, edhe në vulën e tij të madhe, të cilën e përdorte në dokumentat zyrtare. Ndërkohë kur Kastriotët u larguan në Itali pas vdekjes së Skënderbeut, ata jo vetëm e ruajtën simbolin e tyre por e përdorën gjerësisht atë si stemë të heraldikës së tyre.

Në nderim të Festave të Nëntorit të Madh!

by

Promovim veprash të gjenocidit serb mbi shqiptarët!

19 Nëntor 2022
SHTUTGART

Në selinë e Konsullatës së përgjithshme të Republikës së Kosovës në Shtutgart, u promovuan suksesshëm veprat: “Terrori i Serbisë Pushtuese mbi Shqiptarët 1844 – 1999” i autorit N. Pllana, libri i xhepit VERGISS NIEMALS – MOS HARRO KURRË, i autorëve Nusret Pllana e Agim Aliçkaj dhe filmat dokumentarë Kush i vret fëmijët dhe “Gjenocidi serb mbi shqiptarët 1844 – 1999”, të autorëve Nusret Pllana dhe Esat Shala.
Përveç shumë bashëatdhetarëve tanë, në këtë promovim veprash publicistike e dokumentare, të organizuar suksesshëm nga Konsullata e R. së Kosovës, morën pjesë aktive edhe Konsullja e përgjithshme, znj. Lumturie Lipovica, Konsujtë e kësaj Konsullate në Shtutgart, z. Besnik Miftaraj e z. Gramoz Berisha, veprimtarë e afaristë të shumtë si; Baki Mustafa, Ukë Blakaj, Faton Pllana, Can Tahiri, Shemsedin Balaj, Sejdi Rexhepi, Naim Sheremeti, Ilmi Mustafa, përfaqësues të Unionit të studentëve shqiptarë në Shtutgart në krye me z. Medjen Izairi, arsimtarja e nxënësve shqiptarë në Shtutgart, znj.Fehmije Koqinaj – Hoxhaj, e shumë adhurues të librit e të filmit dokumentar, të cilët u shprehën shumë të kënaqur me promovimin e suksesshëm të këtyre veprave dokumentare me karakter shkencor e historik, të cilat kishin vetëm një porosi – mos harresën e kujtesës historike dhe mosbarazimin e viktimës me kriminelin, tendencë kjo ogurzezë edhe e institucioneve relevante të drejtësisë ndërkombëtare, siç është edhe ajo e Tribunalit të drejtësisë ndërkombëtare në Hagë, e ashtuquajtur e Dhomave Speciale, e cila me vite i akuzon padrejtësisht kreun e Ushtrisë Çlirimtare të Kosovës, për krime të supozuara, ndërkaq kriminelët e Serbisë nazifashiste e gjakatare, për mijëra e mijëra krime mbi popullatën civile e duarthatë shqiptare, le që nuk i akuzon kurrë, por i ka amnistuar e rehabilituar të gjithë, edhe pse veprat tona dokumentare e argumentojnë katërcipërisht gjenocidin serb mbi shqiptarët, jo vetëm të fundluftëscsë viteve 1998/1999, por edhe të një periudhe të gjatë gati dyshekullore.
Në fund të këtij manifestimi kulturor e shkencor, që u mbajtë në nderim të Festave të Nëntorit të Madh, veprimtari i njohur i çështjes kombëtare atdhetare dhe publicisti tropojan, z. Can Tahiri dhe Konsullja e përgjithshme e Republikës së Kosovës në Shtutgart, znj, Lumturie Lipovica, në shenjë respekti dhe nderimi për veprimtarinë e tij të parreshtur në shërbim të humanizmit dhe atdhedashurisë, autorit të këtyre veprave, z. N. Pllana ia ndanë mirënjohjen e Federatës Universale të Paqës, me titull Ambasador për paqe, të nënshkruar nga Rev.Dr.Sun Myung Moon, Founder dhe Dr. Hak Ja Han Moon, Co – Founder.

Shkruan: Nusret Pllana