Featured – Page 163 – Dielli

POETI GJERGJ FISHTA, ME TË VËRTETË ATË…

December 30, 2020 by dgreca

– Emocion për praninë e tij të mistershme –/

Nga Visar Zhiti/

Kur themi Atë Gjergj Fishta, janë bashkë e të pandara emri i Poetit me fjalën parake, të lashtë sa vetë shqipja, “Atë”/ baba, që tashmë kanë marrë kuptimin më madhor, forcën shpirtërore dhe sigurinë e Fjalës të Patriarkut të letrave shqipe, që i ngriti në lartësitë botërore të eposit, duke u bërë sa ndërgjegje, po aq dhe kushtrim i shqiptarizmës në shekullin XX, në fillimet e të cilit ribëhej shteti shqiptar, pas një pushtimi mbi 4 shekullor dhe copëtimeve të rënda të trojeve.

At’ Gergj Fishta duhej të tejkalonte dhe tri vdekjet e veta, atë të pas kalimit në amëshim, vrasjen e Emrit dhe të Veprës dhe të Varrit. Edhe vdekjen donin t’ia vrisnin, por Ai mori pavdekësinë.

Mund të thosha që u ringjall, por Ai ishte gjallë gjithmonë, djalli, armiqtë e Shqipërisë, kundërshtarët, s’e mposhtën dot. Mbetet triumfator. Me një lloj misteri përtej kritikës dhe harrimeve të qëllimta. At’ Gjergj Fishtës i ra barra të mbartte amanetet e kombit, kumtet e maleve tona si të mbetura në gojë shpellash, buzëve të plagëve të shekujve, duke u bërë dhe vetë zë i madh, me fuqitë hyjnore të Mujsit dhe të Halyllit (kupto: Muji dhe Halili). Mbarti kryqin e Krishtit dhe priu me gjuhën e popullit të tij kujtesën dhe ndërgjegjet.

At’ Gjergj Fishta u bë dhe vetë një legjendë moderne, ndërkohë ishte Poeti i gjallë, biblik, plot dije dhe urti, por që shungëllonte shqip si orteqet e maleve tona, onomatopeik dimrash e betejash e i lumenjve të gjakut. Akademik roman ndërkohë, që befas kthehej në lirik, me një romantizëm po aq dhe europian, Edhe dramaturg, prozator, mendimtar, kritik letrar, etj. Gjithmonë me një si zëmërim perëndish, që nga dashuria kristiane, si poet e kthen në satirë dashamirësë, ishte satiristi më i mirë në Ballkanin e kohës së tij, por që kumbon dhe sot aktual. Disa nga shpotitë e tij ngjajnë të porsa shkruara për ata që i kemi përreth dhe në krye

Átë Gjergj Fishta është veprimtari i lartë Kombëtar, patrioti i flaktë, deputeti në atdhe, opozitar dhe diplomati nëpër botë i çështjes shqiptare. Dhe nën pushtuesin, aspak bashkëpunëtor me të në dëm të vendit të tij, ai bëri politikanin e atdheut. Prift dhe poet. Me kryqin dhe Fjalën. I dekoruar dhe nga armiqtë për paqen që sillte. Ka të dhëna se është propozuar për çmimin “Nobel nga amerikanët.

At’ Gjergj Fishta është një fenomen në kuptimin metaforik, por dhe të zakonshëm, Ai u bë shumë i njohur qysh në gjallje, por dhe pas vdekjes, jo vetëm të tij, kur Shqipëria ishte në perandorinë komuniste, me diktaturën më të keqe të saj, ashtu varrprishur, me eshtrat e hedhur me një thes djalli në lumin Drin, Ai prapë gjallonte. Enciklopedia ruse dhe sllavët e Jugut e shikonin si rrezik dhe kundërshtar pasionant, por Ai ishte kundër shovinistëve sllave dhe kujdo, Europë qoftë, nëse ishin kundër atdheut të tij. Dhe At’ Gjergj Fishta vinte mistershëm. Më shumë se nga nëntoka, vinte nga Qielli, i vetëtimtë, me dritë të beftë, i pazhdukshëm ashtu si besimi, si me porosi nga Zoti.

Do sjell shembuj të thjeshtë, por me domethënie, sipas meje. Në festivalet folklorike, që bëheshin nën diktaturë, malësorët me lahutë këndonin me vargje të At’ Gjergj Fishtës, regjimi s’kuptonte gjë, se ato ishin bërë popullore, anonime. Poeti ia kishte kthyer borxhin popullit të vet duke arritur kështu atë që pak poetë e arrijnë në botë. Kur po binte diktatura dhe njerëzit guxonin të iknin, të takoshin, të shihnin Shqipërinë Jugë e Veri, për t’ju bashkuar protestave, kudo që bëheshin, në Shkodër, Tiranë, Kavajë, Lushnjë, Vlorë, Korçë, etj, në njërin nga autobuzët dikush kishte nisur të recitojë diçka nga “Lahuta e Malcis” e Atë Gjergj Fishtës, befas ndal, ndoshta pa diçka nga dritarja apo po mendonte gjë tjetër, por menjëherë të tjerët në autobus do ta vazhdonin recitimin, dukej sikur u krijua kori antik, njëri thoshte një varg, tjetri vargun tjetër… kështu kishte ndodhur gjithmonë me Atë Gjergj Fishtën nëpër popull, në teatër, në pllaja, në kuvende burrash, por dhe në burg.

Vepra e At Gjergj Fishtës është pjesë e Vargmaleve të Shqipërisë. Së bashku me pararendësin e tij, Naim Frashërin, që ai e adhuronte, të dy së bashku ata sikur bëjnë dy kokat e shqiponjës në Flamurin tonë.

* * *

…u bënë 80 vjet, që nga 30 nëntori i viti 1940, kur Atë Gjergj Fishta mbylli sytë përgjithmonë dhe mori udhën qiellore të amëshimit. Në tokë, me baltën që u hodh mbi të, u bënë statuja të tij. Më së fundi u ribë shtëpia e tij e lindjes në Fshatin Fishtë, e rrënuar si vetë kujtesa dhe ndërgjegjia jonë, u kthye në muze. Ai nuk është thjeshtë vlerë muzeale, por frymë Kombëtare. Shtëpia e Atë Gjergj Fishtës është në shpirtin e çdo shqiptari. Besoj se Presidenca, Shteti, Parlamenti, këtë vit e kishin shpalur si Viti Atë Gjergj Fishtës, s’e di a kështu dëshiroj të ketë qenë, dhe akademitë, bibliotekat, ajo e Françeskanëve së pari në Shkodër, botuesit, media, shoqatat, grupet etj, e kanë përkujtuar me botime e konferenca, manifestime e homazhe. Kritika letrare, studiuesit, shkrimtarët, poetët, sidomos të rinjtë, personalitetet e larta të venditi e kanë thënë fjalën e tyre siç dhe do të thonë. Kështu besoj… Ndërkaq, e di, më shumë është thënë dikur, nga më të shquarit e Kombit, nga personalitete të huaja, përkthyesit e tij në gjermanisht, italisht, anglisht, etj, etj. Gurra fishtiane nuk shterr, Unë dhashë emocionin tim sot, pa asnjë pretendim, thjeshtë fola. Ardhurimin ndaj Atë Gjergj Fishtës e kemi dhe të trashëguar, nga etërit. Babi im, që kur isha fëmijë, e kutoj që na recitonte vargje nga Naimi dhe nga Fishta, atëhere kur Ai ishte i ndaluar. Ja, pos jell një strofë nga poemat e tij botuar postume. Piktori Guljelm Mosi, i frymëzuar, kompozia dhe një tablo, im atë në takimin me Atë Gjergj Fishtën. Edhe unë kam shkruar poezi për Fishtën dhe në burg, edhe më pas, edhe në gegnisht. Të rinj dhe studentë sot e studiojnë, mbrojnë diplomat me tema për të. Kështu besoj. Dhe desha të thosha, që megjithatë, edhe kur nuk e dëgjojmë, zemra e At’ Gjergj Fishtës rreh mistershëm si zemër e popullit.

POEZITË TONA PËR POETIN

HEKURAN ZHITI

(Është quajtur dhe “Gjergj Fishta i Toskërisë” për poemat e tij dhe satirën..

Një strofë nga libri “Kryengritje shqiptare në parajsë”, shkruar në vitet 1943-44, vënë në skenë në ato vite, së pari në Berat, ku jetonte autori…):

GJERGJ FISHTA

(del nga një altar mermeri)

“Edhe hana do ta dije, edhe dielli do t’ket pa,

Se përqark kësaj rrokullie si Shqipnia’i vend nuk ka!

……….…………………………..

Atje lejnë, po, Toskë e Gegë, /si dy rreze n’flakë, t’një dielli:

Si dy rrufe që shkojnë tue djegë,/kur shkrep reja nalt prej qielli.”

………………………………………….

Jehona e Fishtës

Zani m’dridhet nga dashnia,

dridhen kryqat n’vorret tona.

Po s’u ba paradis Shqipnia,

nga Qielli do zbresin me jehona…

VISAR ZHITI

(Nga libri me poezitë e burgut “Hedh një kafkë te këmbët tuaja”)

DY VARRE PESËQIND VJET LARG NJËRI-TJETRIT

Përsëri erdhën nga larg, nga shkretëtirat. Kaluan

malin e fundit. Panë detin e madh, të huaj.

Si llahtarí të kaltër, harbonjëse shtynte dallgët,

si gjokset lakuriqe të grave të haremeve. Ja çadra

e tyre si trëndafil mes mijëra çadrave ushtarake, mes topave dhe kuajve nën rrapëllimën e daulleve dhe kazanëve, nën emblemat absurde. Pluhur i para

pesëqind vjetëve. Atje poshtë ishte qyteti i vogël, i pushtuar. Kisha dhe varri i Gjergj Kastriotit, i xhindit, që xhindosi Sovranin e madh. Do të suleshin ata, gjithmonë ata, të njëjtët ata, do të shkulnin pllakën e rëndë të varrit, do të nxirrnin eshtrat e heroit si eshtrat e vetë kombit. Pastaj

do t’i thyenin, copa-copa, eshtrat me baltë, të gjata

sa shpatat. Do të thyenin kafkën si kubenë e qiellit.

Të çmendur dhe makabër. Nga një copë kockë si hajmali

do të varnin në qafë ushtarët për të pasur fat

nëpër betejat si armiku i tyre i madh. Pesëqind vjet më parë, kur dhe varret tani janë varrosur në harresë. Ra nata. Nata e kombit. Me heroizma si me gërmadha, pa skelete heronjsh.Nata me britma robërish që digjeshin si pishtarë. Pesëqind vjet natë ballkanike. Frutat e pemëve ashtu si buka s’kishin shije. Rrënjët thithnin gjak të turbullt,

të përzier. Nëpër tokë kalbeshin trupa barbarësh dhe

dezertorësh, bejtexhinjsh dhe devesh, spiunësh

e kuzhinierësh të paqes më të kuqe se lufta. Njeriu

binte e malet bëheshin më të lartë nga kufomat.

Malet u mbushën me partizanët e luftës më të fundit të

botës, plot si me pyje. Gërmadhë u bë mishi

i historisë dhe ne kujtuam se erdhën ditë të reja.

Besuam tek urat. Besuam që deti u bë e dashura

e të gjithëve si liria. Kështu thoshin këngët. Pastaj, ah, pastaj kur u hap tymi i betejave, nëpër pellgje pamë pasqyrimin e sundimtarëve të ikur, të sundimtarëve tanë

që na udhëhoqën, u përzjehej pasqyrimi nëpër pellgje,

binin si pluhuri i pushtuesve të para pesëqind viteve.

Na merreshin mendtë si këmbët. Dhe u sulëm ne, vetë ne,

jo pushtuesit, te kishat tona. Thyem kryqin e

megjithatë nuk shpëtuam dot nga udhëkryqi ynë. Në një tjetër kishë gjetëm skeletin e Gjergjit… jo, jo të Kastriotit…

të Gjergj Fishtës, më të madhit rapsod të shekullit njëzet,

e fundmja lahutë e botës. Në zjarr i kishim hedhur librat

e tij. O Zot! Jo, jo, nuk do t’ju them që pushtuesit anadollakë na vodhën skeletin e kryetrimit dhe ne, vetë ne,

me duart tona, ditën me diell, humbëm skeletin e poetit,

(s’ua ndamë letrarëve të rinj si copa hajmalish

kockat e tij), e hodhëm në lumë. Në lumin që vinte

nga sllavët. Me brinjët e poetit mund të bëhen lira të bukura.

Spaç, 14 janar 1983

(Është botuar dhe në numrin e parë të revistës “Hylli i Dritës”, kur nisi të ridalë pas rënies së diltaturës… është përkthyer dhe italisht nga poetja arbëreshe Cate Zuccaro dhe është lexuar dhe në kishën San Atanasio në Romë, etj, )

SHKODËR, (RI)VARRIMI I GJERGJ FISHTËS

(Nga libri me poezi “Thesaret e frikës)

N’varrin e shembun dhe t’harruem u gjetën

copra kocash, mbetun nga mëkati i pakalbun.

Çka mund t’bahet me to, o At’, veçse skeleti i dorës,

që mbi dhė ka shkrue eposin e vdekun të t’gjallëve

e nan dhė eposin e gjallë të t’vdekunve? Baj kryq

dhe dora m’zhvishet, bien mishi, m’bahet skelet

si dora jote e kombit. E mbushim me zanin tand si

shpatën me millin. Se e gdhendëm drunin e fatit tonë.

Ranë bujashka fjalësh n’varrin që s’do të vdesi ma.

Visar ZHITI

PRESIDENTI META DEKORON AT GJERGJ FISHTEN

December 30, 2020 by dgreca

PRESIDENTI I REPUBLIKËS SË SHQIPËRISË, Z. ILIR META VLERËSOI ME DEKORATËN MË TË LARTË AT GJERGJ FISHTËN NË 80-VJETORIN E VDEKJES /Nga Frank Shkreli/

Sot, vërtetë, e ndjejë veten krenar që jam shqiptar! Presidenti Ilir Meta nderon me Dekoratën më të lartë të Republikës së Shqipërisë, At Gjergj Fishtën, me rastin e 80-vjetorit të ndarjes së tij nga jeta. Kjo është dhurata më e bukur që Z. Meta mund t’i jepte Kombit në prak të Vitit të Ri.Përmes një mesazhi në rrjetet sociale, Meta thekson se nëpërmjet veprave të tij të çmuara artistike, Gjergj Fishta ngriti lart, shpalosi botërisht dhe skaliti në përjetësi vlerat dhe virtytet e veçanta autoktone, si dhe përpjekjet e parreshtura të kombit shqiptar për liri, mbrojtje të trojeve shqiptare dhe të sovranitetit të vendit, njofton gazeta e Tiranës, Telegraf.

“Me rastin e 80-Vjetorit të ndarjes nga jeta, në vlerësim të veprës atdhetare dhe të rolit të jashtëzakonshëm në fushat e gjuhës dhe të letërsisë shqipe, arsimit e kulturës, diplomacisë, politikës e teologjisë, si dhe për meritat e Tij historike në krijimin e alfabetit shqip dhe në proceset shtetformuese”, thekëson i pari i shtetit shqiptar, “kam sot nderin e veçantë të çmoj me Dekoratën më të lartë në Republikën e Shqipërisë, At Gjergj Fishtën, atdhetarin, historianin, gjuhëtarin e madh, diplomatin dhe iluministin e shquar, për të cilin interesat kombëtare ishin po aq të shenjta, sa vetë besimi që i përkiste”, shkruan në postin e tij Presidenti Ilir Meta.

Duke shtuar se, “Nëpërmjet veprave të Tij të çmuara artistike, ai ngriti lart, shpalosi botërisht dhe skaliti në përjetësi vlerat dhe virtytet e veçanta autoktone, si dhe përpjekjet e parreshtura të kombit shqiptar për liri, mbrojtje të trojeve shqiptare dhe të sovranitetit të vendit. Vepra e Tij e vyer do ta ndriçojë përherë kombin tonë për të tejkaluar çdo sprovë në mbrojtje të Pavarësisë, Lirisë, Demokracisë dhe të ardhmes europiane”, nënvijon Z. Meta.

Postimi i Presidentit Meta:

“Me rastin e 80-Vjetorit të ndarjes nga jeta, në vlerësim të veprës atdhetare dhe të rolit të jashtëzakonshëm në fushat e gjuhës dhe të letërsisë shqipe, arsimit e kulturës, diplomacisë, politikës e teologjisë, si dhe për meritat e Tij historike në krijimin e alfabetit shqip dhe në proceset shtetformuese, kam sot nderin e veçantë të çmoj me Dekoratën më të lartë në Republikën e Shqipërisë, At Gjergj Fishtën, atdhetarin, historianin, gjuhëtarin e madh, diplomatin dhe iluministin e shquar, për të cilin interesat kombëtare ishin po aq të shenjta, sa vetë besimi që i përkiste.

Nëpërmjet veprave të Tij të çmuara artistike, ai ngriti lart, shpalosi botërisht dhe skaliti në përjetësi vlerat dhe virtytet e veçanta autoktone, si dhe përpjekjet e parreshtura të kombit shqiptar për liri, mbrojtje të trojeve shqiptare dhe të sovranitetit të vendit.

Vepra e Tij e vyer do ta ndriçojë përherë kombin tonë për të tejkaluar çdo sprovë në mbrojtje të Pavarësisë, Lirisë, Demokracisë dhe së ardhmen europiane.”

Domosdoshmërisht, se është një vlerësim shumë me vend dhe tepër i merituar. Uroj që ky vendim i Presidentit të Republikës së Shqipërisë të hapë rrugën dhe dyertë e institucioneve akademike të Kombit shqiptar dhe të ndriçojë, njëkohësisht, edhe mendjet e disa përfaqësuesëve të mbetur të “realizmit socialist”, si në Shqipëri ashtu edhe në Kosovë, për një vlerësim mbarë kombëtar akademik, ashtu siç meriton, vërtetë, Poeti i Kombit, siç thotë edhe Presidenti Meta në vlerësimin e tij për Fishtën – për skalitjen në përjetësi të vlerave dhe virtyteve të veçanta autoktone.

Uroj që ky akt patriotik i Presidentit të Republikës të zgjojë nga letargjia 80-vjeçare, akademikët e sotëm shqiptarë në Tiranë dhe në Prishtinë dhe le të marrin shembëll nga i madhi Dr. Eqerem Çabej dhe vlerësimin që ai i ka bërë dikur Fishtës. Dy tre vite më parë kisha shkruar se ndoshta pak njerëz e dinë, por Dr. Eqerem Çabej ka pasur konsideratë të lartë për At Gjergj Fishtën – i cili për arsye që dihen ai nuk mund të shprehte admirimin e tij për Fishtën gjatë regjimit komunist, pasi Fishta ishte shpallur “armik i popullit dhe tradhëtar i Kombit”, nga regjimi enverist. Si i tillë, Fishta dhe vepra e tij ishin të ndaluara rreptësisht nga komunistët shqiptarë, me porosi të komunistëve jugosllavë. Por, Çabej ka vlerësuar lartë At Gjergj Fishtën — para sundimit komunist, kur ai mund të shprehej lirisht– duke e cilësuar Fishtën, ndër të tjera, edhe si “Poeti kombëtar i Shqiptarëve”. Duke shkruar për vlerësimet edhe konsideratat e E. Çabej për Fishtën, akademiku nga Kosova, i ndjeri Prof. Dr. Engjëll Sedaj është shprehur se –vlerësimet e Çabejt për Gjergj Fishtën — si “Poet Kombëtar i Shqipërisë”, si “Përfaqësues më i pari i leteraturës së sotme shqiptare” dhe sidomos si poet më i avancuar epik ballkanik i shekullit, (Çabej) i mbështet kryesisht në Lahutën e Malcis”, veprën kryesore të At Gjergj Fishtës.

Në një prej vlerësimeve të tija për Lahutën e Malcis dhe për Fishtën, Dr. Eqerem Çabej është shprehur: “…Fishta zë fill me njësinë e vogël të fisit për të mbaruar te njësia më e madhe e kombit, ia fillon me bariun e moçëm Marash Ucin dhe mbërrin te Abdyl Frashëri në Lidhjen e Prizrenit. Duket qartas përpjekja e tij të zgjerojë dalëngadalë botën në një brendi më fort nacionale, të ngrejë kështu veprën në sferën kombëtare. Kështu vepra e tij ka marrë karakterin e një eposi kombëtar…duke qenë, njëkohësisht, në një farë kuptimi edhe një epos ballkanik. Një dritë jete homerike shkëlqen mbi veprën e tij: si në dukje të zanave që u përngjajnë Dianës e Atenës…”, ka shkruar Çabej. Ndërsa katër vjet para se të vdiste Fishta, Prof. Çabej jep këtë gjykim për At Gjergj Fishtën: “Gjergj Fishta është bërë, sidomos në Lahutën e Malcis, përfaqësuesi më i parë i literaturës së sotme shqiptare”. Dhe më tej Çabej është shprehur se, “Në fakt, në poezinë epike të Fishtës është kënduar thelbi i shpirtit të shqiptarëve, elementi i konservuar i popullit që njëherit më së mirë dëshmon njësinë e kombit”.

Ndërkaq, për kontributin e Fishtës në zhvillimin e gjuhës shqipe në përgjithësi, albanologu austriak, i ndjeri Prof. Dr. Norbert Jokl ka shkruar se, “Me At Gjergj Fishtën gjuha shqipe u rrit, u madhnue, u ba zojë. Me At Gjergjin, kryetar në Kongresin e Manastirit, u caktue njëherë e përgjithmonë një alfabet i vetëm për mbarë Shqipninë, vendim ky me dobi që nuk numrohen. Me At Gjergjin zuni fill shkolla, me shqipen gjuhë mësimi…” është shprehur albanologu i njohur austriak.

Nëqoftse dikush i ka ndjekur shkrimet e mia modeste për Fishtën gjatë viteve, unë kam qenë kritik ndaj mënyrës së si — politika shqiptare si dhe entet akademike të Shqipërisë dhe të Kosovës — e kanë trajtuar ose keq-trajtuar dhe harruar dhe përjashtuar Gjergj Fishtën, këto 30-vjet post-komunizëm, por pa humbur shpresën se

Një bashkohas i Fishtës, At Benedikt Dema është shprehur – në librin përkujtimor “At Gjergj Fishta 1871 – 1940”, botuar pas vdekjes se “Shqypnia do të nisë me e çmue ma tepër At Fishtën, kur në raste në të cilat Kombi kërkon e lyp ndërmjetësimin e nevojshëm të autoritetit e të veprimtarisë së tij”.

Ndër kritikat e mia kisha shënuar se, fatkeqsisht, Atdheu i At Gjergj Fishtës nuk vepron më me entuziazmin e idealeve që ishte program i jetës së tij, “Për të vendosur themelet e patundura të idealizmit kombëtar, për të prirë në luftime në mbrojtje të Kombit, për t’i gërshetue kunora lumnije racës mijëvjeçare shqiptare, gjakut të derdhun e flijeve të vuajtuna të Kreshnikëve të Kombit”, siç ka shkruar dikur bashkoasi i Fishtës, At Benedikt Dema, duke shpresuar, njëkohësisht, se shqiptarët, si Komb i qytetëruar, do të dijnë t’i çmojnë njerzit e mëdhej të tij, duke i ndërtuar atij gjeniu, atij Ati të Atdheut, një përmendore të pashlyeshme, “një shenjë të përherëshëme e të denjë, për një komb të përparuem”.

Vlerësimi dhe nderimi që Presidenti i Shqipërisë, Z. Ilir Meta i akordoi sot Poetit të Madh Kombëtar At Gjergj Fishtës me rastin e 80-vjetorit të shkuarjes së tij në amshim, erdhi pikërisht në një moment të historisë së shqiptarëve, kur “Kombi kërkon e lyp ndërmjetësimin e nevojshëm të autoritetit e të veprimtarisë së tij”.

Urojmë që kjo njohje due nderim nga zyra më e lartë e shtetit shqiptar – një njohje e denjë për një Komb të përparuar ndaj jetës dhe veprimtarisë së At Gjergj Fishtës, të bejë që, më në fund, At Gjergj Fishta të zejë vendin që ai meriton dhe që i takon atij në historinë e vërtetë dhe në kulturën dhe letërsinë mbarëkombëtare të fisit shqiptar. Kjo është Shqipëria që duam – me At Gjergj Fishtën. “Merre Kacel edhe njëherë Lahutën e na këndo nji kangë shqiptare….”, ndërkohë që “Arbnori i Fushës e i Malit njomë syshë me lotët e përmallit të Malcisë, këndon lahutën i lum ti, sod e për amshim…”

Falënderime Presidentit Ilir Meta për nderimin dhe vlerësimin e jetës dhe të veprës së madhe të At Gjegj Fishtës! Gëzuar Vitin e Ri!

VATRA PËRMES VITIT TË VËSHTIRË TË KORONAVIRUSIT

December 28, 2020 by dgreca

NGA ELMI BERISHA- Kryetar i Federatës Panshqiptare të Amerikës”VATRA”/

Të dashur vatranë, së bashku kemi kaluar përmes një viti tepër të vështirë që na ka vënë pengesa të jashtzakonshme, duke na izoluar nga njeri-tjetri, komuniteti, vendlindja. Pandemia e Coronavirusit na mori jetë vatranësh. Shkuan vatranët e devotshëm Jonuz Ndreu dhe Zef Perndocaj, Andon Rrumbullaku e të tjerë. I përcollëm me dhimbje. Pushofshin në Paqe! Disa nga ju miq vatranë keni humbur të dashurit Tuaj, Ju ngushëlloj të gjithëve! Disa nga vatranët dhe familjet e tyre kanë përjetuar dhimbje nga sëmundja që ka shkaktuar COVID-19. Me shpirt kam qenë pranë tyrë. E kalofshit sa më lehtë!

Edhe pse i kemi pasë nëpër këmbë pengesat e pandemisë ne jemi përpjekur që të përshtasim punën tonë dhe ta mbajmë gjallë Vatrën, kemi bërë që të dëgjohet emri dhe historia e saj, jo vetëm këtu në SHBA e Kanada, por edhe në Evropë, trojet tona etnike.Kemi kontribuar për çështjen kombëtare.

Unë u jam mirënjohës vatranëve, veçanërisht delegatëve të Kuvendit të 19 Janarit 2020, që ma besuan mandatin për ta udhëheqë VATRËN.Kam mendimin se Kuvendi i 19 Janarit ka shënuar një moment historik edhe për faktin që për të parën herë mandatoi në krye të saj një shqiptar nga Kosova.

Unë ashtu siç Ju premtova në Kuvendin e Detroitit, kam një projekt afatgjatë: Vatra e shekullit XXI. Projekti ynë synon modelin e ri të “qeverisjes” dhe organizimit, drejtimit dhe delegimit të vendimmarrjes, zgjerimit të Kryesisë, Këshillit të Vatrës, zgjerimit të Degëve të reja dhe mbi të gjitha dëgjimi i çdo zëri, respektimi i çdo ndjeshmërie dhe përqafimi i çdo vizioni apo ideve të reja.Falenderoj Kryesinë e vatrës që edhe pse në kushte të vështira ka bashkëpunuar dhe ka marrë përsipër detyra e kontribute.

Disa punë i kemi bërë:Hapja e degës së re në Manhattan nën drejtimin e anëtarit të Kryesisë së re të Vatrës Agustin Mirakaj, riorganizimi i degës në Worchester nga studiuesi Thanas Gjika, krijimi i grupit organizator për krijimin e degës në Bostonin historik, ku lindi VATRA, janë gjurmë që tregojnë se Vatra e ka tejkaluar izolimin që na vuri pandemia pas Kuvendit. Ne synojmë ngritjen e degëve edhe në qendra të tjera në shtetet kryesore të Amerikës, ku banojnë shqiptarët, por edhe shtimin e anëtarësisë në degët ekzistuese..

VATRA DHE KUJTESA HISTORIKE

Federata Panshqiptare e Amerikës Vatra ishte prezent me evenimente historike për kombin dhe shtetin shqiptar duke organizuar konferenca on-line rreth ngjarjeve më të rëndësishme që kanë shënjuar kombin tonë. Edhe pse në kushte pandemie globale në kushtet kur ishte e pamundur veprimtaria fizike, Vatra nëpërmjet organit të saj mediatike Gazeta Dielli, arriti ti sillte komunitetit dhe lexuesve në faqet e saj figura historike që nga shpallja e pavarësisë, mbretëria, qëndresa antikomuniste, demokracia dhe kohët moderne të shtetit të Kosovës dhe Shqipërisë. Dekorimi me medalje i Familjes Haradinaj dhe Jashari në Kosovë për qëndresën historike dhe luftën e jashtëzakonshme për Liri e Pavarësi ishte një akt vlerësimi që jo vetëm çmon vlerat njerëzore e Kombëtare, por i bën mirë edhe Vatrës. Ne jemi treguar të vëmendshëm që çdo date historike ta sjellim në vëmendje dhe e kemi përkujtuar ose nëpërmjet organizimeve on-line, aktiviteteve në Vatër apo intervistave, profileve, reportazheve, analizave, komenteve apo dosierëve në faqet e Gazetës Dielli. Pavarësia e Kosovës, Pavarësia e Shqipërisë- Festa e Flamurit,ditëlindja e Diellit e Vatrës, revoltat e Spaçit, qëndresa antikomuniste e shumë evenimente të tjera u sollën në Vatër fizikisht, virtualisht dhe mediatikisht.

VATRA DHE MARRËDHËNIET DIPLOMATIKE

Mendoj se pas Kuvendit ka marrë një zhvillim pozitiv ndihmesa e VATRËS në fushën diplomatike me veprimtari e aktivitete të ndryshme.Në rolin e Kryetarit të Vatrës unë kam shfrytëzuar përvojën afro 30-vjeçare në fushën e diplomacisë në Uashington. Duke përfituar edhe prej marrëdhënieve personale me miqtë e njohjet në Senat e në Kongres, po përpiqemi që Vatrën ta kthejmë në një pikë strategjike të koordinimi duke e ndërthurur në vendimmarrjet diplomatike në interes të kombit shqiptar. Kujtoj këtu praninë e delegacionit vatran në Uashington, i cili ishte vazhdimisht pranë qeverisë së Kosovës me këshilla e lobime në interes të Kosovës përpara se të firmosej marrëveshja Serbi-Kosovë, e nënshkruar nga Presidenti i Shteteve të Bashkuara të Amerikës, z. Donald Trump.

Vatra jonë ka marrë mbështetje të sinqertë dhe aktive, të cilat u shoqëruan me vizita dhe me takime të rëndësishme, gjate vitit 2020 në Vatër, ku mund të veçojmë disa prej tyre si: vizitën e Kongresistit Amerikan, Eliot Engel; Presidenti i Republikës së Kosovës, z. Hashim Thaçi; Ambasadorja e Shqipërisë në OKB, Besiana Kadare; Ambasadorja e Shqipërisë në Uashington Floreta Luli Faber; Konsulli i Shqipërisë në New York, Najada Sojli; Ambasadorja e Kosovës në Uashington Vlora Çitaku; Konsulli i Kosovës në New York, Ambasadorja Teuta Sahatçija; si dhe Frymëzim Isufaj. Falë lobimit dhe përpjekjeve të vazhdueshme në fushën e Diplomacisë, Vatra përmes meje, nënshkroi Memorandum Mirëkuptimi me Ministrinë e Jashtme dhe të Diasporës së Kosovës, z. Meliza Haradinaj Stublla, me qëllim avancimin e një agjende Kombëtare dhe diplomatike të përbashkët, një memorandum pritet, që pas zgjedhjeve të 25 Prillit 2021, të nënshkruhet edhe me Tiranën zyrtare, me Ministrinë e Diasporës së Shqipërisë. Gjatë vitit 2020, Vatra si institucion u prit edhe nga Presidenti i Shqipërisë, z. Ilir Meta, nga Kryetari i Parlamentit të Shqipërisë, z. Ruçi, lideri i Opozitës z. Lulzim Basha si dhe nga lideri historik i Partisë Demokratike dhe demokracisë në Shqipëri Prof. Dr. Sali Berisha. Vatra, përmes meje, këmbënguli së fundmi, se është një domosdoshmëri përfshirja e zonjës së hekurt Madlen Ollbajt në bisedimet Kosovë-Serbi,si një garanci dhe sukses i vazhdueshëm i Shtetit të Kosovës dhe kombit shqiptar.

VATRA DHE KERKIMI SHKENCOR

Vatra po merr një drejtim të rëndësishëm në kërkimin shkencor. Nevoja për një punim historik dhe arkivor të plotë mbi historinë dhe trashëgiminë e Vatrës për më shumë se një shekull veprimtari pa ndërprerje, në Tiranë u arrit marrëveshjae Kryetarit të Vatrës me Akademik, Prof. DR. Beqir Meta, drejtor i Institutit të Historisë, Qendra e Studimeve Albanologjike, Tiranë për botimin e historisë së Vatrës në dokumentet historike, me një kolanë dokumentesh, të hulumtuar nëpër arkiva brenda dhe jashtë Shqipërisë, e përbërë prej pese vëllimesh rreth veprimtarisë patriotike-historike të shqiptareve të Amerikës.

Unë mendoj se edhe vlerësimi i kryetarit të Vatrës me titullin e lartë akademik “Doctor Honoris Causa” nga Universiteti “Luarasi” Tiranë dhe angazhimin si pedagog i jashtëm pranë këtij Universiteti,i bën mirë Vatrës.Një arsye më shumë pse Vatra ka marrë një profil akademik pas Kuvendit të 19 janarit, është afrim i intelektualëve në radhët e Vatrës,i njerëzve të letrave, gazetarëve me qellim që në të ardhmen e afërt të krijohet një departament shkencore pranë Bibliotekës së Vatrës për kërkime të thelluara Albanologjike.Mendoj se karakterin shkencor Vatrës do t’ia jap projekti për hapjen e Shkollës së Vatrës pranë qendrës së saj dhe nënshkrimi i marrëveshjes sapo të stabilizohet pandemia globale me Akademinë e Shkencave të Shqipërisë dhe Kosovës për pasurimin e titujve shkencor të librave në bibliotekën e Vatrës.

VATRA DHE PANDEMIA GLOBALE

Federata Panshqiptare e Amerikës Vatra në kushtet e pandemisë globale Covid-19, nën përkujdesjen e veçantë të kryetarit të Vatrës dhe kryeredaktorit të Diellit e bashkëpunëtorëve të tij dhanë një kontribut të jashtëzakonshëm duke sjellë në faqet e organit mediatik të Vatrës, Dielli, një informacion të pasur, përmes intervistave me mjekë shqiptarë kudo në botë.

Gazeta Dielli gjatë kësaj periudhe u bë burim i parë i lajmeve në fushën e mjekësisë për mediet në Tiranë, Prishtinë e Shkup. Mjekët shqiptarë më të suksesshëm në USA, Kanada, Angli, Gjermani, Spanjë, Itali, Francë, Belgjikë, Zvicër, Austri, Greqi, Kroaci, Suedi, Norvegji etj. Me inicimin e Kryetarit të Vatrës dhe me profesionalizmin e drejtuesit të gazetës “Dielli”, me kontributin e jashtzakonshëm të gazetarit Sokol Paja, u kontaktuan dhe u intervistuan rreth pandemisë Botërore Covid-19 për të informuar publikun nëpërmjet medieve on-line dhe të shkruara, në faqet e “Diellit” u paraqitën heronjtë shqiptarë të fushës së shëndetësisë dhe jo vetëm. Gjate pandemisë janë intervistuar personalitete të larta dhe specialiste të ndryshme si: mjekë, infermierë, punonjës të shëndetësisë, profesorë universitetesh, punonjës të njësisë kërkimore-shkencorë, laborantë, punonjës të ndryshme që operojnë në katedra mjekësie dhe disa prej tyre janë pjesë e ekipeve kërkimore shkencore në zbulimin e vaksinës anti-covid si dhe persona që drejtojnë departamente kërkimi shkencor apo janë pjesë e laboratorëve më të avancuar në kërkimet e thelluara mjekësore. Mjekët shqiptarë u paraqitën në gazetën Dielli si heronj që meritojnë gjithë përuljen e qënies sonë për rrezikun, devotshmërinë, punën e palodhur, sakrificat sublime, profesionalizmin dhe humanizmin e jashtëzakonshëm. Këtu mund të veçojmë dhe të falënderojmë përzemërsisht për punën dhe kontributin e tyre të çmuar, dy vatranët e spikatur gjatë periudhës së Covid-19, nënkryetarin, Dr. Pashko Camaj, i cili është dhe profesor në “Lehman College” dhe Dr. Skënder Myrtezani, profesor në “Cornell University” te cilët ishin dhe gjenden aktualisht sa më afër vatranëve, komunitetit shqiptar dhe lexuesve të Diellit duke ndare eksperiencën dhe dijen e tyre shkencore e profesionale.

Dr. Skënder Murtezani është mjeku shqiptar që ka dhënë kontribut të veçantë për shqiptarët. Ai vazhdon që të jetë që nga fillimi në frontin e luftës me koronavirusit. Dr. Murtezani ka testuar rreth 2700 pacientë, nga të cilët 305 kanë dalë pozitivë të trajtuar, 10 të hospitalizuar, vetëm 2 pacientë kanë ndërruar jetë.Formulat e trajtimit dhe mjekimit që ai ka përdorë kanë qenë fikase. Veç këtij kontributi, ai është mjeku shqiptar në SHBA shumë i kërkuar nga Televizionet Kombëtare në Shqipëri, Maqedoni etj. Ka dhënë deri tani 26 intervista përmes të cilave ka këshilluar se si të mbrohen qytetarët nga koronavirusi.

VATRA DHE VIZIONI I SË ARDHMES

Vatra do vazhdojë të mbështesë e promovojë çdo lider zyrtar që vjen nga Tirana zyrtare e Prishtina zyrtare. Vatra do bashkëpunojë ngushte me qeveritë shqiptare në Tiranë e Prishtinë, të dala nga zgjedhje demokratike të lira e të ndershme dhe të njohura nga bashkësia ndërkombëtare. Vatra do mbështesë pa kushte çdo ide dhe veprim kombëtar që i shërben shtetit shqiptar, kombit shqiptar demokracisë në Kosovë e Shqipëri dhe mbi të gjitha zbatimit të ligjit reformave të thella dhe lirive e të drejtave themelore të njeriut. Vatra ka vijuar me sukses të përmbushë misionin dhe rolin e saj Kombëtar, diplomatik në përmbushje të nevojave të vetë Federatës, komunitetit vatran dhe mbi të gjitha qytetarëve shqiptar në Kosovë dhe në Shqipëri. Po punohet fort që të kemi një program dhe agjendë kombëtarë e ndërshtetërore për të ndihmuar reciprocikisht kryerjen e reformave si në Shqipëri dhe në Kosovë. Vatra po luan një rolin e saj në Uashington për të qenë prezent në çdo tryezë bisedimesh dhe sa herë merren vendime në dobi të Shqipërisë, Kosovës, shqiptarëve në Ballkan e çdo shqiptari anë e mbanë botës. Vatra ka ofruar dhe do të ofrojë eksperiencën, ekspertizën, personalitete profesionistësh te formuara në Amerikë dhe vatranët e spikatur në dobi të përmbushjeve të reformave dhe të një ndihme më të specializuar në përmbushje të nevojave që kanë institucionet në Shqipëri dhe në Kosovë. Roli diplomatik i Vatrës në Shtëpinë e Bardhë është dhe do të jetë historik. Shqiptarët janë një faktor i paanashkalueshëm. Vatra ka asistuar dhe do të jetë gjithmonë aty në proceset e mëdha diplomatike, politike e zhvillimore të shteteve tona Kosovë e Shqipëri. Ne kemi nënshkruar Memorandumin me Ministrinë e Jashtme dhe të Diasporës së Republikës së Kosovës, ku kemi garantuar se Vatra do të jetë e pranishme në Uashington dhe do të jetë aty me fuqinë e saj lobuese sa në të mirë dhe prosperitetit të Kosovës dhe Shqipërisë. Në thelb ne synojmë një strategji mbarëkombëtare integruese që identifikon të gjitha nevojat tona si komb dhe si shtete në mënyrë që të ofrojmë bashkëpunim dhe ekspertizë me qëllim që të jemi dinjitozë dhe të zhvillojmë politika të përbashkëta zhvilluese në të mirë të kombit e qytetarëve që jetojnë në shtet tona Shqipëri e Kosovë. Qëllimi i këtij memorandumi është qëllimi i vullnetit të mirë dhe bashkëpunimit e lobimit reciprok në proceset zhvilluese dhe integruese. Ne do të ofrojmë për shtetin e Kosovës dhe të Shqipërisë ekspertët tanë, akademikë, profesorë, kërkues shkencorë në përmbushje të nevojave që do të paraqiten në raport me nevojat dhe proceset zhvilluese.

Federata Pan-shqiptare e Amerikës Vatra përgjatë periudhës një vjeçare që drejtohet prej meje ka qenë më prezent se kurrë më parë në hapësirat mediatike dhe kanalet e komunikimit masiv. Ne kemi qenë të pranishëm në mediat më prestigjioze nga Amerika e deri në hapësirat shqiptare në Ballkan si Zëri i Amerikës, Gazeta Dielli, Gazeta Illyria, Gazeta Panorama, Gazeta Koha Jonë, Gazeta Nacional, Televizionet News 24, Ballkan-web,Gazeta Shqiptare, RTK, TV 21 etj.

Federata Pan-shqiptare e Amerikës Vatra përgjatë periudhës një vjeçare ka dhënë një ndihmesë të konsiderueshme nëpërmjet gazetës së saj Dielli në promovimin etë gjitha shkollave shqipe në botë si formë e identitetit tonë kombëtar shqiptar. Shkollat në USA, Kanada, Angli, Gjermani, Itali, Spanjë, Zvicër, Austri, Suedi, Norvegji, Finlandë, Greqi, Turqi etj.,kanë qenë dhe do të vazhdojnë të jenë të pranishme në gazetën tonë DIELLI.

GEZUAR 2021 !(Dielli ne Print-Dhjetor 2020)

Shqiptarja, pjesë e grupit organizues të dozave të vaksinës në SHBA

December 28, 2020 by dgreca

Nga Lisana SUBASHI*/

Alma Doraci, e lindur në qytetin bregdetar të Durrësit, prej 25 vitesh jeton në Bloomington të shtetit Indiana, SHBA së bashku me bashkëshortin dhe dy djemtë e saj, Soren dhe Aldridge Zajmi. Alma Doraci është pjesë e grupit që është përgjegjës për organizimin e shpërndarjes së vaksinës anti-covid dhe tregon detaje se funksionon shpërndarja. Sipas ekspertes Doraci benefitet e kësaj vaksine janë shumë të rëndësishme se disa efekte anësore që janë normale si çdo vaksinë tjetër. Teksa kujton fillimet e saj në emigrim tregon për “Diaspora Shqiptare” se në mendje i vijnë shumë kujtime.

“Të flas për fillimet e emigrimit më vijnë në mendje kujtime te panumërta, vite të tera dhe është e vështirë t’i përgjigjesh shkurtimisht, por do të përpiqem.

Një gjë duhet të kuptoni që në ato vite teknologjia, kompjuteri, interneti ishin akoma koncepte të reja për shqiptarët dhe ato nuk ishin të disponueshme siç janë tani ku mjafton të kesh wi-fi dhe të duket sikur botën e ke në duar. Pse e përmenda këtë? Kishim dëgjuar për Amerikën si vend i zhvilluar, vend i ëndrrave, i dritave etj., por asgjë konkrete nuk dinim. Largimi nga Shqipëria nuk ishte i lehtë nuk e dinim çfarë na priste e si do ta ndërtonim jetën. Por si të thuash po rendnim drejt një shprese, drejt një rreze drite, drejt një destinacioni që Zoti na e dhuroj.

Fillimi ishte i vështirë, vitet e para ishin vite prove; duhej mësuar gjuha angleze, traditat ishin të pa njohura për ne, mënyra e jetesës dhe e mendimit ishin shumë të ndryshe nga ato që kishim ne si shqiptarë. Familjarët, miqtë e shokët na mungonin. Çdo gjë duhet ta ndërtonim nga zero duke u përpjekur për t’u ingranuar në jetën e re në një vend të huaj. Disa muaj pasi arritëm në qytetin e Bloomington, unë fillova punë si teknike në farmacinë e spitalit. Të them të drejtën u befasova nga puna që bëhej aty. U befasova nga roli dhe ndikimi i padiskutueshem i farmacistëve në vendosjen e mjekimit, konsultat e panumërta, dijet e thella dhe shkencore të farmacistëve në Amerikë. Kjo ishte aresyeja që pas pak vitesh vendosa të ndjek studimet për farmaci dhe arrita të diplomohem me resultate të larta si “Doctor of Pharmacy”.

Jeni pjesë e grupit përgjegjës për organizimin e vaksinës anti-Covid. Na tregoni disa detaje mbi proçedurën e administrimit dhe pergatitjes se dozave?

Unë jam në grupin që është përgjegjës për organizimin, bërjen e dozave gati për administrim, si dhe administrimin e vaksinës në qytetin ku banoj unë. Është një punë e madhe që kemi kohë që e kemi nisur dhe është intensifikuar më shumë këto kohët e fundit. Po përmend vetëm një aspekt të vogël, ne kemi në disponim Vaksinën kundra Covid-19 të prodhuar nga kompania Pfizer dhe së shpejti do të kemi dhe atë të prodhuar nga Moderna. Vështirësitë janë të shumta, udhëzimet janë shumë specifike për të siguruar temperaturën e nevojshme për të ruajtur vaksinën në kushte optimale dhe efikase. Po të marim si shembull vaksinën e prodhuar nga Pfizer e cila duhet mbajtur në ngrirës në temperaturë ndërmjet -60 dhe -80 degree celsius (për këtë kërkohet figorifer special) kur nxirret nga freezer mbahet ne frigorifer jo më shumë se 5 ditë dhe pasi nxirret nga frigoriferi pregatiten shiringat që duhet të përdoren brenda 6 orëve. Ky është vetëm një fraksion i vogel i një pune kolosale,shpërndarjen por e solla si shembull për të kuptuar se sa në detaje duhet të organizohen gjërat deri në momentin që të arrijë pacientin për administrimin e vaksinës. Jam e impresionuar nga puna e përkushtuar e të gjithëve punonjësve të shëndetësisë për ta përfunduar këtë fushatë të vaksinimit me sukses.

Si po shkon procesi i vaksinimit?

Deri tani po shkon më mirë se sa e parashikonim. Të parët që po vaksinohen janë infermierët, mjekët, dhe personeli i spitaleve. Faza e dytë do të përfshijë të moshuarit e kështu me rradhë. Jo vetëm personeli i spitaleve, por shumë njerëz na pyesin dhe presin me padurim të vaksinohen. Ne po punojmë me orë të zgjatura për të përballuar kërkesat dhe për të përshpejtuar vakinimin pa cënuar rregullat dhe mbrojten e popullatës. Ekziston një aplikim dhe pyetësor on-line ku çdo njeri duhet të plotësojë përpara se të vaksinohet dhe të nënshkruaj që është dakort të vaksinohet. Vaksinimi me vaksinën të prodhuar nga Pfizer duhet të bëhet në ditën e parë dhe pas 21 ditësh kurse ajo e prodhuar nga Moderna bëhet në ditën e parë dhe pas 28 ditësh.

A keni siguri se vaksina do e stabilizojë situatën pandemike?

Po, vaksinimi i popullatës do të ndihmojë në uljen e rasteve dhe kontrollimin e kësaj pandemie. Statistikat e fundit të 20 Dhjetorit të vitit 2020 tregojnë 76 milion raste me Covid-19 ku më shumë se 1.6 milion njerëz kanë humbur jetën në këtë pandemi në të gjithë botën. Përditë të sëmurë me Covid+ shtrohen nëpër spitale. Shumë prej tyre janë në gjendje te rende. Ne që punojmë në spital shohim përditë jetë njerëzish që shuhen, njerëz që vuajnë, njerëz që nuk arrijnë të marin dot frymë, familjarë që nuk kanë mundësi t’i jenë pranë njerëzve të dashur në orët e fundit të jetës së tyre. Kësaj gjendje duhet t’i themi STOP!

Si e parashikoni ju situatën pas festave, a mund të pritet një valë në rritje e infektimeve?

Kam frike se kjo pyetje është një pyetje retorike. Rastet e Covid-19 janë rritur gjithmonë pas festave të paktën flas për këtu në SHBA. Kjo u vu re pas 4 Korrikut, pas ditës së halloween, pas ditës së falenderimeve. Tani me Krishtlindjet dhe Vitin e Ri dhe po mundohemi të sensibilizojmë popullatën që të mos nënvlerësojnë situatën e rënduar nga kjo pandemi. Njerëzit duhet patjetër të kuptojnë që ky vit është shumë më ndryshe nga vitet e tjerë dhe shumë gjëra duhen modifikuar e duhen bërë ndryshe. Një këshillë do të doja t’ju jepja; rrini në shtëpinë tuaj, festoni vetëm me familjen tuaj të vogël këtë vit që vitin tjetër t’i festoni mes njerëzve tuaj të dashur.

Cila është këshilla që keni për ata persona që janë kundër vaksinës anti-covid?

E kuptoj që shumë njerëz hezitojnë për të bërë vaksinën. Mendoj që hezitimi vjen nga disa burime. Mos informimi është njeri prej tyre. Disa hezitojnë, sepse mendojnë që vaksina u prodhua shumë shpejt dhe nuk pati kohë të provohet. Është e vërtetë që u prodhua në një kohë të shpejtë, por kjo vjen sepse u përdoren metoda të reja dhe të avancuara të teknologjisë moderne. Iu dhanë prioritet studimeve të bëra për vaksinën kundër Covid-19 dhe shqyrtimi i dokumentave nga FDA kaloi në krye të listës.

Një hezitim tjetër tek njerëzit vjen nga frika e efekteve anësore të vaksinës. Unë do të thoja që çdo medikament apo vaksinë (qoftë i ri i sapo hedhur në treg apo që ka qenë në qarkullim me vite të tëra) ka efekte anësore. Sipas studimit të kryer nga Pfizer, vaksina është provuar të jetë efikase. Benefiti që marim nga vaksinimi i tejkalon këto efekte anësore.

Unë do të inkurajoja të gjithë njerëzit të vaksinohen sidomos ato që kanë riks më të madh infektimi siç mund të jenë personeli shëndetësor, personat me sëmundje kronike etj..

Djali juaj është pjesë vullnetare e personalelit spitalor anti-covid, apo jo?

Pandemia e Covid-19 ishte dhe vazhdon të jetë një plagë shumë e rëndë në të gjithë botën. Shumë njerëz punojnë me orare të zgjatura për t’i shërbyer të semurëve, ka infermierë dhe personel shëndetësor që nuk shkojne as në shtëpite e tyre për dite me rradhë. Ka njerëz dhe midis tyre edhe djali im që e ndjejnë si përgjegjësi humane të ndihmojnë më se të munden personelin mjekësor apo pacientët duke rrezikuar veten e tyre. Djali im është student në pre-med me shpresë që një ditë do t’i bashkohet armates së madhe të mjekëve. Është shumë i ngarkuar me studimet e tij, por më vjen mirë që i krijon kohë vetes edhe për të shkuar e për të ndihmuar ato që kanë nevoje tani më shumë se kurre. Jam krenare që ka një shpirt human, një shpirt që duhet të karakterizoi të gjithë mjekët e pse jo të gjithë njerëzimin.

A janë fëmijët të lidhur me vendlindjen e tyre?

Sigurisht që janë. Bisedat për Shqipërinë, historinë e saj, traditat, natyrën e bukur nuk mungojnë kurrë në familjen tonë. Gjatë kohës se shkolles ato kanë bërë disa projekte të ndryshme ku flasin për Shqipërinë dhe për kulturën shqiptare të cilat kanë qenë shumë të mirëpritura nga profesoret dhe nxënësit e tjerë. Gatimet shqiptare nuk mungojnë nëpër festat familjare. Të dy fëmijët e mi kanë shumë dëshirë të vijnë në Shqipëri kurdo që ti jepet mundësia.

Ktheheni shpesh në Shqipëri?

Jo aq shpesh sa do të kisha dëshirë. Mundohem të vij një herë në dy ose tre vjet por do vija me shpesh po të kisha mundësinë. Zemra më ka mbetur në atë qytetin tim të dashur bregdetar.

Kortezi-Diaspora Shqiptare

Krishtlindja me Shën Nënën Tereze

December 26, 2020 by dgreca

Nga Don Lush GJERGJI/

Shenjtëresha e jetës dhe dashurisë, Shën Nëna jonë Tereze, kishte një përshpirtëri të veçantë ndaj Krishtit të Vogël, lindjes së Tij në shpellën e Betlehemit. Ajo gjithnjë i ftonte motrat e saja “Misionaret e Dashurisë”, nëpërmjet tyre edhe neve, mbarë botë, që ta pranojë këtë Dhuratë të Qiellit, Foshnjën hyjnor, në stilin e Virgjërës Mari, me fe të gjallë dhe dashuri vepruese.

Ja disa tekste, porosi dhe propozime të Nënës Tereze për ne sot:

“Lindja e Jezusit në Betlehem i solli botës dhe çdo zemre njerëzore gëzim. I njëjti Zot bëhet Njeri – Fëmijë, vjen në zemrat tona në kungim.

Ai dëshiron të na dhurojë vetveten, duke ardhur në zemrat tona. Me gëzim dhe paqe.

Të lutemi shumë, që ta marrim këtë hir për zemrat tona, për bashkësitë tona, për Kishën dhe për botën mbarë. Të lutemi, që të jemi të gatshëm ta pranojmë Jezusin për Kërshëndella – jo në shpellën e ftohtë të grazhdit të zemrës sonë, por në një zemër plot me dashuri dhe përvujtëri, një zemër të nxehtë të dashurisë së ndërsjellët, siç ishte ajo e Marisë.

Unë nuk mund të paramendoj asnjë ditë, orë, çast, pa Jezusin. Ai është jeta ime, dashuria ime, gjithçka për mua. Ai erdhi në botë për ta sjellë Lajmin e Mirë, që Zoti na do, që Zoti është Dashuri, që më do mua dhe ty, dhe që ne duhet ta duamë njëri-tjetrin ashtu si na do Ai ne.

Kure shikojmë grazhdin e Betlehemit, kuptojmë si na do, duke vuajtur. Në kryq me gjak dhe dashuri, është vulosur dashuria e Tij për mbarë njerëzimin. Nuk mjafton ta duam Jezusin në Eukaristi, por duhet ta duam edhe në vëllain apo motrën njeri.

Kur meditojmë për kryqin e tij, kuptojmë si na ka dashur: vdiq në kryq, sepse na donte dhe dëshiron që edhe ne ta duam njëri-tjetrin. Ai na ka dashur dhe na do gjithnjë, e ne?

Në Betlehem të gjithë ishin plot me gëzim: barinjtë, engjëjt, mbretërit, Jozefi dhe Maria. Gëzimi ishte shenjë karakteristik i të krishterëve të parë. Gjatë përndjekjeve rrezatonte në fytyrat e tyre gëzimi.

Edhe ne duhet të jemi plot gëzim, dhe ta bartim gëzimin e dashurinë e Zotit te tjerëve.

Gjëra më e bukur e Marisë ishte, kur Jezusi hyri në jetën e saj, ajo me shpejti shkoi në shtëpinë e Elizabetës për t’ia dhënë Jezusin asaj dhe birit të saj ende të palindur, Gjonit. Maria ishte një misionare e vërtet, sepse nuk pati frikë të vihej jo vetëm në shërbim të Zotit, por edhe ndaj Elizabetës, duke krye punë të një shërbëtores… Këtë shërbim ajo e bën edhe sot, për mbarë botën dhe Kishën, për çdo njeri.”

Duke menduar për vrasjen e fëmijëve të pafajshëm, të pambrojtur, nga ana e prindërve, ajo me zemër zë plasur, duar të hapura kah Qielli, e tha dhe e dha këtë porosi dhe uratë:

“Varfëria më e madhe në botë është mungesa e dashurisë. Dështimi është nisja e të këqijave në botë. O Zot, na jep këtë hir që të ndërpritet vrasja e fëmijëve në kraharorin e nënave në botë. Virgjëra tejet e shenjt, ti që e ke pranuar me aq dashuri Jezusin Fëmijë, ndihmo dhe mbro të gjitha nënat e botës nga mëkati i dështimit.”

“Dikur Jezusi lindi në shpellën e Betlehemi. Sot lind në altar, në Meshë, Eukaristi, që ne të jemi Tabërnakulli i gjallë dhe veprues i pranisë dhe dashurisë së Tij në mesin tonë. I krishteri është Tabernakulli i Zotit të gjallë… T’i ndihmojmë njerëzit që ta zbulojnë, njohin dhe duan Krishtin në ata që vuajnë… Kujdesi për të tjerët është fillimi i shenjtërisë…

Çfarë mrekullie: Zoti e ka vendosur mbarë botën në duar të Marisë. Prej Marisë duhet të mësojmë: për të dashur, si na do Jezusi ne. Për të qenë fryt gëzimi, ashtu si është Ai. Për të qenë më afër Asaj, si ishte Ai. Për t’i ndarë të gjitha me Te, edhe kryqin, si shenjë e përkatësisë me Krishtin”.

Si përfundim i këtij meditimi: Me Shën Nënën Tereze për Kërshëndella, ja disa porosi shumë aktuale të saja për botën e sotme:

“Gjëra të vogla me dashuri të madhe.

Pa dashuri dhe flijim jeta s’ka kuptim.

Vetëm dashuria do ta shpëtojë botën.

Veprat e dashurisë janë vepra të paqes.

Dashuria e shëron vetminë

Uria më e madhe e jetës është dashuria.

Me Zotin – Dashuri edhe ne gjejmë vëllain apo motrën njeri.

Mishërimi i JezuKrsihtit është “hyjnizimi” i njeriut.

Kur nuk ke asgjë, atëherë dhuron gjithçka, vetveten.

Të gjithë njerëzit janë vëllezër – motra, sepse jemi të krijuar nga dora e dashur e Zotit.

Jeto me dashuri dhe për dashuri, dhuro dashuri, ji ti Dashuri.”

Krishtlindja nuk është vetëm një datë

Është Krishtlindje çdo herë

kur i buzëqesh vëllait

dhe e merr për dore.

Është Krishtlibdje çdo herë

kur je në heshtje

për ta dëgjuar të afërmin.

Është Krishtlindje çdo herë

kur nuk i pranon ato parime

që i robërojnë të ndrydhurit

në skajet e shoqërisë.

Është Krishtlindje çdo herë

kur shpreson me ata që s’kanë shpresë

në varfërinë fizike dhe shpirtërore.

Është Krishtlindje çdo herë

kur pranon me përvujtëri

kufizimet dhe dobësitë tua.

Është Krishtlindje çdo herë

kur ia mundëson Zotërisë që të rilind te ti

për ta dhuruar të tjerëve.

[Nëna Tereze]

(Kortezi- DRITA)