Featured – Page 389 – Dielli

PERKUJTIMI I MITHAT FRASHERIT, APEL QEVERISE

September 30, 2018 by dgreca

PËRKUJTOHET MITHAT FRASHËRI NË NJU JORK DHE I BËHET APEL QEVERISË PËR TRANSPARENCË/

– Qeveria Shqiptare nuk mund ta anashkalojë Diasporën Shqiptare të Amerikës dhe nuk mund t’i marrë fshehurazi eshtrat e Apostullit të Shqiptarizmit, Mithat Frashërit.

– Derisa Qeveria e cilëson në Vendimin e saj “Personalitet i Shquar i Letrave Shqipe dhe Kulturës Mbarëkombëtare”, emri dhe busti i tij do t’i bënin nder cdo institucioni të Kulturës Kombëtare-

– Mos vallë Mithat Frashëri do të pësojë fatin e Faik Konicës, që e kthyen triumfalisht, por më pas e braktisën, e shkarravitën, e zhgrryen… e nxinë ?

Nga Dalip Greca

Sot, e Djelë 30 Shtator 2018, në orën 11 paradite u përkujtua në 69 vjetorin e vdekjes, Mithat Frashëri, – ikona e Shqiptarizmit,shkrimtari,diplomati,përkthyesi,politikani,intelektuali,që mbi gjithcka vuri inetersat e Atdheut.
Takimi përkujtimor si për cdo përvjetor Lindjeje apo Vdekjeje u organizua pranë varrit të tij, që ndodhet në Ferncliff Cemetery, ne Westchester County, New York, në adresën: 280 Secor Rd, Hartsdale, NY 10530.
Drejtuesi i veprimtarisë përkujtimore z. Pëllumb Lamaj, pas Hymnit Kombëtar, ka kërkuar që të mbahet 1 minut heshtje në nderim të Apostullit të Shqiptarizmit Mithat Frashërit.
Ai ka vlerësuar figurën shumëdimensionale të Mithat Frashërit, duke folur për kontributin e tij ndaj kombit si diplomat, burrë shteti, si politikan, si personalitetit i Kulturës, si Kryetar në Kongresin e Manastirit, si ambasador i Kosovës dhe Camërisë etj.
-E përkujtojmë Mithat Frashërin, tha z. Lamaj, në këtë përvjetor të vdekjes, dhe do ta përkujtojmë gjithmonë edhe pse Qeveria shqiptare ka marrë vendimin për t’ia kthyer eshtrat në Shqipëri. Ne nuk na ndalon kush që të vijmë këtu dhe ta nderojmë njeriun që mbi gjithka deshi dhe luftoi për Kombin e vet.
Z. Lamaj shprehu indinjatën për heshtjen që po mbanë Qeveria Shqiptare për procedurat e trasferimit të eshtrave të këtij personaliteti të shquar të Kombit Shqiptar dhe duket se po e bën për interesa të ngushta. Ai kritikoi heshtjen e qeverisë shqiptare për procedurat e trasferimit dhe rolin që do të ketë diaspora… Druaj, tha z. Pëllumb lamaj, se Mithat Frashëri po kthehet gjysëm ilegal, po ndahet diplomati, personaliteti i shquar Letrave shqipe, nga Atdhetari dhe politikani. Kam frikë, komentoi ai se Mithat Frashëri do të pësojë fatin e Faik Konicës, që e kthyen triumfalisht, por më pas e braktisën, e shkarravitën, e zhgrryen…
Si mund të kthehet Mithat Frashëri vetëm duke i trasferuar eshtrat, ndërkohë që në vendimin e qeverisë nuk ka as një të dhënë se cilit institucioni do t’i vihet emri i tij, cilës rrugë-ndërkohë që rrugët e kryeqytetit ende mbajnë emra atentatorësh e kriminelësh ordinerë…Mithat Frashëri ia dhuroi shtetit shqiptar thesarin e tij, Bibiliotekën, cfarë i dha shteti shqiptar si kompensim?!
Edhe Kryetari i Vatrës, Dritan Mishto, tek nderoi figurën e Mithat Frashërin, foli për përmasat e shërbimeve të tij Kombëtare, dhe evidentoi piktakimet e Vatrës me personalitetin e shquar, kërkoi që komuniteti të bëhet pjesë e përcjelljes, si shenjë nderimi për personalitetin e lartë. Është një përvojë, theksoi Mishto, ajo e kohës kur shqiptarët e Amerikës e Amerikës përcollën Faik Konicën në Tiranë (1995).
Për figurën e Mithat Frashërit folën dhe shprehën nderimin e tyre edhe : Zef Balaj, anëtar i kryesisë së Vatrës, Haxhi Dauti-Kryetar i Këshillit Shqiptaro-Amerikan, Marjan Cubi-Kryetar i Qendrës “Nënë Tereza” dhe anëtar i Kryesisë së Vatrës, Profesori Ilir Hysa, ish nënkryetari i Vatrës Asllan Bushati, Tom Shkreli, ish kryetar i Fondacionit Dom Simon Filipaj, gazetari Robert Papa, editori i Diellit Dalip Greca. etj.
Pjesmarrësit debatuan rerth vendimit që qeverisë dhe ishin në një mendje se: Mithat Frashëri nuk mund të merret fshehurazi, duke anashkaluar komunitetin shqiptar, i cili do ta përcjellë sic e meriton atdhetarin e shquar. Nëse qeveria dhe shërbimi diplomatik shqiptar që është ngarkuar për të kryer veprimet nuk do t’na bëjnë pjesë të përcjelljes së eshtrave të ikonës që ka mbajtë gjallë atdhetarizmin në SHBA, ne do të dijmë të bëhemi vetë pjesë dhe do ta nderojmë në mënyrën tonë Mithat Frashërin.

VATRA, TAKIM ME PRESIDENTIN META

September 30, 2018 by dgreca

-DEBAT PËR NËSHTETSINË, MOSFUNKSIONIMIN E SHTETIT, PËR ISH TË PËRNDJEKURIT POLITIK, PËR MOSDËNIMIN E KRIMEVE TË KOMUNIZMIT, PËR MINISTRINË E DIASPORËS…. –

Nga Dalip Greca/*

Të premten me 28 Shtator 2018, në mbrëmje, një përfaqësi e Vatrës u takua në mjediset e hotelit Kimberly në Manhattan me presidnetin Ilir Meta.

Të pranishëm në takim: zv. Kryetari i Vatrës-njëkohësisht kryetar i degës në Jacksonville Adriatik Spahiu, anëtarët e kryesisë: Zef Bala, Marjan Cubi, Besim Malota, Kryetarët e degëve të Vatrës në Tampa Tasim Ruko dhe kryetari I degës në Michigan Mondi Rakaj,(anëtarë të Këshillit të Vatrës), Bashkim Musabelliu,shefi i Kabinetit të kryetarit Mishto, Dr. Pashko Camaj, këshilltarët e Kryetarët Marko Kepi, Frederik Ndoci dhe Gëzim Nika, ish nënkryetari i Vatrës Asllan Bushati, Sel Celaj, vëllezërit Drishti, Gjergj Balaj, Angjelina Nikaj e të tjerë.

Presidneti Meta shoqërohej nga këshilltari për diasporën z. Flamur Gashi.

Zef Balaj e uroi presidnetin Meta për takimin me Vatrën dhe i solli përshëndetjet e kryetarit Mishto, i cili për arsye familjare nuk mundi të marrë pjesë në takim. Editori e informoi shkurtazi për veprimtaritë dhe punët Kombëtare të Vatrës për gjatë 106 viteve, Asllan Bushati tregoi për veprimtaritë e sotme të Vatrës. Diskutuan Adriatik Spahiu, Pashko Camaj,Marjan Cubi, Marko Kepi, Tasim Ruko, Mondi Rakaj, Gjergj Balaj, Besim Malota, Bashkim Musabelliu, Gezim Nika, Frederik Ndoci, Eddi Drishti.

Në qendër të debatit ishin konstatimet për mosfunksionimin e shtetit shqiptar dhe mosinteresimin e tij për diasporën shqiptare. I pari që shfaqi opononecën e vet ndaj mosfunskionimit të shtetit ishte Gjergj Balaj, i lindur nga dy prindër shqiptarë ne SHBA. Ai tregoi përpjekjet e tij të pasuksesshme 2 vjecare për të marrë nënshtetsinë shqiptare, sorollatjet nga Kosullata Shqiptare në Nju Jork e deri në zyrat e gjendjes civile të shtetit, në Ministrinë e Rendit,burokracia dhe rryshfeti nëpër zyrat e shtetit etj etj…Të njëjtin shqetësim shfaqën edhe vëllezërit Drishti të cilët, edhe pse kanë lindur nga dy prindër shqiptarë në SHBA, nuk po arrijnë që të marrin nënshtetsinë, paçka se kanë trokitur tek vendlindja e prindërve që në vitin 1991, kanë ndërtuar shtëpi atje, por nënshtetsinë nuk po ua japin edhe pse Ligji shqiptar e përcakton qartë se kur i ke prindërit shqiptar, nënshtetsia të jepet menjëherë.Po ashtu Edi bëri vërejtje për kriteret e ndryshimeve në polici sapo nëdrrohen qeveritë ndërrohen policët në nivele profesionale.Ai tregoi përvojën amerikane.

Këshilltari I Kryetarit, Marko Kepi, njëkohësisht President i Rrënjëve Shqiptare, ishte kritik në diskutimin e tij. Ai tha se vinte nga një rrugicë e vogël në Shkodër që mbante mbi supe 100 vite burg të diktaturës, por bijtë e ish të dënuarëve janë të flakur jasht vëmendjes së shtetit, ndërkohë që bijtë e ish persekutorëve bëjnë ligjin, që nga pushteti lokal deri në piramidën e shtetit. Ai e kundërshtoi justifikimin e presidentit se ata që dalin në Pezë apo sheshe e rrugë të vendit me thirrje e Portrete të dikattorit Enver Hoxha, janë ca pleq të padëmshëm, që me atë bindje do të shkojnë nga kjo jetë. Kepi, i solli si kndërvënie shembullin e arrestimin e ish nazistit në Brooklyn. Po ashtu z. Kepi bëri Kritika të rrepta ndaj Minsitrisë së Diasporës, që nuk jep asnëj kontribut real për diasporën shqiptare, ndërkohë që udhëheqës të shteteve të tjera, kur vijën në SHBA, nuk bëjnë vetëm fotografi për fb, por takojnë senatorë e kongresmenë, dhe shtrojnë kërkesa për komunitetet e tyre, deri edhe në kërkesën për fonde për të ndërtuar qendra kulturore apo për të hapë shkolla në gjuhën e tyre, por edhe duke afruar kontribute të shteteve nga vijnë. Ne, tha ai, edhe kur u bëjmë thirrje që të bëhen pjesë e një parade në Manhattan, ku shqiptarët janë numër NJE, kërkon përmes këshilltarëve që Diaspora ti paguaj rrugëtimin, hotelin, ushqimin!!!

Për problemin e mosintegrimit real të shtresës së ish të përndjekurëve diskutoi Mondi Rakaj, Tasim Ruko, Gëzim Nika etj.

Nuk e kuptoj, tha Gëzim Nika, se si në të njëjtën ceremoni, ku dekorohet gjyshja ime pas vdekjes per tragjedinë e kampit të Tepelenës, në radhën e pare të pjesmarrësve bën karshllëk edhe ish persekutori ynë, që nuk na la të vazhdojmë shkollat!

Presidenti Meta u dha përgjigje pyetjeve të shumta, shfaqi mendimet e tij gjat debatit dhe falenderoi për pjesmarrjen në takim, ndërsa në statusin e tij në facebook shkroi: “Kënaqësi të takohesha dhe të bisedoja me drejtues, përfaqësues dhe kryetarë të disa degëve në SHBA të Organizatës Panshqiptare “Vatra” dhe t’i falenderoja për mbështetjen e Shqipërisë dhe çështjes shqiptare.”

*Fotot i shihni ne Facebook

HARADINAJ TAKON DIASPOREN NE NJU JORK

September 29, 2018 by dgreca

Kosova vlerëson kontributin e jashtëzakonshëm të shqiptaro-amerikanëve/

-Kryeministri i Kosovës, Ramush Haradinaj në Shtetet e Bashkuara të Amerikës: Kontributi i diasporës i rëndësishëm për zhvillimin e gjithanshëm të vendit. Pavarësia dhe shtetndërtimi i Kosovës janë të lidhura ngushtë me Shtetet e Bashkuara të Amerikës, të cilat janë prijëse të lirisë dhe rendit demokratik në botë, andaj u jemi mirënjohës përjetësisht/

NJU JORK, 29 Shtator 2018-Gazeta DIELLI/ *

Kryeministri i Republikës së Kosovës, Ramush Haradinaj, gjatë vizitës në Shtetet e Bashkuara të Amerikës, sot ka takuar shqiptaro-amerikanët dhe përfaqësuesit e shoqatave të shqiptarëve në Amerikë, me të cilët ka biseduar për zhvillimet politike dhe ekonomike në Kosovë.
Kryeministri Haradinaj ka falënderuar diasporën e cila jeton dhe vepron në Shtetet e Bashkuara të Amerikës, për kontributin e tyre të jashtëzakonshëm për lirinë dhe pavarësinë e Kosovës dhe tani në zhvillimin ekonomik dhe forcimin e shtetit demokratik.
“Jemi krenar me diasporën tonë në Shtetet e Bashkuara të Amerikës. Ju keni qenë dhe vazhdoni të jeni zëri më i fuqishëm i Kosovës, me punën dhe angazhimin tuaj keni sensibilizuar çështjen e Kosovës në momentet vendimtare”, tha kryeministri Haradinaj, duke vlerësuar rolin e Batalionit Atlantiku dhe të gjithë vullnetarëve për t’i dalë ndihmë vendit në kohëra të vështira.
Kryeministri Haradinaj ka njoftuar shqiptaro-amerikanët dhe përfaqësuesit e shoqatave të shqiptarëve në Amerikë për prioritetet e Qeverisë së vendit, për hapat e ndërmarrë nga Qeveria në përmirësimin e klimës së të bërit biznes, për zhvillimin ekonomik, forcimin e demokracisë dhe konsolidimin e shtetit, duke ju bërë thirrje që suksesin e tyre në biznes ta sjellin si shembull të mirë përmes investimeve në Kosovë.
Kryeministri Haradinaj ka thënë me këtë rast se liria, pavarësia dhe shtetndërtimi i Kosovës janë të lidhura ngushtë me Shtetet e Bashkuara të Amerikës, të cilat janë prijëse të lirisë dhe rendit demokratik në botë, andaj u jemi mirënjohës përjetësisht.
Ndërkaq shqiptaro-amerikanët dhe përfaqësuesit e shoqatave të shqiptarëve në Shtetet e Bashkuara të Amerikës, gjatë takimit me kryeministrin Haradinaj kanë shprehur vullnetin dhe gatishmërinë e tyre që të investojnë në Kosovë./b.j/
*Per me shume foto shihni ne Facebook dielli vatra

PROTESTA E LËVIZJES VETËVENDOSJA

September 29, 2018 by dgreca

Me dhjetëra e dhjetëra mijëra protestues kanë marshuar sot paqësisht. Masës nuk i dukej fundi.

Marshimi me moton “Një popull s’i nënshtrohet një njeriu” ishte ndër protestat më të mëdha të organizuara në Prishtinë. Pjesëmarrës nga anembanë Kosova, e madje nga tërë trojet shqiptare, e bënë protestën madhështore. Pakënaqësia qytetare doli në shesh, sheshi foli kundër pushtetit. Vullneti i Republikës u shpreh kundër pazareve për territore mes Hashim Thaçit dhe Aleksandar Vuçiqit.

Protestuesit e mbledhur tek Biblioteka Kombëtare marshuan drejt sheshit “Skënderbeu” ku edhe u mbajtën fjalimet dhe performancat artistike. Protestuesve iu drejtua Saranda Bogujevci, aktivistja e të drejtave të njeriut dhe deputete e Lëvizjes VETËVENDOSJE! Me plumbat në trup prej luftës së fundit në Kosovë, me familjarët në shpirt e kujtesë të vrarë në masakër, ajo deklaroi: “Për mua është shumë e dhimbshme që Presidenti Thaçi sillet sikur ne i kemi borxh Serbisë”.

Minatori i Trepçës, Isuf Boletini, përfaqësues i masës së minatorëve të Trepçës, grevist i vitit 1989, shpalli mesazhin gjithnjë aktual të revoltës: minatorët nuk do të kursehen as sot për t’i realizuar të drejtat e këtij populli. Para pranisë madhëështore të protestestuesve në mbrojtje të tërësisë së Republikës, foli edhe veprimtari i çështjes kombëtare, deputeti me origjinë nga Presheva, Liburn Aliu. “Hashim Thaçi po na thotë se duhet të zgjedhim në mes të ndarjes dhe Bosnjës”. Ndërkaq, për Hashim Thaçin tha se nuk bëri as nuk foli për Preshevën kur e kishte rastin.

Luljeta Sharani, përfaqësuese e organizatës “Thirrjet e nënave”, së cilës i mungojnë nga lufta dy djemtë dhe burri, është dëshmia tjetër e negociatave pa parim dhe pa drejtësi, pa përgjegjësinë e sakrificës dhe dhimbjes. Të tilla negociata që nuk i marrin parasysh humbjet e Kosovës në njerëz, që hedhin në harresë zhdukjen dhe vrasjen, e bëjnë të ardhmen të dyshimtë.

Për ta dëshmuar se flijimi i shqiptarëve është vetë historia e shqiptarëve nën pushtimin serb, Afrim Kasapolli interpretoi vargjet e fuqishme të Mitrush Kutelit mbi shqiptarin e Kosovës. Forca e poetit dhe aktorit e përshkruan tërë masën qytetare që mbulonte sheshin.

Fjala e kryetarit Albin Kurtit nisi përmes brohoritjeve. Në fjalim theksoi rininë, mërgatën, gratë dhe veteranët. Fjalimi tregoi rëndësinë e shtetit dhe natyrën armiqësore të pushteteve që kemi ngritur deri tani, me tërë shkallën e korruptimit dhe humbjes së shpresës, varfërimin socio-ekonomik dhe arsimor e kulturor. Me përshkallëzimin gjeopolitik tregoi se cilët integrime duhet të synojmë: me SHBA-të në Nato, me Gjermaninë në Evropë, me Shqipërinë në komb. Përkundër kësaj politike të kthjellët dhe njerëzore, është vrazhdësia e thjeshtë e Thaçit që: “Bën vetëm foto me Trumpin dhe Informon Medvedevin e kërkon ta takojë Putinin”. Përballë rrënimit të Republikës prej pushtetit duhet që sheshi të bëhet institucioni i popullit, populli aktori i politikës sovraane: sepse “Një popull, s’i nënshtrohet një njeriu”.Protesta paqësore u mbyll nën vargjet e fuqishme dhe të shpejta të Bim Bimës. Vargje politikë dhe interpretimin artistik të tij e përcaktojnë vazhdimin e protestave në ritëm e në përmbajtje.

Presidenti Thaçi kërkon unitet për të mirën e Kosovës

September 29, 2018 by dgreca

Presidenti Thaçi kërkon unitet për të mirën e Kosovës/

-Presidenti Thaçi flet para pjesëtarëve të Forcës së Sigurisë, kërkon unitet për të mirën e Kosovës/

-Forca e Sigurisë së Kosovës në bashkëpunim me NATO-n dhe partnerët perëndimorë ka arritur pikën kur është e gatshme të marrë përgjegjësi shtesë, ato të një ushtrie të vërtetë/

PRISHTINË, 29 Shtator 2018-Gazeta DIELLI/ Presidenti i Republikës së Kosovës, Hashim Thaçi, sot ka mbajtur një fjalim para pjesëtarëve të Forcës së Sigurisë së Kosovës, ku ka bërë thirrje për unitet në realizimin e aspiratave afatshkurta e afatgjata të Kosovës.

Duke folur pas kthimit nga Nju Jorku, ku ndoqi punimet e Asamblesë së Përgjithshme të Kombeve të Bashkuara, presidenti Thaçi theksoi se ka marrë mbështetje të liderëve botërorë për aspiratat e Kosovës, qoftë për anëtarësim në Interpol dhe liberalizim të vizave, qoftë për formimin e ushtrisë së Kosovës dhe arritjen e marrëveshjes paqësore me Serbinë.

“Në bisedimet me aleatët tanë ndërkombëtarë morëm përkrahje të plotë për projektet tona, si për ato afatshkurta, ashtu edhe ato afatmesme”, u shpreh presidenti Thaçi, duke shtuar se “mbi të gjitha morëm përkrahje për rrugën tonë euroatlantike dhe konfirmim se kjo është rruga e vetme”.Duke folur për hapat e menjëhershëm për anëtarësim në Interpol, presidenti Thaçi u shpreh se “Kosova është përgatitur për Asamblenë e Përgjithshme të Interpolit” dhe se tani “është me rëndësi që të bëhemi bashkë dhe të gjithë të përkrahim dhe punojmë për këtë synim”.Unitet të spektrit politik, presidenti Thaçi kërkoi edhe në çështjen e liberalizimit të vizave për Kosovën.

”Kosova ka përmbushur të gjitha kriteret teknike që i ka vënë BE-ja”, u shpreh presidenti Thaçi dhe shtoi se Kosova tani “me të drejtë pret që sa më parë të merret vendimi për heqjen e regjimit të vizave”.

”Është thelbësore që të jemi të unifikuar në qëndrimin tonë, në mesazhin tonë dhe në deklaratat tona”, u shpreh presidenti Thaçi.

“Të gjithë të flasim me një zë për domosdoshmërinë e heqjes së vizave për qytetarët e Kosovës. Të mbrojmë me një zë interesin e shtetit të Kosovës, të qytetarëve të Kosovës”, shtoi presidenti Thaçi.

Duke folur për synimet afatgjata të Kosovës, anëtarësimin e vendit tonë në NATO dhe në BE, presidenti Thaçi theksoi se është krenar që është president i vendit më pro-NATO dhe më pro-BE në Evropë.

Ai pohoi se Forca e Sigurisë së Kosovës në bashkëpunim me NATO-n dhe partnerët perëndimorë ka arritur pikën kur është e gatshme të marrë përgjegjësi shtesë, ato të një ushtrie të vërtetë.

“Prandaj, të bëhemi bashkë dhe t’i kalojmë në Kuvendin e Kosovës ligjet që i hapin rrugë themelimit të ushtrisë dhe afrimit të Kosovës me NATO-n deri në anëtarësim të plotë”, potencoi presidenti Thaçi.

Ndërsa për dialogun në mes të Kosovës dhe Serbisë, presidenti Thaçi tha se për realizimin e aspiratës për ulëse në Kombet e Bashkuara, për anëtarësim në NATO dhe në BE, kërkohet që të arrihet marrëveshja paqësore në mes të Kosovës dhe Serbisë.

“Është e vërtetë që e kemi merituar që rrugëtimi ynë drejt Kombeve të Bashkuara, drejt NATO-s dhe BE-së, të jetë më ndryshe, më i lehtë, më i shpejtë. Të mos varej më nga marrëveshja paqësore me Serbinë”, u shpreh presidenti Thaçi, duke shtuar se “realiteti rajonal dhe ndërkombëtar imponon arritjen e marrëveshjes për normalizim për të dy shtetet”.

“Unë kam propozuar opsionin e korrigjimit të kufirit në mes të Kosovës dhe Serbisë, si dhe kam argumentuar se marrëveshja eventuale e korrigjimit paqësor të kufirit me Serbinë, Kosovës i siguron njohjen nga Serbia dhe ulësen në Kombet e Bashkuara. Çfarë është edhe më e rëndësishme, kjo hap mundësi edhe për bashkëngjitjen e Preshevës, Bujanocit dhe Medvegjës me vendin tonë”, u shpreh presidenti Thaçi.

Edhe kjo kërkon që në Kosovë, sipas presidentit Thaçi, spektri politik dhe e tërë shoqëria të jemi të bashkuar, të jemi unikë në kërkesën tonë dhe në synimin tonë.

“Të bëhemi bashkë, të sqarojmë se çfarë dëshirojmë të arrijmë, çfarë dëshirojmë të fitojmë, por edhe çfarë jemi gati të paguajmë për të arritur këtë qëllim”.Në fund të fjalimit të tij para pjesëtarëve të Forcës së Sigurisë së Kosovës, presidenti Thaçi u shpreh se “kryefjala ime sot ishte fjala bashkim”. “Të bëhemi bashkë për Kosovën, për të mirën e Kosovës, për të mirën e çdo qytetari”, kërkoi presidenti Thaçi.

”Të bëhemi bashkë e të shikojmë përtej interesave personale, partiake, elektorale, interesave të ditës dhe të punojmë të gjithë së bashku për Kosovën”, përfundoi ai./b.j/