Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova përkrah Amerikës kundër terrorizmit

by

–Qeveria ndau mjete për përkrahjen e koalicionit global për luftë kundër terrorizmit,kryeministri në detyrë Haradinaj: Kosova radhitet përkrah Shteteve të Bashkuara të Amerikës në luftën kundër terrorizmit dhe në arritjen e objektivave të koalicionit global për luftimin e terrorizmit kudo në botë/

PRISHTINË, 10 Janar 2020-Gazeta DIELLI/ Qeveria në detyrë e Republikës së Kosovës, e drejtuar nga kryeministri Ramush Haradinaj, në mbledhjen e sotme ka miratuar vendimin për ndarjen e mjeteve financiare për të mbështetur koalicionin global në luftë kundër ISIS/DAESH.

Njoftimi i dërguar nga Qeveria e Kosovës thekson se, me vendimin e miratuar janë ndarë mjete në vlerë prej 250 mijë eurosh dhe këto mjete janë ndarë nga shpenzimet e paparashikuara. Vendimi obligon Ministrinë e Financave, Ministrinë e Punëve të Jashtme dhe institucionet tjera kompetente për zbatim të vendimit.

Kryeministri në detyrë, Ramush Haradinaj ka theksuar se Kosova si anëtare e koalicionit global për luftimin e terrorizmit është e përkushtuar ta mbështesë në të gjitha format luftën për demokraci dhe liri. “Kosova radhitet përkrah Shteteve të Bashkuara të Amerikës në luftën kundër terrorizmit dhe në arritjen e objektivave të koalicionit global për luftimin e terrorizmit kudo në botë”, ka thënë kryeministri në detyrë, Ramush Haradinaj në mbledhjen e Qeverisë.

Letër Diellit:Të dashur vatranë, ruajeni VATRËN nga vatranët!

by

-Opinon nga jashtë Vatrës:Bëjeni VATREN jo vetëm të vatranëve, por të të gjithë shqiptarëve./

Nga Sami Mulaj/New Jersey/

Ta dashur e të shtrenjtë vatranë e vatrane!
Ju lutemi ruajeni Vatrën nga vatranët.
Të jesh vatran nuk do të thotë se je patriot, E të jesh patriot, padyshim do të thotë se je vatran…Vatran me ose pa testë anëtarësie, se Vatra nuk është e nuk duhet të jetë Parti, as si Parti, me antarsi si bateri ushtarësh, por as si një kope me ose pa dashin Ogiç.
Vatra me mbijetesën e saj na ka mësuar diçka, … se si të jetohet gjatë, dhe si të bëhesh shekullorë…E Vatra ka të drejtë të mburret me vehtëveten, e pse jo dhe vatranët,,,por vetëm kaq pra: vetëm se jemi  shekullorë.
Kjo është mjaftueshëm, pa u bërë e bezdisshme si Nëna e Kombit e vatranët Baballarët e Kombit?!! Dhe vatranët pa u bërë si veteranët në Shqipëri, që shfaqeshin e vazhdojnë kudo  me gjoksdekoratash, e grusht lart deri në vdekje?!!! Heronj pa mbarim, patriotë pa fund, flamuj e trima kudo… e Këngë e marshe deri në varr por pa Shqipëri në Europë, pa Kosovë të cliruar e shqiptarët më të varfërit e më të izoluarit në mes të Europës,?!! E kështu jemi dhe në shekullin e Ri, përsëri me mburrje të shpifur e pa arritje…
Edhe Vatra duhet të gjej rrugën e vet, pa i humbur rruga në Oborr…
Përpara se të mendojë për Kryesi e Kryetar(!!) të mendojë për përshtatje me kohën,,
Nuk është Vatra e Lisave Noli e Konica, dhe e kohës  së Shqipërisë  pa shtet a me diktaturë, e me Kosovë nën Jugosllavi.
Nuk është Vatra e një mërgate të vogël, por është e një mërgate më  se milionshe.
Nuk është Vatra e të ikurve, por është Vatra edhe e të lindurve e të atyre që rriten me Emigrim.
Pra është krejt tjetër kohë e tjetër brumë e tjetër gjeografi për Vatrën tonë.
Nuk e mbrojnë kuvendet as kryetarët!!
E mban përshtatshmëria me kohën.
Sa do të mirë e të zotë të jenë kryetarët, ata nuk mund të jenë Konicë e Nol, ata do të jenë nënhije lisash.
Sado të mirë e me plot histori luftrash të jenë Kryesitë, ato do të jenë nënhije lisash…Se tani, nuk janë e mbeten Lisa vetëm Noli e Konica, por janë me mijëra ata që janë bërë Lisa, këtu në Amerikë e gjetkë…Janë fëmijtë tanë, brezi i dytë e i tretë i Nol-Konicës, porse nuk duam ti njohim, e nuk duam ti vlerësojmë. Ne prindërit e “mirë”vetëm duam ti përdorim, a ti duam si lodra.
Prandaj pa u zgjatë do t’ju lutem:
Hiqni dorë nga kryesitë e Mëdha a kryetarët e Mëdhenj!
Zgjidhni ata që e organizojnë Vatrën e jo ta drejtojnë Vatrën.
Zgjidhni ata që e bëjnë Vatrën edhe shërbyesë të komunitetit e jo Flamurmbajtëse të komunitetit.
Zgjidhni për Vatrën kohën e Re, dhe hapni rrugën e ndërtoni infrastrukturën e shekullit të Ri. 
Zgjidhni një kryetar Nderi, të pranueshëm nga të gjithë, e që nuk zgjidhet e ndryshohet shpesh e Vatrën ta bëni me drejtor organizativ e administratorë profesional dhe jo me Kryesi a Kryetarë që mburren me biografi e heroizma si brigadjerët e arave!
Është më e thjeshtë, dhe Vatrën e bëni jo vetëm të vatranëve, por të gjithë shqiptarëve.

PALMER NË KOSOVË: SI MUND TË SHTROHET RRUGA DREJT PAQES

by

“Përfaqësuesi Special Matthew Palmer foli për atë se si Kosova mund të shtrojë rrugën drejt paqes përmes një marrëveshjeje gjithëpërfshirëse me Serbinë”, theksohet njëjtë në të dy komunikatat e dërguara – nga Presidenca e Kosovës dhe nga Lidhja Demokratike e Kosovës/

PRISHTINË, 1 Nëntor 2019-Gazeta DIELLI nga korrespondenti në Kosovë/ 

Mbërriti sot në Kosovë Zëvendës Ndihmësi i Sekretarit të Shtetit i SHBA-ve, njëherësh Përfaqësues Special i Sekretarit të Shtetit për Ballkanin Perëndimor, Matthew Palmer. Ka zhvilluar takime me drejtues institucionalë e politikë, ndërsa ka folur para një publiku të përbërë nga studentë dhe pjesëtarë të shoqërisë civile në Bibliotekën Kombëtare të Kosovës në Prishtinë/

“Përfaqësuesi Special Matthew Palmer foli për atë se si Kosova mund të shtrojë rrugën drejt paqes përmes një marrëveshjeje gjithëpërfshirëse me Serbinë”, theksohet njëjtë në të dy komunikatat e dërguara – nga Presidenca e Kosovës dhe nga Lidhja Demokratike e Kosovës.

KOMUNIKATA NGA PRESIDENCA E KOSOVËS – DEPARTAMENTI I INFORMACIONIT DHE KOMUNIKIMIT ME PUBLIKUN:

Presidenti Thaçi priti Përfaqësuesin Special të SHBA-së, Matthew Palmer

Prishtinë, 1 nëntor 2019 – Presidenti i Republikës së Kosovës, Hashim Thaçi, ka pritur sot të ngarkuarin e posaçëm të SHBA-së për Ballkanin Perëndimor, Matthew Palmer.

Presidenti Thaçi dhe i ngarkuari i posaçëm i SHBA-së për Ballkanin Perëndimor kanë biseduar për zhvillimet e fundit dhe për nevojën e krijimit të shpejt të institucioneve të Republikës së Kosovës.

Presidenti Thaçi ka thënë se Kosova është e bekuar që ka mbështetjen e vazhdueshme të SHBA-së.

“Kosova është një demokraci e konsoliduar, e dëshmuar në zgjedhjet e fundit. Ka institucione të pavarura të fuqishme, profesionale, të pavarura dhe liri të shprehjes”, ka thënë presidenti Thaçi.

Përfaqësuesi Special, Matthew Palmer, foli për atë se si Kosova mund të shtrojë rrugën drejt paqes përmes një marrëveshjeje gjithëpërfshirëse me Serbinë.

Presidenti Thaçi shtoi se Kosova mbetet e përkushtuar për vazhdimin e reformave për rend dhe ligj, për forcimin e të ardhmes euroatlantike, për reformat demokratike dhe do të angazhohet maksimalisht për arritjen e një marrëveshjeje gjithëpërfshirëse me Serbinë, e cila forcon paqen jo vetëm brenda dy vendeve, por në tërë Ballkanin Perëndimor.

KOMUNIKATA NGA LDK – ZYRA PËR INFORMIM:

Kryetari Mustafa dhe nënkryetarja Osmani takojnë zv. Ndihmës Sekretarin e Shtetit, Matthew Palmer

Prishtinë, 11 nëntor 2019

Sot, kryetari i LDK-së, Akademik Isa Mustafa, së bashku me nënkryetaren, Dr. Vjosa Osmani, takuan zv. Ndihmës Sekretarin e Shtetit, Matthew Palmer në Ambasadën e Shteteve të Bashkuara të Amerikës në Prishtinë. 

Gjatë këtij takimi shumë produktiv, u diskutua lidhur me çështjet që LDK i sheh si prioritet për institucionet e ardhshme që lidhen me agjendën e brendshme si dhe politikën e jashtme të Republikës së Kosovës, siç janë sundimi i ligjit, zhvillimi ekonomik dhe dialogu Kosovë-Serbi. 

Kryetari Mustafa e falënderoi Zv. Ndihmës Sekretarin Palmer për angazhimin shumë aktiv dhe përkrahjen e Shteteve të Bashkuara si dhe për angazhimin e tij personal për ta përkrahur Kosovën në të gjitha prioritetet dhe sfidat që na presin. 

Përfaqësuesi Special Matthew Palmer foli për atë se si Kosova mund të shtrojë rrugën drejt paqes përmes një marrëveshjeje gjithëpërfshirëse me Serbinë.

Veseli i përgjigjet QUNIT-it -Ne jemi përkrah aleatëve, por BE ta ndalë Serbinë

by

-Mirëpresim përpjekjet e SHBA-së, BE-së, Gjermanisë, Britanisë së Madhe, Francës dhe Italisë për zhvillimin e Dialogut/

-Kërkojmë nga BE që ta parandalojë financimin e strukturave paralele në Kosovë nga Qeveria e Serbisë, të ndalojë projektet kolonizuese serbe përmes ndërtimit të lagjeve në Veri…/

PRISHTINË, 13 Gusht 2019-Gazeta DIELLI/ Kryetari i Kuvendit të Kosovës, njëherësh lider i PDK-së, Kadri Veseli, i është përgjigjur letrës së lëshuar sot nga QUINT-i, duke rikonfirmuar qëndrimin e PDK-së e cila do të jetë përkrahë aleatëve perëndimorë të Kosovës

Nëpërmjet një shkrimi të publikuar në faqen e tij në Facebook, Veseli ka thënë se në zgjedhjet e parakohshme parlamentare, qytetarët e Kosovës do të zgjedhin ndërmjet atyre që janë përkrahë aleatëve perëndimorë që ndihmuan për lirinë dhe pavarësinë e vendit, apo për ata që i trajtojnë aleatët perëndimorë si armiq dhe përpiqen që Kosova të mbijetojë e vetme.

Shkrimi i plotë i Kadri Veselit:

Kosova arriti pavarësinë e saj duke pasur në krah një aleancë të fortë me Perëndimin.

Një nga temat mbi të cilat qytetarët do të duhet të vendosin në këto zgjedhje është nëse Kosova dëshiron t’i vazhdojë marrëdhëniet e saj të veçanta me aleatët tanë ndërkombëtarë, apo t’i trajtojë ata si armiq dhe të përpiqet që të mbijetojë e vetme.

Ne duhet t’i mbrojmë interesat e Kosovës, por nuk do të jemi në gjendje ta bëjmë këtë pa partnerët tanë strategjikë. Prandaj, mirëpresim përpjekjet e SHBA-së, BE-së, Gjermanisë, Britanisë së Madhe, Francës dhe Italisë për zhvillimin e Dialogut.

Megjithatë, ne kërkojmë nga BE që ta parandalojë financimin e strukturave paralele në Kosovë nga Qeveria e Serbisë, të ndalojë projektet kolonizuese serbe përmes ndërtimit të lagjeve në Veri, të lejohet rindërtimi i shtëpive të djegura atje ku shqiptarët jetonin para vitit 2001, si dhe të dënohen kriminelët dhe përdhunuesit serbë për krimet e kryera ndaj shqiptarëve të pafajshëm gjatë dhe pas luftës në Kosovë.

Kurban Bajrami në Shqipëri-URON SHBA

by

SHBA uron Kurban Bajramin/….

Dhe një mesazh politikës: Duhet reflektim!

Ambasada amerikane në Tiranë ka uruar të gjithë besimtarëve myslimanë, që festojnë sot Kurban Bajramin.Përmes një mesazhi në “Facebook”, ambasada e SHBA shprehet se kjo ditë ofron një mundësi të re për të reflektuar mbi angazhimin e përbashkët për ndërtimin e komuniteteve paqësore dhe të begata.

“Në emër të Ambasadës së Shteteve të Bashkuara, iu shprehim urimet më të mira të gjithë atyre që festojnë Kurban Bajramin. Kjo ditë ofron një mundësi për të reflektuar mbi angazhimin tonë të përbashkët për ndërtimin e komuniteteve paqësore dhe të begata. Eid Mubarak”, thuhet në mesazhin e SHBA.