Presidenti Nishani uron Presidentin Obama

July 4, 2016 by dgreca

Kreu i Shtetit shqiptar uron Presidentin amerikan Obama me rastin e Ditës së Pavarësisë/

Presidenti i Republikës, Sh. T. Z. Bujar Nishani uron me anë të një mesazhi Presidentin amerikan Barack Obama me rastin e Ditës së Pavarësisë të Shteteve të Bashkuara, në të cilin shkruhet:

“I nderuar Zoti President,

Me rastin e 240-vjetorit të Ditës së Pavarësisë së Shteteve të Bashkuara të Amerikës, kam kënaqësinë e veçantë që në emrin tim dhe të popullit shqiptar, të përcjell urimet më të ngrohta e të përzemërta për Ju dhe popullin mik amerikan.

Përfitoj nga rasti që, në këtë 4 Korrik, të shpreh mirënjohjen e thellë për mbështetjen e gjithanshme e shumë domethënëse që Shtetet e Bashkuara i kanë dhënë Shqipërisë dhe shqiptarëve që nga hedhja e hapave të para në krijimin e shtetit modern e deri në ditët e sotme, për konsolidimin e demokracisë dhe të institucioneve demokratike. SHBA-ja mbetet për Shqipërinë dhe shqiptarët mbështetësi dhe partneri kryesor strategjik për kryerjen e reformave të thella në kuadër të agjendës euroatlantike. Të ndërgjegjshëm për vlerat e lirisë, shqiptarët ndjehen sot krenarë që janë rreshtuar krah Shteteve të Bashkuara dhe koalicionit global në luftën kundër ISIS, terrorizmit ndërkombëtar dhe ekstremizmit të dhunshëm.

Duke ju siguruar për ndjenjat më të mira të miqësisë së popullit shqiptar për popullin mik amerikan, ju lutem pranoni, Zoti President, shprehjen e konsideratës sime më të lartë!”

Kosova në Samitin në Paris

July 3, 2016 by dgreca

-Për në Samitin e Liderëve të Ballkanit Perëndimor, kryeministri Isa Mustafa udhëtoi nga Prishtina, ministri Enver Hoxhaj nga SHBA/

PRISHTINË, 3 Korrik 2016-Gazeta DIELLI-B.Jashari/ Kryeministri i Republikës së Kosovës, Isa Mustafa, ka udhëtuar për në Paris ku do të marr pjesë në Samitin e Liderëve të Ballkanit Perëndimor.Të hënën, kryeministri Mustafa do të marrë pjesë në takimin qendror të Samitit, ku do të jenë të pranishëm presidenti francez François Hollande, kancelarja gjermane Angela Merkel, kancelari austriak Christian Kern, kryeministri italian Matteo Renzi, zëvendëspresidentja e KE-së, njëherësh përfaqësuese e lartë e BE-së për Politikë të Jashtme dhe Siguri, Federica Mogherini.

Njoftimi dërguar sot nga Kryeministria kosovare thekson se, në samitin e tretë që zhvillohet në kuadër të Procesit të Berlinit, do të jenë të pranishëm kryeministrat e Ballkanit Perëndimor, Edi Rama kryeministër i Shqipërisë, Isa Mustafa kryeministër i Kosovës, Miro Cerar kryeministër i Sllovenisë, Tihomir Oreskoviq kryeministër i Kroacisë, Milo Gjukanoviq, kryeministër i Malit të Zi, Emil Dimitrev kryeministër i Maqedonisë, Denis Zvizdiq kryeministër i Bosnjës dhe Hercegovinës si dhe kryeministri i Serbisë, Aleksandar Vuçiç. Gjatë punimeve të Samitit do të bëhet vlerësimi i progresit të arritur në projektet e deritashme si dhe pritet të iniciohen projekte të reja. Temë e Samitit do të jenë edhe avancimi i bashkëpunimit ndërmjet shteteve në rajon, fuqizimi i ekonomisë dhe bashkëpunimi ndërmjet të rinjve.

Gjatë Samitit të Parisit, kryeministri Mustafa do të takohet me drejtuesit e shteteve të BE-së si dhe homologët nga vendet e rajonit. Takime të ndara, kryeministri Isa Mustafa, do të zhvillojë edhe me drejtues të lartë të Bashkimit Evropian, ku do të theksoj përkushtimin e Republikës së Kosovës në proceset eurointegruese si dhe do të kërkojë përkrahje për fillimin sa më të shpejtë të lëvizjes së lirë të qytetarëve të Kosovës në vendet e BE-së.

Ndërsa, ministri i Jashtëm i Kosovës, Enver Hoxhaj, ka mbërritur në Francë nga SHBA, ku gjatë qëndrimit në Nju Jork ka takuar përfaqësuesit e më shumë se 15 shteteve të akredituara pranë OKB-së me axhendë lobimi dhe anëtarësimi në organizata.

“Nesër do të marrë pjesë në Samitin e Parisit me vendet e Ballkanit Perëndimor si vazhdimësi e Procesit të Berlinit. Kosova pritet të përfitojë projekte konkrete dhe prezantojë vizionin e saj për rajonin dhe të ardhmen evroatlantike”, thekson ministri i Jashtëm kosovar.

Koment: Heshtja e Edi Ramës për grabitjen në Rinas

July 2, 2016 by dgreca

… avokati i tij aksioner në kompaninë e sigurisë/

Eni Bushi ka qenë avokat i Partisë Socialiste në Komisionin Qëndror të Zgjedhjeve për disa vite dhe një nga juristët e kësaj force politike në gjykatë. Pikërisht ky person është aksioner në kompaninë që fajëson Ministria e Brendshme për grabitjen e parave në Rinas.

“ICTS Albania” është përgjegjëse sipas policisë për vjedhjen e parave që do të ngarkoheshin në avion.

Kompania fajësohet për sigurinë e dobët në aeroport, pavarësisht raporteve të vazhdueshme për të rritur masat e sigurisë. Nga kërkimet në QKR, rezulton se 25% të aksioneve i ka në zotërim Eno Bushi, ndërsa 75% i përkasin ICTS Europe.

Eno Bushi njihet si jurist i Partisë Socialiste dhe person i afërt me kryeministrin Edi Rama. Kryeministri nuk është prononcuar në asnjë rast për skandalin e grabitjes në Rinas, pavarësisht se ky është konsideruar një cënim i sigurisë kombëtare.

Policia, 30 mijë Euro shpërblim për informacione

30 mijë euro shëprblim ka vendosur policia e Durrësit për këdo që jep informacion të vlefshëm për vendodhjen e autorëve të grabitjes spektakolare dy ditë më parë në aeroportin e Rinasit.

Një ditë më parë u arrestuan 5 punonjës të aeroportit si të implikuar në grabitjen e rreth 1 milion eurove.

Më poshtë deklarata e policisë:

Në lidhje me ngjarjen e ndodhur në aeroportin “Nënë Tereza”, më datë 30.06.2016, Drejtoria Vendore e Policisë Durrës, vë në dispozicion shumën prej 30.000 Euro për çdo shtetas, i cili jep informacion të rëndësishëm që do të ndihmojë grupin hetimor në identifikimim dhe kapjen e autorëve, si dhe informacion të nevojshëm në lidhje me lëvizjet paraprake të mjetit me të cilën u krye vjedhja.

Ne ju garantojmë që çdo informacion do të vlerësohet maksimalisht nga grupi hetimor dhe do të ruhet anonimati i çdo qytetari që do të bashkëpunojë me Policinë.

Për çdo informacion jeni të lutur të telefononi në numrin 0694110217 ose të shkruani në adresën e-mail: policiadurrës@gmail.com, si edhe në faqen zyrtare në rrjetin social Facebook, “Drejtoria e Policisë Qarku Durrës”.

Duke ju falenderuar për bashkëpunimin ju sigurojmë se Drejtoria Vendore e Policisë Durrës, po shfrytëzon të gjitha kapacitetet e saj për zbulimin dhe vënien para përgjegjësisë penale të autorëve.

Berisha: Thirrje prokurorisë të hetojë qeverinë si organizatë kriminale

Ish-kryeministri Sali Berisha ka kritikuar ashpër thyerjen e perimetrit të sigurisë së aeroportit të Rinasit nga ku u grabiten një shumë e madhe parash.

Me anë të një shënimi në facebook, Berisha shkruan se qeveria e hajdutëve të shtetit lau, shpejt e shpejt, duart në kundërshtim me çdo ligj sigurie.

Sipas tij, qeveria reagoi sikur aeroporti i Rinasit të ishte diku në shkretëtirën e ndonjë vendi tjetër, sikur aeroporti, terminalet, pista, anekset e tij të mos ishin për çdo vend të botës objekt të rëndësisë së dorës së parë për sigurinë kombëtare, po sikur të ishin ndonjë pulari apo fermë blegtorale.

“Grabitja në pistën e aeroportit me forcën e armëve është thyerja më e madhe e sigurisë kombëtare këto 25 vite dhe qëndrimi i Edvin Shullazit dhe qeverisë së tij është qëndrimi më i papërgjegjshëm që mund të imagjinohet”,- shkruan ai.

Berisha nënvizon se ata grabiten një kuintal euro pa ju hyrë ferrë në këmbë teksa u larguan në drejtim të paditur.

Më tej, ish-kryeministri i ka bërë thirrje prokurorisë së shtetit të ndërmarrë hetimet më të vendosura për këtë akt të pashembullt që ka vulën e bashkëautorsisë dhe papërgjegjshmërisë ekstreme të qeverisë.

Ja shënimi i plotë i ish-kryeministrit Sali Berisha në Facebook:

Te dashur miq, dy dite me pare, ne nje akt te pashembullt, kriminele me maska dhe kallashnikov pushtuan aeroportin tone te vetem civil, pushtuan pisten e tij, grabiten pa ju hyre ferra ne kembe nje kuintal euro dhe u larguan ne drejtim te paditur.

Ata kesaj rradhe nuk ishin terroriste te ISSI qe kerkonin gjak dhe jete njerezish por ishin terroriste te eurove dhe deshmuan se ata pushtuan lehtesisht, madje ne zonen me delikate, aeroportin tone duke faktuar zero sigurine qe ekziston per aeroportin dhe ata qe udhtojne nga ky aeroport.

Qeveria e hajduteve te shtetit lau shpejt e shpejt duart. Ne kundershtim me çdo ligj sigurie, qeveria reagoi sikur aeroporti i Rinasit te ishte diku ne shkretetiren e ndonje vendi tjeter, sikur aeroporti, terminalet, pista, anekset e tij te mos ishin per cdo vend te botes objekt te rendesise se dores se pare per sigurine kombetare por sikur te ishin ndonje pulari apo ferme blegtorale.

Grabitja ne pisten e aeroportit me forcen e armeve eshte thyerja me e madhe e sigurise kombetare keto 25 vite dhe qendrimi i Edvin Shullazit dhe qeverise se tij eshte qendrimi me i papergjegjshem qe mund te imagjinohet.

I bej thirrje prokurorise se shtetit te ndermarre hetimet me te vendosura per kete akt te pashembullt qe ka vulen e bashkautoresise dhe papergjegjshmerise ekstreme te qeverise organizate e vertet kriminale! Sb.”.

Kosovë-Diplomojnë kadetët e brezit 2016 të FSK-së

July 1, 2016 by dgreca

Komandanti i Gardës Kombëtare të Ajovës (SHBA) gjenerali Timothy Orr: Ju sot e keni bërë krenare tërë Kosovën/ PRISHTINË, 1 Korrik 2016-Gazeta DIELLI/ Në kazermën ʺSkënderbeuʺ në Ferizaj u zhvillua sot ceremonia solemne e diplomimit të kadetëve të Qendrës së Studimeve Universitare të Forcës së Sigurisë së Kosovës, brezi 2016.

Në ceremoninë ku morën pjesë ministri i Forcë së Sigurisë së Kosovës, Haki Demolli dhe komandanti gjenerallejtënant Rrahman Rama, komandanti i Gardës Kombëtare të Ajovës (SHBA) gjenerali Timothy Orr u shpreh i emocionuar me arritjet e kadetëve për katër vjet gjatë shkollimit.

“Në ju, unë shoh drejtues me integritet dhe shërbyes shembullorë. Ju keni punuar shumë përgjatë katër vjetëve, që të arrini sot këtu dhe të merrni gradën e nëntogerit. Ju sot e keni bërë krenare tërë Kosovën. Ju jeni më të mirët e të mirëve që ka Kosova. Para së gjithash, mbani mend: Vendi juaj ka investuar kohë, para dhe udhëheqje që ju të arrini këtë pikë të karrierës ushtarake”, u shprh gjenerali amerikan Orr.

Kadetët e sapo diplomuar e që dhanë betimin solemn janë: Behar Fazliu, Eugen Thaçi, Rilind Idrizi, Xhemal Mziu, Kemajl Haliti, Drilon Hasani, Zymer Kukalaj, Çlirim Morina dhe Besfort Kurteshi./b.j/

PROMOVOHET BUSTI I HYLLARY CLINTON NE SARANDE

July 1, 2016 by dgreca

“Zgjedhjet në SHBA janë akoma disa muaj larg, por një qytet në Shqipëri ka vendosur të ngrejë një monument për Hillary Clinton”.

Kështu ironizon Russia Today, teksa raporton se qyteti turistik i Sarandës i ka ngritur një monument kandidates demokrate për presidente e SHBA.

Shqiptarët kanë ngritur statuja për presidentë amerikanë, por kjo është hera e parë që i ngrihet statujë një kandidati për president, raporton RT.

Shumë komentues thonë poshtë videos së postuar nga RT se kjo është gjëja më e çuditshme që kanë dëgjuar.

“Nuk kanë gjë tjetër për të bërë shqiptarët,” shkruan dikush.

Megjithatë Jessica Rightmayer, një turiste amerikane që ishte në Sarandë në ato momente, qau kur u luajt himni amerikan.

“Mendoj se është një monument i bukur dhe i ngjan,” tha ajo për Reuters.

Skulptori Idriz Balani tha se ka përdorur tre foto për të krijuar këtë punim.