Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Shqipëria, sërish e para në Europë

by

Raporti i BE, Shqipëria e para në Evropë për kultivimin e kanabisit/

Raportin i BE-së për vitin 2016 për drogën, tregon se në gjithë kontinentin qarkullon 24 miliardë euro në vit. Në raportin e Komisionerit për Çështjet e Brendshme në BE, të publikuar nga komisioneri Dimitris Avramopulos, thuhet se ky nuk është i vetmi aktivitet i paligjshëm që sjell përfitime për krimin e organizuar, duke shtuar edhe terrorizmin dhe trafikimin e qenieve njerëzore në to.

Raporti i BE është publikuar si një udhërrëfyes për Europolin dhe policitë e tjera të unionit, ku vlerësohet se aktivitetet e paligjshme sjellin mbi 30 miliardë euro në vit për organizatat kriminale, ku pjesën më të madhe e zë droga.

Sipas këtij raporti, 38 % të tregut të drogës e zënë bimët narkotike, pra kanabisi që gjeneron 9.3 miliardë euro çdo vit fitime për trafikantët dhe prodhuesit.

Për Shqipërinë, në këtë raport thuhet se me gjithë operacionin policor në Lazarat, vendi unë renditet sërish i pari në Europë për prodhim kanabisi dhe shitjen e tij në tregjet e paligjshme europiane. Pas saj vjen Holanda, ku ky mall shpërndahet, duke shkelur shumë herë edhe ligjet për konsumin e tij. Edhe Çekia zë një pjesë të rëndësishme të këtij tregu së bashku me Marokun, Spanjën dhe Afganistanin.

Në vend të dytë, droga që sjell më shumë të ardhura del të jetë heroina, pasi zë 28 % të këtij tregu duke arritur 5.8 miliardë euro në vit.

Heroina, që rrjedh prej opiumit, vjen nga vendet e Kaukazit përmes Turqisë, Shqipërisë dhe vendeve të Ballkanit Perëndimor. Me gjithë operacionet e mëdha që janë bërë përgjatë vitit 2015, ku u sekuestruan më shumë se 3300 tonë heroinë anembanë Evropës, trafikantët e saj kanë gjetur shtigje të reja.

Sa i përket vendit të tretë, atë e zë kokaina, e cila ka 24 % të tregut me 5.7 miliardë euro çdo vit. Më pas vijnë afetamina dhe metamfetamina me 8 % dhe 1.8 miliardë euro në vit. Pas tyre renditet ekstazi me 2 % dhe disa substanca të tjera psikoaktive.

Meshtari Rrok Gjonlleshaj, kryeipeshkvi i ri i Tivarit

by

Meshtari kosovar, Rrok Gjonlleshaj, emërohet nga Papa Françesku si kryeipeshkëv i ri metropolit i Tivarit në Malin e Zi. Sot, Ati i Shenjtë pranoi dorëheqjen e imzot Zef Gashit, për arsye të moshës, dhe emëroi në detyrën e kryeipeshkvit meshtarin, që deri tani ka qenë famullitar në kishën e Shna’Ndout në Prishtinë.

Don Rrok Gjonlleshaj ka lindur më 10 shkurt 1961 në Velezhë, territor i Administraturës Apostolike të Prizrenit. Pasi përfundoi formimin shkollor në vendlindje, vijoi me studimet filozofike dhe teologjike në Seminarin e Rijekës, në Kroaci. U shugurua meshtar në vitin 1987 e më pas, shërbeu në shumë famulli, së pari si vikar e pastaj si famullitar. Ka qenë edhe drejtor i Radio Marisë, emitentes katolike lokale dhe bashkëpunëtor me revistën fetaro-kulturore “Drita”.

Aktualisht është famullitar i kishës së Shna’Ndout në Prishtinë dhe njëkohësisht, kryen edhe detyrën e ekonomit të Administraturës Apostolike të Prizrenit.

Shqiptari që erdhi si refugjat e kthehet i vdekur nga Gjermania

by

Pas një grindjeje një kosovar e një shqiptar vrasin një shqiptar tjetër me thikë në një strehimore në Bonn. Fradjovola 32 vjeçar kishte plane për të vazhduar jetën në Gjermani. Autorët heshtin para hetuesisë.

Dy refugjatët, një kosovar dhe një djalë shqiptar që vranë refugjatin tjetër Fradjovolën nga Tropoja heshtin para hetuesisë gjermane. Në një bisedë me Deutsche Wellen, drejtuesi i zyrës së shtypit të policisë së Bonnit, Robert Scholten njofton se dy autorët e arrestuar që kryen vrasjen e shqiptarit 32 vjeçar në një strehimore azili Bonn të dielën (03.04) i janë paraqitur gjykatësit dhe do të vazhdojnë të qëndrojnë në arrest, ndërkohë që hetimet vazhdojnë, sepse deri më tani të dy autorët heshtin.

Policia e prokuroria po bashkëpunojnë ngushtë për pistat e hetimit, por deri më tani nga të dhënat duket se sherri mes shqiptarëve që përfundoi me nxjerrjen e thikës e vdekjen e shqiptarit, ka pasur arsye personale. Një i afërm i Fradjovolës është shprehur për median gjermane se Fradjovola ishte provokuar më parë nga njëri nga autorët që kryen vrasjen me thikë dhe kritikon mosreagimin e autoriteteve. “Pse nuk u çua ai në një strehimore tjetër?” Njëri nga autorët, një djalë kosovar që jetonte prej disa muajsh në strehimore duket se ka pasur grindje edhe me banorë të tjerë. “Kishim planifikuar që ai të jetonte me mua në Köln, tani më duhet ta varros Fradjovolën në vendlindjen e tij në Tropojë”, thotë kushëriri.

Ndërkohë në vendin e ngjarjes banorët e strehimores dhe ata përreth kanë vënë lule e kanë ndezur qirinj. Tre metra para hyrjes u vra Fradjovola, para një pllakati me mbishkrimin “Welcome” – një zënkë që kishte nisur më parë dhe ishte vazhduar jashtë qendrës së azilit. Megjithë përpjekjet e forcave të shpëtimit dhe mjekëve, viktima humbi jetën ende në vendngjarje. Jana Biesenbach, drejtuese e strehimores thotë se “u njoftuan të gjithë banorët, shumë vetë shpërthyen në lotë, pastaj ne e kujtuam viktimën me një minutë heshtje.” Biesenbach e kujton shqiptarin si një njeri punëtor. “Një njeri i zellshëm, vetëm para pak ditësh ai ndihmoi në rinovimin e një dhome duke lyer.” Strehimorja e azilit në Bonn konsiderohej e qetë dhe policia njofton se deri më tani nuk ka pasur incidente të rënda.(DW)

ALI AHMETI ZEVENDESON MINISTRAT NE QEVERI, I MIRATON KUVENDI

by

Parlamenti i Maqedonisë miratoi sot kandidatët për ministra dhe zëvendësministra të propozuar nga Bashkimi Demokratik për Integrim. Kryeministri i qeverisë teknike, Emil Dimitriev fillimisht refuzoi dy prej emrave, por më pas ishte ai që iu drejtua Parlamentit për të miratuar të gjithë emrat e propozuar për në kabinetin e tij.

Bekim Maksuti në vitin 2012 së bashku me tashmë ish-kryeministrin Fatmir Besimi kishte bërë homazhe tek varrezat e luftëtarëve të rënë të ish-Ushtrisë Çlirimtare Kombëtare në një fshat të Likovës dhe kjo ishte bërë fillimisht pengesë që z.Dimitriev ta pranonte atë i pjesë të qeverisë së tij. Maksuti u zgjiodh për zëvendësministër të Mbrojtjes. Arlind Zeqiri, ministër pa portofol, ishte personi i dytë i diskutueshëm për kryeministrin maqedonas

Zëvendëskryeministër i ri për Zbatimin e Marrëveshjes së Ohrit do të jetë Festim Halili. Arbër Ademi, zëvendëskryeministër për Euro-Integrime. Driton Kuçi – Ministër i Ekonomisë. Valdet Xhaferi. Ministër i Drejtësisë. Pishtar Luftiu, ministër i Arsimit. Ministrinë e Ambientit Jetësor dhe Planifikimit Hapësinor do ta drejtojë Bashkim Ahmeti. Shyrete Elezi u zgjodh për ministre të Pushtetit Lokal.

Ministrat e rinj janë të rinj edhe në moshë dhe pa shumë përvojë politike. Shumica e tyre janë ligjërues në Universitetin e Tetovës. Emil Dimitriev tha se pret nga kjo përbërje një përkushtim maksimal dhe respektimin e Kushtetutës. Lidhja Social Demokrate refuzoi të votojë për listën e ministrave të rinj.

Vendimi i BDI-së për të ndryshuar anëtarët e kabinetit, erdhi pas një skandali brenda dy zyrtarëve të lartë brenda partisë dhe shikohet në mënyra të ndryshme në opinionin publik. Disa mendojnë ndryshimi ishte pozitiv për t’iu lënë hapësirë njerëzve të rinj të tregojnë kapacitetet e tyre, por të tjerë vlerësojnë se këto janë vetëm manovra të partisë shqiptare në pushtet.(VOA)

Presidentja Jahjaga ndanë mirënjohje

by

PRISHTINË, 5 Prill 2016/ Presidentja e Republikës së Kosovës Atifete Jahjaga nderoi me mirënjohje një numër institucionesh dhe individësh. Mirënjohje ka ndarë për Rrjetin e Grupeve të Grave të Kosovës, Qendrën Kosovare për Rehabilitimin e Viktimave të Torturës, Qendrën për Rehabilitimin e Nënës dhe Fëmijës, Medica Kosova, Medica Gjakova, Qendrën për Promovimin e të Drejtave të Grave, Ekipin e filmit “Tri Dritare dhe Një Varje”, për artisten Eliza Hoxha, për kontributin që kanë dhënë në afirmimin e statusit të viktimave të dhunës seksualë gjatë luftës në kuadër të Këshillit Kombëtar për të Mbijetuarit e dhunës seksuale gjatë luftës.

Duke ju shprehur falënderimin e sinqertë për angazhimin e tyre, Presidentja Jahjaga theksoi nevojën e përkushtimit të mëtejshëm shoqëror dhe institucional për ngritjen e vetëdijes shoqërore për krimin e luftës të dhunës seksuale të përdor në Kosovë gjatë luftës dhe mbi të gjitha për nevojën e garantimit të të gjitha të drejtave të parapara me ligjet e vendit.

Jahjaga, e zgjedhur në krye të shtetit të Kosovës në 7 prill 2011, e para Presidente Republike në Kosovë e në vendet fqinje, përfundon mandatin pesëvjeçar, ndërsa Presidenti i ri i zgjedhur, Hashim Thaçi, do të marrë detyrën gjatë një ceremonie që do të organizohet në Sheshin Skënderbeu në Prishtinë, në 8 prill, pas betimit një ditë më parë në Kuvend, ku u votua nga deputetët në 26 shkurt 2016./b.j/