Të dashur bashkombas të besimit Islam

Më lejoni që në emër të Federatës Pan-Shqiptare të Amerikës “Vatra”, të gazetës “Dielli” të familjes sime dhe në emrin tim personal t’ju uroj përzemërsisht: Gëzuar Kurban Bajramin. Paqja dhe mirësia Zotit qoftë përherë me ju.

Me bekimin e të madhit Zot, për të gjithë ju, familjet e miqtë tuaj qoftë kjo festë e madhërishme një çast hyjnor gëzimi, lutje, shprese e begatie.

Kjo festë e bujarisë që na afron më shumë me Zotin e njëri-tjetrin sjelltë paqe, dashuri, vëllazëri e sukses për çdo shqiptar.

Me fat Kurban Bajrami e me zemër të mirë ngahera.

Mirësia, bujaria, respekti e sakrificat në emër të Zotit, familjes, atdheut e kombit qofshin përherë të bekuara, të lëvduara e të shenjtëruara për çdo shqiptar.

Urimet më të përzemërta vëllezër e motra të dashur.

Me respekt e gëzim

Kryetari i VATRËS

Dr.Elmi BERISHA

PARADA SHQIPTARE NË NEW YORK MË 21 QERSHOR 2025.

Patrioti i shquar i mërgatës shqiptare të Amerikës z.Pjetër Gashi dhuroi 500 dollarë për Federatën Vatra. Humanisti Gashi ka dhuruar dhe herë të tjera për Vatrën. Prej 40 vitesh në Shtetet e Bashkuara të Amerikës, fisniku Pjetri bashkë me bashkëshorten Liljana Gashi janë model i artë i bashkëshortëve humanë, ndihmëtarë, fisnikë e patriotë. Ata i përgjigjen pozitivisht gjithmonë çdo thirrjeje për mbështetje dhe kudo ku ka nevojë emri i tyre gjendet aty. Ata janë modeli më i shkëlqyer i shqiptarit në Amerikë, vlerë dhe krenari për komunitetin shqiptar. Që prej ardhjes në Amerikë Pjetër dhe Liljana Gashi kanë marrë pjesë në të gjitha organizimet, tubimet, protestat, demonstratat e ngjarjet kulturore e atdhetare në mbështetje të çështjes kombëtare në Amerikë. Të gjitha organizatat patriotike janë mbështetur prej bashkëshortëve Gashi të cilët dhurojnë për raste gëzimi e hidhërimi, për festa fetare e ngjarje kombëtare, për fatkeqësi e fushata të ndryshme kulturore e sociale. Vatra e Dielli shprehin mirënjohje e falënderim të veçantë për Pjetër dhe Liljana Gashin e çdo shqiptar që mbështet Vatrën e Diellin si institucionet më të fuqishme patriotike në mërgatën shqiptare të Amerikës.

Bashkëpunëtori i gazetës Dielli, historiani Ndue Bacaj u largua prej nesh përgjithmonë. Në New York, më 30 maj 2025, në moshën 71 -vjeçare, shkrimtari, publicisti, studiuesi i përkushtuar dhe historiani i trevës së Malësisë kaloi në amshim duke lënë pas një trashëgimi të çmuar të veprave të tij studimore. Federata Pan-Shqiptare e Amerikës “Vatra” dhe Gazeta “Dielli” i dërgojnë familjes, miqve e bashkëpunëtorëve të tij ngushëllimet më të dhimbshme për ndarjen nga jeta. Ndue Bacaj pjesëmarrës në disa simpoziume brenda dhe jashtë atdheut, është vlerësuar nga Bashkia e Malësisë së Madhe me titullin e lartë “Qytetar Nderi” e njëkohësisht është nderuar e vlerësuar nga disa shoqata e organizata patriotike për punën e tij publicistike. Ndue Bacaj ishte modeli i njeriut patriot, korrekt, i ndershëm dhe punëtor. Gazeta Dielli e përkujton me respekt të veçantë kontributin e tij në lartësimin e figurave kombëtare, ngjarjeve e datave të shënuara historike.

I përjetshëm kujtimi dhe nderimi për jetën dhe veprën e tij.

Valdete Cenalia Dida/

Zikri Meta është një figurë e njohur dhe shumë e respektuar në komunitetin shqiptar të diasporës në Shtetet e Bashkuara. I njohur për shpirtin atdhetar, angazhimin shoqëror dhe talentin artistik, Zikriu ka dhënë një kontribut të shumëanshëm në ruajtjen dhe forcimin e identitetit kombëtar shqiptar.

Përveç përkushtimit të tij të thellë ndaj shkollës shqipe, ku ka mbështetur brez pas brezi edukimin e fëmijëve me gjuhën, kulturën dhe historinë shqiptare, ai ka qenë një zë i fortë në mbrojtje të çështjes shqiptare në Kosovë dhe Maqedoni, duke marrë pjesë në tubime, protesta dhe aktivitete në Washington D.C..

Ai ka qenë i lidhur ngushtësisht me Joe DioGuardin, ish – kongresmenin amerikan dhe themeluesin e Ligës Shqiptaro – Amerikane dhe Lobit Shqiptar, me të cilin ka ndarë bindjen për rëndësinë e një diaspore të bashkuar dhe aktive.

Përveç veprimtarisë së tij komunitare dhe kombëtare, Zikri Meta është gjithashtu një piktor i talentuar, që përmes artit shpreh ndjeshmëri, histori dhe identitet. Pikturat e tij pasqyrojnë shpesh bukuritë natyrore të trojeve shqiptare, përjetime personale dhe simbole kombëtare, duke e bërë artin e tij një mjet të fuqishëm të ruajtjes së kujtesës dhe shpirtit shqiptar në mërgatë.

Trashëgiminë e këtij përkushtimi e vazhdon me dinjitet vajza e tij, Gonxhe Meta, sot drejtoreshë e shkollës shqipe, e cila me pasion dhe profesionalizëm udhëheq procesin arsimor dhe kulturor për fëmijët shqiptarë. Gonxhja është një figurë shumë aktive në komunitet, duke organizuar veprimtari kulturore, festa kombëtare dhe duke nxitur pjesëmarrjen e brezit të ri në ruajtjen e identitetit.

Së bashku, Zikri dhe Gonxhe Meta përfaqësojnë një model të rrallë dhe frymëzues për të gjithë komunitetin shqiptar në diasporë. Kontributi i tyre në fushën e edukimit, artit, kulturës dhe veprimtarisë kombëtare është i paçmuar dhe do të mbetet si trashëgimi për brezat që vijnë.