Kronike – Page 204 – Dielli

Prishtinë-Hapet zyrtarisht RYCO – Zyra Lokale në Kosovë

October 10, 2017 by dgreca

-Zyra Rajonale për Bashkëpunim Rinor (RYCO), si mekanizëm rajonal, është themeluar nga qeveritë e gjashtë shteteve të Ballkanit Perëndimor: Shqipërisë, Kosovës, Malit të Zi, Maqedonisë, Serbisë dhe Bosnë e Hercegovinës/

PRISHTINË, 10 Tetor 2017-Gazeta DIELLI-B.Jashari/ Në Prishtinë sot u bë hapja zyrtare e Zyrës Rajonale për Bashkëpunim Rinor (RYCO), Zyra Lokale në Kosovë, në hapësirat e Qendrës së Studentëve – Kampusit Universitar, në praninë e përfaqësuesve vendorë e ndërkombëtarë. Zyra Rajonale për Bashkëpunim Rinor, si mekanizëm rajonal, i themeluar nga gjashtë qeveritë e Ballkanit Perëndimor (Shqipëria, Kosova, Mali i Zi, Maqedonia, Serbia dhe Bosna e Hercegovina) në bashkëpunim të plotë me shoqërinë civile, ka filluar funksionalizimin e saj me kapacitete të plota në 4 korrik 2017.RYCO tenton të jetë një shembull i mirë i bashkëpunimit rajonal në Ballkanin Perëndimor dhe të forcojë procesin e Berlinit, bashkëpunimin paqësor dhe demokratik në rajon.

Me programet e saj të shkëmbimit, RYCO synon të përmirësojë mirëkuptimin reciprok ne mes dallimeve kulturore dhe të zhvilloj respekt të ndërsjellë, si dhe përgjegjësinë e përbashkët për rajonin dhe Evropën midis të rinjve të Ballkanit Perëndimor.Përmes qasjes së saj, RYCO gjithashtu synon të nxit trajtim konstruktiv ndaj të kaluarës dhe do të mbështet procesin e pajtimit në rajon.Aktualisht RYCO është në fazën e hapjes zyrtare së Zyrave Lokale në gjashtë vendet e Ballkanit Perëndimor. Në këtë kontekst edhe qeveria e Kosovës ka përmbushur obligimin e saj ligjor duke siguruar Zyrën Lokale të RYCO-së në Prishtinë.

Qeveria e Kosovës në 30 dhjetor 2016 ka miratuar Projektligjin për ratifikimin e Marrëveshjes për themelimin e Zyrës Rajonale për Bashkëpunim Rinor në mes të Kosovës, Shqipërisë, Bosnjës dhe Hercegovinës, Malit të Zi, Maqedonisë dhe Serbisë. Ndërsa, në 30 mars 2017 Kuvendi i Kosovës miratoi Ligjin për ratifikimin e Marrëveshjes për themelimin e Zyrës Rajonale për Bashkëpunim Rinor në mes të Kosovës, Shqipërisë, Bosnjës dhe Hercegovinës, Malit të Zi, Maqedonisë dhe Serbisë. Nga 93 deputetë prezentë seancën plenare, 82 votuan pro, 10 kundër e 1 abstenoi.

SHBA-Kosovë, kundër trafikimit me qenie njerëzore

October 9, 2017 by dgreca

-Ministri Sefaj priti në takim një delegacion nga ShBA. Ky takim u realizua pas vizitës dhjetëditore në Shtetet e Bashkuara të Amerikës së delegacionit nga Kosova, të mundësuar nga Open World Leadership Program/

PRISHTINË, 9 Tetor 2017-Gazeta DIELLI/ Ministri i Punëve të Brendshme të Kosovës, Flamur Sefaj priti sot në takim njoftues një delegacion nga Shtetet e Bashkuara të Amerikës, ku temë bisedimi ishte lufta kundër trafikimit me qenie njerëzore.Ky takim u realizua pas vizitës dhjetëditore në Shtetet e Bashkuara të Amerikës së delegacionit nga Kosova, të mundësuar nga Open World Leadership Program, që është një program i financuar nga ShBA, për mundësi të shkëmbimit të përvojave, nga temat e ndryshme të ndërlidhura me mbrojtje dhe siguri të nivelit shtetëror, si dhe të përfaqësuar nga delegacionet përkatëse nga e gjithë bota.

Me këtë rast, nga të dy palët u vlerësua se në Republikën e Kosovës është duke u luftuar me sukses trafikimi me qenie njerëzore, ku nga përfaqësuesit e këtij delegacioni amerikan u premtua se do të ketë përkrahje për Ministrinë e Punëve të Brendshme.

Gjithashtu u diskutua për mundësinë e bashkëpunimit në mes të dy vendeve dhe shkëmbimi i përvojave me mundësinë e përkrahjes nga ana e delegacionit./b.j/

Times Square- si u shmang ’11 shtatori’ i dytë

October 7, 2017 by dgreca

Agjenti i FBI-së që zbuloi planin terrorist, ishte infiltruar në grup, si një ndihmës për realizimin e sulmit./

Një plan i Shtetit Islamik për të sulmuar New York City-n, përfshirë Times Square dhe sistemin e metrove, është zbuluar me ndihmën e një agjenti të FBI-së. Një person në SHBA, një në Pakistan dhe një në Filipine, janë arrestuar nën akuzën e planifikimit të sulmeve terroriste.

Tre shtetasit përdornin aplikacionet telefonike për të mbajtur kontakte me njëri-tjetrin dhe sipas autoriteteve amerikane, plani ishte për një 11 shtator të dytë. Të arrestuarit janë Abdulrahman El Bahnasaëy, 19 vjeç me nënshtetësi kanadeze, Talha Haroon, 19 vjeç dhe Russell Salic, 37 vjeç, me nënshtetësi amerikane. Agjenti i FBI-së që zbuloi planin terrorist, ishte infiltruar në grup, si një ndihmës për realizimin e sulmit.

Prishtinë & Kukes- dëbora e parë e vjeshtës

October 7, 2017 by dgreca

-Dëbora e parë e vjeshtës dy muaj e gjysmë para ardhjes së dimrit me kalendar/-Prishtinës thuhet se i ka mbetur emri si një vend ku prishet stina (Prishstina)…Edhe se e mban emrin e trashëguar nga Perandori Justiniani/

PRISHTINË, 7 Tetor 2017-Gazeta DIELLI-B.Jashari/ Në kryeqytetin e Kosovës, Prishtinë, dëbora e parë e kësaj vjeshte reshi gjatë natës së kaluar, dy muaj e gjysmë para ardhjes së dimrit me kalendar. Kosova gëdhiu sot bardh e mbuluar nga dëbora e hershme edhe në qytete e rajone të tjera.Afër një muaj më e “vonuar” dhe më e paktë me një tis i hollë që zbardhte veçmas kulmet ishte dëbora e parë në vjeshtën e kaluar – 2016, e reshur natën mes 3 e 4 nëntorit në Prishtinë.Në vjeshtën e vitit 2015 Prishtina ishte e mbuluar nga dëbora e parë në mëngjesin e 27 nëntorit. E vjeshtën e vitit 2014 dëbora e parë ka reshur dy muaj para ardhjes së dimrit me kalendar, natën mes 22 e 23 tetorit.Në Prishtinë dëborë reshë edhe pranverave. Në mëngjesin e 20 prillit 2017 kryeqyteti i Kosovës ishte i zbardhur nga dëbora që nisi me fjolla të lehta një ditë më parë e vazhdoi të reshë më dendur natën.

Në 2016-tën dëborë pranverore reshi edhe natën mes 25 e 26 prillit. Ndërsa, dëbora e fundit pranverore në 2015-tën reshte në ditën e gjashtë të muajit prill, pas asaj që nisi mbrëmjen e 1 prillit e që pasonte atë të pragfestës së Ditës së Verës – 14 marsit.Prishtinës, ku moti ndërron edhe brenda orëve e ditës, e dëborë bie edhe në stinë pranvere e vjeshte, thuhet se i ka mbetur emri si një vend ku prishet stina (Prishstina), siç thuhet edhe se e mban emrin e trashëguar nga Perandori Justiniani.Edhe në Kukës dimri ka trokitur më herët duke zbardhur majet e maleve dhe duke i dhënë imazhin dimëror.Lartësitë e malit të Gjallicës, janë zbardhur nga dëbora e parë.Gjithashtu ne tre ditët e fundit ka patur reshje shiu edhe ulje të ndjeshme të temperaturave të ajrit.

Tensione në parlament, përjashtohet Basha

October 6, 2017 by dgreca

Në Shqipëri, seanca e djeshme e parlamentit nisi me tensione të cilat u acaruan duke çuar në përjashtimin e kryetarit të Partisë Demokratike Lulzim Basha. Shkak u bënë diskutimet për reformën zgjedhore. Parlamenti do të duhej të vendoste sot për ngritjen e një Komisioni të posaçëm për këtë çështje. Por Partia Demokratike tha se kishte kërkuar që për këtë temë të zhvillohej edhe debat në sallë. Kryetari i grupit socialist Taulant Balla u shpreh kundër. “Ne kemi rënë dakort me konsensus për ngritjen e Komisionit të posaçëm. Diskutimet tani duhet të bëhen në këtë komision”, deklaroi Balla.

Nga ana e tij kryetari i grupit parlamentar të LSI-së Petrit Vasili, u shpreh në favor të debatit për reformën zgjedhore, por kërkoi kohë. “Ne nuk jemi të përgatitur për diskutime”, u shpreh ai duke propozuar shtyrjen e debatit për javën e ardhshme. Propozimi i tij u hodh në votë duke marrë dhe mbështetjen e socialistëve.Vendimi solli reagimin e ashpër të kryetarit demokrat Basha, i cili i kërkoi drejtuesit të parlamentit Gramoz Ruçi të mblidhte Konferencën e kryetarëve. “Kjo lojë, nuk mund të vazhdojë gjatë, ndaj mblidh Konferencën e Kryetarëve. Mos ngri kartonat bosh këtu. Ose përndryshe, bëhu përgjegjës për bllokimin total të punimeve të këtij parlamenti. Mblidh Konferencën e Kryetarëve tani! Vendos për një afat të arsyeshëm debati. Nuk mund të shtyhet me një javë debati. Për një afat të arsyeshëm debati ne kemi propozuar orën 16:00, nëse ju duhet më shumë kohë të përgatiteni, merrni orën 18:00”, u shpreh zoti Basha duke refuzuar më pas të largohet nga foltorja e parlamentit. I rrethuar edhe nga deputetët e tjerë të PD-ës, zoti Basha nuk lëvizi edhe pas ndërprerjes së seancës, ndërsa zoti Ruçi deklaroi se ishte i detyruar që të vendoste për përjashtimin e tij nga seanca. Edhe pas këtij vendimi, zoti Basha nuk ka lëvizur nga vendi, duke bërë që seanca të bllokohet, dhe kryetari i parlamentit të vendosë për pezullimin e saj deri në orën 13.00.

Por edhe pas rifillimit të seancës në këtë orë, sërish zoti Basha nuk ishte larguar nga salla dhe deputetët demokratë qëndronin rreth tij pranë foltores. Për këtë arsye zoti Ruçi shtyu sërish hapjen e seancës për pasdite në orën 18.00, ndërsa deputetët demokratë nuk lëvizën nga salla.

Sseanca e mbrëmjes, vetëm pak minuta, aq sa u deshën për të miratuar me shpejtësi ngritjen e disa nënkomisioneve parlamentare. Në përfundim të saj zoti Basha foli për një “atentat ndaj demokracisë”, pas të cilit “Grupi Parlamentar i Partisë Demokratike do të shqyrtojë këtë gjendje të rëndë dhe do të rekomandojë hapat e mëtejshëm që Partia Demokratike, jo vetëm Grupi Parlamentar i saj, por edhe aleatët tanë, dhe gjithë qytetarët, do të hedhim së bashku. Ne nuk do të lejojmë kurrë që Gramoz Ruçi dhe Edi Rama ta kthejnë 30 vite pas orën e Shqipërisë”, deklaroi zoti Basha.Pak minuta më pas përgjigja erdhi nga kreu I grupit parlamentar socialist Balla sipas të cilit “për ndëshkimin e zotit Basha është zbatuar rregullorja e parlamentit”. Lidhur me këmbënguljen e PD-ës për debat lidhur me reformën zgjedhore, ai u shpreh se “demokratët duhet të shprehen se cili nen i rregullores së parlamentt është shkelur në këtë rast. Po qe se e thone atëherë janë në të drejtën e tyre”, nënvizoi Balla.(Sipas VOA-s)