Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

USAID mbështet projektin për bujqësinë në një shkollë profesionale në Fier

by

Rreth 18 hektarë tokë bujqësore, e cila është pjesë e shkollës së mesme bujqësore rajonale “Rakip Kryeziu”, do të shërbejë për prodhimin e fidanëve të pemëve dekorative.
Projekti i përbashkët mes Drejtorisë së shkollës “Rakip Kryeziu” dhe Bashkisë së Fierit, me mbështetjen edhe të Ministrisë së Mirëqenies Sociale dhe Rinisë, do të mbështetet gjithashtu nga ana e USAID-it. Ky projekt i është dorëzuar drejtorit të Përgjithshëm të USAID për Shqipërinë, Marcus Jonson, prej kryetarit të Bashkisë së Fierit, Armando Subashi, gjatë vizitës së kryer në këtë shkollë gjatë ditës së martë. Në takim kanë marrë pjesë stafi i kryebashkiakut Subashi, përfaqësues të USAID dhe Drejtorisë së shkollës, specialistë të bujqësisë etj.
Drejtori i Përgjithshëm Jonson tha se, projekte të tilla duhen mbështetur dhe inkurajuar, ndërsa kryetari i Bashkisë, Subashi u shpreh se, të tjera projekte do të investohen sidomos në fushën e bujqësisë në Fier. Shkolla e mesme bujqësore rajonale “Rakip Kryeziu” është e vetmja shkolllë në rajon, e profilizuar për të nxjerrë specialistë në fushën e bujqësisë dhe jo vetëm. Drejtori i USAID-it dhe kreu i Bashkisë së Fierit premtuan se, nëpërmjet bashkëpunimit me këtë shkollë do të punohet për nxitje të ideve të nxënësve në shërbim të mjedisit dhe komunitetit. Projekti është një prej premtimeve të kryebashkiakut Subashi gjatë fushatës së tij elektorale, të fokusuar kryesisht për prodhimin e fidanëve me kosto zero për gjelbërimin e mjedisit.

Kosovë – Ambasadori i ri i SHBA-ve, Greg Delawie dorëzon letrat kredenciale

by

Nga Behlul Jashari/ PRISHTINË, 21 Gusht 2015/ Ambasadori i ri i Shteteve të Bashkuara të Amerikës në Kosovë, Greg Delawie, dorëzon letrat kredenciale në pritjen te presidentja e Republikës, sot pasdite, në orën 14:50.
Pas këtij takimi presidentja kosovare dhe ambasadori amerikan do të japin deklarata për mediat.
Edhe kryeministri i Kosovës, Isa Mustafa pret në takim sot në orën 16:30 ambasdorin e ri të SHBA-ve, Greg Delawie, i cili ka mbërritur dje në Prishtinë.
Ambasada Amerikane në Prishtinë në 30 mars njoftonte se, Presidenti Obama ka nominuar Greg Delawie-n që të shërbejë si ambasadori i ardhshëm i SHBA-ve në Kosovë.
Në fjalën në ceremoninë e betimit si ambasador i Shteteve të Bashkuara të Amerikës në Republikën e Kosovës, në 24 korrik 2015, Delawie mes tjerash është shprehur: “Besoj që qytetarët e Kosovës e ndajnë vizionin tonë. Aspiratat e tyre e përfshijnë Kosovën si shtet demokratik, shumetnik, të njohur dhe në paqe me fqinjët e vet, me një qeveri që funksionon mirë dhe që e zbaton sundimin e ligjit dhe që është e lirë nga korrupsioni. Edhe ata e dëshirojnë një Kosovë që është në rrugë të qëndrueshme drejt anëtarësimit në institucionet kryesore evropiane. Dhe ata dëshirojnë një Kosovë ku me arsye mund të presin të gjejnë vende pune që do t’u ofrojë familjeve të tyre të ardhme pozitive”.
Në 6 korrik, presidentja e Republikës së Kosovës, Atifete Jahjaga, në takimin e lamtumires e dekoroi ambasadoren e SHBA-së në Kosovë, Tracey Ann Jacobson me Urdhrin për Paqe, Demokraci dhe Humanizëm “Ibrahim Rugova”, për kontribut të veçantë për ndërtimin e paqes, zhvillimin e demokracisë dhe kultivimin e humanizmit në Republikën e Kosovës.
SHBA-të janë vendi i parë nga gjithë bota me prani diplomatike në Kosovë. Hapja e Zyrës Amerikane në Prishtinë, para mëse 19 viteve, në 6 qershor 1996, që u bë nga Nënsekretari amerikan i Shtetit, Xhon Kornblum, shënonte vendosjen e pranisë amerikane në Kosovë në rrethana të veçanta.
“Hapja e përfaqësisë amerikane në kryeqytetin e Kosovës është festë për kosovarët dhe përjetohet si një moment shumë i rëndësishëm dhe historik për të ardhmen”, shkruaja-raportoja në media atë ditë të lume gëzimi para 19 viteve.
Në 6 prill 2008 Zyra e SHBA-së në Prishtinë u bë Ambasadë, ndërsa më 18 korrik, po atë vit historik të shpalljes së pavarësisë, Tina Kaidanow është betuar si ambasadore e parë amerikane për Republikën e Kosovës.
Në 5 maj 2015, në Prishtinë u zhvillua ceremonia e përurimit të fillimit të ndërtimit të ambasadës së Shteteve të Bashkuara të Amerikës, ku ishin të pranishëm përfaqësuesit e institucioneve më të larta kosovare, si dhe të ambasadave në Kosovë.
“Ky moment shënon fillimin e ndërtimit të shtëpisë tuaj të përhershme në Kosovë, në shtetin tonë të ri qytetarët e të cilit u janë përjetësisht falënderues dhe mirënjohës për rolin e guximshëm dhe historik që keni në bërjen e Kosovës shtet”, theksonte presidentja e Republikës duke iu drejtuar ambasadores së SHBA-ve.

Libri «Mashtrimi i Madh» u shpërndahet falas seminaristëve ndërkombëtar të albanologjisë

by

Veprimtari i çështjes kombëtare nga Tetova Abedin Murati, ish profesor i gjuhës dhe letërsisë shqipe në fushën e Metodikës në Universitetin Shtetëror të Tetovës, aktualisht pronar i Fabrikës së Mobilieve «Molika» në Tetovë dhe Fabrikës së përpunimit të pemëve dhe perimeve «Royal» si dhe pronar i qendrës tregtare «Prima Centre» në Tetovë sponsorizoi shpërndarjen falas të librit «Mashtrimi i Madh» të autorit Bardhyl Mahmuti për të gjithë seminaristët e Seminarit Ndërkombëtar për gjuhë, letërsi dhe kulturë shqiptare që mbahet në Prishtinë.
Përmes kësaj forme albanologu Abedin Murati dëshiron që t’u ofrojë albanologëve ndërkombëtarë një analizë shkencore që nxjerr në shesh realitetin e politikës së gjenocidit në Kosovë. Krahas sensibilizimit me të vërtetën e hidhur që ka përjetuar populli shqiptar i Kosovës, Abedin Murati shpreson në kontributin e të gjithë albanologëve që tragjeditë e tilla të mos përsëriten as në Ballkan e as gjetiu.

Kosova, Këshill Kombëtar për Ndryshime Klimatike

by

Nga Behlul Jashari/ PRISHTINË, 21 Gusht 2015/ Qeveria e Kosovës, në mbledhjen e sotme, të 45-tën drejtuar nga kryeministri Isa Mustafa, mori vendim për themelimin e Këshillit Kombëtar për Ndryshime Klimatike. “Këshilli ka përgjegjësinë e përcjelljes së zbatimit të dokumenteve strategjike dhe planeve të veprimit për ndryshimet klimatike në përputhje me angazhimet e Konventës Kornizë për Ndryshimet Klimatike të Kombeve të Bashkuara dhe Protokollit të Kijotos”, u theksua në mbledhje.
Kabineti qeveritar miratoi vendimin për t’i rekomanduar Presidentes së Republikës autorizimin e ministrit të Financave për nënshkrimin e Marrëveshjes së Kredisë me Bankën Botërore për Projektin e Përmirësimit të Sistemit të Arsimit në Kosovë, i cili ka për qëllim forcimin e sistemeve të përzgjedhura që kontribuojnë në përmirësimin e cilësisë, llogaridhënies, efikasitetin e arsimit në vend.
U aprovua edhe nisma për lidhjen e marrëveshjes për heqjen e ndërsjellë të vizave hyrëse për bartësit e pasaportave diplomatike dhe shërbimit, ndërmjet qeverisë së Republikës së Kosovës dhe qeverisë së Kuvajtit, e cila, siç u vlerësua, përveç rëndësisë në përmbajtjen e saj, do të avancoj edhe më tutje marrëdhëniet ekzistuese shumë të mira ndërmjet dy vendeve.
Pika e parë që u aprovua ishte Projektligji për statusin dhe të drejtat e personave paraplegjikë dhe tetraplegjikë. Edhe Projektligji për mjekësinë ligjore ka marrë miratimin e kabinetit qeveritar në mbledhjen e sotme.
E votuar në 9 dhjetor 2014, gjashtë muaj pas zgjedhjeve të parakohëshme parlamentare të 8 qershorit, qeveria e Kosovës për vitin 2015 ka paraparë të përgatisë dhe të dërgojë për miratim në Kuvend rreth 100 ligje.

VETEVENDOSJA:“Zajadnica”, rreth 30 përqind e territorit jashtë kontrollit të Kosovës

by

PRISHTINË, 20 Gusht 2015/.-Aktivistët e Lëvizjes Vetëvendosje kanë zhvilluar sot në Prishtinë “një aksion simbolik për të treguar se si duket Kosova me ‘Zajadnicë’ dhe si pa të”. “Zajadnica” është fjalë serbe që do thotë “Bashkësi” dhe në këtë aksion nënkuptonte Bashkësinë-Asociacionin e komunave me shumicë serbe në Kosovë.
Sipas hartës që e kanë zbuluar aktivistët e VV-së, “nëse formohet ‘Zajadnica’ rreth 30 përqind e territorit të vendit mund do të jetë jashtë kontrollit të Republikës së Kosovës”.
“Krijimi formal i ‘Zajednicës’ do t’ia pamundësojë institucioneve shtetërore të Kosovës që praktikisht të ushtrojnë sovranitetin në pothuajse 30% të territorit të shtetit. Kjo pjesë formalisht do të jetë pjesë e Kosovës, por do të funksionojë si entitet i pavarur. Ky entitet autonom do të ketë të gjitha karakteristikat e një minishteti brenda shtetit tonë”, ka thënë akvisiti Nol Nushi.
Sipas tij, ky Asociacion do të ketë edhe polici dhe gjyqësi të vetën të përcaktuar etnikisht. “Strukturat ilegale kriminale të Serbisë do të integrohen brenda institucioneve të Kosovës por që sigurisht jo në shërbim të tyre. Dhe që kjo të funksionojë në mënyrën më të mirë, i është siguruar edhe një linjë buxhetore e veçantë e quajtur Fondi Zhvillimor për Veriun”, është shprehur Nushi.
Ai ka vikjuar se, “para nesh kemi raundin e ri të negociatave i cili për temë kryesore siç duket do të ketë krijimin e ‘Zajednicës’ e cila do të jetë formalizim i asaj që parashihet me marrëveshjen e 19 prillit 2013 me Serbinë. Pra, atë çka e filloi Thaçi më 2013 me marrëveshjen 13 pikëshe, po do që ta formalizojë Isa Mustafa me krijimin e ‘Zajednicës’”.
“Të gjitha këto do të betonojnë përfundimisht kufijtë etnikë brenda Kosovës të nisur qysh nga procesi i decentralizimit më 2007. Dhe e gjithë kjo, do ta bëjë të pamundur funksionimin e Kosovës si shtet normal”, ka thënë Nushi .
“Para kësaj të keqe të madhe që po na vjen, nuk guxojmë të rrijmë duarkryq”, ka shtuar mes tjerash ai./b.j/