Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

VRITET NE RADHET E ISIS-it KAMPIONI VALDET GASHI

by

Valdet Gasi iu bashkua ISIS-it kohë më parë.
Kikboksieri dy herë kampion, Valdet Gashi është vrarë gjatë luftimeve në Siri përkrahë ISIS’it.
20min.ch ka njoftuar se Gashi është vrarë të shtunën, teksa lajmin për ta e konfirmoi vëllai i Valdetit.
Vëllai i Gashit përmes një postimi në rrjetet sociale ka njoftuar se kikboksieri është vrarë në betejë.
Gashi ishte i famshëm në sportin e tij në Zvicër, duke qenë edhe trajner te Winterthur

Kosova, e përkushtuar për dialogun dhe zbatimin e marrëveshjeve

by

-Presidentja Atifete Jahjaga u prit nga komandanti i KFOR-it, gjeneralmajori Francesco Figliuolo/
Nga Behlul Jashari/ PRISHTINË, 6 Korrik 2015.-Presidentja e Republikës së Kosovës, Atifete Jahjaga, u prit sot nga komandanti i forcës paqeruajtëse në Kosovë, KFOR, gjeneralmajori Francesco Figliuolo, në selinë e KFOR-it në kampin “Film City” në Prishtinë.
Presidentja Jahjaga u prit me nderime të larta ushtarake nga garda e nderit e KFOR-it dhe më pas zhvilloi një bisedë të veçantë me gjeneralin Figliuolo. Të dy bashkëbiseduesit folën për rëndësinë e vazhdimit të bashkëpunimit ndërmjet institucioneve të Kosovës dhe forcave paqeruajtëse, për aktualitetin politik në Kosovë, përfshirë edhe zhvillimet e fundit në fushën e sigurisë dhe ato socio-ekonomike. Presidentja Jahjaga është njoftuar nga gjenerali Figliuolo edhe për aktivitetet aktuale të forcave paqeruajtëse.
Presidentja Jahjaga ka theksuar rolin e rëndësishëm të forcave të KFOR-it në ruajtjen dhe garantimin e një mjedisi të qetë dhe të sigurt në gjithë territorin e Kosovës dhe në vendosjen e lidhjeve ndërmjet komuniteteve. Ajo tha se Kosova ka arritur të ndërtojë një shoqëri gjithëpërfshirëse dhe demokratike dhe po promovon paqen dhe stabilitetin në rajon e më gjerë.
Presidentja Jahjaga tha se Kosova është një demokraci në zhvillim dhe ajo është duke ndërtuar marrëdhënie të mira fqinjësore në rajon, përfshirë edhe angazhimin në procesin e normalizimit të marrëdhënieve me Serbinë. Ajo tha se Kosova është e përkushtuar për dialogun dhe implementimin e marrëveshjeve të arritura në Bruksel, që lehtësojnë jetën e qytetarëve, relaksojnë marrëdhëniet ndërmjet dy vendeve dhe i përafrojnë ato me integrimet euroatlantike.
Komandanti i KFOR-it, gjenerali Francesco Figliuolo, duke falënderuar presidenten Jahjaga për vizitën dhe bashkëpunimin që institucionet e Kosovës kanë me forcat paqeruajtëse, tha se procesi i stabilizimit është në një trajektore pozitive. Ai tha se KFOR-i do të jetë i përkushtuar dhe vigjilent derisa zbatimi i marrëveshjeve të jetë i pakthyeshëm.
Presidentja Jahjaga dhe gjenerali Figliuolo theksuan rëndësinë e vazhdimit të bashkëpunimit të ndërsjellë edhe në të ardhmen, marrë parasysh se forca paqeruajtëse KFOR është një prej institucioneve më të respektuara ndërkombëtare në mesin e popullatës së Kosovës.

Thaçi në Romë për integrimet euroatlantike të Kosovës

by

PRISHTINË, 6 Korrik 2015.-Zëvendëskryeministri i parë dhe ministri i Punëve të Jashtme të Republikë së Kosovës, Hashim Thaçi, ka udhëtuar për një vizitë zyrtare në Itali.
Zëvendëskryeministri Thaçi do të zhvillojë një takim pune me ministrin e Jashtëm dhe Bashkëpunimit Ndërkombëtar të Italisë, Paolo Gentiloni, me të cilin do të bisedojnë për zhvillimet e fundit në Kosovë dhe rajon si dhe bashkëpunimin e Kosovës me Bashkimin Europian.
MPJ kosovare thekson se, nënshkrimi i MSA-së, bashkëpunimi rajonal me theks në dialogun për normalizimin e marrëdhënieve në mes Kosovës dhe Serbisë, lufta e përbashkët kundër radikalizmit dhe terrorizmit si dhe përmbushja e obligimeve ndërkombëtare nga ana e Kosovës, janë temat që do të diskutohen në takim.
Italia është ndër shtetet e para që ka njohur Kosovë, është mbështetëse e madhe e Kosovës dhe anëtare e “Quint”-it, grupit të pesë shteteve perëndimore që përkrahin Kosovën në procesin e integrimit euroatlantik./B.J/

URDHERI”IBRAHIM RUGOVA” NE LAMTUMIREN E AMBASADORES TRACEY JACOBSON

by

Ambasadorja e SHBA-së në Kosovë, Tracey Ann Jacobson, dekorohet me Urdhrin për Paqe, Demokraci dhe Humanizëm “Ibrahim Rugova”/
-Jacobson: Kosova duhet të vazhdojë të ndërtohet si një shtet demokratik e gjithëpërfshirës/
Nga Behlul Jashari/ PRISHTINË, 6 Korrik.-Presidentja e Republikës së Kosovës, Atifete Jahjaga, priti sot në takim lamtumire ambasadoren e SHBA-së në Kosovë, Tracey Ann Jacobson, të cilën e dekoroi me Urdhrin për Paqe, Demokraci dhe Humanizëm “Ibrahim Rugova”, për kontribut të veçantë për ndërtimin e paqes, zhvillimin e demokracisë dhe kultivimin e humanizmit në Republikën e Kosovës.
Presidentja Jahjaga e falënderoi ambasadoren Jacobson për mbështetjen e vazhdueshme të qytetarëve dhe institucioneve të Kosovës dhe gjithashtu për përkrahjen e proceseve demokratike nëpër të cilat po kalon vendi. Presidentja Jahjaga e vlerësoi miqësinë e ambasadores Jacobson dhe përfaqësimin e denjë të SHBA-së në Kosovë, thekson njoftimi dërguar nga Presidenca kosovare.
Ambasadorja Jacobson e falënderoi Presidenten Jahjaga për nderimin me Medalje Presidenciale dhe e vlerësoi si shumë të veçantë miqësinë me qytetarët e Kosovës. Ajo gjithashtu e vlerësoi rolin dhe angazhimin e Presidentes Jahjaga si faktor uniteti dhe theksoi se Kosova duhet të vazhdojë të ndërtohet si një shtet demokratik e gjithëpërfshirës.
Presidenti Obama nominon Greg Delawie-n për Ambasador të SHBA-ve në Kosovë, njoftonte Ambasada Amerikane në Prishtinë në 30 mars.
“Ambasada e SHBA-ve ka kënaqësinë të konfirmojë se Presidenti Obama ka nominuar Greg Delawie-n që të shërbejë si ambasadori i ardhshëm i SHBA-ve në Kosovë. Kushtetuta e SHBA-ve kërkon që Presidenti të marrë këshillë dhe pajtimin e Senatit të SHBA-ve para se të emërojë ambasadorët. Përkundër raporteve të fundit mediale në Kosovë Senati ende nuk ka mbajtur dëgjim apo votim lidhur me këtë nominim”, theksonte komunikata e dërguar.
SHBA-të janë vendi i parë nga gjithë bota me prani diplomatike në Prishtinë. Hapja e Zyrës Amerikane në Prishtinë, para 19 viteve, në 6 qershor 1996, që u bë nga Nënsekretari amerikan i Shtetit, Xhon Kornblum, shënoi vendosjen e pranisë amerikane në Kosovë në rrethana të veçanta.
Në 6 prill 2008 Zyra e SHBA-së në Prishtinë u bë Ambasadë, ndërsa më 18 korrik, po atë vit historik të shpalljes së pavarësisë, Tina Kaidanow është betuar si ambasadore e parë amerikane për Republikën e Kosovës.

Akt heroik i alpinistëve shqiptarë

by

Ngritin në majën e Jezercit flamurin çek – në respekt të dy viktimave/
Në pikën më të lartë në veriun e Shqipërisë, në Jezerc, ka valuar flamuri çek. E gjithë kjo e organizuar nga alpinistët shqiptarë, të cilët një veprimë të tillë e kanë bërë në shenj respekti për çiftin çek që u vra në Shqipëri.
Alpinisti nga Gjakova Nëntor Oseku thotë se në këtë aktivitet ishin pjesëmarrës bjeshkatarë nga të gjitha trojet shqiptare.
“I mërzitur thellë nga vrasja makabre e dy turistëve çekë, sot si shenjë solidariteti vendosa që me flamur të Çekisë t’i përkujtojmë turistët çekë. Nga takimi tradicional i bjeshkatarëve Shba Pashtriku në Valbon137, kisha vendosur ta ngjisë majën Kurora, por kur dëgjova për rastin e ndërrova mendjen, e bleva një flamur të Çekisë dhe vendosa ta sfidoj vetën dhe ta ngjes majën më të vështirë të trojeve shqiptare, majën e Jezercit (2694 metra lartësi mbi detare) si shenjë solidariteti për turistët çekë ta shpalosim flamurin e Çekisë”, thotë Oseku.