Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Ndjesa nuk ju mjafton zoti Kryeministër!

by

Nga Elida Buçpapaj/
Zoti kryeministër, në vend se të vinit në vend kërkesën legjitime të Prof. Sami Repishtit, ju shkuat në Shkodër e kërkuat ndjesë për dekoratën dhënë persekutorit të diktaturës.
Kur Prof. Sami Repishti, i mbijetuari i Holokaustit komunist i kërkoi ministres tuaj që të japë dorëheqjen, sepse nuk meriton të jetë ministre e NATO-s, ju nga ana juaj u mjaftuat me një ndjesë, kur persekutori i dekoruar prej Mimi Kodhelit veç At Zef Pllumit dhe Prof Sami Repishtit kishte torturuar edhe 92 viktima të tjera.
Kryeministri i vendit në vend që të reagonte energjikisht, flakë për flakë, mori rolin e protektorit të Mimi Kodhelit dhe, në vend që ta merrnit në telefon urgjentisht vartësen tuaj të kahmotëshme e t’i kërkonit të dorëhiqej, ju reaguat me sulm ndaj kundërshtarit tuaj, dhe nga Shkodra ju thatë: „Po, ne e dekoruam kriminelin, por Sali Berisha e ka privilegjuar me rrogën e veteranit.“
A nuk jeni anët e së njëjtës monedhë! Ju përdorët sulmin, sipas së njohurës – die beste Verteidigung ist der Angriff – se mbrojtja më e mirë është sulmi. Por gaboheni, fajet e Sali Berishës nuk ju shfajësojnë ju.
Sepse PS e ka rehabilituar nomenklaturën kriminale të diktaturës dhe këto dekorime janë në vazhdën e rehabilitimeve. Në 1997 Nexhmija Hoxha ishte në burg, Ramiz Alija ishte në burg, Manush Myftiu ishte në burg. PS i liroi dhe për çdo ditë të burgut të tyre ata u zhdëmtuan. Pra PS i nxori të pafajshëm. Si mendoni ju zoti kryeministër, a ishin të pafajshëm ?
Andaj ndjesa juaj nuk është mjaft. Ndjesa juaj është shplarje goje.
Kjo ndjesë ju vë në një pozitë shumë të vështirë përpara viktimave dhe martirëve të diktaturës e Prof.Sami Repishti që është një martir i gjallë.
Krimet e diktaturës komuniste nuk mund të harrohen kurrë. Kot lodhen historianët e regjimit komunist ta fshehin të vërtetën. Do të vijë një ditë shumë shpejt kur Shqipëria me një klasë politike të përgjegjëshme, jo si kjo që vetëm leh natë e ditë në Parlament, do të denoncojë genocidin e regjimit komunist të periudhës prej 1944-1992. Shqiptarët si komb kanë përjetuar tre lloj genocidesh, por genocidi komunist është më makabri, sepse shqiptari torturoi, persekutoi, internoi e vrau shqiptarin.
Ju nuk keni se përse të bëheni protektori i një ministre, e cila është kthyer në vegël qorre të atyre që i përpiluan ato lista. Një ministre e NATO-s nuk mund ta mbajë mirë edhe me persekutorët e viktimave të regjimit komunist edhe me homologët e saj të Aleancës Verio-Atlantike, sepse standartet janë të përcaktuara.
Prandaj ndjesa juaj nuk mjafton. Ju pas kësaj ndjese hipokrite nuk mund të dilni i palagur. Nuk e kaloni dot lumin zoti Kryeministër me këtë ndjesë. Sepse nuk është ndjesë. Është tallje.
Ju zoti kryeministër nuk e keni provuar kurrë ferrin e diktaturës, ju ka ecur fati. Keni studjuar ku keni dashur, keni zgjedhur vendin e punës sipas qejfit tuaj, po këto privilegje mos harroni jua siguronte regjimi. Ju në asnjë çast të jetës tuaj nuk keni qenë viktimë e monstrës kriminale, ju nuk e keni provuar të jesh adoleshent dhe diktatura të të burgoste prindërit , se çfarë ferri vinte pas kësaj, ju nuk keni provuar burgun, si Visar Zhiti apo Fatos Lubonja, që ju i njihni mirë; por kjo s’do të thotë se ju nuk duhet të keni sensibilitetin e mjaftueshëm që të futeni në lëkurën e viktimave, të të njohurve tuaj apo të atyre djemve të rinj, të edukuar në Perëndim, shokët e qelive të At Zef Pllumit dhe Prof Sami Repishtit që diktatura i torturoi barbarisht dhe pastaj i vrau. Po ju kujtoj Qemal Draçinin, një njëzet vjeçar brilant, që piu DDT – helmin në burg me qëllimin që t’i jepte fund torturave të këtyre kriminelëve që morën dekorata nga një Ministre e NATO-s. Një farsë e vërtetë. Prandaj ndjesa juaj nuk mjafton.
Është tallje ndaj viktimave, është provokim ndaj shoqërisë dhe Perëndimit dhe Perëndimi nuk ha bar.
Me të njëjtin stil si Mimi Kodheli, ministri juaj i jashtëm, Ditmir Bushati, i biri i një ish-eksponenti të diktaturës, jo vetëm që bën emërime nepotike nën hundën tuaj, por posa ka emëruar ambasador të jashtëzakonshëm e fuqiplotë në Izrael, të birin e Nimet Canit dhe të dhëndërin e ish-byroistes Lenka Çuko, që ka një pasuri prej 1.2 milionë Euro, ndërsa mesatarja e pensionit e gjysmë milioni pensionistësh që kanë punuar 45 vite rresht është vetëm 110 $ në muaj!
Cili do të jetë reagimi juaj ? Ju do të thoni se edhe Berisha i caktonte diplomatët nepotikë me vkm. Po nuk është kjo përgjigjia e duhur. Riciklimi i gabimeve dhe fajeve.
Ju jeni kryeministër i Shqipërisë dhe tregojeni se nuk jeni as protektor i Mimi Kodhelit, as bodyguard i Ditmir Bushatit e dhëndurit të Lenka Çukos dhe as riciklues i kundërshtarit tuaj.

Duhet vizion tjetër Jozi

by

Opinion nga lir Levonja-Florida/
A t’i them dy fjalë Jozi. Pasi më është ngulur në kokë një gjë, që… Vendi ynë do ndreqet kur demokrati të merret me demokratin. Dhe socialisti me socialistin. Sidomos kur jemi në pushtet. Përshembull këtë duhet të bëjnë socialistët tani me shtetarët e tyre. Sidomos kur kemi qënë gjatë në pushtet. Dhe ti shyqyr të madhit, nuk ke qëndruar pak. Nga 1996 e këtej. Dhe je akoma aty. Përse e them këtë. Thjesht për të ndryshuar tashmë atë konceptin mbi perceptimin që kemi për njëri-tjetrin. Demokrati karshi demokratit. Dhe demokrati karshi socialistit dhe anasjelltas. Kaq vite demokraci, kaq shumë jemi marrë me njëri-tjetrin sa produkti i urrejtjes sonë ka pjellur me shumicë politikanë të dështuar. Kam parë demokratë provincash me lista parazgjedhore gati. Ashtu siç kam parë socialistë po provincash me lista prerje kokash në administratë. Ashtu siç kam parë barkaliqër të përjetshëm administrash. Të cilët kurrë nuk u hyri gjëmbi në këmbë. Edhe pse në pushtet ishte Enveri.Po kështu dhe kur erdhi Saliu, Nano, ti e me radhë.
Herën e fundit që të dëgjova, qe ajo para pak ditëve. Kur për inat të Taulant Ballës u tregove shqiptarëve për të qindën herë persekutimin tënd, dhjetat, dhe çfarë të them. Respekt për vuajtjet e tua. E sidomos të prindërve. Të familjes tënde. Por nuk bëhet më kështu. Vuajtja nuk është meritë. As dekoratë. Vuajtja është fatkeqësi që të bie për pjesë nga dështakë dhe manjakë regjimesh. Dhe që të mos përsëriten ato. Të mos përsëritet denigrimi, degdisja, përbuzja, racizmi dhe lufta e klasave. Duhet të qeverisin ndryshe. Për hatër të meritës jo të vujatjes. Faza e parë e demokracisë ishin vuajtjet. Faza e dytë ndërtimi i shtetit të së drejtës mbi bazën e ligjit. Mbi të parën ne ishim shumë bujar karshi njëri-tjetrit. Në dy raste me drama të mëdha shekullore. Atë pas mbarimit të luftës së dytë botërore. Kur bëm me shumicë qeverisës të të gjitha niveleve nën emrin e shtëpisë bazë. Dhe pas rënies së socializmit. Po ashtu nën emrin e të persekutuarit, të të përndjekurit bëm shumë administratorë, shtetarë. Madje me shumicë, edhe nga rraca e persekutorëve. Madje edhe krushqi. Megjithëse nga foltoret flasim dhe tregojmë me gisht armiqë, persekutorë, sharlatanë.
Fazën e dytë ne dështuam. Nuk e bëm dot shtetin asnjëherë ligjor. Por ca vite të demokratëve dhe ca vite të socialistëve. Ndaj sot është demode të ankohesh më për persekutim. Sidomos pas 8 vitesh qeverisje. Ne dështuam, pasi nuk i hapëm dosjet. Thënë kjo me qindra herë. Në katërvjeçarin e dytë si demokratë, iu gëzuam pushtetit në një aleancë të brishtë. Aspak natyrale. Madje edhe pse goditjet i merrnin brinjëve. Po prej saj. Më shumë na dhëmbi karrika se sa përsosja e shtetit. Po dështojmë duke thënë se na manipuluan zgjedhjet. Kur ishim ne organizatorët. Po vazhdojmë të dështojmë pasi qëllimin e madh, po e minimizojmë në djegie bunkerësh. Qëllimin e madh po minimizojmë tek ankesat personale të një kohe. E cila duam apo nuk duam ne, jemi bashkëfajtorë dhe bashkëvuajtës. Eshtë kjo arsyeja që nuk ka ndjesë publike ndaj vuajtjeve të familjes tënde. Ashtu sikur është po kjo arsyeja që kurrë edhe si shtet ne nuk morën një herë vendimet e duhura. Në drejtim të ligjbërjes. Të bërjes së shtetit. Nuk mbrohen kauzat e një populli me shokët e djalit apo të vajzës. Përpjekja për reforma të thella. Përpjekja për të pastruar administratën nga ata që tregon me gisht një ambasador i huaj. Ne dështuam, pasi thelluam dasimin dhe luftën klasore. Madje tipare të qarta të saj, gëlojnë edhe mes demokratëve. Ka aty një kulturë gati absurde të vetflijimit për të qënë në rresht. Që je demokrat apo nuk je, sapo thua diçka ndryshe njëshit. Nuk je demokrat kur të mbron ty në luftën absurde me një absurd si Taulant Balla. Nuk është kjo meritë të të mbash ligjëvënese, qoftë ty. Qoftë deri te vet Sali Berisha etj. Ka një kohë pensionimi për çdo qënie njerëzore, aktive. Dhe më vjen keq se ty të ka rënë për pjesë disi më shpejt. Demokratët sot i ngjajnë vëllezërve që shihen në gjyq. Ka një kulturë të dëmëshme sidomos kur e mendon veteveten si vlerë e pazëvendësueshme. Kanjë kulturë të penguese që i kthehesh kryetarit, kur e kupton që nuk merr një vend në strategjitë e reja. Ka një kulturë dështuese e thirrjeve duam babën. Alla Nano kur u thoshte pesë socialistëve të dehur nga ekstravaganca e tij. Se e di që po më luteni, kthehu baba. Na shpëto. Qoftë ti, por deri edhe tek Sali Berisha. Tashmë i përkisni historisë, me të mirat dhe të këqijat. Dhe si histori duhet të mblidheni në stendat e një muze. Në historinë e brishtë të një partije pluraliste. Që në historinë e Shqipërisë nuk është e para.
Duhet një vizion tjetër tashmë Jozefinë. Punuan mjaft për ty demokratët. Një vizion i ri, gjak i ri…

Pse e lëmë Gonxhen e përjetshme të shqiptarëve “në harresë”?!

by

Nga Enver Bytyçi/
Nene Tereza, Gonxhja e perjetshme e shqiptareve, do te jete perfundimisht e shenjteruar. Nese popuj te tjere do ta kishin rrit nje vajze e ta benin 18 vjeç, sa ishte Gonxhja e shqiptareve kur iku nga trevat shqiptare per ne boten e lire, e nese keta popuj do te kishin arritur ta kishin nje shenjtore e bamirese si Nena Tereza, do te kishin mundur te ishin me te perkdhelurit ne bote. Ne shqiptaret e kemi Nene Terezen. Ajo na ka bere drite ne te gjalle e na ndriçon edhe sot pas vdekjes. Me shenjterimin e saj ne kemi privilegjin te jemi bekuar prej Zotit! Por ne nuk jemi mirenjohes. Prandaj nuk arrijme qe ikonat boterore me rrenje shqiptare t’i bejme frymezim per suksesin tone! Aq e vertete eshte kjo sa me duket se Nene Tereza eshte shfaq me permasat e hyjnise, qellimisht qe ta mbroje kombin shqiptar prej vete shqiptareve!!! Çfare do te kishte ndodhur mbreme ne Beograd, ne Shkup, ne Podgorice, ne Athine a diku tjeter, nese do te vinte lajmi i shenjterimit te nje bije te ketyre popujve ne permasat e nene Terezes? Secili mund ta imagjinoje. Ndersa tek ne heshtje, heshtje prej shtetit, heshtje prej politikes, heshtje prej organizatave jo qeveritare, heshtje prej kishes, heshtje prej xhamise, heshtje prej akademise. Te gjithe heshtin dhe gati, gati bejne te paditurin. Ky eshte tmerr! Si nuk mesuam te shfrytezojme asetet qe na i jep Zoti per te miren e kombit tone, te imazhit tone, te nderit tone, te dinjitetit tone, te integritetit tone! I gezohemi nje ndeshjeje te humbur furbolli me shume se shenjterimit te Nene Terezes! Dhe e bejme boten te jete e dyshimte: Vertete i perket apo jo Nene Tereza shqiptareve?!

Obama: Asnjë kërcënim specifik dhe i besueshëm për festat e fundvitit, por jeni vigjilent

by

Presidenti amerikan, Barack Obama deklaroi këtë të enjte se, shërbimet sekrete amerikane dhe zyrtarët e antiterrorizmit nuk kanë marrë ndonjë informacion specifik, të besueshëm, që sugjeron rrezikun e ndonjë sulmi terrorist kundër SHBA-ve. Megjithatë, ai ka thënë se amerikanët duhet të jenë vigjilentë gjatë sezonit të festave të fundvitit. “Nuk duhet të biem prè e frikës, apo të ndërrojmë mënyrën tonë të jetesës”, tha Obama gjatë një fjalimi përpara punonjësve të Qendrës Kombëtare të Antiterrorizmit. “Ne nuk duhet të terrorizohemi. Kemi triumfuar mbi kërcënime shumë herë më të mëdha sesa ky, ndaj dhe do të triumfojmë sërish”. Obama foli pasi ishte njoftuar nga stafi i tij për sigurinë kombëtare mbi nivelin aktual të kërcënimit, mbi përpjekjet për të luftuar grupet ekstremiste dhe propagandën jashtë vendit, si dhe hapat për të forcuar mbikëqyrjen e njerëzve që hyjnë në SHBA me viza. Ky është i dyti informim, që Shtëpia e Bardhë ka nënvizuar gjatë kësaj jave, teksa Presidenti Obama po përpiqet të sigurojë publikun, pas ngjarjeve që ndodhën në San Bernardino të Kalifornisë. Presidenti vizitoi gjithashtu Pentagonin gjatë së hënës për një përditësim të fundit mbi luftën e udhëhequr nga SHBA-të kundër grupit të Shtetit Islamik në Irak dhe Siri. Të enjten, Obama theksoi se ishte informuar mbi programin e vizave “K-1”, të cilën shfrytëzuan agresorët e San Bernardinos për të shkelur në tokën amerikane në korrik të vitit 2014. Tashfeen Malik mësohet të ketë kaluar kontrollet mbi formimin e saj si dhe intervistat e drejtpërdrejta, e megjithatë, kreu i FBI-së James Comey i ka thënë presidentit se, zyrtarët mendojnë që ajo ka qenë e radikalizuar përpara se të mbërrinte në SHBA. Malik dhe bashkëshorti i saj, Syed Farook i premtuan besnikëri njërit prej krerëve të Shtetit Islamik në Facebook, duke postuar në momentin që ndodhën edhe të shtënat me pasoja vdekjeprurëse. Obama tha se kërcënimi i terrorizmit është zhvilluar dhe tashmë përfshin edhe grupe më të vogla apo individë, duke e bërë kapjen e tyre shumë më të vështirë. Megjithatë, SHBA-të kanë ndryshuar dhe kanë perfeksionuar vazhdimisht “lojën e tyre” për të qenë në të njëjtën linjë me kërcënimet. Ai tha se Amerika është fokusuar në 3 fusha: të përndjekë terroristët jashtë vendit; të punojë për të parandaluar futjen e tyre në vend; si dhe të përforcojë marrëdhëniet mes autoriteteve ligjzbatuese, komuniteteve lokale dhe sektorit teknologjik për të parandaluar sulmet në vend. Por, “ne duhet të mbetemi vigjilentë”, përfundoi ai.

Shuplaka e BE-së për qytetarët e mashtruar të Kosovës!

by

Opinion nga Faik KRASNIQI/
Kur ishim të vegjël, kur kërkonim diçka nga prindërit për të na blerë, na thoshin hajt se nesër ta blej, e në fakt kalonin shumë të nesërme…edhe me çështjen e vizave kështu po ndodh.
Mali i Zi mori ftesë për anëtarësim në NATO. Serbia filloi me hapjen e kapitujve të parë të negociatave për anëtarësim në Bashkimin Evropian. Liberalizimin e vizave e mori edhe Kolumbia e Pablo Eskobarit dhe Ukraina e përgjakur tash e gati dy vite.
E, Kosova ku po shkon dhe çfarë përfitoi deri më tash? As liberalizim të vizave nuk përfituam deri më tash, pavarësisht dhjetëra marrëveshjeve të nënshkruara, pjesa dërrmuese e tyre madje edhe në dëm të shtetit. Kjo tregon se kemi politikëbërës të dështuar dhe idiotë që s’e kanë shokun. Ky vend po më ngjan me një laborator për eksperimente të fuqive të mëdha, prandaj kemi një pushtet dhe një klasë politike të tillë, me lloj-lloj gangsteri, mafiozi, hajni, krimineli, banditi, aventurieri, rrugaçi, vrasësi, debili, psikopati, tradhtari, sepse janë të ndërtuar në laboratorin eksperimental ndërkombëtar.

Përralla me mbret!

BE-ja duke mos liberalizuar vizat për qytetarët e getoizuar të Kosovës, po na tregon qartë se Kosova nuk është shtet, por është një laborator për eksperimentet e tyre djallëzore, që padyshim produkt i këtij eksperimenti janë edhe këta politikanë tanë kriminelë e mafiozë. Përralla me mbret se jemi pjesë e Evropës. Po të ishim pjesë e Evropës, dhe kjo BE po ta kishte seriozisht ndërtimin e një shteti serioz në Kosovë, fati i këtij vendi dhe këtij populli që 16 vjet, nuk do kishte ngelur në dorën e kësaj klase politike mafioze, banditeske dhe kriminale, e aq më pak në dorën e idiotëve si Hashim Thaçi me Isa Mustafën dhe bishtat e tyre!

Po të kishim një lidership serioz e jo të shantazhuar, që sot do t’i kishte ndërprerë bisedimet me Serbinë në Bruksel. Për çfarë të zhvillohen ato bisedime, për t’i bërë favore Serbisë dhe ne mos të përfitojmë asgjë?
Shuplaka e BE-së dhënë Kosovës, për mosliberalizim të vizave edhe për një afat të pacaktuar, nuk ishte shuplakë për politikanët e Kosovës, sepse ata kanë pasaporta dhe dyert e hapur jo vetëm në vendet e BE-së, por në shumicën e shteteve të botës. Shuplaka dhe sinjali i BE-së, ishte për qytetarët naivë të Kosovës, të cilët akoma po i hanë gënjeshtrat dhe mashtrimet e këtyre politikanëve mafiozë. Sinjal më të qartë për këtë popull besoj që BE-ja deri tash nuk ka dhënë, që me shqelma duhet t’i largojnë nga politika këta banditë, kriminelë e mafiozë.
Hashim Thaçi gjoja e përjetoi “rëndë” lajmin për mosliberalizim të vizave, dhe apeloi për protesta para zyrës së BE-së në Prishtinë. Kurse, Isa Mustafa filloi të tallet me qytetarët e Kosovës ‘’se kosovarët mund të jetojnë edhe pa viza’’. Kadri Veseli me këtë deklaratë goditi fortë dy të parët kur tha “BE le të na i marrë vizat neve- politikanëve, jo t’i ndëshkojë qytetarët”.
Megjithatë, Thaçi beson se në javët e para të vitit 2016 do të ndodhë rekomandimi për liberalizim të vizave për Kosovën. Shumë të sigurt për këtë gjë janë edhe Isa Mustafa, Bekim Çollaku dhe Skënder Hyseni!

Ia pinë gjakun me pambuk!

Për shkak të dështimit të liberalizimit të vizave në 2016, përgjegjësinë e ndëshkimit duhet ta paguajë kjo Qeveri mashtruese dhe mafioze, sepse popullata, përveç keqqeverisjes së tij, kapjes së shtetit, krimit të organizuar, korrupsionit dhe papunësisë së madhe, varfërisë ekstreme dhe padrejtësive të tjera, është në shpërthim e sipër nga stërlodhja e të jetuarit tash e më shumë se 16 vite në kafaz. Dhe me të drejtë, por edhe nga “zemërgjerësia” e përfaqësuesve të BE-së, qytetarët e dërrmuar të Kosovës e meritojnë liberalizimin e vizave në vitin 2016, të cilët kanë mbetur peng i kësaj klase politike mafioze dhe kriminale, dhe po ndëshkohen nga BE-ja, por jo edhe pa fajin e bashkësisë ndërkombëtare, prej të cilëve këta politikanë mafiozë edhe kanë mbështetjen për krimet dhe djallëzitë e tyre.
Me një fjalë BE-ja na tregoi që ky vend me këta politikanë mashtrues, të paskrupullt dhe mafiozë, ka shkuar për lesh, në dreq të mallkuar! Prandaj, s’kemi pse të ndëshkohemi nga BE-ja, për shkak të këtij pushteti kriminal e mafioz, por t’i largojmë nga skena politike dhe t’i fusim të gjithë në burg! Popull, a nuk po e shikon se ky pushtet kriminal e këta politikanë mafiozë po tallen me ty? Zgjohu, mos fli! Tregoja dhëmbët këtyre kriminelëve që po tallen me ty. Mos lejo që fati yt dhe e ardhmja e fëmijëve të tu, të ngelet në duart e këtyre gjakpirësve, të cilët tash e 16 vite po ta pinë gjakun me pambuk!