Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Frazat envereske të Thaçit!

by

Opinion nga Faik Krasniqi/

Jemi i vetmi vend në botë, ku shkojmë nga keq e te më keq. Jemi i vetmi vend në botë, vetëm për keq. Kreu i qeverisë, thotë, herë pas here, se ia kalojmë vendeve të rajonit, madje së shpejti edhe Gjermanisë! Çudi si i shikuaka vetëm ai dhe nuk i shohim ne të tjerët? Kështu thoshte edhe monstra Enver në epokën e tij.

”Jemi i vetmi vend në Ballkan, në Evropë, në botë ku ndriçojmë, ku lulëzojmë, ku kemi vetëm rritje ekonomike; jemi i vetmi fanar ndriçues etj.”.

Vini re sa të ngjashme janë frazat e Thaçit me ato të Enverit, sikur kanë bërë të njëjtën shkollë, sikur kanë qenë në të njëjtën klasë e bankë, sikur kanë ndenjur në të njëjtën shtëpi e kanë ngrënë në të njëjtën tavolinë. Siç duket, në të vërtetë kështu ka ndodhur.

Me shumë gjasa të njëjtën shkollë (në periudha të ndryshme) kanë bërë, në të njëjtën shtëpi kanë ndenjur e pirë kafe, në të njëjtën tavolinë kanë ngrënë, pavarësisht se në tavolinën ku ka ngrënë Enveri, Thaçi dekada (gjatë viteve 90′) më pas ka qenë i detyruar të hante nga ato që kanë ngelë vite më parë nga sahani i tij.

Ndaj kanë të njëjtën ideologji, ndaj e shikojnë Diellin njësoj, ku ndriçon vetëm në Kosovë, si dikur në kohën e Enverit që ndriçonte vetëm në Shqipëri! Ndaj, për ata, ”ne jemi vendi i parë në rajon”, ku me gjasë së shpejti mund të konkurrojmë edhe me Gjermaninë apo SHBA-në.

Në të vërtet po të ishte kështu nuk do të ishte gjysma e rinisë dhe krejt Kosovës në emigracion; nuk do të shkonim më jashtë as ato dhjetëra-mijëra që po ikin me lotari në Amerikë, e po aq të tjerë janë gati të nisën menjëherë larg vendit. Pse nuk vjen bota te ne, por shkojmë ne tek ajo?

Çuditërisht, si ndodh kështu, kur lidershipi thotë të kundërtën!? Vetëm ai sheh ndryshe e ne të tjerët shohim ndryshe.

Ka plot gjashtë vite që na mbush me rrena e gënjeshtra. Ja dhe rasti i fundit nga Raporti i Progresit, apo më mirë Raporti i Regresit, ku flitet zi e më zi për pushtetin në Kosovë. Miliona euro të hedhura poshtë për papërgjegjshmërinë e politikanëve. Këto të gjitha ne i vuajmë; mbi kurrizin tonë bien.

Po si shpjegohet kur për Thaçin ”ne jemi vendi i parë në rajon” e ne ndjehemi të fundit. Gjithë bota na ka për të fundit. Si arritëm në këtë ”mrekulli” me mjeshtërinë e Thaçit e të Ministrisë së Integrimit. Për çfarë e ka këtë Ministri, apo për kukull, siç mbante Gadafi amazonat për ta ruajtur majtas-djathtas!

Në përfundim kemi kaq nxënës të këqij në krye të Kosovës, sa në të gjitha provimet morën “katra”. Dinë të bëjnë jo keq, por shumë keq detyrat e shtëpisë. Të gjithë ne vuajmë e heqim të zezat e ullirit për të nxjerrë ditën e për të ushqyer fëmijët, kurse ata thonë ”jemi fanar ndriçues në Evropë e në botë”!

Sa të pafytyrë, sa të shpëlarë…!

IA KEMI BORXH ADEM JASHARIT

by

Opinion Nga Cene Pushkolli/

Ribërja e Shqipërisë Etnike(Natyrale) është në duar të politikanëve shqiptarë si edhe në duar të politikanëve të shteteve mike të shqiptarëve, natyrisht se në këtë rrafsh ka edhe asi politikanë që këtë të drejtë shqiptare nuk e duan dhe do të angazhoheshin që ta pengojnë (me çdo forcë demokratike dhe jo demokratike) Ribërjen e Shqipërisë Etnike(natyrale). Gjithsesi kjo kategori e politikanëve të shteteve jo mike të shqiptarëve që nuk e duan dhe do ta pengonin Ribërjen e Shqipërisë Etnike nuk e kanë në favorin e tyre asnjë akt juridik, asnjë konventë, asnjë ligj ndërkombëtar lidhur me vetëvendosjen dhe bashkimin e shteteve në një shtet të vetëm. Prandaj, shqiptarët e të gjitha shtresave, duke e ditur këtë fakt, është mirë që të angazhohen me mall e me shpirt (siç thotë populli) të bashkohen rreth idesë së Ribashkimit Kombëtar. Për hir të së vërtetës, shqiptarët po qe se do të përcaktoheshin që të angazhohen me “me mall e me shpirt”, atëherë politikanët dhe jo vetëm ata të shteteve mike do të na përkrahnin, jo pse ne duam, por sepse në favorin tonë janë të gjitha faktet, dokumentet, ligjet dhe konventat ndërkombëtare që na e mundësojnë Ribashkimin Kombëtar. Politikanët shqiptarë të Kosovës Historike të angazhuar në Institucionet Qeveritare dhe Institucionet tjera shtetërore dhe jo vetëm në to në Kosovën Historike, ia kanë borxh bacit Adem, alias komandantit legjendar të Ish-Ushtrisë Çlirimtare të Kosovës si edhe të rënve të tjerë për shqiptarizëm, që amanetin e e tyre pra të betuarëve për Ribashkim Kombëtar Shqiptar, ta qojnë në vend, përndryshe ata në rast se takohen në botën e amshueshme me bacën Adem dhe jo vetëm me te, por edhe me dëshmorët e tjerë, sigurisht që do të qortohen për mos kryerjen e amanetit në fjalë. Jo. Jo, mos u shqetësoni o ju politikanë të Kosovës Historike! Ribërjen e Shqipërisë Etnike vetëm ju nuk mund ta bëni! Për këtë çështje ju duhet ta keni mbështetjen edhe të politikanëve të të gjitha shtresave të Kosovës Historike të Shqipërisë Londineze, si dhe të politikanëve të trojeve të tjera shqiptare, veçanërisht të shqiptarëve nga mërgata shqiptare e veçmas e atyre nga Amerika. Me siguri për mos angazhimin e duhur rreth Ribërjes së Shqipërisë Etnike që nuk e keni bërë deri më tash, edhe pse e meritoni qortimin e popullit, populli do të ju falë për të kaluarën, por, për tash e tutje që nuk angazhoheni sa dhe si duhet për Ribërjen e Shqipërisë Etnike, me siguri se do të ju qortojë populli. Juve që sot keni mundësi që të angazhoheni për Ribërjen e Shqipërisë Etnike e që nuk e bëni, koha do të ju mallkojë, historia do të ju gjykojë për tradhti të amanetit të dëshmorëve, luftëtarëve dhe të veprimtarëve të të gjitha kohërave. Është mirë që të shfrytëzohet i gjithë potenciali intelektual, politik, ekonomik dhe të gjithë së bashku të angazhoheni maksimalisht sa është e mundur për t’u kërkuar në mënyrë institucionale Ribashkmi Kombëtar. Është e sigurt se në rast se angazhohen të gjithë me aq sa kanë mundësi, materiale, politike dhe jo vetëm politike, atëherë me siguri se edhe faktori ndërkombëtar do të jetë në anën tonë. O sot të bashkuar të veprojmë, o nesër do të na gjykojë historia. Andaj, të veprojmë në këtë drejtim dhe mos të na mashtrojë ana materiale, duke e harruar çështjen kombëtare

 

Shenjat e “lindjes” së një diktatori!

by

Nga Faik KRASNIQI*/

Njeriu nuk lind diktator qysh në momentin e parë që vjen në jetë, ditën që lind, por ai formohet ideologjikisht me kohën.Edhe Hitleri, po të lexosh mbi jetën e tij ose të shohësh dokumentarë, nuk lindi diktator por u formua gjatë jetës. Shembull: Në kohën kur ai nuk fitoji të drejtën për të filluar studimet në fushën e pikturës, pati një demoralizim të theksuar. Në atë kohë, ai, pa asnjë të ardhur financiare, përfundoji në lypës nëpër Vienë…..po, po në lypës rrugësh. Po në ato momente, një shok-mik i njohur i tij që ishte çifut e merr – strehon në dhomën e tij. Duke qenë shok me këtë çifutin, ai hyri në shoqërinë dhe merrte pjesë në aktivitetet që organizonin këta!

Më pas, e dimë të gjithë nga historia se si veproi ai me hebrenjët!

Dhe, një individ, ka forcë të madhe të ndryshojë, për mirë apo për keq, sistemet!

Rastet nuk janë pak në historinë botërore, duke marrë si shembull vitet e fundit, fillimin e viteve 1900, filluar qysh nga diktatori-vrasësi në masë të 8 Milion Rusëve (e thotë historia) të Leninit- kamufluar në të ashtuquajturin “Revolucion të Sindikatave” e më pas të Musolinit, Hitlerit, Stalinit, Frankos, Mao Ce Dunit, Enver Hoxhës, Pinoçetit dhe shumë të tillë që janë akoma në vitet që jetojmë në shtete të ndryshme!

Edhe këta diktatorë, si pa kuptuar e filluan karrierën e tyre, masa e popullit nuk e ndjeu qysh në fillim se çfarë e priste nga këta individë. Por ja që, këta arritën të bëjnë e të ndryshojnë rrjedhat e historisë sipas tekave të tyre.

A ka Hashim Thaçi, mundësinë, kapacitetin ideologjik të sipërpërmendurve? JO. Ai nuk mund të influencojë në botë, por, atij i mjafton thjeshtë Kosova. Dhe shenjat janë që ai, deri në një masë të madhe procentuale, ia ka arritur qëllimit me Kosovën-popullin shqiptar!

Janë me dhjetëra veprime dhe ngjarje në këto vitet e fundit, të bëra nga Hashim Thaçi që tregojnë frymën diktatoriale të tij.

Kush e nënvleftëson, është i gabuar.

*(Autori është publicist dhe redaktor në gazetën e përditshme ”Lajm”)

FRONTI I BASHKIMIT KOMBËTAR I SHKRUAN KRYEMINISTRIT THACI

by

LETËR PUBLIKE*/

Kryesia Qendrore e Frontit Bashkimit Kombëtar Shqiptar ditë më parë analizoi gjendjen politike dhe jo vetëm politike në Kosovë. U konstatua se gjendja e përgjithshme politike dhe jo vetëm politike është e rëndë, këtë gjendje e rëndon akoma më shumë toleranca e pajustifikueshme e grupit negociator të Kosovës në krye me kryeministrin Thaçi, që po i bëhet Serbisë në emër të një stabiliteti dhe marrëdhënive të mira Kosovë-Serbi. Në këtë mbledhje u tha edhe kjo: Edhe çka tjetër duhet të ndodh, edhe sa e sa herë duhet të shikojmë dhe dëgjojmë nga kreu dhe politikëbërësit e Serbisë për të kuptuar qëndrimet dhe veprimet antishqiptare, kolonialiste dhe raciste serbe ndaj shqiptarëve apo më mirë të thuhet ndaj çdo gjëje që frymon shqip.

Zotëri kryeministër dhe ju anëtarët  tjerë të Grupit Negociator që jeni pjesë përbërëse e delegacionit të bisedimeve Kosovë- Serbi, sikur patët tërhequr vijën e kuqe!

E para: Për cilat çështje nuk mund të bisedohet me Serbinë, sepse janë të paprekshme dhe të panegociueshme si:

1.         Çështjet të cilat prekin Pavarësinë, Sovranitetin dhe Integritetin territorial të Repulikës së Kosovës.

2.         Patët deklaruar se marrëveshja eventuale e arritur në mes të Republikës së Kosovës dhe Serbisë janë të natyrës teknike dhe se qëllimi thelbësor ishte integrimi i pjesës veriore të vendit dhe qytetarët atje në jetën e përditshme dhe institucionale të Kosovës dhe shtrirjen e sovranitetit edhe në këtë pjesë të Kosovës.

E dyta:  Kursi politik i Republikës së Kosovës është orientimi drejt BE-së, NATO-s dhe anëtarësimi në OKB, pra orientimi Evropian-Pro Perëndimor.

1.         Marrëveshja e Stabilizim Asociimit

2.         Liberalizimi i vizave, anëtarsimi në BE, lëvizja e lirë e njerëzve dhe mallërave.

 

Pas shumë taktizimeve nga pala Serbe dhe ajo Shqiptare, me insisitimin e vazhdueshëm dhe presionin e BE-së, si dhe një varg shtetesh të cilat e kanë njohur shtetin e Kosovës, duke përfshirë edhe  SHBA-të,  me dt. 19.04.2013 u arrijt marrëveshja e ashtuquajtur historike,

Marrëveshja  për Stabilizimin e marrëdhënjeve në mes të Kosovës dhe Serbisë.

Bukur shumë, në shikim të parë, diçka që nuk ka mund as të imagjinohet.

Kryesia e Përgjithshme e FBKSH-së, pasi ka bërë një analizë në mënyrë kronologjike dhe historike të veprimeve serbe ndaj popullit shqiptar dhe atë vetëm që nga Lidhja Shqiptare e Prizrenit dhe këndej, përfundimisht jemi bindur se kurrë dhe asnjëherë dhe në asnjë rrethanë me serbët nuk është arritur dhe nuk do të arritht as tani marërveshje paqësore dhe e qëndrueshme e vlefshme për të dyja palët.

Gjithnjë shkaktare dhe fajtore e mos arritjes së marrëveshjeve ka qenë pala serbe dhe do të jetë edhe në të ardhmen për shumë arsye, po veçojmë vetëm disa  prej tyre.

1.         Nëse serbët nuk e realizojnë qëllimin e tyre ekspansionist dhe kolonialist ndaj trojeve shqiptare, pastaj me dhunë të kryej shpërnguljen e popullsisë nga trojet e tyre stërgjyshore dhe të kryen popullzimin me popullatë serbe të sjellur nga vise të ndryshme, siç ishte rasti herën e fundit në Kosovë kur i sollën serbët nga Republika e Kroacisë.

 

2.         Pala serbe gjithnjë dhe në mënyrë të vazhdueshme do ta pengojë rrugëtimin e Republikës së Kosovës si shtet me Pavarësi dhe Sovranitet të plotë si depërtimin dhe anëtarësimine e saj në BE, NATO dhe OKB, si dhe mekanizma të tjerë ndërkombëtar strategjik për zhvillimin ekonomik dhe avancimin e statusit politik të Kosovës në organet relevante ndërkombëtare.

 

 

3.         Derisa Serbia vazhdon ta trajtojë Kosoven si tokë serbe, vazhdimisht në mënyrë të paskrupullt prononcohet, madje edhe para organeve të BE-së dhe OKB-së se  “Serbia kurrë nuk do ta njoh Pavarësinë e Kosovës”, madje Serbia edhe më tutje vazhdon që në Kushtetutën e saj Kosovën ta llogarisë si pjesë e Serbisë dhe e konsideron si “tokë e shenjt serbe”, kinse Kosova na qenka “zemra” e Serbisë, etj.”                                                                             Atëherë çfarë bëjmë ne shqiptarët!!!? Jemi të verbër apo të shurdhër dhe nuk duam të shohim as të dëgjojmë! Çka po ndodh me ne shqiptarët?

 

Problemi i serbëve të cilet jetojnë në pjesën veriore të Kosovës është problem i krijuar artifcialisht dhe jo i krijuar rastësisht, ndërsa ndërkombëtarizimi i këtij  problemi është pasojë e gabimeve politike të Qeverisë së Kosovës që nga paslufta e deri më sot.

 

 

4.         Serbia insiston që statusi i serbëve të Kosovës të ketë njohje ndërkombëtare dhe si të tillë të kenë të drejtë të kenë  qëndrim neutral ndaj statusit të Kosovës e kinse të jenë neutral edhe ndaj Serbisë!!! Edhe pse në këtë gjendje çfarë janë serbët si qytetarë të  Kosovës, në praktikën dhe diplomacinë ndërkombëtare paraqet presedan sui-generis.

 

FBKSH-ja si subjekt politik kombëtar i shtrirë në të gjitha trojet shqiptare nuk po e sheh të arsyeshme dhe assesi nuk po e kupton:

-Tundimin e Qeverisë dhe Istitucioneve relevante të Kosovës karshi çështjeve dhe kërkesave serbe. Këto janë obstruksione strategjike të njohura të Serbisë që i bën me qëllim që Kosoven të ndalet në rrugën e saj të shtet-ndërtimit, funksionimit dhe integrimit në mekanizmat dhe organet ndërkombëtare.

 

Do të ishte e pa drejtë dhe jo njerëzore që të mos e njohim dhe kuptojmë gjendjen dhe presionin e faktorit vendor dhe ndërkombetar ndaj Qeverisë Thaqi, e kuptojmë presionin e tmerrshëm që bëhet ndaj jush, vetëm një gjë po na shtyn që të mos jemi skajshmërisht ekstrem në qëndrimet tona e kjo është:

 

1.         Kufirin e jashtëm të Republikës së Kosovës nuk e ruan Ushtria jonë Shqiptare, pra nuk e ruajnë djemt dhe vashat shqiptare. Prandaj, ushtarët që e ruajnë sot kufirin e Republikës së Kosovës janë pjesëtarë të Forcës Ushtarake nga shteti i tyre i cili para 100 vitesh e ka miratuar copëtimin e trojeve shqiptare ose  ka qenë pjesëmarrës  në krijimin e shtetit serb!

Ne, Kryesia e Përgjithshme e FBKSH-së shumë do të donim t’i dinim përgjigjet e pyetjeve të cilat do t’ua bëjmë.

1.         A ekziston ndonjë arsye që Ju si kryeministër i Republikës së Kosovës, z.Thaqi, nuk mund ta ushtroni detyrën e krymenistrit ashtu si është paraparë në Kushtetutën dhe ligjet e Kosovë, apo ekziston arsye e fuqishme nga veprimet e juaja dhe kështu jeni detyruar ti nënshtroheni shantazhimit perfid diplomatik??

 

2.         Ju gjatë luftës kur ia kthyet pushkën shkjaut, sigurisht se nuk e keni ditur se sa do të zgjas lufta dhe se fitorja është shumë afër, pra keni vendosur të vdisni. Përse atëherë pra tani hezitoni të merrni hapa më vendimtarë dhe më konkret për tt ndërprerë këtë lojë të ndyrë serbe? Gjaku nuk mund të bëhet ujë dhe ju nuk duhet të lejoni që edhe më tutje t’i ricoptoni trojet shqiptare, nuk ju lejohet një gjë  e tillë. Kjo kishte me qenë edhe përgjigja e duhur që e prêt populli shqiptar nga ju z.Kryeministër.

 

Ne FBKSH-ja kërkojmë nga ju z.Kryeministër që nëse edhe më tutje pala serbe vazhdon me obstruksionet e saj, duke mos respektuar marrëveshjen e 19.04.2013 dhe vazhdimisht kërkesat serbe nuk kanë mbarim, duke sulmuar në themelet e Pavarësisë dhe Sovranitetit të Republikës së Kosovës, siç janë edhe këto të fundit.

a)         Heqja e logos së shtetit të Kosovës nga fletëvotimet dhe dokumentet tjera administrative dhe gjyqësore!!

b)         Krijimi i këshillit serb për komunat  serbe.

Shtrohet pyetja: Cili shtet po organizon zgjedhje më 3.11.2013, cilat kushte dhe ligje detyrimisht do duhej respektuar.

Nëse kjo lejohet, atëherë mos të mashtrohemi për shtrirje të sovranitetit edhe në atë pjesë të Kosovës, sepse serbët sigurisht zgjedhjet do t’i mbajnë me emblema dhe flamuj serb!!

Deri kur duhet Republika e Kosovës të vazhdojë ta mohojë vetveten dhe qenien e saj karshi lojërave të ulëta të politikës serbe? Prandaj, ne të FBKSH-së në emër të anëtarësisë së gjerë dhe simpatizantëve anë e kënd trojeve shqiptare, kërkojmë që nëse Serbia edhe  më tutje vazhdon avazin e vjetër, Ju z.Kryeminsitër të NDEËRPRENI BISEDIMET. Të jeni i sigurt se do ta keni përkrahjen e gjithë popullit.

Ne mendojmë se ndërprerja e negociatave me fajin e palës serbe, do të përkrahej nga të gjithë ata  që e duan pavarësinë e Kosovës, edhe pse ne e kemi thënë edhe më heret dhe vazhdojmë ta mbajm të njejtin mendim se pavarësia e Kosovës është një arritje e madhe e popullit shqiptar, të cilën e vlerësojmë si hap drejtë Ri-bashkimit kombëtar, si e vetmja alternativë dhe si zgjidhje e vetme e qëndrueshme në këtë Ballkan të trazuar.

Kryesia e Përgjithshme e FBKSH-së

Kryetari: Ibush Hetemi

FRONTI  BASHKIMIT  KOMBËTAR  SHQIPTAR KRYESIA E PËRGJITHSHME

Nr. 09/2013, dt. 25.08.2013

  • Letra u dergua ne Redaksine e Gazetes “Dielli”

 

Rexhep Qosja, ky nihilist, që i prinë anarkisë morale

by

Qosja me shkrimet e tij krijon kushte për krijimin e anarkisë morale dhe që është mjeti i vetëm që e kanë njerëzit të cilëve u mungon logjika në kohë të caktuar./

 Nga Fahri Xharra/

Nihilizmi rrjedh nga fjala latine “nihil”, që do të thotë asgjë, ajo që nuk ekziston. Nihilizmi është qëndrim mohues ndaj botës e ndaj ekzistencës së njerëzimit, qëllimit, vlerës apo të vërtetës së kuptueshme.Nihilizmi pasqyrohet duke i mohuar vlerat e çdo strukture sociale, shtetit e ligjit, normave të vlerës dhe principeve të moralit. Këto orientime mund të çojnë kah dhuna dhe terrorizmi kundër një sistemi të vendosur edhe të rezulton në rezistencën dhe qëndrimin pasiv ndaj çdo gjëje pa kurrfarë alternative në mendje. Kur Demosteni (371-322 p.e.s.) e citon se “çka ai dëshiron të besojë duhet të jetë ajo që të tjerët të besojnë”, ai e parashtron natyrën e marrëdhënies së dijes.

Nihilizmi mund të kuptohet në rrugë të ndryshme, si: nihilzmi politik, ai etik apo moral, nihilizmi ekzistencial dhe nihilizmi kombëtar.

Çka mohon nihilisti? Qëllimet e jetës në përgjithësi, principet e moralit, rendin moral në përgjithësi, si dhe ndjenjat kombëtare. Shumë afër nihilizmit është edhe absurdizmi, që thotë se përpjekjet e njerëzimit për të gjetur mendimin e pandarë (inherent) do të dështojnë.

Zhan-Zhak Ruso shkruante: “Nëse duhet të flas me logjikë, atëherë më duhen për t`i përdorur edhe arsyetimet logjike”. Por, sa është i mbështetur në logjikën e arsyetimit qëndrimi nihilist i Rexhep Qosjes në kushtet aktuale? Logjika e kundërshtimit dhe e mohimit të së vërtetës pa prova, pa fakte, pa realitet, është alibia e paracaktuar e qëndrimeve nihiliste të skajshme të tij për të çuar mendjen e të gjithëve në anarki.

Kurse, për të realizuar qëllimet e tij të errëta, të pabindshme dhe të paarsyeshme, me shkrimet e tij krijon kushte për krijimin e anarkisë morale dhe që është mjeti i vetëm që e kanë njerëzit të cilëve u mungon logjika në kohë të caktuar.

Sipas koncepteve të njohura gjithmonë, në themel të bashkëveprimeve të shumëfishta në shoqëri qëndrojnë interesat. Interesat mund të jenë politike, të fuqisë në pushtet, ekonomike, morale e shpirtërore e, në rastin konkret tonin, më shumë se kurrë interesat gjithëkombëtare. Në rastin e Qosjes, normat morale përjashtohen nga rregullat e përgjithshme, duke vepruar me metodologjinë nihiliste të të menduarit dhe me metodologjinë absurdiste të të vepruarit. Rexhep Qosja nihilizmin dhe absurdizmin i përdor me qëllime dhe me interesa të caktuara, të cilat nuk mund t`i realizojë me mjete e forma të tjera të ndershme dhe të pranueshme për ne.

Të nihilosh margaritarët e kombit, Kadarenë, Nënën Tereze, Skënderbeun, të nihilosh çdo gjë të mbarë të këtij populli, nuk mund të quhet ndryshe vetëm se një idiotizëm i paramenduar me qëllime afatgjate antikombëtare të Qosjes.

Në shkrimet e fundit, dhe si duket qe një kohë të gjatë, në porosi të Qosjes vërehet se mungon argumenti logjik i bazuar në fakte e të dhëna konkrete. Kur bota na i nderon diamantet e kombit, Qosja i lëshon vavuzelet e tij në të katër anët, me fyerje, me përçarje dhe me shprehje absurde. Po, ç`na pengon, ty dhe neve, nderimi që Evropa i bën Ismail Kadaresë?

Kur shqiptarët mendojnë dhe thonë se Perëndimi është antishqiptar (e që s`është e vërtetë), është detyrë e njerëzve të penës të përmirësojnë mendësinë e popujve vendimmarrës në politikat shtetërore, rajonale, bile edhe kontinentale. Kur Spanja konservatore, me tradita të larta të krishtera, pa asnjë paragjykim i jep çmimin e saj një shqiptari, Kadaresë, atëherë Qosja ngrihet dhe shpalos krekosjen e tij prej kacagjeli të joshkëputjes nga trashëgimia e tij turko-aziatike.

A ka të drejtë Qosja që inatin e tij e shtrin deri te Mbretëria spanjolle për vlerësimin e saj botëror të kulturës shqiptare? I huaji, i civilizuari, ta nderon kulturën me një lartësi të madhe para një elite të kulturës botërore, kurse Qosja krekoset duke mohuar edhe vetveten. Kjo është një sjellje si pasojë e një mungese të kulturës së tij ndaj Perëndimit, i cili po na afron me dëshmi konkrete, e ne reagojmë pakuptimshëm deri në absurditet.

Kush je dhe kë përfaqëson me gjithë këtë egërsi dhe pse? Pse bie ne nivelin e “kurrkushave” duke mohuar “faktin që robëria turke e ka cenuar rëndë zhvillimin natyror të popullit tonë”? Pse për qëllimet tua nihiliste e mohon “që shqiptarët, duke u shkëputur prej Evropës, u vonuan apo humbën krejt në zhvillimin e tyre material, ekonomik, kulturor, qytetërues”? Pse e mohon që ajo kohë “na e humbi identitetin shpirtëror dhe kulturor”? E, tani, mundohesh të na bindësh neve dhe botën për identitete të copëtuara dhe të izoluara shqiptare.

Të gjithë jemi me mendimin e Rilindësve se për ne shqiptarët s`ka formulim tjetër përveç atij që feja s`mund të shërbejë dot si një faktor lidhjeje kombëtare dhe duhet të kemi kujdes që ajo të mos marrë peshë të madhe më tepër se sa duhet në jetën tonë publike, e aq më pak në atë politike e intelektuale. Por, ti e bën të kundërtën!

Dikush, që në Prishtinë e ka shijuar me gojën plot kupën e mjaltit të sistemit, nuk guxon të anatemojë të tjerët dhe të shkatërrojë ndërgjegjen e popullit me kaosin dhe me papërgjegjësinë në shkrimet e tij. Kombi ynë ka nevojë për mendje të larta, për figura të mëdha që merren me probleme madhore kombëtare, e jo me politikën ditore të matrapazëve në të dy anët e kufirit.

Si mund të përmirësohet imazhi ynë në sytë e botës? Si t`iu përgjigjemi Jeremiqëve, të cilët, në takimet shtetërore në botën arabe-myslimane mundohen që neve të na paraqesin si jomyslimanë të denjë dhe miq të SHBA-ve dhe të Perëndimit, ndërsa në anën tjetër gjatë takimeve me perëndimorët mundohen të na paraqesin si fundamentalistë, terroristë islamikë, që janë kundër civilizimit të krishterë dhe atij perëndimor.

Çka duhet të bëjmë që të ndahet shapi prej sheqerit? A jemi fundamentalistë antiperëndimorë, apo jemi miq të SHBA-ve dhe të Evropës? Si guxon të heshtësh me gjithë atë “potencial mendor” që ke, para faktit që Jeremiqët e paraqesin veten si viktima si ato të natës së kristaltë, kur dihet se shqiptarët janë i vetmi popull që nuk i ka vrarë e as dorëzuar hebrenjtë gjatë Luftës së Dytë Botërore?

Kush je ti Rexhep Qosja? “Letërsia shqipe me të vërtetë nuk ka shumë tragjedi të shkruara”, por ka aktorë të tragjedisë kombëtare që nuk dinë të veprojnë ndryshe, pos me shkrimet e tyre.

 

22.04.2011