*SHBA: Nisën festimet e shqiptarëve për 8 Vjetorin e Pavarësisë e Kosovës/
* Federata Vatra, Bashkesia Fetare,Konsullata e Kosoves,Partia Levizja e Legalitetit, Shoqata Rugova, Shoqata e Shkrimatreve-Shqiptaro-Amerikane,Organizata “ Shprese & Paqe” (Hope & Peace) etj. festuan se bashku ne restorantin MAESTRO’S 8 Vjetorin e Pavaresise se Kosoves/
Nga Beqir SINA New York/
Shqiptarë nga Shqipëria, Kosova, dhe viset shqiptare, morën pjesë në këtë kremtim – që është më i rëndësishmi prej se kur Kosova shpalli pavarësinë e saj. /
BRONX : Me manifestimin e Vatrës, dhe bashkësisë shqiptare kanë nisur në Nju Jork, festimet me rastin e pavarësisë së Kosovës. Nën organizimin e Federatës PanShqiptare të Amerikës VATRA -, në lokalin Maestro’s në Bronx- New York, u organizua një program festiv në shenjë të 17 Shkurtit –Ditës së Pavarësisë së Kosovës.
Kështu, që duke vazhduar me traditën e nderimit të datave të shënuara kombëtare, organizata më e vjetër e shqiptarëve të Amerikës, Vatra, dhe bashkësia shqiptare në zonën e Tri-Shtetshit, u bënë së bashku për të festuar nëntorin e dytë shqiptarë – “Tetë Vejtorin e Shpalljes së Pavarësisë së Kosovës”.
Dhejtra shqiptarë nga Shqipëria, Kosova, dhe viset shqiptare morën pjesë në këtë kremtim – që është më i rëndesishmi prej se kur Kosova shpalli pavarësinë e saj.
Dekori të festës shoqërohej me vendosjen e flamujve të Shqipërisë, dhe SHBA, krah tyre ishte vendosur edhe flamuri i Republikës së Kosovës.
8-Vjetori i Pavarësisë së Kosovës, u hapë me intonimin e hymneve kombëtare, të SHBA, Shqipërisë dhe Republikës së Kosovës.
Kurse, me një minutë heshtje nga pjesëmarrësit janë nderuar të gjithë dëshmorët e kombit, dhe të rënët për lirinë dhe çlirimin e Kosovës.
Manifestimi e drejtojë zonja Naze Veliu, sekretare Vatrës, e cila disa herë gjatë fjalës së saj, vuri në pah edhe rëndësinë e madhe që ka kjo festë për të gjithë shqiptarët.
Në këtë program festiv përveç udhëheqësve të Vatrës, anëtarët e kryesisë së saj, me familjet e tyre, mori pjesë edhe Kryetari i saj, Dr. Gjon Buçaj, Dega e PLL, për SHBA dhe Kanada, Shoqata Rugova, Shoqata e Grave Shqiptare në Amerikë “Motrat Qiriazi”, Kisha Katolike Shqiptare Zoja e Shkodrës, Shoqata e Shkrimtarave Shqiptaro Amerikan, Bashkimi Kombëtar, e tjera.
Në festën e Vatrës me bashkësinë shqiptare, morën pjesë edhe të ftuar nderi si Konsulli i Kosovës Ylber Kryeziu, Dr Elmie Mara, nga Shqipëria, famullitari dom Pjetër Popaj, dhe të tjerë.
Bekimin e festës e kreu Dom Pjetër Popaj.
Duke kremtuar lindjen e shtetit të ri të Kosovës, tha në fillim të fjalës së tij gjithashtu, kujtojmë dëshmorët tanë gjatë historisë sonë dhe të gjithë ata që bënë sakrifica të panumerta; duke filluar me prijsin e demokracisë dhe pavarësisë së Kosovës Dr. Ibrahim Rugova e trimave të tjerë që flijuan veten e bënë të agoj kjo ditë. Po ashtu, tha ai faleminderojmë me këtë rast Amerikën dhe miqtë e tjerë, që ndihmuan në realizmin e ëndrrës së gjithë shqiptarëve për pavarësinë e Kosovës.
“ Në rradhë të parë duhet të faleminderojmë Zotin, tha prifti katolik shqiptarë, për këtë dhuratë, si edhe dhuratën që jemi shqiptarë, që e kemi njeri tjetrin. Historia jonë e përgjakur na ka bashkuar me njeri tjetrin edhe më fortë. Na ka bërë të kuptojmë se nuk kemi ku të shkojmë pa njeri tjetrin. Zoti na ka krijuar shqiptarë dhe kudo që të jemi ne, janë të gjithë shqiptarët. Në venat tona qarkullon i njëjti gjak.” tha ai.
Më pas Dom Pjetër Popaj, u ka kujtuar të pranishmeve se :”Shpallja e Pavarësisë së Kosovës më 17 Shkurt 2008, patjetër që është fitore për të gjithë shqiptarët, dhe, shkon krahas me shpalljen e pavarësisë së Shqipërisë me 28 Nëntorin 1912. Kjo, duhet të bind gjithëkënd se shqiptari duhet të sundojë vendin e vetë. Kudo që jetojmë brenda dhe jashtë kufinjëve të Sshqipërisë, është truall i ynë qysh prej kohës së Illirve, dhe e quajmë Shqiptari”
Kryetari i Komisionit organizativ të festës së Vatrës, Dr. Pashko Camaj, foli në emër të organizatorit.
Ai tha se jemi bashkuar sot për të festuar 8-vjetorin e pavarsisë se Republikës se Kosovës, dhe njekohsisht të kujtojm heronjët tonë të cilët sakrifikuan dhe jetën e vet për kët ditë të pritur pothuajse me shekuj.“E kaluara jonë, thkesojë Camaj, është plot me sakrifica, plotë gjak e vuajtje për liri. E çka fitohet me sakrifica duhet ruhet si sytë e ballit. Thuhet se diçka për lirinë: “Vështirë të fitohet, por dhe ma vështirë ruhet”! Kur e kanë thënë këtë njerezit tonë kanë folur për pasurinë. Kam bindje sikur kjo vlen edhe për lirinë. Sepse, sado e vështirë dhe e përgjakshme ishte fitorja, mund të duket se ishte më e lehtë se sa ruejtja dhe kultivimi i sajë. Pra edhe ruajtja i don sakrificat e veta dhe dedikimin e përhershëm”.
Simbas, folësit të ditës, dr. Camaj, “Duket se armiqtë tonë, ate të vjetër e ata të rinj, i kanë bashkuar forcat; po kamuflohen mirë, dhe në Perëndim po mundohet të çojnë një imazhë të dobët për Kosovën. Bashkëpunimi i tyre padyshim se na dëmton, por ne kemi obligim qe këto dukuri t’i identifikojmë, t’i lokalizojmë dhe t’i minimalizojmë ashtu që ne t’i japim mundesi ardhmërisë Euro-Atlantike të Kosovës, aty ku ajo e ka vendin e vet”.
Por, sqaroje nëpërmjet fjalës së tij Dr. Camaj, “sikurse, nuk ia kanë arritur në shekujt e kaluar, shpresoj se do të kalojmë edhe këtë sfidë, sepse ne jemi një: na bashkojnë një gjak, një gjuh dhe një flamur; na bashkon tryeza jone mbare-kombëtare, rreth te se cilës te perjetshëm do te jenë Gjergji dhe Ismaili; Naimi dhe Gonxhja; Isa dhe Luigji, Ibrahimi dhe Ademi…Kjo eshte harmonija jone, formula qe na bashkon dhe siguron ti mbijetojm ato pak dallime që duan me zor e dinakëri të na i imponojnë armiqet tonë. Kosova do të jetë e përjetshme si edhe vet kombi shqiptar,”.
Duke marrë pjesë si përfaqësues i shtetit të Kosovës, diplomati i Konsullatë së Përgjithshme të Kosovës në Nju Jork, Ylber Kryeziu, për të ndarë gëzimin me rastin e 8 vjetorit të pavarësisë së Kosovës, tha se :”Tetë vite më parë, populli i Kosovës e përcaktoj fatin e vetë. Në një ditë festive për të gjithë shqiptarët anekënd Botës, Kuvendi i Kosovës përmes përfaqësuesve të zgjedhur me votën e popullit, shpalli Kosovën shtet të pavarur dhe sovran”.
Në fjalën e tij diplomati kosovar, theksojë se shpirti i një kombi të shtypur me shekuj, më 17 shkurt 2018, përqafoj një herë e përgjithmonë paqen dhe gjeti lirinë. Ne, të gjallët, tha ai ishim brez me fat pasi patëm rastin jetësor të shohim me sy, të dëgjojmë me veshë ta ndiejm me zemër, lindjen e shtetir të ri.
Po shënojmë sot ditëlindjen e shtetit të Kosovës, dhe në të njëjten kohë, të nderojmë të gjithë ata që bënë realitet ëndrren tonë. Breza të tërë që dhanë gjithcka nga vetja, ata që mbajtën gjallë idealin e lirisë dhe ndërtuan vizionin e sëardhmes.
Sot, nderojmë të rënët për lirinë e Kosovës. Ata lindën heronjë, gjaku i tyre u bë dritë për ne dhe brezat që do vijnë. Ata janë mes nesh dhe mes nesh do mbesin për sa kohë që do të ketë Kosovë, për sa kohë që do të ketë Shqiperi.
Diplomati kosovar kujtojë në fjalën e tij gjithashtu edhe miqsinë tonë me Shtetet e Bashkuara të Amerikës, këtu, përtej oqeanit, shqiptarët, tha ai sikur e kishin pasë të shkruar destinimin e tyre historik, dhe permendi kontributin e shqiptarëve të Amerikës.
“Ne jemi krenar, tha Kryeziu, që një vend i vogël si Kosova të ketë kujdesin dhe përkushtimin e përhershëm të SHBA-ve, dhe e gjithë kjo, do të ishte e pamundur pa Ju të dashur bashkëkombas. Ju ishit ata që bëtë të mundur që në këtë vend të bekuar të kuptohet drejtë për të parën hërë, kauza për liri e popullit të Kosovës. Ju ishit ambasadorët e parë të shqiptarëve, ju ishit ura lidhëse mes dy kombëve, ju i dhatë frymë dhe e ushqyet me vite përkushtimin e administratës amerikane për Kosovën” ju drejtua të pranishmëve me rastin e festës së pavarësisë, përfaqësues i shtetit të Kosovës, diplomati i Konsullatë së Përgjithshme të Kosovës në Nju Jork, Ylber Kryeziu,
Një përshëndetje të veçantë në manifestimin e Vatrës, dhe bashkësisë shqiptare, me rastin e Shpalljes së Pavarësisë së Kosovës, solli nga presidentja e Fondacionit “Fëmijët Shqiptarë”, zonja Liri Berisha, nëpërmjet doktoresh Elmie Mara.
Enkas për këtë ditë të shënuar përshëndeti me një poezi kushtuar Vatres”Kur mblidhen Vatranet” poeti dhe shkrimtari Ilir Spata.
Duke përkujtuar tetëvjetorin e shpalljes së Pavarësisë së Kosovës,poeti dhe shkrimtari Ilir Spata, vatranë i vjetër, para pjesëmarrësve të këtij manifestimi, në mesin e të cilëve kishte edhe poet dhe shkrimtarë, recitojë një poezi shkruar prej tij enkas prej tij – për lirinë dhe pavarësinë e Kosovës.
Ndërsa, për të pasuruar programin muzikor të këtij programi festivë, u angazhua krahas argëtimit muzikor, këngëve dhe valleve, DJ Bendis MANI.
Nën tingujt e ëmbël të muzikës shqipe, kënga vallja dhe hareja zgjatën disa orë të ditës, në këtë manifestim.
Gjatë programit festivë në manifestimin e Vatrës dhe bashkësisë shqiptare, në shenjë të 17 Shkurtit –Ditës së Pavarësisë së Kosovës, u bënë dhe realizimet televizive nga Televizioni Kultura Shqiptare dhe TV21.(Gazeta Dielli do te kete nje reportazh te zgjeruar per gazeten e printuar)
Kryetarja Bashkisë Shkodër ,Voltana Ademi në Vatër
Nga Alfons Grishaj/*
Së bashku me zv/Kryetarin e Degës së Vatrës Michigan, Mond Rakaj, u nisëm për NY, për të takuar Kryetaren e Bashkisë Shkodër Znj.Voltana Ademi në një takim të ngushtë me Kryesinë e Vatres.Ajo e kishte planifikuar takimin me Mondin në Vatër me datën 13/02/16, rreth orës 10:00 të mëngjezit.
Tek aeroporti na priti miku ynë Dritan Mishto, i cili komunikoi me Editorin e Diellit Z. Dalip Greca.
I palodhuri Dalip Greca , Editor i Diellit , me prokupacionin dhe shqetësimin e tij që gjithnjë e karaktizon si kronograf i Vatres , ishte zgjuar me kohë dhe së bashku me Dritanin pregaditën dekorin e pritjes.
Kryetarja e Bashkisë së Shkodrës e shoqëruar nga mbesa e saj , Hyrjana Dibra u shfaqën tek Vatra në orën korrekt. Z. Alfons Grishaj e priti tek dera zonjën e nderuar Ademi, duke i prezentuar me rrallë të pranishmit . Ajo i njihte një pjesë të tyre, duke përfshirë ish-Konsullin e Pergjithshëm të Shqipërisë Zotni Dritan Mishto. Aktualisht Z.Mishto , është anëtari i Kryesisë së Vatrës dhe gëzon një respekt absolut në hapësirën e diasporës dhe në atë të Vatrës.
Kryetari i Vatrës Dr. Gjon Buçaj , “Nderi i Kombit” me Zonjën Nikoleta Buçaj, shfaqet me humor duke thënë, “ Më parë paskan ardhur miqtë se i zoti i shtëpisë”! Ai pasi përshëndeti Kryetaren e Bashkisë dhe i uroi mirëseardhjen, duke bërë dhe një historik të shkurtër të Vatres … Zonja Voltana Ademi, pasi përshëndeti të pranishmit dhe falemnderoi për pritjen e Vatrës , bëri një ekspoze të Bashkisë se Shkodrës dhe Komunave përreth .Gjatë kësaj eksopzeje hyn në sallë dhe këngëtari i madh shqiptar Frederik Ndoci , i cili përshëndet të pranishmit me rrallë. Atmosfera disi ndryshon dhe humori shkodran sipas zakonit zë vendin me finesë dhe në takimet e llojit zyrtar.
Z. Asllan Bushati, me korrektesën dhe seriozitetin që e ka në natyrë merr fjalën si zv/Nënkryetar i Vatrës .Paraqet në mënyrë dinjitoze të pranishmit duke prezantuar dhe njëherë një për një në atë takim . Ai shfaqi mendimet e tija për gjendjen aktuale në Shqipëri dhe diasporë.
Pati disa ndërhyrje të Z.Grishaj , kur pyetjet ishin të konsumuara nga përgjigjet e dhëna me korrektësi dhe mprehtësi nga Kryetarja Ademi.
Në sallë ishin të pranishëm dhe Vatranët legjendarë Zef Përnocaj, Zef Balaj , Lekë Mirakaj, të cilët bënë pyetjet e tyre . I pranishëm ishte dhe Televizioni Albanian Culture i NY me Drejtor Adem Belliu dhe televizioni i ACTV i Michiganit me Drejtor Eduard Aliko dhe me President Ndue Ftoni , të cilët dhanë sugjerimet dhe propozimet e tyre … Pyetjet që iu drejtuan Zonjës Voltana Ademi ishin nga më të ndryshmet dhe përgjigjet ishin në lartësinë profesionale dhe zyrtare.
Z. Greca , në rolin e cicëronit shpjegon me përpikmëri çdo foto që nga themelimi i Vatrës deri tek foto e Bill Klinton , që pat vizituar Vatrën një ditë para ndërhyrjes ushtarake në Serbi…
Duke u përshëndetur si miq të vjetër me Kryetaren e Bashkisë Shkodër , Voltana Ademi dhe të mbesen e saj Ana , siç e thërrisnin miqtë e saj short form, premtuam për një takim të dytë , për të konsoliduar planet dhe ndihmesën e diasporës sipas programit dhe planit të Bashkisë Shkodër. Më pas Z.Asllan Bushati , shtroi një darkë për miqtë Vatranë të ardhur nga Michigani.
* Edhe grupi i kryebashkiakeve te tjere,qe ishin per vizite ne SHBA, me ane te shoqeruesit,u interesuan per nje takim ne Vater, dhe Kryetari Bucaj, u ofroi si alternative oren 4 pm,por te ftohtit dhe axhenda e ngjeshur e tyre, nuk e mundesuan kete takim. Vatra e ka deren hape per cdo vizitor.
Shqipëria dhe shqiptarët në penën e Konicës
* Botohet me rastin e Vitit te Faik KONICES(2016) Shpalle nga Federata Panshqiptare e Amerikes”VATRA”/
NGA ANTON ÇEFA/
“Malli i Atdheut, pa shpresa të shoh Shqipërinë, më japin një forcë më të madhe për të punuar. E, çdo gjë në daltë, sido që në vafshin punët, unë, me ndihmë të shokëve të vërtetë, s’i kam për të hedhur armët/ .”- Faik Konitza, (Albania, Tetor 1899)./
“Unë parandjej: në agimin e të nesërmes një Shqipëri të lulëzuar demokratike dhe intelektuale, ku do të jetojë një rini kërshëriplotë e dhënë pas artit, bukurisë dhe punës. Këta shqiptarë të rinjë do të gjykojnë me një drejtësi të çiltër përçapjet tona, përplot me gabime, po të zjarrta sinqerisht. Ata do të shqyrtojnë, me të gjitha burimet dokumentare dhe kritike atë që ishte gjuha jonë dje dhe atë që do të bëhet gjuha jonë nesër, gjuha në të cilën ata do t’i shprehin mendimet dhe ëndërrat e tyre, dhe bukurinë e vitalitetin e kësaj gjuhe do ta hulumtojnë dhe do ta dinë ta shkoqisin.”
“ . . . Edhe një ndjenjë tjetër, atë që me gjithë dëshirë do ta quaja ‘afsh kombëtar’ d. m. th. një vullnet i domosdoshëm për ta ndier e përjetuar e ka pllakosur rininë shqiptare kohë më parë. Së këndejmi shpresojmë se ky afsh kombëtar, kjo flakë, të përhapet, të mos shuhet dhe të përforcohet akoma më tepër. Ta duash Shqipërinë, nuk do të jetë më si dikur një sport, po do të jetë vullnet për gëzimin e jetës.”
* “Shqipëria është e lindur nga idealistët, e shpëtuar nga rastet, e vrarë nga politikanët.”
*“Historia e Shqipërisë gjithmonë është trajtuar mbi bazën e pohimeve subjektive e të anshme që kanë bërë armiqtë e saj. Një paraqitje e ndryshme nga një autor shqiptar detyrimisht do t’i trazojë disa shprehi të caktuara të të menduarit dhe disa opinione të gatshme për çështjet në diskutim.”
Faik Konica
* “Për të gjitha ngjarjet që kanë kaluar ne kemi vetëm njërën anë të të ashtuquajturit informacion, e më konkretisht, kemi atë të armiqve të Shqipërisë, kurse varianti shqiptar mungon tërësisht.”
*“E vlen të vihet në pah se askush në këtë galeri vezhguesish (është fjala për ata që kanë vizituar vendin tonë, A. Ç.), me sa duket nuk e ka gjetur karakteristikën më kryesore të shqiptarëve, e pikërisht atë pa njohjen e së cilës historia e tyre do të mbetej një mister, pra individualizmin e tyre.”
* “Shqiptari është tepër i pavarur dhe tepër individualist, kështu që nuk i nënshtrohet ndikimit të kujtdoqoftë në kundërshtim me vullnetin e vet.”
*“Ndërsa popujt e tjerë i kanë përqendruar energjitë e tyre për të nxjerrë para, për të grumbulluar sende të bukura ose për të kaluar kohën këndshëm me rrugë të ndryshme, këta njerëz të thjeshtë e të ashpër (është fjala për shqiptarët, A. Ç.) kanë pasur vetëm një qëllim në jetë dhe e kanë aritur disa herë me çmimin e vdekjes së njerëzve të familjes së tyre: të jenë individualisht të lirë kundër ardhësve.”
* “Megjithëqë shqiptari është tepër i pavarur dhe tepër individualist e prandaj nuk pranon t’i nënshtrohet ndikimit të askujt kundër vullnetit të vet, ai përsëri beson fort te prejardhja dhe te e drejta e precedencës, si dhe te gjithçka lidhet me ide të tilla.”
*“Standardi etik i shqiptarit është besa, pra fjala e dhënë. Pavarësisht nga rrethanat, kur një shqiptar jep fjalën, ajo nuk mund të shkelet dhe nuk ka nevojë për asnjë lloj marrëveshjeje të shkruar.”
* “Fyerja më e rëndë në Shqipëri është ta quash dikë të pabesë.”
* “Mercenarët dhe ushtarët shqiptarë . . . kanë luftuar në ushtritë e Francës, të Spanjës, të Perandorisë së Shenjtë Romake, të Venedikut dhe të shteteve të tjera italiane, kanë lënë shumë gjurmë në historinë e Evropës. Ata kanë qenë luftëtarë të ndershëm, që nuk besonin në përvjedhjen nga beteja, siç ishte zakoni i shumicës së mercenarëve.”
* “Një e metë që zakonisht nuk gjendet në karakterin e shqiptarit është provokimi.”
* “Shqiptarët nuk janë aq të prirur për fjalë të shumta”
* “Unë besoj se dihet gjithkund që shqiptarët janë tolerantë për besimet e tjera, dhe ndoshta, ky është i vetmi vend në Evropë që nuk ka pasur luftëra fetare. Për këtë arsye disa kanë folur shpesh për ‘skepticizmin’ shqiptar.”
* “Dy kategori shqiptarësh munt të jenë idealistë: E para, Shqiptarët që janë të zotërit të mendojnë, që shohin ç’është Shqipëria dhe kuptojnë ç’munt t’ish, që vënë re me hidhërim padrejtësinë, që i bëhet popullit tonë, dhe dinë edhe krojin e asaj padrejtësie edhe të vetëmen mënyrë për të thanë për gjithënjë atë krua. E dyta, kategori, janë Shqiparët të shtypur brez pas brezi, zemëra e të cilëve u qanë për ditë më të bukura dhe munt t’u lartësojë mendjen gjer në kuptim të një ideali kombtar, i vetëm i zoti t’i japë çdo djali të kombit vendin e tij në diell. Tani, Zotërinj, ju pyes te cila nga këto kategori munt të hyjnë mëmëdhetarët e shentëruar të cilët sot e hothne maskën dhe u çfaqnë siç janë ?”
*“Është e rëndësishme të vëmë në dukje këtu dallimin mes nesh dhe grekëve lidhur me idealin ku synon secili popull për sjelljen e tij. “Fyerja më e rëndë në Shqipëri është ta quash dikë i pabesë”, çka lidhet me karakterin e njeriut; ndërsa: në Greqinë e sotme, fyerja më e rëndë për një njeri është ta quash analfabet dhe të trashë, pra ideali i fqinjëve jugorë është zgjuarësia, një atribut i hises mendore të psikës njerëzore. Nuk është e nevojshme të dallojmë këtu, në ç’kahe rëndon kandari i dinjitetit njerëzor: nga karakteri human etik apo nga një cilësi e të menduarit.”
* “Ana fisnike e shqiptarit është e panjohur për grekun.”
* “Banorët e bajrakëve (malësorët e Veriut, A. Ç.) janë më të sjellshëm dhe më me dinjitet se gjithë shqiptarët e tjerë.”
* “Një anë tjetër e karakterit shqiptar është përkushtimi i thellë i një njeriu ndaj prindërve dhe familjes. Kjo ndjenjë e natyrshme si kudo gjetkë, merr një formë më të mprehtë në Shqipëri, ku familja është një njësi shoqërore, që në një shkallë të gjerë zë vendin e shtetit në mendimin e njerëzve. Fëmijët rriten me traditat pak a shumë patriarkale për të respektuar më të mëdhenjtë, e mbi të gjithë, babanë, fjala e të cilit është ligj brenda caqeve të familjes. . .”
*“Në raportin dërguar Luigjit XII, Mbretit të Francës, të datës 27 qershor 1510, nga Seneschal-i i Madh i Normandisë, që ishte një nga gjeneralët që komandonte forcat ushtarake në Itali, gjejmë një krahasim mahnitës mes etikës së sllavëve dhe asaj të shqiptarëve. ‘Sllavët’ shkruan Seneschal-i i Madh, ‘janë mizorë në luftë, sepse ata i vrasin të gjithë ata që mundin dhe nuk mbajnë të burgosur. . . . Sa për shqiptarët, ata kanë treguar një sjellje krejtësisht të ndryshme dhe i kanë trajtuar me dashamirësi robët.”
* “Në kohët moderne vetëm shqiptarët, nga të gjithë kombet e Evropës Juglindore njihen që i kanë qëndruar besnikë traditës kalorsiake të kursimit të armikut të mundur.”
* “Në kronikat mesjetare franceze, na tregon Konica, del shprehja ‘krenar si shqiptar’. Duke polemizuar me Tozerin, i cili, ndër të tjera, shkruan: ‘Është kënaqësi të vesh re përzierjen kureshtare të krenarisë me varfërinë që dukej qartë tek disa nga këta burra. Mund t’i shihnit duke u krekosur . . . sikur ishin zotërinj tepër të hollë, saqë nuk begenisnin t’u hudhnin sytë kalimtarëve si ju, e megjithatë gjithçka e tyre flet për mjerimin më të madh … Konica argumenton: ‘Ajo që është një gjëzë për Tozerin, është fare e qartë për çdo shqiptar. Krenaria është një gjendje e mendjes pavarësisht nga pasuria ose rrethanat, dhe djemtë që ka parë Tozeri i përkasin një tipi të njohur mjaft mirë. Brez pas brezi ata me shpatë ose me pistoletë në dorë kanë ruajtur pavarësinë e tyre kundër kufizimeve qeveritare të Turqisë. Ata ia kanë dalë të kundërshtojnë pagimin e taksave, i janë kundërvënë rekrutimit ushtarak, kanë mbrojtur doket e ligjët e kanunit dhe në mënyrën e tyre e kanë ndier veten njërëz të lirë. .”
PJESMARRJA NE FESTIMIN E PAVARESISE SE KOSOVES ESHTE OBLIGIM PER CDO VATRAN
VATRA DHE BASHKËSIA SHQIPTARE KREMTOJNË PAVARËSINË E KOSOVËS/
Njoftohet Komuniteti Shqiptar në Nju Jork dhe rrethina se me 14 Shkurt 2016, Ditën e Dielë,duke filluar
nga mesdita, ora 12-5. pm, VATRA dhe BASHKËSIA SHQIPTARE organizojnë Festimin tradicional të Pavarësisë së Kosovës. Të pranishëm, mes komunitetit shqiptar, në këtë festim do të jenë Komunitetet
Fetare dhe Diplomatët Shqiptarë.
Festa organizohet në MAESTRO’S RESTORANT.
1703 Bronxdale Ave, Bronx, NY 10462
– Konsulli i Republikës së Kosovës z. Ylber KRYEZIU do të mbajë fjalën përshëndetse me rastin e 8 Vjetorit të Pavarësisë së Kosovës.
– Moderatore: Aida GASHI
Krahas argëtimit muzikor, kwngwve dhe valleve nwn drejtimin e DJ Bendis MANI, do të ketë ushqime dhe pije pa kufizim.
Të rriturit: $ 60.00
Fëmijët deri në 12 Vjeç- $20.00
Mund të rezervoni biletat në nurmat e telefonave të anëtarëve të Komisionit të festës.
KOMISIONI ORGANIZATOR
1- Kryetar: Pashko Camaj-516- 902-0588
2-Zv/kryetar: Saimir Dashi, cel :347-401-8519.
3-Anëtar: Marjan Cubi, cel:914-316-0045.
4-Anëtar: Hakik Mena, cel:201-993-0833
5-Anëtar: Isuf Rexhaj, cel:917-626-5782
6-Anëtar: Fuat Mamo, cel:201-893-6776
7-Anëtare: Arjana Elezi cel:917-445-4126
8-Anëtar: Fitim Krasniqi, cel:347-755-1486.
SHENIM: Ju mund te njoftoni edhe ne zyren e Vatres: 718- 365-6852 ose I telefononi editori ne tel 917-254-6103 ose porositni ne Email: gazetadielli@gmail.com
Federata Vatra,Vizita e Sekretarit te Shtetit John Kerry në Tiranë
Në një deklaratë të lëshuar nga Federata Panshqiptare e Amerikës VATRA në SHBA, mbështetet vizita e Sekretarit të Shtetit, Kerry dhe kërkohet konsensus qeveri – opozitë për reformën në drejtësi. Gjithashtu Federata Vatra vlerëson lart punën e ambasadorit Donald Lu dhe e gjen vehten tërësisht në deklaratat dhe qëndrimet e tij. Lidhur me problemet e rënda të konstatuara gjatë zgjedhjeve të fundit në Shqipëri, si kriminalizimi i listave të kandidateëve, shitblerja e votës, etj, Vatra shpreh bindjen se kjo temë do të jetë gjithashtu pjesë e bisedimeve me Sekretarin Kerry. Vetëm dekriminalizimi i politikës e institucioneve dhe garantimi i zgjedhjeve të lira e të ndershme do të ishin garancia e duhur për stabilitetin në Shqipëri, e më gjerë. Në vlerësimin e Vatrës, kjo vizitë është një mundësi e mirë për politikanët shqiptarë që të përmbushin detyrimet e tyre ndaj qytetarëve dhe të vendosin çështjet e rëndësishme politike mbi interesat partiake dhe personale.
Ja Deklarata e plotë e Vatrës
“Federata Panshqiptare e Amerikës VATRA përshëndet me mirënjohje të përzemërt vendimin e Sekretarit të Shtetit të SHBA, John Kerry, për të vizituar Shqipërinë, si një akt që tregon rëndësinë e bashkëpunimit mes dy vendeve tona, si dhe synimin e SHBA për rritjen e mëtejshme të këtij bashkëpunimi. Kjo vizitë zhvillohet në një kohë, kur debati politik përmban një sërë çështjesh të rëndësishme ende të pazgjidhura dhe shqetësuese për partnerët dhe miqtë tanë, por edhe kur shoqëria shqiptare po përjeton një krizë të thellë besimi dhe ekonomike, e pasqyruar qartazi në rritjen e emigrimit të qytetarëve drej vendeve të BE. Kjo vizitë është një mundësi e shkëlqyer për politikanët shqiptarë për të rritur përgjegjshmërinë e tyre ndaj pubikut dhe përmbushjen e detyrave të marra përsipër.
VATRA pret që, në temat, të cilat do të diskutohen me këtë rast, të zërë vend me rëndësi realizimi i një reforme të thellë në sistemin e drejtësisë, duke e parë atë si një rrugëdalje të mirë nga qerthulli i korrupsionit dhe padrejtësive, por edhe që do të ngrinte lart besimin e munguar të publikut tek institucionet e drejtësisë. Reforma në drejtësi do të hapte rrugën për ecje të mëtejshme drejt shkëputjes nga trashëgimia e rëndë e diktaturës së kaluar. Kjo reformë do të ishte jetëgjatë dhe e frytshme vetëm, nëse do të arrihej nëpërmjet një konsensusi mes qeverisë dhe opozitës, sipas rekomandimeve të Komisionit të Venecias.
Gjithashtu, ne shprehim shqetësimin tonë lidhur me problemet e rënda të konstatuara në zgjedhjet e fundit vendore 2015, veçanërisht shitblerja e votës dhe kandidimi i personave me rekorde kriminale, shqetësime të konstatuara edhe nga vëzhguesit ndërkombëtarë. Zgjedhjet e lira dhe të ndershme janë të një rëndësie jetësore për demokracinë dhe garantojnë stabilitetin e Shqipërisë. Çështja e sigurisë në përgjithësi është një temë e rëndësishme me interes për të dy palët, por, për palën shqiptare, përqendrimi i vëmendjes tek siguria në territoret shqiptare, ka një rëndësi të veçantë, duke patur parasysh rritjen e influences së organizatave terroriste dhe manipulimet nga armiqtë tanë shekullorë.
Federata Panshqiptare e Amerikës VATRA e gjen tërësisht vehten në deklaratat e ambasadorit të SHBA në Tiranë, Donald Lu, duke e falënderuar publikisht për punën e tij të shkëlqyer. Duke përfituar nga ky moment diplomatik, VATRA shpreh publikisht respektin më të thellë për punën dhe personalitetin e Sekretarit të Shtetit, John Kerry, e siguron për ndjenjat më të thella të mirënjohjes për mbështetjen e saj të pakushtëzuar për çdo nismë lidhur me Shqipërinë dhe çështjen shqiptare. Së fundi, Federata Panshqiptare e Amerikës VATRA, në traditën e saj më se njëshekullore, rikonfirmon qëndrimin e saj për thellimin e bashkëpunimit dhe rritjen e miqësisë mes dy shteteve dhe popujve tanë”.(Botoi: Zeri I Amerikes, Bota Sot, Rilindja Demokratike, Gazeta MINERVA,Gazeta Dita, Gazeta 55, TV Kultura Shqiptare, Gazeta Dielli, Gazeta Illyria, City News, Gazeta Impakt,Koha) Opozita.com etj)
- « Previous Page
- 1
- …
- 81
- 82
- 83
- 84
- 85
- …
- 148
- Next Page »