Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova dhe Bashkimi Evropian nënshkruajnë marrëveshje financiare

by

-Mbështetja financiare e këtij Programi në total është mbi 66 milionë euro/
Nga Behlul Jashari/ PRISHTINË, 7 Gusht 2015/ Qeveria e Republikës së Kosovës dhe Bashkimi Evropian kanë nënshkruar sot marrëveshje financiare.
Ministri kosovar për Integrim Evropian, Bekim Çollaku ka nënshkruar Marrëveshjen Financiare vjetore në mes të Qeverisë së Republikës së Kosovës dhe Bashkimit Evropian në kuadër të Instrumentit të Asistencës së Para-Anëtarësimit (IPA). Në emër të Bashkimit Evropian, kjo Marrëveshje është nënshkuar nga Drejtori për Ballkanin Perëndimor në Komisionin Evropian,Jean-Eric Paquet. Mbështetja financiare e këtij Programi në total është 66.050.000 euro.
Nën programin vjetor të veprimit të IPA-s për Kosovën, do të mbështeten sektorët në vijim: Demokracia dhe Qeverisja, Sundimi i Ligjit dhe të Drejtat Themelore të Njeriut, Energjia, Konkurrueshmëria dhe Inovacioni, Bujqësia dhe Zhvillimi Rural. Projektet e parapara të mbështetura me këtë Program do të fillojnë së zbatuari në fillim të vitit 2016.
Sa i përket demokracisë dhe qeverisjes, fokus i veçantë do t’i kushtohet përpjekjeve për përmirësimin e administratës publike në Kosovë, me qëllim që t’i mundësohet asaj transpozimi, aplikimi dhe zbatimi i acquis të BE-së, veçanërisht në fushat e mbuluara nga Marrëveshja për Stabilizim dhe Asociim (MSA). Programi do të mbështesë gjithashtu shoqërinë civile në ngritjen e efikasitetit dhe në pjesëmarrjen në procesin e politikëbërjes. Gjithashtu, Programi do të ndihmojë në përmirësimin e kapaciteteve të Kuvendit të Kosovës. Shuma financiare për ketë sektor do të përfshijë 17 300 000 euro.

Sa i përket sundimit të ligjit dhe të drejtave themelore do të adresohen sfidat në tre nën-sektorë: në nën-sektorin e drejtësisë fokusi do të jetë në fuqizimin e arsimimit ligjor për ngritjen e nivelit të profesionalizimit, llogaridhënies dhe efikasitetit në gjyqësor. Sa i përket punëve të brendshme, fokusi do të jetë në fuqizimin e strukturave që merren me politikat e migracionit në Kosovë dhe në fuqizimin e institucioneve që luftojnë trafikimin me qenie njerëzore. Ndërsa, sa i përket të drejtave themelore dhe minoriteteve, fokusi do të jetë në përmirësimin e respektimit të drejtave të njeriut, duke mbështetur përfshirjen e komuniteteve joshumicë dhe grupeve të cenueshme dhe lehtësimin e dislokimin e familjeve të zhvendosura nga qendrat kolektive. Shuma financiare për ketë sektor do të përfshijë 4 000 000 euro.
Veprimet në sektorin e energjisë do të fokusohen kryesisht në zbatimin e legjislacionit që transpozon Pakon e Tretë për Energji si dhe në reduktimin e emetimeve të karbonit dhe përmirësimin e efiçiencës së sektorit të energjisë në Kosovë. Shuma financiare për ketë sektor do të përfshijë 5 500 000 euro.
Sa i përket konkurrueshmërisë dhe inovacionit, programi do të ndihmojë në përmirësimin e konkurrueshmërisë së sektorit privat në Kosovë, në veçanti përmes përmirësimit të infrastrukturës komunale dhe mbështetjes së ndërmarrësve përmes programit për zhvillim rajonal. Shuma financiare e ndarë për ketë sektor është 12 150 000 euro .
Ndërsa për sektorin e bujqësisë dhe zhvillimit rural, veprimet e parapara do të ndihmojnë në përmirësimin e konkurrushmërisë së sektorit agroushqimor në Kosovë, përmirësimin e kushteve të jetesës për popullatë në zona rurale, përmirësimin e sigurisë së ushqimit dhe rritjes së aftësisë së eksportit të sektorit agroushqimor. Shuma financiare për ketë sektor do te përfshije 10 500 000 euro.

Kosovë-Serbi, sigurimi i automjeteve zbatim nga 12 gushti

by

Nga Behlul Jashari/ PRISHTINË, 5 Gusht 2015/ Marrëveshja Kosovë-Serbi për sigurimin e automjeteve nis zbatimin në 12 gusht.
Delegacioni i Republikës së Kosovës i udhëhequr nga ministrja për Dialog, Edita Tahiri, mori pjesë në takimin e mbajtur në Bruksel lidhur me zbatimin e Marrëveshjes për njohjen reciproke të sigurimeve të automjeteve.
“Në këtë takim, të ndërmjetësuar nga Bashkimi Evropian, u arrit pajtimi që më 12 gusht 2015 të fillojë zbatimi i Marrëveshjes për sigurimin e automjeteve në mes të dyja shteteve, Kosovës dhe Serbisë”, bën të ditur njoftimi dërguar nga Brukseli i delegacionit kosovar.
“Gjatë këtij takimi, të dyja palët raportuan për finalizimin e përgatitjeve teknike për fillimin e mbarë të zbatimit të kësaj marrëveshje sipas planit zbatues. Palët u zotuan që me përkushtim do të zbatojnë këtë marrëveshje e cila është lehtësuar dhe garantuar nga Bashkimi Evropian dhe Këshilli i Byrove Evropiane”, thekson njoftimi.
Ministrja për Dialog, Edita Tahiri, theksoi se pas këtij takimi çdo gjë është gati që të fillojë zbatimi i marrëveshjes për sigurimin e automjeteve që është në interes të qytetarëve të Republikës së Kosovës, sepse u hiqet një barrë e pagesës së tarifave të larta dhe se tani e tutje nuk kanë nevojë të paguajnë tarifa shtesë gjatë kalimit në Serbi.
“Kjo marrëveshje kontribuon për përmirësimin e lëvizjes së lirë për qytetarët e të dyja shteteve dhe është në pajtim me standardet evropiane për lëvizjen e lire”, u shpreh ajo.
Në orët e pasdites, përkatësisht në ora 17:00 delegacioni i Republikës së Kosovës i udhëhequr nga Tahiri pritet të takohet me presidentin e Këshillit të Byrove Evropiane (KBE), Jean Zenners. Gjatë këtij takimi do të diskutohet për mundësitë e thellimit të bashkëpunimit, me theks të veçantë të Byrosë Kosovare të Sigurimeve dhe Këshillit të Byrove Evropiane, zbatimi i kritereve të KBE-së nga ana e institucioneve përgjegjëse të Kosovës, dhe perspektiva e anëtarësimit të Kosovës në Këshillin e Byrove.
Në mbrëmjen e 23 qershorit 2015 njoftohej se, në Bruksel, në margjina të takimit të raundit të 26-të kryeministror Kosovë-Serbi, në procesin drejt normalizimit të marrëdhënieve, të kryesuar nga BE e mbështetur nga SHBA, është nënshkruar Marrëveshja për Sigurimet Kufitare të Automjeteve.

Kosovë-Serbi, bisedime në Bruksel për njohjen reciproke të sigurimeve të automjeteve

by

PRISHTINË, 4 Gusht 2015/-Delegacioni i Republikës së Kosovës, i udhëhequr nga ministrja për Dialog, Edita Tahiri, udhëtoi sot për Bruksel për të marrë pjesë në takimin lidhur me zbatimin e Marrëveshjes për njohjen reciproke të sigurimeve të automjeteve, në bisedimet Prishtinë-Beograd.
Në këtë takim të ndërmjetësuar nga BE dhe Këshilli i Byrove Evropiane do të diskutohet për aspektet teknike të zbatimit të Marrëveshjes për njohjen reciproke të sigurimeve të automjeteve mes dy shteteve, Kosovës dhe Serbisë, të nënshkruar në 23 qershor në Bruksel në prani të kryeministrave të Kosovës dhe të Serbisë, si dhe Përfaqësueses së Lartë të BE-së, Mogherini. Kjo Marrëveshje ishte paraparë të hyjë në fuqi në 24 korrik dhe institucionet e Kosovës kishin bërë përgatitjet e nevojshme.
“Gjatë këtij takimi do të diskutohet për të gjitha aspektet teknike të përgatitjeve për fillimin e mbarë të zbatimit të kësaj marrëveshje sipas planit zbatues, për të cilën të dyja palët do të raportojnë për përgatitjet e duhura. Është qëndrim i delegacionit të Republikës së Kosovës që Marrëveshja duhet të zbatohet në plotëni, sa më parë që është e mundur dhe jo më larg se 10 gushti 2015”, theksojnë burimet zyrtare të Kryeministrisë kosovare.
Gjatë ditës së nesërme, delegacioni i Republikës së Kosovës do të pritet në një takim nga Presidenti i Këshillit të Byrove Evropiane (KBE), Jean Zenners. Do të diskutohet për mundësitë e thellimit të bashkëpunimit, me theks të veçantë të Byrosë Kosovare të Sigurimeve dhe Këshillit të Byrove Evropiane, për zbatimin e kritereve të KBE nga ana e institucioneve përgjegjëse të Kosovës dhe perspektivën e anëtarësimit të Kosovës në Këshillin e Byrove./b.j/

Kosovë-Kuvendi mund të mblidhet sot edhe në seancë të jashtëzakonshme

by

Nga Behlul Jashari/ PRISHTINË, 3 Gusht 2015/-Kuvendi i Kosovës do të mblidhet sot edhe në seancë të jashtëzakonshme për dy ligje të proceduara po sot nga qeveria, nëse në seancën plenare të nisur sot paradite e që po vazhdon do të votohen me dy të tretat – së paku 80 vota pro ndryshimet kushtetuese drejt krijimit të Gjyakëtës Speciale.
Shqyrtimi i propozim-amendamentit nr. 24 në Kushtetutën e Republikës së Kosovës, i riproceduar të premtën në Kuvend nga qeveria e Republikës së Kosovës, është pikë e vetme e axhendës së seancës plenare të Kuvendit që po zhvillohet me debate pro dhe kundër.
“Menjëherë pas aprovimit të amendamenteve kushtetueese qeveria do të mblidhet për ta shqyrtuar Projektligjin për Dhomaat e Specializuara dhe Zyrën e Prokurorit të Specializuar dhe Projektligjin për Mbrojtjen Juridike dhe Mbështetjen Financiare të Personave të Akuzuar Potencialë në Proceset Gjyqësore pranë Dhomave të Specializuara. Qeveria menjëherë pas kësaj do të kërkojë që sot të mbahet seancë e jashtëzakonshme e Kuvendit për të trajtuar edhe këto dy ligje”, tha kryeministri Isa Mustafa në debatin në Kuvend.

Opozita edhe në seancën e sotme të Kuvendit të Kosovës u deklarua në “mbrojtje të demokracisë” dhe kërkoi mosriprocedum dhe “të mos shkelet Kushtetuta me riprocedim të Gjykatës Speciale pa respektuar procedurat”.

Por, nga koalicioni qeverisës u deklarua se, “Kushtetuta e Republikës së Kosovës dhe Rregullorja e Punës së Kuvendit nuk e kufizojnë mundësinë që qeveria të riprocedojë me të njëjtat amendamente në Kuvendin e Republikës së Kosovës”. Nga Lista Serbe dhe komunitetet tjera pakicë të grupit Gjashtë Plus nuk pati deklarime grupesh parlamentare.

Në seancën e sotme të Kuvendit të Kosovës, të nisur paradite, nuk kaloi mocioni i opozitës lidhur me krimet e Serbisë në Kosovë i nënshkruar nga Lëvizja Vetëvendosje, Aleanca për Ardhmërinë e Kosovës
dhe Nisma për Kosovën, që të hyjë si pikë e parë e rendit të ditës para Gjyakëtës Speciale që ishte dhe mbeti pikë e vetme axhendës. Mocioni u rrëzua me shumicë votash, 55 kundër, 42 pro e 5 abstenime.
Gjatë debatit në seancën që po vazhdon nuk ka shumë prani të deputetëve në sallë, si vërejnë edhe disa nga diskutuesit, por pritet numër i mjaftueshëm në momentin kur do votohet. Pak më parë, derisa diskutonte, deputeti i PDK-së, Nait Hasani, i cili u rideklaru kundër Speciales dhe bëri thirrje të mos votohet, prezantoi në foltoren e Kuvendit edhe fotografi të krimeve të shumta të forcave serbe gjatë luftës në Kosovë. Pas këtij diskutimi kryetari i Kuvendit të Kosovës, Kadri Veseli dha një orë pauzë, për të vazhduar seanca me debate pasdite.
Gjykata Speciale u rikthe në axhendën e seancës plenare të Kuvendit të Kosovës, ku në 26 qershor për miratim munguan 5 vota për të arritur numrin e nevojshëm 80 – dy të tretat e 120 deputetëve, përfshirë ato të 20 përfaqësuesëve të komuniteteve pakicë, 10 prej tyre serbë. Në procesin e votimit opozita nuk mori pjesë, ndërsa nga pozita, subjekti politik më i madh i koalicionit qeverisës PDK, 7 deputetë ishin kundër, 2 abstenuan e 4 mungonin. Para mbledhjes së sotme të Kuvendit të Kosovës Thaçi ritakoi grupin parlamentar të partisë së tij.

Kosovë – Në Ditën e Diasporës ndahen çmime

by

-Për kontribut të veçantë jetësor Çmimi “Post Mortem” ju dha vëllezërve Yll, Agron dhe Mehmet Bytyqi/
-Nga Prishtina-Forumi i studentëve dhe të rinjve të diasporës vazhdon në Tiranë/
PRISHTINË-Në kryeqytetin e Kosovës, Prishtinë, u përmbyll sonte manifestimi i Ditës së Diasporës dhe Mërgatës, që tradicionalisht organizohet nga Ministria e Diasporës për nder të bashkatdhetarëve tanë.
Në mesin e aktiviteteve të shumta si dhe debatit me krerët e institucioneve shtetërore e lokale të Kosovës dhe Shqipërisë, këtë vit u ndanë edhe Çmimet për “Mërgimtarin e Vitit” në 6 fusha, si dhe 4 çmime për gazetarin përkatësisht kronikën më të mirë të realizuar në promovimin e diasporës dhe sukseseve të personaliteteve që jetojnë dhe veprojnë jashtë kufijve të Kosovës.
Çmimet i ndanë ministri kosovar i Diasporës, Valon Murati, ministri i Mirëqenies Sociale dhe Rinisë nga qeveria e Republikës së Shqipërisë, Blendi Klosi dhe kryetari i komunës së Prishtinës, Shpend Ahmeti.
Mërgimtari i vitit për kontribut të veçantë për shtetin e Kosovës apo diasporën dhe mërgatën u shpall artisti ynë i mirënjohur Shkelzen Doli;
Bejtullah Destani – për kontribut në arsim, shkencë apo teknologji;
Elina Duni – për kontribut në fushën e kulturës;
Shkelzen Gashi – për kontribut të veçantë në fushën e sportit;
Nazar Mehmeti – për kontribut të veçantë në fushën e biznesit;
Për kontribut të veçantë jetësor Çmimi “Post Mortem” ju dha vëllezërve Yll, Agron dhe Mehmet Bytyqi.
Ndërsa çmimet për gazetari të cilat Ministria e Diasporës i ndan për herë të parë u vlerësuan në dy kategori:
Çmimi i parë për kronikë televizive për promovimin e diasporës ju nda Lumira Kelmendit nga Radio Televizioni i Kosovës për reportazhin “Arbëreshet e Italisë”;
Çmimi i dytë në këtë kategori i takoni Zana Fetiut nga Klan Kosova për reportazhin “Skulptori Destan Gashi”;
Ndërsa dy çmimet për kontribut të veçantë në promovimin e diasporës dhe mërgatës në kontinuitet për punën e tyre u nderuan Demir Reshiti me emisionin Më Afër, dhe portali informativ “Albinfo.ch”.
Pas ndarjes së çmimeve u organizua një debat i hapur me qytetarët e mbledhur në Amfiteatrin e pishinës së Gërmisë dhe përfaqësuesve të ministrive, komunës dhe shoqatave të ndryshme, ku mes tjerash me prezencën e saj tubimin e nderoi edhe ikona e muzikës shqiptare Nexhmije Pagarusha.
Gjatë kësaj ceremonie, e cila është organizuar në bashkëpunim me Komunën e Prishtinës, dhe me kontribut të Postës së Kosovës, kryeshefi i Postës, Sejdi Hoxha, prezantoi edhe edicionin e veçantë të Pullës Postare me temën “Diaspora”, e cila si motiv ka logon e diasporës së përzgjedhur muaj më parë nga Ministria e Diasporës./b.j/

Prishtinë-Forumi i studentëve dhe të rinjve të diasporës vazhdon në Tiranë/

PRISHTINË, 2 Gusht 2015/-Forumi për krijimin e Unionit të Studentëve dhe të Rinjve të Diasporës, organizuar nga Ministria kosovare e Diasporës, sot në Prishtinë, do t’i vazhdojë punimet edhe më 4 gusht në Tiranë, për të përfunduar një ditë më pas me konkluzionet e nxjerra nga studentët.
Ministri i Mirëqenies Sociale dhe Rinisë i Shqipërisë, Blendi Klosi, përshëndeti këtë iniciativë, duke thënë se ky forum është fillimi i ngjarjeve të përbashkëta.
“Tashmë është një gjeneratë e tretë, e katërt, e cila ka lindur, është rritur dhe po zhvillohet në Evropë, prandaj do të duhet të ketë shumë më tepër lidhje me vendin, duhet të ketë më tepër njohuri në administratën shqiptare dhe atë të Kosovës. Prandaj, padyshim, nuk mund të quhet më një ngjarje që një ministër i Shqipërisë dhe një ministër i Kosovës të bëjmë së bashku aktivitetet të këtij lloji”, citohet ministri Klosi në njoftimin e dërguar nga Ministria kosovare e Diasporës.
Në këtë forum me të rinjtë dhe studentët e diasporës nga vendet e ndryshme të Evropës, ishin edhe kryeministri i Kosovës, Isa Mustafa, ministri i Diasporës, Valon Murati, ambasadori shqiptar në Prishtinë, Qemal Minxhozi, zëvendësministrja kosovare e Arsimit, Shkencës dhe Teknologjisë, Anila Statovci–Demaj, dhe përfaqësues të shoqërisë civile në Kosovë.
Në forum pati diskutime lidhur me fushën e arsimit, por edhe për tema të tjera me interes për studentët pjesëmarrës