deklarate – Page 3 – Dielli

VATRA PËRSHËNDET MIRATIMIN E LIGJIT PËR GJUHËT E BASHKËSIVE ETNIKE NË PARLEMINTIN E MAQEDONISË

March 15, 2018 by dgreca

– Dekleratë e Federatës Panshqiptare të Amerikës “VATRA”-THE HEARTH-/

Nju Jork, 15 Mars 2018- Federata Panshqiptare e Amerikës “Vatra”-The Hearth- përshëndet votimin dhe miratimin në Parlamentin e Maqedonisë me 64 vota të Ligjit për përdorimin zyrtar të gjuhëve të bashkësive etnike, me 14 Mars 2018. Ligji njeh zyrtarisht gjuhën shqipe si gjuhën e dytë në Maqedoni dhe zyrtarizon përdorimin e saj në nivelin lokal dhe qendror të pushtetit. Kjo përbën një arritje historike për shqiptarët që jetojnë në Maqedoni.

Vatra e ndoqi me shumë vëmendje eçurinë dhe kalvarin e projekt-ligjit, që nga refuzimi i Presidentit Ivanov për dekretimin e tij dhe rikthimin në Parlament dhe shfaq brengosjen e saj për tensionet e krijuara nga opozita maqedonse, nga VMRO, lideri i saj, Hristijan Miçkoski, nga ish Kryeministri Gruevski, që tentuan të pengojnë risjelljen e këtij Ligji në Parlament dhe krijuan tension për mosvotimin e tij, ç’ka tregon se Opozita dhe kreu i saj, ende nuk janë distancuar nga politika e vjetër, tensionet, përçarjet,dhe grindjet etnike që mbolli regjimi i Sllobodan Millosheviçit në Ish Jugosllavi…

Federata Panshqiptare e Amerikës”VATRA” e vlerëson si akt civilizimi deklarimin e Kryeministrit Zoran Zaev se: “Me përparimin e të drejtave për përdorimin e gjuhëve nuk humb askush, por mundësohen kushte për komunikim më të mirë ndërmjet qytetarëve dhe institucioneve.Komunikimi i papenguar i qytetarëve është përfitim civilizues.”

Vatra i apelon Presidentit Gjorge Ivanov që të dekretojë sa më parë Ligjin që garanton një të drejtë kushtetuse të mohuar deri tani për qytetarët shqiptarë, që janë elementë shtetformues në Maqedoni. Deklaratat e tij pas votimit në Parlament, nuk i bëjnë mirë Maqedonisë dhe rajonit, që aspiron Bashkimin Europian.

Vatra përgëzon faktorin politik shqiptar që u gjet i bashkuar në këtë çast historik, ku gjuha shqipe, zyrtarizohet në Parlament.

Dëshmi tronditëse për krime të pandriçuara në Kosovë

January 12, 2018 by dgreca

Deklaratë e përbashkët e familjeve Zemaj, Tolaj dhe Haklaj/

Dje, më datë 11 janar 2018, në emisionin “Zona e Debatit” në Klan Kosova, është transmetuar dëshmia e Shkumbin Mehmetit, dëshmitar i mbrojtur i Prokurorisë Speciale, ku janë dhënë dëshmi tronditëse për krime të pandriçuara në Kosovë.

Në dëshminë e tij, z. Mehmeti, ndër të tjera, ka dhënë informacione që lidhen me vrasjen e Kolonel Tahir Zemajt si dhe të dy policëve hetues, Sebahate Tolajt dhe Isuf Haklajt, duke dëshmuar për motivet që çuan urdhërdhënësit për porositjen e këtyre vrasjeve si dhe duke apostrofuar emra që mund të jenë të përfshirë në kryerjen e këtyre krimeve.

Ashtu si është tronditur mbarë opinioni publik, edhe familjet tona janë tronditur thellë nga deklaratat dhe pretendimet e këtij dëshmitari, njëherit i dënuar për krime të kryera si pjesë e një grupi kriminal, po ashtu i apostrofuar si pjesë e ndërmarrjes së krimeve ndaj familjarëve tanë, Tahir, Hasan, Enis Zemaj dhe Sebahate Tolaj e Isuf Haklaj.

Por, ajo që na ka shqetësuar pa masë është dëshmia e tij në lidhje me neglizhencën e zyrtarëve të shtetit karshi deklaratave dhe pretendimeve të tij.

Jemi thellësisht të indinjuar që pavarësisht pretendimeve të dëshmitarëve të mundshëm që do të çonin në zbardhjen e këtyre vrasjeve, por edhe të shumë krimeve të tjera të kryera në Kosovë me motive politike, prokurorët nuk kanë bërë sa duhet për ta përmbushur obligimin e tyre konform standardeve etike dhe profesionale, duke i lënë këto raste në mëshirën e fatit.

Familjet tona ftojnë Prokurorinë e Shtetit që t’i marrë shumë seriozisht të gjitha pretendimet e këtij dëshmitari dhe dëshmitë e tjera eventuale dhe t’i trajtojë ato me seriozitet, në mënyrë që kryerësit e këtyre krimeve të marrin dënimin e merituar.

Me respekt,

Familjet Zemaj, Tolaj dhe Haklaj

Deklarata u dergua ne posten elektronike te Diellit

DEKLARATA E VATRES PER GJUHEN SHQIPE NE MAQEDONI

January 11, 2018 by dgreca

VATRA PERSHENDET MIRATIMIN E LIGJIT PER GJUHEN SHQIPE NGA PARLAMENTI I MAQEDONISE/

shoqata-vatra-presidenti--c1200x600

Federata Panshqiptare e Amerikës “VATRA” përshëndet vendimin e Parlamentit të Maqedonisë për miratimin e ligjit për përdorimin zyrtar të gjuhëve të bashkësive etnike.

Federata Vatra e vlerëson si hap pozitiv të arritur në një shtet ku dasitë etnike janë të theksuara.

Vatra e vlerëson pozitivisht Vendimin sepse Ligji lejon që gjuha shqipe do të përrdoret për të parën herë edhe në Qeveri; edhe në Kuvend, por edhe në të gjitha organet e tjera të pushtetit qëndror, ndërmarrjet publike, agjensitë, drejtoritë, Komisionet etj.Ky Ligj avancon përdorimin zyrtar të Gjuhës shqipe në të gjitha organet e pushtetit qëndror dhe lokal.

Vatra përgëzon bashkësinë shqiptare për këtë arritje dhe bën thirrje që edhe për të ardhmen faktori shqiptar, qoftë ai në opozitë, qoftë në pozitë, të bashkohen në çështje Kombëtare, si kjo.

Vatra mendon se ky ligj është jo vetëm një arritje për shqiptarët , por edhe për vetë maqedonasit dhe do të ulë tonet e grindjeve dhe dasive etnike dhe garanton të drejtat e njeriut sipas kartave ndërkombëtare.

Edhe pse ky Ligj është ende larg plotësimit të zotimit që Partia Social Demokrate e Kryeministrit Zoran Zaev, pat premtuar kur mori mbështetjen e partive shqiptare, sërish përbën një hap përpara në betejën e gjatë të shqiptarëve të Maqedonisë për përdorimin e gjuhës shqipe dhe i hap rrugën marrjes së statusit të barabartë të Gjuhës shqipe me atë maqedonase, ç’ka do të kërkonte ndryshimin e Kushtetutës. Beteja mbetet e hapur dhe shqiptarët duhet të punojnë edhe për këtë objektiv madhor.

***

VATRA- VOTA ANTIAMERIKANE E QEVERISE SHQIPTARE NE OKB, KUNDER INTERESAVE TE KOMBIT SHQIPTAR

December 22, 2017 by dgreca

DEKLARATE E FEDERATES PANSHQIPTARE TE AMERIKES”VATRA”/

Federata Panshqiptare e Amerikës VATRA ka ndjekur me një interes të lartë cështjen e transferimit të ambasadës së Shteteve të Bashkuara në Jeruzalem dhe ka mbështetur qëndrimin e Presidentit Trump pa asnjë rezervë.

Federata Vatra, mbështetësit dhe simpatizantët e saj në SHBA dhe mbarë botën janë ndjerë tejet të zhgënjyer nga votimi kundër i Qeverisë së Republikës së Shqipërisë për Rezolutën e paraqitur në OKB.

Kjo votë kundër SHBA e Kryeministrit Edi Rama është jo vetëm mosmirënjohje për gjithë mbështetjen amerikane ndaj Shqipërisë përgjatë shtetformimit, e deri më tash, si edhe për rolin vendimtar në krijimin dhe procesin e njohjes së Republikës së Kosovës, por është edhe një mesazh tejet i rrezikshëm për vazhdimësinë e marrëdhënieve mes SHBA dhe Shqipërisë. Votimi i Qeverisë Shqiptare kundër SHBA është akti i dytë publik i Kryeministrit Edi Rama, pas deklarimit të tij të mëparshëm se zgjedhja e Trumpit President të SHBA “Zoti na ndjeftë, do të dëmtonte botën demokratike”.

Parë në zhvillimet më të fundit të diplomacisë amerikane, sa i përket anëtarësimit të Kosovës në OKB, vota e Qeverisë Shqiptare kundër Shteteve të Bashkuara konsiderohet nga Federata Vatra si një Akt Antikombëtar.

Duke përfituar nga ky moment krycial i diplomacisë botërore, VATRA shpreh publikisht mbështetjen më të thellë për Presidentin Trump dhe përpjekjet e tij për të rritur autoritetin e SHBA në botë. Gjithashtu, Federata Panshqiptare Vatra vlerëson jashtëzakonisht prezantimin tejet professional dhe mbrojtjen dinjitoze të kësaj nisme në OKB nga Ambasadorja Nikki R. Haley.

Së fundi, Federata Panshqiptare e Amerikës VATRA, si organizatë shekullore dhe më e madhja e diasporës shqiptare rikonfirmon qëndrimin e saj të palëkundur në mbështetje të Presidentit Trump dhe dënon me ashpërsi sjelljen antikombëtare të Kryeministrit të Shqipërisë Edi Rama.

Vatra i bën thirrje ndërgjegjes shqiptare kudo në botë që në këto momente delikate të rrisë dashurinë dhe besimin tek SHBA, si vendi më mik i kombit tonë.

Federata Panshqiptare e Amerikës Vatra po ndjek me vëmëndje situatën dhe do të paraqesë shqetësimin e saj në instancat më të lartë të Shteteve të Bashkuara të Amerikës.

President

Dritan Mishto

Pacolli-ambasadorit rus: Kosova është shtet i pavarur dhe Sovran

November 5, 2017 by dgreca

-Deklaratë për media e Ministrit të Jashtëm të Kosovës, Behgjet Pacolli, në lidhje me deklarimet e Ambasadorit rus në Beograd, Alexander Chepurin/

-Pacolli: Sipas Ligjeve dhe Rregullave Ndërkombëtare Kosova është shtet i pavarur dhe Sovran/

PRISHTINË, 5 Nëntor 2017-Gazeta DIELLI/ Ministria e Punëve të Jashtme të Kosovës dërgoi sot këtë deklaratë të ministrit Behgjet Pacolli në lidhje me deklarimet e ambasadorit rus në Beograd, Alexander Chepurin: “E lexova me vëmendje të shtuar deklaratën e Ambasadorit rus në Beograd, Alexander Chepurin, i cili sipas raportimeve të mediave, ndër të tjera, kishte deklaruar se ‘…sa i përket Kosovës, sipas të gjitha ligjeve dhe rregullave ndërkombëtare, Kosova mbetet pjesë e Serbisë…’. Është, vërtetë, për keqarjdhje, që një titullar kaq i lartë diplomatik bën deklarata të tilla, që nuk i kontribojnë aspak paqes, stabilitetit dhe ndërtimit të besimit dhe pajtimit në Ballkanin Perendimor.

Rusia, në vazhdimësi ka qenë pjesë e procesit të negociatave për zgjidhjen e statusit përfundimtarë të Kosovës.Mbase ka kaluar një kohë pak sa e gjatë –rreth 6 vjet dhe Ambasadorit rus nuk i është kujtuar, por, po e shfrytëzojë këtë rast për t’i ri-kujtuar se Organi Kryesor i Kombeve të Bashkuara, Gjykata Ndërkombëtare e Drejtësisë në Hagë, kishte vërtetuar me vendimin e saj se ‘shpallja e pavarësisë së Kosovës nuk e shkel as të Drejtën e Përgjithshme Ndërkombëtare, Rezolutën e Këshillit të Sigurimit të vitit 1999 apo Kornizën Kushtetuese…’.Në këtë proces edhe shteti, që ai përfaqëson deponoi kontributet e tij me shkrim dhe me gojë. Unë, thjeshtë nuk e di se për çfarë Ligjesh dhe Rregullash tjera ndërkombëtare flet përfaqësuesi diplomatik rus. Në mbështetje të asaj që u tha më lartë, nuk mund të jap vlerësim tjetër pos atij të vazhdimësisë së pretendimeve ruse për krjimin e lajmeve të rreme dhe krijim hutie tek opinioni lokal dhe ndërkombëtar”. /b.j/