Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Presidenti dekoron “Nderi i Kombit” xhudistët olimpikë të Kosovës D’Istria Krasniqi, Nora Gjakova dhe trajnerin Driton Kuka

by

9 Gusht 2021, Presidenti Ilir Meta vlerëson me Dekoratën “Nderi i Kombit” xhudistet kosovare D’Istria Krasniqi dhe Nora Gjakova si dhe trajnerin e tyre, Driton Kuka. Me anë të një ceremonie solemne, Presidenti i Republikës, Sh.T.Z. Ilir Meta vlerësoi sot me Dekoratën e lartë “Nderi i Kombit” dy xhudistet kampione nga Kosova, fituese të “Medaljes së Artë” në Lojërat Olimpike “Tokyo 2020”, D’Istria Krasniqi dhe Nora Gjakova, si dhe trajnerin e tyre, Driton (Toni) Kuka. Kreu i Shtetit çmoi sportisten D’Istria Krasniqi, me motivacionin: “Në shenjë vlerësimi për rezultatet e shkëlqyera si fituese e Medaljes së Artë në Lojërat Olimpike Verore të Tokios 2020, në sportin e Xhudos, duke treguar aftësi profesionale dhe talent të padiskutueshëm. Me mirënjohje për pasionin dhe përkushtimin e saj duke dëshmuar cilësi të rralla si sportiste e nivelit botëror, duke ngritur lart krenarinë kombëtare.”. si dhe sportisten Nora Gjakovën, me motivacion: “Në shenjë vlerësimi për rezultatet e shkëlqyera si fituese e Medaljes së Artë në Lojërat Olimpike Verore të Tokios 2020, në sportin e Xhudos. Me mirënjohje ndaj talentit dhe personalitetit të saj, që e shndërroi në një shembull frymëzimi për sportistet e reja, duke ngritur lart krenarinë kombëtare”. Po ashtu, Presidenti Meta vlerësoi me Dekoratën “Nderi i Kombit” trajnerin e tyre, Driton (Toni) Kuka, me motivacionin: “Në shenjë vlerësimi për talentin dhe personalitetin e gjithanshëm të treguar në sport, me arritjen e rezultateve të larta në sportin e Xhudos, duke fituar me sportistet e tij medaljet e arta në Lojërat Olimpike Verore të Rios 2016 dhe Lojërat Olimpike Verore të Tokios 2020. Me mirënjohje për punën dhe kontributin e tij në sportin e xhudos, që është kthyer në shembull frymëzimi për të rinjtë e të rejat, duke ngritur lart krenarinë kombëtare”. Në fjalën e Tij përshëndetëse drejtuar autoriteteve të larta të sportit të Kosovës dhe Shqipërisë, sportisteve kampione olimpike dhe familjarëve të tyre, kolegëve dhe të pranishmëve në ceremoninë e vlerësimeve, Presidenti Meta u shpreh: “Kur Majlinda Kelmendi mori ‘Medaljen e Artë’ në Rio, të gjithë shqiptarët u emocionuan. Ishte një ngjarje e jashtëzakonshme, sepse ishte hera e parë që Kosova prezantohej në një veprimtari të tillë dhe me shumë sukses, duke tërhequr mjaft vëmendje. Por tani, kur kemi dy të ‘arta’ nga Tokio, sigurisht që nuk kemi të bëjmë thjesht me një ngjarje dhe me një talent të jashtëzakonshëm, siç ishte dhe është Majlinda Kelmendi, por kemi të bëjmë me një projekt të jashtëzakonshëm, me një vazhdimësi dhe një strategji, me një punë tepër profesionale, por edhe shkencore. Dëshiroj të shpreh falënderimin më të përzemërt për D’Istria Krasniqin, për Nora Gjakovën dhe për Driton Kukën, tre personalitete dhe kampionë të jashtëzakonshëm, të cilët sot kam privilegjin t’i vleresoj me Dekoratën e Lartë “Nderi i Kombit”, për arritjet e tyre madhështore në sportin e xhudos, për këtë diplomaci të jashtëzakonshme sportive që ju keni bërë, ashtu sikurse ishte dhe aderimi dhe prezantimi me sukses i Kosovës në UEFA dhe në FIFA. Këto triumfe dhe ‘Medalje të Arta’, kanë dhënë një kontribut të shkëlqyer për imazhin e Kosovës, për të shtuar respektin ndaj saj në botë edhe nga ato vende që ende nuk e kanë njohur, sepse tashmë njohin fuqinë dhe ambicien e këtij vendi, që prezantohet denjësisht përmes këtyre kryeshqiponjave si Majlinda Klemendi, D’Istria Krasniqi dhe Nora Gjakova, si dhe gjithë ekipi i shkëlqyer i xhudos, së bashku me “arkitektin” Driton Kuka. Faleminderit për atë frymëzim që u keni dhënë të gjithë shqiptarëve, e sidomos të rinjve dhe të rejave, fëmijëve për të qenë plot ëndrra që këto ‘Medalje të Arta’ të shtohen nga shumë të tjera jo vetëm në xhudo, por edhe në sportet e tjera, jo vetëm nga Kosova, por edhe nga Shqipëria dhe shqiptarët kudo ku janë në botë!”

President.Al

KOSOVA NË FESTË PRET VAJZAT E ARTA OLIMPIKE

by

-Kosova është e artë, tha Kryeministri Albin Kurti në festën e pritjes së medalisteve të arta olimpike/

-Tre vajzat e arta të Kosovës kampione olimpike: E para Majlinda Kelmendi në Rio 2016, e dyta Distria Krasniqi dhe e  treta Nora Gjakova në Lojërat Olimpike në Tokio këtë verë/

-Në Lojërat Olimpike në Tokio, në  ceremonitë e dorëzimit të medaljeve Flamuri i Republikës së Kosovës nën tingujt  e Himnit Shtetëror u ngrit në majën më të lartë – për të artat historike në festën botërore të sportit/

Gazeta DIELLI nga korrespondenti në Kosovë Behlul JASHARI

PRISHTINË, 2 Gusht 2021/ Kosova e artë e tre vajzave kampione olimpike, e të parës Majlinda Kelmendi në Rio 2016, të dytës Distria Krasniqi e të tretës Nora Gjakova në Lojërat Olimpike në Tokio këtë verë, ka festë të madhe në pritjen e ekipit të xhudos që u kthye në Prishtinë në mbrëmjen e 2 Gushtit 2021. Ekipi olimpik i xhudos që përfaqësoi Kosovën në Lojërat Olimpike Tokio 2020, kampionet e reja olimpike të xhudos, Distria Krasniqi e Nora Gjakova, u pritën në Aeroportin e Prishtinës “Adem Jashari” nga Kryeministri i Republikës së Kosovës, Albin Kurti.

“Kemi shkuar për një medalje, por u kthyem me dy dhe kjo është diçka e jashtëzakonshme”, tha trajneri i ekipit olimpik të Kosovës, Driton Kuka në konferencën për media, pas aterimit. Kosova u përfaqësua me pesë xhudistë në Tokio dhe fitoi dy të arta, Distria Krasniqi dhe Nora Gjakova, dhe një vend të shtatë, Akil Gjakova. Dy medalistet e arta, falënderuan popullin e Kosovës, për mbështetjen e vazhdueshme e të cilit thanë se ia dedikojnë medaljet.​ “Shumë shtete, kanë shprehur interesim për bashkëpunim në sportin e xhudos pas suksesit që e patëm dhe kjo është një krenari e madhe. Këto medalje kanë hapur rrugë për donacione nga federatat ndërkombëtare, por edhe do të rrisin investimet në sportin e Kosovës”, tha Daulina Osmani, zëvendësministre e Ministrisë së Kulturës, Rinisë dhe Sportit. Më pas, ekipi olimpik u nis për në ceremoninë e pritjes të organizuar në sheshin “Zahir Pajaziti” në Prishtinë, të mbushur plot njerëz në festën e madhe. Në shesh, kryeministri Kurti në fjalën e tij vlerësoi angazhimin e tri kampioneve dhe trajnerit Kuka, falë punës dhe përkushtimit të të cilëve, xhudo është bërë sinonim i fitoreve. “Në Rio ishte hera e parë, morëm një medalje, në Tokio hera e dytë, morëm dy medalje, dhe tani le të fillojnë përgatitjet për Paris 2024 për tri e më shumë medalje”, tha kryeministri i Kosovës. Gazeta DIELLI e Federatës Pan-Shqiptare të Amerikës VATRA ka raportuar këtë verë se, Kosova arriti sukses historik, të majave të sportit botëror, në Lojërat Olimpike në Tokio – në 26 Korrik 2021 me xhudisten Nora Gjakova fitoi medaljen e dytë të artë, pas të parës që në ditën e parë të garave në 24 Korrik 2021 me Distria Krasniqin. Në Lojërat Olimpike në Tokio, në  ceremonitë e dorëzimit të medaljeve Flamuri i Republikës së Kosovës nën tingujt  e Himnit Shtetëror u ngrit në majën më të lartë – për të artat historike në festën botërore të sportit të kampioneve olimpike që u shpallën zyrtarisht  Distria Krasniqi e Nora Gjakova.

KRENARIA E KOMBIT – DISTRIA KRASNIQI

by

Xhelal Zejneli

Distria Krasniqi, (Pejë, Kosovë, 1995). Emri yt, Distria, na përkujton publicisten dhe shkrimtaren rumune me prejardhje shqiptare, Elena Gjikën, të njohur në qarqet kulturore evropiane si Dora d’Istrian (1828-
1888). Edhe emri i këtij personaliteti të shquar të periudhës së Rilindjes Kombëtare, do të na përkujtojë emrin tënd. Sot, në orët e para të së shtunës, pas betejash titanike me xhudistet më të shquara të planetit, u ngjite në piedestalin e arenës sportive të vendit ku lind dielli. Në ato çaste, për Ty
dhe për kombin shkëlqyen rreze të arta. Sakaq, ushtuan në qiell fjalët e moderatorit: “Distria Krasniqi – Kosovë”. Miliarda njerëz të rruzullit, panë në sytë e tu lotët e ngadhënjimit dhe të ngazëllimit. Në ato çaste kur Ti krijoje historinë, në zemër pate shqiptarinë, flamurin e Gjergj Kastriotit dhe himnin Arbërisë. Për Ty, për Kosovën dhe për kombin shqiptar, shkruajnë sot të gjitha mediumet dhe agjencitë e lajmeve, më prestigjioze të botës.
Ngadhënjeve, ngase je bijë e ilirëve të stërlashtë, e racës ariane. Në arenat e sportit botëror, të frymëzojnë luftërat dhe fitoret lavdiplote të Gjergjit dhe zjarri i atdhedashurisë – i rilindësve. Ia bëre me dije botës mbarë se je mbesë e Nënë Terezës. U stolise me medalje në kampionatin botëror dhe në atë evropian, në konkurrencën e juniorëve. U bëre edhe kampione e botës për femra, të moshës në 21 vjeç. Në kualifikimet olimpike more gjashtë medalje. More bronz në Drand Slam të Parisit (2017). Po atë vit more
bronz edhe në Open Europian në Sofje. Fitove medalje të artë në manifestimin sportiv Mjeshtrit e artë të xhudos 2021, të mbajtur në Doha të Katarit. Në prillin e thyer, u shpalle në Lisbonë, kampione e Evropës. 
Erdhe në finale duke eliminuar me radhë: brazilianen Chibana, kinezen nga Taipei, Chao Lin, mongolen Munkhbat. Në fund, me një “Wasabi-Ari” kalove kryelartë nëpër portën triumfale, duke mposhtur në arenën “Nippon Budikan” ish-kampionen e botës, japonezen Funa Tonaki. Fitorja jote mbresëlënëse na e përkujton atë të heroinës Majlinda Kelmendit në vitin
2016 në Rio de Janeiro. Je nder i kombit, i shtatë milionë shqiptarëve në gadishull, i arbëreshëve në Sicili dhe në Kalabri, i diasporës shqiptare në Evropë dhe në ShBA. Para madhështisë Tënde, u gjunjëzuan edhe armiqtë tanë historikë. Ari i së shtunës së këtij muaji të korrjeve, i fituar në botën e agimit të mëngjesit, është stoli dhe dëshmi heroizmi në monumentet e përjetësisë dhe të pavdekësisë të burrave të kombit – Adem Demaçit, Ibrahin Rugovës, Adem Jasharit – të luftëtarëve të lirisë dhe të demokracisë.

DISTRIA KRASNIQI, ARI I KOSOVËS NË LOJËRAT OLIMPIKE

by

Nga Behlul Jashari

Xhudistja Distria Krasniqi lan Kosovën në ar. Ajo rrëmbeu me meritë Medaljen e Artë në Lojërat Olimpike Tokio 2020 teksa mundi në finale japonezen, Funa Tonaki. Xhudistja Krasniqi para se të shkonte në finale mundi Urantsetseg Munkhat të Mongolisë. Kosova u vesh në ar që në ditën e parë të garave në Lojërat Olimpike Tokio 2020. Kjo medalja e dytë olimpike, pas të artës së Majlinda Kelmendit në Rio 2016. E arta e Kosovës Distria Krasniqi, pas fitores së madhe, deklaroi: “Ndihem e përmbushur. Synoj pjesëmarrjen edhe në dy olimpiada”.

Presidentja e Republikës së Kosovës, Vjosa Osmani u shpreh me këtë rast: “Distria i solli Republikës sonë medaljen e dytë të artë olimpike. Nder e krenari e lumturi e papërshkrueshme. Ajo e ngriti sot flamurin e shtetit të saj në piedestalin më të lartë. Me suksesin e saj olimpik ajo nderoi një komb të tërë, si dhe e gëzoi fort çdo zemër në Kosovë por edhe shumë të tjera anë e mbanë botës. Distria, e para e botës, dëshmoi sot sërish se është e pamposhtur dhe se është krenaria e vendit tonë. Ajo dëshmoi që talenti dhe puna triumfojnë gjithnjë. Sot, nëpërmjet Distrias, Kosova shkëlqeu para tërë botës. Sot dhe përherë, Kosova do të krenohet me ty” shkruan në mesazhin e saj Presidentja Osmani. Kyeministri i Republikës së Kosovës Albin Kurti pas suksesit të xhudistes Krasniqi u shpreh: “Distria e artë. Në garën e parë në Lojërat Olimpike, Kosova fiton medaljen e artë. Faleminderit që po bëni krenar secilin prej nesh. Me zemër jam me ju në Tokio” përfundoi kryeministri Kurti. Distria Krasniqi nuk ishte vetëm në luftën për medaljen e saj të parë olimpike. Krahas Presidentes së shtetit, Vjosa Osmani, të pranishëm në sallë në përkrahje të xhudistes shqiptare nga Kosova ishin edhe drejtuesit e Komitetit Olimpik të Kosovës, me në krye presidentin Ismet Krasniqi dhe sekretarin e përgjithshëm, Shasivar Haxhijaj, nënpresidentët Gazmend Maxhuni e Milaim Kelmendi, anëtarin e BE, Avni Nuha, përfaqësuesit nga Ambasada e Kosovës në Japoni, si dhe ekipi i xhudos me në krye kryetarin, Agron Kuka.

XHUDISTJA E KOSOVËS E ARTË NË BUDAPEST, NJË PAMJE E BUKUR…

by

XHUDISTJA E KOSOVËS E ARTË NË BUDAPEST, NJË PAMJE E BUKUR…

Xhudistja e Kosovës nga Peja ka shkëlqyer dhe ka fituar Medalje të artë në “Grand Slamin” të Hungarisë, i cili filloi dje. Raportohet se, ajo ka dominuar në kategorinë 48 kilogramë, në garën që po mbahet në Budapest.

Rrethin e parë, Distria e kaloi pa luftë, ndërsa në atë të dytë ishte më e mirë se hungarezja Eva Csernoviczki.

Në rrethin e tretë, përkatësisht në çerekfinale, Krasniqi e mposhti francezen Shirine Boukli.

E në gjysmëfinale, Distria  e mundi izraeliten Shira Rishony për ta siguruar kështu medaljen e argjendtë.

Ajo ishte në nivel edhe në finale, ku përballë e kishte argjentinasen Paula Pareto, njëherësh kampione olimpike, për ta fituar kështu të artën.

Kosova në Hungari përfaqësohet me 7 garues. Në këtë garë prestigjioze po marrin pjesë afro 500 garues nga rreth 70 shtete të botës.

Trajneri i Kosovës në xhudo, Driton Kuka e ka vlerësuar lart paraqitjen e Distria Krasniqit në finale të turneut Grand Slam që të premten nisi në Budapest të Hungarisë. Krasniqi fitoi medaljen e artë në kategorinë deri 48 kilogramë, duke u konfirmuar si pretendente e madhe për medalje evropiane e po ashtu edhe për medalje olimpike.

“Finalja e Distria Krasniqit ishte perfekte. Me siguri të lartë e ka mposhtur kampionen olimpike që sot asnjëherë nuk e ka rrezikuar seriozisht”, citoht Kuka.

Presidenti i Republikës së Kosovës, Hashim Thaçi, sot në mëngjes ka uruar duke postuar foton nga ndarja e medaljeve ku më së larti është ngritur Flamuri i Kosovës – shtetit fitues të Medaljes së Artë.“Mirëmëngjesi me këtë pamje të bukur nga fitorja e mbrëmshme e xhudistes së Kosovës, Distria Krasniqi, e cila fitoi Medaljen e Artë🥇në “Grand Prix” të Hungarisë”, ka shkruar Presidenti  Thaçi.