Drejtesia – Page 2 – Dielli

Drejtësia, ambasadori Lu: Rama e Basha të takohen sërish

July 15, 2016 by dgreca

Ambasadori amerikan: Propozimi i opozitës i papranueshëm nga Shtetet e Bashkuara. Tregon se Basha ka thyer zotimin e tij ndaj Ambasadores Nuland. Po nuk u arrit kompromis deputetët të votojnë reformën/

Në Shqipëri ambasadori amerikan Donald Lu ftoi sot kryeministrin Edi Rama dhe kreun e opozitës Lulzim Basha të takohen sërish për të gjetur një zgjidhje për Reformën në Drejtësi. Ngërçi tanimë lidhet me rolin e ekspertëve ndërkombëtarë në procesin e verifikimit. Opozita ju përgjigj me një kundër-propozim ofertës së ndihmës sekretares amerikane Victoria Nuland, por për ambasadorin amerikan “është e papranueshme”. Ai tha se ka ende kohë për kompromis duke përsëritur se edhe në paumndësi të këtij kompromisi parlamenti duhet ta miratojë reformën.
Përpara se ambasadori amerikan të dilte pasdite për deklaratën e tij, kryeministri Edi Rama dhe kreu i opozitës Lulzim Basha shëmbyen replika në distancë me njëri tjetrin. Ndërsa e cilësoi si alibi të opozitës, kundërshtimin e saj për rolin që duhet të kenë ekspertët ndërkombëtarë në procesin e verifikimit të gjyqtarëve dhe prokurorëve, kryeministri, siç dhe e kishte paralajmëruar dje përmes Facebook-ut deklaroi se: “Ne jemi gati të votojmë më 21 korrik çdo gjë që PD do të fusë në draftin e Reformës në Drejtësi me kushtin qëtë pranohet nga SHBA e BE se është në përputhje të plotë me standartet e kërkuara nga Shqipëria për reformimin e Drejtësisë në Shqipëri në funksion të integrimit europian. Ka më qartë dhe më shumë konsensus se kaq?”

Duke i mëshuar disa herë fjalës konsensus, kryeministri u duk se po i jepte një përgjigje dhe aleatit të vet, LSI e cila në mënyrë të qartë ngjan se po e kushtëzon votën pro me nevojën e konsensusit me opozitën, duke ritheksuar ashtu si dhe ajo se Reforma duhet të jetë në përputhje me Komisionin e Venecias. Zoti Rama gjithashtu deklaroi se nuk pranonte më vazhdimin e procesit të negocimit “për t’i dhënë mundësi, Partisë demokratike që të gënjejë shqiparët se është qeveria që nuk e do kompromisin”.

Zoti Basha u përgjigj përmes Facebook-ut duke shkruar se “Rama nuk tërhiqet nga bllokimi por gjen pretekste për t’i ikur përgjegjësisë dhe për t’ju fshehur Venecias. Nëse vërtetë e do reformën në drejtësi, zgjidhjen e ka gati, e ka në tryezë”.

Deklaratave të dy udhëheqësve shqiptarë, ambasadori amerikan ju përgjigj: “Sot, zoti Basha tha se opozita kishte vendosur mbi tavolinë një propozim të vlefshëm. I thashë Z. Basha se propozimi i tij ishte i papranueshëm nga Shtetet e Bashkuara dhe se tregon që ka thyer zotimin e tij ditën e dielë ndaj Ambasadores Nuland. Gjithashtu sot, zoti Rama njoftoi se ai u ka dhënë fund negociatave me opozitën dhe se do të pranonte çdo kërkesë të opozitës që miratohet nga BE dhe SHBA. Unë e refuzoj edhe këtë rol. Përgjegjësia për zgjidhjen e problemeve politike të Shqipërisë është e udhëheqësve shqiptarë”.

Ambasadori Lu tha se i sfidonte të dy drejtuesit politik duke propozuar që ata të takoheshin sërish bashkë të hënën me premtimin se nuk do të dilnin nga takimi pa një zgjidhje: “Le të shohim se kush është me të vërtetë në favor të mbështetjes së një kompromisi. Kjo do ta zgjidhë problemin në njërën prej dy mënyrave. Ata ose do të gjejnë një zgjidhje që mund të mbështetet si nga qeveria, ashtu edhe nga opozita. Ose, mund të mbyllen brenda asaj salle takimi së bashku, përjetë”.

Ambasadori amerikan kujtoi pyetjen që ai kishte ngritur muaj më parë lidhur me atë se kush i trembej reformës: Krerët e krimit të organizuar? Gjyqtarët e korruptuar? Apo politikanët kriminelë? Për ambasadorin Lu “sot, përgjigja është e qartë. Të gjithë ata kanë frikë dhe të gjithë po e luftojnë”.

Dhe për këtë arsye ai përsëriti thirrjen drejtuar deputetëve shqiptarë: “Të enjten, deputetët e kuvendit kanë mundësinë të tregojnë qëndresë për popullin e nderuar të Shqipërisë, që po e kërkon këtë reformë. Ka ende kohë që Z. Basha dhe Z. Rama të gjejnë një kompromis. Nëse ata nuk munden, Kuvendi duhet ta miratojë këtë Reformë”.

Për ambasadorin amerikan një ditë kjo Reformë do të miratohet, dhe se “e vetmja pyetje është nëse ky parlament dhe udhëheqësit e partive politike, do të mbahen mend për suksesin apo do të fajësohen për dështimin e saj”, nënvizoi ambasadori Lu.

DEKLARATA

Të dashur miq shqiptarë!

Mendoj se ka një gjë për të cilën biem dakord. Të gjithë jemi të acaruar dhe të lodhur me udhëheqësit politikë të Shqipërisë.

Sot, Z. Basha tha se opozita kishte vendosur mbi tavolinë një propozim të vlefshëm. I thashë Z. Basha se propozimi i tij ishte i papranueshëm nga Shtetet e Bashkuara dhe se tregon që ka thyer zotimin e tij ditën e dielë ndaj Ambasadores Nuland.

Gjithashtu sot, Z. Rama njoftoi se ai u ka dhënë fund negociatave me opozitën dhe se do të pranonte çdo kërkesë të opozitës që miratohet nga BE dhe SHBA. Unë e refuzoj edhe këtë rol. Përgjegjësia për zgjidhjen e problemeve politike të Shqipërisë është e udhëheqësve shqiptarë.

Propozoj një zgjidhje të thjeshtë. E sfidoj kryeministrin dhe kreun e opozitës që të takohen ballë për ballë të hënën dhe të premtojnë publikisht se nuk do të largohen nga salla e takimit deri sa të kenë një zgjidhje për çështjen e fundit të kësaj reforme. Le të shohim se kush është me të vërtetë në favor të mbështetjes së një kompromisi.

Kjo do ta zgjidhë problemin në njërën prej dy mënyrave. Ata ose do të gjejnë një zgjidhje që mund të mbështetet si nga qeveria, ashtu edhe nga opozita. Ose, mund të mbyllen brenda asaj salle takimi së bashku, përjetë. Disa muaj më parë kam pyeta se kush ka më shumë frikë nga kjo reformë? Krerët e krimit të organizuar? Gjyqtarët e korruptuar? Apo politikanët kriminelë? Sot, përgjigja është e qartë. Të gjithë ata kanë frikë dhe të gjithë po e luftojnë.

Të enjten, deputetët e kuvendit kanë mundësinë të tregojnë qëndresë për popullin e nderuar të Shqipërisë, që po e kërkon këtë reformë. Ka ende kohë që Z. Basha dhe Z. Rama të gjejnë një kompromis. Nëse ata nuk munden, Kuvendi duhet ta miratojë këtë reformë.

Harku i historisë është i gjatë, por anon nga drejtësia. Reforma në drejtësi do të miratohet. E vetmja pyetje është nëse ky kuvend dhe udhëheqësit e partive politike, do të mbahen mend për suksesin apo do të fajësohen për dështimin e saj”.

Ambasadori Amerikan dhe Reforma në Drejtësinë Shqiptare

November 13, 2015 by dgreca

Nëse ka njeri që mund ta bëjë Reformën në Drejtësi, përveç faktorit të specialistëve, është ambasadori LU. Natyrisht ambasadori nuk do të bëjë nenet apo ndryshimet, por ai mban të karikuar faktorin politik që të mos ndalojë apo hezitoj. Partitë politike përdridhen e spërdridhen dhe nuk e duan në thelb ndryshimin e sistemit të drejtësisë, por sapo shikojnë ambasadorin Lu shkojnë me vrap tek komisioni përkatës për reformën. E kemi thënë se Lu nuk është ambasador si gjithë paraardhësit e tij. Ai është përtej ambasadorit, është edhe lider i fjalës, debatit, argumentit dhe i vendosmërisë.Ambasadori amerikan në Tiranë u tregua edhe njëherë tjetër i drejpërdrejtë në qortimet dhe akuzat për sistemin e drejtësisë. Në fjalën e mbajtur në takimin me Komisionin e Posaçëm për këtë reformë, Donald Lu tha se SHBA mbështesin plotësisht ndryshimet kushtetuese të propozuara nga paneli i ekspertëve. “Unë ju siguroj se SHBA mbështet plotësisht propozimet aktuale për ndryshimet kushtetuese. Ne kemi marrë pjesë në shkrimin dhe diskutimet e ekspertëve për secilin prej këtyre ndryshimeve. Kjo është një reformë rrënjësore që për herë të parë do të ndërmarrë hapa konkretë për të larguar gjykatësit dhe prokurorët e korruptuar nga sistemi i drejtësisë”, deklaroi Lu. Ambasadori u tregua edhe njëherë tjetër i drejtpërdrejtë ndaj gjyqësorit, kur tha se gjykatës të korruptuar dhe të paaftë mbushin xhepat e tyre me paratë e shqiptarëve dhe kërkoi prej klasës politike t’i japë fund gjuhës së konfliktit dhe të punojë bashkërisht për këtë reformë. “Duhet të ketë dialog të hapur dhe të sinqertë nëse këto propozime janë reformat e duhura për të drejtuar problemet serioze të vendit. Partitë duhet të angazhohen dhe t’i japin fund sulmeve politike. Nxis që të dëgjohen me vëmendje diskutimet dhe këshillimet për këtë reformë”, shtoi Lu. Lidhur me shqetësimet e ngritura nga pjesëtarë të gjyqësorit se reforma mund të cënojë pavarësinë e këtij pushteti, Donald Lu kishte një përgjigjie krejt origjinale. “Asnjë shqiptar nuk beson sot se sistemi i drejtësisë është i pavarur. Nuk është i pavarur nga ryshfeti, nuk është i pavarur nga telefonatat, ku persona me pushtet i telefonojnë drejtpërdrejtë personat e drejtësisë, nuk është i pavarur prej presionit të krimit të organizuar. Kjo reformë do t’i japë mundësinë e vërtetë për të bërë sistemin e drejtësisë për herë të parë të pavarur”, mbylli fjalën e tij, Donald Lu.(KJ)

Eksperimentet ndërkombëtare të drejtësisë në Kosovë

June 3, 2015 by dgreca

Praktika gjyqësore e shqiptuar për të akuzuarin Sami Lushtaku nuk mund të jetë analoge bazuar me hetimet e zhvilluara dhe dëshmitë e ofruara/
Shkruan: XHAVIT ÇITAKU/
Procesi gjyqësor në shkallën e parë për grupin e Drenicës përfundoi. Përfundoj “ pamëshirshëm “ dhe me fakte jo të bindshme që i kishte në shqyrtim trupi gjykues i EULEX-it. Pra, ndaj tyre u shqiptuan 65 vjet burg. Ndaj, edhe shtrohet pyetja se a e” mirituan” këtë dënim kaq të rëndë këta luftëtar të lirisë. Ka edhe shumëçka për të thënë e për të dyshuar se mos vallë është ky një proces i montuar politik i porositur nga “kuzhinat” e Beogradit që shpifin e hartojnë skenar të rrezikshëm kundër shqiptarëve e sidomos ndaj ushtarëve e eprorëve të UÇK-së. I gjithë opinioni jo vetëm i brendshëm, por edhe ai ndërkombëtar e di se ende qëndrojnë akuzat e ngritura nga gjykatat serbe për udhëheqësit e ushtrisë çlirimtare, akuza këto që janë shpërndar në të gjitha institucionet e drejtësisë ndërkombëtare dhe të organeve tjera ndjekëse.
“ Trillimi” rreth praktikës gjyqësore
Në sistemin e drejtësisë, përkatësisht në fushën e gjyqësisë janë të parapara në rastet e rralla edhe praktika gjyqësore, ashtu siç po arsyetohet EULEX-i për rastin e Sami Lushtakut, kryetar aktual i komunës së Skenderajt. Mirëpo, për t’u bërë kjo gjë rasti duhet të hetohet e argumentohet me fakte përmbajtësore në shumë dimensione që ofron drejtësia “ moderne”, të cilat me në fund do të mund t’ua mbushin mendjen jo vetëm gjyqtarit por edhe opinionit të gjerë. Do të thotë se rasti konkret është hetuar aq shumë sa që janë hequr të gjitha dilemat se vrasja është kryer nga i akuzuari. Edhe EULEX-i kishte angazhuar hetues të shumtë dhe asnjë prej tyre nuk ka mundur të nxjerr e të gjejë fakte nga banorët e atyre tri fshatrave të Drenicës, në mesin e të cilave pretendohet se është kryer vepra. Posaçërisht hetuesit nuk kanë mundur të argumentojnë se në këto fshatra është vrarë bashkëfshatari i tyre në vendin e supozuar nga EULEX-i. Së këndejmi, një praktikë gjyqësore e marrë parasysh nga trupi gjykues i EULEX-it ndaj Sami Lushtakut, komandant i Zonës së Drenicës në kohën e luftës çlirimtare, nuk ka mundur të aplikohet sepse nuk është analog karshi gjithë procedurës hetimore që është zhvilluar dhe u paraqitën në seancën gjyqësore. Pra, nuk mund të aplikohet një praktikë gjyqësore e bazuar vetëm në dëshmitë e një dëshmitari, i cili do të mund t’i hynte kësaj aventure kundër këtij eprori për çështje hakmarrëse, inati apo për çështje të tjera personale. Do të duhej të dëshmonin edhe përcjellësit e Sami Lushtakut, sepse si një komandant që ishte ai në asnjë rrethanë nuk ka mundur të ishte i vetëm gjatë rrugëtimit të tij dhe drejtimit të operacioneve luftarake në terren. Kjo gjë me sa e kam përcjell me vëmendje këtë proces gjyqësor nuk është bërë.
Përse më shumë po ndiçën ushtarët shqiptar se sa kriminelet serb
Është numër i madh i të vrarëve shqiptar gjatë luftës së pabarabartë të zhvilluar në Kosovë. Janë vrarë rreth 15 mijë shqiptarë. Të zhdukur edhe rreth dy mijë të tjerë. Edhe më keq: u përdhunuan rreth 20 mijë vajza e gra, shumë prej tyre u vranë e u masakruan në mënyrën më mizore. U dogjën e u shkatërruan me themel mbi 180 mijë shtëpi. U plagosen, u torturuan e ndoqën nga trojet e tyre mbi një milion shqiptarë. Për të gjitha këto krime të luftës dihet me emër e mbiemër se kush i ka krye e kush i ka urdhëruar të kryhen. Këtë gjë e dëshmojnë edhe pjesëmarrësit serb në ato krime, në atë tragjedi shqiptare, në atë skenar të kobshëm për shqiptarët. Edhe këta, pra, e drejtojnë gishtin kah ata që kanë kryer krime, i kanë paraqitur në prokurori të ndryshme serbe, por edhe i kanë njoftuar edhe organet e drejtësisë evropiane me emër e mbiemër se kush janë ata gjakpirës që kryen aq shumë krime në Kosovë. Mirëpo, për çudi askush nuk ndërmerr asgjë. Këto dëshmi nuk i merr parasysh askush. Organet gjyqësore e hetimore serbe jo se jo, por as ato evropiane e ndërkombëtare nuk po bëjnë asgjë, po e injorojnë këtë gjë. Më shumë po iu intereson, disave qarqeve, që para bankës së të akuzuarëve të dalin luftëtarët e lirisë së Kosovës se sa ata që kryen krime të rënda lufte në kosovë. Pra, kriminelet serb shëtisin të lirë, bile mbajnë edhe poste të rëndësishme në Serbi siç është rasti me eprorin e lartë të ushtrisë serbe Dikoviq, ndërsa ushtarët e UÇK-së tash po edhe në të ardhmen do të përballen me akuza të pa argumentuara sa e si i kërkon një sistem i mirëfillt i drejtësisë.
Nisur nga një pabarazi e tejdukshme që po ndodh pas luftës së zhvilluar në Kosovë në aspektin e ndjekjes së atyre që kryen krime, është e kuptueshme që edhe reagimi i qytetarëve është i arsyeshëm të cilët pyesin: si është e mundur që për luftëtarët e lirisë të formohen kaq shumë gjyqe paralele, ndërsa për kriminelet serb iu është besuar që me ta merren organet e atij shteti që ishte nxitësi i luftës dhe ushtria si dhe të gjitha grupet e ndryshme kriminale kryen gjenocid mbi popullatën shqiptare dhe popujt e tjerë në ish-Jugosllavi. Këto eksperimente të një sistemi të këtillë të drejtësisë mund të ndodhin vetëm në Kosovë e akund tjetër. Në emër të asaj se ju kemi ndihmuar për t’u çliruar nga okupuesi serb, kjo nuk do të duhej të ndodh. Tehu i aktivitetit do të duhet të orientohet shumë më tepër kah kapja e dënimi i atyre që vranë e masakruan qindra mijëra qytetarë të pafajshëm, që përdhunuan mijëra vajza e gra, që shkatërruan e pasurinë e qytetarëve, që shumë vështirë e patën të mëkëmben. Nuk pretendoj t’i mbroj ata që eventualisht kanë kryer ndonjë vepër të ndëshkueshme, por siç thotë një fjalë popullore “ katundi që shihet kallauz nuk do”.

SA E LIRE ESHTE DREJTESIA NE SHQIPERI?

April 11, 2015 by dgreca

PERSE GJYKATA E DHA VENDIMIN PASI PD ZYRTARIZOI KANDIDATUREN E MZIUT DHE PARALAJMERIMET E TAULANT BALLES NE PARLAMENT?/
Kryetari i Partisë Demorkatike Lulzim Basha, nje dite para se te shpallte vendimin gjykata,pat vendosur ti jepte mundësinë Xhelal Mziut të kërkojë një mandat të tretë për drejtimin e Bashkisë së Kamzës.
Por në kohën kur ai kishte marrë miratimin e demokratëve, emri i Mziut nuk qëndroi jashtë debatit në seancën parlmentare mes mazhorancës dhe opozitës.
Deputeti socialist Taulant Balla, akuzoi kryedemokratin Lulzim Basha, se ka ndërhyrë tek gjyqtari i çështjes së kryebashkiakut të Kamzës, duke kërkuar pafajësinë e tij.
I menjehershëm ka qenë reagimi i kreut të grupit parlamentar demokrat Edi Paloka, duke e cilësuar deputetin Balla si shpifës. Mirepo paralajmerimi I Balles duket se ishte urdher per Gjykaten, e cila shpejtoi qe te shpallte fajtor Mziun duke e denuar me 2 vjet burg kryebashkiakun. Ec e thuaj se gjykata eshet e lire nga politika!Po sjellim nga media e Tiranes kronikat rreth ketij procesi dhe reagimet.

VENDIMI: Gjykata 2 vjet burg kryebashkiakut të Kamzës, Xhelal Mziu

Gjykata e Tiranës ka dënuar me dy vite burg kryetarin e Bashkisë Kamëz Xhelal Mziu, i zyrtarizuar vetëm një ditë më parë për një mandat të tretë nën siglën e PD.
Sipas Gjykatësit Besnik Hoxha, Mziu në ushtrimin e detyrës së tij ka shpërdoruar detyrën dhe ka shkelur barazinë në tendera, duke dëmtuar buxhetin e Bashkisë Kamëz dhe interesat e 2 firmave private. Po kështu Kryebashkiakut i hiqen të gjitha funksionet publike për një periudhë 2 vjeçare
Genc Gjokutaj, avokati mbrojtësi Xhelal Mziut, tha pas vendimit se do ti drejtohet Apelit.
“Vendimi ishte i paligjshëm dhe në lajthitje. Vendimi është marrë jashtë kësaj gjykate. Ne këtë vendim do ta apelojmë, ai nuk është i formës së prerë, dhe nuk e pengon klientin të kandidojë për Bashkinë e Kamzës. Ne i bëjmë thirrje të qëndrojë larg këtij procesi dhe të mos marrë pjesë në vendim.”
Rreth një orë para vendimit Xhelal Mziu ishte i qetë teksa inpektoi nisjen e punimeve të rrugës Kozarë. Mziu u shpreh se do të këtë votat e majtëve dhe të djathtëve për të fituar zgjedhjet për Bashkinë e Kamzës.
Po kështu Gjykata e Tiranës dënoi me nga 6 muaj burg Drejtorin e Tatimeve në Bashkinë e Kamzës Bujar Loshi dhe juristin e bashkisë Atlis Hotin, që të dy të akuzuar për “shpërdorim detyre”.

Xhela Mziu: Vendimi ishte paracaktuar në zyrat e Ramës

Pas vendimit të Gjykatës që e shpalli fajtor Xhelal Mziun dhe e dënoi me 2 vjet burg, ka reaguar kreu i Bashkisë Kamëz, i cili e ka konsideruar si një vendim politik të paracaktuar nga zyrat e Ramës. Ai tha se vendimi u dha në kushtet e një persioni të paprecedent.
Xhelal Mziu u shpreh se vendimi për dënimin e tij ishte vetëm sepse Rama kërkon të marrë bashkinë e Kamzës.
“Vendimi ishte politik, i paracaktuar nga zyrat e Ramës, i cili përdor cdo mjet për të arritur synimet e tij. Synimi i Ramës është që të marrë bashkinë e Kamzës. Por marrja e Kamëzës me vota nga Rama është e pamundur dhe ka future në veprim çdo instrument”, është shprehur Xhelal Mziu.
Reagimi i plotë i Xhelal Mziut
Përmes këtij komunikimi dua të informoj opinionin publik dhe qytetarët e Kamzës, në lidhje me atë që është një skemë gjakftohtë, e mirëmenduar e Edi Ramës për të përdorur çdo mjet në arritjen e synimeve të tij.
Synimi i tij është marrja e Kamzës, dhe meqenëse me votë e ka pasur dhe e ka të pamundur, atëherë Edi Rama ka futur në veprim çdo instrument, edhe në shkelje të ligjit, për të shmangur garën e rivalitetin.
Vendimi i sotëm është marrë në kushtet e një presioni të paprecedentë politik. Vetëm një ditë më parë, përfundimet e këtij vendimi u lexuan nga numri dy i grupit parlamentar të Partisë Socialiste në Parlament. Shpifës Balla haptazi kërkoi nga Kuvendi që gjykata sot të më dënonte me çdo kusht.
Ky vendim, një ditë pas pretencës së bërë nga mazhoranca në seancën plenare, u komentua sot në mënyrë festive nga Edi Rama, nga selia e Partisë Socialiste.
Rama foli me një kënaqësi perverse si për të thënë që e hodha hapin e parë drejt Kamzës.
I ndikuar politikisht, i diktuar ka qenë procesi ndaj meje që ditën e parë.
Ka nisur me urdhër politik përndjekja ime dhe përndjekje ka qenë në çdo moment, pasi për asnjë çast nuk ka patur proces të rregullt ligjor.
Akuza është qesharake, dhe ajo është një dosje që studentët e vitit të parë të drejtësisë do ta hidhnin menjëherë në kosh pasi nuk ka asnjë argument ligjor.
Avokatët e mi do ta sqarojnë opinionin publik me detaje të hollësishme, se si është ngritur nga hiçi, nga zeroja, një akuzë që është thjesht një shërbim politik për Edi Ramën.
Ia vlen të theksohen 3 momente që e nxjerrin zbuluar dhe farsë këtë proces.
1-Nuk ka asnjë dëm ekonomik, nuk është shpenzuar asnjë qindarkë publike, pra nuk ka asnjë pasojë.
2-Kompania që ka bërë kallëzimin penal nuk ka paraqitur asnjë nga dokumentat e kërkuar nga ligji për lidhje kontrate.
3-Përsa i përket aplikimit të taksave lokale, vetë prokuroria ka vendosur pushimin e çështjes penale ndaj meje për të njëjtën akuzë për taksën e vitit 2014. Çfarë do të thotë se vetë Prokuroria e ka rrëzuar këtë akuzë.
Eshtë politik ky proces ndaj meje, dhe mund të vëreni se si vendimi merret pikërisht përpara nisjes së fushatës, dhe ndërkohë që unë jam shpallur zyrtarisht kandidat i Partisë Demokratike për Bashkinë e re të Kamzës.
Por dua të siguroj qytetarët e banorët e Kamzës dhe Paskuqanit, se asgjë nuk me bën të tërhiqem nga angazhimi që kam për t’u shërbyer atyre, për të përfaqësuar dhe mbrojtur interesat e tyre.
Kushtetuta e Shqipërisë i njeh pafajësinë çdo qytetari i cili nuk është gjetur fajtor me vendim të formës së prerë, dhe i tillë është vetëm vendimi i Gjykatës së Apelit.
Dua të shpreh publikisht gatishmërinë time të plotë për të zbatuar çdo vendim gjykate, duke mbajtur të gjitha përgjegjësitë e mia ligjore, politike dhe morale, dhe për ta ndjekur e apeluar çështjen deri në fund. Kam besim tek drejtësia dhe ligji, edhe pse asnjëherë më parë gjyqtarët nuk kanë qenë nën një presion të tillë të hapur politik nga kryeministri i vendit.
Kontrata që kam me banorët e zonës time është e pathyeshme, e pamundur të cënohet nga Edi Rama dhe urdhërat e tij politikë.

PERFUNDIMI: SA E LIRE ESHTE DREJTESIA NE SHQIPERI?

Jo vetem ky rast, por edhe shume te tjere tregojne se ngerci i Demokracise ne Shqiperi eshet binomi-Politike-Drejtesi. Perderisa politika nuk i heq tentakulat e saj nga Drejtesia dhe perderisa Drejtesia nuk clirohet nga politika, tranzicioni, do te jete i zgjatur dhe qytetaret do te vuajne pasojat.