Elida Buçpapaj – Page 19 – Dielli

Avdullah Hoti ule kokën dhe rri sus !

June 20, 2017 by dgreca

Nga Elida Buçpapaj /

Një deklaratë infantile ma tepër se skandaloze nga Mali i Zi ajo e kandidatit të LDK-së për kryeministër se grupacioni i tij politik nuk do të bashkëpunojnë as me PAN dhe as VV sepse këto formacione politike rrëzuan qeverinë e Isa Mustafës, mentorit të tij që edhe e emeroi ministër financash, edhe kandidat për kryetar të qeverisë.

Po të shohësh rezultatet paraprake të zgjedhjeve të jashtëzakonshme të 11 qershorit ku po të hiqen edhe fletëvotimet e pavlefshme rezulton që 63% e popullit të Kosovës i ka bojkotuar duke i thënë jo kësaj klase politike, ku nga gati 2 milione votues, votën e kanë dhënë vetem 700 mije, dhe LDK-së po t’ja heqesh votat e AKR dhe Alternativës, del me këpucë të kuqe, të jetë votuar nga rreth 100 mijë votues, një humbje e paparë në krahasim me të gjitha zgjedhjet e mbajtura deri tash në Kosovë.

Të njëjtën humbje e ka pësuar edhe PDK, si dy partite bashkë me LDK qe kanë keqqeverisur Kosovën në një aleancë diabolike që prej zgjedhjeve të nëntorit 2007.

Qeveria e Isa Mustafës ka qenë qeveri e turpit sepse u ngrit në kundërshtim të plotë me vullnetin e elektoratit që ia dha votën sipas premtimit parazgjedhor se LDK do të rrëzonte Hashim Thaçin, që jo vetëm nuk e rrëzoi, pra e zgjodhi edhe president, ndersa Hashim Thaçi e shpërdori establishmentin e LDK në kēmbim të pushtetit.

Qeveria ku Avdullah Hoti u emërua ministër i saj u ngrit duke mashtruar elektoratin e LDK, prandaj puna ma e mirë që duhet të bëjë Avdullah Hoti asht me hesht.

Të shuj ma mirë.

Tė rrijë sus.

Ose t’i kërkojë ndjesë elektoratit të LDK dhe atij Rugovist se e keni mashtru dhe rrejt e tash ju ka ardhë ora me pagu.

Pra ule kokën Avdullah Hoti dhe si njeri i financave analizo rezultatin zgjedhor.

Nëse je profesionist nuk bëzan por reflekton.

Nëse je sharrllatan lëshon deklarata idiote si ajo nga Mali i Zi, të cilat kanë vetëm një efekt boomerang e të djegin ty dhe ti bëhesh harakiri për një qeveri antidemokratike që u ngrit për interes të Klanit Pronto si thuhet në Kosove dhe kundër interesave kombëtare të Kosovës!

A ke kuptu gja nga këto që kam shkrujt?!(E dergio per Diellin- VOAL)

Për herë të parë e shohim fytyrën e vërtetë të Ilir Metës

June 20, 2017 by dgreca

Nga Elida Buçpapaj/

26 vjet kemi parë maskën e Ilir Metës/

si lider i rinise socialiste,/

si deputet, ministër dhe kryeministër i PS,/

si admirues i Dritero Agollit/

si mik dhe armik i Fatos Nanos/

si besnik dhe kundërshtar i Edi Ramës

si lider i LSI dhe bashkëshort i Monika Kryemadhit

si opozitar dhe aleat i Sali Berishës,

si premier që e imitoi dhe e arrestoi liderin e opozitës

si i kapur me presh në duar në videon e Dritan Priftit

si kryeparlamentari dhe i votuari për president

me votat e partisë të Edi Ramës

gjithmonë ai ka luajtur rolin e dialoguesit, loyalit, njeriut të kompromisit, të deal-it

me qetësinë dhe dashurinë e tij proverbiale, por të shtirur

sepse njihet si një nga simpatizantët e Mehmet Shehut gjakatar

dhe tani papritmas Ilir Meta është vetvetja

ngre zërin, kërcënon, turfullon, fyen, shan dhe prapë kërcënon

në emër të speakerit të Parlamentit,

në emër të Presidentit të Republikës,

në emrin e rremë të votës së lirë,

sepse LSI njihet si formacioni që mbijeton në sajë të klientelizmit,

sepse po të deshte Ilir Meta,

po të kishte përdorur këto tone që po përdor sot,

si ithtar i votës të lirë

e kishte detyruar Edi Ramën të ndryshonte kodin zgjedhor me kohë,

si kusht, që në 1 prillin e 2013,

kur i shtrënguan duart njëri-tjetrit,

pasi ishin pështyrë me muaj e vite në fytyrë…

Modeli i Monika Kryemadhit nuk është shembull për rininë shqiptare

June 15, 2017 by dgreca

Nga Elida Buçpapaj/

E dëgjova me vemendje Monika Kryemadhin sot tek Koha për t’u zgjuar.Akuzoi për tirani produktin që doli nga marrëveshja e 18 prillit;denoncoi ferrin që jetojnë qytetarët në zonën e Elbasanit ku është në kryelistë;përgëzoi zërin e fortë të bashkëshortit Ilir Meta në fushatë, pa marrë parasysh se ka shkelur Kushtetutën, sepse president i Republikës është mbi palët dhe institucioni që përfaqëson shpreh unitetin kombëtar.

Kryemadhi i bëri thirrje rinisë të votoi partinë e saj.Në fakt modeli që ofron Monika është në antitezë të plotë me modelin që duhet të ketë rinia shqiptare.Monika Kryemadhi ka 26 vjet në politikë. E ka filluar karierēn me forumin e rinisë socialiste dhe tani është de facto nr.1 i LSI pas marrjes të presidencës nga bashkëshorti i saj.

Monika Kryemadhi nuk ka punuar deri tani asnjë orë punë në jetën e saj. Edhe Ilir Meta po ashtu.Janë 26 vjet politikanë profesionistë që gjithë të ardhurat dhe pasurinë e kanë nga taksat e popullit.

Monika Kryemadhi dhe Ilir Meta janë pjesë e kupolës së klasës politike, pikërisht e asaj klase që Monika Kryemadhi denonconte sot tek emisioni i Bashkim Hoxhës.Për tmerrin, mjerimin dhe varfërinë në Elbasan për të cilin akuzonte Edi Ramën, Monika do të duhej të akuzonte edhe vetveten, Ilir Metën ose bashkëqeverisjet politike 8 vjeçare të LSI, një herë me PD, një herë me PS.

Tiraninë e ka krijuar kupola, kupola ka uzurpuar pushtetin, ku çifti Meta-Kryemadhi është pjesë e saj. Të dy e kanë kthyer LSI në pronësi private që vjel përfitime dhe pushtet për vete dhe enturazhin. LSI është pjesë e keqqeversjes, është një nga shkaktarët e mjerimit të popullit shqiptar.

Populli shqiptar nuk mund ta besojë Monikën sepse arritjet e saj, pasuria e saj janë në përpjestim të zhdrejtë me mirëqenien e popullit. Sa më tepër pasurohet familja Meta-Kryemadhi aq më tepër varfërohet populli. Populli s’ka mirëqenie. Populli ka varfëri.

Monika Kryemadhi ishte e vërtetë vetëm kur tregoi për ferrin që jeton zona e Elbasanit, por si Elbasani është e gjithë Shqipëria, e bashkëqeverisur edhe nga familja Meta-Kryemadhi ose LSI-ja e tyre.

Edhe tirania është produkt i kësaj bashkëqeverisje. PS, LSI,PD. Edhe posti i presidentit gjithashtu. Edhe kreu i LSI.

Në Shqipëri ka uzurpim të pushtetit nga kupola, ku çifti Meta-Kryemadhi, kanë dy copa torte, nëse krahasojmë me krerët e tjerë të partive kryesore.

Prandaj them se modeli që ofron Monika Kryemadhi është ai se si nuk duhet të jetë politikani që për 26 vjet shpërdori pushtetin, ndërsa popullin e la si në zonën e Elbasanit, ku mjerimi dhe skamia është ngritur në piedestal.

Këtë gjendje ferri e dëshmoi vetë Monika me gojën e saj.

Kjo ishte e vetmja e vërtetë që tha, por fajtor bëri Edi Ramën, kur si bashkëfajtor duhej të shpallte bashkëshortin e saj dhe vetë Monika Kryemadhin.

Armiku i Edi Ramës është një grua

May 10, 2017 by dgreca

Armiku i Edi Ramës është Monika Kryemadhi!/

Nga Elida Buçpapaj/

Armiku i Edi Ramës nuk është Sali Berisha.

As Lulzim Basha!

As Ben Blushi apo Koço Kokëdhima,

Bile as Ilir Meta!

Armiku i Edi Ramës është…një grua

Natyrisht jo nga ato gratë e veta, deputetet, ministreshat, drejtoreshat, fotografeshat, që e adhurojnë si të ishte Zot!

Armiku i Edi Ramës është Monika Kryemadhi!

Harrojeni atë proverbin që thotë se koha i shëron plagët!

Se bashkëqeverisja ja shëroi pezmin Monikës!

Koha dhe durimi, sipas Lev Tolstoit, janë dy luftëtarë të fuqishëm, për t’u hakmarrë.

Në Shqipëri nuk ka drejtësi, ka hakmarrje.

Edi Rama ku ta gjente që të kishte armik njërin prej atyre të përmendurve më sipër, ose të ndeshej me të gjithë ata së bashku, veç me Monika Kryemadhin të mos kishte të bënte, së cilës i ka ardhur ora që t’i lajë hesapet me Edi Ramën për vitin e mbrapshtë kur Ilir Meta u detyrua të japë dorëheqjen dhe të heqë dorë nga imuniteti.

Të jetë për Monika Kryemadhin, ajo bëhet menjëherë me Berishën dhe e kalon në opozitë Edi Ramën, që tashmë ka kaluar në opozitë.

Të jetë për Monika Kryemadhin, Edi Rama ishte djegur në turrën e druve, metaforikisht.

Dhe me të drejtë, sepse asaj i del në ëndërr si makth dhe ankth 2010 kulmuar me janar-shkurtin e vitit 2011 kur PS kishte dalë në demonstrata me në krye Edi Ramën, pasi Dritan Prifti shfaqi videon e famshme dhe opinioni shqiptar u ngrit në këmbë.

Nuk e harron atë kohë apokaliptike Monika Kryemadhi, që e bëri të urrente në heshtje dhe me durim Edi Ramën dhe t’i ishte mirënjohëse për gjithë jetën Sali Berishës!

Edhe në intervistën e saj më të freskët, kur Edi Rama tashmë e ka luajtur kartën fatale, që e bëri Ilir Metën President të Republikës, Monika Kryemadhi shpërtheu pa doreza fare!

Iu bëri thirrje gjithë simpatizantëve të PS të votojnë për LSI, pastaj si kryetare partie, sepse Petrit Vasili është sa për sy e faqe, i doli hapur dhe ballë për ballë.

Tani që Ilir Meta ka siguruar vendin e Presidentit të Republikës, paçka se e shkel çdo ditë Kushtetutën e vendit, duke bërë fushatë për LSI, Monika Kryemadhi e ka ngrehur shpatën kundër Edi Ramës. Mllefet e kohëve të shkuara, të grumbulluara nëpër vite dhe me durim tani ka ardhur koha që t’i shprehë lirshëm.

Edhe Monika Kryemadhi është shkelëse e Kushtetutës, sepse ka konflikt të hapur interesi. Kushtetueshmërisht Presidenti duhet të shprehë unitetin kombëtar, dhe nuk ka sesi, kur bashkëshortja është kryetare e LSI-së, partia, që bashkëshortët e trajtojnë si pronën e tyre të patundëshme.

Por në Shqipëri nuk ka shtet ligjor! Dhe deri kur të vendoset shteti ligjor, kupola e faktorëve politikë që kanë 26 vjet duke e hequr zvarrë këtë vend, e bëjnë vetë ligjin!

Dhe Monika Kryemadhi e ka nënshkruar fermamin, për ta nxjerrë jashtë loje Edi Ramën, të cilit i ka shpallur hapur luftë.

Do të vijë një kohë, shumë shpejt, kur Edi Rama do të mbetet pa kryeministrinë dhe pa partinë, veç me lapsat për të zhgarravuar!

Nuk i ka fajin kush! As atij dhe as Berishës!

Edi Rama deri tani e ka patur kohën e të përpjetës. Tani i vjen rradha kohës së tatëpjesës, kur rënia është sikur e thonë italianët me fjalën e tyre më të gjatë me 11 rrokje e 26 gërma, precipitevolissimevolmente, por që ka kuptimin e kohës skajshmërisht të limituar, të zvogëluar e të shkurtër, që shqip thuhet, do të bjerë sa hap e mbyll sytë.

Përgjigje pyetjes: a e takuat Edi Ramen në Bernë?

April 21, 2017 by dgreca

Nga Elida Buçpapaj/Kishte kuriozitet nëse ne u takuam me Edi Ramën gjatë vizitës së tij zyrtare në Bernë.Po ua shteroj kuriozitetin.Për Zërin e Shqiptarëve – Voice of Albanians – www.voal.ch- portalin më të suksesshëm shqiptar në Zvicër, që drejtohet nga dy gazetarë nga shteti amë, do të ishte normaliteti më normal që të mbulonte vizitën e premierit shqiptar, nëse çdo gjë në Shqipëri nuk do të ishte në kundërthënie me normalitetin.Përfaqësia e shtetit shqiptar në Bernë e lajmëroi në rrjetin social që në muajin janar vizitën zyrtare të Edi Ramës në Konfederatën Helvetike.Pas këtij lajmërimi publik, do të duhej që kjo përfaqësi të kontaktonte me mediat kryesore shqiptare në Zvicër dhe t’i akreditonte. Ashtu sikur veprojnë shtetet në Perëndim.Ambasada e Shqipërisë në Bernë nuk kontaktoi me Voal.

Natyrisht që përfaqësia shqiptare për çdo veprim apo mosveprim të saj merr vizën aprovuese nga Ministria e Jashtme e RSh.Në analizë të veprimeve supozohet se për mbulimin e vizitës të PM shqiptar, Ministria e Jashtme e Republikës të Shqipërisë nuk e ka dëshiruar praninë e dy gazetarëve shqiptarë tashmë të natyralizuar të cilëve Zvicra u është bërë Atdheu i parë.

MPJRSH preferoi rolin klishe të përçarësit dhe censorit, një reminishencë e kohës së diktaturës kur diaspora konsiderohej “Mërgatë qyqesh”.

Nga ana e saj Ambasada vetëm pas kërkesës tonë na dërgoi programin ndërsa adresa ku do të mbahej pritja, ishte gabim. Këto të dhëna që ajo i publikoi edhe në Facebook nuk kishin asnjë vlerë për gazetarët nëse nuk shoqëroheshin me akreditim.

Pra, po të varej nga pala shqiptare, Voal nuk do të merrte pjesë në mbulimin e vizitës së premierit të Shqipërisë në Bernë. Pala shqiptare bëri aq sa mundi në sensin e kundër të akrepave të sahatit. Nuk është diçka e re, tashmë histori e vjetër. Diplomacia shqiptare është e shpërfytyruar dhe e defaktorizuar nga politika që e përdor si kukull.

Fatmirësisht dhe faleminderit Zotit, Voal nuk varet as prej Ditmir Bushatit, as prej Edi Ramës dhe as prej vartësave të tyre. Sikur nuk është varur as prej pararendësve.

Ne e morëm ftesën nga protokolli i shtetit helvetik, ku jemi të akredituar, së bashku me programin e vizitës. Ministria e Jashme e Zvicrës si zakonisht u kujdes deri në detaje që gazetarët e ftuar të kryenin sa më mirë misionin e tyre.

Kryeministri i Shqipërisë u prit me të gjitha nderet nga Presidentja e Zvicrës zonja Doris Leuthard.

Për shkak të hapësirës jo shumë të madhe ku do të zhvillohej takimi, vizita u mbulua nga një grup i kufizuar gazetarësh, katër nga Shqipëria, dy nga RTSH, nga flokëportokallia, fotografja personale e Edi Ramës dhe nje tjetër nga zyra e kryeministrit. Gazetarë shqiptarë me banim në Zvicër ishim katër: ne nga Voal dhe dy nga Albinfo, portali kosovar të cilit Edi Rama për arsye klienteliste i dha trofeun e Shqiponjës së Artë në samitin e diasporës që u organizua nëntorin që shkoi në Tiranë.

Ishin të pranishëm edhe katër-pesë gazetarë zviceranë: Nga televizioni SRF, televizioni kryesor publik gjermanofon, nga gazeta e njohur NZZ, Le Temps etj.

Konferenca për shtyp nuk zgjati shumë. Të parët që e morën fjalën ishin dy gazetarët zviceranë, i pari nga televizioni SRF dhe i dyti nga Le Temps, që i bënë të njëjtën pyetje Edi Ramës në lidhje me Dritan Zaganin, të cilin shteti shqiptar e kërkonte ta ekstradonte nga Zvicra, ndërsa Zvicra i dha azil politik pikërisht në prag të vizitës zyrtare të PM. Që kishte një tingëllim sfide. Kur i dëgjoi pyetjet, Edi Rama i befasuar, e fshehu disi nervozimin duke tribluar nën buzëqeshjen me okeljon se “gazetarët janë kudo njëlloj”.

Voal pyeti në shqip në lidhje me linjën ajrore Zvicër-Shqipëri dhe shkollën plotësuese shqipe, nisur nga fakti dramatik se në shkollën shqipe të një niveli që lë shumë për të dëshiruar shkojnë vetēm 3 % e fëmijëve shqiptarë. Nëse gazetarët zviceranë nuk do ta konsumonin pyetjen për Zaganin, Voal do ta pyeste kryeministrin edhe për ish-oficerin e antidrogës.

Dhe kështu mbaroi konferenca për shtyp.

Ishte një moment që Edi Rama mund të shkëputej nga grupi për disa sekonda duke respektuar veten për të na përshëndetur. Shqiptarçe. Aq më tepër kur ne njihemi. Nuk e bëri. As për hipokrizi nuk mundi. E keni parasysh se sa orë harxhon dhe se si e vret kohën Edi Rama duke iu lëpirë dhe mikluar nëpër restaurante peshku dhe ngjalash Ilir Metën! Voal nga ana e vet po të dëshironte sadopak që të takohej me Edi Ramën i kishte të gjitha mundësitë për ta bërë. Të takohesh me politikanët shqiptarë nuk është privilegj.

Voal e respektoi kryeministrin e shtetit shqiptar gjatë vizitës historike në shtetin helvetik. Voal do ta dëshironte Shqipërinë të jetë një Zvicër e Ballkanit, që bregdeti i saj i mrekullueshëm të kthehet destinacion kryesor mikpritës për miliona turistë zviceranë. Por Zvicra nuk i dërgon shtetasit e saj aty ku nuk ka shtet ligjor, rregull dhe siguri. Ky është realiteti.

Ndërsa Edi Rama që e personalizon shtetin si pronë dhe gazetarët i konsideron servitorë të pushtetit të tij e mori një leksion të vogël por kuptimplotë nga gazetarët zviceranë.

A nxori mësim?! Politikanët shqiptarë nuk nxjerrin mësime as nga gabimet dhe as nga fajet e tyre.

Ata janë recidivë. Prandaj e kanë mbushur kupën.