Enver Hoxhaj – Page 3 – Dielli

Nëse Serbia nuk e njeh Kosovën, rajoni do vazhdojë të mbetet në status quo

October 29, 2016 by dgreca

Kryediplomati Hoxhaj: Kosova nuk mund të shihet si e ndarë nga proceset në rajon/

2-enver-hoxhaj-kosove

PRISHTINË, 29 Tetor 2016-B.Jashari/ Kosova nuk mund të shihet si e ndarë nga proceset në rajon, tha ministri i Jashtëm Kosovar, Enver Hoxhaj, sot në Sllovaki. Në këtë kontekst, vijoi ai, procesi i zgjerimit të Bashkimit Evropian duhet të shfrytëzohet për mbylljen e të gjitha temave të hapura në rajon.“Nëse Serbia nuk e njeh Kosovën, rajoni do vazhdojë të mbetet në status quo”, tha ministri Hoxhaj.Për më tepër, ai, duke përshkruar kontekstin e ri të zvillimeve në Ballkanin Perëndimor, potencoi edhe rëndësinë amerikane në të gjitha proceset. “Pa angazimin e SHBA-ve, si dhe kontributin e BE-së, nuk do të ishim në gjendje të kishim progres, i cili bërë deri më tani”, tha Hoxhaj.Ministri i Punëve të Jashtme i Republikës së Kosovës, Enver Hoxhaj, po merr pjesë në konferencën ndërkombëtare “Globsec Tatra Summit” që po mbahet në Bratisllavë, Sllovaki. Në këtë forum ndërkombëtar, ku po diskutohet për aspektet e rëndësishme politike, ekonomike dhe financiare evropiane, po marrin pjesë edhe ministra të jashtëm nga Evropa dhe Ballkani Perëndimor, komisionerë nga BE dhe personalitete tjera.

Njoftimi i dërguar thekson se, në adresimin në panelin me temën “Ballkani Perëndimor, pjesa e munguar e BE-së”, ku është diskutuar për të ardhmen e Ballkanit perëndimor, respektivisht, procesin e zgjerimit të BE-së, Hoxhaj ka vlerësuar se rajoni në përgjithësi, në 20 vitet fundit ka bërë progres të jashtëzakonshëm, por ende mbetet punë për t’u bërë.Në këtë panel kanë marrë pjesë edhe ministra dhe zëvendës ministra të jashtëm të Ballkanit Perëndimor.Sa i përket zgjerimit të mëtejmë të BE-së, ministri Hoxhaj ka theksuar se është bërë punë e mirë në sundimin e ligjit, etj, por pa zhvillim ekonomik, nuk do të jemi në gjendje të ecim përpara. Megjithatë, sipas tij, duhet të ketë politikë më fleksibile sa i përket zgjerimit.

Shqipëria reale & Enver Hoxha-j nga Suhareka dhe ai…nga Gjirokastra

October 16, 2016 by dgreca

Ne shqiptarët duhet të zgjohemi. Të kuptojmë përfundimisht…, se ekzistenca e një shteti të dytë për shqiptarët. Eshtë mundësia e dhënë nga bota. Detyrë shtëpie për ne. O të dimë e të bashkohemi urtë e butë. Ose të vazhdojmë kështu, me gërr-vërret tona….Ca turq myslimanë, ca ortodoksë grekë… e ca shqiptarë pa atdhe./

1-enver-hoxhaj

Ne Foto: Ministri i Jashtem i Kosoves. z. Enver Hoxhaj/

Shqipëria reale,- nuk është çështje as Enver Hoxhës nga Gjirokastra, as e atij nga Suhareka. Eshtë çështje e vitalitetit të një race. Kësisoj nuk ka gjë, nuk ka çështje e imja apo e jotja, kur ndihet qartë se si aroma e racës po çel sythë të përtërirë. Mjerë ai politikan që nuk e shikon gjindjen e tij me syrin e një bujku. Ai nuk është politikan, por një perandor i vogël, që është i suksesshëm vetëm në dëmtimin e racës së tij.

Dhe ne deri tani i kemi pasur me bollëk këto soje.Po, po me bollëk.Që Edi Rama bën mirë që flet për Kosovën, as që diskutohet.Kjo jo vetëm për ne shqiptarët në koracën e mendjes serbosllave…,por edhe serbët vetë. Qytetarët që jetojnë një dyzim civil midis ekzistencës sonë;mos pranimit apo pranimit të kësaj ekzistence…Ne ekzistojmë. Me mëkatet tona por edhe me gjëmat e tyre….Të njëjtën gjë do thosha edhe për grekët, në lidhje me Çamërinë./

1-ilir-levonja

Nga Ilir Levonja/Florida/

Ndofta duket paksa e vonuar kjo si temë që do trajtojë. Por preokupimet e shumta, dita e ngarkuar. Lajmet që na ulin kokën, të tjera ndodhira…, e bëjnë ditën të më tretet si kripa në ujë. Megjithatë akoma nuk po i përtyp dot këto deklarata prej Kosove se, nuk ka çfarë i duhet Kryeministrit të Shqipërisë të merret me marrëdhëniet e shqiptarëve dhe serbëve.

Dhe kjo vjen nga ministri i jashtëm i Kosovës shtet, nga një njeri që për koiçedenca jo rastësore. Kur dihet që në vitet 60-70, shqiptarët brenda dhe jashtë kufijve shtëterorë e kishin për lavdi tu vendosnin fëmijëve emrin Enver. Ashtu si vite me vonë, kur shqiptarët brenda vendit. Shtetit në dheun e amlë, iu përveshën modës së futbollistëve nga kampionet europiane e botërorë të futbollit. Ndaj sot kemi gjenerata të tëra shqiptarësh muslimanë, katolikë apo orthodoksë. Me emrat Ziko, Xhorxhinjo, Sokrates, Krujf, Neske, Maradona etj. Ndërkohë që ata shqiptarët jashtë këtij territori vërshonin tek Enveri, Noli, Isa etj. Apo emrat e qyteteve e lumenjëve. Si Berat, Shkumbin, Vjosë, Vlonë etj.
Duhet ngulur mirë në fletoret e kujtesës kjo. Thjesht që të mos u hapet punë kolosale studiuesve të etimiologjisë së emrave.
Pra është kjo arsyeja (moda e kohëve të përçartjes kolektive, kohërave pa busull) që sot kemi një batalion dekadash njerëzish, një batalion myslimanësh me emrin Sokrates, Ramadel Falkao etj.
Por le të rrimë tek tema jonë.
Ajo që, a ka të drejtë Kryeministri i Shqipërisë të flasi për Kosovën?
Po, shumë fare.
E vërteta është se politikanët shqiptarë janë dorë e tretë në hollet e kancelarive të botës. Edhe kur janë njohur, janë dalluar o për marrëzitë e tipit soji bllokon sojin. O për heroizminin e tipit soji shfaros sojin. Vetëm tek ne është prodhur kryetipi që për hatër të karrikes nuk e ka për gjë të shes edhe gjysmën e Shqipërisë. Siç edhe është rasti i beut të Durrësit, Esat Toptanit. Apo të izolojë vendin për teka dhe inate shokësh e fisnore, deri në marrëzi të tilla pse u refuzua nga një vajzë. Siç është rasti i (anti) komunistit nga Gjirokastra, Enver Hoxhës.
Së pari, sa do me inat ta kemi Edi Ramën…, është Kryeministri i shqiptarëve. Dhe ndofta nga të vetmit që në këto dekada demokracie ka prekur çështje tabu. Ato të cilat shtetarët shqiptarë të deritanishëm, i quajnë të nxehta. Shikojnë sa majtas e djathtas. Rrinë pa gjumë gjithë natën që t’i flasin apo jo? Ta përmendim Çamërinë apo jo.? Ta përmendin Kosovën? Të drejtat e shqiptarëve në Maqedoni? Mal të Zi etj. Atyre në Turqi që janë asimiluar fare. Ose edhe nëse nuk janë, rrinë strukur sokakëve të Stambollit. Edhe pse kanë ngritur administrata dhe akademi, siç është rasti i familjes Frashëri.
Nuk ka më çështje të nxehta. Dhe kjo shpjegohet me ca fakte të thjeshta. Të drejtat e njeriut, qarkullimi i lirë në botën e madhe, globalizmi etj. Dështimet e politikave të deritanishme që kanë çuar në falimente ekonomike. Apo në kriza të thellla sociale shumë vende kështjella të rajonit.
Së dyti, duam apo nuk duam ne Enver djali, është shqiptarizma ajo që na ka mban në një vathë. Nëse e ke inat Edi Ramën për drogën, foli e qortoje aty. Në ato kangjellat e hequra të selisë së tij. Madje në faqet e tia sociale në Fb e Twitter. Bjeri vënçe. Zgjoje nga gjumi i shefave mëndje mbushur. I thuaj se është një betejë që nuk fitohet vetëm. Asesi. Që nuk fitohet duke i thënë popullit se fajin e kanë ata që ishin para meje në pushtet etj. Vota e popullit nuk të jepet për ankuar për paraardhësit. Por për të qeverisur.
Së treti, duket si rastësore. Por mendojë se nuk është e tillë.
Para pak ditëve në studiot telelvizive shqiptare u fol për herë të parë për bashkimin e trojeve shqiptare. E ardhmja si do jetë etj.
Ndofta të mos i mëshojmë Enverit nga Suhareka. Por egos që vuajnë politikanët shqiptarë. Ndër shekuj. Atë të interesit personal mbi kombin. Disave u është mbushur mendja se do vazhdojnë kështu. Proincër apo mbretër të fushatave elektorale. Me shtete të shqiptarësh. Duhet ta dini mirë se perandoritë janë ngrehina të përkohëshme. Eshtë vloja e popullit që për një apo dy arsye ka marrë rrugën e pashmangshme. Perandoritë e vogla do vdesin. Por lum ai politikan që ua shpejton vdekjen. Pasi sado, sido, qyshdo, shqiptarët janë faktor dhe do ta kenë shtetin e tyre. Jo atë që e mbytën me frymë frike. E që i thonë Shqipëria e madhe. Jo, jo, …
Thjesht Shqipërinë reale. Kjo nuk është çështje as Enver Hoxhës nga Gjirokastra. As e atij nga Suhareka. Eshtë çështje e vitalitetit të një race. Kësisoj nuk ka gjë, nuk ka çështje e imja apo e jotja, kur ndihet qartë. Se si aroma e racës po çel sythë të përtërirë. Mjerë ai politikan që nuk e shikon gjindjen e tij me syrin e një bujku. Ai nuk është politikan, por një perandor i vogël. Që është i suksesshëm vetëm në dëmtimin e racës së tij.
Dhe ne deri tani i kemi pasur me bollëk këto soje.
Po, po me bollëk.
Që Edi Rama bën mirë që flet për Kosovën, as që diskutohet.
Kjo jo vetëm për ne shqiptarët në koracën e mendjes serbosllave…,
por edhe serbët vetë. Qytetarët që jetojnë një dyzim civil midis ekzistencës sonë. Mos pranimit apo pranimit të kësaj ekzistence.
Ne ekzistojmë. Me mëkatet tona por edhe me gjëmat e tyre.
Të njëjtën gjë do thosha edhe për grekët, në lidhje me Çamërinë.
Grekëve që jetojnë me dyzimin e varreve në kokë. Me mos pranimin apo pranimin ekzistencës tonë. Duke i mohuar pala palës, me dhunl, me përbuzje, me gjithfarësoj politikash …, deri me duart e Zotit. Prani e njëri-tjetrit… edhe pse si nëri-si tjetri janë djegur e përvëluar nga mundja prej së keqes.
Eshtë një epokë mbetjesh politike e tillë që, kujton se karrikja është për tu mbajtur. Jo, ore jo, është thjesht, për tu ulur. Kaq…
Një Kryeminstri, një të pari të një race njerëzore, ia jep e drejta kushtetuese për të folur për racën e tij. Po kujt ia thua…
Ne shqiptarët duhet të zgjohemi. Të kuptojmë përfundimisht…, se ekzistenca e një shteti të dytë për shqiptarët. Eshtë mundësia e dhënë nga bota. Detyrë shtëpie për ne. O të dimë e të bashkohemi urtë e butë. Ose të vazhdojmë kështu, me gërr-vërret tona.
Ca turq myslimanë, ca ortodoksë grekë… e ca shqiptarë pa atdhe.

VATRA PROMOVON LIBRIN E MINISTRIT ENVER HOXHAJ

September 23, 2016 by dgreca

Federata “Vatra” do të promovojë të Dielën në orën 7 të mbrëmjes në Royal Regency Hotel, Yonkers, New York, librin “Ngritja e një shteti” të Ministrit të Jashtëm të Kosovës, Enver Hoxhaj…Mos humbisni rastin. Hyrja e Lire./

Federata Pan-Shqiptare në Amerikë “Vatra” organizon promovimin e librit “Ngritja e një Shteti” të Ministrit të Punëve të Jashtme të Kosovës, Enver Hoxhaj. Libri që do të promovohet këtë të diel në New York, është botuar para dy muajsh në Kosovë dhe flet për aspektet e politikës së jashtme të Kosovës dhe ngritjen ndërkombëtare të shtetit më të ri.

I mirëpritur nga lexuesit, edhe në panairin e fundit të librit në Prishtinë, libri analizon aspektet praktike të sjelljes së Kosovës në politikën e jashtme, raportet brenda dhe jashtë, si dhe merr në konsideratë një kornizë intelektuale dhe akademike në fushën e marrëdhënieve ndërkombëtare. Veçmas, Hoxhaj në libër i kushton një kapitull të veçantë ngritjes së cështjes së Kosovës në vitet 90-ta dhe rolin që ka luajtur diaspora shqiptare nëpër botë vecmas ajo në SHBA. Aty mes të tjerash thuhet se “Shqiptarët në Amerikë kanë luajtur një rol të jashtëzakonshëm për ndërkombëtarizimin e cëshjes së Kosovës në Shtëpinë e Bardhë dhe Dapartamentin e Shtetit. Angazhimi i tyre ishte jetik edhe gjatë luftës e deri në shpalljen e pavarësisë”.

Një aspekt tjetër që përmban libri i ministrit Hoxhaj është raporti i Kosovës si shtet i vogël me botën jashtë, sjelljen në një rend botëror gjithnjë e më të ndërvarur dhe përdorimin e fuqisë së butë si kompensim i mungesës së fuqisë së fortë sikurse ushtria, fuqia ekonomike apo gjeografia e madhe. Diskuton gjatë konceptet e fundit akademike dhe praktike se si shtete të caktuara në botë janë përpjekur ta ushtrojnë këtë koncept të ri të diplomacisë, i sjellë së fundit nga Joseph Nye. Duke iu referuar Kosovës, Hoxhaj shkruan se “shtetet e vogla, pos nevojës së mirëpërdorimit të instrumenteve të fuqisë së butë, në mënyrë që të mbijetojnë dhe ngriten vazhdimisht në rrafshin ndërkombëtar duhet të jenë në një raport të veçantë me një superfuqi”, duke iu referuar marrëdhënies së Kosovës me SHBA-të.

Në mesin e shumë temave që trajtohen në libër, ka edhe momente të përvojës personale që Hoxhaj i përshkruan edhe pse libri nuk është një autobiografi e tij, siç autori edhe e shpjegon në parathënie. Madje ka momente, ku Hoxhaj i qëndron besnik gjykimit të lirë intelektual të tij teksa shfaqet i sinqertë kur pranon ndikimin ‘pozitiv’ në formë presioni që shpesh miqtë ndërkombëtarë kanë ushtruar ndaj Kosovës.

Ai përshkruan marrëdhënie të caktuara me politikanë të Kosovës, ndërkombëtarë dhe veçmas ata serb si Vucic e Dacic, me të cilët ‘ironizon’ për mënyrën e sjelljes politike sot e që në fakt janë relikte të së kaluarës të Millosheviqit. Enver Hoxhaj, në librin “ngritja e një shteti” analizon gjatë nedhe marrëdhëniet e vështira me Serbinë, siç i përshkruan aty dhe kërcënimet e Kosovës siç janë ISIS, Rusia dhe ndikimi në Ballkan apo tendencat ndonjëherë të pakuptueshme neo-otomane në Kosovë dhe rajon.

Pjesa e fundit e librit, dhe jo më pak e rëndësishme, është rezervuar për mendimin strategjik që duhet ta ketë Kosova në sjelljen e saj në vitet e ardhshme. Diçka që Hoxhaj e përshkruan si të nevojshme dhe e ndanë në tri rrathë. “Të gjitha këto janë trajtuar në detaje deri më tani, qoftë si domosdoshmëri bazike të vendit, qoftë si projektim i së ardhmes nëpërmes simbolikës së rrathëve gjeometrikë – Evropa Juglindore, sfera euro-atlantike dhe OKB-ja, duke i shërbyer idesë kryesore të librit për krijimin e një mendimi strategjik” shkruan Hoxhaj. Kjo pjesë, që mund të merret edhe si ‘doktrina Hoxhaj” analizon në detaje sjelljen e Kosovës në dhjetë vitet e ardhshme që do të duhej të përmbyllej me anëtarësimin në OKB dhe hyrjen e plotë në sistemin ndërkombëtar.

Kosovë-Minsitri Hoxhaj takime në NATO

September 13, 2016 by dgreca

-Gjatë fundvitit formalizohet raporti i ri me Aleancën/

-Kryediplomati Hoxhaj është takuar edhe me Përfaqësuesin e Përhershëm të SHBA-së në NATO, Douglas Lute/Bruksel, 12 shtator 2016-Gazeta DIELLI/ Ministri i Punëve të Jashtme i Kosovës, Enver Hoxhaj pas takimeve në selinë e BE-së, është pritur edhe në NATO ku është takuar me Zëvendës/Sekretarin e Përgjithshëm të NATO-së, Ambasadorin Alexander Vershbow, Ambasadorin amerikan në NATO dhe zyrtarë të tjerë të lartë të Aleancës.Në këto takime, Hoxhaj ka ngritur nevojën e thellimit të marrëdhënieve kontraktuale mes Kosovës dhe NATO-së që janë të rëndësishme jo vetëm për paqen dhe sigurinë në Kosovë, por edhe mbarë rajonin.Ministri Hoxhaj është shprehur optimist për këtë raport të ri që mund të formalizohet në fund të këtij viti.

“NATO vazhdimisht ka qenë një përkrahës dhe mbështetës i rëndësishëm i Kosovës. Por në takimin që sot kisha me zv/Sekretarin e Përgjithshëm të NATO-së, biseduam si të kemi një bashkëpunim më të ngushtë bilateral ndërmjet NATO-s dhe Kosovës. Shpresoj që nga fundi i këtij viti kjo marrëdhënie e re do të formalizohet”, ka thënë Hoxhaj.

Kryediplomati Hoxhaj është takuar edhe me zyrtarë të kabinetit të Sekretarit të Përgjithshëm, si dhe me Përfaqësuesin e Përhershëm të SHBA-së në NATO, Douglas Lute.

Paradite, Enver Hoxhaj ka zhvilluar takime të ndara me Përfaqësuesen për Politikë të Jashtme dhe Siguri të BE-së, Frederica Mogherini dhe Komisionerin për Zgjerim, Johannes Hahn./b.j/

Mbështetje e fuqishme e BE-së për Kosovën

September 12, 2016 by dgreca

-Hoxhaj në Bruksel takon Mogherinin, më shumë presion ndaj Serbisë për zbatimin e marrëveshjeve me Kosovën/

Bruksel, 12 shtator 2016-Gazeta DIELLI/ Ministri i Punëve të Jashtme i Republikës së Kosovës, Enver Hoxhaj ka nisur një vizitë dy ditore në Bruksel dhe Strasburg ku do të zhvillojë takime me krerët më të lartë të institucioneve të BE-së dhe Këshillit të Evropës.

Njoftimi dërguar nga Brukseli thekson se, takimin e parë ministri Hoxhaj e ka zhvilluar me Përfaqësuesen për Politikë të Jashtme dhe Siguri të BE-së, Frederica Mogherini, me të cilin ka diskutuar për zhvillimet më të fundit politike në Kosovë, sfidat rajonale, liberalizimin e vizave dhe raportet ndërmjet Kosovës dhe Bashkimit Evropian.Hoxhaj ka thënë të ketë marrë mbështetje të fuqishme politike të BE-së për Kosovën, institucionet e saj dhe zhvillimin e dialogut me Serbinë. Por, sipas tij, BE-ja duhet të bëj presion në Serbinë që t’i zbatojë marrëveshjet e arritura dhe të kushtëzojë progresin e mundshëm të saj në rrugën evropiane me njohjen e Kosovës.

“Zhvillova një takim shumë të mirë dhe përmbajtësor me Shefen e Politikës së Jashtme dhe Sigurisë së BE-së, Federica Mogherini. Diskutuam për shumë çështje të zhvillimeve politike jo vetëm në Kosovë, por edhe në rajon dhe raportet mes Kosovës dhe BE-së pas nënshkrimit të MSA-së. Theksova nevojën për më shumë presion ndaj Serbisë në zbatimin e marrëveshjeve të arritura dhe kushtëzim në rrugën e saj evropiane nëse vazhdon të ketë qasje bllokuese ndaj Kosovës. Pa një afatizim të dialogut dhe zbatim të marrëveshjeve, vështirë të flasim për progres dhe normalizim të mirëfilltë”, ka thënë Hoxhaj.

Po ashtu, temë diskutimi ka qenë edhe çështja e votimit të demarkacionit me Malin e Zi, për çka është shprehur gatishmëria dhe vullneti i plotë që ka Qeveria e Kosovës për ta shtyrë sa më parë këtë.

Hoxhaj pritet të takohet edhe me Komisionerin Johannes Hahn, Komisionerin për Punë të Brendshme, Dimitris Avramopoulos, Zëvendësekretarin e Përgjithshëm e të NATO-s dhe shumë eurodeputetë./b.j/