Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova, zgjatje teknike njëvjeçare mandatit të EULEX-it

by

-Presidenti i Kosovës, Hashim Thaçi dhe përfaqësuesi i Bashkimit Evropian, Josep Borrell, pajtohen për zgjatje teknike njëvjeçare të mandatit të EULEX-it/
PRISHTINË, 11 Korrik 2020-Gazeta DIELLI/ Presidenti i Republikës së Kosovës, Hashim Thaçi, është pajtuar për zgjatje teknike njëvjeçare të mandatit të misionit të EULEX-it me një letërkëmbim me Përfaqësuesin e Lartë për Politikë të Jashtme dhe Siguri të BE-së, Josep Borrell. Zgjatja teknike po bëhet pasi që pandemia ka pamundësuar negociatat për të ardhmen e mandatit të EULEX-it.

Në letërkëmbimin e tij, presidenti Thaçi ka shprehur gatishmërinë që “në mënyrë që të sigurojmë vazhdimësinë e Misionit të Bashkimit Evropian për Sundimin e Ligjit në Kosovë (“EULEX KOSOVA”) gjatë këtyre rrethanave të jashtëzakonshme, Kosova pajtohet për një zgjatje teknike të EULEX KOSOVA, më së voni deri më datën 14 qershor 2021”.

Presidenti Thaçi gjithashtu ka shprehur mbështetjen për misionin, duke konfirmuar se institucionet e Kosovës vazhdojnë të mbështesin në tërësi mandatin e “EULEX KOSOVA” në përputhje me dokumentet e nënshkruara deri tani.

Në përgjigjen e tij, Përfaqësuesi i Lartë i BE-së, Josep Borrell, pranon këtë pajtueshmëri për zgjatje teknike njëvjeçare të EULEX Kosovo deri më 14 qershor 2021 dhe thekson mbështetjen e BE-së për Kosovën, me theks të veçantë te mbështetja në këto kohë të “sfidave të pa precedencë” të shkaktuara nga pandemia.

Përfaqësuesit e BE-së, duke folur edhe në emër të shteteve anëtare të BE-së, kanë njoftuar se për shkak të pandemisë COVID-19 ka qenë e pamundur që të mbahen takime për t’i shqyrtuar misionet e BE-së, përfshirë edhe atë EULEX-it në Kosovë dhe kanë kërkuar mirëkuptim nga autoritetet vendore për zgjatje teknike të mandateve aktuale për një vit.
Mandati i EULEX-it është negociuar çdo dy vite dhe gradualisht është zvogëluar mandati dhe janë bartur kompetencat tek organet vendore.

Kosovë-EULEX, bashkëpunim në veri

by

-Vazhdimësi e bashkëpunimit të mirë të EULEX dhe komunave në veri të Kosovës/
 -Shefja e EULEX takim me kryetarët e komunave në veri dhe vizitë Gjykatës Themelore në Mitrovicë/
 PRISHTINË, 4 Tetor 2016-B.Jashari/ Shefja e Misionit EULEX, Alexandra Papadopoulou, u takua sot me kryetarët e katër komunave të veriut të Kosovës, Mitrovicës Veriore, Leposaviçit, Zubin Potokut dhe Zveçanit. 
 Njoftimi i dërguar thekson se, ky takim, i cili mes tjerash u përqendrua në mandatin e ri të EULEX-it, është vazhdimësi e bashkëpunimit të mirë ndërmjet këtij Misioni dhe komunave në veri.  Papadoupolou i përgëzoi kryetarët e komunave në veri për angazhimin e tyre konstruktiv, duke theksuar se ky bashkëpunim është shumë i rëndësishëm për këtë mision si dhe për komunitetin lokal.
 “EULEX-i është i gatshëm që të vazhdojë ta mbështesë fuqizimin e institucioneve të sundimit të ligjit në veri, si dhe ta përkrah zbatimin e marrëveshjeve të arritura ndërmjet Prishtinës dhe Beogradit”, tha Papadopoulou, duke shtuar se integrimi gjyqësor është një proces i rëndësishëm i cili shpresojmë se do të finalizohet së shpejti.
 Pas këtij takimi, Papadopoulou e vizitoi Gjykatën Themelore të Mitrovicës, ku u takua me gjyqtarë dhe prokurorë që punojnë aty për të diskutuar lidhur me një numër të çështjeve, duke e përfshirë integrimin e gjyqësorit dhe aktivitetet e përditshme, bën të ditur njofimi i EULEX.
Shefja e re e Misionit të Bashkimit Evropian për Sundimin e Ligjit në Kosovë (EULEX), grekja Alexandra Papadopoulou, ka marrë detyrën në 1 shtator 2016.
Katër komunat në veri të Kosovës, Mitrovica Veriore, Leposaviçi, Zubin Potoku dhe Zveçani janë të banuara me shumicë nga komuniteti serb.

EULEX, 15 vetura për Doganën e Kosovës

by

PRISHTINË, 7 Korrik -Në Doganën e Kosovës u mbajt sot ceremonia e donacionit të 15 automjeteve nga misioni i EULEX-it.Ky donacion u dorëzua personalisht nga shefi i EULEX-it, Gabriele Meucci, ndërsa u pranua nga drejtori i përgjithshëm i Doganës së Kosovës, Lulzim Rafuna.
“Ky donacion do të na ndihmojë që të realizojmë në mënyrë efikase detyrat tona, këto vetura do të përdoren për ekipet antikontrabandë”, tha Rafuna.
Ai shtoi se, “pa dyshim që donacionet si këto ndihmojnë në arritjen e standardeve evropiane, në luftimin e evazionit fiskal dhe indirekt reflektojnë në më shumë të hyra për buxhetin e shtetit, që është edhe strategjia e qeverisë së Kosovës në luftimin e ekonomisë joformale”.
“Dogana e Kosovës ka bërë përpjekje të jashtëzakonshme që të përmirësoj proceset dhe luftoj korrupsionin, ka treguar që është lidere në rajon”, theksoi shefi i EULEX, Meucci./B.J/