Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

PREHU NE PAQE, MIK I SHQIPTAREVE, KONGRESMEN GILMAN

by

1-gjoni-per-gilman

Kryetari i Federatës Panshqiptare të Amerikës  Vatra, Dr.Gjon Bucaj,  i  dorëzoi bashkëshortes së Kongresmenit të ndierë  Gilman, një pllakadë mirënjohjeje./

2-ok-gilman

Në West Point të NY (Akademia Ushtarake e SHBA-së), në këtë vend mahnitës mjedisor, në mesditën e 20 Dhjetorit 2016 u krye një ceremoni e thjeshtë  mortore. Ishte një ditë me diell  por e  ftohtë e me  një shtresë të hollë dëbore. Nën lotët  e familjes, të afërmve, miqëve , shokëve, dashamirëve dhe të shumë personaliteteve nga Uashington DC dhe NY,  zinxhirët e punonjësve  të funeralit,  ulën ngadalë në  shtëpinë e përjetësisë , trupin e pajetë të një personaliteti shumë të nderuar  të politikës  amerikane  (ish pilotit të Luftën e Dytë Botërore), të  mikut të shqiptarëve , Kongresmenit Benjamin Gilman.  Ky burrë i madh shteti, shërbeu  për 34 vite  (17 legjislatura)   si  kongresmen  republikan në  Capitol Hill, duke përfaqësuar denjësisht Distriktin 19 të Shtetit të NY. Jo vetëm kaq, por  krahas  një veprimtarie të gjërë në fushën e të drejtave të njeriut ,u bë në të njejtën kohë dhe një ambasador i vërtetë në Kongres  për pavarsinë e Kosoves dhe ceshtjen shqiptare në përgjithësi.

Pjesëmarrja në  këtë ceremoni  mortore ishte  e përcaktuar me protokoll të vecantë nga  shteti  dhe Familja Gilman. Por, për të marrë pjesë në këtë ngjarje të dhimëshme , ishte  i pranishëm edhe një delegacion i Vatrës i kryesuar nga Kryetari  Dr. Gjon Bucaj, Nenkryetari  Asllan Bushati dhe anëtari i Këshillit Drejtues Zef Balaj, te cilet iu bashkuan ish Kongresmenit dhe President i Liges Qytetare Shqiptaro Amerikane, Zotit Jozeph J. DioGuardi

Me shumë respekt e mirënjohje, vatranët  i  prezantoi me  Familjen Gilman dhe pjesëmarrësit në ceremoni ,  zoti DioGuardi . Ai me elegancen  që e karakterizon tha se ky grup shqiptarësh ka ardhur ti shpreh lamtumirën e fundit, mikut të tyre,  kongresmenit  Ben Gilman, në shenjë respekti për gjithcka ai bëri për Kosovën dhe shqiptarët. Gjatë prezantimit, DioGuardi disa herë  riktheu në kujtesën e të pranishmëve, fjalimet e  zjarrta  të Ben Gilman në demostratat e shqiptarëve në NY  e Uashington DC, dhe seancat dëgjimore,peticionet e Rezolutën e Kongresit për Kosovën. DioGuardi  jo rrallë  përsëriti se edhe ai vetë kishte mësuar shumë nga përvoja e Ben Gilman, si politikan vizionar  e  me aftësi të rralla  menaxhuese e drejtuese  në komisionet e Kongresit .

Kryetari i Federatës Panshqiptare të Amerikës  Vatra, Dr.Gjon Bucaj,  i  dorëzoi bashkëshortes së Kongresmenit të ndierë  Gilman, një pllakadë mirënjohjeje. Ai duke i shpieguar  mesazhin që bartëte kjo mirënjohje, në fund përmendi fjalët “Universiteti I Tetovës” dhe më pas vazhdoi:’ Ky universitet nuk do t’ju kishte rezistuar sulmeve brutale, të  autoritetet maqedonase, në qoftë se nuk do ti shkonte një notë e fortë proteste Presidentit të atëherëshëm Grigorov, nga Komisioni i politikave të jashëme i Kongresit Amerikan i iniciuar nga Kongresmeni Gilman. Nota e protestës shpiegonte se është e drejtë legjitime e cdo pakice, në cdo vend të botës, të edukohet në të gjitha nivelet me gjuhën amtare. Një vend që nuk lejon hapjen e universiteteve nuk mund të quhet demokratik.” Zonja Gilman duke marrë në dorë mirënjohjen tha se ndiehej shumë e nderuar për bashkëshortin e saj të ndierë, që edhe në ditën e varrimit dorëzohen mirënjohje për të. Zyra e bashkëshortit tim-  shtoi ajo- ka shumë dhurata e suvenire  të shqiptarëve, por kjo e fundit  dhe në këtë ditë  lamtumire është shumë domethënëse.

Anëtari i Këshillit Drejtues të Vatrës (dhe Bordit të Ligës Qytetare Shqiptaro Amerikane) Zef Balaj, ju tha  të pranishmëve se pas një vizite në Kosovë e Shqipëri në fund të viteve 90-të, kongresmenët Tom Lantosh e Joseph DioGuardi sollën nga arkivi i Tiranës shumë dokumenta që vërtetonin se Shqipëria në kohën e Holokaustit  jo vetëm që i kishte mbrojtur familjet hebre, por nuk ishte vrarë asnjë  person i vetëm nga besa që shqiptarët u dhanë hebrenjëve.  Në këtë kohë, në muzetë  e Holokaustit në Uashington DC dhe Izrael, emri i Shqipërisë nuk figuronte, por pas njohjes me dokumentat e sipër përmendura ,me insistimin e Kongresmenit Gilman , emri i Shqipërisë u skalit i pari (Albania) në mermerin e të dy mozeumeve, duke u përjetësuar kështu si vend mbrojtës i popullit hebre në ditët e tij më të vështira. Ne si shqiptarë krenohemi me këtë, por  edhe  ndihmesa e  kongresmenit Gilman ishte në kohën e duhur dhe vendimtare- përfundoi Zoti Balaj.

Nënkryetari i Vatrës Asllan Bushati shtoi se në maj të vitit 2002 i bëra një kërkesë Zyrës së  Kongresmenit  Gilman për një takim vetëm dy minutësh, pasi i kasha shpieguar se jam ish ushtarak i lartë në Ushtrinë Shqiptare dhe resident në NY. Pas dy javësh më njoftuan  kohën e takimit. Sot mund të duket qesharake, por do ta them në ligjëratë të drejtë se ndoshta kjo do të zbardhet në të ardhmen dhe do të ishte një gjë jo e mirë për mu devijimi nga teksti. “ I nderuar kongresmeni Gilman. Këto që do t’ju them Juve sot, ja kam thënë edhe Kongresmenit Eliot Engell. Arsyeja e parë ardhjes sime  këtu është t’ju bëj me dije se në gjykimin tim demokracia në Shqipëri është në rrezik nga një bandë neokomuniste që ka marrë pushtetin  pas ngjarjeve të 1997-tës. Së dyti –personalisht nuk kam asnjë lidhje gjaku e miqësie me udhëheqësin e opozitës Sali Berisha,por mendoj se padrejtësisht është hedhur shumë baltë mbi të dhe se Berisha i duhet vendit tim edhe për një periudh të caktuar  kohore. Kërkoj mirëkuptimin dhe mbështetjen Tuaj. Kaq kishit më tha shumë miqësisht? Kaq i thashë. Dhe për ta mbyllur më tha:Ju siguroj se shqetësimin tuaj do ta kemë në konsideratë.

Të pranishmit solln shumë kujtime të bukura  për takimet që kishin patur me kongresmenin Ben Gilman, për  punën  e palodhur në  komunitet e në  Kongres, për Qendrën Ndërkombëtare të Edukimit Gilman si pjesë e Kolegjit të studimeve Globale, librarinë e shumë veprimtari të tjera. Për nder të pranishmëve Familja Gilman në Hotelin “The Thayer” të West Point –it, shtroi një drekë lamtumire. Grupi i Vatranëve duke u largua nga West Point, në shenjë respekti tha:”U prehësh në paqe miku ynë i paharruar Benjamin Gilman”.

ASLLAN  BUSHATI

                                                                                

KRYETARI I VATRES I SHKRUAN ISH SEKRETARES HILLARY R. CLINTON

by

1-hillary

1-logo-e-vatresNovember 9, 2016

Mrs. Hillary R. Clinton

Former U.S. Secretary of State

Chappaqua, New York

Dear Madam Secretary,

On behalf of The Pan-Albanian Federation of America VATRA (THE HEARTH), I take this opportunity to reach out to you at this time of great disappointment that is shared by tens of millions, including many Albanians here and in the homeland.

Albanians will never forget President Clinton’s historical decision that you fully supported, to save the Albanian people of Kosova from genocide and ethnic cleansing less than two decades ago. We have followed with great appreciation your continued friendship toward the Albanian people, who are perhaps the most pro-American by a long tradition.

We remember with gratitude your visit to Albania a few years ago and, speaking to the Parliament, you told all the members and leaders present that they had to work together for the interests of their country, regardless of party differences. You cited your own example of working with Obama, for America that you both loved, despite the harsh rhetoric of the electoral campaign. You proudly displayed that inspiring spirit of democracy again today, when you congratulated Donald Trump and wished him to be a successful President for all Americans!

We are confident that Albanians will always enjoy your continued friendship and that of President Clinton. God bless you and your family.

Yours with warm regards,

Dr. Gjon Buçaj,

President, The Pan-Albanian Federation of America Vatra (The Hearth) 2437 Southern Blvd Bronx, NY 10458

DHURATA TË VEÇANTA PËR VATRËN NGA ARTISTËT YLLI KALAJA DHE RAKIPE KARAJ

by

 Kompozitori Ylli Kalaja kishte sjellë një dhuratë -surprizë, në bashkëpunim me djalin e tij Aulon Kalaja, babë e bir, kishin shkruar e kompozuar një këngë kushtuar Vatrës. Tekstin dhe notat e këngës së muzikuar u vendosën në arkivin e Vatrës. Po ashtu Ylli Kalaja dhuroi dhe CD-në e tij”PENTAGRAM” me 11 krijime origjinale të tij. Nga ana e saj, këngëtarja Rakipe Karaj dhuroi CD-në e saj më të fundit”MALL”, që përfshinë 11 këngë me muzikë të Ylli Kalaja, tekste të Aulon & Florian Kalaja, orkestruar nga Roland Guli./

Shumë nga vizitorët që vijnë në Vatër sjellin dhurata simbolike. Ka këtu simbole kombëtare, flamuj, albume me bukuri nga viset Kombëtare, albume historike, tablo piktureske, tablo pikture, CD me këngë atdhetare, ka statuja të Heroit Kombëtar Gjergj Kastrioti Skënderbeu, të Nënë Terezës, libra të rrallë etj… Kohët e fundit dhurata të veçanta janë dhuruar nga artistët Shqiptarë, kompozitori Ylli Kalaja dhe këngëtarja Rakipe Karaj.Të dy artistët ishin të ftuar nga Vatra për të kontribuar për Festivalin e katërt “Zërat e rinj 2016′ organizuar në Nju Jork nga Pranvera Çobo. Para se të largoheshin nga Nju Jorku artistët vizituan Vatrën. Kompozitori Ylli Kalaja është i njohur si fitues i çmimeve Kombëtare në Festivalet Kombëtare të  Fëmijëve për dekada, ndërsa këngëtarja e talentuar, Rakipe Karaj, e pëlqyer aq shumë për publikun shqiptar në vendlindje dhe në Diasporë, veçanërisht shumë e njohur me këgët me Pleqtë e Krujës.Ata ishin mysafirë të Kryetarit të Vatrës, dr. Gjon Buçaj, dhe zonjës së Tij, Nikoleta Buçaj. Mysafirët i shoqëronte artistja shkodrane, Pranvera Çobo, organizatore e katër Festivaleve për fëmijët e talentuar në SHBA, i njohur si Festivali “Zërat e Rinj “. Ylli Kalaja , ishte kryetar i Jurisë së Festivalit,”Zërat e Rinjë 2016” i organizuar me 13 Qershor 2016, në mjediset e  “Symphony Space” që ndodhet në Broadway, 95 street në Manhattan , Nju Jork, me të në Juri ishin edhe Rakipe Karaj , Ilir Dangëllia dhe Paulin Trieshi.

Gjatë vizitës në Vatër mysafirët u njohën me historinë 104 vjeçarë të Vatrës dhe historinë 107 vjeçare të Gazetës së saj “Dielli”. Kryetari i Vatrës dr. Gjon Buçaj u prezantoi qëndresën e Vatrës ndër vite falë kontributit të një grupi atdhetarësh që dhanë gjithçka që ajo të mos shuhej për më shumë se një shekull. Dr. Buçaj i ka njohur mysafirët  edhe me dinamikën e rritjes së degëve të Vatrës pas festimit të 100 vjetorit të themelimit të saj me 28 dhe 29 Prill 2012. Vatra ka nisë ripërtëritjen e saj duke ngritur degë nëpër shumë shtete të Amerikës dhe në Kanada, si dhe një forum me të rinjët e Vatrës. Vatranët, tha ai, janë idelalistët e Kombit. Dr. Buçaj i informoi mysafirët artistë edhe për mbështetjen që u jep Vatra veprimtarive kulturore në Diasporë, siç është edhe festivali i Zërave të rinj, një nismë dhe realzim i artistes pasionante Pranvera Çobo, njëkohësisht Vatra, tha ai, ka dhënë mbështetje për promovime librash e autorësh, ka dhënë dhe jep mbështetje për shkollat shqipe, mbështet koncertet e artistëve shqiptar etj. Po ashtu dr. Buçaj i ka njohur ata edhe me veprimtaritë e Vatrës në “Vitin e Faik Konicës-2016″, ku përveç promovimit të librit me dy novelat e Konicës, të pvrgatitura nga studiuesi Fotaq Andrea dhe sponsorizuar nga Vatra,  do të ketë edhe ekspozitë me objekte që i përkasin shqiptarit të madh Faik Konica.

Editori i Diellit, Dalip Greca, i njohu mysafirët me kontributin e madh që ka dhënë Vatra në fushën e kulturës për gjatë një shekulli: Ai përmendi Bandën Muzikore të Vatrës, që shkoi në Shqipëri dhe u shëndrrua Bandën Kombëtare të Shtetit Shqiptar, së bashku me Trupat e Vatrës. Më 1920 Banda muzikore e drejtuar nga Thoma Nassi, shkoi në Shqipëri, dhe u bë pjesë edhe e Luftës së Vlorës, madje dhe muzika e këngës Hymn të Luftës së Vlorës”Vlora-Vlora” është kompozuar nga dirigjenti i bandës së Vatrës,Thoma Nassi. Po ashtu, tha editori, Vatra kishte Hymnin e saj me tekst të shkruar  nga intelektuali Çam Refo Çaparit dhe muzikë të kompozuar nga Ajdin Asllani, ky Hymn u ringjall gjatë 100 vjetorit të Vatrës falë artistit Zhani Ciko dhe korit të Ansamblit Kombëtar dhe iu dhuruan Vatrës me rastin e 100 vjetorit nga ish kryeminsitri Sali Berisha.Editori përmendi punën e madhe që bëri Vatra edhe për dërgimin e artistëve amerikanë në Shqipëri, që në vitet 20-30 të shekullit të shkuar organizuan ekspedita njohëse dhe eksploruan folklorin shqiptar dhe ku u kthyen këtu promovuan Shqipërinë, duke dhënë koncerte me këngë që i mblodhën gjatë këtyre ekspozitave. Në Vatër, tha editori, kanë kontribuar dhe njerëz tyë mëdhenj, sic ka qene mjeshtri botëror i fotografisë, Gjon Mili, i cili në vitet 1926-27 ishet dhe anëtar i bordit të Vatrë, duke kryer detyrën  e arkëtarit të saj.

Mysafirët thanë se ndjeheshin të privilegjuar që preknin nga afër Historinë e Vatrës dhe objektet e kësaj historie, e cila ka bërë aq shumë për Kombin shqiptar. Ata falenderuan Vatrën dhe kryetarin e saj dr. Gjon Buçaj, për përkrahjen dhe mbështetjen që u japin artistëve dhe veprimtarive muzikore, si dhe për ftesën  për këtë vizitë në SHBA.

– Vatra, për ne, është simbol i dashurisë për Kombin dhe simbol i bashkimit, tha kompozitori Ylli Kalaja. Ai shfaqi mendimin se qeveria duhet të jetë më afër diasporës shqiptare dhe ta ndihmojë atë, sidomos në fushën e mbajtjes gjallë të gjuhës shqipe dhe traditave kombëtare, duhet të investojë edhe në fushën e kulturës dhe për shkollat shqipe. Më erdhi keq, shtoi ai, që në festivalin e fëmijëve nuk kishte një përfaqësues nga Konsullatat shqiptare dhe as asaj të Kosovës. Pranvera Çobo, për mua është artiste heroinë, tha Kalaja. Të organizosh një festival vetëm, të shpenzosh me financat e tua, të udhëtosh nëpër shtete të amerikës me ta ardhurat e tua, është tepër e vështirë. Dhe ajo nuk ka organizuar një, por katër festivale, dhe përfaqësuesit e shtetit shqiptar heshtin… të paktën t’u thonin:Urime…Ju lumtë…vazhdoni se nderoni Kombin!

Edhe këngëtarja Rakipe Karaj falenderoj Vatrën për ftesën dhe përgëzoi kryetarin e Vatrës për punën e shkëlqyer në shërbim të kombit.

Të dy artistët i dorëzuan kryetarit të Vatrës dhurata të veçanta; Kompozitori Ylli Kalaja kishte sjellë një dhuratë -surprizë, në bashkëpunim me djalin e tij Aulon Kalaja, babë e bir, kishin shkruar e kompozuar një këngë kushtuar Vatrës. Tekstin dhe notat e këngës së muzikuar u vendosën në arkivin e Vatrës. Po ashtu Ylli Kalaja dhuroi dhe CD-në e tij”PENTAGRAM” me 11 krijime origjinale të tij. Nga ana e saj, këngëtarja Rakipe Karaj dhuroi CD-në e saj më të fundit”MALL”, që përfshinë 11 këngë me muzikë të Ylli Kalaja, tekste të Aulon & Florian Kalaja, orkestruar nga Roland Guli.

Kryetari i Vatrës, që shoqërohej në këtë pritje nga zonja Nikoleta Buçaj, Marjan Cubi, Zef Përndocaj dhe Dalip Greca, falenderoi për dhuratat.(Gazeta Dielli)

 

PROF. DR. BESIM REXHAJ U PRIT NGA KRYETARI I VATRËS

by

Me 15 Qershor 2016, në mbrëmjen e së Mërkurës, Kryetari i Federatës Panshqiptare të Amerikës “VATRA” dr. Gjon Buçaj, priti në Selinë e Vatrës, Prof. Dr. Besim Rexhaj, studiues i njohur, kritik e specialist i njohur në fushën e Letrave,enkas në gjininë e Dramës, por jo vetëm, madje  jo vetëm në Kosovë dhe Shqipëri, por edhe në forume e katedra ndërkombëtare. Z. Besim Rexhaj ka qenë bashkëpunëtor më Dr. Ibrahim Rugovën dhe ka edituar Revistën”Fjala”, Revistë për Kulturë, Art dhe Letërsi, detyrë që e kreu deri në vitin 1999.

Karriera e z. Rexhaj ka pasë një rrugëtim të veçantë:ai ka kryer studimet në Fakultetin e Filologjisë, Letërsi dhe Gjuhë Shqipe në Universitetin e Prishtinës, më 1987,  ka diplomuar me studimin:” Struktura e romanit”Vdekja më vjen prej syve të tillë” të Rexhep Qoses në vitin 1993, ndërkohë që Magjistraturën e ka kryer me “Tipologjia e dramës së sotme shqiptare në Kosovës 195-1990”, ka doktoruar dhe ka marrë titullin akademik Profesor i Asociuar  me “Tipat e dramës së sotme shqiptare, 1948-2000”. Që nga nëntori i vitit 2011 ai është në Fakultetin e Arteve, Drejtimi i Arteve Dramatike. Shef i Katedrës së Dramaturgjisë së Drejtimit të Arteve Dramatike të Fakultetit të Arteve nga viti akademik 2012. Ka botuar artikuj studimorë, kritikë letrare, është përherë i pranishëm në shtypin e specializuar, pro edhe në atë të përditshëm. Udhëheq diskutimet për dramën, i pranishëm ne Juritë e konkurseve Kombëtare- Shqipëri-Kosovë etj. Janë me dhjetëra artikujt e botuar, ndërkohë që nga viti 2011 Shtëpia Botuse “Faik Konica” nisi botimi i Trilogjisë “Vorbulla’ vepër e Prof. Dr. Besim Rexhaj, e cila përbëhet nga tri vepra dramatike: Portreti i pakryer dhe Loja e pafund, dhe një dramë e titulluar “Vorbulla”, kjo e fundit e shfaqur në Teatrin e  Prishtinës në shkurt 2014…

Kryetari i Vatrës, dr. Gjon Buçaj, tha në fjalën e mirëseradhjes se Vatra ndjehet e nderuar që pret një personalitet të tillë, për të cilët si Kosova dhe Shqipëria kanë nevojë. Z. Buçaj e informoi mysafirin nga Kosova për zhvillimet në Vatër, për vullnetarizmin e vatranëve dhe gadishmërinë e komunitetit për të kontribuar për çështjen kombëtare, që Vatra e ka në themel të punës së vet. Dr. Buçaj tregoi edhe rastin e z. Rrustem Gecaj, një biznesmen patriot, që harxhoi mijëra dollarë për trasformimin e ndërtesës së Vatrës. Përmendi punën e jashtzakonshme të ish kryetarit të Vatrës, president nderi i Vatrës sot, ing. Agim Karagjozi, i cili ka meritë  të veçantë në blerjen e kësaj godine, duke qenë prej disa vitesh në krye të komisionit të mbledhjeve të fondeve për blerjen e godinës, ku dha një kontribut edhe i biri i tij, biznesmeni dhe anëtari i këshillit të Vatrës, Zyhdi Karagjozi.

Kryetari i Vatrës shprehu brengosjen për zhvillimet si në Shqipëri ashtu edhe në Kosovë, për korrupsionin, krimin, rendin e munguar, për varfërinë e madhe dhe për paaftësinë e klasës politike për t’i çuar përpara dy shtetet tona.

Vatra nuk prodhon fonde, nuk është organizatë bamirëse, por një federatë gjithëshqiptare, që ka në themel çështjen kombëtare, tha dr. Buçaj, i cili informoi edhe për praninë e tij në Tiranë, në Kongesin e Partisë që mbron çështjen Çame.

Mirëseardhjen mysafirit ia kanë uruar edhe zv/kryetari Asllan Bushati dhe anëtari i kryesisë, President i Fondit të Studentëve, pedagogu Mithat Gashi, ndërsa editori i Diellit e ka njohur mysafirim me trashëgiminë historike të Vatrës dhe rrugëtimin 104 vjeçar dhe punët e  mëdha të Vatrës në ndihmë të Kombit.

Prof. Dr. Besim Rexhaj ka falenderuar përzemërsisht për pritjen e ngrohtë. Kjo shtëpi juaja, tha ai, prodhon ngrohtësi kombëtare. Me Vatrën , shtoi ai, jam njohur që në moshën 14-15 vjeçare. Babi ynë i ndjerë, na përcillte dashuri për Vatrën e  Shqiptarëve të Amerikës. Ju admiroj, tha ai që ju e mbani gjallë pasurinë historike të Vatrës, duke e çuar më tej. Kurdo dhe kudo që përmendet Vatra, sjell në kujtesë madhështinë e Nolit dhe Konicës, por jo vetëm atyre, por dhe bashkëpunëtorëve, dhe atyre vatranëve të thjeshtë, që bënë aq shumë për Kombin. Ju vatranët, tha ai, keni bërë shumë për Kosovë e Shqipëri, edhe për trojet tona jashtë kufijëve,madje e bëni më mirë se ç’e bejnë dy shtetet tona mbrojtejn e shqiptarvë , dhe kjo ju nderon. Edhe brenga që shprehni për  zhvillimet në Kosovë e Shqipëri, është me vend, janë brengat e Vatrës që ka punuar aq shumë për Kombin dhe vazhdon të punojë edhe sot. Vatra e Shqiptarëve të Amerikës të imponon qëndresë e krenari Kombëtare. Vatra nuk ështështet,-kjo dihet, por ka lujatur rolin e  shtetit të munguar. Vatra është Institucion, madje i pazëvendësueshëm, tha mysafiri nga Kosova, profesori i nderuar Besim Rexhaj.

Më pas ai do të shkruante në Librin e vizitorëve fjalë të ngrohta, por të pamjaftueshme-siç shkroi ai vetë- për të shprehur ngrohtësinë e pritjes, krenarinë e të qenit në Vatrën e Shqiptarëve të Amerikës, në qendrën e shqiptarizmës, aty ku buron shpresa dhe mendimi atdhetar, aty ku gatuhet fryma Kombëtare për sot dhe të ardhmen e  Kombit.

Mysafiri e mbyll mesazhin : “Në “Vatrën” e Nolit dhe të Konicës e të sivëllezërve të tyre, njeriu e ndjen veten edhe më të fortë; me më shumë shpresë se fryma atdhetare e Kolosëve të Kombit do të ruhet për jetë e mot.”.

Prof. Dr. Besim Rexhaj është vëllai i zv/Kryetarit të Vatrës z. Agim Rexhaj, nga i cili shoqërohej gjatë vizitës së tij.

Korresp. i Diellit

 

VATRA dhe Çështja Çame

by

Çështja Çame, plagë e dhimbshme në trupin e kombit shqiptar,- peshë e rëndë në ndërgjegjen e kombit grek/

1 Gjoni1

NGA GJON BUÇAJ/

Përshëndetja e mabjtur ditën e Shtunë 4 Qershor 2016, në Kongresin e PDIU, në Tiranë/

Ju falënderoj për nderimin që i keni ba Federatës Panshqiptare të Amerikë “VATRA” me ftesat bujare Kryetarit të saj të Nderit, zotit Agim Karagjozi dhe mue, për të marrë pjesë në këtë Kongres. Kam kenaqsinë të jem sot mes jush dhe t’ju sjell përshëndetje të përzemërta, si nga zoti Karagjozi me keqardhjen që nuk mund të vinte për shkak të moshës, ashtu nga Kryesia dhe nga antarët e VATRËS, bashkë me urimin që Kongresi i juej të dali me suksese në dobi të interesavet kombëtare.

Partia e juej, si entitet politik i intergruem në sistemin elektoral, ka antarë e mbështetësa të ndryshëm, megjithatë ajo identifikohet si subjekt çam. Prandej programi i juej konsiderohet, vetëvetiu, me detyrë të dyfishtë, atë të angazhimevet për trajtimin e çashtjevet kombëtare në përgjithësi, si dhe detyrën e përpjekjevet për zgjidhjen e Çashtjes Çame në mënyrë veçantë.

Mbi këto detyra, mue si përfaqsues i VATRËS, të cilën kam nderin aktualisht t’a kryesoj me vetëdijen e përgjegjësisë së randë, që e ndaj me bashkëpuntorë dhe me këshilltarë dashamirës, më përket të sjell para jush këtu sot, në vija të shkurta, disa nga mendimet dhe brengat kryesore të saj.

Në vorbullën politike të këtyne 25 vjetve të tranzicionit të pambarim, dallohen me dritë dy arritje të mëdha: ndërtimi i “Rrugës së Kombit” dhe anëtarsimi i Shqipnisë në NATO. Por vërehet mungesa e madhe e disa realizimeve të  randësishme, mungesë që pengon shkëputjen nga trashigimia e randë e diktaturës komuniste, si edhe perforcimin e pozitës  ndërkombëtare të Shqipnisë dhe përmirësimin e jetës së qytetarëve të saj. Realizimet e mungueme janë kryesisht: dënimi i krimeve dhe i kriminelëve të komunizmit, hapja e dosjeve të Sigurimit dhe Ligji i Lustracionit, damshpërblimi dhe integrimi i shtresës së ish të përndjekunve politikë, kthimi i pronës së konfiskueme te i zoti legjitim, lufta e njimendtë kundër korrupsionit, reforma e sistemit gjygjësor dhe atij zgjedhor, e tjera. Si rrjedhim, ka ardhë rritja korrupsionit, rritja e papunësisë, thellimi i vorfnisë dhe krijimi i kulturës se krimit. Largimi i mija familjevet pa shpresë, drejt fatit të pasigurtë, asht padi e randë kundër sistemit që burgosë fukaranë për vjedhje të energjisë elektrike për të ba darkën, ndërsa mbron dhe mban në gji kriminela të njohun dhe hajna milionash.

Kongresi i juej po zhvillohet në nji kohë kur klasën politike shqiptare e presin vendime dhe veprime të nji randësie jetike për të ardhmën e Shqipnisë dhe të kombit shqiptar në përgjithësi. Rrethanat ndërkombtare janë të favorshme për shqiptarët sot ma shumë se sa ndonji herë tjetër në të kaluemen. Prandej elita politike aktuale e ka për detyrë sublime të angazhohet me përkushtim maksimal, për t’a shfrytëzue këtë fat para se të kalojë, për përparimin e vendit dhe për zgjidhjen e problemeve të kombit tonë të ndamë padrejtësisht në gjashtë shtete ku, jashtë Shqipnisë e Kosovës, shqiptarët sundohen nga të huejt që u mohojnë edhe të drejtat ma elementare.

Gjeneratat e ardhshme do t’a gjykojne eltën e sotme, nuk do të pyesin sa pasuni grumbullove, sa mjeshtri tregove në blemjen dhe manipulimin e votës, por do të pyesin se çka bane për atdheun e për kombin kur e pate në dorë. Mirëpo për të qenë në gjendje me i dalë zot efektivisht kësaj detyre, klasa politike duhet urgjentisht të bajë nji këthesë të domosdoshme që e imponon interesi jetik i kombit. Ma mirë vonë se kurr!

Asht fat i madh që miqt tanë, Bashkimi Europian dhe Shtetet e Bashkueme, po angazhohen seriozisht me e ndimue Shqipninë që t’a bajë këtë këthesë historike realitet, tue fillue me reformën e sistemit gjygjësor. Ambasadori Lu ka thanë nji të vërtetë shpresëdhanëse: “Reformën në drejtësi nuk e duan ministrat dhe deputetët kriminelë”. Te çohen më kambë kriminelat që e pengojnë reformën! …. Askush nuk ngrihet, prandaj  reforma do të kalojë, sepse pengimi i saj asht krim dhe kush e pengon asht kriminel.

Për nji njeri, i cili vjen mes nesh me pasion të sinqertë për të mirën tonë, si Ambasadori Donald Lu, nuk mund të ketë vi të kuqe, por mireseardhje. Ai vjen për t’a ngritë dhe nderue sovranitetin e shqiptarëvet, jo për ta cenue, prandej le t’i jemi thellësisht mirënjohës.

Nji tjetër problem i të gjithë shqiptarëvet që pret zgjidhje tash ma se 70 vjet, asht Çashtja Çame, nji plagë e dhimshme në trupin e kombit shqiptar, por edhe nji peshë e randë në ndërgjegjen e kombit grek. Si entitet çam dhe si forcë politike, juve ju përket të kordinoni dhe të harmonizoni aktivitetet dhe të shtyni shtetin dhe qeverinë shqiptare që të angazhohen për të drejtat legjitime te Çamëvet, pranë shtetit grek dhe pranë autoritetevet përkatëse ndërkombëtare.  Edhe na jemi të gatsheëm, si gjithmonë, t’a ndimojmë dhe t’a përkrahim cashtjen pa kursim, me mënyrat dhe mubndësitë që ka Vatra.

Greqia dhe Shqipnia, dy shtete kufitare me fate të ndërlidhuna, kanë nevojë të përbashkët për paqë dhe marrëdhanjë të mira fqinjësie, mbi baza të drejtësisë dhe të respektit reciprok. Por nuk mund të ketë marrëdhanje të tilla as paqë, pa zgjidhjen e drejtë të problemit çam. Kjo temë ngritet lart në rendin e ditës të shqiptarëvet në këto dit që Tirana do të presë ministrin e jashtëm të Greqisë. Fatkeqsisht parapamja për bisedime produktive nuk asht optimiste, tue pasë parasyshë deklaratat e ministrit Kotzias, me pretendime absurde në dam të Shqipnisë. Pala shqiptare duhet t’a kryejë  detyrën me korrektesë por me vendosmëni për kërkesat çame që mbështeten në të drejtat njerzore dhe në normat e konventavet ndërkombtare të nënshkrueme edhe nga shteti grek. Mbajtja e gjendjes së luftës me Shqipnine nuk asht vetëm absurditet i Greqise, por edhe nji abnormalitet i papranueshëm në mes dy shtetevet antare të NATO-s. Prandej Greqia t’a hjekë këtë status menjiherë, ose të paditet juridikisht në Forumin përkatës.

Sado që synojmë integrimin në Europë, nuk mund t’u nënshtrohemi shantazheve në dam të interesave kombtare, edhe pse të vonohemi. Këtë qendrim, simbas mendimit tone, duhet të mbajnë Shqipnija edhe Kosova.  Le t’urojmë dhe të punojmë të gjithë së  bashku për zgjidhjen e drejtë të Çashtjes Çame dhe për dit ma të mira për popullin tonë të lashtë e fisnik!

Tiranë, 4 qershor 2016