Presidenti i drejtohet Gjykatës Kushtetuse për shfuqizimin e Ligjit për Pronat

February 23, 2016 by dgreca

Presidenti Nishani i drejtohet Gjykatës Kushtetuese për shfuqizimin dhe pezullimin e zbatimit të ligjit nr.133/2015/

Tirane, 23 shkurt 2016

Presidenti i Republikës, Sh.T.Z. Bujar Nishani i drejtohet Gjykatës Kushtetuese për shfuqizimin, si i papajtueshëm me Kushtetutën e Republikës së Shqipërisë, dhe pezullimin e zbatimit të ligjit nr.133/2015 “Për trajtimin e pronës dhe përfundimin e procesit të kompensimit të pronave”.

KËRKESË

GJYKATËS KUSHTETUESE TË REPUBLIKËS SË SHQIPËRISË

KËRKUES: PRESIDENTI I REPUBLIKËS SË SHQIPËRISË

SUBJEKT I INTERESUAR: KUVENDI I REPUBLIKËS SË SHQIPËRISË

KËSHILLI I MINISTRAVE

AGJENCIA E KTHIMIT DHE KOMPENSIMIT TË PRONAVE

OBJEKTI: Shfuqizimi, si i papajtueshëm me Kushtetutën e Republikës së Shqipërisë, i ligjit nr.133/2015 “Për trajtimin e pronës dhe përfundimin e procesit të kompensimit të pronave”.

Pezullimi i zbatimit të ligjit nr.133/2015 “Për trajtimin e pronës dhe përfundimin e procesit të kompensimit të pronave”.

BAZA LIGJORE: Nenet: 4/1, 17, 18, 41, 42/1, 43, 131/a, 134/d të Kushtetutës së Republikës së Shqipërisë; Nenet: 6/1, 14 i KEDNJ; Neni 1 Protokolli 1 i KEDNJ-së; si dhe nenet 45 dhe 49/1 të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”.

KËRKESË GJYKATËS KUSHTETUESE TË REPUBLIKËS SË SHQIPËRISË

Presidenti Nishani kërkon opinionin e Gjykatës Kushtetuese

February 21, 2016 by dgreca

Presidenti i Shqipërisë, Bujar Nishani, ka kërkuar opinionin e Gjykatës Kushtetuese lidhur me nominimin e minsitrave, lëvizje kjo që mund të shkaktoj krizë qeveritare.Javën e kaluar, kryeministri Edi Rama, e shkarkoi ministrin e financave, pastaj e nominoi ish-ministrin e ekonomisë, Arben Ahmetaj, në këtë post, ndërsa Milva Ekonomi, u nominua për postin e zotin Ahmetaj, raporton AP nga Tirana.

Çështja e konfirmimit të ministrave të rinjë është, në një masë, procedurale dhe nëse presidenti Nishani e kompleton këtë veprim deri ditën e martë. Por, Partia Socialiste në qeveri, ka dyshime se Nishani po e zvarritë çështjen dhe kjo po ndikon në nominimet e tjera.

Bujar Nishani ishte zgjedhur president i Shqipërisë në vitin 2012 në Kuvend, nga Partia Demokratike, që atëherë ishte në qeveri. Kjo parti tash është në opizitë.

Raportohet se ai ishte problem për koalicionin qeverisës të krahut të majtë të zotit Rama, për shkak të vonesës së nominimeve të gjeneralëve ushtarakë, diplomatëve dhe gjyqtarëve të lartë.

Ermonela Felaj, anëtare e qeverisë e ngarkuar me raportet me kuvendin, ka thënë se koalicioni qeveritar mund të kërkoj shkarkim të Nishanit, nëse ndryshimet në qeveri nuk konfirmohen deri të martën. Sipas saj, kjo parashihet edhe me Kushtetutën e Shqipërisë, raporton AP.

Kosovë-Pezullohet “Zajednica”

November 10, 2015 by dgreca

-Gjykata Kushtetuese e Republikës së Kosovës miraton Masë të përkohshme për Marrëveshjen e Asociacionit të komunave me shumicë serbe/
-Ky Vendim për Masë të përkohshme është pa paragjykim ndaj ndonjë vendimi të mëtejshëm që do të nxirret nga Gjykata/
PRISHTINË, 10 Nëntor 2015-B.Jashari/ Gjykata Kushtetuese e Republikës së Kosovës miratoi Masë të përkohshme për marrëveshjen Kosovë – Serbi për krijimin e Asociacionit të komunave me shumicë serbe. Në njoftimin e sotëm të Kushtetueses kosovare thuhet:
Në seancën e mbajtur më 10 nëntor 2015, Gjykata Kushtetuese e Republikës së Kosovës mbajti këshillime dhe njëherazi miratoi Masë të përkohshme në rastin KO130/15, në kërkesën e paraqitur nga Presidentja e Republikës së Kosovës “Lidhur me vlerësimin e përputhshmërisë së ‘Asociacioni/Bashkësia i komunave me shumicë serbe në Kosovë – Parimet e përgjithshme/Elementet kryesore’ me frymën e Kushtetutës, nenin 3, paragrafin 1 [Barazia para Ligjit], Kapitullin II [Të Drejtat dhe Liritë Themelore] dhe Kapitullin III [Të Drejtat e Komuniteteve dhe Pjesëtarëve të tyre] të Kushtetutës së Republikës së Kosovës”.
Gjykata Kushtetuese ka nxjerrë dhe ka publikuar Vendimin për Masë të përkohshme, me të cilin suspendon implementimin e çfarëdo veprimeve të mëtejshme ligjore në bazë të këtyre “parimeve të përgjithshme/elementet kryesore” të Asociacionit/Bashkësisë së komunave me shumicë serbe në Kosovë deri në vlerësimin e përputhshmërisë së këtyre Parimeve me Kushtetutën nga ana e Gjykatës Kushtetuese.
Ky Vendim për Masë të përkohshme është pa paragjykim ndaj ndonjë vendimi të mëtejshëm që do të nxirret nga Gjykata për pranueshmërinë apo për meritat e kërkesës.
Në 30 tetor njoftohej se, Presidentja e Republikës së Kosovës, Atifete Jahjaga i ka drejtuar Gjykatës Kushtetuese kërkesën për interpretimin e përputhshmërinë së parimeve të asociacionit me Kushtetutën e Republikës së Kosovës.
Presidentja Jahjaga e ka referuar këtë kërkesë në Gjykatën Kushtetuese duke u bazuar në kompetencat e saj kushtetuese për të ngritur çështje kushtetuese në Gjykatën Kushtetuese.
Në Kosovë, “aksionet simbolike” të opozitës, me “rrethime” të foltores e kryesuesëve, fërshëllima, gjuajtje vezësh e gazi lotësjellës në sallën e seancave të Kuvendit, janë pjesë e kundërshtimeve, edhe me protesta në rrugë dhe me një peticion me mbi 200 mijë nënshkrime, të 4 marrëveshjeve të 25 gushtit me Serbinë dhe marrëveshjes së demarkacionit me Malin e Zi.
“Protesta jonë në Kuvend nuk do të ndalet dhe nuk do të lejojmë normalizimin e ‘Zajednicës’”, janë paralajmërimet e vazhdueshme të opozitës që nga fillimi i sesionit vjeshtor të Kuvendit të Kosovës.
Opozita shprehet me fjalën serbe “Zajednica” që do të thotë “Bashkësi” dhe nënkupton Bashkësinë/Asociacionin e komunave me shumicë sebe në Kosovë.

Kosovë – Qeveria riprocedon nesër në Kuvend amendamentet kushtetuese për Gjykatën Speciale

July 30, 2015 by dgreca

Nga Behlul Jashari/ PRISHTINË, 30 Korrik 2015/ -Sot po zhvillon seancë Kuvendi i Kosovës, ndërsa nesër Qeveria do të zhvillojë mbledhjen e rregullt, ku do të shqyrtojë dhe riprocedojë propozim-amendamentet kushtetuese që kanë të bëjnë me formimin e Dhomave të Specializuara dhe Zyrën e Prokurorit të Specializuar si dhe Projektligjin për Mbrojtjen Juridike dhe Mbështetjen Financiare të Personave të Akuzuar Potencialë në Proceset Gjyqësore pranë Dhomave të Specializuara.
“Riprocedimi në Kuvend, si dhe miratimi i këtyre amendamenteve kushtetuese nga ana e Kuvendit, është një hap me rëndësi të posaçme për Republikën e Kosovës në procesin e përmbushjes së obligimeve që shteti i Kosovës ka marrë ndaj partnerëve ndërkombëtarë me rastin e aprovimit në Kuvend, me dy të tretat e votave të deputetëve, të letërkëmbimit të Presidentes Jahjaga me Baroneshën Ashton, vitin e kaluar”, thuhet në njoftimin e dërguar nga Kryeministria kosovare.
Theksohet se, “përmbushja e obligimeve ndërkombëtare nga ana e Republikës së Kosovës në këtë drejtim, në asnjë mënyrë nuk e konteston luftën e drejtë të Ushtrisë Çlirimtare të Kosovës dhe nuk do të cenojë vlerat e luftës së popullit të Kosovës”. “Përmbushja e këtij obligimi nga institucionet e Kosovës, do të jetë në shërbim të zbardhjes së drejtësisë për dyshimet individuale që mund të lidhen me këtë proces dhe do të jetë një hap i rëndësisë së posaçme për proceset integruese euroatlantike, si dhe në shërbim të plotë të fuqizimit të mëtejshëm të partneritetit strategjik të Republikës së Kosovës me Shtetet e Bashkuara të Amerikës dhe me Bashkimin Evropian”, përfundon njoftimi nga Kryeministria kosovare.
Ishte paralajmëruar se, Gjykata Speciale do rikthehet në axhendë e riprocedohet në Kuvendin e Kosovës pasi të sigurohen votat e mjaftueshme. Në seancën e 26 qershorit mungonin 5 nga numri i nevojshëm 80 i votave të Kuendit 120 anëtarësh, kur opozita nuk mori pjesë e nga pozita 7 ishin kundër, 2 abstenuan e 4 mungonin.
Për miratim ndryshimesh kushtetuese dhe disa ligjeve të rëndësishme në Kuvendin e Kosovës duhen edhe dy të tretat e votave të 20 deputetëve të komuniteteve pakicë, 10 prej të cilëve janë serbë.
THAÇI: PROCES NË NJË RRETHANË TË FAVORSHME PËR ANËTARËSIMIN E KOSOVËS NË UNESCO
Në Kuvendin kosovar, në seancën e sotme plenare, e cila është duke u zhvilluar, zv/kryeministri e ministri i Jashtëm Hashim Thaçi tha se, një nga prioritetet kryesore të qeverisë për këtë vit është anëtarësimi i Kosovës si shtet në organizata të ndryshme rajonale, evropiane dhe ato botërore. “Në kuadër të kësaj është edhe përkushtimi dhe zotimi ynë që të anëtarësohemi sa më shpejtë në UNESCO, si një organizatë që do të na hapë perspektivë edhe për anëtarësimin edhe në shumë organizata tjera të OKB-së”, u shpreh ai, duke shtuar se mendonte se është një situatë e rrethanë e përshtatshme për Kosovën që të aplikojë dhe të anëtarësohet.
“Natyrisht se është bërë lobim i fuqishëm nga ana e Kosovës së bashku me partnerë ndërkombëtarë. Në të njëjtën kohë jemi dëshmitarë edhe të reagimeve shqetësuese të qeverisë së Serbisë. Por, ajo që është shumë me rëndësi mund të konfirmoj se i tërë procesi është duke shkuar në një rrethanë të favorshme për anëtarësimin e Kosovës në UNESCO”, theksoi Thaçi në përgjigje të një pyetje parlamentare.
Në 17 korrik, MPJ kosovare bënte të ditur se, Kosova sapo kishte aplikuar për anëtarësim në UNESCO, agjencionin e Organizatës së Kombeve të Bashkuara për arsim, shkencë dhe kulturë, ndërsa anëtarësimi pritet në nëntor.
Seanca e sotme e Kuvendit të Kosovës ka nisur me deklarime jashtë rendit të ditës dhe me pyetje parlamentare, ndërsa në axhendën vijuese është shqyrtimi i dytë i Projektligjit për digjitalizimin e transmetimeve radiodifuzive tokësore dhe zgjedhja e 5 anëtarëve të bordit të Radio Televizionit publik, për të cilët u zhvillua procesi i votimit të fshehtë.
Në Kuvendin e Kosovës, ende nuk janë në axhendë ndryshimet kushtetuese drejt transformimit të FSK në FAK, për të cilin ka kushtëzime nga Lista Srpska.
Në 20 korrik, para se të futen në axhendë seance plenare të Kuvendit propozim-amendamentet kushtetuese të propozuara nga qeveria për transformimin e FSK-së në Forca të Armatosura të Kosovës, me kërkesë të shumicës së përfaqësuesve të subjekteve politike, Kryesia e Kuvendit vendosi “t’u japë kohë partnerëve të koalicionit të zhvillojnë konsultimet”.
Lista Srpska, me 10 deputetë, pjesë e koalicionit qeverisës në deklarata ka shprehë qëndrimin se, “nuk do të votojë transformimin e Forave të Sigurisë së Kosovës në Forca të Armatosura të Kosovës derisa të përmbushen katër kushte”, të cilat janë: Formimi i Bashkësisë së Komunave Serbe, emërimi nga komuniteti serb i zëvendësdrejtorit të Agjencisë Kosovare të Inteligjencës, zëvendësi i komandantit të FSK-së të jetë poashtu nga radhët e komunitetit serb si dhe ndërprerja e privatizimit nëpër komuna, përfshirë Brezovicën (qendër turistike) dhe Trepçën (kombinatin xehtaro metalurgjik kimik ).
Derisa nuk ka as paralajmërime se kur do jenë në axhendë ndryshimet kushtetuese drejt krijimit të Forcave të Armatosura të Kosovës, sot në seancën e Kuvendit, në axhendë janë çështje të tjera, përfshirë edhe interpelancën e ministrit të Bujqësisë, Pylltarisë dhe Zhvillimit Rural, Memli Krasniqi, rreth të cilës pikë e pikave tjera të rëndit të ditës pati debat.
TRE PARTITË OPOZITARE, VV, AAK E NISMA DEKLARATA KUNDËR RIPROCEDIMIT TË GJYKATËS SPECIALE
Tre partitë opozitare të Kosovës, VV, AAK e Nisma, në deklarata të veçanta u rishprehën dje kundër riprocedimit në Kuvend të Gjykatës Speciale.
“Vendimi i Kuvendit është fuqiplotë dhe nuk mund të prapakthehet”, thekson Lëvizja Vetëvendosje.
“Kuvendi i Republikës së Kosovës ka refuzuar miratimin e Amendamentit kushtetues për themelimin e Dhomave të specializuara dhe Zyrës së Prokurorit të Specializuar (Nenin 162). Ky vendim i Kuvendit të Republikës i bazuar në votën e lirë të deputetëve sipas përgjegjësisë së tyre është legjitim, fuqiplotë dhe i pandryshueshëm. Ai është i detyrueshëm për të gjithë”, thuhet në deklaratën e VV-së.
Aleanca për Ardhmërinë e Kosovës vlerëson se Kuvendi ka votuar për amendamentet kushtetuese që lidhen me Gjykatën Speciale dhe rezultati ka qenë negativ. “Përpjekjen për ta rikthyer të njejtën çështje edhe një herë tjetër në votim e konsiderojmë të panevojshme dhe në kundërshtim me praktikat parlamentare dhe arsyeshmërinë e një hapi të tillë duhet ta japin PDK dhe LDK. Ne i kemi kundërshtuar me votë amendamentet kushtetuese dhe besojmë se kjo është krejtësisht e mjaftueshme, pa provuar forma të tjera të kundërshtimit të kësaj Gjykate”, thekson AAK.
Nisma për Kosovën përkujton se, në seancën e Kuvendit të mbajtur në 26 qershor, “pas një debati të gjatë dhe shterues, deputetët përmes vullnetit të tyre të lirë morën vendim të mos miratojnë amendamentin 24, i cili do t’i hapte rrugë krijimit të Gjykatës Speciale”.
“Ky vendim është obligativ për të gjithë, pa përjashtim, sikur për ata që kanë votuar për ashtu edhe për ata që kanë votuar kundër. Zbatimi i këtij vendimi nuk ka alternativë”, sipas Nisma-s.
Një ditë pas mosarritjes së numrit të nevojshëm të votave në Kuvend për Gjykatën Speciale, qeveria në 27 qershor, në një mbledhje konsultative paralajmëroi riprocedim dhe për këtë edhe bashkërendësim e bisedime edhe me opozitën. Por, tre partitë opozitare, VV, AAK e Nisma në një deklaratë të përbashkët shprehën dhe vazhdojnë të mbajë qëndrimin se, “vendimi i Kuvendit të Kosovës për refuzimin e ndryshimeve kushtetuese për themelimin e Gjykatës Speciale është përfundimtar dhe i pakthyeshëm”.
Por, nga liderët e partive më të mëdha të koalicionit qeverisës, PDK e LDK, është kërkuar që deputetët të mos shkojnë në pushimet e verës para riprocedimit nga qeveria dhe vendimit të Kuvendit të Kosovës për Gjykatën Speciale.

Ligji i Arsimit të Lartë,pozitë–opozitë takohen në Gjykatën Kushtetuese

July 23, 2015 by dgreca

Nga Shefqet Kërcelli/
Në Shqipëri vazhdojnë debatet për ligjin e ri për Arsimin e Lartë i cili miratua pas mesnatës së datës 21 korrik me votat e shumicës së majtë. Kryetari i opozitës Lulzim Basha paralajmëroi dje një aksion për të penguar hyrjn e tij në fuqi, që nga ndërhyrja pranë presidentit deri të ankimimi në Gjykatën kushtetuese. Por nga ana e tij kryeministri Edi Rama tha se ligji përfaqëson një reformë revolucionarizuese të sistemit të lartë arsimor në vend. Seanca maratonë e datës 21 korrik në parlament dhe debatet e zjarrta mes shumicës dhe opozitës, nuk kanë mjaftuar për të zbutur zhurmën e madhe që ka shkaktuar ligji për arsimin e lartë. Përkundrazi. Edhe në ditët në vijim po vazhdojnë replikat në distancë mes palëve. Ja si u shprehën liderët e dy forcave kryesore politke në vend për këtë ligj të rëndësishëm.
Rama: Ligji garanton konkurrencën dhe nuk përjashton askënd.
Kryeministri Edi Rama mbrojti ligjin e arsimit të lartë, të kaluar ditën e martë në seancën e posaçme të Kuvendit, duke deklaruar se ligji garanton konkurrencën dhe nuk përjashton asnjë nga e drejta e arsimimit. “Produkti është shumë i mirë dhe është për të ardhur keq kundërshtia që bëhet në emër të të varfërve, duke spekuluar në mënyrën më të padenjë dhe duke gënjyer në mëyrën më të papranueshme. Ligji garanton konkurrencë dhe që asnjë i ri apo e re, që ka dëshirë të ndjekë universitetin dhe që e meriton, të mos pengohet nga varfëria në familje, sepse është shteti që do të mbështesë të gjithë fëmijët e shtresës së varfër për të kryer me sukses përfundimet ku ata dëshirojnë”, tha Rama. Ligji mbështete financiarisht jo vetëm këtë shtresë, por edhe studentët e shkëlqyer dhe ata që zgjedhin programet e përcaktuara si prioritet kombëtar. “Ky është një ligj që hap rrugën për të sjellë Shqipërinë në kohën e re europiane pas 20 e ca vitesh korrupsion dhe privilegjesh për një kastë që është financuar nga buxheti i shtetit dhe nuk ka kthyer mbrapsht investimin e marrë”, deklaroi kryeministri. Rama ripërsëriti se financimi shtetëror shkon i gjithë për të mirën publike, për rritjen e konkurrencës dhe cilësisë. Basha: Në Kushtetuese ligjin e arsimit të lartë. Rama-Meta, shkatërruan autonominë
Partia Demokratike paralajmëoi kundërshtimin deri në Gjykatën Kushtetuese të ligjit për arsimin e lartë, të miratuar ditën e martë nga mazhoranca. “Ne do të marrim një aksion të gjerë informimi dhe ndërgjegjësimi të çdokujt, sesi hidhen në kosh të plehrave përpjekjet e mijëra gjimnazistëve? Si goditen të zotët, të aftët? Si stimulohen të paaftët? Çfarë do të thotë kjo për studentët? Një fushatë ndërgjegjësuese që nis sot e do të vazhdojë. Së dyti Partia Demokratike do të ndërmarrë një aksion masiv institucional, që nga Presidenti e deri tek Gjykata Kushtetuese, ku opozita do të jetë në krah të studentëve dhe pedagogëve që kanë të drejtë”, tha Basha. Për opozitën është akoma më e qartë se ligji u shërben interesave të një pakice njerëzish. “Me vendimin e djeshëm është hapur një betejë e madhe me njërën anë qeverinë dhe pakicën klienteliste korruptive, interesat e të cilës u shpërblyen dje, dhe nga ana tjetër të gjithë shqiptarët, që nga fëmijët e deri tek prindërit e gjyshërit”, u shpreh kreu i opozitës. Basha ironizoi duke thënë se ligji i arsimit të lartë është votuar nga deputetë pa diplomë, me diploma të rreme dhe me rekorde kriminale. Basha përsëriti qëndrimin e shprehur edhe në seancë plenare nga deputetët e opozitës, kur thanë se ligji do të rrisë kostot dhe tarifat duke u hequr të drejtën e arsimimit shtresave të varfra. Por jo vetëm kaq. Sipas Bashës, ligji shkatërron cilësinë përmes shkatërrimit të autonomisë me një qëllim të vetëm; vënien nën kontroll të pedagogëve. “Me këtë vendim, Rama-Meta kërkojnë të përdorin si marioneta pedagogët, në shtesa të pushtetit në vend të zërit të pavarur dhe të përvojës akademike shkencore që janë dhe duhet të jenë”, deklaroi Basha. Ligji i ri, i cili është kundërshtuar dhe nga një pjesë e pedagogëve dhe studentëve, do të nisë nga zbatimi vitin e ardhshëm akademik, në mënyrë që gjatë këtij harku kohor të përgatiten dhe të gjitha aktet e tjera nënligjore.