-Shtypi kosovar: Përpjekja 2 për Specialen këtë javë/
Nga Behlul Jashari/ PRISHTINË, 27 Korrik 2015/-Nuk do të shkohet në pushim para riprocedimit të amendamentit kushtetues dhe vendimit për Gjykatën Speciale, është përkushtimi nga institucionet e Kosovës i ritheksuar edhe në fundjavën e kaluar, ndërsa ditën e parë të javës vijuese, sot, u mblodhën Kryesia e Kuvendit e kryetarët e grupeve parlamentare me axhendë përgatitjet për seancën plenare, e cila u vendos të mbahet të enjten e 30 korrikut.
“Kemi kërkuar që deputetët të mos shkojnë në pushime para se të vendosë Kuvendi për Gjykatën Speciale, përkatësisht para se ta riprocedojmë”, është shprehur kreu i qeverisë së Kosovës, Isa Mustafa, në konferencën për shtyp të premtën.
Qeveria e Kosovës pritet ta riprocedojë amendamentin nr. 24 në Kushtetutën e Republikës për krijimin e Gjykatës Speciale, pasi të sigurohen të pakëtën 80 vota të Kuvendit 120 anëtarësh, përfshirë këtu edhe dy të tretat e 20 deputetëve të komuniteteve pakicë, prej tyre 10 serbë. Në seancën e Kuvendit në 26 qershor për miratim të amendamentit mungonin 5 vota, derisa 75 deputetë ishin pro, 7 kundër, 2 abstenuan e opozita nuk mori pjesë në votim.
Votat kundër dhe abstenim ishin nga deputetët e koalicionit qeverisës, PDK-së, që ishin në seancë, ndërsa 4 mungonin kur u votua. Por, në zhvillimet pasuese, sipas burimeve mediale të raportuara javën e kaluar, “vetëm katër nga 13 deputetët e PDK-së, që nuk i dhanë mbështetje amendamentit kushtetues që do t’i hapë rrugë themelimit të Gjykatës Speciale, nuk kanë ndryshuar qëndrim”, prandaj, “mbështetje Speciales pritet t’i japin 85 deputetë të koalicionit qeverisës”.
“Përpjekja 2 për Specialen këtë javë”, është një kryetitull në shtypin e sotëm kosovar, sipas të cilit “burimet kanë thënë se partitë e koalicionit janë ‘bindur’ se do t’i bëjnë 80 votat e nevojshme për ta kaluar Specialen”.
“Në qeveri nuk është në diskutim plotësimi apo ndryshimi i amendamentit ekzistues, të cilin Gjykata Kushtetuese e kishte cilësuar të jetë në përputhje me Kushtetutën”, thekoson shtypi.
Në 27 qershor, në një mbledhje konsultative të qeverisë u paralajmërua riprocedim dhe për këtë bashkërendësim e bisedime edhe me opozitën që nuk votoi në Kuvend ndryshimet kushtetuese, por në 30 qershor tre partitë opozitare kosovare , me gjithësej 31 deputetë, në një deklaratë të përbashkët janë shprehur se, “vendimi i Kuvendit të Republikës së Kosovës për refuzimin e ndryshimeve kushtetuese për themelimin e Gjykatës Speciale, i datës, 26 qershor 2015 është përfundimtar dhe i pakthyeshëm”.
“Opozita organizohet kundër Speciales”, shkruante dje shtypi në Prishtinë, sipas të cilit, “nëse kjo çështje procedohet sërish në Kuvend nga ana e qeverisë, opozita do ta kundërshtojë atë me metoda parlamentare e përtej parlamentare me qëllim që ta mbrojë demokracinë në vend”.
Se kur do jetë Gjykata Speciale në axhendën e seancës plenare, Kryesia e Kuvendit të Kosovës pritet të vendosë në një mbledhje tjetër e jo sot, kur në rend dite ishin çështje të tjera.
Të enjten, në 30 korrik, në orën 10:00, Kuvendi i Republikës së Kosovës do të mbajë seancën e radhës.
Kështu vendosi sot Kryesia e Kuvendit të Republikës së Kosovës, në mbledhjen e saj të përbashkët me kryetarët e grupeve parlamentare, të udhëhequr nga Xhavit Haliti, nënkryetar i Kuvendit.
Në seancën e të enjtes, pas deklarimeve jashtë rendit të ditës dhe pyetjeve parlamentare, deputetët do të shqyrtojnë kërkesën për interpelancë me ministrin e Bujqësisë, Pylltarisë dhe Zhvillimit Rural, Memli Krasniqi.
Kryesuesi i mbledhjes, Haliti, citoi shkresën e Sekretarit të Përgjithshëm të Qeverisë, Fitim Krasniqi, sipas të cilës, duke parafrazuar përgjigjen e ministrit, vlerësohet se pikat e adresuara në kërkesën e parashtruar për Interpelancë, veçanërisht tek pjesa e rekomandimeve, nuk kanë të bëjnë me fushën e përgjegjësive të ministrit të Bujqësisë, Pylltarisë dhe Zhvillimit Rural, sepse ato lidhen me fushat e përgjegjësive të institucioneve tjera.
Më pas, në seancë do të shqyrtohet për herë të dytë Projektligji për digjitalizimin e transmetimeve radiodifuzive tokësore dhe pritet të zgjedhen pesë anëtarë të Bordit të Radio Televizionit të Kosovës.
EDHE 86 STUDENTË NË UNIVERSITETET AMERIKANE PREJ KOSOVE
– Ministri kosovar i Arsimit, Shkencës dhe Teknologjisë, Arsim Bajrami, kërkoi nga përfituesit e bursave për studime në ShBA që më pas të kthehen e të transformojnë lidershipin-/
Nga Behlul Jashari/ PRISHTINË, 24 Korrik 2015/-Ministri kosovar i Arsimit, Shkencës dhe Teknologjisë, Arsim Bajrami ka marrë pjesë në ceremoninë e organizuar nga USAID për grupin e dytë të studentëve, të cilët kanë përfituar bursa nga Programi për Transformimin e Lidërshipit – Bursat dhe Partneritet (TLP-SP), dhe janë gati të nisen për studime master në universitetet amerikane.
Ministri Bajrami iu tha studentëve se kanë arsye për t’u gëzuar, sepse tani kanë një mundësi jetësore për të marrë një arsim të lartë të avancuar të modelit amerikan dhe kjo do t’iu ndërrojë atyre jetën. “Jam i sigurt se ju do të jeni lidërët e së ardhmes. Kur të ktheheni do t’i qaseni jetës pak më ndryshe. Më shumë se sa një diplomë masteri e universiteteve amerikane, është një kulturë e re që do të sillni, një ndërrim i mentalitetit. Do të shihni se të pamundurat bëhen të mundura me përkushtim, me qasje dhe me angazhim”.
Ministri, po ashtu porositi përfituesit e bursave që të jenë të përkushtuar gjatë studimeve, të përfaqësojnë Kosovën në mënyrë dinjitoze dhe të jenë edhe ambasdorë të Kosovës për kohën sa zgjasin studimet. “Mos harroni se ju duhet të ktheheni në Kosovë dhe të kontribuoni në vendin tuaj”.
Ministri Bajrami u shpreh i gëzuar që Qeveria e Kosovës ka mundur që bashkë me USAID-in të ndihmojë në këtë Program dhe iu premtoi studentëve se pas kthimit në Kosovë do të bisedojnë për angazhimin e këtyre studentëve në sfera të ndryshme, për të mundësuar transformimin e lidershipit dhe zhvillimin e vendit.
Drejtori i Misionit të USAID-it, James Hope, tha se këta studentë kanë kaluar nëpër një proces të vështirë të përzgjedhjes, ndërsa u shpreh i sigurt në suksesin që do të tregojnë gjatë studimeve në universitetet më të mira amerikane
Programi i TLP-SP implementohet në partneritet me World Learning, Agjensionin e Shteteve të Bashkuara të Amerikës për Zhvillim Ndërkombëtar (USAID) dhe MASHT-in. Me grupin e dytë nga ky Program, 86 studentë do të ndjekin studimet master në universitetet amerikane.
Kosovë, EULEX i përgjigjet mocionit të Vetëvendosjes
PRISHTINË, 22 Korrik 2015/-Në seancën plenare të Kuvendit kosovar, sot pasdite, po zhvillohet debat parlamentar lidhur me veprimtarinë e misionit të BE-së në Republikën e Kosovës. Debati ka hyrë në axhendë me kërkesën e deputetes Albulena Haxhiu (nga Lëvizja Vetëvendosje), e mbështetur nga 5 deputetë nënshkrues, ndërsa po zhvillohet në vazhdimin e seancës së ndërprerë, në 16 korrik për shkak të mungesës së kuorumit.
Misioni i BE-së, EULEX “në përgjigje të mocionit substancial të sponsoruar nga Vetëvendosje”, sipas njoftimit të dërguar, “dëshiron të rikujtojë si vijon:
Për rastet “e reja” të EULEX-it:
Po, natyrisht se ka raste të reja të EULEX-it, meqenëse ligjet e miratuara në prill 2014 përcaktojnë se prokurorët e EULEX-it punojnë normalisht në rastet që janë duke u zhvilluar, përveç në “rrethana të jashtëzakonshme kur një rast mund t’i caktohet një prokurori të EULEX-it” përmes një vendimi të përbashkët të autoriteteve kompetente, të cilët janë Kryeprokurori i Shtetit dhe Kryeprokurori i EULEX-it. Në pajtim me këto ligje, që nga muaji prill 2014 ishin parashtruar 46 kërkesa të tilla. Nga ky numër, prokurorëve të EULEX-it u janë caktuar 38 raste të reja, prej të cilave 31 raste janë në kompetencë të Prokurorisë Themelore në Mitrovicë dhe 7 raste janë në kompetencë të PSRK-së. 7 kërkesa ishin refuzuar, dhe 1 kërkesë ishte tërhequr. 8 raste i janë caktuar një ekipi të përbashkët që përbëhet prej prokurorëve të EULEX-it dhe prokurorëve vendës.
Lidhur me kompetencat ekzekutive të EULEX-it në pjesën veriore të Kosovës:
Rikujtojmë se EULEX-i ende i mbanë kompetencat e tilla (në bazë të Nenit 7 paragrafi 1 dhe 5, dhe Neni 7A – i përshkruar lart – të Ligjit mbi Juridiksionin). Kushdo që thotë ndryshe i ka faktet e gabuara, që nuk kanë bazë ligjore dhe prandaj janë të pasakta.
Ndërsa – përkitazi me përfshirjen e EULEX-it në pjesën veriore të Kosovës – në të shtënat e pohuara të cilat kanë sjellë deri te vdekja e një personi të ri në fshatin Suhodoll të Mitrovicës, shpjegojmë si vijon:
Nga respekti për familjet e viktimve dhe në përputhje me praktikat e prokurorisë në Kosovë, raportet nga autopsia nuk mund të publikohen. Edhe për këtë rast raporti i autopsisë nuk përbën përjashtim nga kjo rregull. Mirëpo, prokurori kompetent i EULEX-it ka autorizuar lëshimin e këtij informacioni për publik:
“Nuk ka pasur të shtëna. Viktima nuk ka pasur shenja të plagëve të shkaktuara nga plumbi. Gjatë rindërtimit të rastit në vendin e ngjarjes, njërit (dhe të vetmit person) i cili më herët kishte aluduar për të shtëna, nuk po i kujtohej një incident i tillë.”
Lidhur me pikën tetë të mocionit, ne duam të përsërisim se raporti i përmendur është një fabrikim.
Ja se çfarë kishte deklaruar zëdhënësi i Përfaqësuesit Special të BE-së Stojan Pelko, më 12 qershor 2015:
“Ne nuk kemi njohuri për një raport të tillë dhe prandaj nuk mund të spekulojmë se kush dhe me çfarë motivi e ka hartuar atë.
Sidoqoftë, ne mund të konfirmojmë qartazi se raporti nuk ka qenë i përgatitur nga EULEX-i, ShVJE ose Komisioni Evropian, e as për asnjërën prej këtyre organizatave.” /B.Jashari/
POLITIKANËT E KOSOVËS MË DETYRUAN TA BRAKTIS SËRISH ATDHEUN,PAÇIN FAQEN E ZEZË!
Në vend të reagimit/
Distancohem nga çdo punë në institucionet publike, që lidhen, me PDK-LDK/
Nga Jeton Kelmendi, Prishtinë/
Ndonëse kishte 8 vite që isha larguar nga Kosova edhe pse e kisha njohur natyrën e funksionimit të jetës institucionale ne vendin tim, këto vite më mashtruan. Mendova se gjërat kanë ndryshuar dhe vërtet kishin ndryshuar, por jo për të mirë, por në atdheun tim çdogjë është degraduar deri në shkallën më ekstreme. Me propozimin e disa miqve të mij, provova të bëhem anëtar i Bordit të Mediumit Publik RTK.Pa modesti, mendova se mund të shërbej per evndin tim nga ai pozicion.Që në fillim një nga anëtaret e komisionit parlamentar më tha se koti po konkurron, sepse këto punë i ka në dorë partia, në fakt dy partitë më të mëdha LDK-PDK. E merrja me mend edhe ketë, por jo edhe centralizimin e krejtë pushteteve që lidhen me tre emra: Hashim, Kadri dhe Isa. Nejse, për mos t’u marrë më shumë me ketë punë, po dal tek ngjarja që më ndodhi.Erdhi dita, kur 55 kandidatët që kishim konkuruar për anëtarë të Bordit të RTK-së,të dalim para komisionit parlamentar për t’u intervistuar.Isha diku pas te 20-tit dhe sapo hyra në sallën S-2, ku,ky grup i quajtur Ad-hok intervistonte, më morën në pyetje për afër një minutë e gjysëm. Realisht nuk di çka më pyetën, sepse doren në zemër,ky komision nuk kishte nivel as për së afërmi që të dijë gjë nga shkenca e medies, për të mosthënë se shumica nga ata nuk dinë as të shkruajnë dhe as të flasin mirë gjuhën e tyre. Nejse edhe kjo nuk është punë e imja sepse ata dhe ato i ka sjellur aty “populli”, por ajo që më bëri përshtypje ishte mungesa e disave nga anëtaret, nga njëra anë, ndërsa në anën tjetër disa flisnin me telefona, e disa bënin shaka. Sido që të jetë ky grup bëri punën e vet, në fakt bëri punën e shefave të tyre: përzgjodhën 8 anëtarët që shkojnë në Kuvend për t’u votuar. Nga 55 konkurrentet, sigurisht që kishte kandidat me gradashkencore, me përvoja ndërkombëtare, kishte autoritete të njohura ndërkombëtarisht në fusha të artite tje, por në mesine atyre 8 të përzgjedhurve nuk hynri asnjëri.Nga të përgjedhurit e këtij grupi parlamentarë, ka pensioniste, njerëz pa profesion, por sigurisht militante të partishëm.Fundja kjo është e drejta e komisionit të përzgjedhin këtë duan ata, nuk ka rëndësi pse nuk janë profesionist, me rëndësi është se ata janë përsona të besuar te shefave që po e sundojnë ketëpopull.Ajo që dua të them është se Kosovës nuk i duhet më të hap konkurse për asnjë vend pune në institucionet publike, sepse kot i mundon njerëzit të konkurojnë, të shpenzojnë, kur nuk janë të preferuarit e shefave. Ndoshta konkurset hapen sa për meditje të komisioneve parlamentare, ndërsa kush punësohet dihet mirë që në fillim, paar konkursit,ashtusiç u ditën këta 8 persona, që para intervistimeve, sepse këta ishin më të “mençur”, pra ishin përsonat e partishëm. Unë mund të jem ekspert i cilësdo parti, por jo nuk mund të jem i partishëm dhe delitant, prandaj mua nuk më bëjnë punë as të qenit veteran i luftës, as përgatitja shkollore me dy master dhe para përfundimit të doktoratës, as të qenit shkrimtar i përkthyer në dhjetra gjuhë dhe lauerat i shumë çmimeve ndërkombëtare, prandaj përjashtoj vetën nga çdokonkurim në institucionet publike të vendit, derisa atdheun time ta sundojë kjo kastë politike. Vendimi hyn në fuqi që nga sot. Gjithashtu ju kërkoj falje disa anëtarëve të komisionit që u detyruan të më gënjejnë (nuk i detyrova unë, por vetëvetën e detyruan para meje) se do më vlerësojnë me maksimum pikësh, gjithnjë duke u bazuar në bagazhin timprofesional dhe shkencor, e artistik,ndërsa urdhërat nga Lartë-Partia ju kishte ardhur:që duhen vlerësuar të preferuarit e shefave, prandaj prej sot distancohem nga çdopunë apo bashkëpunim me partizanët e partive që po sundojnë popullin tim.Në pamundësi për t’i shërbyer vendit tim, më ka mbetur vetëm një shpresë: ta lus Perëndinë ta shpëtojë atdheun tim, sepse keq i kapunët kypopull nga kjo kastë politike, ndëresa unë i faleminderohem Zotit që nuk varem nga ata dhe serish detyrohem ta lë Kosovën time, dhe të ktheme në atdheun e huaj (Belgjikë), atje ku mënyra se si trajtohem më dhemb, jo përfaktin se trajtohem keq, por se ashtu do të doja të trajtohësha në vendintim.Ndërsa këtyre politikanëve u mbetet faqja e tyre e zezë!
Prishtinë/ me 21 korrik 2015
Ambasadori gjerman Ischinger vlerëson progresin e Kosovës
Nga Behlul Jashari/ PRISHTINË, 15 Korrik 2015/ Kryeministri i Republikës së Kosovës, Isa Mustafa, priti sot pasdite në takim ambasadorin gjerman Wolfgang Ischinger.
Gjatë takimit u bisedua për proceset aktuale në Kosovë, për progresin që po arrihet në shumë fusha si dhe për bashkëpunimin e Kosovës me Gjermaninë.
Kryeministri Mustafa shprehu mirënjohjen e popullit dhe të Qeverisë së Kosovës për përkrahjen e vazhdueshme që Gjermania po jep për Kosovën, duke theksuar përkushtimin e Kosovës për zgjerimin e mëtejshëm të marrëdhënieve bilaterale me Gjermaninë.
Kryeministri Mustafa po ashtu e falënderoi ambasadorin Ischinger për përkrahjen e tij personale për Kosovën në proceset shtetformuese dhe për mbështetjen që po vazhdon ta jap në përfaqësimin e Kosovës në arenën ndërkombëtare, duke përfshirë pjesëmarrjen në Konferencën e Munihut për Siguri.
Me këtë rast, kryeministri Mustafa vlerësoi lart konferencën e Munihut për Siguri, si një prej ngjarjeve vjetore më të rëndësishme globale që synon promovimin e zgjidhjes paqësore të konflikteve, bashkëpunimin ndërkombëtar dhe të dialogut në trajtimin e sfidave të sigurisë, ku marrin pjesë liderë të shteteve anekënd botës.
Kryeministri Mustafa e informoi edhe për progresin që po arrihet në Kosovë, për reformat që po ndërmerr Qeveria e Kosovës në shumë fusha, duke filluar nga zhvillimi ekonomik, hapja e vendeve të punës, forcimi i shtetit ligjor dhe sigurisë dhe proceset integruese evropiane.
Ambasadori Wolfgang Ischinger vlerësoi lartë progresin që po arrihet në Republikën e Kosovës, duke shprehur përkrahje të mëtejshme për proceset në Kosovë.
Ambasadori Ischinger u interesua edhe për zhvillimet tjera në Kosovë dhe e ftoi kryeministrin Mustafa që të marr pjesë sërish në konferencën e radhës të Munihut për Siguri, që do të mbahet në fillim të vitit të ardhshëm.
Gjatë takimit u bisedua edhe për proceset tjera aktuale në Kosovë dhe në rajon.
- « Previous Page
- 1
- …
- 36
- 37
- 38
- 39
- 40
- …
- 47
- Next Page »