KOSOVË-2019-ta, VIT I EKONOMISË

January 16, 2019 by dgreca

-Kryeministri i Kosovës, Ramush Haradinaj: Agjencia Kosovare e Privatizimit, institucion i rëndësishëm në zhvillimin ekonomik të vendit. Drejtori menaxhues i Agjencisë Kosovare të Privatizimit, Valon Tolaj: Mbështetja e Qeverisë është shumë thelbësore/

Gazeta DIELLI nga korrespondenti në Kosovë Behlul Jashari/

PRISHTINË, 16 Janar 2019/ Viti 2019 është vit i ekonomisë, ka ritheksuar sot kryeministri i Republikës së Kosovës, Ramush Haradinaj, gjatë një vizite pune në Agjencinë Kosovare të Privatizimit (AKP), ku është pritur nga Bordi Drejtues i kryesuar nga u.d. kryesuesi i Bordit, Skender Komoni dhe Drejtori Menaxhues i AKP-së, Valon Tolaj.
Njoftimi i dërguar nga Qeveria thekson se, kryeministri Haradinaj është njoftuar me aktivitetet dhe sfidat e Agjencisë Kosovare të Privatizimit, poashtu udhëheqësit e Bordit prezantuan sfidat dhe vizionin për vitet në vazhdim, si dhe për asetet në pronësi shoqërore të cilat mund të trajtohen sipas Ligjit për Investime Strategjike.
Kryeministri Haradinaj, me këtë rast ofroi mbështetjen e Qeverisë së Kosovës, duke thënë se qëllimi i ardhjes në AKP është se AKP-ja është një institucion i rëndësishëm në zhvillimin ekonomik të vendit, menaxhon me asete që janë publike dhe po ashtu të gjitha veprimet e saj mund të ndikojnë direkt në dinamikat që po ndodhin në zhvillim ekonomik.

“Atë që kemi deklaruar, që është vit i ekonomisë, do të vërtetohet, do të ndodhë një nxitje ekonomike edhe më e madhe sesa e planifikuar”, tha kryeministri Haradinaj, duke shtuar se edhe në takimin që pati me kryetarët e komunave, ishte zhvillimi lokal ekonomik, është këtu dhe do të vazhdojë çdo ditë kështu.Drejtori menaxhues i Agjencisë Kosovare të Privatizimit, Valon Tolaj, tha se mbështetja e Qeverisë për AKP-në është shumë thelbësore dhe në funksion të kësaj falënderoi kryeministrin Haradinaj për mbështetjen, duke shprehur njëkohësisht gatishmërinë dhe vullnetin, që përveç obligimeve ligjore, që AKP të jetë bashkëpunëtore dhe të japë kontributin e saj në funksion të zhvillimit ekonomik të konceptit që Qeveria e ka proklamuar.“Do të japim maksimumin dhe do të rritin dinamikën e gjithë asaj që ne mund të ofrojmë në funksion vetëm të zhvillimit ekonomik dhe krijimit të vendeve të punës, si dhe thithjes së investimeve, qoftë të jashtme apo të brendshme”, tha drejtori menaxhues i AKP-së, Valon Tolaj.Bordi i Drejtorëve i Agjencisë Kosovare të Privatizimit (AKP) njoftonte në 26 nëntor 2018 se ka mbajtur një mbledhje të rregullt.“Në këtë mbledhje Bordi i Drejtoreve ka emëruar z. Valon Tolaj në pozitën Drejtor Menaxhues me mandat prej katër (4) vitesh. Mandati i z. Tolaj fillon me 26 nëntor 2018”, theksonte, mes tjerash, njoftimi i dërguar nga AKP.

AUSTRIA, MBËSHTETJE PËR KOSOVËN

November 6, 2018 by dgreca

-Kancelari i Austrisë, Sebastian Kurz: Zhvillimet pozitive në Kosovë dhe në tërë rajonin janë shumë me rëndësi për ne. Si kryesues i Presidencës së Bashkimit Evropian i kemi vendosur shtetet e Ballkanit Perëndimor në fokus/

1 ok Thaci-Kurz 5-Haradinaj-Kurz qeveri 3-Haradinaj-Kurz ok

-Presidenti Thaçi dhe kancelari Kurz: Marrëveshja Kosovë-Serbi sjellë paqe të qëndrueshme dhe stabilitet për tërë Ballkanin Perëndimor/

-Kryeministri Haradinaj: Austria mike e madhe e Kosovës dhe mbështetëse e fuqishme/

Gazeta DIELLI nga korrespondenti në Kosovë Behlul Jashari(Me shume foto gjeni ne fb (dielli vatra)

PRISHTINË, 6 Nëntor 2018/ Kancelari i Austrisë, Sebastian Kurz, në vizitën sot në Kosovë u prit në takime të ndara nga Presidenti i Republikës, Hashim Thaçi, dhe nga Kryeministri Ramush Haradinaj.

Presidenti Thaçi e ka falënderuar kancelarin Kurz për mbështetjen që Austria po i jep Kosovës në marrëdhëniet bilaterale dhe në arenën ndërkombëtare.

“Austria është duke vazhduar udhëheqjen e BE-së si kryesuese e radhës dhe gjatë gjithë kësaj periudhe ka bërë përpjekje për të promovuar perspektiven evropiane të shteteve të Ballkanit Perëndimor. Kosova është shteti më proevropian në rajon dhe e kemi bërë të qartë vizionin tonë për anëtarësim në BE dhe NATO. Prandaj, puna dhe angazhimi ynë për arritjen e këtyre qëllimeve mbeten konsistente. Kjo është arsyeja që ne duhet të punojmë me përkushtim për të përmbyllur reformat e brendshme, në ekonomi, të drejtësi, edukim, shëndetësi dhe në qeverisje të mirë”, u shpreh presidenti Thaçi.

Në kontekst të integrimeve euroatlantike, presidenti Thaçi ka thënë se marrëdhëniet e mira fqinjësore janë kushti thelbësor.

“Kosova ka ndërtuar raporte fqinjësore të mira me të gjitha shtetet fqinje. Po mundohemi maksimalisht që të ndërtojmë raporte korrekte edhe me Serbinë. Fatkeqësisht, Serbia dhe Bosnja e Hercegovina ende nuk e kanë njohur pavarësinë e Kosovës. Përkundër këtij fakti, Kosova mbetet thellësisht e përkushtuar për dialogun me Serbinë, për arritjen e një marrëveshje gjithëpërfshirëse, që nënkupton normalizimin e plotë të marrëdhënieve dhe pajtimin, që nënkupton njohjen reciproke dhe anëtarësimin e Kosovës në Organizatën e Kombeve të Bashkuara”, ka thënë presidenti Thaçi.

Në anën tjetër, kancelari austriak, Sebastian Kurz, theksoi se ka ardhur si Kancelar i Qeverisë Federale të Austrisë dhe si kryesues i Presidencës së Bashkimit Evropian për të theksuar mbështetjen për Kosovën.

“Zhvillimet pozitive në Kosovë dhe në tërë rajonin janë shumë me rëndësi për ne. Si kryesues i presidencës së BE-së i kemi vendosur shtetet e Ballkanit Perëndimor në fokus, sepse dëshirojmë që si rajon të gjitha shtetet të kenë një perspektivë evropiane dhe i mbështesim të gjitha shtetet e Ballkanit Perëndimor në këtë rrugë. Që të sigurohet paqe, liri dhe siguri në mënyrë afatgjate dhe të qëndrueshme në Ballkan është i rëndësishëm një dialog i suksesshëm ndërmjet Beogradit dhe Prishtinës dhe përmbyllja e suksesshme e këtij dialogu me një marrëveshje ndërmjet Kosovës dhe Serbisë”, u shpreh kancelari Kurz, duke kërkuar nga qytetarët e Kosovës që t’i përkrahin përpjekjet e lidershipit për forcimin e paqes në rajon.(Lexoje te plote (ne Gazeten Dielli www.gazetadielli.com) specialen e pergatite nga korrespondenti yne Behlul Jashari)

KOSOVA PO E NDËRTON ARKITEKTURËN E SIGURISË

October 22, 2018 by dgreca

-Kryeministri Ramush Haradinaj në Universitetin Amerikan të Kosovës (AUK): Kryeministri Haradinaj: Kosova po e ndërton arkitekturën e saj të sigurisë. Jo vetëm Kosova, por edhe rajoni ynë do të përfitojnë nga tranzicioni i Forcës së Sigurisë së Kosovës (FSK)/

1 Haradinaj ok FSK

PRISHTINË, 22 Tetor 2018-Gazeta DIELLI/“Tranzicioni i FSK-së po tregon rrugën e qartë dhe angazhimin e Kosovës drejt konsolidimit të shtetësisë, konsolidimit të arkitekturës së Sigurisë Kombëtare, si dhe kontributin rajonal për stabilitet dhe siguri”, kështu tha Kryeministri i Republikës së Kosovës, Ramush Haradinaj, gjatë ligjëratës së tij, para studentëve në Universitetin Amerikan të Kosovës (AUK).

Në fjalën e tij hyrëse para studentëve të pranishëm, ku ishin edhe Presidentja e këtij Universiteti, Sharon Hart, stafi, dhe kadetët e FSK-së, Kryeministri Haradinaj shpjegoi fazat e transformimit të FSK-së në ushtri, duke thënë se vendimi sovran së bashku me konsultimet gjithëpërfshirëse çuan në suksesin e procedimit të tri ligjeve mbi tranzicionin e FSK-së.
“Ishte një proces, jo një vendim i izoluar. Ky proces transparent e përgatitë Kosovën për rrugën e saj drejt anëtarësimit në NATO dhe i hapë rrugë që të kontribuojë më tej drejt paqes dhe stabilitetit nëpërmjet Operacioneve të Mbajtjes së Paqes”, tha Kryeministri Haradinaj.
Ndër tjerash, kryeministri Haradinaj u shpreh i bindur se Kosova do të bashkohet me NATO-n në vitet e ardhshme dhe prania e Aleancës Veri-Atlantike në Kosovë është e mirëpritur përgjithmonë, duke besuar se anëtarësimi në NATO për të gjitha vendet e rajonit është alternativa më e mirë drejt paqes, sigurisë dhe stabilitetit.“Jo vetëm Kosova, por edhe rajoni ynë do të përfitojnë nga tranzicioni i FSK-së, pasi zhvillimi i një ushtrie të vogël multietnike dhe profesionale do të rrisë sigurinë dhe stabilitetin rajonal, ajo shmang mundësinë e ndonjë vakuumi të sigurisë në Kosovë dhe kontribuon në përafrimin e vendit tonë me vlerat euroatlantike, lehtëson kalimin e Republikës sonë nga një konsumator i sigurisë tek një ofrues i saj, duke i përfaqësuar dhe mbështetur të gjitha komunitetet e Kosovës, lejon angazhim më të madh dhe bashkëpunim me KFOR-in dhe NATO-n, por edhe forcon ekonominë tonë. Kjo iniciativë do të krijojë 2500 vende të reja pune”, deklaroi Kryeministri Haradinaj.

Para të pranishmëve të shumtë të interesuar për ligjëratën e sotme, Kryeministri Haradinaj, shtoi se FSK pasqyron të vërtetën mbi Kosovën, është shtëpia e të gjitha komuniteteve, forcë profesionale, multietnike dhe e gatshme, e ndërtuar dhe trajnuar nën mbikëqyrjen e NATO-s që nga themelimi i saj. Për kontributin e madh në këtë çështje, Kryeministri Haradinaj falënderoi SHBA-në për trajnimin, arsimin dhe zhvillimin profesional të FSK-së, duke shtuar se FSK-ja perceptohet si institucioni më i besueshëm i sigurisë në vend gjatë gjashtë vjetëve të fundit.

Në përfundim të ligjëratës së tij, Kryeministri Haradinaj, foli edhe për orientimin aktual dhe të ardhshëm të FSK-së, e që siç tha ai, FSK-ja është një forcë e besueshme, përfaqësuese dhe e gatshme dhe se për të ruajtur këtë nivel të profesionalizmit, ajo duhet të vazhdojë dhe të rrisë bashkëpunimin e saj me SHBA dhe NATO.“Ndërtimi i FSK-së dhe tranzicioni i saj, është jetësor për të vazhduar zhvillimin e bazuar në standardet e SHBA-së dhe NATO-s në Doktrinën, Udhëheqjen, Sistemin e Armëve dhe Pajisjet”, vlerësoi Kryeministri Haradinaj, duke thënë se ndërtimi i kapaciteteve të plota do të zgjasë rreth 10 vjet dhe do të ndahet në tri faza.Duke folur rreth mandatit dhe tri projektligjeve për FSK-në, Ligji për Ministrinë e Mbrojtjes, Ligji për Forcën e Sigurisë së Kosovës, Ligji për Shërbimin e FSK-së, Kryeministri Haradinaj tha se Kosova do të respektojë plotësisht mandatin e misionit të KFOR-it, ndërsa FSK-ja do të vazhdojë të mbetet një institucion partner në KFOR./b.j/

DOM FRAN KOLAJ NDEROHET NGA KRYEMINISTRI HARADINAJ

October 16, 2018 by dgreca

DOM FRAN KOLAJ NDEROHET NGA KRYEMINISTRI RAMUSH HARADINAJ ME MEDALJEN E GJERGJ KASTRIOTIT-SKËNDERBEUT/-“Për kontributin e tij madhor në shërbim të atdheut dhe kombit, në kultivimin e vlerave të traditës shqiptare dhe në forcimin e unitetit të popullit tone”…./

Prifti i devotshëm për Atdhe e Fe, dom Fran Kolaj, ish famullitari i Kishës Katolike Shqiptare “ShënPali” në Detroit, tash Misionar në famullinë e Gllogjanit, është vlerësuar si Misionar atdhetar i përkushtuar.

Dom Fran Kolaj, është nderuar nga Kryeministri i Republikës së Kosovës, z. Ramush Haradinaj me medaljen simbol të Heroit Kombëtar. Lajmin e bëri të ditur në faqen e tij në facebook vetë Kryeministri z. Ramush Haradinaj, i cili shkroi: “Për kontributin e tij madhor në shërbim të atdheut dhe kombit, në kultivimin e vlerave të traditës shqiptare dhe në forcimin e unitetit të popullit tonë, pata kënaqësinë ta nderoj Dom Franë Kolaj me medaljen e Gjergj Kastriotit – Skënderbeut.”

Dom Fran Kolaj mbetet një mik e bashkëpunëtor i devotshëm i vatranëve në Shtetet e Bashkuara të Amerikës. Kur ishte në Famulline e Kishës së Shën Palit në Detroit ai bashkëpunoi ngushtësisht me degën e Vatrës atje. Po ashtu ai ka mbajtë marrdhënie të ngushta me Federatën Vatra, qendrën e saj në Nju Jork. Dom Frani ka marrë pjesë në shumë veprimtari të Vatrës dhe Diellit. Ai ishte pjesë edhe i koferencës shkencore kushtuar 100 vjetorit të gazetës Dielli, organizuar në qershor 2009 dhe në veprimtari të mëvonshme të Vatrës.

Dekorimi nga Kryeministri i Kosovës i dom Fran Kolaj është pritur shumë mirë nga shqiptarët e Amerikës, veçanërisht nga vatranët. Dega e Vatrës në Michigan komentoi me fjalë të ngrohta këtë vlerësim që Kryeministri Haradinaj i bëri misionarit të devotshëm për fe e atdhe. Vatranët e Michiganit shkruan në faqen e facebook-ut: I dashur Dom Fran Kolaj, urimet më të përzemërta për dekorimin tëvijnë nga vëllezërit dhe motrat tuaja, Vatranët në Michigan.
Medalja: Gjergj Kastrioti-Skënderbeu,- Kjo është një dekorate që Ju e keni merituar shumë kohë më parë,erdhi në kohën e duhur,dhe për këtë e falenderojmë shumë mikun tonë, Kryeministrin e Kosoves, Z Ramush Haradinaj”…

Edhe miqtë e tij po në Detroit, Alfons Grishaj dhe bashkëshortja Mirela Grishaj, e kanë pritur me gëzim këtë vlerësim të dom Fran Kolaj prej Kryeministrit të Kosovës. Ata komentuan vlerësimin e kryeministrit në fb: “Lavdia e Zotit ështëe pakufijshme. Meshtari atdhetar sjell fjalën e lavdishme tëHyut , dhe Kombit aureolen mbrojtëse. Ka gjëmëmadhështore se kjo?
Prandaj , pjesa e asaj aureole qe u djersit për Komb tëtakon dhe ty o miku ynë.
Prandaj ,falenderoj Kryeministrin Haradinaj për vlerësimin e lartëqëJu ka akorduar.
Mik i dashur , lutu per ne mekatnorët…!”
Alfons dhe Mirela Grishaj

Federata Vatra dhe Gazeta Dielli i përcjellin urimet më të ngrohta shërbestarit të Kombit dhe të Fesë dom Fran Kolaj duke besuar se kjo medalje e akorduar nga Kryeministri Ramush Haradinaj do ta kurajojnë atë për ta uar më tutje Misionin për Atdhe e Fe.(Dielli)

LUFTE NE PUBLIK MES PRESIDENTIT DHE KRYEMINISTRIT

October 8, 2018 by dgreca

Thaçi i shpall luftë Haradinajt, e sulmon për dialogun, lidhjet me Radojçiqin dhe veteranët/

Presidenti Hashim Thaçi e ka mbajtur edhe sot një konferencë për media, permes së cilës zgjodhi që t’ia kthejë një nga një publikisht të gjitha akuzat kryeministrit Ramush Haradinaj. Thaçi i bëri thirrje kryeministrit të jetë më racional dhe më i përgjegjshëm kur flet për dialogun. Ia përmendi edhe miqësinë me Milan Radojçiqin e Veriut dhe listat e fryra të veteranëve.

Presidenti Thaçi e nisi konferencën e sotme duke e përsëritur se nuk kanë qenë më shumë se 12 mijë pjesëtarë të UÇK’së dhe u bëri thirrje përfaqësuesve politikë të mos përzihen në çështje të drejtësisë, transmeton Express.

Kjo ishte vetëm pika e parë e deklaratës hakmarrëse që Thaçi ka përgatitur sot për kryeministrin Haradinaj, i cili vazhdimisht thotë se kanë qenë 50-60 mijë veteranë të UÇK’së dhe i cili ka kritikuar ashpër ish-prokurorin Elez Blakaj.
***

Haradinaj: Përgëzime dhe ngushëllime, ideja e kufijve ‘ka vdekur’

Kryeministri i Kosovës, Ramush Haradinaj, tha sot se ideja e korrigjimit të kufijve tashmë ‘ka vdekur’ dhe u ka shprehur ngushëllime atyre që kanë pasur pretendime për ndryshim të territoreve.“I shpreh ngushëllimet e mija për këtë ide të kufijve, pasi që mendoj se ka vdekur, dhe njëkohësisht edhe përgëzime”, ka thënë ai.

Ideja për korrigjimin e kufijve mes Kosovës e Serbisë është dhënë nga Presidenti Hashim Thaçi në gusht të këtij viti, ndërsa Haradinaj vazhdimisht e ka kundërshtuar këtë opsion.Ai pas dekorimit me hartën e artë për Elena Kadaren, është shprehur optimist sa i përket çështjes së liberalizimit të vizave.

***

Muharrem Nitaj: Thaçi t’i përmirësojë deklaratat e tij, jo Haradinaj

Zëdhënësi i Aleancës për Ardhmërnë e Kosovës, Muharrem Nitaj, ka reaguar ndaj kërkesave të fundit nga Presidenti i vendit Hashim Thaçi në drejtim të Kryeministrit Ramush Haradinaj.Derisa Thaçi ka kërkuar nga Haradinaj të përmirësojë deklarimet lidhur me korrigjimin e kufijve, Deputeti Nitaj në një prononcim për klankosova.tv, ka thënë se është vet presidenti ai që duhet korrigjuar deklarimet:

”Nëse në Kosovë ka një njeri që duhet t’i përmisojë deklaratat e tij për kufijtë, ai është vet presidenti Thaçi”, ka deklaruar ai përmes telefonit.

Presidenti Thaçi ka kërkuar nga Kryeministri Ramush Haradinaj t’i permisojë deklaratat e tij lidhur me korrigjimin e kufijeve, përndryshe shumë shpejt mund të ndërrohet pasi sipas tij Haradinaj po ndihet komod në karrigen e tij, njofton Klan Kosova.