Kosova nuk bisedon me askënd për Trepçën
-Kryeministri Isa Mustafa, në pyetjet e gazetarëve ka theksuar se Trepça assesi nuk do të shkoj në Bruksel dhe se qeveria e Kosovës me askënd nuk do të bisedojë lidhur me pronat e Republikës së Kosovës/
-Zgjidhja e afërt për Trepçën, në përputhje të plotë me interesat e qytetarëve të Kosovës/
Nga Behlul Jashari/ PRISHTINË, 15 Mars 2016/ Zgjidhja e afërt për Trepçën do jetë në përputhje të plotë me interesat e qytetarëve të Kosovës, tha sot kryeministri Isa Mustafa në një konferncë shtypi pas mbledhjes së qeverisë.
“Në vazhdën e punëve për të definuar statusin final të Trepçës, sot në mbledhjen e qeverisë është aprovuar vendimi për themelimin e Komisionit për Hartimin e Projektligjit për Trepçën, me një përbërje gjithëpërfshirëse”, theksoi ai.Kryeministri Mustafa tha se këtij komisioni i është dhënë detyrë që në afatin optimal t’i paraqes Ministrisë së Zhvillimit Ekonomik projektligjin, të kryhen pastaj të gjitha fazat e konsultimeve të brendshme dhe të jashtme, me të gjitha palët e interesuara për këtë ligj, dhe që ai të procedohet në qeveri dhe në Kuvendin e Republikës së Kosovës gjatë pjesës së parë, përkatësisht deri në mesin e këtij viti.
“Ligji do t’iu nënshtrohet të gjitha procedurave të rregullta dëgjimore dhe do të aprovohet në procedurë të rregullt në Kuvend dhe në qeveri. Ky Komision do t’i raportoj qeverisë lidhur me punën e tij dhe do të kemi bashkëpunim të ngushtë lidhur me këtë. Unë mendoj se themelimi i këtij komisioni për hartimin e projektligjit, paraqet hapin e fundit që qeveria po e ndërmerr në realizimin e premtimeve të saj që i ka dhënë për zgjidhjen afatgjate të statusit të Trepçës, e cila kompani tani gjendet nën qeverisjen e Agjencisë Kosovare të Privatizimit dhe ne do të dëshironim që gjatë këtij procesi të kemi të gjitha inputet edhe prej shoqërisë civile, qytetarëve, profesionistëve, në mënyrë që të gjejmë zgjidhjen më të mirë dhe më të qëndrueshme për Trepçën”, tha kryeministri.
Mustafa, po ashtu tha se së shpejti do të kenë informatë edhe nga Agjencioni Kosovar i Privatizimit lidhur me kërkesat e kreditorëve dhe lidhur me të gjitha borxhet për të cilat pretendohet se i ka Trepça.
“Jemi në koordinim me Agjencionin e Privatizimit se tani janë në përfundim termat e referencës për organizimin e punëve për Studimin e Fizibilitetit dhe të Strategjisë së Trepçës, i cili studim presim që do të përfundoj në vjeshtën e këtij viti. Ndërsa, në bashkëpunim me Kuvendin e Republikës së Kosovës, po ndërmerren masa për studime të rastit (case study), për raste të caktuara të firmave të tilla në shtete të ndryshme, qoftë të atyre në tranzicion apo të vendeve të tjera, se si ato i kanë zgjidhur në mënyrën më të mirë këto raste, të cilat ne do t’i marrim parasysh edhe gjatë procesit të hartimit të ligjit, por edhe në pikëpamje të organizimit dhe të funksionimit të mëtutjeshëm të kompanisë Trepça”, tha kryeministri.
Duke folur për këtë proces, kryeministri tha se po bëhen përpjekje që të kyçen të gjitha palët e interesuara.
“Kemi biseduar edhe me sindikatat, kemi biseduar me udhëheqjen e Trepçës, kemi biseduar me profesionistët e ndryshëm që e njohin këtë fushë, dhe besoj plotësisht që qeveria me kohë do të përfundojë ligjin për Trepçën, se minatorët do të jenë të kënaqur me zgjidhjen, të cilën do ta bëjmë, dhe po ashtu që zgjidhja do të jetë në interes dhe në harmoni me interesat e qytetarëve të Republikës së Kosovës dhe të gjithë atyre që janë të interesuar që ne ta aftësojmë, ta rigjenerojmë dhe ta revitalizojmë këtë kompani që është shumë e rëndësishme për ne”, u shpreh kryeministri.
Kryeministri Isa Mustafa, në pyetjet e gazetarëve ka theksuar se Trepça assesi nuk do të shkoj në Bruksel dhe se qeveria e Kosovës me askënd nuk do të bisedojë lidhur me pronat e Republikës së Kosovës.
“Trepça është pronë e Republikës së Kosovës, e sanksionuar me Kushtetutën e Republikës së Kosovës, dhe po ashtu është pronë e njohur edhe me Planin e Ahtisaarit, si bazë e rregullimit kushtetues të Republikës së Kosovës”, tha kryeministri Mustafa, duke bërë të ditur se ka biseduar edhe me ministrat serbë të kabinetit dhe duke shprehur bindjen e plotë se Kuvendi i Republikës së Kosovës do ta aprovojë ligjin i cili do të përgatitet dhe se ai do të jetë në interes të të gjithë qytetarëve të Republikës së Kosovës.
Mustafa: Kosovës vlerat e lirisë e demokracisë nuk mund t’ia rrënojë askush
– Kryeministri Isa Mustafa: Jemi të lumtur se Pavarësia e Kosovës tashmë është realitet, të cilin e kanë pranuar 111 vende, pjesë e të cilave janë vendet më të fuqishme, më demokratike e më të zhvilluara të globit- /
Nga Behlul Jashari/ Prishtinë, 17 Shkurt 2016/
Republika e Kosovës i ka përvetësuar vlerat e lirisë dhe të demokracisë të cilat nuk mund t’i rrënojë askush. Për këtë siguroi kryeministri i Republikë së Kosovës, Isa Mustafa, duke folur në ditëfeste, në parakalimin e kuadrateve të Forcës së Sigurisë së Kosovës dhe njësive të Policisë së Kosovës, me rastin e shënimit të 8-vjetorit të shpalljes së Pavarësisë së Kosovës.
Para të pranishmëve, kryeministri Mustafa tha se kjo ditë është kurorëzim i aspiratës për liri, pavarësi dhe demokraci, është ditë e përkujtimit të sakrificës së shumë gjeneratave që u flijuan për këtë ide dhe dëshmorëve e martirëve të vendit të bekuar. “Republika e Kosovës po e shënon Ditën e Pavarësisë në sheshin e komandantit të UÇK-së, Zahir Pajaziti, këtu pranë Ibrahim Rugovës, që me simbolikën e hapit të tij, shënon vizionin e ecjes përpara të këtij vendi, shënon rrugëtimin e vështirë por të vendosur të këtij populli, shënon miqësinë e përhershme me Shtetet e Bashkuara të Amerikës dhe orientimin euroatlantik të qytetarëve të Kosovës”, theksoi kreu i qeverisë kosovare.Kryeministri Mustafa u shpreh se, është kjo ecje mbi vështirësitë kah një e ardhme e sigurt.
“Jemi të lumtur se Pavarësia e Kosovës tashmë është realitet, të cilin e kanë pranuar 111 vende, pjesë e të cilave janë vendet më të fuqishme, më demokratike e më të zhvilluara të globit.
Jemi krenarë që Republika e Kosovës është shtet i gjithë qytetarëve të saj, është shtet i vlerave dhe përkushtimit të tyre, është një sukses i përbashkët i kosovarëve dhe aleatëve të tyre”, tha kryeministri kosovar.
Të gjithë, theksoi Mustafa, se bashku do t’i jemi përgjithmonë mirënjohës aleatëve perëndimor për përkrahjen e tyre për liri dhe shtetndërtimin tonë.
Kosovë-2016-ta, vit i ndryshimeve
*President Jahjaga’s 2016 New Year’s Message /
* Ambasadori amerikan Delawie: Do ta bëjmë suksesin e madh realitet në vitin 2016/
* Veseli: 2016-ta, qoftë një vit i mirëqenies dhe i mbarësisë /
* Mustafa: 2015-ta me suksese, 2016 vit i punës, shpresës dhe besimit/
PRISHTINË, 31 Dhjetor 2015/ Presidentja e Republikës së Kosovës, Atifete Jahjaga në mesazhin me rastin e Vitit të Ri 2016 shprehet se, ky vit që po e përmbyllim na dëshmoi se kemi shumë punë para nesh, shumë pritje për t’i përmbushur. “Megjithatë, ishte vit që na bashkoi në kërkimin e një Kosove ndryshe”, theksoi ajo.
Ne, vijoi Jahjaga, nuk jemi dorëzuar kurrë, as atëherë kur përndiqeshim, as tash kur lista e prioriteteve sa vjen e rëndohet.
“Nuk kam asnjë dyshim që me gjithë këtë forcë dhe kurajo dhe me dashurinë që të gjithë e ndjejmë thellë në zemrat tona për Kosovën shtetin tonë, viti 2016 do të jetë vit i ndryshimeve. Për një jetë me te mire”, tha presidentja kosovare.
Ne, shtoi ajo, kemi vlera të palëkundura, forcë të hatashme dhe parime të qarta. “Ato do te vazhdojnë të jenë udhërrëyesi ynë në këtë vit të ri”, përfundon Jahjaga me urimin gëzuar Vitin e Ri./b.j/
***
President Jahjaga’s 2016 New Year’s Message
Honourable citizens of the Republic of Kosovo
I wish you a very successful New Year, in good health, wellbeing, in comfort and abundance in your families.
The year we are leaving behind proves that there is still a lot of work ahead of us, lots of expectations to fulfil. However, it was a year which got us all together, in search for a different Kosovo.
We have never given up, not then when we were persecuted, and not now when the list of priorities keeps on getting longer and longer.
I have no doubt that with all this strength and love which we all feel deep in our hearts for Kosovo, for our state, that 2016 will be a year of changes. For a better life.
We have unwavering values, immense strength and clear principles. They will continue to be our guide during the New Year as well.
I wish you pleasant holiday and a Happy New Year.
***
Ambasadori amerikan Delawie: Do ta bëjmë suksesin e madh realitet në vitin 2016
PRISHTINË, 31 Dhjetor 2015-B.Jashari/Ambasadori i Shteteve të Bashkuara të Amerikës në Kosovë, Greg Delawie, në një mesazh të dërguar nga Ambasada në Prishtinë uron Vitin e Ri 2016 duke paralajmëruar realizimin e suksesit të madh.“Do të vazhdoj ta mbështes Kosovën në rrugën e saj si shtet shumetnik, demokratik, me një të ardhme në qendër të Evropës. Së bashku, ne do ta bëjmë suksesin e madh realitet në vitin 2016!”, thekson mesazhi i ambasadorit amerikan në Kosovë, për Vitin e Ri.
***
Veseli: 2016-ta, qoftë një vit i mirëqenies dhe i mbarësisë
PRISHTINË, 31 Dhjetor 2015/ Me rastin e Festës së Vitit të Ri, kryetari i Kuvendit të Republikës së Kosovës, Kadri Veseli, ka uruar të gjithë qytetarët e Republikës së Kosovës.
“Në prag të ndërrimit të motmoteve, qëndrova në familjen e Fadil Rexhepit në Gadime të Epërme të Lipjanit, veteran i UÇK-së. Olsës së vogël, e cila ishte fëmija i parë i lindur në Kosovë në vitin 2015, i urova ditëlindjen e saj të parë.
Me këtë rast, dëshiroj që në emër të Kuvendit të Republikës së Kosovës dhe në emrin tim, të gjithë qytetarëve tanë, grave dhe burrave, fëmijëve, të rinjve dhe të moshuarve, shërbyesve civilë, punëtorëve të sektorit privat dhe sipërmarrësve, arsimtarëve, studentëve, profesorëve universitarë, mjekëve, fermerëve, veteranëve të UÇK-së, familjeve të dëshmorëve, policëve dhe ushtarëve të Kosovës, qytetarëve me nevojave të veçanta, bashkatdhetarëve tanë kudo në botë, Gëzuar Viti i Ri 2016!
Qoftë një vit i mirëqenies në familjet tuaja dhe i mbarësisë në punë e shoqëri!”, thuhet në urimin e kryeparlamentarit Veseli.
Mustafa: 2015-ta me suksese, 2016 vit i punës, shpresës dhe besimit
PRISHTINË, 31 Dhjetor 2015-B.Jashari/Republika e Kosovës po e përmbyll edhe një vit me suksese, pavarësisht nga vështirësitë e saj, tha kryeministri Isa Mustafa, në mesazhin me rastin e Vitit të Ri 2016.“Nënshkruam Marrëveshjen e Stabilizim Asocimit, hap i madh i Kosovës në proceset integruese për zhvillimin e vendit”, theksoi fillimisht ai.
Ai theksoi se janë bërë reforma të mëdha, të cilat shtruan rrugën për rritje të qëndrueshme ekonomike dhe punësim, në vitet në vijim.
“Siguruam pensionet për veteranët e UÇK-së, rritëm ndjeshëm asistencën sociale dhe pensionet për prindërit tanë kontributdhënës, të cilët na sollën këtu ku jemi, me sakrifica të paimagjinueshme. Në vendin tonë vazhdon të dominojë optimizmi, vullneti, dashuria dhe solidariteti për njëri-tjetrin”, u shpreh Mustafa.
Gjatë këtij viti, vijoi ai, u ballafaquam me sfida dhe situata të paparashikuara, ishim dëshmitarë të tensioneve të rënda politike.
“Besoj shumë se është koha e duhur që të gjithë t’i kthemi traditës tonë mbresëlënëse politike të unitetit dhe konsensusit politik, në periudha të rëndësishme për vendin. Gjërat që na bashkojnë janë shumë më shumë sesa ato që na ndajnë”, tha kryeministri kosovar.
“Jemi në prag të liberalizimit të vizave, të avancimit të proceseve tjera integruese euroatlantike, të transformimit të FSK-së në Forcë të Armatosur të Kosovës. Vendet mike, në krye me SHBA-të, po bëjnë përpjekje maksimale që ta bëjnë Kosovën anëtare të Kombeve të Bashkuara”, theksoi kryeministri Mustafa.
Ai u shpreh besimplotë se Viti i Ri 2016, do të jetë vit i punës, shpresës dhe besimit. “Vit i mirëkuptimit tonë! Është çasti më i duhur që të reflektojmë së bashku dhe që me forcën e vullnetit me të cilën fituam lirinë dhe krijuam shtetin, të angazhohemi që ta bëjmë Republikën e Kosovës anëtare të denjë të familjes së madhe evropiane”, tha kryeministri kosovar, Mustafa.
Kosova përkrahet nga Banka Evropiane e Investimeve
-Kryeministri Mustafa: Reformat e Qeverisë po krijojnë kushte të favorshme për zhvillim ekonomik/Prishtinë, 8 dhjetor 2015/ Kryeministri i Republikës së Kosovës, Isa Mustafa, priti sot në takim zëvendësdrejtorin e përgjithshëm të Bankës Evropiane të Investimeve, Romualdo Massa Bernucci. Gjatë takimit, u bisedua për mbështetjen e Bankës Evropiane të Investimeve në projekte konkrete që lidhen me zhvillimin ekonomik në Kosovë, siç janë projektet në infrastrukturën hekurudhore, në efiqencën e energjisë, mbështetja e ndërmarrjeve të vogla dhe të mesme, si dhe përkrahja e sektorit privat përmes bankave komerciale në Kosovë. Kryeministri Isa Mustafa e njoftoi për progresin në Kosovë dhe për hapat e ndërmarrë nga Qeveria e Kosovës në zhvillimin ekonomik, me theks të posaçëm për reformat fiskale dhe stabilitetin financiar që është arritur.Kryeministri Mustafa, po ashtu, prezantoi orientimet e mëtejshme të Qeverisë dhe mundësitë e zhvillimit në të gjithë sektorët e ekonomisë. “Qeveria e Kosovës, gjatë kësaj periudhe, është përcaktuar që prioritet kryesor t’i jap zhvillimit ekonomik. Kemi bërë reforma të shumta sidomos të fushës fiskale, kemi miratuar në Qeveri Projektligjin për Investime Strategjike, i cili do të mundësojë investime të mëdha në Kosovë, kemi miratuar Ligjin për Garantimin e Kredive dhe një varg hapash të tjerë të cilët do të rezultojnë me krijimin e kushteve të favorshme për zhvillim ekonomik dhe hapje të vendeve të reja të punës”, tha kryeministri Isa Mustafa, duke përmendur edhe rëndësinë e marrëveshjes me FMN-në. Zëvendësdrejtori i Përgjithshëm i Bankës Evropiane të Investimeve, Romualdo Massa Bernucci, vlerësoi të arriturat e deritashme në Kosovë. Bernucci, gjatë takimit, shprehu përkrahjen e mëtutjeshme të Bankës Evropiane të Investimeve për projekte konkrete në Kosovë./b.j/