Gjatë Darkës Solemne të 110 Vjetorit të Gazetës”DIELLI” Konsullja e Përgjitshme e Republikës së Kosovës, ambasadorja Teuta Sahatçija, përcolli urimin e Kryeministrit të Kosovës z. Ramush Haradinaj.
Ja Letra-uruese, të cilën zonja ambasadore, pasi e lexoi, ia dorëzoi Editorit të Diellit, Dalip Greca.*
Redaksisë së Gazetës”DIELLI”
Federatës Pan-Shqiptare të Amerikës”VATRA”
New York, SHBA
Prot.Nr. 2424/2019
Datë: 6 Prill 2019
E nderuara redaksi e Gazetës”Dielli”
Të nderuar drejtues të Vatrës
Kam nderin e posacëm, që në emër të Qeverisë së Republikës së Kosovës dhe në emrin tim personal t’ju uroj 110 vjetorin e Lindjes së Gazetës”DIELLI”, Organ i Federatës Pan-Shqiptare të Amerikës “VATRA”.
Kjo gazetë, për më shumë se një shekull nuk pushoi së qenurit zë i shqiptarëve në Shtetet e Bashkuara të Amerikës, por edhe zë Mbrojtës i të drejtave të shqiptarëve kudo nëpër Botë.
Gazeta “DIELLI, ashtu siç e ka emrin, paraqiti dritën në kohën e errët, kur Perandoria Otomane ndalonte çdo fjalë shqipe. Ajo ndriçoi rrugën për krijimin e shtetit Shqiptar, avokoi dhe loboi fuqishëm në shtetin amerikan dhe krijoi miqësi që do të zgjasë përgjithmonë.
“Vatra” dhe “Dielli” vazhduan angazhimin e palodhshëm patriotik dhe ndihmën edhe në kohën kur Kosova kalonte kohët më të rënda dhe mbijetonte nën okupimin e egër të regjimit serb.
Ju, shqiptarët që jetoni e veproni në Amerikë, keni qenë dhe jeni krah i ‘Diellit”, kësaj ikone të gazetarisë. Prandaj dua të shfrytëzoj rastin dhe t’ju përgëzoj për angazhimin tuaj të pakursyer, e në veçanti dy personalitete të shquar, z. Harry Bajraktari dhe z. Ekrem Bardha,për kontributin e tyre të jashtzakonshëm.
Ju falenderoj për punën, angazhimin dhe lobimin e palodhshëm që asnjëherë nuk ka munguar.
Urime përvjetorin e 110-të!
Paçit dhe shumë shekuj të tjerë në shërbim të Kombit!
Sinqerisht
Ramush Haradinaj
Kryeministër i Republikës së Kosovës.
* Editori e falenderon Familjen Sahatçija për të gjithë mbashtetjen që i ka dhënë Gazetës si dhe për Kontributin familjar që ambasadorja dhe bashkshorti i saj, Dugagjini,dhanë në fushatën e 110 vjetorit të Diellit.