Kreu i Partisë Demokratike, Lulzim Basha, me rastin e 67-vjetorit të themelimit të NATO-s dhe 7-vjetorit të anëtarësimit të Shqipërisë në këtë aleancë, u ka dërguar shqiptarëve dhe aleatëve të vendit tonë një mesazh. “Në këtë ditë të shënuar për të gjithë vendet e Aleancës së Atlantikut të Veriut, deshiroj të uroj mbarë shqiptaret për përvjetorin e anëtarësimit në NATO. Me këtë rast ju shpreh të gjitha vendeve anëtare dhe veçanërisht aleatit tonë strategjik, SHBA mirënjohjen më të thellë të mbarë shqiptarëve për mbështetjen e jashtëzakonshme që i kanë dhënë Shqipërisë, para, gjatë dhe pas anëtarësimit. Si kryetar i PD-së shpreh krenarinë legjitime që në 8 vjet qeverisje kemi udhëhequr një proces historik reformash në fushën e sigurisë dhe të mbrojtjes, që u finalizuan me anëtarësimin në NATO (prill 2009), dhe me përmbushjen e angazhimeve teknike të antërarësimit (shtator 2013)”, lexohet në mesazhin e Bashës. Më tej, Basha kritikon qeverinë aktuale: “Dua të nënvizoj pa asnjë mëdyshje se PD i konsideron çështjet strategjike të sigurisë dhe mbrojtjes si tërësisht përtej interesave politike të ditës. Në këtë kontekst, shpreh shqetësimin por edhe angazhimin tim se do te bëjmë gjithçka të mundur për të ndalur prishjen e balancave kushtetuese; arrogancën e paprecedentë politike; mungesën e konsensusit; shpërdorimin propagandistik të burimeve, pronave dhe kapaciteteve të mbrojtje; uljen drastike të buxhetit me 50%, politizimin ekstrem të FA, dhe rrëshqitjen e Shqipërisë në fundin e listës së vendeve të NATO-s – ku fatkeqësisht e kanë katandisur pseudo reformat e dështuara në këtë fushë. Është për të ardhur keq që standardet e NATO-s janë përdhosur në këto tre vite veçanërisht në fushën e mbrojtjes, ku jo vetëm kemi rënie të buxhetit nga 2 përqind që është kërkesë e Aleancës në 0.87 % të GDP, por ku paratë e shqiptarëve shpërdorohen në mënyrë skandaloze për luks zyrash, apo vidhen me tendera të korruptuar, siç ka zbuluar Kontrolli i Lartë i Shtetit”. ”Politizimi, shkarkimet e padrejta dhe emërimet korruptive e klienteliste kanë sjellë si rezultat rënie të gatishmërisë së forcave tona të armatosura, trafikun me avionë të drogës, rikthimin e skafeve dhe cënimin e sigurisë kombëtare”, shtoi Basha.
MESAZH NGA NJU JORKU PER MOTRAT SHQIPTARE TE KOSOVES
Ne jemi me ju Motra Shqiptare në Kosovë!/
Fort të dashura Nëna dhe Motra shqiptare në Kosovë, ju që thundra e armikut barbar ju dëmtoi, vrau e ju shkatërroi jetën!
Kemi qenë e jemi me ju në këto ditë, kur mbarë opinioni në Kosovë po mbron Kauzën e dhimbjes tuaj. Bëhuni të forta motra shqiptare, e ardhmja është me ju me fëmijët e familjet tuaja.
Ne si Organizatë e Gruas Shqiptare – Amerikane me qendër ne New York – The Women’s Organization “Hope & Peace” gjithmonë ju kemi patur në zemër, kemi vuajtur nga larg me brengat e dertet tuaja. Nën moton e misionit tonë: “Stop Dhunës Ndaj Grave” kemi ngritur zërin për ju e hallet tuaja, e do të vazhdojmë të flasim në të gjitha institucionet Amerikane e Ndërkombëtare për të drejtat tuaja.
Persekutimi serb që ra padrejtësisht direkt edhe mbi Ju nga makineria serbe shënoi pa diskutim edhe Pavarësine e Kosovës. Me këtë rast falenderojmë SHBA, Anglinë e të gjitha vendet demokratike që i dhanë Paqen e Lirinë Kosovës.
Ju jeni Heroinat e Kombit tonë, popullit tonë. Jeni trimëreshat dardane që me heshtjen, inteligjencën, bukurinë e fisnikërinë tuaj i ngritët vlerat femrës shqiptare e duhet të trajtoheni si të tilla.
Ne gjithashtu firmosim peticionin që është përpiluar në Kosovë nga Ministria për Dialog Znj. Edita Tahiri e gjithë populli i Kosovës drejtuar Sekretarit të OKB -së Z. Ban Ki Moon.
Mbetemi me shpresë se do t’ju vizitojmë nga afër e do të meret në konsideratë persekucioni serb mbi ju nga ana e OKB-së.
Me respekt
Mimoza Dajçi
Themeluese e Organizatës The Women’s Organization “Hope & Peace”
SHBA
New York
(Njëherësh mbesë nga Familja e Boletinëve – Kosovë)
New York, Mars 2016
Rilindja në 30 dhjetor 2008: MESAZH ATYRE QË DUAN KUFIRIN NË MITROVICË
Nga Behlul Jashari/
Në përfundim të Vitit Historik 2008 të shpalljes së pavarësisë së Kosovës më 17 shkurt dhe njohjes nga 53 shtete, dhe më të fuqishmet në botë, po presim gëzuar Vitin e Ri 2009 të pritjesë së anëtarësimit të shtetit tonë të ri në OKB dhe të jubileut të 10-vjetorit të paqes e lirisë në Kosovë – të hyrjes së NATO-s, forcës më të madhe planetare.
Në Ditën e Lirisë e të Paqes, më 12 qershor 1999, kur NATO-ja hyri e nisi marshin fitimtar e çlirimtar në tokën e Kosovës për t’iu dhënë fund krimeve të tmerrshme e gjenocidit, nga kolona e tankeve të para, ku isha me ushtrinë e Aleancës Veriatlantike e gazetarë nga gjithë bota, atë mëngjes të gëzimit të madh shqiptar kemi qeshur me një grafit çmendie të shkruar nga forcat që po dëboheshin pas humbjes së luftës kundër lirisë, në një shpatull mali në Grykën e Kaçanikut: “Serbija do Tokio”.
Shkarravina, që përkthyer shqip thoshte “Serbija deri në Tokio” më rikujtoi grafitet “Shqiptarët përtej Bjeshkëve të Nemuna” dhe britmat “ikni përtej…” të atyre që me dhunën më të ergër dëbuan më se një milion shqiptarë nga Kosova.
Ata me operacionin “patkoi” kishin dashur ta zhbënin Kosovën, që duke vrarë e dëbuar shqiptarët, duke ua djegur e rrënuar shtëpitë, qytetet e fshatrat, të zhvendosnin kufirin shqiptaro-serb edhe përtej Bjeshkëve të Nemuna, siç e kishin zhvendosur para më shumë se një shekulli përgjakshëm nga Molla e Kuqe e kujtesës sonë historike.
Ata edhe më tej duan t’ua vënë flakën kufijve të Kosovës si në 19 shkurtin e 2008-tës në veri, duan të copëtojnë hartën e vendit që deshën ta zhbëjnë me gjenocid dhe tokëdjegie.
Ata edhe më tej shohin ëndrra të pamundshme, tash më 9 dhjetor 2008, kur në ditën e shtrirjes së EULEX-it në gjithë Kosovën, në veri të urës mbi limin Ibër në Mitrovicë pashë grafitin që përkthyer shqip thoshte “këtu është Serbi”.
Por, edhe ata të gjithë do ta kuptojnë, shumë prej tyre e kanë kuptuar, se ka ikur përgjithmonë koha e pretendimeve dhe e ëndrrave të këqija kundër Kosovës, se Kosova është shtet.
Le të jetë 2009-ta edhe viti i vetëdijësimit e besimit edhe të asaj pjese të vogël të shtetasve të Kosovës që janë kundër këtij shteti, se Kosova është edhe shtëpia e atdheu i tyre, i lirisë, paqes, mirëqenies, prosperitetit e garancive për të gjithë, i demokracisë, standardeve dhe ecjes drejt integrimeve euroatlantike.
Le të jetë 2009-ta viti i vetëdijësimit përfundimtar edhe të fqinjit tonë verior që ka mbetur i vetmi fqinj kundër shtetit të Kosovës, se kufijtë e Kosovës janë të vendosur e të garantuar edhe ndërkombëtarisht dhe se Kosova është shtet i pavarur, sovran e demokratik.
Shtet që rrezaton paqe, stabilitet e demokraci dhe që i ofron fqinjësi të mirë e bashkëpunim edhe shtetit nga i cili pret edhe kërkimfaljen për krimet e gjenocidin.
Grafitet, pretendimet e ëndrrat e këqija “Serbia deri në Tokio”, “Shqiptarët përtej Bjeshkëve të Nemuna”, “Kufiri në mes të Mitrovicës” e të tjera si këto e të kohëve që shkaktuan edhe tragjedi njerëzore le të mbesin përmendore të marrëzisë e të shkuarës, apo më mirë sikur të ishte e mundur le t’i fshijë përgjithmonë e bardha dëborë e dimrit që do të shkrijë derisa shkojmë drejt Vitit të Ri 2009 e pranverës së re, drejt kohëve të mira që vijnë për të gjithë.
Gëzuar!
***
SHËNIM I SOTËM, 11 GUSHT 2015
PRISHTINË, 11 Gusht 2015/ Shkrimi-editoriali MESAZH ATYRE QË DUAN KUFIRIN NË MITROVICË është botuar në gazetën tradicionale të Kosovës Rilindja në 30 dhjetor 2008, vitin historik të shpalljes së Pavarësisë së Kosovës në 17 Shkurt. Autori, kryeredaktor i parë-themelues i gazetës së përditshme Bujku nga18 janari 1991 dhe kryeradaktor i Rilindja në kohën e dëbimit të padrejtë e të kundërligjshëm që i bëri UNMIK gazetës tradicionale të Kosovës nga Pallati i Shtypit dhe deri në numrin e fundit.
Autori, Behlul Jashari sot tregon për gazetën Dielli: Edhe pas dëbimit në 21 shkurt 2002, deri në të cilën datë gazeta doli përditë, Rilindja nuk u ndal, si në kohën e luftës vazhduam të punojmë nëpër shtëpia. Botuam numra të jashtëzakonshëm dhe protestues të gazetës tradicionale të Kosovës, jo të përditshëm-të kohëpaskohshëm.
Gazeta Rilindja, kronikë e zhvillimeve historike të Kosovës, pasi doli me botime speciale edhe për ngjarjen historike të shpalljes së pavarësisë dhe njohjet ndërkombëtare që pasuan, ka përmbyllë daljet e mëse 40 numrave të jashtëzakonshëm të kohëpaskohshëm në 30 dhjetor 2008, me numrin festiv të Vitit të Ri 2009, me paralajmërimin në ballinë: DUKE BESUAR NË SUNDIMIN E LIGJIT NË SHTETIN E KOSOVËS PRESIM QË NGA NUMRI I ARDHSHËM RILINDJA TË DALË PËRDITË.
Kryetitulli në ballinën e gazetës Rilindja ishte i ëndërres dhe i të ardhmes: KOSOVA SHTET NË OKB. Dy nga titujt tjerë në ballinë: 53 SHTETE NJOHËN SHTETIN E KOSOVËS dhe VITI 2009 I SHQIPËRISË NË NATO.
Në kalendarin e gazetës Rilindja për Vitin 2009 ishte piktuara ekskluzive, e autorit Veli Blakçori: Molla e Kuqe. Te ajo mollë, sipas kujteses historike të shqiptarëve, ishte kufiri shqiptaro-serb para dëbimit të përgjakshëm të shqiptarëve nga Sanxhaku i Nishit e Toplica, para mëse 130 vjetëve (sa ishin në vitin e daljes së atij numri të gazetës Rilindja). Molla e Kuqe është si një mesazh atyre që duan të vendosin kufi në Mitrovicë, se nëse ndryshon kufiri – dihet ku ishte…
MESAZHI I KRYETARIT TE PLL, Z. SULEJMAN GJANA, DREJTUAR ELEKTORATIT
PLL del para elektoratit shqiptar për zgjedhjet vendore të 21 Qershorit 2015,- Si partia që ka dhënë një kontribut të paçmuar në të gjitha etapat e formimit të shtetit shqiptar, në favor të konsolidimit të institucioneve, të lirisë dhe demokracisë, për të gjithë shqiptarët, para LDB, gjatë diktaturës komuniste dhe gjatë gjithë periudhës tashmë të tejzgjatur të tranzicionit pas ndryshimeve politike të fillim-viteve 90.
- Si trashëgimtarja dhe bartësja e një filozofie dhe vizioni kombëtarist të drejtimit të shtetit në të gjitha nivelet e pushtetit, që inspirohet dhe bazohet në vlerat perëndimore, me një ideologji, program dhe përbërje njerëzore të së djathtës reale, që synon zhvillimin e vendit dhe të shoqërisë me politika, programe dhe projekte që kanë dhënë provat e tyre në historinë tonë por edhe në të gjitha vendet e qytetëruara.
- Si një parti me identitet të veçantë, që nuk pranon fatalitetin dhe mjerimin e imponuar për qytetarët shqiptar nga politika dhe politikat e dështuara të 25 viteve të fundit dhe që, ndryshe nga të tjerët, ka në epiqendër të veprimtarisë vet: popullin, kombin, shtetin, dhe jo thjesht pushtetin.
Sepse ne kemi bindjen se Shqipëria mund të bëhet!
Ne dalim para elektoratit shqiptar me bindjen se në vendin tonë, politika dhe politikanët duhet të jenë në shërbim të interesave të qytetarëve, JO për ti mashtruar ata, JO për t’i blerë, JO për t’ju kthyer shpinën nesër, JO për të fituar statuse, privilegje, pasuri apo imunitet, POR për t’i përfaqësuar ata denjësisht në shqetësimet, kërkesat, nevojat dhe të drejtat e tyre, që nuk mund t’jua mohojnë dhe injorojnë më interesaxhinjtë, oportunistët, demagogët dhe dallaveraxhinjtë që ndërtuan një sistem në shërbim të interesave të tyre, të klaneve të djeshëm dhe të sotëm, duke injoruar e nëpërkëmbur qytetarët, popullin, kombin dhe shtetin.
***
Me ndarjen e re territoriale dhe reformën administrative, si shumë qytetarë, PLL ka bindjen se, pushteti vendor do të jetë problematik, aq më tepër në kushtet kur kjo reformë nuk është shoqëruar nga paketa ligjore për funksionimin dhe kompetencat e bashkive të reja.
Dihet tashmë se pushteti qendror ka vendos ta gllabërojë edhe pushtetin vendor për të kontrolluar gjithçka dhe vendosur si të dojë me fondet publike.
Angazhimi i të gjithë shtetit dhe qeverisë në këtë fushatë nuk është një shenjë e mirë për demokracinë dhe funksionimin normal të një shteti sidomos kur mendojmë se kryeministri i vendit deklaron se disa njësi do ti shohë si të nënës dhe disa si të njerkës, dhe kur disa kandidatë për kryetar bashkie janë të përfolur si të inkriminuar.
Edhe pse opozita ka shfaqur performanca jo optimale në këtë fushatë dhe se partitë e djathta si ne, duhet të përballojnë pabarazinë e mjeteve si dhe besëprerjen nga aleatët tanë, ne jemi optimist dhe të vendosur sepse besojmë se qytetarët janë në gjendje të gjykojnë sot më mirë se dje.
Në zgjedhjet vendore të 21 Qershorit 2015, PLL ka bindjen dhe vullnetin që mund të ndryshohen kushtet e jetesës së qytetarëve shqiptar duke luajtut një rol vendimtar në Këshillat bashkiakë, në 61 Bashkitë e vendit, ku këshilltarët tanë do të jenë përfaqësuesit tuaj, ku do të sigurojmë mbrojtjen e interesave të përgjithshme të publikut, me vendosjen e prioriteteve në çdo vendim-marrje, ku shpenzimet publike do të shkojnë në dobi të publikut,
Për të stimuluar politika lokale të punësimit,
- Për t’i dhënë përparësi dhe mbështetje iniciativës së lirë dhe private duke stimuluar ndërmarrjet e vogla dhe garantuar tregje brenda dhe jashtë vendit për prodhimet e tyre,
- Për të garantuar projekte zhvillimi me institucione ndërkombëtare dhe bashki simotra në vende të ndryshme të botës dhe ku emigrantët shqiptar, djemtë dhe vajzat tona, mund të luajnë një rol vendimtar në krijimin e urave të bashkëpunimit në të gjitha fushat,
- Për të ofruar kushte njerëzore të kujdesit ndaj të sëmurëve, të moshuarve, të vobegëtve dhe të gjitha shtresave në nevojë,
- Për garantimin e kushteve optimale të arsimit dinjitar për të rinjtë e të rejat me investime publike jo vetën në infrastrukturë por edhe duke tërhequr mësuesit dhe pedagogët dhe stimuluar ata që të gjejnë kushtet e nevojshme dhe të barabarta në të gjitha institucionet e 61 bashkive të vendit,
- Për të trajtuar me përparësi problemin e pronave të pakthyera tek pronarët legjitim, aty ku pushteti lokal e ka në kompetencë të vet këtë çështje.
Ne jemi të vetëdijshëm se secila prej 61 bashkive të vendit ka specifikat e veta dhe se paraqiten kushte dhe mundësi të ndryshme dhe jo të barabarta në secilën prej tyre, por ekzistojnë gjithkund mundësi reale të zhvillimit kur kapacitetet e këshilltarëve të përdoren me devotshmëri, integritet, ndërgjegje dhe profesionalizëm.
Mjafton të ekzistojë vullneti i përfaqësuesve tuaj, i këshilltarëve që të angazhohen për t’i shërbyer interesit kolektiv të komuniteteve lokale.
Dhe ne ju garantojmë se këshilltarët e PLL do të jenë gjithmonë prezent për ju, do të jenë gjithmonë në shërbimin tuaj dhe të interesave tuaja sepse ne i kemi përzgjedhur ata ndër profesione, profile dhe eksperienca të ndryshme si dhe të të gjitha moshave dhe gjinive duke ju dhënë përparësi të rinjve dhe të rejave.
Andaj, më 21 Qershor 2015, ne ju bëjmë thirrje, që të votoni, që të mos impresionoheni nga presionet dhe mashtrimet, që të mos shisni dinjitetin tuaj, që të mos mbeteni peng i politikave dhe politikanëve matrapazë, por të votoni për veten tuaj, për familjet tuaja, për djemtë dhe vajzat tuaja, që të shohin një të ardhme më të mirë në vendin tonë, duke mbështetur kandidatët e PLL për këshillat bashkiakë, duke votuar Partinë Lëvizja e Legalitetit.
MESAZH DORJAN GRECES PAS DASMES SE MREKULLUESHME….
Nga Asllan BUSHATI/*
I dashur Dori, do të më falësh për stilin e pasqyrimin jo me nivel të shkrimit të më poshtëm, jo se nuk dua, por se unë nuk jam as gazetar dhe as gjuhtarë si Babai Juaj Dalip Greca në përshkrimin e ngjarjeve të bukura si ajo e dasmës tënde që përjetuam sonte në Rockleigh Country Club. Ai sigurisht që din shumë më mirë se unë ti përdori format gazetare dhe figurat letrare për t’i pasqyruar ngjarjet bukur , këndëshëm e me stil. Koha i ka gedhendur bukur shkrimet e tij në shumë faqe të shtypit të shkruar shqiptar, por vecanërisht në faqet e “Diellit”, me të cilat ne krenohemi.Por sot unë duke përdorur shprehje e fjali të zhargonit të përditshëm (ndoshta dhe të konsumuara), do te përpiqem të përciellë vetëm disa ndiesi të mijat dhe të disa vatranëve që morën pjesë në dasmën tuaj dhe të Kristinës.
Po e filloj nga organizimi i dasmës i cili me një fjalë të vetme mund të quhet thjeshtë –perfekt,. Ai nisi me ftesat e nisura që para gjashtë muajsh duke na thënë me kohë se”s’ka justifikim për mos pjesëmarrje”, ftesa të cilat ishin nga më të mirat që kemi patur rastin të shohim .Por jo vetëm kaq, ishte zgjedhur për dasëm një lokal i shkëlqyer, në një vend shumë të bukur dhe piktoresk. Na pritët hijshëm,me kultur dhe duke gërshetuar mirë traditën me qytetarinë , kulturën tonë shqiptare me kulturën e Amerikës. Dalipi e Xhemilja, motrat tuaja dhe Ju, familja Bardhecaj, Kristina e dashamirët e tyre, na pritën buzëgas e me ndienjë të thellë respekti në hyrje të restorantit dhe në cdo tavolinë , të cilën do ta ruajmë të pa harruar.
Ushqimi ishte i klasit të lartë si në sallën aperitive ,në restaurant dhe në pjesën vijuese për fruta e ëmbëlsira. Muzika e gërshetuar bukur live e me DJ, nga Kelmendi e në Camëri, nga Kosova e në Gjirokastër, nga Korca e në Lushnje, nga Ulqini e në Dibër, në një harmoni të plotë mbarshqiptare. Atmosfera e dasmës dhe muzika na bënë që për disa orë ,të harrojmë hallet e jetës kurbetqare dhe të mbushim zemrat me copëza gëzimi atdhetar. Në urimet per ju u ngritën dolli e shëndete nga Puka:Gjon Bucaj e Zef Balaj me bashkeëshortet; nga Kosova Agim Rexhaj e Marjan Cubi me bashkëshortet,; nga Mirdita Zef e Albert Pernocaj;nga Luma, Halit Daci e Mithat Gashi me familje;Idriz Lamaj me bashkeshorten Alma, Leke dhe Pashko Gojcaj nga Hoti shqiptar,Teki Gjonzeneli me bashkeshorten Filnlanda, Petrit Spiro me Enxhin, avokati shume i njohur shqiptar Ylber Dauti, Tana Vila nga Tirana, Vedat Kulla me Veren vajzen dhe dhendrrin,Sokol Prenjo Imeraj,Adem Belliu i TV KUTURA SHQIPTARE me te gjithe familjen,Nazo Veliu me Veiz Belliun dhe mbesen Kamila, nga Camëria,Perparim Likollari nga Permeti me Violeten, vajzen Blerina dhe dhendrin amerikan Maxhid, lushnjaret e shumte qe kishin ardhe edhe nga Kanadaj, presidentja e Komunitetit Shqiptar ne Kanda Aida Lumi Bejte em bashkshortin Arben, Viktor Haxhiu dhe Lindita, Kristaq Papa dhe Pavlina, Kristaq Foto dhe Entela, Dr. Irida Hasalla me Dr. Ermal Molla, Mereme Dervishi(Nezaj) me djalin Dritan dhe nusen Enkeleda, Luan Korershi me Mozen,fqinjet dhe kusherirat e Dalipit, Lavdije dhe Natasha, me bashkeshortet Zenel Hasalla dhe Arben Bilbili dhe femijet,krushqit e Dalipit nga Delvina Abaz dhe Donika Shehu, shoket dhe shoqet e tua, qe i dhane “zjarr” valleve, …dhe rrjeshti s’ka të ndalur por vazhdon me të gjitha trevat shqiptare.
Të dyja familjet, Greca e Bardhecaj na kënaqën e na gëzuan, Dori e Kristina na lumturun në atë amient të këndëshëm dhe në një local luksoz. Po të kisha mundësi shprehjen e më poshtëme do ta shkruaja mbi gurë (që të mos fshihej kurrë), në një faqe shkëmbi ku të thuhej:”U trashëgofsh Dorian Greca”. Por me qënëse nuk kam mundësi ta bëj një gjë të tillë, do ti lutem editorit të Diellit të ma botojë atë në on line dhe në print, që të mbetet si një dëshmi e datës 7 Qershor 2015,në mënyrë që vatranët dhe breznitë e ardhëshmë shqiptaro- amerikane të mund të bëjnë një dasëm të tillë kaq të pa harrueshme dhe ku shprehet me fakte se feja e shqiptarit është shqiptaria.
Urojmë (fjala jonë në vesh të perendisë), që Doriani e Kristina të trashëgohen, të kalojnë jetë të lumtur dhe fëmijët e tyre të bëhen shqiptaro-amerikanë të zot, për vehten e tyre dhe komunitetin. Bëfshin dasma si kjo e Dorit dhe e Kristinës.
Të thashë Dori që në fillim se nuk kam dell për gazetari,por sido që të jetë, miqt e mi vatranë dhe unë me familjen time të urojmë e të pëqafojmë shumë.
*Nënkryetari i Vatrës
Rockleigh Country Club. 7 Qershor 2015
Shenim: Keto radhe u shkruan shpejt e shpejt pas kthimit nga dasme qe u be ne Nju Xhersi,ora duhet te kete qene 2 e nates.Koha nuk qe e mjafte sepse me priste udhetimi me aeroplan drejt Tiranes, udhetim qe e kisha shtyre per shkak te dasmes tende Dorjan! Te trashegohesh!